!- தமிழில் - தொழில்நுட்பம் -!

தமிழ்நுட்ப டிவிட்டுகள் 01-02-2010 முதல் 07-02-2010 வரை

2010-02-07T20:56:00.000-08:00

சென்ற வாரத்தில் ட்விட்டரில் நான் பகிர்வதை, குறிப்பிட்ட நாள்களுக்கு ஒரு முறை ஒரு இடுகையாக இந்த வலைப்பதிவில் பகிர போவதாக கூறி இருந்தேன். நான் டிவிட்டுவது பெரும்பாலும் ஆங்கில சுட்டிகளுடன் கூடிய தகவலாகத்தான் இருக்கும். எனவே வரவேற்பை பெறுமா என்ற சந்தேகம் இருந்தது.

ஆனால் ட்விட்டர் பரிட்சயம் இல்லாத நண்பர்கள் இந்த முறையை அதிகம் வரவேற்றனர். சென்ற வாரம் வேலைப்பளுவால் இணையத்தில் அதிகம் வாசிக்க முடியவில்லை. குறைவாகவே டிவிட்ட முடிந்தது. அந்த சில டிவிட்டுகள் இதோ.

எனது ட்விட்டர் முகவரி : http://twitter.com/tvs50

யாரவது லஞ்சம் கேட்டால் அவர்களுக்கு ஜீரோ ருபாய் நோட்டுகளை கொடுத்து பாருங்கள். 5th Pillar அமைப்பின் அதிரடி யோசனை. http://goo.gl/uqpC

ஐபிஎல் 2010 மேட்ச் ஸ்கோர் மற்றும் தகவல்களை இலவசமாக உங்கள் மொபைலில் பெற கூகிள் SMS சேனல். Subscribe http://goo.gl/RlPx

காதலர் தினத்திற்காக கணினியை காதலில் நிரப்ப 42 அட்டகாசமான வால் பேப்பேர்கள். லவ் பீலிங்க்ல உள்ளோருக்கு பிடிக்கும். http://goo.gl/epkh

பார்த்து ரசிக்க பெரிய படங்களை தருவதில் Boston.com பிரபலம். இந்திய பெருமை கூறும் 'கலர்புல் இந்தியா' படங்கள். http://goo.gl/Ympd

இணைய இணைப்பு இல்லாத கணினிகளில் மைக்ரோசாப்ட் ஆபீஸ் , விண்டோஸ் மென்பொருள்களை அப்டேட் செய்யலாம். http://goo.gl/tLCV

மொபைலில் தமிழ் கொணர எழுதி இருந்தேன். எனக்கு ஐபோன் அனுபவம் இல்லை. அதில் தமிழ் கொணர பிகேபி எழுதியுள்ள இடுகை http://goo.gl/94co

உங்கள் கணினியை மெதுவாக்கும் தற்காலிக கோப்புகளை கண்டறிந்து அழிக்க இலவச மென்பொருள் சிஸ்டம் கிளீனர். http://goo.gl/HVRx

தயாரிப்பில் இருக்கும் குரோம் ஓஎஸ் டேப்லெட் கணினி வடிவம் எப்படி இருக்கும். கூகுளின் தளத்தில் படம், வீடியோ வெளியீடு http://goo.gl/JmqX

வரப்போகிறது நல்ல செய்தி. 500 ரூபாய்க்கு நோக்கியா போன். மேலும் பலரிடம் செல்பேசி தொழில்நுட்பத்தை கொண்டு செல்லும். http://goo.gl/3V7l

இன்டர்நெட் எக்ஸ்ப்ளோரர்தான் உலகில் அதிகமாக பயன்படுத்தப்படும் இணைய உலாவி IE - 62.12%, Firefox – 24.43%, Chrome - 5.22% http://goo.gl/b2t6

வழக்கமா சீனாதான் காப்பி அடிக்கும். 'ஆப்பிள் ஐபேட் எங்கள் தயாரிப்பை காப்பி அடித்து விட்டது' - சைனா நிறுவனம் கவலை. http://goo.gl/shiv

லேண்ட்லைன் பயனர்களுக்கு காதலர்தின சலுகை. எந்த ஏர்டெல் லோக்கல், எஸ்டிடி நம்பருக்கும் பிப்ரவரி 7,14,21 நாட்கள் இலவசம். http://goo.gl/6lIv

இணையப் பயனர் சந்தையை குறிவைத்து ஆப்பிள் ஐபேடுக்கு போட்டியாக வரவிருக்கும் மற்ற நிறுவன தயாரிப்புகள். http://goo.gl/dtaw

ஆப்பிளின் ஐபேட் காமெடி தொடர்கிறது. சமீபத்தில் ரசித்து சிரித்த ஐபேட்டை கிண்டல் செய்யும் காமெடி வீடியோ http://goo.gl/OaFA

தொடர்புடைய இடுகைகள்

தமிழ்நுட்ப டிவிட்டுகள் 21-01-2010 முதல் 31-01-2010 வரை

பிளாக்கரில் சுருக்கத்தை காட்ட 'மேலும் வாசிக்க' வசதி

2010-02-07T10:26:00.000-08:00

நமது வலைப்பதிவு வேகமாக திறக்கும்படி அமைத்து இருந்தால்தான் வாசிப்பவர்கள் விரும்புவர். சில வலைப்பதிவுகள் திறக்க நேரம் பிடிக்கும் போது அவற்றை வாசிக்காமல் / தொடர்ந்து செல்லாமல் விட்டு விடுவதுண்டு. அணுகுவதற்கும் எளிமையாக இருக்க வேண்டும்.

நாம் எவ்வளவுதான் சிறப்பாக எழுதி வந்தாலும் நமது வலைப்பதிவின் வடிவமைப்பு சரியில்லாமல் இருந்தால் / திறக்க அதிக நேரம் பிடித்தால் வாசிப்பவர் நமது தளத்திற்கு தொடர்ந்து வருவதை விரும்ப மாட்டார். RSS செய்தியோடை போன்ற மாற்று வழிகளில் வாசிப்பார். அல்லது வாசிப்பதை நிறுத்தி விடுவார்.

இந்த வகையில் நமது வலைப்பதிவை வாசிக்க வருபவர்களுக்கு நல்ல வடிவ / சூழ்நிலையை உருவாக்கி கொடுக்க வேண்டும். 'ஆள் பாதி. ஆடை பாதி' என்பதை போல மக்களை கவருவதில் ஒரு வலைப்பதிவின் வடிவமைப்பும் முக்கிய பங்காற்றுகிறது. எழுதுவதில் நேரத்தை செலவழிப்பது போல வலைப்பதிவை வடிவமைப்பதற்கும் சிறிது நேரம் ஒதுக்கலாம். சில மணி நேரங்கள் செலவழித்தாலே நமது வலைப்பதிவிற்கு நல்ல வடிவமைப்பை கொடுத்து விடலாம்.

பெரும்பாலும் நமது வலைப்பதிவின் முகப்பில் அதிக இடுகைகள் தோன்றும்படி வைத்து இருப்போம். உதாரணத்திற்கு முகப்பு பக்கத்தில் ஏழு இடுகைகள் வரும்படி வைத்து இருப்பதாக கொள்வோம். ஒவ்வொரு இடுகையும் முழுமையாக தோன்றும்.

இதனால் வரக்கூடிய பின்னடைவு என்னவெனில் உங்கள் வலைப்பதிவை வாசிப்பவர் திறக்கும் போது ஏழு இடுகைகளும் அதில் உள்ள படங்களும் தோன்றுவதற்கு அதிக நேரம் பிடிக்கும். கடைசியாக உள்ள ஏழாவது இடுகையை பார்க்க வேண்டுமெனில் வாசிப்பவர் ஸ்குரோல் (Scroll) செய்தே ஓய்ந்து போவார்.

இதனால் பலர் முகப்பு பக்கத்தில் ஒரே ஒரு இடுகை மட்டும் தோன்றும்படி அமைத்து இருப்பர். இதில் உள்ள பின்னடைவு என்னவெனில் வாசிப்பவர் அடுத்தடுத்த இடுகைகளை பார்க்க நினைக்கும் போது 'Older Posts' கிளிக் செய்து ஒவ்வொரு இடுகையாக பார்க்க வேண்டி வரும். கிளிக். கிளிக்.. கிளிக்... ஆனால் ஒரே பக்கத்தில் ஏழு இடுகைகள் இருக்கும் போது வாசிப்பவர் எளிதாக வேண்டுமென்ற இடுகையை தேர்ந்தெடுத்து வாசித்து கொள்ளுவார்.

இப்போது ஓரளவுக்கு தீர்வு என்னவென்றால் முகப்பு பக்கத்தில் அதிக இடுகைகளையும் காட்ட வேண்டும். அதே நேரம் பக்கமும் சுருக்கமாக வேகமாக திறக்கும்படி இருக்க வேண்டும். இதனை எப்படி அமைப்பது?. அதற்கு ஒவ்வொரு இடுகையின் சுருக்கத்தையும் சிலவரிகள் காண்பித்து அவர் மேலும் வாசிக்க விரும்பினால் 'மேலும் வாசிக்க' என்ற சுட்டி மூலம் அந்த இடுகையை தனிப்பக்கத்தில் திறக்க வழி செய்தால் நன்றாக இருக்கும். உங்கள் வலைப்பதிவின் வடிவமும் பார்க்க அருமையாக இருக்கும்.

எளிதாக சொல்ல வேண்டுமெனில் நமது இந்த வலைப்பதிவை எடுத்து கொள்ளுங்கள். முகப்பு பக்கத்தில் ஏழு இடுகைகள் தோன்றும்படி வைத்து உள்ளேன். ஒவ்வொரு இடுகையிலும் அதன் சில வரிகள் மட்டும் தோன்றும். எளிதாக ஸ்க்ரோல் (Scroll) செய்து அனைத்து இடுகைகளையும் பார்த்து கொள்ள முடியும். வாசிப்பவர் குறிப்பட்ட இடுகையை தேர்ந்தெடுத்து முழுமையாக வாசிக்க விரும்பினால் அதன் 'மேலும் வாசிக்க' எனும் சுட்டியை கிளிக் செய்து முழு இடுகையை வாசித்து கொள்ளலாம். வலைப்பதிவு வேகமும் நன்றாகவே உள்ளது.

இது போன்று உங்கள் வலைப்பதிவுலும் செய்ய விரும்பினால் இந்த இடுகையை தொடர்ந்து படியுங்கள்.

இதனை செய்ய உங்கள் பிளாக்கரின் டாஷ்போர்டு (Dashboard) சென்று கொள்ளுங்கள். அங்கே Layout --> Edit HTML சென்று தோன்றும் பக்கத்தில் 'Expand Widget Templates' என்ற ஆப்சனை தேர்வு செய்து கொள்ளுங்கள். கீழே உங்கள் பிளாக்கின் வார்ப்புரு நிரல் கிடைக்கும். அதில் <data:post.body/> என்பதனை தேடுங்கள். அதன் கீழே கீழ்காணும் வரிகளை இணைத்து விடுங்கள்.

<b:if cond='data:post.hasJumpLink'>
<div class='jump-link'>
<a expr:href='data:post.url + "#more"' style='float:right;'><data:post.jumpText/></a>
</div>
</b:if >

இப்போது 'Save Template' கிளிக் செய்து உங்கள் வார்ப்புருவை சேமித்து கொள்ளுங்கள்.

அடுத்து Layout --> Page Elements சென்று கொள்ளுங்கள். தோன்றும் வடிவமைப்பு பக்கத்தில் 'Blog Posts' என்ற பகுதியில் 'Edit' கிளிக் செய்து கொள்ளுங்கள்.

அடுத்து தோன்றும் பக்கத்தில் 'Post page link text:' என்ற பகுதியில் 'Read more' என்ற வாசகம் தோன்றும். அதனை அழித்து விட்டு 'மேலும் வாசிக்க' என்று கொடுத்து 'Save' கிளிக் செய்து கொள்ளுங்கள். வார்ப்புருவை பொறுத்தவரை உங்கள் வேலை முடிந்தது.

இனி நீங்கள் ஒவ்வொரு இடுகை இடும்போது கடைப்பிடிக்க வேண்டி வழிமுறை ஒன்று உள்ளது. நீங்கள் இடுகை எழுதும் பக்கத்தில் தோன்றும் பிளாக்கர் டூல்பாரில் வலது மூலையில் காகிதம் இரண்டாக கிழிந்ததை போன்ற ஒரு பட்டனை நீங்கள் கண்டிருக்கலாம். அதன் பெயர் 'Insert jump break' .

நீங்கள் இடுகை எழுதும் போது அதனை கிளிக் செய்வதன் மூலம் உங்கள் இடுகையை நீங்கள் இரண்டாக பிரித்து கொள்ளலாம். அதனை கிளிக் செய்தால் கர்சரை நீங்கள் வைத்துள்ள இடத்தில் ஒரு கோடு தோன்றும். அந்த கோட்டிற்கு மேலுள்ள பகுதி மட்டும் முகப்பு பக்கத்தில் சுருக்கமாக தோன்றும். அந்த கோட்டிற்கு கீழ் உள்ள பகுதி அந்த இடுகையின் தனிப் பக்கத்தில் தோன்றும்.

முக்கியமான குறிப்பு : மேலே குறிப்பிட்ட பட்டன் பிளாக்கரில் புதிய எடிட்டர் கொண்டுள்ளவர்களுக்கு மட்டுமே தோன்றும். புதிய எடிட்டர் இல்லாதவர்கள் அதனை உயிர்ப்பிக்க (Enable) Settings --> Basic கிளிக் செய்து கொள்ளுங்கள். தோன்றும் பக்கத்தில் கீழே வாருங்கள். அங்கே 'Global Settings' என்பதில் 'Updated editor' என்ற ஆப்சனை தேர்வு செய்து கொண்டு 'Save Settings' கிளிக் செய்து கொள்ளுங்கள். இதனால் நீங்கள் பதிவுகள் போடும் பக்கத்தில் புதிய வசதிகளுடன் கூடிய எடிட்டர் தோன்றும்.

சரி. மேலே குறிப்பிட்ட படி பட்டனை கிளிக் செய்து முகப்பில் தெரிய வேண்டிய பகுதியை தனியே பிரித்து இருப்பீர்கள். இப்போது 'Publish Post' செய்து பாருங்கள். உங்கள் பிளாக்கின் முகவரியை திறந்தால் நீங்கள் கோடிட்ட பகுதிக்கு மேலுள்ள வரிகள் மட்டும் முகப்பில் தோன்றும். அத்துடன் அதன் கீழே 'மேலும் வாசிக்க' என்று ஒரு சுட்டி வந்து இருக்கும்.

இதே போன்று ஒவ்வொரு இடுகை இடும் போதும் செய்யுங்கள். ஏற்கனவே எழுதி உள்ள இடுகைகளுக்கு செயல்படுத்த விரும்பினால் Posting --> Edit Posts செய்து ஒவ்வொரு இடுகையாக மாற்றி கொள்ளுங்கள். இந்த வசதி மூலம் நீங்கள் உங்கள் வலைப்பதிவின் முகப்பில் அதிக இடுகைகளை உங்கள் வலைப்பதிவின் வேகம் குறைவில்லாமல் தோன்ற செய்து கொள்ள முடியும்.

செயல்படுத்துவதில் சிரமங்கள் இருந்தால் பின்னூட்டத்தில் கேளுங்கள். உங்கள் வலைப்பதிவில் செயல்படுத்தினால் அதன் முகவரியையும் பின்னூட்டத்தில் போடுங்கள். அதனை பார்த்தால் எழுதியது பிறருக்கு பயன்பட்டதற்கான திருப்தி எனக்கு கிடைக்கும் :)

தொடர்புடைய இடுகைகள்

இணையதளங்களின் கட்டாய பதிவில் இருந்து தப்பிக்க

2010-02-06T08:42:00.000-08:00

சில இணையதளங்கள் தனது மேலதிக சேவைகளை பெறுவதற்கு பதிவு செய்வதனை கட்டாயமாக்கி இருக்கும். சில தளங்கள் பதிவு செய்கிற மின்னஞ்சலை ஆக்டிவேட் செய்ய சொல்லி பொறுமையை சோதிக்கும். அந்த தளங்களில் பதிவு செய்வதற்குள் அந்த தளத்தை காணும் ஆர்வமே போய் விடும்.

அவசரத்தில் ஒரு தகவலை தேடும் நமக்கு இது பெரும் சோதனைதான். இப்படி நாம் செல்லும் பதிவை கட்டாயமாக்கும் தளங்களின் சங்கடங்களில் இருந்து தப்பிக்க ஒரு தளம் வழி செய்கிறது. பதிவு செய்யாமலேயே ஏற்கனவே உள்ள பயனர் கணக்குகளை கொடுத்து லாகின் செய்து கொள்ள முடியும்.

BugMeNot.com - இந்த தளத்தில் பயனர்கள் பகிர்ந்து கொண்ட பல தளங்களின் பயனர் கணக்குகள் உள்ளன. அவற்றை நீங்கள் உங்களுக்கு தேவைப்படும் தளங்களில் பயன்படுத்தி கொள்ளலாம். அந்த தளத்திற்கு சென்று நீங்கள் வேண்டும் தளத்தின் பெயரை கொடுத்து 'Get Logins' கிளிக் செய்யவும்.

அந்த தளத்தின் பல பயனர் கணக்குகள், பாஸ்வோர்ட் பட்டியலிடப்படும். அவற்றில் ஒன்றை தேர்ந்தெடுத்து உபயோகிக்கவும். அதில் வரும் எல்லா பயனர் கணக்குகளும் வேலை செய்யும் என்று கூற முடியாது. ஆனால் சில கணக்குகள் வேலை செய்கிறது.

நீங்கள் பயர்பாக்ஸ் இணைய உலாவி உபயோகிப்பவராக இருந்தால் இந்த வசதியை மிகவும் எளிமையாக ஒரு நீட்சி (Extension) மூலம் பயன்படுத்தலாம். அந்த நீட்சியை இந்த சுட்டியில் சென்று தரவிறக்கி நிறுவி கொள்ளுங்கள். இனி நீங்கள் வேண்டும் தளத்தின் லாகின் பக்கத்திற்கு செல்லும் போது, அங்கே வலது கிளிக் செய்து கொண்டு 'Login with BugMeNot' என்பதனை தேர்ந்தெடுத்து கொள்ளவும். தானாக பயனர் கணக்கு உள்ளீடு செய்யப்படும்.

இது அனைத்து தளங்களிலும் வேலை செய்கிறதா என்றால், இல்லை. நான் ஐந்து தளங்களில் பல்வேறு பயனர் கணக்குகளை பயன்படுத்தி பார்த்தேன். மூன்று தளங்களில் சரியாக லாகின் செய்ய முடிந்தது.

தொடர்புடைய இடுகைகள்

கோப்பு பகிர்தலை எளிமையாக்கும் டோரன்ட் நுட்பம்

2010-02-02T02:05:00.000-08:00

இணையத்தில் உலவுபவர்களுக்கு நல்ல பரிட்சயமான வார்த்தை 'டோரன்ட்'. பெரும்பாலான வீடியோ பகிர்ந்து கொள்ளும் தளங்களில் கோப்புகளை டோரன்ட் வடிவில் வழங்குவதை நீங்கள் கண்டிருக்கலாம். அந்த கோப்புகளை தரவிறக்கினால் அவை மிகச்சிறிய அளவிலேயே இருக்கும்.

அதனை திறக்கும் போது வீடியோ ஓட வில்லையே என்று பலர் திகைப்பதுண்டு. டோரன்ட் மூலம் வீடியோக்களை / பெரிய கோப்புகளை தரவிறக்குவது எப்படி? என்று இணைய புதியவர்கள் பின்னூட்டத்திலும், ஈமெயில் மூலமாகவும் நீண்ட நாட்களாகவே கேட்டு வருகிறார்கள். அதனைப் பற்றி மற்ற பதிவர்களின் சுட்டிகளுடன் இந்த இடுகையில் பார்ப்போம்.

டோரன்ட் என்பது உங்களிடம் உள்ள கோப்புகளை உன்லகெங்கும் மற்றவர்களிடையே பகிர்ந்து கொள்ளும் வசதி. சாதாரணமாக தளங்களில் இருந்து கோப்புகளை தரவிறக்கும் போது அந்த கோப்புகளை ஏற்தாவது ஒரு இணைய வழங்கியில் (Web Server) சேமித்து வைத்து இருப்பார்கள். அங்கிருந்து நீங்கள் அவற்றை பெறுவீர்கள்.

ஆனால் டோரன்ட்களில் உலகெங்கும் நீங்கள் தரவிறக்கும் கோப்புகளை கொண்டுள்ள கணினிகள் இணைய இணைப்பில் இருக்கும் போது இணைக்கப் பட்டிருக்கும். நீங்கள் மற்றவர் கணினியில் இருந்து அந்த கோப்பினை தரவிறக்கி கொண்டிருப்பீர்கள். உங்கள் கணினியில் உள்ள அந்த கோப்பின் பகுதிகள் மற்றவர்கள் தரவிறக்க உங்கள் கணினியில் இருந்து அனுப்பப் பட்டு கொண்டிருக்கும்.

இந்த அருமையான தொழிநுட்பம் மூலம் அதிக செலவு பிடிக்கும் இணைய வழங்கியின் தேவை இன்றி பயனர்களே தங்கள் கணினிகளை கோப்பினை மற்றவருக்கு பகிரும் வழங்கி ஆகவும், தரவிறக்கும் பயனராகவும் பயன்படுத்தி கொள்ள முடிகிறது.

டோரன்ட்களின் தொழில்நுட்பம் பற்றி அறிந்து இருந்தாலும் அதனை தமிழில் புரியும்படி விளக்குவது எனக்கு பெரிய சவாலாகவே இருந்தது. பதிவர் சுடுதண்ணி டோரன்ட் குறித்து எளிமையாக அனைவருக்கும் புரியும்படி மூன்று இடுகைகள் எழுதி உள்ளார். டோரன்ட் பற்றி தமிழில் இதை விட சிறப்பாக யாரும் எழுத முடியாது எனும் வண்ணம் அந்த இடுகைகள் உள்ளன. டோரன்ட் பற்றி புரிந்து கொள்ள அந்த இடுகைகளை கண்டிப்பாக படியுங்கள். இடுகை1, இடுகை2, இடுகை3.

படிச்சாச்சா? இந்த இடுகையில் பிரபலமான UTorrent செயலி பயன்படுத்தி டோரன்ட் மூலம் கோப்புகளை தரவிறக்குவது எப்படி? என்று பார்ப்போம். டோரன்ட் மூலம் தரவிறக்க பல்வேறு செயலிகள் உதவினாலும் மிகச் சிறப்பானதாக யுடோரன்ட் செயலி விளங்குகிறது.

இதனை யுடோரன்ட் தளத்திற்கு சென்று தரவிறக்கி உங்கள் கணினியில் நிறுவி கொள்ளுங்கள். நிறுவிய பின் யுடோர்ரன்ட் டாஸ்க் பாரில் வலது மூலையில் வால்யூம் கண்ட்ரோலுக்கு அருகில் அமர்ந்து இருக்கும். இனி டோரன்ட் தளங்களில் நீங்கள் தரவிறக்கும் டோரன்ட் கோப்புகள் (.torrent) யுடோரன்ட் மூலம் திறக்கப்பட்டு தரவிறக்கம் ஆரம்பமாகும். உங்கள் கணியில் ஏற்கனவே தரவிறங்கி உள்ள கோப்புகள் மற்றவர்களுக்கு அனுப்பப் பட்டு (Upload) கொண்டிருக்கும்.

முக்கியமாக உங்கள் தரவிறக்கம் முடிந்த பின்பும் உங்களிடம் தரவிரங்கிய கோப்புகள் மற்றவர்களுக்கு அனுப்பப் பட்டு கொண்டிருக்கும். உங்களிடம் Unlimitted Bandwidth இணைய இணைப்பு இருந்தால் பரவாயில்லை. Limitted Bandwidth இணைய இணைப்பு உள்ளவர்களாக இருந்தால் உங்களை அறியாமலேயே உங்கள் இன்டர்நெட் பில் எகிறி விடலாம். எனவே தரவிறக்கம் முடிந்தவுடன் உங்கள் யூடோர்றேன்ட் செயலியை நிறுத்தி விடுவது அல்லது மூடி விடுவது நல்லது.

ஏற்கனவே பல பதிவர்கள் இது குறித்து தமிழில் எழுதி உள்ளார்கள். அவற்றையும் படிக்கவும். உங்களுக்கு முழுமையான விளக்கம் கிடைக்கும்.

http://pkp.blogspot.com/2008/11/blog-post_11.html
http://velang.blogspot.com/2009/12/u-torrent.html
http://browseall.blogspot.com/2009/11/mininovademonoid.html
http://rvkrishnakumar.blogspot.com/2009/10/blog-post_07.html
http://sagacomputer.blogspot.com/2009/03/2008-torrent.html

தொடர்புடைய இடுகைகள்

எல்லாவிதமான வீடியோக்களையும் கணினியில் காண

2010-02-02T00:02:00.001-08:00

கால ஓட்டத்தில் புதிய கண்டுபிடிப்புகளாக Divx, FLV, MP4, MKV என்று வீடியோக்கள் புதிது புதிதாக வடிவங்களில் வருகின்றன. இணையத்தில் பெரும்பாலும் பகிரப்படும் வீடியோக்கள் இந்த வடிவங்களில்தான் வருகின்றன. தரவிறக்கி அவற்றை நீங்கள் பார்க்க முற்படும் போது Codec இல்லை என்ற பிழைச்சொல் வரும். சிலவற்றில் DVD வீடியோக்கள் ஓடாது.

இது போன்ற வீடியோக்கள் திறக்க உங்கள் கணினியில் அவற்றிற்கு ஏற்ற கோடக் (Codec) தேவைப்படும்.விண்டோஸ் இயங்குதளத்துடன் வருவது விண்டோஸ் மீடியா பிளேயர். நீங்கள் திறக்கும் வீடியோ கோப்புகள் இதில் தான் தெரியும். ஆனால் விண்டோஸ் மீடியா பிளேயர் எல்லா வீடியோ வடிவத்திற்கான கோடக்குகளுடன் வருவதில்லை.

அவற்றை இணையத்தில் தேடி உங்கள் கணினியில் நிறுவ வேண்டி வரும். சில சமயம் வேலை செய்யும். பல நேரம் காலை வாரும். பெரிய தலைவலி பிடித்த வேலை இது. புதிதாக கணினி வாங்கிய நண்பர்கள் / உறவினர்கள் அடிக்கடி என்னிடம் கொண்டு வரும் பிரச்சனை இது.

இந்த இம்சையில் இருந்து விடுபட ஒரே வழி விண்டோஸ் மீடியா ப்ளேயரை உபயோகிப்பதை நிறுத்தி விடுங்கள். எல்லா வீடியோ கோப்புகளையும் தடை இன்றி திறக்க ஒரு மென்பொருளை அறிமுகம் செய்கிறேன்.

VLC Media Player. கணினிக்கான மிகச்சிறந்த மீடியா பிளேயர் இது. இதற்கென நீங்கள் எந்த வீடியோ கோடக்குகளையும் தனியே நிறுவ வேண்டியதில்லை. எல்லாம் உள்ளடங்கியே வருகிறது. அடிக்கடி மேம்படுத்தப்பட்டு வருவதால் அனைத்து விதமான வீடியோவையும் திறக்கிறது.

இது முற்றிலும் இலவசம். தற்சமயம் ஒரு வினாடிக்கு பதினேழுக்கும் மேற்பட்டோர் இதனை தரவிறக்குவதாக அவர்கள் இணையதளத்தில் குறிப்பிட்டு உள்ளார்கள். இது விண்டோஸ், லினக்ஸ், மேக் ஓஎஸ் என்று பெரும்பாலான இயங்குதளங்களில் வேலை செய்யும். இந்த சுட்டிக்கு சென்று உங்கள் கணினி இயங்குதளத்திற்கு ஏற்ற விஎல்சி மீடியா ப்ளேயரை தரவிறக்கி உங்கள் கணினியில் நிறுவி கொள்ளுங்கள்.

இனி 'கணினியில் இந்த வீடியோ திறக்க மாட்டேன் என்கிறது' என்ற பிரச்னைக்கு முடிவு காட்டுங்கள். இணைய உலாவிகளில் பயர்பாக்ஸ் எப்படி இன்டர்நெட் எக்ஸ்ப்ளோரருக்கு மாற்றாக உள்ளதோ அது போல் விண்டோஸ் மீடியா ப்ளேருக்கு மிகச்சிறந்த மாற்று விஎல்சி மீடியா பிளேயர். இது ஒவ்வொருவர் கணினியிலும் காட்டாயம் இருக்க வேண்டிய மென்பொருள்.

விஎல்சி மீடியா பிளேயர் வீடியோ பார்ப்பதற்கு மட்டுமல்லாமல் வீடியோக்களை வெட்டுவது, இணைய ஒளிபரப்புகளை பார்க்க, வீடியோ கன்வெர்ட் செய்ய, உங்கள் வீடியோக்களை இணையத்தில் நேரடியாக ஒளிபரப்ப, உங்கள் கணினி ஸ்க்ரீன் காட்சிகளை பதிவு செய்ய என பல விதங்களில் பயன்படுகிறது. தற்சமயம் வீடியோ பார்ப்பதற்கு மட்டும் பயன்படுத்துங்கள். விஎல்சியின் சிறப்பு வசதிகளை விளக்கமாக தனித்தனி இடுகைகளாக அடிக்கடி எழுதுகிறேன்.

குறிப்பு : இது முதல் இன்னும் பத்து இடுகைகள் கணினிக்கும், இணையத்திற்கும் புதியவர்களுக்காக எழுதலாம் என்றுள்ளேன். இவை பற்றி தெரிந்தவர்கள் பொறுத்தருள்க!

தொடர்புடைய இடுகைகள்

நல்ல கேமரா வாங்க உதவும் பிகாசா தளத்தின் வசதி

2010-02-01T20:52:00.000-08:00

நீங்கள் கேமரா அல்லது கேமரா வசதி உள்ள மொபைல் வாங்கப்போவதாக வைத்துக் கொள்ளுவோம். அந்த கேமராவில் எடுக்கப்படும் புகைப்படங்கள் எப்படி இருக்கும்? என்று அறிந்து கொள்ளும் ஆர்வம் இருக்கும்.

உங்கள் நண்பர்கள் அந்த கேமரா வைத்து இருந்தால் நீங்க அவற்றை உபயோகித்து பார்த்து அவற்றின் புகைப்படங்களின் துல்லியத்தை அறிந்து கொள்ளலாம். அல்லது இணையத்தில் பல்வேறு கேமராக்களில் எடுத்த புகைப்படங்களின் மாதிரிகளை சிலர் தரவேற்றி இருப்பர். அவையும் மிகக் குறைவான அளவிலேயே உள்ளன.

அவற்றை கேமரா மாடல் எண்ணை கூகுளில் தேடி கண்டுபிடித்து பல காமெராக்களின் புகைப்படங்களை ஒப்பிட்டு கொள்ளமுடியும். நீங்கள் விரும்பும் கமெராவில் எடுக்கப்பட்ட புகைப்படங்கள் சில நேரம் கிடைக்காமல் போகலாம். ஆனால் தற்போது அதிக புகைப்படங்களுடன் உள்ள ஒரு தளம் புகைப்படங்களை கேமரா மாடல் வாரியாக பிரித்துக் காட்டுகிறது.

கூகிள் பிகாசா இணையதளம். பயனர்கள் புகைப்படங்களை தரவேற்றி கொள்ளும் சேவையையை வழங்குகிறது என்பதனை பெரும்பாலானோர் அறிந்திருப்பீர்கள். அங்கே உள்ள புகைப்படங்களை நீங்கள் பார்த்த்துக் கொள்ள முடியும். இப்போது புது வசதியாக நீங்கள் அங்கே குறிப்பிட கேமரா மாடலில் எடுக்கப்பட்ட புகைப்படத்தை தேடி பார்த்துக் கொள்ளலாம்.

Picasaweb இணைய தளத்திற்கு சென்று கொள்ளுங்கள். அங்கே நீங்கள் தேட விரும்பும் புகைப்படங்களை தேடுங்கள். உதாரணத்திற்கு நான் 'india' என்று தேடுகிறேன். எல்லா புகைப்படங்களும் தோன்றும். இடது புறத்தில் 'Show Options' கிளிக் செய்து கொண்டு, அங்கே காமெரா மாடலை தேர்வு செய்து கொண்டு எண்டரை தட்டுங்கள். நீங்கள் விரும்பிய கமெராவில் எடுக்கப்பட்ட புகைப்படங்கள் தோன்றும்.

Sony DSC-W50 இல் எடுக்கப்பட்ட புகைப்படங்கள் இங்கே. Canon EOS 40D -இல் எடுக்கப்பட்ட புகைப்படங்கள் இங்கே. மொபைல் போன் கேமராக்கள் மூலம் எடுக்கப்பட்ட புகைப்படங்களை மொபைல் மாடல் கொடுத்து தேடுவதன் மூலம் பெறலாம். Sony Ericsson K800i மொபைல் மூலம் எடுக்கபட்ட புகைப்படங்கள் இங்கே.

இவ்வாறு கேமரா மாடல்களை குறிப்பிட்டு அதில் எடுக்கப்பட்ட புகைப்படங்களை ஒப்பிட்டு உங்களுக்குத் தேவையான மிகச்சரியான காமெராவை தேர்ந்தெடுத்துக் கொள்ள பிகாசாவின் இந்த வசதி உதவுகிறது.

தொடர்புடைய இடுகைகள்

கூகிள் தேடல் முடிவுகளை ஜிமெயிலில் இணைக்க

2010-02-01T19:56:00.000-08:00

இந்த இடுகை ஜிமெயிலில் உள்ள ஒரு கூடுதல் வசதி பற்றியது. நீங்கள் மின்னஞ்சல் உபயோகிக்கும் போது ஏதாவது தகவலை தேட வேண்டும் என்றால் தனி பக்கத்தில் கூகுளை திறந்து தேவையானவற்றை தேடி கொண்டிருந்திருப்பீர்கள்.

தேடலில் உள்ள குறிப்பிட்ட முடிவை மின்னஞ்சலில் இணைக்க காப்பி செய்து மின்னஞ்சல் உள்ளே பேஸ்ட் செய்ய வேண்டி இருக்க வேண்டும். ஜிமெயிலில் ஒரு வசதி இந்த வேலையை மிகவும் எளிதாக்குகிறது. இந்த வசதியை உயிர்ப்பித்துக் கொள்ள உங்கள் ஜிமெயிலில் வலது மூலையில் உள்ள 'Settings' லிங்கை கிளிக் செய்து 'Labs' பகுதிக்கு சென்று கொள்ளுங்கள்.

லேப்ஸ் பகுதியில் கீழே வாருங்கள். 'Google Search' என்ற வசதியை கண்டுபிடித்து 'Enable' கிளிக் செய்து கொள்ளவும். அடுத்து 'Save Changes' கிளிக் செய்து சேமித்து கொள்ளுங்கள். உங்கள் ஜிமெயில் தானாக மீள் துவக்கப்படும். இப்போது இடது புறத்தில் Chat -க்கு கீழே Google Search வசதி தோன்றி இருக்கும்.

நீங்கள் புதிய மின்னஞ்சலை உருவாக்கும் போது ஈமெயில் டூல்பாரில் புதிதாக ஒரு கூகிள் பட்டனை காணலாம். அதனை கிளிக் செய்து வேண்டியவற்றை ஜிமெயில் உள்ளேயே நீங்கள் தேடிக்கொள்ள முடியும். அதன் முடிவுகளில் உங்களுக்கு தேவையானவற்றை 'Send by email' என்பதனை கிளிக் செய்வதன் மூலம் உங்கள் மின்னஞ்சலில் எளிதாக இணைத்துக் கொள்ள முடியும்.

இனி மேல் உங்களுக்கு தேவையான விசயங்களை ஜிமெயில் உள்ளேயே தேடிக்கொள்ளுங்கள். ஜிமெயிலில் இந்த கூடுதல் வசதி சிலருக்கு பயன்படும்.

தொடர்புடைய இடுகைகள்

ஜிமெயில் மின்னஞ்சல்களை பீட் ரீடரில் காண

2010-01-31T23:25:00.000-08:00

முந்தைய இடுகை இணையதளங்களின் புதிய தகவல்களை ஈமெயிலில் பெற பதிவேற்றிய சில நிமிடங்களில் அபராஜிதன் என்பவரிடம் இருந்து ஒரு பின்னூட்டம் வந்திருந்தது.ஈமெயில் முகவரிக்கு வரும் மின்னஞ்சல்களை எப்படி பீட் ரீடரில் படிப்பது எப்படி? என்று கேட்டிருக்கிறார்.

நான் ஜிமெயில் உபயோகித்து வருகிறேன். அதனை எப்படி பீட் ரீடரில் பார்ப்பது? ஜிமெயிலில் ஒவ்வொரு முறையும் மெயில் வந்திருக்கிறதா என்று சோதிப்பதற்கு பதில், பீட் ரீடரில் இணைத்து வைத்து இருந்தால் புதிய மின்னஞ்சல் வந்திருந்தால் தானாக அறிவிப்பு காட்டும். பின்பு ஜிமெயில் உள்ளே சென்று மின்னஞ்சல்களை வாசித்து கொள்ளலாம்.

ஜிமெயில் உங்களுக்கு வரும் மின்னஞ்சல்களை RSS செய்தியோடையாக காணும் வசதியை வழங்குகிறது. ஜிமெயில் வழங்கும் RSS செய்தியோடைக்கான முகவரிகள்.

Inbox - https://mail.google.com/mail/feed/atom/inbox, Unread - https://mail.google.com/mail/feed/atom/unread, All mails - https://mail.google.com/mail/feed/atom/all, Spam - https://mail.google.com/mail/feed/atom/spam, Label Based - https://mail.google.com/mail/feed/atom/LABEL NAME

இவற்றை உங்கள் பீட் ரீடரில் இணைத்து கொண்டு, உங்களுக்கு புதிதாக மின்னஞ்சல் வந்தால் அதன் அறிவிப்பை பெறலாம். இவற்றை உபயோகிக்கும் போது உங்கள் மின்னஞ்சல் முகவரி மற்றும் பாஸ்வோர்ட் கேட்கும்.

இது அனைத்து பீட் ரீடரிலும் வேலை செய்வதில்லை. BottomFeeder, FeedDemon/NewsGator, NewzCrawler, SharpReader, RSSOwl போன்ற ரீடர்களில் வேலை செய்கிறது. குறிப்பாக பெரும்பாலானோர் பயன்படுத்தும் கூகிள் ரீடரில் இந்த வசதி வேலை செய்வதில்லை.

இதனை கூகிள் ரீடரில் வேலை செய்ய வைக்கவும் வசதியை ஒரு இணையதளம் வழங்குகிறது. FreeMyFeed.com - இந்த இணையதளத்திற்கு சென்று 'feedurl' என்பதில் மேலே சொன்ன ஜிமெயில் பீட் முகவரி ஒன்றை கொடுங்கள்.

அடுத்து 'user' -ல் உங்கள் ஜிமெயில் முகவரி, 'password' -ல் உங்கள் ஜிமெயில் பாஸ்வோர்ட். 'submit' கிளிக் செய்தால் உங்களுக்கான RSS செய்தியோடை கிடைக்கும். அதனை காப்பி செய்து உங்கள் கூகிள் ரீடரில் 'Add a Subscription' மூலம் இணைத்து கொள்ளுங்கள்.

இனி உங்கள் மின்னஞ்சலுக்கு புதிய மின்னஞ்சல்கள் வரும் போது உங்கள் பீட் ரீடரில் காட்டப்படும்.

எச்சரிக்கை : நீங்கள் பெறும் இந்த RSS முகவரியை பத்திரமாக வைத்து கொள்ளுங்கள். மற்றவருடன் பகிர்ந்தாலோ அல்லது வேறு யாரவது அறிந்து கொண்டாலோ உங்கள் ஈமெயில் தகவல்களை உங்கள் பாஸ்வோர்ட் தேவை இன்றியே, அவர்கள் முழுமையாக இல்லாவிடினும் அதன் சிலவரி அறிவிப்புகளை அறிந்து கொள்ள முடியும். Use at your own risk.

தொடர்புடைய இடுகைகள்

இணையதளங்களின் புதிய தகவல்களை ஈமெயிலில் பெற

2010-01-31T17:43:00.000-08:00

இணையதளத்தில் வருகின்ற புதிய தகவல்களை ஈமெயிலில் பெறுவதை பலர் விரும்புகின்றனர். ஒவ்வொரு தளமாக சென்று புதிய தகவல் வந்துள்ளதா என்று தினசரி பார்ப்பதை விட, புதிய தகவல்கள் வரும் போது அவை அவர்கள் ஈமெயிலுக்கு வந்து சேர்ந்தால் அவற்றை ஒரே இடத்தில் வாசித்து கொள்ள முடியும்.

ஈமெயில் ஒரு சிறந்த சேமிப்பகமாகவும் திகழ்கிறது. மீண்டும் எப்போதாவது தகவல்கள் தேவைப்படும் போது அவற்றை ஈமெயிலில் எளிமையாக தேடி அணுகிக் கொள்ள முடியும். எனவே தனது ஈமெயிலில் விரும்பிய படைப்புகளை சேமித்து வைப்பதை வாசிப்பவர் விரும்புகிறார்.

சில இணையதளங்கள், சில வலைப்பதிவுகள் ஈமெயில் மூலம் சந்தாதாரர் ஆகும் வசதியைக் அளிக்கின்றன. அதன் மூலம் வாசகர்கள் தகவல்களை தன் ஈமெயிலில் பெற்று கொள்ளுகின்றனர். நமது இந்த வலைப்பதிவில் கூட அந்த வசதியை அளித்து உள்ளேன்.

இந்த வசதியை வலைப்பதிவுகள் / இணையதளங்களில் எப்படி வழங்குவது? என்று ஓர் இடுகை எழுதி இருந்தேன். நல்ல வரவேற்பை பெற்றது. சென்ற ஆண்டின் சிறந்த இடுகை என முதல் பரிசை தமிழ்மணம் விருதுகளில் அந்த இடுகை பெற்றது. அந்த இடுகையை வாசிக்கவும். ஈமெயில் சந்தா குறித்து நல்ல அறிமுகம் கிடைக்கும்.

பெரும்பாலான இணையதளங்கள் ஈமெயில் சந்தா வசதியை அளிப்பதில்லை. ஆனால் சில பயனர்கள் அந்த வசதியை விரும்புகின்றன. சிலர் மின்னஞ்சல் சந்தா வழங்காத தளங்களில் வரும் புதிய இடுகைகள் / தகவல்களை எப்படி ஈமெயிலில் பெறுவது என்று சந்தேகம் கேட்டு இருந்ததனர்.

RSS செய்தியோடை வசதி வழங்கும் எந்த தளத்தின் புதிய தகவல்களையும் நீங்கள் ஈமெயில் மூலம் பெற முடியும். RSS செய்தியோடை பற்றி அறிமுகம் இல்லாதவர்கள் ஏற்கனவே விரிவாக எழுதிய 'RSS செய்தியோடையின் முக்கியத்துவம், மகத்துவம்' என்ற இடுகையை வாசிக்கவும்.

ஓரளவுக்கு இணையம் சார்ந்த அனுபவம் உள்ளவராக இருந்தால் நீங்கள் இடுகையில் குறிப்பிட்டு இருந்தபடி Feedburner மூலம் எவரும் எந்த தளத்திற்கும் ஈமெயில் சந்தா வசதியை உருவாக்கி கொள்ள முடியும். பீட்பர்னரில் உங்கள் கூகிள் கணக்கு மூலம் உள்நுழைந்து கொண்டு, நீங்கள் விரும்பும் தளத்தின் முகவரியை கொடுத்து ஒரு புதிய RSS செய்தியோடையை உருவாக்கி கொள்ளுங்கள். இதன் வழிமுறைகள் விரிவாக ஏற்கனவே எழுதிய 'பிளாக்கின் வாசகர்களை அதிகரிக்க, நிரந்தரமாக்க' என்ற இடுகையில் இருக்கிறது.

பின்பு கிடைக்கும் செய்தியோடை ( உதாரணத்திற்கு http://feeds2.feedburner.com/tvs50 ) பக்கத்தின் 'Get _____________ delivered by email' என்ற சுட்டியை கிளிக் செய்து கொண்டு உங்கள் ஈமெயில் முகவரியை அளித்து சந்தாதாரர் ஆகி விடுங்கள். இது போன்று எந்த தளத்திற்கும் எத்தனை செய்தியோடைகளையும் உருவாக்கி நீங்கள் ஈமெயில் சந்தாதாரர் ஆகலாம்.

இந்த செயல்முறை கொஞ்சம் கஷ்டமா இருக்கு என்று நினைப்பவர்களுக்கு ஒரு எளிய தளத்தை பற்றி சொல்லுகிறேன். இதன் ஒரே பின்னடைவு மொத்தம் ஐந்து தளங்களை மட்டுமே நீங்கள் இணைத்து உபயோகித்து கொள்ள முடியும். அதற்கு மேல் அதிக தளங்களுக்கு இந்த வசதியை உபயோகிக்க வேண்டுமென்றால் காசு கேட்பார்கள்.

FeedMyIbox.com - இந்த முகவரிக்கு சென்று விரும்பிய இணையதள / வலைப்பதிவு முகவரி , உங்கள் ஈமெயில் கொடுத்து விட்டு 'Submit' கிளிக் செய்தால் போதும். உங்கள் ஈமெயில் முகவரிக்கு அதனை உறுதிப்படுத்த ஒரு ஈமெயில் அனுப்பி இருப்பார்கள். அதில் உள்ள சுட்டியை கிளிக் செய்து விடுங்கள். (குறிப்பு : உடனடியாக பழைய இடுகைகள் அனைத்தும் உங்கள் மெயிலுக்கு வராது. வரும் காலங்களில் புதிதாக வரும் இடுகைகள் மட்டுமே வரும். அதிகபட்சம் 24 மணி நேரம் ஆகும்.)

அவ்வளவுதான். இனி நீங்கள் கொடுத்த இணையதளத்தில் புதிய இடுகைகள் / தகவல்கள் வரும் போது அவை அனைத்தும் ஒரு நாளைக்கு ஒரே மெயிலாக உங்களை வந்தடையும். அதன் முழுமையான செயல்பாடுகள் குறித்து அறிய மேலே உள்ள வீடியோவை பாருங்கள்.

ஐந்திற்கு மேற்பட்ட தளங்களில் உபயோகிக்க இந்த வசதி பயன்படாது. அது போன்ற நேரங்களில் மேலே கூறிய பீட்பர்னர் (Feedburner) முறையை பயன்படுத்தவும்.

தொடர்புடைய இடுகைகள்

தமிழ்நுட்ப டிவிட்டுகள் 21-01-2010 முதல் 31-01-2010 வரை

2010-01-31T14:00:00.000-08:00

தினமும் நிறைய தொழில்நுட்ப விசயங்களை படித்தாலும் அவை எல்லாவற்றையும் நமது இந்த வலைப்பூவில் எழுதுவது என்பது இயலாத காரியம். சில விஷயங்கள் விரிவாக எழுத முடியா வண்ணம் முக்கிய செய்திகளாக மட்டும் உள்ளன.

படிக்கும் சுவாரசியமான விசயங்களை குறுஞ்செய்திகளாக பகிர்ந்து கொள்ளலாம் என்று அவற்றை டிவிட்டரில் பதிவு செய்து வருகிறேன். எனது டிவிட்டர் முகவரி http://twitter.com/tvs50 ட்விட்டரில் பயனர் கணக்கு உள்ளவர்கள் என்னை தொடர்ந்து (Follow) என் பகிர்தல்களை உடனுக்குடன் வாசித்து கொள்ளலாம்.

நமது இந்த வலைப்பதிவிலும் வலது புறத்தில் எனது ட்விட்டர் செய்திகள் தோன்றும்படி வைத்து உள்ளேன். இங்கு தினமும் வருபவர்கள் அவற்றை வாசித்து கொள்ளலாம். ஆனால் நமது இந்த வலைப்பதிவை பெரும்பாலும் ஆர்எஸ்எஸ் (RSS) செய்தி ஓடை மூலமாகவும், மின் அஞ்சல் மூலமாகவும் வாசிப்பவர்கள் அதிகம். எண்ணிக்கையில் 1700 ஐ தாண்டி சென்று கொண்டிருக்கிறார்கள்.

அவர்களுக்கும் எனது ட்விட்டர் செய்திகள் சென்றடைய வேண்டும் என்று கருதுகிறேன். எனவே வாரம் ஒரு முறை அந்த வாரத்திய என் ட்விட்டர் பகிர்தல்களை தொகுத்து இந்த வலைப்பதிவில் ஒரு இடுகையாக இடலாம் என்று நினைக்கிறேன்.

இது உங்களுக்கு உபயோகமாக இருக்கும் என கருதுகிறேன். அல்லது மின் அஞ்சல் மூலமாக வாசிப்பவர்களுக்கு இது தேவை இல்லாத இடுகையாக தோன்றினால் / எரிச்சலை தந்தால் பின்னூட்டத்தில் தெரிவிக்கவும். நிறுத்தி விடலாம்.

ஜனவரி 20 2010 முதல் ஜனவரி 31 2010 வரையிலான எனது ட்விட்டர் பகிர்தல்கள்

ஆப்பிள் ஐபேட் காமெடியில் கலக்கி வருகிறது. இணையத்தில் பிரித்து மேய்கிறார்கள் http://goo.gl/Pf6O வறுக்க தனி இணையதளம் http://ifake.it/

மைக்ரோசாப்ட் புதிய பதிப்புகள் விண்டோஸ் 8, விண்டோஸ் சர்வர் 2012, ஆபீஸ் 2012 வெளியாகும் நாட்கள் 1-7-11, 2-7-12, 2-7-12 http://goo.gl/CVWy

ஐபோனுக்கு அடுத்து ஐபேடும் கலக்கப் போகிறதா? ஆப்பிள் ஐபேட்டின் நிறை குறைகளை தமிழில் அலசும் எனது இடுகை. http://goo.gl/PfoK

1500 புதிய வசதிகளுடன் கூகிள் குரோம் உலாவி புதிய பதிப்பு 4.0. நிறைய நீட்சிகள். புக்மார்க் சிங்க் குறிப்பிட வேண்டிய வசதி. http://goo.gl/NInD

மொபைல் பயனர்கள் தொலைபேசி நிறுவனங்களுக்கு எதிரான புகார்களை டிராய் இணையதளத்தில் விரைவில் பதிவு செய்யலாம். http://goo.gl/WoaY

மாணவர்கள் விண்டோஸ் 7-ஐ இலவசமாக பெற வழிமுறைகள். கல்வி நிறுவனங்களுக்கு வழங்கப்பட்ட பதிப்பை மாணவர்கள் பெறலாம் http://goo.gl/2Boq

கூகிள் ஆர்க்குட்டுக்கு இன்று ஆறாவது பிறந்தநாள். ஆறு பலூனை பறக்க விட்டு சிறப்பு டூடுல் போட்டிருக்காங்க. வாழ்த்துக்கள் http://goo.gl/7p15

பிஎஸ்என்எல் தனது 3G சேவையை கோவை, ஊட்டி, குன்னூர் இடங்களுக்கு விரிவுபடுத்தி உள்ளது. வேகம் 3.1MBPS வரை? http://goo.gl/Ze0o

கூகிள் மீதான ஹேக்கர்களின் தாக்குதலுக்கு, சீனா பதில் சொல்ல வேண்டும். ஒபாமா கோரிக்கை. பிரச்சனை நீளுகிறது. http://goo.gl/v7P1

2009-ல் இணையத்தின் போக்கு எப்படி? எத்தனை இணையதளங்கள், மெயில்கள், வீடியோக்கள், கண்டம் வாரியாக பயனர்கள். புள்ளிவிபரம். http://goo.gl/Bk1D

சீன கூகிள் தாக்குதலுக்கு பயன்படுத்தப் பட்ட இன்டர்நெட் எக்ஸ்ப்ளோரர் பாதுகாப்பு ஓட்டையை மைக்ரோசாப்ட் அடைத்தது. http://goo.gl/6pW4

புதிதாக வெளியாகி உள்ள பயர்பாக்ஸ் புதிய பதிப்பு 3.6 சிறப்பம்சங்கள் பற்றிய வீடியோ. முன்பை விட வேகம், Plugin மேம்பாடு. http://goo.gl/j0DN

சீன கூகிள் ஹேக்கிங். ஜெர்மனி அரசின் இன்டர்நெட் எக்ஸ்ப்ளோரர் புறக்கணிப்பு அறிவுரை. பயர்பாக்ஸ் தரவிறக்கங்கள் எகிறி உள்ளது. http://goo.gl/kvXR

கணினியை அசெம்பிள் செய்வது எப்படி? என்று பதிவர் மகாராஜன் வலைப்பதிவில் தொடர் எழுதி வருகிறார். புரியும்படி எளிமையாக உள்ளது. http://goo.gl/VIF2

மொபைல் சந்தையை பிடிக்க கூகிள் Vs ஆப்பிள் வியாபார போட்டி. ஐபோன்களில் கூகிள் தேடலுக்குப் பதிலாக பிங் மாற்றப் படலாம். http://bit.ly/5djrPk

புதிய பயர்பாக்ஸ் 3.6 இறுதி பதிப்பு வெளியிடப்பட்டது. பயனர்கள் அப்கிரேட் செய்யுங்கள். டேப் உபயோகத்தில் சிறு மாற்றம். http://bit.ly/6zdseE

வலைப்பதிவை அழகாக வடிவமைக்க பிளாக்கருக்கான அழகான டெம்ப்ளேட். மாதிரி வலைப்பதிவு http://goo.gl/sHN2 விபரங்களுடன் தரவிறக்க http://goo.gl/lXa6

வருங்கால தொழில்நுட்பம். அணுக எளிமை. டிஜிட்டல் சஞ்சிகை. டேப்லட் பிசி வடிவில். Mag+. புதிய கான்செப்ட். அருமையான வீடியோ. http://goo.gl/AbDk

மொபைல் இணைய உலாவி Skyfire-ன் புதிய பதிப்பு. தொடுதிரை மொபைல்களில் வேலை செய்யும். தமிழ் எழுத்துரு பிரச்சினை இல்லை. http://goo.gl/Hl40

அவாஸ்ட் ஆண்டி வைரஸ் & ஸ்பைவேர், புதிய வெர்சன் 5 வெளியிட்டுள்ளது. குறைந்த அளவு மெமரி உபயோகம். இலவச தரவிறக்க http://goo.gl/ENK7

பில்கேட்ஸ் ட்விட்டரில் டிவிட்ட ஆரம்பித்துள்ளார். அவரது முதல் டிவிட் 'Hello World' பாலோவர்கள் குவிகிறார்கள். அவரது பக்கம் http://goo.gl/hd5m

ஐபிஎல் 2010 மார்ச் முதல் ஆரம்பம். நமக்கெல்லாம் நல்ல செய்தி. இணையத்தில் நேரடி ஒளிபரப்பை யூடியுபில் காணலாம். http://goo.gl/zBj7

கூகிள் வேவ் பயன்பாடுகள் பற்றி முழுமையாக அறிந்து கொள்ள முடியவில்லை. சில சந்தேகங்களுக்கு பதில் இங்கே இருக்கிறது. http://goo.gl/QtI5

சீன கூகிள் ஹேக் எதிரொலி. விண்டோஸ் எக்ஸ்பி, இன்டர்நெட் எக்ஸ்ப்ளோரர் 6 விட்டு புதுசுக்கு போக மைக்ரோசாப்ட் அறிவுறுத்தல் http://goo.gl/6ne5

குரோம் போன்று விண்டோஸ் 7க்குக் ஏற்ற வடிவமைப்புடன், பிரைவேட் பிரவுசிங் வசதியுடன் ஒபேரா 10.5 வெளிவந்துள்ளது. http://goo.gl/hbhZ

தொடர்புடைய இடுகைகள்

செயலிகளில் எளிமையாக பிடிஎப் உருவாக்க

2010-01-30T09:58:00.000-08:00

ஆன்லைனில் இணையப் பக்கங்களை பிடிஎப் கோப்புகளாக மாற்றுவது பற்றி ஓர் இடுகை எழுதி இருந்தேன். அதே வேலையை செய்ய மேலும் சிறப்பு வாதிகளுடன் ஒரு மென்பொருள் உதவுகிறது. அதனை இந்த இடுகையில் காண்போம்.

இதனை உங்கள் கணினியில் பிரிண்டர் போன்று நிறுவி கொள்ள வேண்டும். பிரிண்ட் வசதி உள்ள அனைத்து செயலிகளிலும் பிடிஎப்பாக சேமித்து கொள்ளலாம். மைக்ரோசாப்ட் வோர்ட், நோட்பேட், பெயிண்ட் என்று எந்த மென்பொருளின் கோப்புகளையும் பிடிஎப்பாக சேமித்து கொள்ள முடியும்.

நீங்கள் உருவாக்குகிற பிடிஎப் கோப்புகளின் பின்னணியில் வாட்டர் மார்க்காக நீங்கள் விரும்பும் வார்த்தைகளை இணைத்துக் கொள்ள முடியும். இவற்றிற்கு பாஸ்வோர்ட் கொடுத்து பாதுகாத்து கொள்ளும் வசதியையும் இந்த மென்பொருள் தருகிறது.

பிடிஎப் மட்டுமல்ல. JPEG, PNG, EPS, BMP, TIFF, PS, PCX என்று எந்த வடிவிலும் கோப்புகளை சேமித்து கொள்ள முடியும். அதாவது நீங்கள் பார்த்து கொண்டிருக்கும் இணையப் பக்கத்தையோ, வோர்ட் கோப்பையோ படமாக JPEG வடிவில் கூட சேமித்து கொள்ளலாம்.

இந்த மென்பொருளின் பெயர் Bullzip PDF Printer. இலவசமாக கிடைக்கிறது. இதனை இந்த சுட்டிக்கு சென்று தரவிறக்கி உங்கள் கணினியில் நிறுவி கொள்ளுங்கள். உங்கள் பிரிண்டர் பகுதியில் Bullzip PDF Printer நிறுவப்பட்டு இருக்கும்.

இனி எந்த மென்பொருளிலும் பிரிண்ட் வசதி மூலம் உங்கள் கோப்புகளை பிடிஎப் வடிவிலோ அல்லது வேண்டிய பட வடிவிலோ சேமித்து கொள்ளலாம். File மெனுவில் Print கிளிக் செய்து கொள்ளுங்கள். வருகின்ற விண்டோவில் Bullzip PDF Printer ஐ தேர்ந்தெடுத்து கொள்ளுங்கள். இனி Print கிளிக் செய்து கொள்ளுங்கள்.

அடுத்து வரும் விண்டோவில் நீங்கள் வேண்டுமென்ற கோப்பு வடிவை தேர்ந்தெடுங்கள். இனி Save செய்தால் போதுமானது. நீங்கள் விரும்பிய கோப்பு கிடைத்து விடும்.

இது எளிமையான முறை. அந்த செயலியிலும் (Application) இருந்தும் பிடிஎப் கோப்பினை எளிதாக உருவாக்கி கொள்ளுங்கள். நமது இந்த பிளாக்கில் இடுகைக்கு கீழே உள்ள 'Print this post' கிளிக் செய்து பிரிண்டரில் Bullzip PDF Printer தேர்வு செய்து கொண்டு வேண்டுமென்ற இடுகைகளை சேமித்து கொள்ளுங்கள்.

தொடர்புடைய இடுகைகள்

விகடனுக்கு நன்றி + அச்சு ஆவணங்களில் இருந்து எழுத்துகளை பிரித்தெடுக்க

ஆப்பிளின் ஐபேட் - காமெடி பீஸ்?

2010-01-29T19:02:00.000-08:00

ஓவர் சீன் ஒடம்புக்கு ஆகாது? மிகப்பெரிய 'பில்டப்' கொடுத்து பெரிய நட்சத்திரங்களின் தமிழ்ப் படங்கள் வந்து சக்கையாகி ரசிகர்களின் எதிர்பார்ப்பை பூர்த்தி செய்யாமல் போகும் போது நமது தமிழ் வலைப்பதிவர்கள் அதனை துவைத்து காயப்போடுவதை பார்த்திருக்கிறோம்.

அதே போன்ற நிலைமை தற்போது ஆப்பிளின் ஐபேடுக்கும் நேர்ந்திருக்கிறது.ஆப்பிள் நிறுவனமும் ஏதோ ஒன்றை ரிலீஸ் செய்ய போகிறோம் என்று ஒரு மாதமாகவே பில்டப் கொடுத்து வந்ததது. அனைவரும் மிகுந்த எதிர்பார்ப்புடன் இருந்தனர். அது அப்படி இருக்குமோ? இப்படி இருக்குமோ? என்று ஆங்கில தளங்களும், வலைப்பதிவர்களும் எழுதி தீர்த்தனர்.

ஐபேடின் பெருமைகளை அள்ளி விட்டு ஜனவரி 27 அன்று அறிமுகம் செய்தார்கள். மக்களை திருப்தி படுத்தியதா என்ற கேள்விக்கு மெல்ல மெல்ல பதில்கள் வந்து கொண்டு இருக்கின்றன. நேற்று ஆப்பிளின் ஐபேட் விரிவான அறிமுகம் என்று அதன் நிறை குறைகள் பற்றி ஒரு இடுகை எழுதி இருந்தேன். குறைகள் பெரியனவாய் பெரும்பாலானோரை அதிருப்திக்கு உள்ளாக்கி இருப்பதை காண முடிகிறது.

இதன் பிரதிபலிப்பாக ஹிட்லர் ஆப்பிள் ஐபேடுக்கு எதிராக கொதித்து எழுவதாக வீடியோக்கள் யூடியுபில் வருகின்றன. எப்படியெல்லாம் யோசிக்குறாங்க! காமெடிக்கு கியாரண்டி. நீங்களும் பாருங்கள்.

மேலும் பார்க்க இங்கே செல்லுங்கள்.
முந்தைய இடுகையில் நான் குறிப்பிட்டு இருந்த குறைகளை இங்கே தருகிறேன்.

மல்டிடாஸ்கிங் (Multitaking) கிடையாது. ஒரே நேரத்தில் பல செயலிகளில் (Application) வேலை செய்ய இயலாது. எளிமையாக சொல்ல வேண்டும் எனில் நீங்கள் பாடல் கேட்டு கொண்டே இணையத்தில் உலவவோ, ஈபுக் படிக்கவோ முடியாது. ஒரு நேரத்தில் ஒரு வேலை மட்டும்தான்.

வெப்கேம் இல்லாததால் வீடியோ சாட்டின் செய்ய இயலாது. 3G மாடலாக வந்தாலும் அதை நீங்கள் இணைய இணைப்புக்கு மட்டுமே பயன்படுத்தி கொள்ள முடியுமே தரவிற போன் அழைப்புகள் (Phone Calls), குறுஞ்செய்தி (SMS) சேவை முதலியவற்றை பயன்படுத்த இயலாது.

நேரடியாக USB க்களை ஐபேட்டில் பயன்படுத்த இயலாது, அதற்கென தனியே அடாப்டர் தேவைப்படும். Flash சப்போர்ட் கிடையாது. இணையதளங்களில் உள்ள பிளாஷ் பகுதிகள் தெரியாது. புரியும்படி கூற வேண்டும் என்றால் இணையப்பக்கங்களில் உள்ள Flash வீடியோக்களை பார்க்க இயலாது.

16GB, 32GB, 64GB போன்ற அளவுகளில் கிடைக்கிறது. இருந்தாலும் நீங்கள் தனியே மெமரி கார்ட் வாங்கி இதனை மேம்படுத்தி (Upgrade) கொள்ள முடியாது.

ஐபேட்டின் இயங்குதளம் ஐபோன் போன்று கட்டுப்பாடுகளை உடையது. அவற்றிற்கு யார் புதிய செயலிகளை வெளியிட்டாலும் ஆப்பிள் அனுமதித்தால் மட்டுமே அவற்றை ஐபேட்டில் பயன்படுத்த முடியும். ஐபோனுக்கான கூகுளின் அருமையான பல செயலிகளை (Applications) கூட ஆப்பிள் மட்டுறுத்தியிருக்கிறது.

எனவே ஆப்பிள் என்ன தருகிறார்களோ அவற்றை தான் பயன்படுத்த வேண்டுமே தவிர மற்ற கணினிகள் போன்று பிறர் செயலிகளை ஐபேட்டில் பயன்படுத்த இயலாது. உதாரணத்திற்கு நீங்கள் மைக்ரோசாப்ட் வோர்ட் (Microsoft Word), பயர்பாக்ஸ் விரும்புபவர் என்றால் அதனை ஐபேட்டில் உபயோகிப்பதற்கான வாய்ப்பு கிடையாது.

கூகுளில் 'Apple IPad Rant' என்று தேடிப்பார்த்தால் இணைய பயனர்களின் எதிர்வினை பற்றி நன்றாக அறிந்து கொள்ள முடியும். எந்த தயாரிப்பு வந்தாலும் வாழ்த்தி வரவேற்கும் இணையதளங்களும் தனது அதிருப்தியை பலமாக வெளிப்படுத்தி உள்ளன. சில பிரபல ஆங்கில தளங்கள் தந்துள்ள கருத்துக்களுக்கான சுட்டிகளை தருகிறேன்.

IO9 - Why The iPad Is Crap Futurism, TechTeam - The Problem with the Apple, LifeHacker – The Problem with the Apple iPad, Mashable – The Anti-Hype: Why Apple’s iPad Disappoints, Gizmodo – 8 Things That Suck About the iPad, Gizmodo -The iPad Is The Gadget We Never Knew We Needed, CNet – 10 things Netbooks still do better than an iPad

ஐபோன் வெளிவந்த போது இந்த அளவுக்கு இல்லை என்றாலும் ஓரளவு புகைச்சல்கள் வெளிவரத்தான் செய்தன. அவற்றை எல்லாம் மீறி ஐபோன் மொபைல் சந்தையில் காலூன்றி நிற்கிறது. ஆனால் ஐபேட் அந்த அளவு எடுபடுமா? என்பது சந்தேகத்திற்கு உரியதே.

இந்நேரத்தில் மற்றொன்றையும் சொல்ல வேண்டும். விண்டோஸ் ஏழை இயங்குதளமாக கொண்டு ஐபேடை போன்ற சாதனம் HP Slate இந்த ஆண்டு இறுதிக்குள் வெளி வரப்போகிறது. விண்டோஸ் 7 இருப்பதால் நாம் ஐபேடில் கூறிய குறைகள் எதுவும் இருக்கப் போவதில்லை. ஆனால் என்ன மைக்ரோசாப்ட் இயங்குதளங்கள் வைரசால் அடி வாங்குவது வழக்கம் பொறுத்துக் கொண்டால் போதும் :) .

தொடர்புடைய இடுகைகள்

ஆப்பிளின் ஐபேட் (IPAD) விரிவான அறிமுகம்

ஆப்பிளின் ஐபேட் (IPAD) விரிவான அறிமுகம்

2010-01-28T22:18:00.000-08:00

தகவல் தொடர்பு உலகில் ஆப்பிள் நிறுவனத்தின் படைப்புகள் எப்போதும் புரட்சியை உண்டு பண்ணும் விதம் வெளிவந்திருக்கின்றன. மைக்ரோசாப்ட்டின் விண்டோஸ் இயங்குதளமே ஆப்பிள் மேக் இயங்குதளங்களை காப்பி அடித்து வந்தவைதான்.

இப்படியெல்லாம் வசதி அளிக்க முடியுமா? என்று எதிர்பாரா வசதிகளுடன் பயனர்களை மகிழ்விப்பதில் ஆப்பிள் நிறுவனம் கில்லாடி. பல நிறுவனங்களின் தயாரிப்புகளுக்கு ஆப்பிள் ஒரு முன்னோடி. உதாரணத்திற்கு ஐபோன் எடுத்து கொள்ளுங்கள்.

ஐபோன் வருவதற்கு முன்பு மொபைல் சந்தை எப்படி இருந்தது என்பதை நீங்கள் மறந்திருக்க மாட்டீர்கள். தொடுதிரை மொபைல் என்பது கனவுதான். ஆனால் ஐபோன் வந்த பின்பு எத்தனை நிறுவனங்கள் வகை வகையான தொடுதிரை மொபைல்களை போட்டு தாக்கி வருகின்றன. மொபைல் போன் சந்தையில் ஒரு புத்துணர்ச்சியை உண்டு பண்ணியது ஐபோன் என்றால் அது மிகையாகாது. ஆப்பிள் தயாரிப்புகளை பயன்படுத்துவது அந்தஸ்தின் அடையாளமாகவும் பார்க்கப் படுகிறது.

மடிக்கணினிக்கும், மொபைல் போன்களுக்கும் இடையில் எளிதாக எங்கும் எடுத்து செல்லும் எளிமையுடன் நெட்புக் கணினிகளின் பயன்பாடு அதிகரித்து வருகிறது. பெரும்பாலான பெரிய நிறுவனங்கள் சிறிய திரைகளுடன் கூடிய நெட்புக் கணினிகளை வெளியிடத் துவங்கி உள்ளன.

கூகிள் நிறுவனமும் தனது புதிய இயங்குதளமான குரோம் ஓஎஸ் ஆரம்பத்தில் நெட்புக் கணினிகளுக்காகத்தான் வெளியிடுகிறது. இவை நேட்புக் கணினிகளுக்கான சந்தை எதிர்காலத்தில் அதிகம் இருப்பதை உணர்த்துகிறது.

இந்த சந்தையையும் தனது வித்தியாசமான தயாரிப்பு மூலம் கலக்கப் போகிறது ஆப்பிள். நேற்று (ஜனவரி 27, 2010) ஐபேட் (IPad) எனும் தனது புதிய தயாரிப்பை உலகுக்கு தந்துள்ளது. தோற்றத்தில் பெரிய ஐபோன் போன்று இருக்கும் ஐபேட் 9.5 இன்ச் தொடுதிரையுடன் வருகிறது. இது Wi-Fi, Wi-Fi + 3G என்று இரண்டு மாடல்களில் வெளியிடப்பட்டு உள்ளது.

அரை அங்குல தடிமனுடன், .68 kg எடையுடன் வரும் ஐபேட்தில் இணையத்தில் உலவுதல், இசை கேட்டல், வீடியோ பார்த்தல், ஈபுக் (Ebook) வாசித்தல் போன்ற வேலைகளை எளிமையாக செய்து கொள்ள முடியும். தொடுதிரை உள்ளதால் மற்ற கணினிகளை உபயோகிப்பதை விட ஐபேட்டை உபயோகிப்பது மிகவும் எளிது.

ஐபேட் இயங்குதளம், ஐபோனின் இயங்குதளத்தை ஒத்ததாகவே உள்ளது. செயல்முறைகள் பெரும்பாலும் ஐபோனே போன்றே உள்ளன. இது ஆப்பிளின் 1Ghz பிராசசரில் இயங்குகிறது. இதன் முழுமையான தொழிநுட்ப விபரங்கள் குறித்து அறிந்து கொள்ள இந்தப் பக்கத்திற்கு செல்லுங்கள். இதன் பயன்பாடுகள் குறித்து வீடியோவை பாருங்கள்.

வீடியோ 2. வீடியோ 3. மேலும் வீடியோக்கள் யூடியுபில் குவிந்து உள்ளன.
இந்த ஐபேட் மக்களை எந்த அளவு கவரும்? கவருவதற்கான வாய்ப்புகள் அதிகம் உள்ளன. எடை குறைவு. எங்கு வேண்டுமானாலும் எளிதில் எடுத்து செல்ல முடியும். தொடுதிரை. எளிதில் உபயோகிக்கலாம். மடியில் வைத்துக்கொண்டு புத்தகம் போல வாசித்து கொள்ளலாம். காலத்தின் வளர்ச்சியில் பெரும்பாலான மாணவர்கள் கையில் சிலேட் போன்று ஐபேட் மாதிரியான சாதனங்கள் உட்காரும் காலம் வரலாம்.

ஐபேட்டில் உள்ள குறைகளை பார்க்கலாமே. மல்டிடாஸ்கிங் (Multitaking) கிடையாது. ஒரே நேரத்தில் பல செயலிகளில் (Application) வேலை செய்ய இயலாது. வெப்கேம் இல்லாததால் வீடியோ சாட்டின் செய்ய இயலாது. 3G மாடலாக வந்தாலும் அதை நீங்கள் இணைய இணைப்புக்கு மட்டுமே பயன்படுத்தி கொள்ள முடியுமே தரவிற போன் அழைப்புகள் (Phone Calls), குறுஞ்செய்தி (SMS) சேவை முதலியவற்றை பயன்படுத்த இயலாது.

நேரடியாக USB க்களை ஐபேட்டில் பயன்படுத்த இயலாது, அதற்கென தனியே அடாப்டர் தேவைப்படும். Flash சப்போர்ட் கிடையாது. இணையதளங்களில் உள்ள பிளாஷ் பகுதிகள் தெரியாது. புரியும்படி கூற வேண்டும் என்றால் இணையப்பக்கங்களில் உள்ள Flash வீடியோக்களை பார்க்க இயலாது. 16GB, 32GB, 64GB போன்ற அளவுகளில் கிடைக்கிறது. இருந்தாலும் நீங்கள் தனியே மெமரி கார்ட் வாங்கி இதனை மேம்படுத்தி (Upgrade) கொள்ள முடியாது.

ஐபேட்டின் இயங்குதளம் ஐபோன் போன்று கட்டுப்பாடுகளை உடையது. அவற்றிற்கு யார் புதிய செயலிகளை வெளியிட்டாலும் ஆப்பிள் அனுமதித்தால் மட்டுமே அவற்றை ஐபேட்டில் பயன்படுத்த முடியும். ஐபோனுக்கான கூகுளின் அருமையான பல செயலிகளை (Applications) ஆப்பிள் மட்டுறுத்தியிருக்கிறது.

எனவே ஆப்பிள் என்ன தருகிறார்களோ அவற்றை தான் பயன்படுத்த வேண்டுமே தவிர மற்ற கணினிகள் போன்று பிறர் செயலிகளை ஐபேட்டில் பயன்படுத்த இயலாது. உதாரணத்திற்கு நீங்கள் மைக்ரோசாப்ட் வோர்ட் (Microsoft Word), பயர்பாக்ஸ் விரும்புபவர் என்றால் அதனை ஐபேட்டில் உபயோகிப்பதற்கான வாய்ப்பு கிடையாது.

விலையைப் பொறுத்தவரை மிகவும் அதிகம் இல்லை. Wifi மாடல் 499 டாலரில் இருந்தும், 3G+Wifi மாடல் 629 டாலரில் இருந்தும் கிடைக்கிறது. ஐபோன்களின் அறிமுக விலையை ஒப்பிடும் போது ஐபேட்டின் விலை ஏற்றுக் கொள்ளக் கூடியதாகவே உள்ளது.

மொத்தத்தில் ஆப்பிளின் ஐபேட் புதுமையான, கவர்ச்சிகரமான தயாரிப்பாக வந்துள்ளது. ஆனால் சூப்பர் என்று கொண்டாடுவதற்கு குறைகள் இன்றி இல்லை. இன்னும் சிறிது காலம் பொறுத்திருந்தால் நாம் கூறிய குறைகள் அற்ற ஐபேட் போன்ற புதிய தயாரிப்புகள் கூகிள், நோக்கியா போன்ற நிறுவனங்களிடம் இருந்து வரலாம். அதற்குள் ஐபேட் சந்தையை ஆக்ரமித்து கொள்ளக் கூடிய சாத்தியக் கூறுகள் இருப்பதை மறுப்பதற்கில்லை.

தொடர்புடைய இடுகைகள்

குரோம், ஐஈ, பயர்பாக்சில் பிரைவேட் பிரவுசிங்

2010-01-23T20:49:00.000-08:00

நீங்கள் எப்போதும் உங்கள் சொந்த கணினியிலேயே இணையத்தை பயன்படுத்துவீர்கள் என்று சொல்ல முடியாது. சில நேரங்களில் அலுவலகங்களில் பிறர் கணினிகளையும், நண்பர்கள் கணினிகளையும், பிரவுசிங் மையங்களில் கணினிகளையும் பயன்படுத்த வேண்டிய கட்டாயம் ஏற்படலாம்.

பொதுவாக இணைய உலாவிகளில் நீங்கள் இணையதளங்களை பார்க்கும் போது நீங்கள் பார்த்த தளங்களின் ஹிஸ்டரி, தேடல் எந்திரங்களில் தேடிய தகவல்கள், தரவிறக்கிய கோப்புகளின் விபரங்கள் உள்ளிட்ட தடயங்கள் அந்த இணைய உலாவிகளில் சேமிக்கப்பட்டு விடும்.

உங்களுக்கு அடுத்து வருபவர் நீங்கள் உலவிய விபரங்களை கண்டு கொள்ள முடியும். சில நேரங்களில் பிறர் கணினிகளில் நாம் மின்னஞ்சல் பார்க்கும் போது நமது மின்னஞ்சல், பாஸ்வேர்டை கூட விட்டு வந்து விடுவோம். இது போன்றவை நமக்கு அசௌகரியத்தை தரும்.

இது போன்ற தருணங்களில் நமது இணைய உலாவிகளில் நமது செயல்பாடுகளின் தடயங்களை விடாது தனிப்பட்ட முறையில் உலவுவதற்குதான் பிரைவேட் பிரவுசிங் என்கிறோம். இது பாதுகாப்பானதும் கூட. இந்த வசதியை கூகிள் குரோம் இணைய உலாவி முதலில் அறிமுகப்படுத்தியது. தற்போது பயர்பாக்சின் புதிய பதிப்பான 3.6 லும் இந்த வசதி வந்து விட்டது. இதனை ஐஈ, குரோம், பயர்பாக்சில் எப்படி உபயோகிப்பது? என்று பார்ப்போம்.

மொசில்லா பயர்பாக்சில் :- பயர்பாக்சின் புதிய பதிப்பை (3.6 க்கு மேல்) நிறுவி இருப்பது அவசியம். Tools மெனுவில் Start Private Browsing என்பதனை கிளிக் செய்து கொண்டு இணையத்தில் உலவ ஆரம்பியுங்கள். நீங்கள் உலவிய தடயங்கள் எதுவும் பயர்பாக்சிலோ, நீங்கள் பயன்படுத்திய கணினியிலோ சேமிக்கப்படாது.

கூகிள் குரோமில் :- குரோம் கன்ட்ரோல் மெனுவில் New incognito window என்பதனை கிளிக் செய்து கொண்டு பிரைவேட் பிரவுசிங் செய்ய துவங்குங்கள்.

இன்டர்நெட் எக்ஸ்ப்ளோரரில் :- இன்டர்நெட் எக்ஸ்ப்ளோரர் 8 -ல் இந்த வசதி உள்ளது. Safety மெனுவில் InPrivate Browsing கிளிக் செய்வதன் மூலம் இந்த வசதியை பெறலாம். ஆனாலும் நான் இன்டர்நெட் எக்ஸ்ப்லோரரை பரிந்துரைக்க போவதில்லை. இன்னமும் பாதுகாப்பற்ற கெட்ட இணைய உலாவியாகவே இது இருக்கிறது.

சீன கூகிள் ஹேக்கர்களால் தாக்கப்பட்டதில் இதில் உள்ள பாதுகாப்பு ஒட்டையையே பயன்படுத்தி உள்ளார்கள். இதை மைக்ரோசாப்ட்டும் ஒப்புக் கொண்டிருக்கிறது. மைக்ரோசாப்ட்டுக்கும் இணைய உலாவிக்கும் ஏழாம் பொருத்தம்தான். எப்போதும் மைக்ரோசாப்ட் இன்டர்நெட் எக்ஸ்ப்ளோரரில் இருந்து விலகியே இருங்கள். இல்லையெனில் இணையத் திருடர்களுக்கு உங்கள் கணினி கதவை திறந்து வைத்து உள்ளீர்கள் என்று அர்த்தம்.

உங்கள் கணினிகளை தவிர பிறரது கணினிகளில் நீங்கள் இணையத்தை உபயோகிப்பதாக இருந்தால் இந்த பிரைவேட் பிரவுசிங் முறையை பயன்படுத்துங்கள்.

தொடர்புடைய இடுகைகள்

பிளாக்கரில் இடுகைகளை பிடிஎப் கோப்பாக சேமிக்க வசதி

2010-01-23T10:02:00.000-08:00

வலைப்பதிவர்கள் ஒவ்வொருவருக்கும் தனது படைப்பை அதிக வாசகர்களிடம் கொண்டு சேர்க்க வேண்டும் என்ற ஆர்வம் இருக்கும். வலைப்பதிவிற்கு டிராபிக்கை அதிகரிப்பது தொடர்பாகவும், RSS ஓடை சேவை பற்றியும் ஏற்கனவே பல இடுகைகள் எழுதி இருந்தேன்.

நமது இடுகைகளை வாசகர்களுக்கு பிடிஎப் கோப்பாக வழங்குவது மூலம் நமது எழுத்துக்களை மேலும் சிலரிடம் கொண்டு சேர்க்க முடியும். அதனை உங்கள் வலைப்பதிவில் நிறுவுவது எப்படி? என்பதனை பற்றி இந்த இடுகையில் பார்ப்போம்.

வாசிப்பவருக்கு ஓர் இடுகை பிடித்துப் போனால் அந்த இடுகையை தனது கணினியில் வாசிப்பிற்காக சேமித்து கொள்ள விரும்புவார். இணைய உலாவிகளில் இணையப் பக்கத்தை சேமிக்கும் போது இணைய பக்கம் தனியாகவும், அதில் உள்ள படங்கள் தனியாகவும் சேமிக்கப்படும். இடுகைப் பக்கத்தின் பல பகுதிகள் முழுமையாக சேமிக்கப்படாது. இப்படி சேமிக்கப்பட்ட HTML பக்கங்களை அவர் இணைய இணைப்பு இல்லாத ஒரு நண்பருடன் பகிர்ந்து கொள்ளுவது சற்றே சிக்கலான விஷயம்.

இதற்கு பதிலாக நமது இடுகைப் பக்கத்தை ஒரே கோப்பாக PDF வடிவில் கொடுத்தால் அவருக்கு எளிமையாக இருக்கும். அந்த கோப்பை அவர் மற்றவருடன் பகிர்வதன் மூலம் உங்கள் இடுகை பலரை சென்றடையும். இணைய பரிச்சயம் இல்லாதவர் கூட உங்கள் இடுகைக்கான PDF கோப்பை வாசித்து கொள்ள முடியும்.

இணையப்பக்கங்களை பிடிஎப் கோப்பாக சேமிப்பது பற்றி ஒரு இடுகை எழுதி இருந்தேன். படிக்கவும். அதன் மூலம் எந்த இணையப் பக்கத்தையும் கணினியில் பிடிஎப்பாக சேமித்து கொள்ளலாம். உங்கள் பதிவுக்கு வரும் அனைவரும் இந்த வசதி பற்றி அறிந்து இருப்பார்களா என்றால் சந்தேகம்தான்.

அதனால் உங்கள் பதிவின் ஒவ்வொரு இடுகையின் கீழும் பிடிஎப்பாக சேமிப்பதற்கான வசதியை அளித்து விட்டால் உங்கள் வாசகர்களுக்கு எளிதாக இருக்கும். நமது இந்த TVS50 வலைப்பூவின் ஒவ்வொரு இடுகையின் கீழும் 'தொடர்புள்ள இடுகைகள்' பகுதிக்கு கீழே பாருங்கள். 'Download As PDF' என்ற வசதி இருக்கும்.

உங்கள் பிளாக்கர் வலைப்பதிவில் இந்த வசதியை கொண்டு வர உங்கள் வலைப்பதிவின் வார்ப்புரு நிரலில் சில வரிகளை சேர்த்தால் போதுமானது. உங்கள் பிளாகரின் டாஷ்போர்டு சென்று Layout --> Edit HTML கிளிக் செய்து கொள்ளுங்கள். தோன்றும் பக்கத்தில் 'Expand Widget Templates' என்ற ஆப்சனையும் தேர்வு செய்து கொள்ளுங்கள்.

கிடைக்கும் வார்ப்புரு நிரலில் <data:post.body/> என்ற வார்த்தையை தேடுங்கள். அதன் கீழே, கீழ்காணும் வரிகளை காப்பி செய்து பேஸ்ட் செய்யுங்கள்.

<a expr:href='"http://pdfmyurl.com?url=" + data:post.url'>Download As PDF</a>

இப்போது 'Save Template' கிளிக் செய்து உங்கள் வார்ப்புருவை சேமித்து கொள்ளுங்கள். வேலை முடிந்தது.

இனி உங்கள் ஒவ்வொரு இடுகையின் கீழேயும் பிடிஎப்பாக சேமிப்பதற்கான வசதி 'Download As PDF' என்ற சுட்டியாக வழங்கப்பட்டு இருக்கும். அந்த சுட்டியை கிளிக் செய்யும் போது உங்கள் இடுகைப்பக்கம் பிடிஎப் கோப்பாக கணினியில் தரவிறக்கப்படும்.

இதனை செயல்படுத்துவதில் குழப்பங்கள் இருந்தால் பின்னூட்டத்தில் கேட்கவும். உதவுகிறேன்.

தொடர்புடைய இடுகைகள்

இணையப் பக்கங்களை பிடிஎப் கோப்பாக சேமிக்க

2010-01-23T07:29:00.000-08:00

பிடிஎப்(PDF) பரவலாக உபயோகிக்கப்படும் கோப்பு வடிவம். தகவல்களை பிடிஎப்(PDF) வடிவில் இணையத்தில் பகிர்ந்து வருவதை நீங்கள் கண்டிருக்கலாம். பிடிஎப் ரீடர் உள்ள எவருமே இந்த கோப்புகளை படித்துக் கொள்ள முடியும்.

நீங்கள் காணும் இணையதளங்கள், இணையப் பக்கங்களை நீங்கள் ஆன்லைனில் இல்லாத போது படித்துக் கொள்ள பிடிஎப் கோப்பாக மாற்றி உங்கள் கணினியில் சேமித்து கொள்ளலாம். அல்லது மின்னஞ்சல் மூலமாக எளிதில் மற்றவருடன் பகிர்ந்து கொள்ளலாம். இதற்கான சிறந்த சேவையை நீண்ட நாட்களாக தேடி கொண்டிருந்தேன்.

பல்வேறு இணையதளங்கள் இது போன்ற சேவையை வழங்கினாலும் திருப்திகரமாக இல்லை. சில சேவைகளில் படங்கள் சரியாக தெரிவதில்லை. சிலவற்றில் தமிழ் எழுத்துருக்கள் பிரச்சனை. சமீபத்தில் பதிவர் சைபர்சிம்மன் பதிவை படித்த போது இதற்கென ஒரு சேவை தளத்தை அறிமுகப்படுத்தி இருந்தார். அது திருப்திகரமாக வேலை செய்தது.

PDFMyUrl.com இந்த சேவையை வழங்குவதில் இந்த தளம் மிக சிறந்ததாக இருக்கிறது. இணைய பக்கத்தில் உள்ள படங்கள், அதன் வடிவம் முழுமையாக பிடிஎப் கோப்பாக சேமிக்கப்படுகிறது. URL பகுதியில் நீங்கள் பிடிஎப் ஆக மாற்ற வேண்டிய இணையப் பக்கத்தின் முகவரியை (URL) கொடுத்து என்டர் தட்டினால் போதுமானது. அந்த பக்கம் பிடிஎப் கோப்பாக சேமிக்கப்பட்டுவிடும்.

இதனை செயல்படுத்துவதற்கு எளிதான வழி ஒன்றும் இருக்கிறது. இந்த PDFmyURL புக்மார்க்லெட் சுட்டியை இழுத்து உங்கள் இணைய உலாவியின் புக்மார்க் டூல்பாரில் விட்டு விடுங்கள் (Drag that PDFmyURL link and drop in bookmark toolbar of your browser like firefox, chrome). பொதுவாக புக்மார்க்லெட் நிறுவுவது எப்படி? என்ற விளக்கத்திற்கு இந்த வீடியோவை பார்க்கவும். நீங்கள் ஒரு இணையப் பக்கத்தில் இருக்கும் போது இந்த புக்மார்க்லெட்டை கிளிக் செய்தால் போதுமானது. அந்த பக்கம் பிடிஎப்பாக உங்கள் கணினியில் தரவிறக்கப்பட்டு விடும்.

நமது TVS50 வலைப்பதிவின் இடுகைகளையும் இன் நீங்கள் பிடிஎப் கோப்பாக தரவிறக்கி கொள்ள முடியும். ஒவ்வொரு இடுகையின் கீழே இதற்கான வசதியை அளித்து உள்ளேன். 'Download As PDF' என்பதனைக் கிளிக் செய்தாலே போதுமானது. இதன் பிடிஎப் கோப்பு உங்களுக்கு கிடைத்து விடும். இதன் மூலம் இடுகைகளை உங்கள் கணினியில் சேமித்து வைத்து கொள்ளுங்கள். நண்பர்களுடன் பகிர்ந்து கொள்ளுங்கள்.

நீங்கள் வலைப்பதிவராக இருந்தால் உங்கள் வாசகர்களுக்கு உங்கள் இடுகை பக்கங்களை பிடிஎப் கோப்பாக தரவிறக்கும் வசதியை அளிப்பது குறித்து எழுதிய இடுகையை பாருங்கள். உங்கள் வலைப்பதிவில் நிறுவி கொள்ளுங்கள்.

தொடர்புடைய இடுகைகள்

பவர்பாய்ன்ட் கோப்புகளை வீடியோவாக மாற்ற

2010-01-22T20:19:00.000-08:00

நம்மில் பலர் மைக்ரோசாப்ட்டின் ஆபீஸ் தொகுப்பில் உள்ள பவர்பாய்ன்ட் செயலியை பயன்படுத்தி வருவோம். எளிய முறையில் தகவல்களை தொகுத்து அனிமேஷன் வேலைகளுடன் வழங்க உதவும். இதன் பயன்பாடுகள் விரிவானவை.

இவ்வாறு பவர்பாய்ன்ட் மூலம் உருவாக்கிய கோப்புகளை மற்ற கணினிகளில் வேலை செய்ய வைக்க அந்த கணினிகளில் பவர்பாய்ன்ட் அல்லது பவர்பாய்ன்ட் வியுவர் தேவைப்படும். இவற்றை வீடியோ கோப்புகளாக மாற்றுவது பவர்பாயிண்ட்டில் இயலாத காரியம். வீடியோவாக மாற்றினால் கணினி, மொபைல் டிவிடி பிளேயர் என்று பயன்படுத்தி கொள்ளலாம்.

Leawo PowerPoint to Video Free. இந்த இலவச மென்பொருள் மூலம் மேற்சொன்ன வேலையை செய்ய வைக்க முடியும். பவர்பாய்ன்ட் கோப்புகளை ASF, WMV, 3PG, 3G2 வீடியோ கோப்புகளாக மாற்றிக் கொள்ளலாம். இந்த மென்பொருளை இந்த சுட்டியை கிளிக் செய்து தரவிறக்கி நிறுவி கொள்ளுங்கள்.

PPT, POT, PPTX, PPS என்று அனைத்து விதமான பவர்பாயிண்ட் கோப்புகளையும் ஆதரிக்கும். அனைத்து அனிமேஷன்களும் வேலை செய்யும். வீடியோவிற்கு இசையை தனி டிராக்காக சேர்த்து கொள்ளலாம். இவ்வாறு உருவாக்கப்பட்ட வீடியோக்களை யுடியுப் மாதிரியான தளங்களிலும் பகிர்ந்து கொள்ள முடியும்.

தொடர்புடைய இடுகைகள்

மொபைலில் தமிழ் தளங்களை காண ஸ்கைபயர் உலாவி

2010-01-21T06:45:00.000-08:00

மொபைலில் தமிழ் தளங்களை பார்ப்பது பற்றியும், ஒபேரா மொபைல் உலாவி பற்றியும் ஏற்கனவே இடுகைகள் எழுதி இருந்தேன். மொபைல் போன்களில் உபயோகிக்க சிறந்த மற்றொரு இணைய உலாவியை பற்றி இந்த இடுகையில் பார்ப்போம்.

பொதுவாக மொபைல் உலாவிகளில் இணையதளங்கள் முழுமையாக தெரியாது. இணைய பக்கங்களில் உள்ள வீடியோக்களை காண முடியாது. இணையதளங்களின் வசதியை முழுமையாக உபயோகிக்க முடியாது. இது போன்று சில குறைபாடுகள் மொபைல் உலாவியில் உண்டு.

ஸ்கைபயர் (Skyfire). கணினியில் இணையதளங்கள் தெரிவது போன்று ஸ்கைபயர் மொபைல் உலாவியில் இணையதளங்கள் தெளிவாக தெரிகின்றன. யூடியுப் போன்ற வீடியோ தளங்களில் வீடியோக்கள் உலாவியின் உள்ளேயே ப்ளே ஆகின்றன. மொத்தத்தில் ஓரளவுக்கு கணினியில் பிரவுசிங் செய்வது போன்ற அனுபவத்தை ஸ்கைபயர் தருகிறது.

ஸ்கைபயரின் மேம்படுத்தப்பட்ட புதிய பதிப்பு 1.5 சிம்பியன் இணையங்குதளத்தை உபயோகிக்கும் மொபைல் போன்களுக்கு என்று வெளியாகி உள்ளது. இது தொடுதிரை (Touch Screen) மொபைல்களையும் ஆதரிப்பது சிறப்பம்சம்.

தமிழர்களாகிய நமக்கு ஸ்கைபெயரில் சிறப்பம்சம் என்னவெனில் தமிழ் இணையதளங்கள் தெளிவாக தெரிகின்றன. பொதுவாக ஒபேரா மினி தவிர மற்ற மொபைல் உலாவிகளில் தமிழ் இணைய தளங்களை பார்க்க முடியாது. ஒபேரா மினி இணைய உலாவியில் தமிழ் தளங்களை காண சிறிய மாற்றம் செய்ய வேண்டும். ஆனால் ஸ்கைபயர் இணைய உலாவியில் எந்த மாற்றமும் செய்ய தேவை இல்லை.

நீங்கள் மொபைல் போனில் இணையம் உபயோகிப்பவராக இருந்தால் நீங்கள் கண்டிப்பாக சோதித்து பார்க்க வேண்டிய இணைய உலாவி ஸ்கைபயர். இது நிச்சம் உங்களை கவரும்.

ஸ்கைபயரின் இணையதளம். உங்கள் கணினியில் தரவிறக்க இந்த சுட்டிக்கு செல்லுங்கள். தரவிறக்கிய பின் உங்கள் மொபைலுக்கு மாற்றி நிறுவி கொள்ளுங்கள். நேரடியான உங்கள் மொபைலில் இருந்து ஸ்கைபயரை தரவிறக்க உங்கள் மொபைலில் இருந்து இந்த m.skyfire.com முகவரியை அணுகுங்கள். உங்கள் மொபைலுக்கு ஏற்ற பதிப்பு தரவிறக்கப்பட்டு நிறுவப்படும்.

தொடர்புடைய இடுகைகள்

IPL 2010 கிரிக்கெட் யூடியுபில் நேரடி ஒளிபரப்பு

2010-01-20T06:30:00.000-08:00

மொழி கடந்து இந்தியா முழுக்க ரசிக்கப்படும் ஒரே விஷயம் கிரிக்கெட். ஒரு நிறுவனம் தயாரிப்பை இந்திய எங்கும் கொண்டு செல்ல வேண்டும் என்றால் அதன் விளம்பரத்தில் ஒரு கிரிக்கெட் ஆட்டக்காரரை போட்டால் போதுமானது. உலகமெங்கும் கிரிக்கெட் ரசிக்கப்பட்டாலும், இந்தியாவில் வெறித்தனமான கிரிக்கெட் ரசிகர்கள் இருக்கிறார்கள்.

இந்திய கிரிக்கெட் போட்டிகள் நடைபெறும் நாட்களில் நாம் வேலையில் இருந்தாலும் கிரிக்கெட் ஆட்டம் பற்றிய நினைப்பு நமது மூளையில் ஒடிக் கொண்டே இருக்கும். பதிவுலகில் கூட பரவசமூட்டும் கிரிக்கெட் பதிவுகள் சிலவற்றை படித்து இருக்கிறேன். கிரிக்கெட் பற்றி எழுதுவதில் பதிவர் லோஷன் கில்லாடி.

இணையம் மிகப்பெரிய ஊடகமாக இருந்தாலும் இதில் கிரிக்கெட் ஆட்டங்களை நேர்மையான முறையில் பார்த்து ரசிக்க ஒழுங்கான வழிமுறை இல்லை. அனுமதியின்றி இணைய பயனர்கள் கிரிக்கெட் ஆட்டங்களையும், ஹைலைட்ஸ்களையும் இணையத்தில் ஒளிபரப்பி வருவர். வீடியோ தளங்களில் கிரிக்கெட் ஆட்டங்கள் ஏற்றப்படுவதும், பின்பு தடை செய்யப்பட்டு தூக்கப்படுவதும் வழக்கமானவை. சில தொலைக்காட்சி நிறுவனங்கள் ஒளிபரப்பை இணையைத்தில் வழங்கினாலும் அவற்றின் சேவை தரமின்றி இருக்கின்றன.

கிரிக்கெட் காய்ச்சலை காசாக்குவதற்கு ஆரம்பிக்கப்பட்டு வெற்றிகரமாக சென்று கொண்டிருக்கின்றன IPL ஆட்டங்கள். இந்த ஆட்டங்கள் நடக்கும் நாட்களில் மக்கள் மற்ற தொலைக்காட்சி நிகழ்ச்சிகளை மறந்து குடும்பத்தோடு ஐபிஎல் ஆட்டங்களை தொலைக்காட்சியில் ரசிப்பதை காண முடிகிறது.

மும்பை குண்டுவெடிப்பால் சென்ற ஆண்டு தாமதமாக தென்னாப்ரிக்கா சென்று நடத்தினார்கள். இந்த ஆண்டு இந்தியாவிலேயே மார்ச் முதல் ஐபிஎல் ஆட்டங்கள் நடைபெற உள்ளன. சென்ற ஆண்டுகள் ஐபிஎல் தனது ஆட்டங்களை தனது அதிகாரபூர்வ தளத்தில் ஒளிபரப்பினாலும் சேவை தரத்தில் பல குளறுபடிகள். திருப்தியின்மை. இணைய வீடியோ ஒளிபரப்பில் அதி தொழில்நுட்பம் கொண்ட அனுபவசாலிகளாலேயே சிறந்த சேவை தர முடியும்.

சிலர் அலுவலகத்தில் ஒரு பக்கம் கிரிக்கெட் தளங்களை திறந்து வைத்து கொண்டு கிரிக்கெட் ஸ்கோர்களை, வர்ணனனைகளை பார்த்து கொண்டு இருந்தால்தான் அவர்களுக்கு வேலையே ஓடும். உலகில் சில நாடுகளில் இந்த கிரிக்கெட் ஒளிபரப்புக்காக மக்கள் சில சேனல்களை அதிக விலை கொடுத்து வாங்க வேண்டிய நிர்பந்தத்தில் உள்ளார்கள். 3G, வாயர்லேஸ் இணைய இணைப்புகள் வந்து விட்ட பின்பு செல்லுமிடமெல்லாம் மடிக்கணினிகள் வாயிலாகவோ, மொபைல் வாயிலாகவோ காண இணையம் மூலம் தரமான ஒளிபரப்பு தேவைப்படுகிறது.

இது போன்று குறைபட்டு கொண்டிருந்தவர்களுக்கு இனிக்கும் செய்தி ஒன்று வந்துள்ளது. ஐபிஎல் ஆட்டங்கள் நேரடியாக இந்த வருடம் யூடியுபில் ஒளிபரப்ப படும் என்பதே அது. யூடியுப் கிரிக்கெட் ஆட்டங்களை ஒளிபரப்புவது இதுவே முதல்முறை. 45 நாட்கள் நடைபெறும் 60 ஐபிஎல் ஆட்டங்களை நீங்கள் யூடியுபில் நேரடி ஒளிபரப்பாக கண்டு ரசிக்க முடியும்.

ஹைலைட்ஸ், வீரர்களின் பேட்டிகள், ஆட்டகள அறிக்கை, பரிசளிப்பு நிகழ்ச்சி முதலியவையும் யூடியுபில் பதிந்து தரப்போகிறார்கள். இவற்றை நீங்கள் இணைய இணைப்புள்ள மொபைலில் கூட பார்த்து கொள்ள முடியும். யூடியுபில் ஒளிபரப்ப இரண்டு ஆண்டுகளுக்கு உரிமையை கூகிள் நிறுவனம் வாங்கி உள்ளது. விளம்பர வருமானங்களை ஐபிஎல்லும், கூகுளும் பகிர்ந்து கொள்ளும்.

யூடியுபின் http://www.youtube.com/ipl சேனலில் ஆட்டங்களை நீங்கள் பார்த்து கொள்ள முடியும். ஐபிஎல் 2010 ஆட்ட கால அட்டவனையை இந்த சுட்டியில் பார்த்து தெரிந்து கொள்ளுங்கள். இந்த ஆட்டங்களை தொலைக்காட்சியில் இந்தியாவில் சோனி மேக்ஸ் ஒளிபரப்புகிறது.

ஆதாரம் : ஹிந்து பிசினஸ் லைன் , கூகிள் இந்தியா டிவிட்டர்

தொடர்புடைய இடுகைகள்

மடிக்கணினியில் தட்டச்சும் போது தொடுபலகையை முடக்க

2010-01-19T07:01:00.000-08:00

செல்லுமிடமெல்லாம் எளிதாக எடுத்து செல்லும்படி இருப்பதால் மடிக்கணினிகள் குறிப்பிட தகுந்த அளவு பயன்படுத்தப்பட்டு வருகிறது. ஆனால் மேஜை கணினிகள் அளவு உபயோகிப்பதற்கு எளிதாக இருக்கிறதா என்றால், என்னைப் பொறுத்தவரை 'இல்லை' என்பதே பதில்.

மேஜை கணினிகளில் கட கடவென தட்டச்சு செய்வது போன்று மடிக்கணினிகளில் என்னால் விரைவாக தட்டச்ச முடிவதில்லை. மேசைக் கணினிகள் எனக்கு அதிகம் பழக்கப்பட்டு விட்டதால் கூட இருக்கலாம். மடிக்கணினிகளில் தொடுபலகை (Touchpad) மௌஸ் அளவிற்கு எளிமையாக இல்லை.

பெரும்பாலானோர் ஒரு அசௌகரியத்தை மடிக்கணினிகளில் தட்டச்சும் போது அனுபவித்து இருக்க முடியும். தட்டச்சும் போது தவறுதலாக கை விரல்கள் தொடுபலகையில் பட்டு கர்சர் வேறு எங்கோ சென்று நின்று கொள்ளும். அதனை மீண்டும் இழுத்து வந்து, தட்டச்சு செய்ய வேண்டிய இடத்தில் விட்டு மீண்டும் தட்டச்ச வேண்டி இருக்கும்.

இதற்கு தீர்வாக ஒரு இலவச மென்பொருள் கிடைத்து உள்ளது. TouchFreeze. இது நீங்கள் தட்டச்சு செய்யும் போது உங்கள் மடிக்கணினியில் தொடுபலகையை முடிக்கி வைத்து விடும். உங்கள் விரல்கள் பட்டாலும் எந்த பாதிப்பும் இராது. நீங்க தட்டச்சுவதை நிறுத்தியதும் சில வினாடிகளில் தொடுபலகை மீண்டும் செயல்பட ஆரம்பிக்கும்.

இந்த இலவச மென்பொருளில் அளவு 251KB மட்டுமே. இதனை இந்த சுட்டிக்கு சென்று தரவிறக்கி நிறுவி கொள்ளுங்கள். இது சிஸ்டம் டிரேயில் அமர்ந்து கொண்டு வேலை செய்யும். இது அனைத்து விண்டோஸ் கணினிகளிலும் வேலை செய்யும்.

நீங்கள் லினக்ஸ் உபயோகிப்பாளராக இருந்தால் இதே வேலையை செய்ய மென்பொருளை இந்த சுட்டியில் சென்று தரவிறக்கி கொள்ளுங்கள்.

தொடர்புடைய இடுகைகள்

கூகிள் மீதான தாக்குதல் : சீனாவின் பங்கு?

2010-01-18T13:38:00.000-08:00

சீனாவிலிருந்து கூகிள் வெளியேறலாம் என்று ஏற்கனவே ஒரு இடுகை எழுதி இருந்தேன். அதன் தொடர்ச்சியாக தற்போது வரும் செய்திகள் அதிர்ச்சியூட்டும் வண்ணம் உள்ளன.

ஏதோ ஹேக்கர்கள் செய்த வேலைக்கா கூகிள் வெளியேறுகிறது? என்ற சந்தேகம் ஏற்கனவே இருந்தது. இப்போது அந்த சந்தேகம் தெளிவாகி வருகிறது. சீன அரசே இது போன்ற ஹேக்கிங் வேலைகளில் ஈடுபட்டிருக்கலாம் என்ற சந்தேகத்தை எழுப்பி செய்திகள் வர துவங்கி உள்ளன. பல நாடுகளின் பாதுகாப்பு தொடர்பான விஷயங்கள் களவாடப்பட்டு இருக்கலாமோ? என்ற அச்சம் உலக நாடுகளிடையே பரவ தொடங்கி இருக்கிறது.

கூகுளின் சேவையான ஜிமெயில் உபயோகித்த மனித உரிமை ஆர்வலர்களின் தகவல்கள் திருடப்பட்டன என்று கூகிள் தெரிவித்து இருந்தது. இது பழைய செய்தி. இப்போது இந்த திருட்டு வேலையில் கூகிள் சீன அலுவலகத்தில் பணிபுரிந்தவர்கள் உதவி இருக்கலாம் என்று Reuters செய்தி வெளியிட்டு உள்ளது. இது குறித்து கூகுளிடம் கேட்டதற்கு வதந்திகளுக்கு பதில் அளிக்க முடியாது என்று கூறி விட்டது. இந்த தாக்குதல்கள் பயனர்கள் கணினியில் மல்வேர்களை (malware) நிறுவி அதன் மூலம் தகவல்கள் திருடப்பட்டதாக கூறுகிறார்கள்.

ஜனவரி 13 -க்கு பிறகு, சீன கூகிள் அலுவலர்கள் கூகிள் இன்டெர்னல் நெட்வொர்க்குகளை அணுக அனுமதி மறுக்கப்பட்டுள்ளதாக தெரிகிறது. பல சீன கூகிள் அலுவலர்கள் விடுமுறையில் அனுப்பப்பட்டு உள்ளதாகவும், சிலர் சீனாவில் இருந்து வேறு நாடுகளுக்கு பணி மாற்றம் செய்யப்பட்டு உள்ளதாகவும் தெரிகிறது.

இது குறித்து கூகுளிடம் கேட்டதற்கு உள்ளுக்குள் நடக்கும் அலுவலக நடவடிக்கைகள் பற்றி வெளியே கருத்து தெரிவிப்பதில்லை என்று கூறி உள்ளார்கள். அமெரிக்க அரசு புகுந்து சீனாவிடம் விளக்கம் கேட்கும் அளவிற்கு பிரச்சினை நடந்திருக்கிறது என்றால், என்னமோ நடந்திருக்கு! நடந்துகிட்டிருக்கு!! மர்மமா இருக்குது!!. கூகிள் இன்னும் சில தினங்களில் சீன அரசுடன் பேச போவதாக அறிவித்து உள்ளார்கள்.

இந்த கூகிள் மீதான தாக்குதலுக்கு 'ஆபரேசன் அரோரா' (Operation Aurora) என்று பெயரிட்டு உள்ளார்கள். மைக்ரோசாப்ட்டின் இணைய உலாவி இன்டர்நெட் எக்ஸ்ப்ளோரரில் உள்ள பாதுகாப்பு ஓட்டையே இந்த தாக்குதலுக்கு பயன்பட்டதாக Macafee இணையதளம் செய்தி வெளியிட்டு உள்ளது. இது தகவல்கள் திருடப்பட வாய்ப்பாக அமைந்ததாகவும் கூறி உள்ளது. பிரெஞ்சு மற்றும் ஜெர்மன் அரசுகள் மக்களை இன்டர்நெட் எக்ஸ்ப்ளோரர் உபயோகிக்க வேண்டாம் என்று அறிவுறுத்தி உள்ளன.

ஜிமெயில் போலவே யாஹூ உள்பட பல நிறுவனங்களின் மின்னஞ்சல் சேவைகள் இந்த தாக்குதலில் பாதிக்க பட்டிருக்கலாம். கூகிள் இது தொடர்பாக தொடர்ந்து விசாரித்து வருவதாக கூறுகிறது. இந்த தாக்குதலின் பல விசயங்களை வெளியிடாமல் கூகிள் மௌனம் காத்து வருவது உண்மை. அவை கூகுளுக்கும், அமெரிக்க அரசுக்குமே வெளிச்சம்.

நம்மூர் செய்திக்கு வருவோம். சீனா இந்திய கணினிகளை தாக்க முயன்றதாக இந்திய பாதுகாப்பு செயலர் நாராயணன் டைம்ஸ் இதழுக்கு அளித்த பேட்டியில் தெரிவித்து உள்ளார். தனது அலுவலகம், அரசு நிறுவன கணினிகள் டிசம்பர் 15 அன்று தாக்குதலுக்கு உள்ளானதாக கூறுகிறார். இது போன்று சைபர் தாக்குதல் நடப்பது முதல் முறை அல்ல என்கிறார்.

PDF ஆவணம் ஒன்று டிராஜனுடன்(trojan) இணைத்து மின்னஞ்சல் மூலம் அனுப்பி இந்த தாக்குதல் நிகழ்த்தப் பட்டதாக கூறுகிறார். இது சீனாவில் இருந்ததுதான் வந்தது என்றும், துல்லியமாக எந்த இடத்தில் இருந்து வந்தது என்று கண்டறிவது கடினம் என்றும் கூறியுள்ளார்.சில மாதங்களுக்கு முன்பு சீனா இந்திய ராணுவ கணினிகளை தாக்கி பல தகவல்களை திருடியது என்பது இங்கு குறிப்பிட வேண்டிய விஷயம். அமெரிக்காவின் பாதுகாப்பு துறை கணினிகள் சீனாவிலிருந்து அதிக தாக்குதலுக்கு உள்ளாகின என்ற குற்றசாட்டும் ஏற்கனவே உண்டு. இணையத்தில் சீனர்களின் அத்துமீறல்கள் தற்போது வெளிச்சத்திற்கு வர ஆரம்பித்து இருக்கின்றன.

இந்நிலையில் சீனாவில் கூகுளின் போட்டியாளரான தேடல் தளம் Baidu.cn தாக்குதலுக்கு உள்ளாக்கப் பட்டு நான்கு மணி நேரங்கள் செயலிழந்து போனது. 'இரானியன் சைபர் ஆர்மி' என்ற பெயரில் சிலர் இந்த தாக்குதலை செய்ததாக கூறி கொள்ளுகிறார்கள். இவர்கள்தான் ஒரு மாதத்திற்கு முன்பு ட்விட்டர் தளத்தையும் தாக்கியவர்கள். இது குறித்த வீடியோ செய்தி இங்கே.

அவ்வப்போது சீனா மீது சைபர் தாக்குதல் தொடர்பான புகார்கள் வந்திருந்தாலும், இந்த முறை கூகிள் எழுப்பி உள்ளதால் இது உற்று நோக்கப்படுகிறது. உலக நாடுகளுக்கு பெரும் அச்சுறுத்தல் சக்தியாகவே சீனா மாறி வருகிறது. உலக நாடுகள் இந்த விசயத்தில் ஒரு கண்டிப்பான முடிவை எடுத்து, இந்த பூனைக்கு மணி கட்ட வேண்டிய நேரம் இது.

இந்த புகார்களுக்கு சீனாவிடம் கேட்டால், "ஹேக்கிங் வேலை எந்த வடிவில் இருந்தாலும், சீனாவில் சட்டப்படி தடை செய்யப்பட்டுள்ளது." என்ற பதில் வருகிறது.

நல்ல பதில்!

தொடர்புடைய இடுகைகள்

பயர்பாக்ஸ், குரோமில் இன்டர்நெட் எக்ஸ்ப்ளோரர் டேப்

2010-01-17T14:11:00.000-08:00

என்னதான் பயர்பாக்ஸ், குரோம், ஒபேரா என்று பாதுகாப்பான இணைய உலாவிகள் வந்துவிட்டாலும் சில இணையதளங்கள் மைக்ரோசாப்ட்டின் இன்டர்நெட் எக்ஸ்ப்ளோரர் இணைய உலாவியில் மட்டும் செயல்படும்படி வடிவமைக்க படுகின்றன. இன்டர்நெட் எக்ஸ்ப்ளோரரில் மட்டும்தான் செயல்படுவேன் என்று அடம்பிடிக்கும் சில இணையதளங்களை நீங்கள் கண்டிருக்க கூடும்.

நீங்கள் இணைய பக்கங்களை வடிவமைக்கும் போது அவை அனைத்து இணைய உலாவிகளிலும் சரியாக தெரிகிறதா என்று பார்த்து வடிவமைக்க வேண்டும். நீங்கள் இன்டர்நெட் எக்ஸ்ப்ளோரர் உபயோகிக்க விரும்பாதவராக இருந்தாலும் இது போன்ற தருணங்களில் இன்டர்நெட் எக்ஸ்ப்ளோரர் உபயோகிக்க நிர்பந்த படுத்த படுவீர்கள்.

நீங்கள் பயர்பாக்ஸ், குரோம் உபயோகிப்பாளராக இருந்தால் ஒரு சிறிய நீட்சியை நிறுவுவதன் மூலம் உங்கள் விருப்ப இணைய உலாவிகளுக்கு உள்ளேயே தனி டேப்(Tab)ஆக இன்டர்நெட் எக்ஸ்ப்லோரரை பயன்படுத்தி கொள்ள முடியும்.

மொசில்லா பயர்பாக்சில் :- பயர்பாக்சில் IE Tab நீட்சியை நிறுவ இந்த சுட்டிக்கு சென்று தரவிறக்கி நிறுவி கொள்ளுங்கள். பயர்பாக்சில் உங்கள் விருப்ப இணைய பக்கத்தில் இருக்கும் போது IE Tab ஐகானை கிளிக் செய்தால் அந்த பக்கம் தனி டேப்பில் இன்டர்நெட் எக்ஸ்ப்ளோரரில் திறக்கும்.

கூகிள் குரோமில் :- குரோமில் IE Tab நீட்சியை நிறுவ இந்த சுட்டிக்கு சென்று தரவிறக்கி நிறுவி கொள்ளுங்கள். இதிலும் IE Tab ஐகானை கிளிக் செய்யும் போது நீங்கள் இருந்த இணைய பக்கம் தனி டேப்பில் இண்டநெட் எக்ஸ்ப்ளோரரில் திறக்கும்.

இதன் மற்றொரு பயன் என்னவெனில், நீங்கள் ஒரு இணைய தளத்தில் ஒன்றிற்கு மேற்பட்ட பயனர் கணக்கு வைத்து இருக்கும் போது ஒரு பயனர் கணக்கினை உங்கள் விருப்ப இணைய உலாவி (குரோம்/பயர்பாக்ஸ்) டேப்பிலும் மற்றொரு கணக்கை இன்டர்நெட் எக்ஸ்ப்ளோரர் டேப்பிலும் திறந்து இரண்டு கணக்குகளிலும் ஒரே நேரத்தில் வேலை செய்து கொள்ள முடியும்.

உதாரணத்திற்கு நீங்கள் இரண்டு ஜிமெயில் கணக்குகள் வைத்து இருப்பதாக கொள்ளுவோம். இரண்டு கணக்குகளையும் தனிதனி டேப்புகளில் (Firefox Tab + IE Tab) திறந்து கொண்டு ஒரே நேரத்தில் வேலை செய்து கொள்ளலாம்.

இந்த நீட்சி உங்களுக்கு இன்டர்நெட் எக்ஸ்ப்ளோரர் தேவை படும் போது அதனை தனியே ஒரு விண்டோவாக திறக்காமல் உங்கள் விருப்ப இணைய உலாவிகளின் உள்ளேயே திறந்து கொள்ள உதவுகிறது. இது இணையத்தில் உலவும் போது சில சந்தர்ப்பங்களில் தேவைப்படும்.

தொடர்புடைய இடுகைகள்

தமிழ் யூனிகோட் எழுத்துருக்கள் தரவிறக்க

2010-01-17T07:58:00.000-08:00

பின்னூட்டங்களில் பல அன்பர்கள் உதவி கேட்டு மறுமொழி இட்டு வருகிறார்கள். பெரும்பாலும் என்னால் உதவ முடிந்த கேள்விகளுக்கு இடுகைகள் இட்டு வந்திருக்கிறேன். தற்சமயம் தமிழ் யூனிகோட் எழுத்துருக்கள் கோரி பல பின்னூட்டங்கள் வந்த வண்ணம் உள்ளன.

இந்த துறையில் எனக்கு எவ்வித அனுபவமும் இல்லை என்பதால் அதற்கான உதவி செய்ய இயலாது இருந்தது. இன்று நேரம் கிடைத்த போது இணையத்தில் தமிழ் எழுத்துருக்களுக்காக தேடினேன். சில நல்ல எழுத்துருக்கள் கிடைத்தன. அவற்றை பகிர இந்த இடுகை.

தமிழ் யூனிகோட் எழுத்துருக்களை பொறுத்தவரை சிலர் தன்னார்வத்தில் பல எழுத்துருக்களை அறிமுகப்படுத்தி உள்ளனர். அந்த எழுத்துருக்களை அறிந்து கொள்ள அழகி இணையதளத்தின் இந்த பக்கம் மிகவும் உதவியது.

ஹாய்கோபி இணையதளத்தில் அட்டகாசமான சில எழுத்துருக்களை காண நேர்ந்தது. மொத்தம் பத்து எழுத்துருக்கள் உள்ளன. இந்த சுட்டிக்கு சென்று உங்களுக்கு தேவையானவற்றை தரவிறக்கி கொள்ளுங்கள். எழுத்துருக்களின் மாதிரி வடிவ படங்களும் அந்த பக்கத்தில் உள்ளன.

ILDC தளத்தின் இந்த சுட்டியில் மொத்தம் ஐம்பது எழுத்துருக்கள் உள்ளன. அனைத்து ஒருங்கிணைக்கப்பட்டு ZIP வடிவில் கிடைக்கின்றன. நேரடியாக தரவிறக்க இந்த சுட்டியை கிளிக் செய்யவும். தரவிறக்கிய பின் ZIP கோப்பை தனியே ஒரு போல்டரில் Extract செய்து கொள்ளவும். இந்த எழுத்துருக்களின் மாதிரி வடிவங்களை இந்த சுட்டியில் காணவும்.

மேலும் சில தமிழ் யூனிகோட் எழுத்துருக்கள் இந்த சுட்டி, இந்த சுட்டிகளில் உள்ளன. மாதிரி வடிவங்களும் உள்ளன. தேவையானவற்றை தரவிறக்கி கொள்ளுங்கள்.

தரவிறக்கிய இந்த எழுத்துருக்களை உங்கள் விண்டோஸ் கணினியில் நிறுவுவது எப்படி? என்று பார்ப்போம். தரவிறக்கிய அனைத்து எழுத்துருக்களையும் ஒரே போல்டரில் போட்டு வைத்துக் கொள்ளவும். அனைத்து எழுத்துரு கோப்புகளையும் செலக்ட் செய்து Copy செய்து கொள்ளவும். Copy செய்த இந்த கோப்புகளை My Computer திறந்து கொண்டு C: -> Windows -> Fonts என்ற போல்டரில் பேஸ்ட் செய்து கொள்ளவும்.

இனி எழுத்துருக்களை நீங்கள் உபயோகிக்க விரும்பும் இடங்களில் நீங்கள் நிறுவிய எழுத்துருக்கள் கிடைக்கும்.

இந்த அருமையான எழுத்துருக்களை உருவாக்கிய அனைவருக்கும் நன்றி தெரிவித்து கொள்ளுவோம். உங்களுக்கு மேலும் தமிழ் யூனிகோட் எழுத்துருக்கள் தெரிந்திருந்தால் பின்னூட்டத்தில் தெரிவிக்கவும். பலருக்கும் மிகவும் உபயோகமாக இருக்கும்.

தொடர்புடைய இடுகைகள்

மொபைல் வீடியோவை இணையத்தில் நேரடி ஒளிபரப்ப

2010-01-16T00:43:00.000-08:00

சுற்றுலா, பிறந்தநாள், விழாக்கள் போன்றவற்றிற்கு செல்லும்போது அந்த நிகழ்ச்சியை மொபைலில் பதிவு செய்து உறவினர்கள், நண்பர்களுடன் பகிர்ந்து வந்திருப்போம். மிக வேகமான பகிர்தலுக்கு இணையம் நல்ல ஊடகமாகவே நமக்கு பயன்பட்டு இருக்கிறது.

மொபைலில் எடுக்கும் புகைப்படங்கள், வீடியோக்களை உடனுக்குடன் இணையத்தில் ஏற்றுவது பற்றி ஏற்கனவே இடுகைகள் எழுதி இருந்தேன். மொபைலில் எடுக்கும் வீடியோக்களை நேரடியாக இணையத்தில் ஒளிபரப்புவது எப்படி? என்று இப்போது பார்ப்போம்.

இது ஒன்றும் கடினமான வேலை கிடையாது. இதற்கு தேவை கேமரா வசதி உள்ள மொபைல் உள்ள போன், மொபைலில் நல்ல வேகமான (3G or Wifi) இணைய இணைப்பு. இதனை சிறப்பாக செய்வதற்கு இணையத்தில் Qik எனும் இணையதளம் சிறப்பான சேவை வழங்குகிறது.

Qik.com சென்று பயனர் கணக்கு உருவாக்கி கொள்ளுங்கள். நீங்கள் பேஸ்புக், டிவிட்டர் பயனராக இருந்தால் அதனை உபயோகித்து Qik -ல் பயனராகி கொள்ள முடியும். அடுத்து அவர்கள் வழங்கும் சிறிய மென்பொருளை தரவிறக்கி உங்கள் மொபைலில் நிறுவி கொள்ள வேண்டும். எந்தெந்த மொபைல் மாடல்கள் சப்போர்ட் செய்யபடுகிறது என்பதனை இந்த சுட்டியில் காணவும். உங்கள் மொபைல் அந்த பட்டியலில் இருந்தால் மென்பொருளை தரவிறக்கி உங்கள் மொபைலில் நிறுவி கொள்ளுங்கள்.

இந்த மென்பொருளை உபயோகித்து நீங்கள் எடுக்கும் மொபைல் வீடியோக்களை நேரடியாக இணையத்தில் ஒளிபரப்புங்கள். வீடியோக்கள் பதிவு செய்யப்பட்டு Qik இணையதளத்தில் ஒளிபரப்பப்படும், சேமிக்கப்படும். உங்கள் ஒளிபரப்பு அனைவரும் பார்க்கும்வண்ணம் பப்ளிக் ஆக அமைந்து இருக்கும். அதனை நீங்கள் அனுமதிப்பவர்கள் மட்டும் பார்க்கும்படி பிரைவேட் ஆக அமைத்து கொள்ளும் வசதியும் உண்டு.

Qik -ல் சேமிக்கப்படும் உங்கள் வீடியோக்களை நீங்கள் பேஸ்புக், ட்விட்டர், யுடியூப் போன்ற சமூக தளங்களில் நீங்கள் பகிர்ந்து கொள்ளலாம். உங்கள் பிளாக்குகளில் Embed செய்தும் கொள்ளலாம். Qik பயனர்களின் நேரடி ஒளிபரப்பு வீடியோக்களையும், சேமிக்க பட்டவற்றையும் இந்த சுட்டியில் காணுங்கள். மொபைல் உபயோகிப்பாளர்கள் இடையே இந்த இணைய சேவை மிகுந்த வரவேற்பை பெற்றுள்ளது.

தொடர்புடைய இடுகைகள்

கூகிள் வாய்ஸ் விரிவான அறிமுகம்

2010-01-15T08:23:00.000-08:00

மிகவும் உபயோகமான பல்வேறு சேவைகளை இணையத்தில் வழங்கி வரும் கூகுளின் மற்றுமொரு சேவைதான் கூகிள் வாய்ஸ் (Google Voice).அது குறித்து ஓரளவுக்கு அறிமுகம் கொடுக்கும் வண்ணமே இந்த இடுகை. உங்களிடம் உள்ள தொலைபேசிகளை ஒருங்கிணைத்து பல சிறந்த வசதிகளை இந்த சேவை வழங்குகிறது.

ஒப்பிட்டு சொல்ல வேண்டும் என்றால் இது ஜிமெயில் போன்றதொரு சேவைதான். மற்றவர்களுக்கு அனுப்ப வேண்டிய செய்தியை குரல் வழி அனுப்ப முடியும். உங்களிடம் உள்ள பல தொலை பேசிகளுக்கு ஒரே எண்ணை கூகிள் வாய்ஸ் மூலம் பயன்படுத்தி கொள்ள முடியும். மேலும் பல சிறப்பம்சங்கள் இந்த சேவையில் உண்டு.

செய்திகளை உங்கள் குரல்வழி பதிவு செய்து மெயிலாக அனுப்பலாம். அனுப்பபடுகிற வாய்ஸ் மெயில்களை கேட்கலாம். தரவிறக்கலாம். வாய்ஸ் மெயில்கள் எழுத்துகளாக transcript செய்யப்பட்டு அவற்றை மெயில் போன்று வாசித்து கொள்ளவும் முடியும். இவை உங்கள் மொபைலுக்கு எஸ்எம்எஸ்சாக வந்து சேரும்படியும் அமைத்து கொள்ளலாம்.

இதனை உபயோகிக்கும் போது உங்களுக்கென்று தனியே போன் நம்பர் போன்று கூகிள் வாய்ஸ் எண் பெற்று கொள்ள முடியும். இதனை உங்கள் தொலைபேசி, மொபைல் போன்களுடன் தொடர்பு படுத்தி கொள்ள முடியும்.உதாரணத்திற்கு உங்களை தொடர்பு கொள்வதற்கு வீட்டு தொலைபேசி, அலுவலக தொலைபேசி, மொபைல் என்று மூன்று எண்கள் இருப்பதாக கொள்வோம். இந்த மூன்று எண்ணையும் உங்கள் கூகிள் எண்ணுடன் தொடர்புபடுத்தி கொள்ள முடியும்.

உங்களை அழைப்பவர் உங்கள் கூகிள் எண்ணுக்கு அழைக்கும் போது உங்களுக்கு உள்ள மூன்று போன்களிலும் ரிங் அடிக்கும். அல்லது உங்கள் கூகிள் எண்ணில் தொடர்பு கொண்டால் காலை பத்து மணியில் இருந்து மாலை ஐந்து மணிவரை உங்கள் அலுவலக போனில் அழைப்பு (Ring) வரும்படியும், மற்ற நேரங்கள் உங்கள் வீட்டு போனில் தொடர்பு (Ring) கொள்ளும்படியும் உங்கள் கூகிள் எண்ணில் செட்டப் செய்து கொள்ளலாம்.

உங்கள் நண்பர்கள் அழைக்கும் போது மட்டும் மொபைல் எண்ணில் அழைப்பு வரும்படி அமைத்து கொள்ளலாம். வேண்டாதவர்களிடம் இருந்து வரும் அழைப்புகளை நிரந்தரமாக தடை செய்துகொள்ளும் வசதியும் உண்டு. உங்கள் மூன்று போன்களில் எந்த போன் வழியாகவும் கூகிள் வாய்ஸ் மூலம் மற்றவர்களை அழைத்து கொள்ள முடியும்.

நாம் எப்போதும் ஒரே தொலைபேசி எண்ணை வைத்திருப்போம் என்று உறுதியாக கூற முடியாது. தொலைபேசி நிறுவனங்கள் சலுகையுடன் சிறப்பான சேவை வழங்கும் போது அடிக்கடி எண்ணை மாற்றி மற்றொரு சேவைக்கு மாறி கொண்டிருப்போம். இதனால் நமக்கு நிரந்தர தொடர்பு எண் என்பது இயலாத விஷயம். இதற்கும் ஒரு தீர்வு கூகிள் வாய்ஸ் எண்.

நீங்கள் ஆயுளுக்கும் நிரந்தர எண்ணாக கூகிள் வாய்ஸ் எண்ணை வைத்து கொள்ளலாம். நீங்கள் உங்கள் தொலைபேசி எங்களை மற்றும் போது அவற்றை கூகிள் வாய்சில் மாற்றினால் போதுமானது. உங்கள் கூகிள் வாய்ஸ் எண்ணுக்கு அழைக்கும் அழைப்புகள் உங்கள் கொடுத்துள்ள புதிய தொலை பேசி எண்ணுக்கு தானாக மாற்றி விடப்படும்.

கூகிள் வாய்ஸ் மூலம் உலகமெங்கும் தொலைபேசிகளை குறைந்த கட்டணத்தில் அழைத்து கொள்ள முடியும். உங்கள் கூகிள் எண் மூலம் இலவச எஸ்எம்எஸ் அனுப்ப, பெற முடியும். தொலைபேசி பேச்சுக்களை பதிவு (Record) செய்து ஆன்லைனில் சேமித்து கொள்ள முடியும்.

தொலைபேசிகளில் உங்களை அணுக முடியாதபோது 'I am Mr.X .. Please leave your message' என்று அழைப்பவர்கள் அனைவருக்கும் தெரிவிக்கும்படி பொதுவாக அமைத்து கொள்ள முடியும். ஆனால் கூகிள் வாய்ஸ் மூலம் ஒவ்வொரு அழைப்பாளருக்கும் ஏற்றபடி தனிப்பட்ட செய்தியை தெரிவிக்கும்படி உங்களால் அமைத்து கொள்ள முடியும்.

கூகிள் வாய்சை உங்கள் கணினி மூலமும், இணைய இணைப்பு உள்ள மொபைல் போன் மூலமும் உபயோகித்து கொள்ள முடியும். கூகிள் வாய்ஸ் வசதிகள் பற்றி மேலும் அறிந்து கொள்ள இந்த வீடியோக்களை பாருங்கள்.

தற்சமயம் கூகிள் வாய்ஸ் பொது பயன்பாட்டுக்கு வழங்கப்பட வில்லை. சிறப்பு அழைப்பு (Invite) மூலமாகவே நீங்கள் அதனை சோதித்து கொள்ள முடியும். அதுவும் அமெரிக்காவில் வசிப்பவர்களுக்கு மட்டுமே இப்போது வாய்ப்பு வழங்கப்படுகிறது. கூகிள் வாய்ஸ் அழைப்பு (Invite) பெற இந்த சுட்டிக்கு செல்லவும்.