www.thiruma.in

காமன்வெல்த் மாநாடு பிரிட்டிஷ் மகாராணியாரின் உதாரணத்தைப் பின்பற்றுக!

noreply@blogger.com (S R E E) — Wed, 08 May 2013 08:10:46 PDT

காமன்வெல்த் மாநாடு

பிரிட்டிஷ் மகாராணியாரின் உதாரணத்தைப் பின்பற்றுக!

இந்திய அரசுக்கு தொல்.திருமாவளவன் வேண்டுகோள்

இலங்கையில் நடைபெறவுள்ள காமன்வெல்த் நாடுகளின் மாநாட்டில் கலந்துகொள்வதில்லை என பிரிட்டிஷ் மகாராணியார் முடிவுசெய்துள்ளார். காமன்வெல்த் நாடுகளின் கூட்டமைப்பு உருவாக்கப்பட்டு இதுவரை நடைபெற்றுள்ள அனைத்து மாநாடுகளிலும் கலந்துகொண்ட அவர் இலங்கை மாநாட்டைப் புறக்கணித்திருப்பது வரவேற்புக்குரியதாகும். பிரிட்டிஷ் மகாராணியாரின் இந்த அறிவிப்புக்கு விடுதலைச் சிறுத்தைகள் கட்சி தனது நன்றியைத் தெரிவித்துக்கொள்கிறது.

காமன்வெல்த் மாநாட்டில் கலந்துகொள்ளக்கூடாது என்று பல்வேறு நாடுகளிலும் எதிர்ப்புக் குரல்கள் எழுந்துள்ள நிலையில் இந்தியா அம்மாநாட்டில் கலந்துகொள்ளக் கூடாது என்று நாம் ஏற்கனவே வலியுறுத்தி வருகிறோம். தமிழ்நாட்டில் உள்ள அத்தனை அரசியல் கட்சிகளும் இதைக் கூறி வருகின்றன. காங்கிரஸ் கட்சியைச் சேர்ந்த மத்திய அமைச்சர் திரு. ஜி.கே.வாசன் அவர்களும், அக்கட்சியின் மாநிலத் தலைவர் திரு. ஞானதேசிகன் அவர்களும்கூட இந்தக் கோரிக்கையை வழிமொழிந்துள்ளனர்.

இலங்கையில் நடைபெறவுள்ள காமன்வெல்த் நாடுகளின் மாநாட்டில் கலந்துகொள்வ தென்பது அங்கு நடைபெற்ற இனப்படுகொலையை அங்கீகரிப்பதாகிவிடும். அது மட்டுமின்றி, காமன்வெல்த் நாடுகளின் கூட்டமைப்பில் உள்ள அத்தனை நாடுகளும் அடுத்து வரும் இரண்டு ஆண்டுகளுக்கு இலங்கையின் தலைமையை ஏற்றுக்கொள்ள வேண்டிய அவல நிலை ஏற்படும். எனவேதான் இலங்கையில் காமன்வெல்த் மாநாட்டை நடத்தக்கூடாதெனவும் அவ்வாறு நடத்தப்பட்டால் அதில் இந்தியா கலந்துகொள்ளக் கூடாது எனவும் தமிழகத்தைச் சேர்ந்த அரசியல் கட்சிகள் வலியுறுத்தி வருகின்றன. தமிழக மக்களின் உணர்வுகளுக்கு மதிப்பளித்து காமன்வெல்த் மாநாட்டில் பங்கேற்க மாட்டோம் என இந்திய அரசு உடனடியாக அறிவிக்க வேண்டுமென்று விடுதலைச் சிறுத்தைகள் கட்சி சார்பில் வலியுறுத்திக் கேட்டுக்கொள்கிறோம்.

இவண்

தொல்.திருமாவளவன்

பா.ம.க.வினர் சுமத்தும் வீண்பழி - அரசு கவனித்துக்கொண்டிருக்கிறது; அமைதி காப்போம்!

noreply@blogger.com (S R E E) — Mon, 06 May 2013 00:25:32 PDT

பா.ம.க.வினர் சுமத்தும் வீண்பழி

அரசு கவனித்துக்கொண்டிருக்கிறது; அமைதி காப்போம்!

தொல்.திருமாவளவன் அறிக்கை

தமிழகத்தின் சட்டம்-ஒழுங்கையும் பொது அமைதியையும் சீர்குலைக்கும் வகையில் கடந்த ஒரு வார காலமாக திட்டமிட்ட வன்முறையில் பா.ம.க.வினர் ஈடுபட்டு வருவதை நாட்டு மக்கள் நன்கு அறிவர். இதுவரையில் 500க்கும் மேற்பட்ட பேருந்துகள் சேதமடைந்துள்ளதாகவும், 125க்கும் மேற்பட்ட அரசுப் பேருந்துகள் மற்றும் தனியார் வண்டிகள் தீ வைத்துக் கொளுத்தப்பட்டிருப்ப தாகவும், ஊடகங்களின் வாயிலாக அறிய முடிகிறது. அத்துடன், ஆளுங்கட்சி சட்டமன்ற உறுப்பினர்கள் இருவரின் வீடுகளின் மீது பெட்ரோல் குண்டுகளை வீசித் தாக்குதல் நடத்தியுள்ளனர்.

திண்டிவனம் - மரக்காணம் சாலையில் முறுக்கேறி என்னுமிடத்தில் பா.ம.க. வன்முறைக் கும்பல் கல்வீசித் தாக்கியதில் தனியார் வண்டியின் ஓட்டுநர் ஒருவர் பலியாகியிருக்கிறார். திண்டிவனம் அருகே தரைப்பாலம் ஒன்றை வெடிகுண்டு களை வைத்துத் தகர்த்துள்ளனர்.

இவ்வாறு, பா.ம.க.வினர் நடத்தும் திட்டமிட்ட வன்முறை வெறியாட்டத்தினால் கோடிக்கணக்கான ரூபாய் மதிப்புள்ள அளவில் சொத்துக்கள் சேதமடைந்துள்ளன. மேலும், பொதுமக்களின் பாதுகாப்புக் கருதி, அரசு, இரவு வேளைகளில் வடமாவட்டங்களெங்கும் போக்குவரத்தை நிறுத்தியுள்ளதால், அப்பாவிப் பொதுமக்கள் பெரும் அவதிக்கு ஆளாகியுள்ளனர் என்பதுடன், அரசுக்கு இதனால் பெருமளவில் வருவாய் இழப்பும் ஏற்பட்டிருக்கிறது. இத்தகைய வன்முறைச் செயல்களுக்கு வெளி மாநிலங்களிலிருந்து கூலிப் படையினரை இறக்கியுள்ளனர் என்றும் ஒரு சில ஊடகங்களில் செய்திகள் வெளியாகியுள்ளன.

உண்மை நிலை இவ்வாறிருக்க, அப்பாவி தலித் மக்கள் மீதும், விடுதலைச் சிறுத்தைகள் மீதும் வீண்பழி சுமத்தும் முயற்சியில் பா.ம.க.வினர் ஈடுபட்டு வருவது வேடிக்கையாக உள்ளது. விழுப்புரம் நகரத்தில் தனியார் பேருந்து ஒன்றின் மீது கல்வீசிய தேசிங்கு என்பவர் காவல்துறையினரால் கைது செய்யப்பட்டிருக்கிறார். அவர் குடிபோதையில் இருந்ததாகவும், அரசு ஓட்டுநராகப் பணியாற்றக் கூடியவர் என்பதும் விசாரணையில் தெரிய வருகிறது. அவருக்கும் விடுதலைச் சிறுத்தைகள் கட்சிக்கும் எந்தத் தொடர்பும் இல்லை. இதனை நடுநிலையாளர்கள் விசாரித்தால் உண்மையை அறிந்துகொள்ள முடியும். வேண்டுமென்றே விடுதலைச் சிறுத்தைகளின் மீது வீண்பழி சுமத்தி, தங்களை அகிம்சாவாதிகளாகக் காட்டிக்கொள்ள முயற்சிக்கிறார்கள்.

வேலூர் மாவட்டம், காட்பாடி அருகே லத்தேரி என்னுமிடத்தில் நடந்த கல்வீச்சு தொடர்பாக காவல்துறையினர் இரு சக்கர வண்டியில் வந்த இருவரைப் பிடித்து விசாரித்துள்ளனர். பின்னர் அவர்களுக்கும் கல்வீச்சு சம்பவத்துக்கும் தொடர்பில்லை என்பதை அறிந்து அவர்கள் இருவரையும் காவல்துறையினர் விடுவித்துள்ளனர். அவர்கள் எந்த சமூகத்தைச் சேர்ந்தவர்கள் என்று காவல்துறையினருக்கும் தெரியாது என்பதுதான் விசாரணையில் தெரிய வருகிறது. ஆனால், அவர்கள் இருவரும் விடுதலைச் சிறுத்தைகள் என்றும் காவல்துறையினர் வேண்டுமென்றே அவர்களை விடுவித்துவிட்டார்கள் என்றும் அப்பட்டமான பொய்யைப் பரப்புகின்றனர்.

பா.ம.க.வினர் செய்யும் வன்முறைகளுக்கும் அவர்கள் பரப்பும் பொய்யுரைகளுக்கும் எல்லையே இல்லை என்கிற அளவுக்குப் போய்க்கொண்டிருக்கிறது. தமிழகத்தில் தங்களைத் தவிர மற்றவர்கள் அனைவருமே விவரமில்லாத மூடர்கள் என்று நினைத்து பா.ம.க.வினர் செயல்படுவதாகத் தெரிகிறது. முழுப் பூசணிக்காயை பிடி சோற்றில் மறைக்க முயற்சிக்கிறார்கள்.

வன்முறையில் ஈடுபடுகிறவர்கள் யாராக இருந்தாலும், அவர்கள் மீது அரசு கடும் நடவடிக்கை எடுக்க வேண்டும் என்றும், உரிய பாதுகாப்புடன் போக்குவரத்தை இயக்குவதற்கு அரசு போதிய நடவடிக்கைகளை மேற்கொள்ள வேண்டுமென்றும் விடுதலைச் சிறுத்தைகளின் சார்பில் கேட்டுக்கொள்கிறேன்.

விடுதலைச் சிறுத்தைகள் மற்றும் தலித் மக்களின் மீது அவதூறுகளைப் பரப்பி வீண்பழி சுமத்தும் பா.ம.க.வினர் மீது நடவடிக்கை எடுக்க வலியுறுத்தி காவல்துறை மற்றும் நீதித் துறையினை அணுகுவோம் என்பதைத் தெரிவித்துக்கொள்கிறேன்.

நல்லோர், சனநாயகத்தின் மீது நம்பிக்கையுள்ளோர், நடுநிலையோடு அனைத்தையும் சீர்தூக்கிப் பார்க்கும் பெரியோர் மற்றும் நாடாளுவோர் யாவரும் நாட்டின் நடப்புகளை உன்னிப்பாகக் கவனித்துக்கொண்டிருக்கிறார்கள். இத்தகைய சூழலில், விடுதலைச் சிறுத்தைகளும் தலித் சமூகத்தைச் சேர்ந்த பொதுமக்களும் அமைதி காப்பதுடன் மிகவும் விழிப்பாகவும் எச்சரிக்கையாகவும் இருக்க வேண்டுமெனக் கேட்டுக்கொள்கிறேன்.

இவண்

தொல்.திருமாவளவன்

மேற்கண்ட அறிக்கையை தங்கள் ஊடகத்தில் வெளியிட்டு உதவுமாறு கேட்டுக்கொள்கிறேன்.

ராமதாஸின் ஆயுதம் அவரையே தாக்கும்! - கல்கி வார இதழில் தலைவரின் நேர்காணல்

noreply@blogger.com (S R E E) — Sat, 04 May 2013 01:26:54 PDT

விடுதலைச் சிறுத்தைகளின் மே நாள் செய்தி

noreply@blogger.com (S R E E) — Tue, 30 Apr 2013 00:26:45 PDT

உலகெங்கும் இருக்கும் உழைக்கும் மக்களின் திருநாளாக மே நாள் கொண்டாடப்படுகிறது. உழைப்பை அங்கீகரிக்கும் இந்த நாளில் நாடெங்கும் இருக்கும் தொழிலாளத் தோழர்களுக்கு விடுதலைச் சிறுத்தைகள் மே நாள் வாழ்த்துகளைத் தெரிவித்துக்கொள்கிறது.

உலகமயக் கொள்கையின் காரணமாக உழைக்கும் மக்களின் உரிமைகள் ஒவ்வொன்றாகப் பறிக்கப்பட்டு வரும் இன்றைய சூழலில் உழைக்கும் மக்கள் ஒன்றிணைந்து நிற்க வேண்டியது அவசியம். சாதியின் பெயராலும் மதத்தின் பெயராலும் உழைக்கும் மக்களைப் பிளவுபடுத்தும் சக்திகளை அடையாளம் கண்டு அவர்களது சுயநல சதித் திட்டங்களை முறியடிக்க வேண்டியது தொழிலாளர் வர்க்கத்தின் கடமையாகும்.

கடல் தொழிலாளிகள் எனப்படும் மீனவ மக்கள் இலங்கைக் கடற்படையால் தொடர்ந்து தாக்கப்பட்டு வருகிறார்கள். சிங்களக் கொடுஞ்சிறைகளில் பல வாரங்களாக 56 மீனவர்கள் சிறைவைக்கப்பட்டுள்ளனர். சிங்கள அரசு தொடர்ந்து அவர்களது காவலை நீட்டித்து வருகிறது. இன்னலுக்காளாகி சிறையில் வாடும் கடல் தொழிலாளர்களாம் மீனவர்களை மீட்பதற்கு இந்த மே நாளில் உறுதியேற்போம் என விடுதலைச் சிறுத்தைகள் சார்பில் அனைவரையும் அறைகூவி அழைக்கிறோம்.

இவண்

தொல்.திருமாவளவன்

உண்மையை உலகுக்கு உரத்துச் சொன்ன தமிழக முதல்வருக்கு நன்றி!

noreply@blogger.com (S R E E) — Mon, 29 Apr 2013 22:05:57 PDT

மரக்காணம் வன்முறை

உண்மையை உலகுக்கு உரத்துச் சொன்ன

தமிழக முதல்வருக்கு நன்றி!

தொல்.திருமாவளவன் அறிக்கை

மரக்காணம் வன்முறை தொடர்பாக தமிழக சட்டப்பேரவையில் இன்று கவன ஈர்ப்புத் தீர்மானம் கொண்டுவரப்பட்டது. இவ்விவாதத்தில் கலந்துகொண்டு தேமுதிக சார்பில் பண்ருட்டி இராமச்சந்திரன், இந்திய கம்யூனிஸ்ட் கட்சி சார்பில் குணசேகரன், மார்க்சிஸ்ட் கம்யூனிஸ்ட் கட்சியின் சார்பில் கே.பாலகிருஷ்ணன், புதிய தமிழகம் கட்சி சார்பில் மருத்துவர் கிருஷ்ணசாமி, இந்திய குடியரசுக் கட்சி சார்பில் செ.கு. தமிழரசன், சமத்துவ மக்கள் கட்சி சார்பில் சரத்குமார் ஆகியோர் உரையாற்றியுள்ளனர். நிறைவாக, மாண்புமிகு தமிழக முதல்வர் அவர்கள் விளக்கம் அளித்துள்ளார்.

இவ்விவாதத்தில் பங்கேற்று உரையாற்றிய அனைவரும் மரக்காணத்தில் தலித் மக்கள் தாக்கப்பட்டது, குடிசைகள் எரிக்கப்பட்டது, அரசுப் பேருந்துகள், தனியார் வண்டிகள் தாக்கப்பட்டது மற்றும் எரிக்கப்பட்டது ஆகிய வன்முறைகளைக் கண்டித்துள்ளனர்.

நிறைவாக உரையாற்றிய முதல்வர் அவர்கள், மாமல்லபுரத்தில் நடந்த விழாவில் பேசிய பா.ம.க. நிறுவனர் மருத்துவர் இராமதாசு காவல்துறையின் நிபந்தனைகளை மீறியதைச் சுட்டிக்காட்டி அவர்கள் மீது வழக்குப் பதிவுசெய்யப்பட்டுள்ளது என்று தெரிவித்துள்ளார். அத்துடன், அவ்விழாவில் பங்கேற்பதற்காக வந்தவர்கள் பெரும்பாலும் குடிபோதையில் வந்துள்ளனர் என்றும் அவர்கள் பொதுமக்களுக்கு இடையூறுதரும் வகையில் வன்முறையில் ஈடுபட்டதையும் ஆபாசமாகப் பேசியதையும் சுட்டிக்காட்டியுள்ளார்.

“இந்த விழாவில் கலந்துகொள்ள வந்தவர்கள் பயணம் செய்த வாகனங்களின் பதிவு எண்களை காவல்துறையினர் பின்னர் ஆய்வு செய்து சரிபார்த்தபோது சில வேன்களின் பதிவு எண்கள் போலியானவை எனத் தெரியவந்துள்ளது. இரு சக்கர வாகனங்களுக்கு வழங்கப்பட்ட பதிவு எண்களை சில வேன்களுக்குப் போலியாகப் பயன்படுத்தியுள்ளனர். எனவே வேண்டுமென்றே சட்டம்-ஒழுங்குப் பிரச்சனையை ஏற்படுத்துவதற்காகத் திட்டமிட்டுள்ளனர் என்று தெரிய வருகிறது” எனக் கூறியிருப்பதன் மூலம் யார் திட்டமிட்ட வன்முறையில் ஈடுபட்டுள்ளனர் என்பதை மாண்புமிகு தமிழக முதல்வர் அவர்கள் தெளிவுபடுத்தியுள்ளார்.

அப்பாவி தலித் மக்களின் குடிசைகளையும், இசுலாமியர்களின் கடைகளையும் தாக்கித் தீ வைத்திருப்பதுடன் அரசுப் பேருந்துகளையும் தனியார் வண்டிகளையும் கொளுத்தியுள்ளனர் என்பதை அம்பலப்படுத்தியுள்ளார். மாநாட்டிற்கு வந்தவர்கள் தாறுமாறாக வண்டி ஓட்டியதில் ஏற்பட்ட விபத்தில் இருவர் உயிரிழந்துள்ளதையும் தெளிவுபடுத்தியுள்ளார்.

நிகழ்ச்சி முடிந்து வீடு திரும்பும்போது வழியில் விடுதலைச் சிறுத்தைகள் கட்சி மற்றும் பிற கட்சிகளின் கொடிகளையும் விளம்பரப் பதாகைகளையும் சேதப்படுத்தியுள்ளனர் என்றும், வாலாஜாபாத் அருகே திடீர் சாலைமறியலில் ஈடுபட்டு பொதுமக்களுக்கு இடையூறு செய்ததையும் குறிப்பிட்டிருக்கிறார்.

மாமல்லபுரம் நிகழ்ச்சிக்காக பா.ம.க.வினர் செய்த விளம்பரங்களில் பிற சமூகத்தினரின் உணர்வுகளைக் காயப்படுத்தும் வகையில் சுவர் விளம்பரங்கள் மற்றும் சுவரொட்டிகளில் எவ்வாறு விளம்பரப்படுத்தியிருந்தனர் என்பதையெல்லாம் சுட்டிக்காட்டியதுடன், வன்முறையைத் தூண்டியவர்கள் மற்றும் ஈடுபட்டவர்கள் மீது சட்டப்பூர்வமான நடவடிக்கைகள் எடுக்கப்படும் என்றும் உறுதியளித்திருக்கிறார்.

பா.ம.க. சட்டமன்ற உறுப்பினர் இவ்விவாதத்தில் கலந்துகொண்டு உரையாற்றியபோது தலித் மக்களின் மீது, குறிப்பாக விடுதலைச் சிறுத்தைகளின் மீது, ஆதாரமில்லாத குற்றச்சாட்டுகளைக் கூறி அவதூறாகப் பேசியபோது, முதல்வர் அவர்கள் குறுக்கிட்டு அவற்றை அவைக்குறிப்பிலிருந்து நீக்கும்படிச் செய்திருக்கிறார்.

பொய்யுரைகளையும், அவதூறுகளையும் திரும்பத் திரும்பச் சொல்லுவதன் மூலம் உண்மையாக்கிவிடலாம் என்று அதட்டிப் பேசி, அதன் மூலம் தமிழகத்தில் அமைதியைச் சீர்குலைக்கவும் அப்பாவி மக்களிடையே மோதலை உண்டுபண்ணவும் திட்டமிட்டவர்களின் சதி முயற்சிகளை முறியடித்திருக்கிறார்.

வாய்மையே வெல்லும்; சனநாயகமே நிலைக்கும் என்பதை உறுதிப்படுத்தும் வகையில் சரியான நேரத்தில் மாண்புமிகு தமிழக முதல்வர் அவர்கள் உண்மையை உலகுக்கு உரத்துச் சொல்லி, தமிழகத்தில் அமைதியை நிலைநாட்டவும் சமூக நல்லிணக்கத்தைப் பேணவும் வழி வகுத்திருக்கிறார்.

முதல்வர் அவர்களின் இந்த விளக்கம் கடந்த சில மாதங்களாக வன்முறைக் கும்பலால் பாதிக்கப்பட்டுவரும் தலித் மக்களுக்கு பெரும் ஆறுதலை அளித்துள்ளது. இந்நிலையில், மாண்புமிகு முதல்வர் அவர்களுக்கும் விவாதத்தில் கலந்துகொண்டு சாதியவாத சக்திகளின் வன்முறைப் போக்குகளைக் கண்டித்து உரையாற்றிய அனைத்துக் கட்சி உறுப்பினர்களுக்கும் விடுதலைச் சிறுத்தைகளின் சார்பில் நெஞ்சார்ந்த நன்றியைத் தெரிவித்துக்கொள்கிறோம்.

அரசியல் உள்நோக்கம் ஏதுமின்றி, உண்மையின் பக்கமும் சனநாயகத்தின் பக்கமும் நின்று குரல்கொடுத்த அனைத்துக் கட்சித் தலைவர்களுக்கும் இந்த நேரத்தில் விடுதலைச் சிறுத்தைகள் மனப்பூர்வமான நன்றியைத் தெரிவித்துக்கொள்கிறது. தமிழகத்தில் அனைத்துத் தரப்பு மக்களும் சாதி-மத வேறுபாடுகளைக் கடந்து நல்லிணக்கமாகவும் அமைதியாகவும் வாழ்வதற்கு கட்சி, தேர்தல் போன்ற வரம்புகளையெல்லாம் தாண்டி, அனைத்துக் கட்சியினரோடும் விடுதலைச் சிறுத்தைகள் என்றும் கைகோர்த்து நிற்போம் என்று உறுதியளிக்கக் கடமைப்பட்டிருக்கிறோம்.

இவண்

தொல்.திருமாவளவன்

மாமல்லபுரம் சாதிவெறிப் பேச்சு - மரக்காணம் தீ வைப்பு சாதிவெறிக் கும்பலைக் கைது செய்ய வலியுறுத்தி மே 2ஆம் நாள் ஆர்ப்பாட்டம் விடுதலைச் சிறுத்தைகள் அறிவிப்பு

noreply@blogger.com (S R E E) — Sun, 28 Apr 2013 00:44:08 PDT

தமிழகத்தில் அண்மைக் காலமாக பா.ம.க.வினர், அப்பாவி தலித் மக்களுக்கு எதிரான திட்டமிட்ட வன்முறை வெறியாட்டத்தை அரங்கேற்றி வருகின்றனர். தமிழகமே தலைகுனியும் வகையில் தருமபுரியில் மூன்று கிராமங்களைத் தீ வைத்துக் கொளுத்தி வெறியாட்டம் போட்டதோடு அதை ஞாயப்படுத்தும் வகையில் கடந்த ஆறு மாத காலமாக திட்டமிட்ட அவதூறு நடவடிக்கைகளிலும் ஈடுபட்டு வருகின்றனர். இதனால் வட மாவட்டங்களில் தலித் மக்கள் குறிவைத்துத் தாக்கப்படுவதும் சேரிகள் கொளுத்தப்படுவதும் அதிகரித்து வருகின்றன. வட மாவட்டங்களில் மட்டுமின்றி தமிழகத்தின் பிற பகுதிகளிலும் சாதிவெறி சக்திகளை ஒருங்கிணைத்து ஏழை எளிய தலித் மக்களுக்கெதிராகத் தூண்டிவிடும் ஆபத்தான போக்குகளையும் கடைப்பிடித்து வருகின்றனர். எதிர்வரும் நாடாளுமன்றத் தேர்தலில் ஒன்றிரண்டு தொகுதிகளிலாவது வெற்றிபெற வேண்டும் என்பதற்காக இத்தகைய காட்டுமிராண்டித்தனமான நடவடிக்கைகள் மூலம் ஒட்டுமொத்தத் தமிழகத்திலும் சட்டம்-ஒழுங்கைச் சீர்குலைத்து வருகின்றனர். தலித்துகள் மற்றும் விடுதலைச் சிறுத்தைகள் மட்டுமின்றி முற்போக்குச் சக்திகளையும், பிற சனநாயக சக்திகளையும் துளியளவும் கூச்சமும் தயக்கமுமின்றி இழிவாகப் பேசியும் வருகின்றனர்.

கடந்த ஏப்ரல் 25ஆம் நாள் மாமல்லபுரத்தில் நடத்திய சாதிச் சங்க விழாவில் தலித் மக்களையும் முற்போக்கான அரசியல் கட்சித் தலைவர்களையும் மிகக் கேவலமான முறையில் பேசியதுடன் அப்பாவி வன்னிய இளைஞர்களுக்கு சாதிவெறியை ஊட்டியுள்ளனர். கடந்த ஆறு மாத காலமாக அவர்கள் செய்த சாதிவெறிப் பிரச்சாரத்தால் மாமல்லபுரம் நிகழ்ச்சிக்கு வந்தவர்கள் கட்டுப்பாடற்ற முறையில் வன்முறையில் இறங்கினர். இதனால் தலித்துகளும் இசுலாமியர்களும் இன்னும் பிற பொதுமக்களும் வெகுவாகப் பாதிக்கப்பட்டுள்ளனர். ஆனால், முழுப் பூசனிக்காயைச் சோற்றில் மறைப்பதுபோல விடுதலைச்சிறுத்தைகள் மீது பழிசுமத்த முயற்சிக்கிறார்கள். மரக்காணம், கழிக்குப்பம் கிராமங்களில் தலித் மக்களின் 15 வீடுகள் கொளுத்தப்பட்டுள்ளன. தலித் மக்கள் மீது கொலைவெறித் தாக்குதல் நடத்தியதில் சேட்டு என்பவர் பலியாகியுள்ளார். ஏகாம்பரம் என்பவர் உயிருக்குப் போராடும் நிலையில் சிகிச்சை பெற்று வருகிறார். மேலும் பல இளைஞர்கள் காயம் அடைந்துள்ளனர். கூனிமேடு என்னுமிடத்தில் இசுலாமியர்களும் பொதுமக்களும் தாக்கப்பட்டுள்ளனர். அரசுப் பேருந்துகளும் பொதுமக்களும் வண்டிகளும் கொளுத்தப்பட்டுள்ளன. ஆனாலும் வன்முறை வெறியாட்டத்தில் ஈடுபட்ட சாதிவெறியர்கள் ஒருவரும் இதுவரையில் கைது செய்யப்படவில்லை.

மாமல்லபுரத்தில் அவர்கள் பேசியதைத் தொடர்ந்து வடமாவட்டங்களில் பல்வேறு இடங்களில் தலித் மக்கள் தாக்குதலுக்குள்ளாகி வருகின்றனர். நேற்று (27-4-2013) திருவண்ணாமலை மாவட்டம் வந்தவாசி அருகே அத்திப்பாக்கம் கிராமத்தைச் சேர்ந்த தலித் மாணவர்கள் இருவர் ஈட்டி, அரிவாள் போன்ற ஆயுதங்களால் தாக்கப்பட்டு உயிருக்கு ஆபத்தான நிலையில் மருத்துவமனையில் அனுமதிக்கப்பட்டுள்ளனர். இந்த வன்முறையில் தொடர்புடைய குற்றவாளிகளும் இதுவரையில் கைது செய்யப்படவில்லை.

சாதிவெறியர்களை ஊக்கப்படுத்தும் வகையில் தமிழக அரசு சட்டப்படியான நடவடிக்கை எதுவும் எடுக்காமல் வேடிக்கை பார்ப்பது வேதனையளிக்கிறது. அரசின் இந்த மெத்தனப்போக்கை விடுதலைச்சிறுத்தைகள் வன்மையாகக் கண்டிக்கிறது. வெளிப்படையாக சாதிவெறியைத் தூண்டிவரும் பா.ம.க. நிறுவனர் இராமதாசு உள்ளிட்ட சாதிவெறிக் கும்பல் அனைவரையும் கைதுசெய்ய வலியுறுத்தி அனைத்து மாவட்டத் தலைநகரங்களிலும் வருகிற 2-5-2013 அன்று விடுதலைச்சிறுத்தைகளின் சார்பில் கண்டன ஆர்ப்பாட்டம் நடைபெறும். முற்போக்கு சக்திகள், சனநாயக சக்திகள் யாவரையும் ஒருங்கிணைத்து இந்த ஆர்ப்பாட்டம் நடைபெறும். தமிழகத்ணில் அமைதியை நிலைநாட்ட, சமூக நல்லிணக்கத்தைப் பாதுகாக்க சனநாயகத்தின் மீது நம்பிக்கை உள்ள அனைவரும் விடுதலைச்சிறுத்தைகளின் இந்த அறப்போராட்டத்திற்கு ஆதரவு நல்கிட வேண்டுகிறோம்.

இவண்

தொல்.திருமாவளவன்

மதுரையில் ஆர்பாட்டம்

noreply@blogger.com (S R E E) — Sun, 28 Apr 2013 01:13:12 PDT

ஓவியர் அணியின் மாவட்டச் செயலாளர்
இராசேந்திரன் ஒன்றிய அமைப்பாளர் ரவி ஆகியோரின் படுகொலையை கண்டித்தும்,
தமிழகத்தில் தலித் தலைவர்களுக்கு பாதுகாப்பு வழங்க கோரியும், வன்கொடுமை
தடுப்புச் சட்டத்தை தீவிரமாக நடைமுறைபடுத்தக் கோரியும், மதுரையில் ஆர்பாட்டம்

தமிழகத்தில் ஆதிக்க சாதிவெறியர்கள் தாழ்த்தப்பட்ட மக்கள்

மீது தாக்குதல் நடத்துவதும், அம்மக்களை வெட்டி படுகொலை செய்வதும்,

தமிழகத்தில் தொடர்ச்சியாக நடைபெற்றுக்கொண்டிருக்கிறது. இதில் பள்ளி

கல்லூரிகளில் படிக்கின்ற தலித் மாணவிகளும் தப்பவில்லை. அவர்களும் வக்கிர

புத்திக்கொண்ட சாதிவெறிக் கயவர்களால் பாலியல் வல்லுறவுகளுக்கு உட்படுத்தி

கொலை செய்யப்படுகிறார்கள். நாமக்கல்லில் காயத்திரி என்கிற கல்லூரி

மாணவியும், வானூரில் திவ்யா என்கிற பள்ளி மாணவியும் கற்பழித்து

படுகொலை செய்யப்பட்ட போது விடுதலைச் சிறுத்தைகள் கட்சியினரும் மற்றும்

அதன் தோழமை இயக்கத்தினர் மட்டுமே போராடினார்கள் என்பது அனைவருக்கும்

நினைவிருக்கும்.

டெல்லியி.....லே கற்பழிக்கப்பட்ட மாணவிக்கு..... தமிழகத்திலே

பொங்கியெழுந்து வீதிக்கு வந்து போராடிய அமைப்புகள் காயத்திரி, திவ்யா

ஆகியோர் கற்பழித்து கொலை செய்யப்பட்ட போது இந்த அமைப்புகள் எல்லாம்

முனைப்பு காட்டவில்லை. இவர்கள் தாழ்த்தப்பட்ட சமூகத்தைச் சார்ந்த

மாணவிகள் என்கிற ஒரே காரணத்திற்காகவே இந்த தமிழ் மாணவிகளுக்காக

போராடுவதற்கு எந்த ஒரு அமைப்பும் முன்வரவில்லை என்பதனை தமிழகத்தில்

புரையோடிக்கிடக்கின்ற சாதியச் சிந்தனை நிரம்பிய இந்த சமுதாயம், தமிழ்

உணர்வாளர்களிடத்திலும், பிற மொழி பேசக்கூடிய மனித இன

உணர்வாளர்களிடத்திலும் மௌனமாகவே விளக்கி விட்டது.

ஒடுக்கப்பட்ட, தாழ்த்தப்பட்ட, பாதிக்கப்பட்ட, மக்கள்

காவல்துறையினரிடத்தில் சென்று நியாயமான முறையில் கொடுக்கும் புகார் மனு

மீது உரிய நடவடிக்கை எடுப்பதற்கே இந்த மக்கள் கொடி பிடித்து காவல்

நிலையத்தை முற்றுகையிடும் அவலநிலை தமிழகத்தில் மட்டுமே உள்ளது. நாம்

போராடி வழக்கு பதிவு செய்துவிட்டால் கூட குற்றவாளிகள் எளிதில்

தப்பிவிடும் வகையிலே சாதாரண பிரிவின் கீழ் வழக்கு பதிவு

செய்துவிடுகிறார்கள். ஆனால் வன்கொடுமையால் பாதிக்கப்பட்டவர்கள் மீது

கடுமையான பிரிவுகளின் கீழ் வழக்கு பதிவு செய்வதில் காவல்துறை அதிகாரிகள்

மிகவும் நேர்த்தியாகவே பயிற்சி பெற்றுள்ளனர். எந்த ஒரு அரசியல்

பிண்ணனியும் இல்லாத தாழ்த்தப்பட்டவனின் தலைமையை ஏற்று,

தாழ்த்தப்பட்டோர் அல்லாத முற்போக்கு சிந்தனையுள்ள மக்களும் விடுதலைச்

சிறுத்தைகள் கட்சியில் நாற்பது விழுக்காடுகளுக்கு மேல் உள்ளார்கள்

என்பதனை மறந்து, விடுதலைச் சிறுத்தைகள் கட்சியை சில காவல்துறை

அதிகாரிகள் சாதியக் கண்ணோட்டத்திலேயே பார்க்கிறார்கள். அதனால்தான்

சென்னையில் நடைபெற்ற மக்கள் ஒற்றுமை பேரணிக்காக உரிய அனுமதிபெற்று

மதுரையில் வைக்கப்பட்டிருந்த விடுதலைச் சிறுத்தைகளின் விளம்பர பதாகைகளை

காவல் துறை அதிகாரிகள் நடு இராத்திரியில் ஏணியில் ஏறி கழற்றியெறிந்து தன்

சாதிவெறியை காட்டியுள்ளனர். .

தாழ்த்தப்பட்ட மக்களின் உரிமைகளுக்காகவும், அம்மக்களின் அரசியல்

அதிகாரத்திற்காகவும், எழுச்சியை ஏற்படுத்தும் வலிமையுள்ள தலித்

தலைவர்களுக்கும், தலித் மக்களின் பிரதிநிதிகளுக்கும், பாதுகாப்பற்ற சூழல்

தமிழகத்தில் உள்ளது. நாகை மாவட்டம் விடுதலைச் சிறுத்தைகள் கட்சியின்

ஓவியர் அணியின் மாவட்டச் செயலாளர் இராசேந்திரன், ஒன்றிய அமைப்பாளர் ரவி

ஆகியோர் பாதுகாப்பற்ற சூழலில்தான் ஆதிக்க சாதிவெறியர்களால் வெட்டி

படுகொலை செய்யப்பட்டனர். திண்டுக்கல்லில் தமிழ்நாடு தேவேந்திரகுல

வேளாலர் கூட்டமைப்பின் தலைவர் அண்ணன் பசுபதிபாண்டியன் அவர்களும் இதே

சூழலில்தான் ஆதிக்க சாதிவெறியர்களால் வெட்டி படுகொலை செய்யப்பட்டார்.

விடுதலைச் சிறுத்தைகள் கட்சியின் காஞ்சிபுரம் மாவட்ட துணைச் செயலாளர்

அம்பேத்வளவன் வெட்டி படுகொலை செய்யப்பட்டார். தியாகி இம்மானுவேல்

சேகரனார் நினைவு நாளில் அஞ்சலி செலுத்தச்சென்ற தோழர்களின் மீது காவல்துறை

நடத்திய துப்பாக்கிச் சூட்டில் ஏழு பேர் படுகொலையான அரச பயங்ரவாதம்,

தருமபுரியில் மூன்று தலித் கிராமங்கள் குச்சி கொழுத்திகளால்

எரிக்கப்பட்டது, மதுரையில் சட்ட மாமேதை புரட்சியார்

டாக்டர்.அம்பேத்கார் மற்றும் தியாகி இம்மானுவேல் சேகரனாரின் சிலைகள்

உடைத்தெறியப்பட்டது. மதுரை வண்டியூர் தீர்த்தக்காட்டிலே தாழ்த்தப்பட்ட

மக்களின் இடங்களை ஆக்கிரமிப்பு செய்த ஆதிக்க சாதிவெறியர்களை தட்டிக்

கேட்ட கண்ணன், கரிகாலன் ஆகியோர் வெட்டி படுகொலை, திருமங்கலம்

தங்களாச்சேரியில் தாழ்த்தப்பட்ட மக்களின் நாகரீகமான வளர்ச்சியை கண்டு

பொறுத்துக்கொள்ள முடியாத ஆதிக்க சாதிவெறியர்களின் ஊர் கட்டுப்பாட்டை மீறி

வெள்ளை வேட்டிச் சட்டையணிந்து தெருவுக்குள் நடந்த ஆதித் தமிழர் பேரவையைச்

சார்ந்த முதியவரை அரிவாளால் வெட்டிய பயங்கரம் என தாழ்த்தப்பட்டவர்கள்

மீது திணிக்கப்படும் அடுக்கடுக்கான வன்கொடுமைகளும், படுகொலைகளும்

தொடர்ந்து கொண்டேதான் இருக்கிறது.

மதுரையில் இருக்கக்கூடிய எவிடன்ஸ் என்கிற தொண்டு நிறுவனத்தின் நிறுவனர்.

திரு.கதிர் அவர்கள் தி இந்து என்கிற நாளேட்டில் 2012-ல் தான் அதிகமான

வன்கொடுமைகள் நடைபெற்றுள்ளது என தனது கட்டுரையில் எழுதியிருந்தார்

என்பதனை எழுச்சித் தமிழர் அவர்களும், தி.மு.க. தலைவர் கலைஞர் அவர்களுமே

சுட்டிக்காட்டியுள்ளனர். ஆனால் 2013-ல் இந்த நான்கு மாதங்களில் மட்டுமே

நடந்த வன்கொடுமைகள் 2012-ஐ பின்னுக்கு தள்ளிவிடும் அளவிற்கு சாதியக்

கொடுமைகள் அரங்கேறிக் கொண்டிருக்கிறது.

இந்த தாழ்த்தப்பட்ட மக்களின் உரிமைகளுக்காகவும், நலனுக்காகவும்

வரையறுக்கப்பட்ட வன்கொடுமை தடுப்புச்சட்டத்தை செயல்படுத்தக் கூடிய தமிழக

அரசும், இச்சட்டங்களை தீவிரமாக அமுல்படுத்தாமல் இருப்பது, சாதி

மோதல்களை உருவாக்கும் சாதியத் தலைவர்களுக்கும், சாதிச் சங்களுக்கும்

தாழ்த்தப்பட்டோர் மீதான தாக்குதல்களை நடத்தவும், இம் மக்களை படுகொலை

செய்யவும் ஆயுதங்களை தமிழகஅரசே வழங்குவது போல் உள்ளது. தாழ்த்தப்பட்ட

மக்களுக்கெதிரான பயங்கரவாதத்திற்கு தமிழகஅரசே துணை போகிறது. ஈழத்திலே

தமிழீழ மக்களின் மீது சிங்கள இன வெறியன் இராஜபக்சே நடத்திய தாக்குதலை

தடுத்து நிறுத்தாமல் மத்திய அரசு எப்படி வேடிக்கை பார்த்ததோ,

அதைப்போலவே தமிழக அரசும் வேடிக்கை பார்த்துக் கொண்டேதான் இருக்கிறது.

இப்படிப்பட்ட சூழ்நிலையை தமிழகஅரசு மாற்றிக்கொள்ள வலியுறுத்தியும்,

விடுதலைச் சிறுத்தைகள் கட்சியின் ஓவியர் அணியின் மாவட்டச் செயலாளர்

இராசேந்திரன் ஒன்றிய அமைப்பாளர் ரவி ஆகியோரின் படுகொலையை கண்டித்தும்,

தமிழகத்தில் தலித் தலைவர்களுக்கு பாதுகாப்பு வழங்க கோரியும், வன்கொடுமை

தடுப்புச் சட்டத்தை தீவிரமாக நடைமுறைபடுத்தக் கோரியும், மதுரையில்

சித்திரைத் திருவிழா நடைபெற்றுக் கொண்டிருக்கும் நெருக்கடியான நேரத்தில்

22-04-2013 அன்று காலை 10.00 மணியளவில் விடுதலைச்சிறுத்தைகள் கட்சியின்

மதுரை மாவட்ட ஓவியர் அணியின் சார்பில் மாபெரும் கண்டன ஆர்ப்பாட்டம்,

ஓவியர் அணியின் மாநில துணைச்செயலாளர் ப.முதல்வன் தலைமையில் மதுரை மாவட்ட

ஆட்சியர் அலுவலகம் முன்பாக நடைபெற்றது.

மாநில துணைப்பொதுச் செயலாளர் வெ.கனியமுதன், மாநகர் மாவட்டச் செயலாளர்

இரா.பாண்டியம்மாள், க.கலைவாணன், முற்போக்கு மாணவர் கழக மாநிலத்

துணைச்செயலாளர் வழக்கறிஞர் வி.பி.இன்குலாப், பூபாலன், மாதவன்,

தென்னிலவன், ரேவதிகடம்பு,ஆகியோர் கண்டன உரையாற்றினார்கள்.

இரா.அய்யங்காளை, கொ.ஆறுமுகம், அ.மணியரசு, பனையூர் சேகர், ராக்கப்பன்,

விடுதலை புலியம்மாள், வழக்கறிஞர்.ப.இரவிக்குமார், சிறுத்தைக்கனி,

அழகர்(எ)தமிழழகன்,வரிச்சியூர் பூமிநாதன், , பா.ஆனந்த், பரமசிவம்,

ஆதிவளவன், உசிலை பழனிச்சாமி, , அச்சம்பட்டி மகாலிங்கம், தலித்

அய்யனார், கலைச்செல்வன், செந்தமிழன், ராசுக்குட்டி, கு.செல்வமணி,

முத்துக்குமார், எஸ்.எம்.பி. கண்ணன், முனிச்சாமி, மோகனம்பாள், நிலையூர்

கணேசன், கள்ளிக்குடி பாலா, கொட்டாம்பட்டி விஸ்வநாதன், பா.அமுதவாணன்,

மற்றும்....நகர , ஒன்றிய , முகாம் நிர்வாகிகள் பலர் கலந்து கொண்டனர்.

கரும்பாலை முகாம் செயலாளர் திருமா தேவன், ஓவியர்கள் சு.ஆதவன்,

புதுதாமரைப்பட்டி ஓவியர்.நா.அழகர்சாமி

ம.எழில், ம.சரவணன், வே.பாலமுருகன், கருவளவன்,அவனிநாவளன் உள்ளிட்டோர்

நிகழ்ச்சியினை ஒருங்கிணைப்பு செய்திருந்தனர்.

-ஓவியர்.நா.அழகர்சாமி

தலித் மக்களுக்குப் பாதுகாப்பு அளிக்க வேண்டும்! - தமிழக அரசுக்கு தொல்.திருமாவளவன் வேண்டுகோள்

noreply@blogger.com (S R E E) — Sat, 27 Apr 2013 20:58:58 PDT

தலித் மக்களுக்குப் பாதுகாப்பு அளிக்க வேண்டும்!

தமிழக அரசுக்கு தொல்.திருமாவளவன் வேண்டுகோள்!

நாளை மாலை மாமல்லபுரத்தில் சாதி அமைப்பு ஒன்று பவுர்ணமி விழா என்ற பெயரில் கூட்டம் ஒன்றை நடத்தத் திட்டமிட்டுள்ளது. அந்த விழா நடைபெற்றால் வன்முறை நேரலாம் என கடந்த கால சம்பவங்களைச் சுட்டிக்காட்டி தமிழக அரசு எதிர்ப்புத் தெரிவித்தது. தமிழக அரசின் எதிர்ப்பையும் மீறி நீதிமன்றம் அனுமதியளித்த காரணத்தால் அந்த விழா நடைபெறவுள்ளது.

ஒவ்வோர் ஆண்டும் இவ்விழாவின்போது விழாவுக்கு வருகிறவர்கள் கிழக்குக் கடற்கரைச் சாலையிலுள்ள தலித் கிராமங்களைத் தாக்குவதும், அதனால் பலருக்கு காயம் ஏற்படுவதும், தலித் மக்களின் சொத்துக்கள் சேதப்படுத்தப்படுவதும் தொடர் நிகழ்வுகளாக உள்ளன. 2002ஆம் ஆண்டு மரக்காணம் தலித் காலனியில் நுழைந்து குடிசைகளைக் கொளுத்தியதுடன் தலித்துகள் பலரை கண்மூடித்தனமாக வெட்டிக் காயப்படுத்தினார்கள்.

வெண்ணாங்கப்பட்டு, எல்லையம்மன் கோவில், சீக்கனாங்குப்பம், கூவத்தூர், வயலூர் முதலான தலித் கிராமங்களும் தொடர்ந்து தாக்குதலுக்கு உள்ளாகி வருகின்றன.

கடந்த ஆண்டு இந்த விழாவில் பேசியவர்கள் வன்முறையைத் தூண்டும் வகையில் பேசினார்கள் என்பதால் காவல்துறை அவர்கள் மீது வழக்குப் பதிவுசெய்துள்ளது. சில மாதங்களுக்கு முன்னால் தருமபுரியில் நடத்தப்பட்ட வன்முறை வெறியாட்டத்துக்கு மாமல்லபுரம் விழாவில் பேசப்பட்ட சாதிவெறிப் பேச்சுகளே காரணம் என்பதைப் பலரும் சுட்டிக்காட்டியுள்ளனர்.

இந்நிலையில், இந்த ஆண்டும் மாமல்லபுரம் விழாவுக்கு வருவோர் தலித் கிராமங்களைத் தாக்கக்கூடும் என்கிற அச்சம் கிழக்குக் கடற்கரைச் சாலையிலுள்ள தலித் மக்கள் மட்டுமின்றி சிறுபான்மையினர், மீனவர்கள், வணிகர்கள் என அனைத்துத் தரப்பு மக்களிடையேயும் நிலவுகிறது.

விழாவுக்கு வருகிறவர்களால் எமது கட்சிக் கொடிக்கம்பங்கள் வெட்டிச் சாய்க்கப்படுவதும், டிஜிட்டல் பேனர்கள் சேதப்படுத்தப்படுவதும் ஒவ்வோர் ஆண்டும் நடந்துவருகின்றன. எனவே, அத்தகைய சம்பவங்கள் நிகழாவண்ணம் காவல்துறை தடுத்திட வேண்டுமெனவும், கிழக்குக் கடற்கரைச் சாலையிலுள்ள தலித் கிராமங்களுக்கு உரிய காவல்துறை பாதுகாப்பை வழங்குமாறும் விடுதலைச் சிறுத்தைகள் கட்சியின் சார்பில் வலியுறுத்திக் கேட்டுக்கொள்கிறோம்.

இவண்

தொல்.திருமாவளவன்

இலங்கைக் கடற்படைக்கு இந்தியா பயிற்சி அளிப்பதா? -இந்திய அரசுக்கு எழுச்சித் தமிழர் கண்டனம்

noreply@blogger.com (S R E E) — Sat, 27 Apr 2013 21:05:06 PDT

நாள்தோறும் தமிழக மீனவர்கள் இலங்கைக் கடற்படையால் தாக்கப்படுகின்றனர். பலர் சிறைபிடிக்கப்பட்டு இலங்கைச் சிறைகளில் அடைக்கப்பட்டுள்ளனர். தமிழக மக்களும் தமிழக அரசும் எத்தனையோ போராட்டங்களை நடத்தியும்கூட இந்திய அரசு இலங்கைக் கடற்படையின் தாக்குதல்களைத் தடுத்து நிறுத்த எந்த நடவடிக்கையையும் எடுக்கவில்லை. இந்நிலையில் இலங்கைக் கடற்படையைச் சேர்ந்த 250பேருக்கு இந்தியக் கடற்படைக் கப்பல்களில் பயிற்சி அளிக்கப்பட்டிருப்பதாக செய்தி வெளியாகியுள்ளது.

இந்தியக் கடற்படை மற்றும் கடலோரக் காவல் படையைச் சேர்ந்த சுஜாதா, தரங்கிணி,வருணா ஆகிய மூன்று கப்பல்கள் இந்தப் பயிற்சியை அளித்துள்ளன. பயிற்சி பெற்ற சிங்களப் படையினருக்கு இந்திய தூதரகம் சார்பில் அளிக்கப்பட்ட வரவேற்பு நிகழ்ச்சியில் பேசிய இலங்கைக் கடற்படை துணைத் தளபதி ஜெயந்த் கொலம்பகே என்பவர் இலங்கைக் கடற்படையினரில் 80% பேருக்கு இந்தியாதான் பயிற்சி அளிக்கிறது என்று

கூறியுள்ளார்.

இது தமிழக மக்களைப் புண்படுத்துவதாக இருக்கிறது தமிழக மீனவர்கள்மீது

நடத்தப்பட்டுவரும் தாக்குதல்கள் இந்திய அரசின் ஆதரவோடுதான் நடத்தப்படுகிறதோ என்ற ஐயத்தை நமக்கு ஏற்படுத்துகிறது. இலங்கை ராணுவத்தினருக்கு இந்தியா பயிற்சி அளிப்பதும் அவர்கள் இந்திய மீனவர்களையே தாக்குவதும் தொடர்கதையாகிக்கொண்டிருக்கிறது. தனது நாட்டு குடிமக்களைக் கொல்பவர்களுக்குத் தாங்களே பயிற்சி அளிக்கும் இத்தகையகேவலம் உலகில் வேறு எங்குமே நடந்ததில்லை. இந்திய அரசு இலங்கைப் படையினருக்குப் பயிற்சி அளிப்பதை உடனடியாக நிறுத்திக்கொள்ளவேண்டும் என வலியுறுத்துகிறோம்.

இலங்கைக்கான இந்தியத் தூதராக தமிழ்நாட்டைச் சேர்ந்த ஒருவரை நியமிக்கவேண்டும் என கேட்டுக்கொள்கிறோம்.

மத்திய அரசு தொடர்ந்து தமிழக மக்களின் உணர்வுகளுக்கு எதிராக செயல்படுவதென்பது அதற்கு தேசிய ஒருமைப்பாட்டின்மீது நம்பிக்கை இல்லையோ என்ற கேள்வியைத்தான் எழுப்புகிறது. இது இந்தியாவின் எதிர்காலத்துக்கு நல்லதல்ல என்று சுட்டிக்காட்டுகிறோம்.

இவண்

தொல்.திருமாவளவன்

சமூக நீதிக் கொள்கைக்கு ஆபத்து! – தமிழக அரசு நடவடிக்கை எடுக்க எழுச்சித்தமிழர் வலியுறுத்தல்

noreply@blogger.com (S R E E) — Sat, 27 Apr 2013 21:02:44 PDT

பொறியியல் கல்லூரிகளில் மாணவர் சேர்க்கைக்கு குறைந்தபட்சம் 40 விழுக்காடு மதிப்பெண் பெற்றிருக்க வேண்டும் என அகில இந்தியத் தொழில்நுட்பக் கல்வி கவுன்சில் (கிமிசிஜிணி) ஆணை பிறப்பித்திருந்தது. அதனை எதிர்த்து தமிழக அரசு தொடுத்திருந்த வழக்கில் நேற்று தமிழக உயர் நீதிமன்றம் தீர்ப்பு வழங்கியுள்ளது. அகில இந்தியத் தொழில்நுட்பக் கல்வி கவுன்சில் பிறப்பித்த ஆணை சரிதான் என்றும், குறைந்தபட்ச மதிப்பெண் 40 விழுக்காடு இருக்க வேண்டும் என்றும் நீதிமன்றம் கூறியுள்ளது. இதனால் தாழ்த்தப்பட்ட-பழங்குடியின வகுப்பைச் சேர்ந்த மாணவர்கள் கடுமையான பாதிப்புக்குள்ளாகும் நிலை உருவாகியுள்ளது.

பொறியியல் கல்லூரியில் சேர்வதற்கு தாழ்த்தப்பட்ட-பழங்குடியின வகுப்பைச் சேர்ந்த மாணவர்கள் 35 விழுக்காடு மதிப்பெண் பெற்றிருக்க வேண்டும் என்றும், மிகவும் பிற்படுத்தப்பட்ட மற்றும் சீர் மரபினர் 40 விழுக்காடு மதிப்பெண் பெற்றிருக்க வேண்டும் என்றும், பிற்படுத்தப்பட்ட வகுப்பைச் சேர்ந்தவர்கள் 45 விழுக்காடு மதிப்பெண் பெற்றிருக்க வேண்டும் என்றும் 2011ஆம் ஆண்டில் அன்றைய திமுக அரசு ஆணை பிறப்பித்தது. இதனால் கிராமப் புறத்தைச் சேர்ந்த ஏழை எளிய, தாழ்த்தப்பட்ட-பழங்குடியின வகுப்பு மாணவர்கள் பொறியியல் கல்லூரியில் சேர்வதற்கு வாய்ப்பு கிடைத்தது. தற்போது, உயர்நீதிமன்றத்தின் தீர்ப்பால் அந்த மாணவர்கள் பெரும் பாதிப்புக்குள்ளாவார்கள்.

பொறியியல் கல்வியின் தரத்தை உயர்த்த வேண்டுமென்பதில் நமக்கு கருத்து மாறுபாடு இல்லை. ஆனால், பொறியியல் கல்லூரியில் சேர மிகவும் பிற்படுத்தப்பட்ட வகுப்பைச் சேர்ந்த மாணவர்களும், தாழ்த்தப்பட்ட-பழங்குடியின மாணவர்களும் ஒரே மதிப்பெண் பெற்றிருக்க வேண்டும் என்பது எந்தவிதத்திலும் ஏற்கத்தக்கதல்ல. இந்தப் பிரச்சனையை நீதிமன்றத்தின் கவனத்துக்கு தமிழக அரசு கொண்டு சென்றதாகவும் தெரியவில்லை. எனவே, சமூக நீதிக்கு எதிரான இந்த ஆணையை எதிர்த்து தமிழக அரசு உச்ச நீதிமன்றத்துக்குச் செல்ல வேண்டும் என விடுதலைச் சிறுத்தைகள் கட்சி சார்பில் வலியுறுத்திக் கேட்டுக்கொள்கிறோம்.

ஆண்டுதோறும் பொறியியல் கல்லூரிகளில் ஆயிரக் கணக்கான காலியிடங்கள் நிரப்பப்படாமல் கிடக்கின்றன. ஆனாலும், அரசு மற்றும் அரசு உதவி பெறும் பொறியியல் கல்லூரிகளில், தாழ்த்தப்பட்ட-பழங்குடியின வகுப்பைச் சேர்ந்த மாணவர்களுக்கான இடஒதுக்கீட்டை நிரப்புவதில் குளறுபடிகள் தொடர்ந்துகொண்டிருக்கின்றன. நிகர்நிலைப் பல்கலைக்கழகங்களில் இடஒதுக்கீட்டின் நிலை குறித்து, கேட்பாரற்ற சூழல் உள்ளது. இந்நிலையில், தாழ்த்தப்பட்ட-பழங்குடியின மாணவர்களுக்கு மட்டும் தகுதி மதிப்பெண் அளவை உயர்த்துவது என்பது தலித் விரோத நிலைப்பாடே ஆகும் என்பதை அகில இந்திய தொழில்நுட்பக் கல்வி கவுன்சிலுக்கும் தமிழக அரசுக்கும் சுட்டிக்காட்டுகிறோம். இந்த பாரபட்சத்தைக் களைவதற்கு உடனடியாக தேவையான சட்ட நடவடிக்கைகளை எடுக்குமாறு தமிழக அரசை வலியுறுத்துகிறோம்.

இவண்

தொல்.திருமாவளவன்

விடுதலைச் சிறுத்தைகள் கட்சியின் விருதுகள் வழங்கும் விழா பொதுக்கூட்டத் தீர்மானங்கள்

noreply@blogger.com (S R E E) — Tue, 16 Apr 2013 09:23:54 PDT

விருதுகள் வழங்கும் விழா பொதுக்கூட்டத் தீர்மானங்கள்

14.4.2013 - புரட்சியாளர் அம்பேத்கர் பிறந்த நாளில், விடுதலைச் சிறுத்தைகள் கட்சியின் தலைவர் தொல்.திருமாவளவன் அவர்கள் தலைமையில் காலை 10 மதியளவில் நடைபெற்ற மக்கள் ஒற்றுமைப் பேரணியைத் தொடர்ந்து மாலை 6 மணிக்கு மயிலை மாங்கொல்லையில் நடைபெற்ற விருதுகள் வழங்கும் விழா பொதுக்கூட்டத்தில் நிறைவேற்றப்பட்ட தீர்மானங்கள்:

1. வீரவணக்கம்

தமிழ்நாட்டில் அண்மைக் காலத்தில் நடைபெற்ற சாதி ஒழிப்புக்கான களத்திலும், ஈழத்தில் இன விடுதலைக்கான களத்திலும் தம் இன்னுயிரை ஈகம் செய்த போராளிகளுக்கு விடுதலைச் சிறுத்தைகள் கட்சி தமது வீரவணக்கத்தைச் செலுத்துகிறது. அத்துடன், மகளிருக்குரிய சமத்துவத்துக்கான போராட்டங்களில் பாலியல் வன்முறைக்குப் பலியான பெண்களுக்கும் தமது வீரவணக்கத்தைச் செலுத்துகிறது.

2. இனப்படுகொலைக்கு நீதி வழங்குக

ஈழத்தில் இனப்படுகொலை செய்து பல்லாயிரக்கணக்கான தமிழர்களைக் கொன்றழித்த கொடுங்கோலன் இராசபக்சேவின் தலைமையிலான கொலைக் கும்பல் தண்டிக்கப்பட வேண்டும் என்னும் குரல் உலக அளவில் வலுவடைந்து வருகிறது.

அதற்காக, ஐ.நா. மனித உரிமைகள் பேரவையில் சிங்கள இனவெறி அரசுக்கெதிராக அமெரிக்க வல்லரசால் முன்மொழியப்பட்டு நிறைவேற்றப்பட்ட தீர்மானம் தமிழ் மக்களின் எதிர்பார்ப்பை ஈடுசெய்யவில்லையெனினும் இலங்கைப் பேரினவாத அரசின் போர்க் குற்றங்களை அது சுட்டிக்காட்டியுள்ளது.

இனப்படுகொலைக் குற்றவாளிகள் ‘சுதந்திரமான சர்வதேச விசாரணை’க்கு உட்படுத்தப்பட்டு தண்டிக்கப்பட வேண்டும். அதற்கான நடவடிக்கைகளை மேற்கொள்ள வேண்டுமென இந்திய அரசையும் உலக நாடுகளையும் இக்கூட்டம் வலியுறுத்திக் கேட்டுக்கொள்கிறது.

3. ஈழமே தீர்வு

சிங்களவர்களைவிட தொன்மைவாய்ந்த இனமாக இலங்கையில் வாழ்ந்து வருவது தமிழினம்தான். ‘தாம் பூர்வகுடிகளல்ல, வந்தேறிகள்தாம்’ என்பதை இலங்கைத் தூதரே அண்மையில் ஒப்புக்கொண்டுள்ளார். அப்படி தொன்மைக் காலந்தொட்டு ஆட்சியதிகாரம் செய்த தமிழினம் இப்போது சிறுபான்மை இனமாக்கப்பட்டு ஒடுக்கப்படுகிறது. ஆங்கிலேயே காலனிய ஆட்சியாளர்கள் இலங்கைக்கு விடுதலை வழங்கியபோது ஆட்சியதிகாரத்தை சிங்களவர்களின் கைகளில் கொடுத்துவிட்டுப் போனதால்தான் தமிழ் மக்கள் இரண்டாந்தரக் குடிமக்கள் ஆனார்கள். சிங்களப் பேரினவாதம், இனச் சிறுபான்மையினரை மட்டுமல்ல, மதச் சிறுபான்மையினரையும் ஒடுக்கி வருகிறது. இந்நிலையில், தமிழ் மக்கள் சமத்துவத்தோடும் அமைதியோடும் வாழ தனி ஈழமே ஒரே தீர்வு என்பதை ஈழத் தமிழர் உள்ளிட்ட அனைத்து உலகத் தமிழர்களும் வற்புறுத்தி வருகின்றனர். இக்கோரிக்கையை நிறைவேற்ற ஐ.நா. பேரவையின் மேற்பார்வையில் ஈழத் தமிழர்களிடையே ‘கருத்தறியும் வாக்கெடுப்பு’ நடத்தப்பட வேண்டும் என இக்கூட்டம் வலியுறுத்துகிறது.

4. காமன்வெல்த் மாநாட்டை இலங்கையில் நடத்தக் கூடாது

54 நாடுகளை உறுப்பினர்களாகக் கொண்ட காமன்வெல்த் நாடுகளின் மாநாடு இலங்கையில் எதிர்வரும் நவம்பர் மாதத்தில் நடைபெறவுள்ளது. அங்கு மாநாடு நடைபெற்றால் அடுத்த இரண்டு ஆண்டுகளுக்கு இலங்கையே அந்தக் கூட்டமைப்பின் தலைமைப் பொறுப்பில் இருக்கும். போர்க்குற்றம் இழைத்த நாடாக, ஐ.நா. மனித உரிமைகள் பேரவையில் கண்டனத்துக்குள்ளாகியிருக்கும் இலங்கைக்கு அத்தகைய அங்கீகாரத்தை வழங்கக் கூடாது; அது காமன்வெல்த் கூட்டமைப்பின் கொள்கைக்கும் எதிரானது என ஏற்கனவே ஆஸ்திரேலியா, கனடா, இங்கிலாந்து உள்ளிட்ட பல நாடுகள் எதிர்ப்புத் தெரிவித்து வருகின்றன.

எனவே, காமன்வெல்த் மாநாட்டை இலங்கையில் நடத்தாமல் தடுக்க இந்திய அரசும் குரலெழுப்ப வேண்டுமென வலியுறுத்துகிறோம். எதிர்வரும் ஏப்ரல் 26ஆம் நாள் இலண்டனில் நடைபெறவுள்ள காமன்வெல்த் வெளியுறவு அமைச்சர்களின் கூட்டத்தில் இலங்கையை ‘காமன்வெல்த் உறுப்புத் தகுதி’யிலிருந்து நீக்கம் செய்ய வேண்டுமெனவும், அதற்காக இந்தியா உரிய நடவடிக்கை எடுக்க வேண்டுமெனவும் இக்கூட்டம் இந்திய அரசைக் கேட்டுக்கொள்கிறது.

5. ஐ.நா. மனித உரிமைகள் பேரவை இலங்கைக்கு காலஅவகாசம் வழங்கக் கூடாது

கடந்த மார்ச் மாதத்தில் ஜெனிவாவில் நடந்து முடிந்த ஐ.நா. மனித உரிமைகள் பேரவையில் இலங்கை குறித்து நிறைவேற்றப்பட்ட தீர்மானத்தில், ஜெனிவா தீர்மானத்தை நடைமுறைப்படுத்துவதற்கு இலங்கைக்கு ஓர் ஆண்டு கால அவகாசம் வழங்கப்பட்டுள்ளது. எதிர்வரும் செப்டம்பர் மாதம் நடைபெறவுள்ள 24வது அமர்வில் ஐ.நா. மனித உரிமை ஆணையர் வாய்மொழியாக அறிக்கை வழங்குவதென்றும், அடுத்து 2014 மார்ச்சில் நடைபெறவுள்ள 25வது அமர்வில் மீண்டும் இலங்கை குறித்து விவாதிப்பதெனவும் தீர்மானத்தில் குறிப்பிடப்பட்டுள்ளது.

ஐ.நா. தீர்மானத்தை நாங்கள் ஏற்கவில்லை. அது கூறியுள்ளவாறு ஆறு மாதங்களுக்கு ஒரு முறை அறிக்கை சமர்ப்பிக்க மாட்டோம்! என இலங்கை அரசு அண்மையில் அறிவித்துள்ளது. எனவே, ஐ.நா. மனித உரிமைகள் பேரவை ஓர் ஆண்டு காலம் வரை காத்திருக்கத் தேவையில்லை. உலக நாடுகளை மதிக்காமல் ஒரு ‘பொறுக்கி நாடாகச்’ செயல்படும் இலங்கையின் இனவெறிப் போக்கை, உடனே தலையிட்டு தடுத்து நிறுத்த வேண்டும். இப்பிரச்சனையின் அவசர முக்கியத்துவம் கருதி மே மாதத்தில் நடைபெறவுள்ள 23ஆவது கூட்டத்திலேயே இலங்கை குறித்து ஐ.நா. மனித உரிமைப் பேரவை விவாணிக்க வேண்டுமெனவும் அதற்கு இந்திய அரசு நடவடிக்கை எடுக்க வேண்டுமெனவும் இக்கூட்டம் வலியுறுத்துகிறது.

6. சாதிய வன்கொடுமைகளைத் தடுத்து நிறுத்துக

தமிழ்நாட்டில் முன்னர் எப்போதும் இல்லாத அளவுக்கு சாதிய வன்கொடுமைகள் அண்மைக் காலமாக பெருகியுள்ளன. விழுப்புரம், தருமபுரி மாவட்டங்கள்தாம் இதில் முன்னணியில் இருக்கின்றன என்று தெரியவந்துள்ளது. தாழ்த்தப்பட்ட மக்கள் படுகொலை செய்யப்பட்ட வழக்குகளிலும், தலித் பெண்கள் பாலியல் வல்லுறவுக்கு ஆளாக்கப்பட்ட வழக்குகளிலும் தமிழக அரசு உரிய நடவடிக்கைகளை எடுக்கவில்லை. நீதிமன்றம் தலையிட்டு ஆணையிட்ட தருமபுரி வழக்கைத் தவிர, வேறு எங்கும் சட்டப்படியான நடவடிக்கைகளும் எடுக்கப்படவில்லை. உரிய இழப்பீடுகளும் வழங்கப்படவில்லை. தமிழக அரசின் இத்தகைய தலித் விரோதப் போக்கை விடுதலைச் சிறுத்தைகளின் இக்கூட்டம் வன்மையாகக் கண்டிக்கிறது.

தமிழ்நாட்டில் சாதிய வன்கொடுமைகளைத் தடுத்து நிறுத்த தமிழக அரசு சட்டரீதியான தனது கடமைகளை ஆற்றிட வேண்டுமெனவும் வன்கொடுமைகள் தடுப்புச் சட்டத்தைத் தீவிரமாக நடைமுறைப்படுத்த வேண்டுமெனவும் இக்கூட்டம் வலியுறுத்துகிறது.

7. வெறுப்புப் பிரச்சாரத்தைத் தடுத்து நிறுத்துக

தமிழ்நாட்டில் சாதிய வன்கொடுமைகள் அதிகரிப்பதற்கு சாதி வெறியர்கள்களின் வெறுப்புப் பிரச்சாரமே தூண்டுகோலாக உள்ளது. அவர்கள் மீது உரிய நடவடிக்கை எடுக்காமல், அவர்களை மேலும் ஊக்குவிப்பதுபோல அரசு செயல்படுவதால்தான் இத்தகைய வன்முறைகள் அதிகரித்து வருகின்றன. எனவே, அரசியல் ஆதாயம் கருதி, திட்டமிட்டு வன்முறைகளைத் தூண்டும் வகையில் செயல்பட்டுவரும் சாதிவெறியர்களின் தலித் மக்களுக்கு எதிரான ‘வெறுப்புப் பிரச்சாரத்தை’த் தடுக்க வேண்டுமெனவும், சட்டத்தின் ஆட்சியை நிலைநாட்டிட உரிய நடவடிக்கைகளை மேற்கொள்ள வேண்டுமெனவும் தமிழக அரசை இக்கூட்டம் வலியுறுத்துகிறது.

8. கௌரவக் கொலைகளைத் தடுக்க சட்டம் இயற்றுக

சாதி மறுப்புத் திருமணங்கள் செய்துகொள்வோரைப் படுகொலை செய்யும் போக்கு தமிழகத்தில் அதிகரித்து வருகிறது. கௌரவக் கொலைகள் என ஊடகங்களால் குறிப்பிடப்படும் இந்தப் படுகொலைகளைத் தடுக்க சிறப்புச் சட்டம் ஒன்றை இயற்ற வேண்டுமென இந்திய சட்ட ஆணையமும், நீதிபதி வர்மா குழுவும் இந்திய அரசுக்குப் பரிந்துரை செய்துள்ளன. ஆனால் அந்த சட்டத்தை நிறைவேற்றாமல் இந்திய அரசு அலட்சியப்படுத்தி வருகிறது. கௌரவக் கொலைகளைத் தடுத்திட சிறப்புச் சட்டம் இயற்ற வேண்டும் என விடுதலைச் சிறுத்தைகள் கட்சி நாடாளுமன்றத்திலும் குரலெழுப்பியுள்ளது. இனியும் காலந்தாழ்த்தாமல் கௌரவக் கொலைகளைத் தடுத்திட சிறப்புச் சட்டம் இயற்றிடுமாறு இந்திய, தமிழக அரசுகளை இக்கூட்டம் வலியுறுத்துகிறது.

9. தனியார் துறையிலும் இடஒதுக்கீட்டை விரிவுபடுத்துக

அரசுத் துறைகளிலும், பொதுத் துறை நிறுவனங்களிலும் வேலைவாய்ப்புகள் குறைந்து வருவதால் இடஒதுக்கீட்டின் அடிப்படையில் வேலைவாய்ப்பைப் பெற்றுவரும் தாழ்த்தப்பட்ட-பழங்குடியின இளைஞர்கள் பெரிதும் பாதிக்கப்பட்டுள்ளனர். வேலை பெறும் தகுதியிருந்தும் இந்தச் சமூகங்களைச் சேர்ந்த இலட்சக்கணக்கான இளைஞர்கள் வேலைவாய்ப்பின்றி அவதியுறுகின்றனர். தனியார்மயமே அரசின் கொள்கையாகிவிட்ட சூழலில், இடஒதுக்கீட்டு உரிமையைத் தனியார் துறைக்கும் விரிவுபடுத்தினால் மட்டுமே தாழ்த்தப்பட்ட-பழங்குடியின இளைஞர்கள் வேலைவாய்ப்பைப் பெற முடியும். பொது வளங்களைப் பயன்படுத்திக்கொள்ளும் தனியார் துறையினர் சமூக நீதிக்கு எதிராகச் செயல்படுவது ஏற்கத்தக்கதல்ல.

தனியார் துறையிலும் இடஒதுக்கீடு வழங்குவதற்கான வழிவகைகளைக் கண்டறிய 2004ஆம் ஆண்டு அமைந்த காங்கிரஸ் தலைமையிலான அரசு சில நடவடிக்கைகளை எடுத்தது. அதற்கென சட்ட மசோதா ஒன்றும் தயாரிக்கப்பட்டது. ஆனால், அவை யாவும் கிடப்பில் போடப்பட்டுள்ளன. தவீயார் துறையிலும் இடஒதுக்கீட்டு உரிமையை விரிவுபடுத்திட விரைந்து நடவடிக்கை எடுக்க வேண்டுமென காங்கிரஸ் தலைமையிலான ஐக்கிய முற்போக்குக் கூட்டணி அரசை இக்கூட்டம் வலியுறுத்திக் கேட்டுக்கொள்கிறது.

10. தாழ்த்தப்பட்டோர் - பழங்குடியினர் துணைத் திட்ட பாதுகாப்புச் சட்டம் இயற்றுக

நிதிநிலை அறிக்கையில் ஒவ்வோர் ஆண்டும் மாநிலத்தில் உள்ள தாழ்த்தப்பட்ட, பழங்குடியின மக்கள் தொகைக்கு இணையாக நிதி ஒதுக்கீடு செய்யப்பட வேண்டும் என திருமதி இந்திராகாந்தி அவர்கள் ஆட்சியின்போது, ஆறாவது ஐந்தாண்டுத் திட்டக் காலத்தில் இந்திய அரசு ஆணையிட்டுள்ளது. ஆனால் அது கடந்த முப்பது ஆண்டுகளாக மாநில அரசுகளால் நிறைவேற்றப்படவில்லை. எனவே, இதற்காக சட்டம் ஒன்றை இயற்றுமாறு திருமதி சோனியாகாந்தி அவர்களின் தலைமையிலான தேசிய ஆலோசனைக் குழு இந்திய அரசுக்கு அறிவுறுத்தியுள்ளது. அதன்படி, தற்போது அத்தகைய சட்டத்தை இந்தியாவிலேயே முதன்முதலாக இயற்றியுள்ள ஆந்திர மாநில அரசையும், முதல்வர் கிரண்குமார் ரெட்டி அவர்களையும் விடுதலைச் சிறுத்தைகள் நெஞ்சாரப் பாராட்டுகிறது.

தாழ்த்தப்பட்டோர் மற்றும் பழங்குடியினருக்காக ஒதுக்கப்படும் நிணியை வேறு செலவுகளுக்குப் பயன்படுத்தாமல் தடுக்க இந்தச் சட்டம் வழிவகை செய்கிறது. ஆந்திர அரசைப் பின்பற்றி அத்தகைய சட்டம் ஒன்றை தமிழக அரசு உடனே இயற்ற வேண்டும் என இக்கூட்டம் வலியுறுத்துகிறது.

11. மதவாத சக்திகளை முறியடிப்போம்

இந்தியாவைப் பன்னாட்டு நிறுவனங்களின் வேட்டைக் காடாக மாற்றி விலைவாசி உயர்வுக்கு வழிவகுத்துள்ள காங்கிரஸ் தலைமையிலான இந்திய அரசின் தவறான பொருளாதாரக் கொள்கையை விடுதலைச் சிறுத்தைகள் கண்டிக்கிறோம். ஈழத் தமிழரின் இன்னல் தொடரவும், தமிழக மீனவர்கள் தாக்கப்படவும் காரணமாக உள்ள இந்திய அரசின் தவறான வெளியுறவுக் கொள்கையைக் கடுமையாக எதிர்க்கிறோம். ஈழத் தமிழர் பிரச்சனையில் இந்திய அரசு காட்டிவரும் தமிழர் விரோதப் போக்கைக் கண்டித்தே விடுதலைச் சிறுத்தைகள் கட்சி அண்மையில் ஐக்கிய முற்போக்குக் கூட்டணியிலிருந்து வெளியேறியது.

காங்கிரஸ் கட்சியை எதிர்ப்பதென்பது பாரதிய ஜனதா கட்சி மத்தியில் ஆட்சியைப் பிடிப்பதற்குக் காரணமாகிவிடக் கூடாது. இந்தியாவில் மதவெறியைத் தூண்டி பல்லாயிரக் கணக்கான உழைக்கும் மக்கள் படுகொலை செய்யப்படக் காரணம் பாரதிய ஜனதா உள்ளிட்ட சங்கப் பரிவார அமைப்புகள்தாம் என்பதை நாம் மறந்துவிட முடியாது. குஜராத்தில் ஆயிரக் கணக்கான இசுலாமியர்களின் இனப்படுகொலை நடப்பதற்குக் காரணமான நரேந்திர மோடியைப் பிரதமர் வேட்பாளராக பாரதிய ஜனதா கட்சி முன்னிறுத்தும் வேளையில், மதவாத சக்திகள் குறித்து நாம் விழிப்போடு இருக்க வேண்டும். காங்கிரஸ் கட்சியின் தவறான கொள்கைகளை எதிர்க்கும் அதே வேளையில், மதவாத சக்திகள் ஆட்சிக்கு வந்துவிடாமல் தடுத்திட, மதச்சார்பற்ற சக்திகள் ஒன்றிணைந்து செயல்பட வேண்டுமென இக்கூட்டம் வேண்டுகோள் விடுக்கிறது.

12. ஒற்றுமை காக்க உறுதியேற்போம்

முன் எப்போதையும்விட அண்மைக்காலமாக இந்திய அரசால் தமிழக உரிமைகள் மென்மேலும் மறுக்கப்படும் நிலையைப் பார்க்கிறோம். தமிழக மீனவர்கள் நாள்தோறும் சிங்களப் படையால் தாக்கப்படுகிறார்கள். தமிழ்நாட்டின் நதிநீர் உரிமைகள் மறுக்கப்படுகின்றன. மாநில உரிமைகள் மத்தியில் குவிக்கப்படுகின்றன. ஈழத் தமிழரின் உரிமைகளை வென்றெடுக்கத் தமிழகம் குரல் கொடுக்க வேண்டிய தேவை உள்ளது. இவை எல்லாவற்றுக்கும் தமிழக மக்கள் ஒன்றுபட்டுப் போராட வேண்டியது இன்றியமையாததாகும். இந்நிலையில் சாதி, மதப் பகைமைகளை மூட்டி தமிழக மக்களின் ஒற்றுமையைச் சீர்குலைக்கும் நடவடிக்கைகளில் சிலர் ஈடுபட்டு வருகின்றனர். அத்தகைய பிற்போக்கான சாதியவாத சக்திகளைத் தனிமைப்படுத்தவும், தமிழக மக்களின் ஒற்றுமையைப் பாதுகாக்கவும் புரட்சியாளர் அம்பேத்கர் பிறந்த நாளில் அனைவரும் உறுதியேற்போம் என விடுதலைச் சிறுத்தைகள் தமிழக மக்களுக்கு அறைகூவல் விடுக்கிறது.

இவண்

தொல்.திருமாவளவன்

உதயன் நாளிதழ் அலுவலகத்தின் மீது தாக்குதல் ஐ.நா. பேரவை தலையிட தொல்.திருமாவளவன் வலியுறுத்தல்

noreply@blogger.com (S R E E) — Sat, 13 Apr 2013 03:47:17 PDT

யாழ்ப்பாணத்தில் உதயன் நாளிதழ் அலுவலகத்தின் மீது இன்று அதிகாலை மர்ம நபர்கள் தாக்குதல் நடத்தியுள்ளனர். தலைக்கவசம் அணிந்து துப்பாக்கிகளோடு அலுவலகத்திற்குள் நுழைந்த மர்ம நபர்கள் வானத்தை நோக்கி துப்பாக்கியால் சுட்டு அச்சுறுத்தியும் அங்கிருந்த ஊழியர்களைத் தாக்கியும் விரட்டியடித்துள்ளனர். அதன் பின்னர் அங்கிருந்த அச்சு இயந்திரங்கள் மற்றும் பத்திரிகை அச்சிடுவதற்குரிய காகிதங்கள் போன்றவற்றை பெட்ரோல் ஊற்றி தீ வைத்து எரித்துள்ளனர். இதனால் அந்த நாளேடு செயல்பட முடியாத நிலை ஏற்பட்டுள்ளது. கடந்த மூன்று மாதங்களில் இலங்கையில் ஊடகத்தினர் மீது தொடுக்கப்படும் ஐந்தாவது தாக்குதல் இது. அரசாங்கத்தின் ஆதரவோடும் இராணுவத்தின் தூண்டுதலோடும் நடத்தப்பட்டுள்ள இத்தாக்குதலை விடுதலைச் சிறுத்தைகள் மிக வன்மையாகக் கண்டிக்கிறது. இலங்கையில் ஊடகச் சுதந்திரம் முற்றாகப் பறிக்கப்பட்டுள்ள நிலையில் ஐ.நா. பேரவை உடனடியாக இதில் தலையிட வேண்டுமென விடுதலைச் சிறுத்தைகள் கட்சி வலியுறுத்துகிறது.

இலங்கையிலுள்ள இராஜபக்சே அரசை விமர்சிக்கிற ஊடகங்களின் மீது தொடர்ந்து இவ்வாறு கொடூரமான தாக்குதல்கள் நடத்தப்பட்டு வருகின்றன. இதுவரை, இலங்கையைச் சேர்ந்த 23 ஊடகவியலாளர்கள் அங்கிருந்து வெளியேறி அயல்நாடுகளில் தஞ்சம் புகுந்துள்ளனர். சிங்கள இனத்தைச் சேர்ந்த ஊடகவியலாளர்களும்கூடத் தாக்குதலுக்குள்ளாகியுள்ளனர். சிலர் படுகொலை செய்யப்பட்டுள்ளனர். உலகிலேயே ஊடக சுதந்திரம் மிக மோசமாக இருக்கும் நாடுகளில் ஒன்றாக இலங்கை இருக்கிறது. கடந்த மாதத்தில் ஐ.நா. மனிதஉரிமைப் பேரவையில் இலங்கைக்கு எதிராக நிறைவேற்றப்பட்ட தீர்மானமும்கூட அங்கு நடைபெற்றுவரும் வன்செயல்களைக் கட்டுப்படுத்த உதவவில்லை. அந்தத் தீர்மானத்தை தாம் ஏற்கவில்லையென்றும், ஐ.நா. கூறியபடி ஆறு மாதங்களுக்கு ஒரு முறை அறிக்கை சமர்ப்பிக்க முடியாது என்றும் இராஜபக்சே அரசு திமிர்த்தனமாக அறிவித்துள்ளது. இந்நிலையில் இலங்கையில் எஞ்சியிருக்கும் தமிழர்களைக் காப்பாற்ற உடனடியாக நடவடிக்கை எடுக்க வேண்டிய கடமை ஐ.நா. பேரவைக்கு உள்ளது.

அச்சு ஊடகங்கள், காட்சி ஊடகங்கள் மட்டுமின்றி இணையத்தளங்களும்கூட இலங்கை அரசாங்கத்தின் தாக்குதலுக்குள்ளாகி வருகின்றன. இதுவரை, 5 இணையதளங்கள் மூடப்பட்டுள்ளன. 2 இணைய தள அலுவலகங்களில் இராணுவத் தாக்குதல் நடைபெற்றிருக்கிறது. புகழ்பெற்ற பிபிசி வானொலியும்கூட இலங்கை அரசால் அச்சுறுத்தப்பட்டு சேவையை நிறுத்த வேண்டிய நிலை ஏற்பட்டுள்ளது. முள்ளிவாய்க்கால் யுத்தத்தின்போதான இனப்படுகொலை வெளிஉலகுக்குத் தெரியாதவண்ணம் எப்படி ஊடகங்களை இலங்கை அரசு கட்டுப்படுத்தியதோ, அதுபோலவே இப்போதும் செய்துகொண்டுள்ளது. இது இலங்கையில் வாழும் அனைத்துத் தரப்பினருக்கும் மிகப்பெரிய அச்சுறுத்தலாக உள்ளது. இலங்கையைக் கண்டிக்க வேறு எந்த நாடும் முன்வராத நிலையில் ஐ.நா. பேரவை தலையிடுவதைத் தவிர வேறுவழியில்லை. அங்கு மிச்சம் மீதி இருப்பவர்களும் கொன்றொழிக்கப்பட்ட நிறகு தீர்மானம் நிறைவேற்றுவதால் எந்தப் பயனும் ஏற்படப் போவதில்லை.

எனவே இனியும் காலந்தாழ்த்தாமல் உடனடியாக ஐ.நா. பேரவை தலையிட்டு இலங்கையில் ஊடக சுதந்திரத்தைப் பாதுகாக்க வேண்டும் என விடுதலைச் சிறுத்தைகள் கட்சி வலியுறுத்திக் கேட்டுக்கொள்கிறது. இது தொடர்பாக ஐ.நா. பேரவைச் செயலாளருக்கும், ஐ.நா. மனித உரிமை ஆணையருக்கும் கடிதங்கள் எழுதப்படும் என்பதையும் தெரிவித்துக்கொள்கிறோம்.

இவண்

தொல். திருமாவளவன்

தலித்துகள் மீதான வன்கொடுமைகள் அதிகரிப்பது ஏன்?

noreply@blogger.com (S R E E) — Fri, 12 Apr 2013 05:03:18 PDT

தலித்துகள் மீதான வன்கொடுமைகள் அதிகரிப்பது ஏன்?

தமிழக அரசுக்கு தொல். திருமாவளவன் கேள்வி

கடந்த பதினைந்து ஆண்டுகளில் இல்லாத அளவுக்கு 2012 ஆம் ஆண்டில் தலித் மக்கள் மீதான சாதிய வன்கொடுமைகள் உச்சகட்டத்தை எட்டியிருப்பதாக மதுரையைச் சேர்ந்த 'எவிடன்ஸ்'என்ற அமைப்பு ஆதாரங்களோடு அம்பலப்படுத்தியிருக்கிறது. விழுப்புரம், தருமபுரி மாவட்டங்கள் சாதி வெறியாட்டத்தில் முன்னணியில் இருப்பதாகவும் தெரியவந்துள்ளது.

கடந்த ஆண்டில் 2048 வழக்குகள் வன்கொடுமைத் தடுப்புச் சட்டத்தின்கீழ் பதிவு செய்யப்பட்டிருப்பதாக அரசாங்கத்தின் புள்ளிவிவரம் கூறுகிறது. ஆனால் அந்த வழக்குகளில் உருப்படியான எந்த நடவடிக்கையும் எடுக்கப்படவில்லை.

நாடு முழுவதும் பெண்கள்மீதான பாலியல் வன்முறைகளுக்கு எதிராக போராட்டங்கள் நடைபெற்ற கடந்த 2012 ஆம் ஆண்டில் தலித் பெண்கள் மீதான பாலியல் வன்முறைகள் தொடர்பாக தமிழ்நாட்டில் 62 வழக்குகள் பதிவு செய்யப்பட்டுள்ளன . ஆனால் அதில் ஒரு குற்றவாளிகூடத் தண்டிக்கப்படவில்லை. பெண்கள் மீதான வன்கொடுமைகளைத் தடுக்க இந்தியாவிலேயே முதல் மாநிலமாக முந்திக்கொண்டு திட்டங்களை அறிவித்த தமிழக முதல்வர் தலித் பெண்கள்மீதான வன்கொடுமைகளைக் கண்டும் காணாமல் இருப்பது ஏன் ?

வன்கொடுமைத் தடுப்புச் சட்டத்தின்கீழ் பதிவு செய்யப்படும் வழக்குகளில் பாதிக்கப்பட்ட மக்களுக்கு இழப்பீடு வழங்கவேண்டும் என்று சட்டம் இருந்தபோதிலும் நீதிமன்றம் தலையிட்டு ஆணைப் பிறப்பித்த தருமபுரி வழக்கில் மட்டும்தான் இழப்பீடு வழங்கப்பட்டிருக்கிறது. மற்ற வழக்குகளில் தமிழக அரசு எந்த நடவடிக்கையையும் எடுக்கவில்லை.

முன் எப்போதும் இல்லாத அளவுக்கு தலித் மக்கள் மீதான வன்கொடுமைகள் அதிகரித்திருப்பதற்குக் காரணம் என்ன? என்பதைத் தமிழக அரசு ஆராய்ந்து பார்க்கவேண்டும். தலித் மக்களுக்கு எதிராக வெறுப்புப் பிரச்சாரத்தில் ஈடுபட்டுவரும் சாதிவெறியர்களை அரசு கட்டுப்படுத்தாததே இதற்கு முதன்மையான காரணம். அவர்கள்மீது சட்டபூர்வமான நடவடிக்கைகளை மேற்கொள்வதற்குப் பதிலாக தமிழக அரசு அவர்களின் வெறுப்புப் பிரச்சாரத்தை சுதந்திரமாக அனுமதித்து வருவது வேதனை அளிக்கிறது.இதே நிலை தொடர்ந்தால் தமிழ்நாட்டின் அமைதி கெடுவதோடு மாநிலத்தின் வளர்ச்சியும் வெகுவாகப் பாதிக்கும் என்பதைத் தமிழக அரசுக்கு சுட்டிக்காட்டுகிறோம்.

பாராளுமன்ற தேர்தலை மனதில் வைத்து சாதிவெறியர்களை தமிழக அரசு ஊக்குவித்து வருகிறதோ என்ற ஐயம் நமக்கு எழுகிறது. அத்தகைய குறுகிய நோக்கத்தில் செயல்பட்டால் தமிழ்நாடு கலவர பூமியாக மாறிவிடும் என்பதைத்தான் இந்தப் புள்ளி விவரங்கள் சுட்டிக்காட்டுகின்றன.

ஈழத் தமிழர் உரிமைகளைப் பெற்றுத் தருவதற்காகவும், தமிழக உரிமைகளைப் பாதுகாப்பதற்காகவும் தமிழக மக்கள் அனைவரும் ஒன்றுபட்டு நிற்கவேண்டிய சூழலில் அவர்களிடையே பகையை ஏற்படுத்திப் பிரிவினையைத் தூண்டும் சாதி வெறியர்களைத் தனிமைப்படுத்த வேண்டுமென்றும், நலிந்த பிரிவினரான தலித் மக்களைப் பாதுகாப்பதற்கு தமிழ்நாட்டில் சட்டத்தின் ஆட்சியை நிலைநாட்ட வேண்டுமென்றும் விடுதலைச் சிறுத்தைகள் கட்சி தமிழக அரசை வலியுறுத்துகிறது.

தமிழகத்தில் அதிகரித்து வரும் சாதிய வன்கொடுமைகளுக்கு எதிராக போராட முன்வரும்படி இடதுசாரிகளையும், ஜனநாயக சக்திகளையும் விடுதலைச் சிறுத்தைகள் கட்சி அறைகூவி அழைக்கிறது.

இவண்

தொல்.திருமாவளவன்

மரண தண்டனையை ரத்து செய்யக்கோரி தமிழக அமைச்சரவையைக் கூட்டி தீர்மானம் நிறைவேற்ற வேண்டும்!

noreply@blogger.com (S R E E) — Sat, 13 Apr 2013 03:56:34 PDT

மரண தண்டனையை ரத்து செய்யக்கோரி

தமிழக அமைச்சரவையைக் கூட்டி தீர்மானம் நிறைவேற்ற வேண்டும்!

முதல்வருக்கு தொல்.திருமாவளவன் வேண்டுகோள்

பஞ்சாபைச் சேர்ந்த தேவீந்தர்சிங்பால் புல்லரின் வழக்கில் உச்சநீதிமன்றம் அளித்துள்ள தீர்ப்பு அனைவரையும் அதிர்ச்சிக்குள்ளாக்கியுள்ளது. காலதாமதத்தை ஒரு காரணமாகக் கருத முடியாது என நிலுவையில் உள்ள மரண தண்டனை வழக்குகளிலும் நீதிமன்றம் செல்லக்கூடிய நிலை உருவாகியுள்ளது. இதனால் வீரப்பன் கூட்டாளிகள் வழக்கிலும் ராஜீவ் கொலை வழக்கிலும் தருமபுரி பேருந்து எரிப்பு வழக்கிலும் மரண தண்டனை பெற்று சிறையிலுள்ள தமிழர்களின் எதிர்காலம் கேள்விக்குள்ளாகியுள்ளது. இவர்கள் அனைவரும் தூக்கிலிடப்படும் அபாயம் அதிகரித்திருக்கிறது.

புல்லர் வழக்கில் கருணை மனு மீது குடியரசுத் தலைவர் முடிவெடுக்க 8 ஆண்டுகள் தாமதம் செய்வதால் தூக்குத் தண்டனையை ஆயுள் தண்டனையாக மாற்ற வேண்டும் என வாதிடப்பட்டது. அதை 2 நீதிபதிகள் கொண்ட அமர்வு தற்போது தள்ளுபடி செய்திருக்கிறது. அரசியலமைப்புச் சட்டத்தோடு தொடர்புடைய இந்தத் தீர்ப்பை அரசியலமைப்புச் சட்ட முழு அமர்வு ஒன்று ஆராய்ந்து தீர்ப்பளிப்பதே சரியானதாக இருக்கும். எனவே, கருணை மனு தொடர்பான நிலைப்பாட்டை இறுதிசெய்ய மத்திய அரசு உச்ச நீதிமன்றத்தில் அரசியலமைப்புச் சட்ட முழு அமர்வு ஒன்றை அமைத்திட உடனடியாக நடவடிக்கை எடுக்க வேண்டும் என்று விடுதலைச் சிறுத்தைகள் கட்சி சார்பில் வலியுறுத்துகிறோம்.

மரண தண்டனையை ரத்து செய்யக்கூடிய அதிகாரம் மாநில ஆளுநருக்கும் இருக்கிறது. ஒரு மாநிலத்தின் அமைச்சரவைக் குழுவில் அதற்கான முடிவு எடுக்கப்பட்டு ஆளுநருக்குப் பரிந்துரைக்கப்பட்டால் அவர் மரண தண்டனையை ரத்து செய்ய முடியும். இந்த அதிகாரத்தில் எந்தச் சட்டமும் குறுக்கிட முடியாது என அரசியலமைப்புச் சட்டம் தெளிவுபடுத்தியுள்ளது. எனவே, ராஜீவ் கொலை வழக்கு, தருமபுரி பேருந்து எரிப்பு வழக்கு உள்ளிட்டவற்றில் மரண தண்டனை விதிக்கப்பட்டிருக்கும் கைதிகள் அனைவரது தண்டனையையும் ஆயுள் தண்டனையாகக் குறைக்கும்படி தமிழக அமைச்சரவையில் தீர்மானம் நிறைவேற்றிட தமிழக முதல்வர் நடவடிக்கை எடுக்க வேண்டும். இதன் மூலம் இந்தியாவுக்கே ஒரு முன்னுதாரணமாக அவர் திகழ வேண்டும் என விடுதலைச் சிறுத்தைகள் கட்சி மாண்புமிகு தமிழக முதல்வர் அவர்களை வேண்டிக்கொள்கிறது.

தமிழ்நாட்டிலிருக்கும் அரசியல் கட்சிகள் தமக்கிடையே இருக்கும் கருத்து வேறுபாடுகளைக் கடந்து இந்தப் பிரச்சனையில் ஒன்றுபட்டுக் குரல் எழுப்ப முன்வருமாறு விடுதலைச் சிறுத்தைகள் கேட்டுக்கொள்கிறது.

இவண்

தொல்.திருமாவளவன்

மக்கள் ஒற்றுமைப் பேரணி - பொதுக்கூட்டம் நடத்த விடுதலைச்சிறுத்தைகளுக்கு உயர்நீதிமன்றம் அனுமதி

noreply@blogger.com (S R E E) — Sat, 13 Apr 2013 03:49:01 PDT

புரட்சியாளர் அம்பேத்கர் அவர்களின் பிறந்த நாளான ஏப்ரல் 14 அன்று விடுதலைச் சிறுத்தைகள் கட்சி சார்பில் சென்னையில் மக்கள் ஒற்றுமைப் பேரணி மற்றும் விருதுகள் வழங்கும் விழா நடத்துவதற்கு அனுமதி வழங்கும்படி சென்னை உயர்நீதி மன்றம் தீர்ப்பு வழங்கியுள்ளது.

பேரணி மற்றும் பொதுக்கூட்டம் நடத்துவதற்கு அனுமதி கோரி கடந்த 26-3-2013 அன்று சென்னை நகரக் காவல் துறையிடம் விண்ணப்பிக்கப்பட்டது. இரு வாரங்கள் கழித்து, நிகழ்ச்சிக்கு இரண்டு மூன்று நாட்கள் மட்டுமே இடைவெளி உள்ள நிலையில், உங்களுக்கு ஏன் அனுமதி மறுக்கக் கூடாது? என்று விளக்கம் கேட்டு காவல்துறை விடுதலைச் சிறுத்தைகளுக்கு அறிக்கை அனுப்பியது. விளக்கம் கேட்கிறோம் என்கிற பெயரால் மேலும் காலத் தாழ்வை ஏற்படுத்தி விடுதலைச் சிறுத்தைகளின் பேரணி மற்றும் பொதுக்கூட்டத்தை நடத்த விடாமல் தடுக்க வேண்டும் என்கிற உள்நோக்கத்தோடு காவல்துறை செயல்படுவதாக உணர்ந்த நிலையில், 11-4-2013 அன்று உயர்நீதிமன்றத் தலைமை நீதியரசர் திரு. அகர்வால் அவர்களை அணுகி, எமது நீதிப் பேராணை (ரிட்) மனுவை ஏற்கும்படி கேட்டுக்கொண்டோம். அன்று தெலுங்கு வருடப் பிறப்பு விடுமுறை நாள் என்பதால் தலைமை நீதிபதி அவர்களை அவரது இல்லத்தில் சந்தித்து விடுக்கப்பட்ட எமது வேண்டுகோளை ஏற்று அன்றே சிறப்பு அமர்வுக்கு ஆணையிட்டார். அதன்படி, நீதியரசர் திரு. ராஜேஸ்வரன் அவர்கள் எமது நீதிப் பேராணை மனுவை விசாரணைக்கு எடுத்துக்கொண்டார். விடுதலைச் சிறுத்தைகளின் தரப்பில் மூத்த வழக்கறிஞர் பிரபாகரன் அவர்கள், பேரணி மற்றும் பொதுக்கூட்டத்திற்கு உடனடியாக அனுமதி வழங்க வேண்டும் என்று வாதாடினார். அரசுத் தரப்பில், மாநகரக் காவல் ஆணையரின் பதிலை உடனடியாகப் பெற இயலாது என்றும், ஆகவே அடுத்த நாளைக்கு விசாரணையைத் தள்ளி வைக்க வேண்டும் என்றும் அரசு வழக்கறிஞர் மூர்த்தி கேட்டுக்கொண்டார்.

அதன்படி 12-4-2013 பகல் 12 மணிக்கு நீதியரசர் ராஜேஸ்வரன் அவர்கள் வழக்கை விசாரணைக்கு எடுத்துக்கொண்டார். இரண்டரை மணி நேரம் நடைபெற்ற இவ்வழக்கில் அரசுத் தலைமை வழக்கறிஞர் திரு. யோமயாஜுலு, சட்டம்-ஒழுங்கு பாதுகாப்பைக் கருத்தில் கொண்டு விடுதலைச் சிறுத்தைகள் பேரணி, பொதுக்கூட்டம் நடத்த அனுமதி அளிக்கக் கூடாது என்று வாதாடினார்.

வழக்கமாக அனைத்துக் கட்சியினருக்கும் பொதுக்கூட்டம் நடத்தவும் பேரணி நடத்தவும் அனுமதி வழங்கப்பட்டுவரும் இடங்களில் விடுதலைச் சிறுத்தைகளுக்கு மட்டும் அனுமதி வழங்க காவல்துறை மறுப்பது ஏன் என்றும் இது சனநாயகத்திற்கும் அடிப்படை உரிமைகளுக்கும் எதிரானது என்றும் விடுதலைச் சிறுத்தைகள் கட்சி சார்பில் வழக்கறிஞர் பிரபாகரன் வாதாடினார்.

சட்டம்-ஒழுங்கைப் பாதுகாக்கும் வகையில் உரிய நிபந்தனைகளுடன் அனுமதி வழங்குவதுதான் ஞாயமானது என்று நீதியரசர் தன்னுடைய கருத்தை வெளிப்படுத்தியபோது, அரசுத் தலைமை வழக்கறிஞர், “பொதுக்கூட்டத்தை நடத்துவோரும் அதில் பங்கேற்போரும் யார் என்பதை மாண்புமிகு நீதியரசர் அவர்கள் கவனத்தில்கொள்ள வேண்டும்” என்று கூறிய கருத்து அதிர்ச்சியளித்தது. இதனை மறுத்து, டாக்டர் அம்பேத்கர் அவர்களின் பிறந்த நாள் விழா என்பதால், அவ்விழாவை நடத்துவோரும் பங்கேற்போரும் பெரும்பாலும் தலித்துகள் என்பதை மறைமுகமாக அவர் சுட்டிக்காட்டுகிறார் என்றும், இது தலித்துகள் என்பதனால் இழைக்கப்படும் ஓரவஞ்சனை என்றும் வழக்கறிஞர் பிரபாகரன் வாதாடினார்.

இதனைத் தொடர்ந்து, நீதியரசர் ராஜேஸ்வரன் அவர்கள் விடுதலைச் சிறுத்தைகள் கோரியபடி எழும்பூர் இராசரத்தினம் திடலிலிருந்து லாங்ஸ் தோட்ட சாலை - பாந்தியன் சாலை சந்திப்பு வரை பேரணி நடத்தவும், மயிலை மாங்கொல்லையில் பொதுக்கூட்டம் நடத்தவும் அனுமதி வழங்க வேண்டும் எனத் தீர்ப்பு வழங்கியுள்ளார். அத்துடன், பேரணி மற்றும் பொதுக்கூட்டத்தில் பின்பற்ற வேண்டிய வழிமுறைகளையும் அத்தீர்ப்பில் கூறியிருக்கிறார்.

ஆகவே, திட்டமிட்டவாறு ஏப்ரல் 14 அன்று பிற்பகல் 3 மணியளவில் இராசரத்தினம் திடலிலிருந்து மக்கள் ஒற்றுமைப் பேரணியும், மாலை 6 மணியளவில் மயிலை மாங்கொல்லையில் விருதுகள் வழங்கும் விழா பொதுக்கூட்டமும் நடைபெறும்.

இந்நிகழ்வுகளில் பங்கேற்கும் என் உயிரின் உயிரான விடுதலைச் சிறுத்தைகள் அனைவரும் பொதுமக்களுக்கு இடையூறு ஏற்படாத வகையிலும், மாற்றுக் கருத்துள்ளவர்களின் மனம் புண்படாத வகையிலும், சட்டம்-ஒழுங்கு பாதிக்கப்படாத வகையிலும் கட்டுப்பாடு காத்திட வேண்டும் என கேட்டுக்கொள்கிறேன். சமூக நல்லிணக்கத்தைப் பேணுவதும் அனைத்துத் தரப்பு மக்களின் நன்மதிப்பைப் பெறுவதும் மட்டுமே நமது நோக்கம் என்பதை உறுதிப்படுத்தும் வகையில் மக்கள் ஒற்றுமைப் பேரணியும், விருதுகள் வழங்கும் விழா பொதுக்கூட்டமும் அமைதியாகவும் வெற்றிகரமாகவும் நடந்தேறுவதற்கு விடுதலைச் சிறுத்தைகள் மிகுந்த பொறுப்புணர்வோடு செயலாற்ற வேண்டும் எனவும் கேட்டுக்கொள்கிறேன்.

இவண்

தொல்.திருமாவளவன்

துபாயில் சிக்கிக்கொண்டிருக்கும் ஈழத் தமிழ் அகதிகளை இலங்கைக்கு அனுப்பக்கூடாது!

noreply@blogger.com (S R E E) — Fri, 12 Apr 2013 05:01:20 PDT

துபாயில் சிக்கிக்கொண்டிருக்கும்

ஈழத் தமிழ் அகதிகளை இலங்கைக்கு அனுப்பக்கூடாது!

இந்திய அரசு தலையிட தொல்.திருமாவளவன் வேண்டுகோள்

தமிழகத்திலிருந்து படகில் ஆஸ்திரேலியாவுக்குச் செல்லும்போது படகு பழுதாகி தற்போது துபாயில் தங்கியிருக்கும் லோகினி ரதிமோகன் உள்ளிட்ட 19 ஈழத் தமிழர்களை மீண்டும் இலங்கைக்கு அனுப்பக்கூடாது.அவர்களைப் பாதுகாக்க இந்திய அரசு நடவடிக்கை எடுக்கவேண்டும் என விடுதலைச் சிறுத்தைகள் கட்சி சார்பில் கேட்டுக்கொள்கிறோம். அவர்களை இன்று(11.04.2013) துபாய் அரசு இலங்கைக்குத் திருப்பி அனுப்பவுள்ளதாக செய்திகள் வெளியாகியுள்ள நிலையில் இந்திய அரசு விரைந்து செயல்படவேண்டுமென்று வலியுறுத்துகிறோம்.

தமிழ்நாட்டிலிருந்து படகில் சென்றபோது படகு பழுதானதால் நடுக்கடலில் தத்தளித்த ஈழத் தமிழர்கள் 46 பேரில் 7 பேர் ஏற்கனவே இலங்கைக்குத் திருப்பி அனுப்பப்பட்டுவிட்டார்கள். மீதமுள்ளவர்களில் 20 பேருக்கு அமெரிக்காவும், சுவீடனும் புகலிடம் வழங்கியுள்ளன . எஞ்சியிருக்கும் 19 பேரையும் இலங்கைக்குத் திருப்பியனுப்ப துபாய் அரசு முடிவு செய்திருக்கிறது.அவர்களைத் திரும்பவும் இலங்கைக்கு அனுப்பக்கூடாது என சர்வதேச மனித உரிமை அமைப்புகளும், அகதிகளுக்கான ஐ.நா அமைப்பும் (யூ.என்.எச்.சி.ஆர் ) வலியுறுத்தியுள்ளன .இலங்கைக்குத் திருப்பி அனுப்பப்படவுள்ள 19 பேரில் லோகினி ரதிமோகன் என்ற இளம் பெண்ணும் ஒருவராவார். அவர் ஈழத்தில் தொலைக்காட்சியில் செய்தி வாசிப்பாளராக இருந்தவர். ஏற்கனவே அவ்வாறு செய்தி வாசிப்பாளராக இருந்த இசைப்பிரியா கொடூரமான முறையில் இலங்கைப் படையால் பாலியல் வல்லுறவுக்கு ஆட்படுத்தப்பட்டு கொல்லப்பட்டிருக்கும் நிலையில் லோகினியை இலங்கைக்கு அனுப்புவது தெரிந்தே அவரைக் கொலைக்களத்துக்கு அனுப்புவதற்கு ஒப்பாகும். எனவே இந்திய அரசு இதில் தலையிட்டு அந்த ஈழ அகதிகள் அனைவரையும் இந்தியாவுக்கு அழைத்துவர நடவடிக்கை எடுக்கவேண்டும்.

ஐ.நா மனித உரிமைக் கவுன்சில் தீர்மானத்துக்குப் பிறகும்கூட இலங்கை அரசு தன்னை திருத்திக்கொள்ள எந்தவொரு நடவடிக்கையையும் எடுக்கவில்லை. மாறாக அந்தத் தீர்மானத்தைக் கேவலப்படுத்தும் விதமாகவே நடந்துகொள்கிறது. எல்.எல்.ஆர்.சி பரிந்துரைப்படி அமைக்கப்பட்ட ராணுவ நீதிமன்றம் இப்போது வழங்கியிருக்கும் தீர்ப்பு அதற்கொரு உதாரணமாகும். இலங்கையில் இறுதி யுத்தத்தின்போது தமிழர்கள் கொல்லப்பட்டதற்கு தாங்கள் பொறுப்பல்ல என அது கூறியிருக்கிறது. இந்தச் சூழலில் ஈழத் தமிழ் அகதிகளை மீண்டும் அவர்களது விருப்பத்துக்கு மாறாக இலங்கைக்கு அனுப்புவது எவ்விதத்திலும் நியாயமாகாது. இதை உணர்ந்து ஈழத் தமிழ் அகதிகள் 19 பேரையும் காப்பாற்ற இந்தியா முன்வரவேண்டும் எனக் கேட்டுக்கொள்கிறோம் .

இவண்

தொல்.திருமாவளவன்

ஏப்ரல் 14 புரட்சியாளர் அம்பேத்கர் பிறந்த நாள் சென்னையில் மாபெரும் மக்கள் ஒற்றுமைப் பேரணி -

noreply@blogger.com (S R E E) — Mon, 08 Apr 2013 06:13:05 PDT

ஏப்ரல் 14 புரட்சியாளர் அம்பேத்கர் பிறந்த நாள்
சென்னையில் மாபெரும் மக்கள் ஒற்றுமைப் பேரணி -
விருதுகள் வழங்கும் விழாப் பொதுக்கூட்டம்
விருது பெறும் சான்றோர் பட்டியல் அறிவிப்பு

தொல்.திருமாவளவன் அறிக்கை

விடுதலைச் சிறுத்தைகள் கட்சியின் சார்பில் கடந்த 2007ஆம் ஆண்டு முதல் சாதி ஒழிப்பு, பெண் விடுதலை மற்றும் மொழி, இன பாதுகாப்பு போன்ற தளங்களில் சிறப்பாகப் பணியாற்றிவரும் சான்றோருக்கு விருதுகள் வழங்கப்பட்டு வருகிறது. புரட்சியாளர் அம்பேத்கர், தந்தை பெரியார், பண்டிதர் அயோத்திதாசர், பெருந்தலைவர் காமராசர், கண்ணியத்தமிழர் காயிதே மில்லத் ஆகிய மாமனிதர்களின் நினைவாகவும், தமிழ்மொழி செம்மொழி தகுதி பெற்றதை நினைவுகூரும் வகையிலும் ஆண்டுதோறும் ஆறு விருதுகள் ஏப்ரல் 14, புரட்சியாளர் அம்பேத்கர் பிறந்த நாளில் அளிக்கப்பட்டு வருகின்றன. விருதுபெறும் சான்றோருக்கு நினைவுக் கேடயம், பாராட்டுப் பட்டயம் ஆகியவற்றுடன் தலா ரூபாய் 50,000 பொற்கிழியும் வழங்கி சிறப்பிக்கப்படுகிறது.

அந்த வகையில், 2013ஆம் ஆண்டுக்கான விருதுகள் வழங்கும் விழா ஏப்ரல் 14 அன்று சென்னையில் நடைபெறுகிறது. இவ்விழாவில் அம்பேத்கர் சுடர் விருது புதுதில்லியில் வசிக்கும் ஓய்வுபெற்ற ஐ.ஏ.எஸ் அதிகாரி திரு. பி.எஸ்.கிருஷ்ணன் அவர்களுக்கும், பெரியார் ஒளி விருது திராவிடர் விடுதலைக் கழகத் தலைவர் கொளத்தூர் மணி அவர்களுக்கும், அயோத்திதாசர் ஆதவன் விருது இந்தியப் பொதுவுடைமைக் கட்சியின் மூத்த தலைவர் டி.ஞானையா அவர்களுக்கும், காமராசர் கதிர் விருது முன்னாள் சட்டப்பேரவை உறுப்பினர் நிலக்கோட்டை ஏ.எஸ்.பொன்னம்மாள் அவர்களுக்கும், காயிதே மில்லத் பிறை விருது தமிழக தெற்கு எல்லைப் போராட்ட வீரர் கொடிக்கால் ஷேக் அப்துல்லா அவர்களுக்கும், செம்மொழி ஞாயிறு விருது சொல்லாய்வறிஞர் ப.அருளியார் அவர்களுக்கும் வழங்கிச் சிறப்பிக்கப்படுகிறது.

இவ்விழாவுடன் இந்த ஆண்டு தமிழக மக்களின் ஒற்றுமையை வலியுறுத்தும் வகையில் மாபெரும் மக்கள் ஒற்றுமைப் பேரணி நடத்தவும் திட்டமிடப்பட்டுள்ளது.

தற்போதைய நிலையில் தமிழகத்தில் தருமபுரி வன்முறையைத் தொடர்ந்து நாடு முழுவதும் சாதிவெறி உணர்வுகளைத் தூண்டிவிட்டு அரசியல் ஆதாயம் தேடும் முயற்சியில் வெளிப்படையாகவே ஒரு கும்பல் ஈடுபட்டு வருகிறது. ஈழத் தமிழர் நலன்களுக்காக மாணவர்கள் உள்ளிட்ட ஒட்டுமொத்தத் தமிழகமும் போர்க்கோலம் பூண்டுள்ள நிலையிலும் அக்கும்பல் மட்டும் தமிழினத்தின் ஒற்றுமையைச் சீர்குலைக்கும் வகையில் சாதிவெறிப் பிரச்சாரங்களை மேற்கொண்டு வருகிறது. இந்நிலையில் சாதி உணர்வுகளுக்கு ஆட்படாதவாறு தமிழ் மக்களின் ஒற்றுமையை வென்றெடுக்க வேண்டியுள்ளது.

அதாவது, ஈழத் தமிழர்களின் நலன்களுக்காகவும், தமிழ்நாட்டின் மாநில உரிமைகளுக்காகவும் தமிழக மக்கள் அனைவரும் ஒன்றுபட்டுப் போராட வேண்டிய தேவை எழுந்துள்ளது. ஈழத் தமிழர்ச் சிக்கல், காவிரி நீர் மற்றும் முல்லை பெரியாறு அணைச் சிக்கல்கள், கச்சத் தீவு மீட்பு, தமிழக மீனவர்கள் பாதுகாப்பு போன்றவற்றில் இந்திய அரசின் போக்கு தமிழ்ச் சமூகத்திற்கு எதிராகவே இருந்து வருகிறது. ஆகவே, இந்திய அரசின் கவனத்தை ஈர்க்கும் வகையில் தமிழக மக்கள் சாதி, மத வேறுபாடுகளைக் கடந்து ஒன்றுபட வேண்டும் என்பதையும், தலித்துகள், பெண்கள் மற்றும் சிறுபான்மையினர் நலன்களைப் பாதுகாத்திட யாவரும் ஒருங்கிணைந்து போராட வேண்டுமென்பதையும் உணர்த்தும் வகையில் விடுதலைச் சிறுத்தைகளின் சார்பில் மாபெரும் மக்கள் ஒற்றுமைப் பேரணி நடத்தப்படுகிறது. பிற்பகல் 3 மணியிலிருந்து 5 மணி வரை பேரணியும் அதனைத் தொடர்ந்து மாலை 6 மணிக்கு விருதுகள் வழங்கும் விழாப் பொதுகூட்டமும் நடைபெறவுள்ளது. இப்பேரணியிலும் பொதுக்கூட்டத்திலும் விடுதலைச் சிறுத்தைகள் மட்டுமின்றி மக்கள் ஒற்றுமையை விரும்பும் சனநாயக சக்திகள் அனைவரும் பங்கேற்க வேண்டுமென அழைப்பு விடுக்கிறோம்.

இவண்

தொல்.திருமாவளவன்

காமன்வெல்த் நாடுகளின் வெளியுறவு அமைச்சர்கள் கூட்டத்தில் இலங்கையைப் பற்றி விவாதிக்க இந்தியா நடவடிக்கை எடுக்கவேண்டும்

noreply@blogger.com (S R E E) — Fri, 29 Mar 2013 05:11:06 PDT

காமன்வெல்த் நாடுகளின் வெளியுறவு அமைச்சர்கள் கூட்டத்தில் இலங்கையைப் பற்றி விவாதிக்க இந்தியா நடவடிக்கை எடுக்கவேண்டும் -

தொல். திருமாவளவன் வேண்டுகோள்

54 நாடுகளை உறுப்பினர்களாகக் கொண்ட காமல்வெல்த் நாடுகளின் அடுத்த மாநாடு இலங்கையில் நவம்பர் மாதம் நடைபெறவுள்ளது. அந்த மாநாட்டை இலங்கையில் நடத்தக்கூடாது என கனடா, ஆஸ்திரேலியா முதலான நாடுகள் ஏற்கனவே எதிர்ப்பு தெரிவித்துள்ளன. காமன்வெல்த் நாடுகளின் கூட்டமைப்புக்குத் தலைமை தாங்கும் பிரிட்டிஷ் அரசியாரும் அந்த மாநாட்டில் கலந்துகொள்ள மாட்டார் என்ற செய்திகள் வெளியாகியுள்ளன. இதனிடையில் காமன்வெல்த் நாடுகளின் வெளியுறவு அமைச்சர்களின் குழுவான 'காமன்வெல்த் மினிஸ்டிரியல் ஆக்சன் குரூப் (சி.எம்.ஏ.ஜி)' எதிர்வரும் ஏப்ரல் 26ஆம் தேதி லண்டனில் கூடவுள்ளது. ஒரு நாட்டை காமன்வெல்த் அமைப்பிலிருந்து இடை நீக்கம் செய்வதற்கு இந்தக் குழுவுக்கு அதிகாரம் உள்ளது.

இந்தக் கூட்டத்தில் இலங்கைப் பிரச்னையை விவாதத்துக்கு எடுத்துக்கொள்ள வேண்டும் என கனடா முதலான நாடுகள் வலியுறுத்தி வருகின்றன. ஆனால் இக்குழுவுக்குத் தற்போது தலைமை ஏற்றிருக்கும் பங்களாதேஷ், இலங்கையை ஆதரிப்பதால் இக்கூட்டத்தில் இலங்கைப் பிரச்சனை விவாதிக்கப்படமாட்டாது எனத் தெரிய வந்துள்ளது. இது நமக்கு அதிர்ச்சியை ஏற்படுத்தியிருக்கிறது. காமன்வெல்த் நாடுகளின் கூட்டமைப்பில் இடம்பெற்றுள்ள இங்கிலாந்து, செய்ன்ட் கிட்ஸ், கேமரூன், மால்டா, நியூசிலாந்து, ஆஸ்திரேலியா, சைப்ரஸ் ஆகிய எட்டு நாடுகள் ஐ.நா மனித உரிமைப் பேரவையில் நிறைவேற்றப்பட்ட இலங்கைக்கு எதிரான அமெரிக்கத் தீர்மானத்தை வழிமொழிந்திருந்தன. சியர்ரா லியோன், இந்தியா ஆகியவை ஆதரித்து வாக்களித்திருந்தன. இந்தப் பத்து நாடுகளும் எதிர்ப்பு தெரிவித்தால் இலங்கையை காமன்வெல்த் கூட்டமைப்பிலிருந்து வெளியேற்றிவிட முடியும். அதற்கு ஏப்ரல் மாதம் லண்டனில் நடக்கவுள்ள வெளியுறவு அமைச்சர்கள் கூட்டத்திலேயே தீர்மானம் கொண்டுவரவேண்டும். இந்த வாய்ப்பை இந்தியா தவறவிடக்கூடாது.

இலங்கையில் காமன்வெல்த் மாநாடு நடப்பது இந்தியாவுக்கு மிகப்பெரிய அவமானமாகும். அத்தகைய தலைக்குனிவுக்கு இந்தியா ஆளாகக்கூடாது. எனவே லண்டனில் நடைபெறவுள்ள கூட்டத்தில் இலங்கையைப் பற்றி விவாதிக்க இந்தியா நடவடிக்கை எடுக்கவேண்டும் என வலியுறுத்திக் கேட்டுக்கொள்கிறோம்.

இவண்

தொல்.திருமாவளவன்

சட்டப் பேரவைத் தீர்மானம்: தமிழக முதல்வர் பிரதமரிடம் நேரில் வழங்க வேண்டும்

noreply@blogger.com (S R E E) — Thu, 28 Mar 2013 21:50:37 PDT

சட்டப் பேரவைத் தீர்மானம்:

தமிழக முதல்வர் பிரதமரிடம் நேரில் வழங்க வேண்டும்

தொல். திருமாவளவன் வேண்டுகோள்!

தமிழக அரசியல் கட்சிகளும், பொதுமக்களும், மாணவர்களும் ஈழச் சிக்கல் தொடர்பாக வலியுறுத்திவந்த கருத்துகளை தமிழக சட்டப் பேரவையில் தீர்மானமாக முன்மொழிந்த தமிழக முதல்வருக்கும் அதனை நிறைவேற்றித் தந்த சட்டப்பேரவை உறுப்பினர்களுக்கும் விடுதலைச் சிறுத்தைகள் சார்பில் பாராட்டுகளைத் தெரிவித்துக்கொள்கிறோம்.

இத்தீர்மானத்தில் இடம்பெற்றிருக்கும் பொது வாக்கெடுப்பு, சர்வதேச விசாரணை முதலான கருத்துகள் ஏற்கனவே 'டெசோ' உள்ளிட்ட பல்வேறு அமைப்புகளால் முன்வைக்கப்பட்டு அதற்காகப் பல்வேறு போராட்டங்களும் நடத்தப்பட்டிருக்கின்றன. என்றாலும், தமிழக சட்டப் பேரவையில் தீர்மானமாக நிறைவேற்றப்பட்டதன்மூலம் அவை இன்னும் அதிகமான வலிமையைப் பெற்றிருக்கின்றன. சிங்கள அரசின் மீது பொருளாதாரத் தடை விதிக்கப்பட வேண்டும், ஐ.நா. பாதுகாப்பு கவுன்சிலில் தீர்மானம் கொண்டுவர இந்தியா நடவடிக்கை எடுக்கவேண்டும் என்ற கோரிக்கைகள் இந்திய அரசுக்கு மேலும் அழுத்தம் தருவனவாக அமைந்துள்ளன. தக்க நேரத்தில் முக்கியத்துவம் வாய்ந்த இந்தத் தீர்மானத்தை நிறைவேற்றியிருப்பதன் மூலம் ஒட்டுமொத்தத் தமிழகத்தின் உணர்வுகளும் உலகறியச் செய்யப்பட்டுள்ளன.

சட்டப் பேரவையில் நிறைவேற்றப்பட்ட தீர்மானத்திற்கு எதிராக விமர்சனங்கள் எழுந்துள்ளன. குறிப்பாகச் சில ஆங்கில ஊடகங்களும் விமர்சித்துள்ளன. தமிழ் இனத்தில் பிறந்த காரணத்தாலேயே பல்லாயிரக் கணக்கான தமிழர்கள் கொல்லப்பட்டதை 'இனப்படுகொலை'யென அழைக்கக் கூடாது என்று வாதிடுகிறவர்கள்தான் இப்படி விமர்சிக்கிறார்கள். அவர்களின் தமிழின விரோதப் போக்கைத் தெரிந்துகொள்ள இதுவொரு வாய்ப்பு எனக் கருதுவோம்.

சட்டப் பேரவையில் நிறைவேற்றப்பட்டுள்ள தீர்மானத்தை இந்திய அரசு பொருட்படுத்தாமல் அலட்சியம் செய்யலாம். எனவே, வரலாற்றுச் சிறப்பு வாய்ந்த இத்தீர்மானத்தை தமிழக முதல்வர் தாமே நேரில் சென்று பிரதமரிடம் அளித்து விளக்க வேண்டும். அத்துடன் பிற மாநில முதல்வர்களையும், அரசியல் கட்சித் தலைவர்களையும் சந்தித்து இத்தீர்மான நகலை அளித்து அவர்களது ஆதரவையும் திரட்டுவதற்குரிய நடவடிக்கைகளை மேற்கொள்ள வேண்டும் எனவும் கேட்டுக்கொள்கிறோம்.

இலங்கையில் இனப்படுகொலை செய்த போர்க்குற்றவாளிகள் தண்டிக்கப்படுவதற்கு நாம் வெகுதூரம் பயணப்பட்டாகவேண்டும். கட்சி வேறுபாடுகளைக் களைவோம்! அந்த நீண்ட நெடிய போராட்டப் பயணத்தில் தமிழகம் ஒன்றுபட்டு நின்றது என்ற வரலாற்றை உருவாக்குவோம்!

இவண்

தொல்.திருமாவளவன்

பூந்தமல்லி-செங்கல்பட்டு சிறப்பு முகாம்களை இழுத்து மூட வலியுறுத்தி முற்றுகைப் போராட்டம்!

noreply@blogger.com (S R E E) — Tue, 26 Mar 2013 21:38:30 PDT

சட்டத்திற்குப் புறம்பான பூந்தமல்லி-செங்கல்பட்டு சிறப்பு முகாம்களை இழுத்து மூட வலியுறுத்தி விடுதலைச் சிறுத்தைகள் முற்றுகைப் போராட்டம்!

பூந்தமல்லி, செங்கல்பட்டு சிறப்பு முகாம்களை இழுத்து மூட வலியுறுத்தி இன்று (26-3-2013) காலை 11 மணியளவில் பூந்தமல்லி சிறப்பு முகாம் முன்பு விடுதலைச் சிறுத்தைகள் சார்பில் முற்றுகைப் போராட்டம் நடைபெற்றது.

பூந்தமல்லி சிறப்பு முகாமில் பல ஆண்டுகளாக பொய் வழக்குகளில் கைது செய்யப்பட்டு சித்திரவதைக்குள்ளாகிக் கொண்டிருக்கும் சந்திரகுமார், பகீதரன், ஜெயமோகன், கங்காதரன் ஆகியோரைச் சந்திப்பதற்காக கட்சியின் செய்தித் தொடர்பாளர் வன்னிஅரசு தலைமையில் விடுதலைச் சிறுத்தைகள் சென்றனர். காவல்துறையும், வருவாய்த் துறை அதிகாரிகளும் தடுத்து நிறுத்தியதால், அங்கேயே முற்றுகைப் போராட்டத்தில் ஈடுபட்டனர். "விடுதலை செய் விடுதலை செய் சட்ட விரோதமாகத் தடுத்து வைக்கப்பட்டிருக்கும் ஈழத்துச் சொந்தங்களை விடுதலை செய்! இழுத்து மூடு இழுத்து மூடு சட்டவிரோதமான சிறப்பு முகாம்களை இழுத்து மூடு!, தமிழக அரசே சிறப்பு முகாம்களை தமிழகத்திலிருந்து அப்புறப்படுத்த சட்டப்பேரவையில் தீர்மானம் கொண்டுவா!' ஆகிய முழக்கங்களை முன்வைத்து முற்றுகைப் போராட்டத்தில் ஈடுபட்டனர்.

துணை வட்டாட்சியருடன் நடைபெற்ற பேச்சுவார்த்தையின்போது, இதுவரை உணவுப் படியாக ரூபாய் 70 அரசால் கொடுக்கப்பட்டிருந்தது. அதனை ரூ. 150ஆக உயர்த்திக் கேட்டு 6 மாதம் ஆகியும் இன்னும் தரவில்லை. உறவினர்கள் சந்திக்க அனுமதியில்லை. அயல்நாட்டவர் சட்டத்தில் சொல்லப்படாதவாறு, குடும்பத்திலிருந்து பிரித்து சிறப்பு முகாமில் அடைப்பது சட்டவிரோதம் என்று விடுதலைச் சிறுத்தைகள் வாதிட்டனர். உங்கள் கோரிக்கைகளை அரசுக்கு எடுத்துச் சொல்கிறேன் என்று அவர் உறுதியளித்ததன் பேரில் போராட்டம் கைவிடப்பட்டது. கோரிக்கைகளை அரசு உடனடியாக நிறைவேற்றாவிட்டால் விடுதலைச் சிறுத்தைகள் சார்பில் ஏப்ரல் 3ஆம் நாள் மிகப் பெரிய அளவில் முற்றுகைப் போராட்டத்தை நடத்துவோம் என எச்சரிக்கை விடுக்கப்பட்டுள்ளது.

இப்போராட்டத்தில் பூந்தமல்லி சிறப்பு முகாமில் சாகும்வரை உண்ணாநிலைப் போராட்டம் நடத்தி விடுதலையான ஈழத்தமிழர் செந்தூரன் மற்றும் கட்சியின் அமைப்புச் செயலாளர் பூவை வல்லரசு, மாவட்டச் செயலாளர் கதிர்நிலவன், தேவமுதல்வன், பூவை ஒன்றியச் செயலாளர் முகிலன், பத்ரி கென்னடி, எழிலன் உள்ளிட்ட நூற்றுக்கும் மேற்பட்ட விடுதலைச் சிறுத்தைகள் கலந்துகொண்டனர்.

மதுரை போராட்டங்கள்

noreply@blogger.com (எழுச்சி தமிழர்) — Fri, 29 Mar 2013 02:41:33 PDT

ஐ.நா மன்றத்தில் அமெரிக்கா கொண்டு வரவுள்ள தீர்மானத்தில், இராஜபக்சே இனப்படுகொலைக்கான போர்க் குற்றவாளி என்றும், அங்கு நடந்த இனப்படுகொலைக்கு பாரபட்சமற்ற பன்னாட்டு விசாராணை நடத்தப்பட வேண்டும் என்றும், இந்திய அரசு ஐ.நா.மன்றத்தில் ஈழத்தமிழர்களுக்கு ஆதரவான தீர்மானத்தை தன்னிச்சையாக கொண்டு வரவேண்டும், அதில் தனித் தமீழ் ஈழம் அமைவதற்க்கான பொது வாக்கெடுப்பு நடத்தப்படவேண்டும், இந்திய அரசு இலங்கைக்கு பொருளாதார தடை விதிக்கவேண்டும் போன்ற கோரிக்கைகளை வலியுறுத்தி 21-03-013 அன்று காலை 11.00 மணியளவில் மதுரை ஒத்தக்கடையில் உள்ள பாரத ஸ்டேட் வங்கியை மதுரை கிழக்கு ஒன்றிய விடுதலைச் சிறுத்தைகள் இழுத்துப் பூட்டி முற்றுகைப்போராட்டம் நடத்தினர்.

இதில் இனவெறியன் இராஜபக்சேவின் உருவ பொம்மையும், சோனியா, மன்மோகன்சிங் ஆகியோரின் உருவப் படங்களையும் விடுதலைச் சிறுத்தைகள் தீயிட்டு கொளுத்தினர். முன்னதாக இப்போராட்டம் மதுரை-மேலூர் பிரதான சாலையிருந்து சிறுத்தைகளின் விண்ணை முட்டும் முழக்கங்களோடு பேரணியாக ஆரம்பிக்கப்பட்டது. பிறகு திடீரென பாரத ஸ்டேட் வங்கியை விடுதலைச் சிறுத்தைகள் இழுத்துப் பூட்டி முற்றுகையிட்டதனால் காவல்துறையினர் செய்வதறியாது திகைத்து போயினர்.

இப்போராட்டதிற்கு முற்போக்கு மாணவர் கழக மாநிலத் துணைச் செயலாளர் அ.செல்லபாண்டியன் தலைமை தாங்கினார். கொ. ஆறுமுகம், க.நல்லதம்பி, பூபாலன், சிறுத்க்தைகனி , ம.முதல்வன் , ஏ.என்.சாமி, குமார்வளவன், வரிச்சியூர் பூமிநாதன், வீரமணி, பூமி, திருமோகூர் முருகன், ஓவியர்.நா.அழகர்சாமி, மணிமாறன், இராஜகம்பீரம் பு.முருகன், ப.மார்க்கண்டன், கல்லானை, இராஜகம்பீரம் முருகன், புதூர் மாரிமுத்து, பாரதி, பிச்சை, செல்வி உள்ளிட்ட ஏராளமான விடுதலைச் சிறுத்தைகள் கலந்து கொண்டனர்.

மேலும் இதே கோரிக்கைகளை வலியுறுத்தி திருப்பாலை முற்போக்கு மாணவர் கழக மாவட்டச் செயலாளர்மு.மாதவன் தலைமையில் பி.எஸ்.என்.எல். அலுவலகத்தை விடுதலைச் சிறுத்தைகள் பூட்டுப் போட்டு உள்ளிருப்பு போராட்டம் நடத்தினர். இதில் அரசமுத்துப்பாண்டியன், தீபா, கார்வண்ணன், கதிர் பாண்டியன், சிறுத்க்தைகனி , செல்வி, முரளி(எ)தமிழாளன், அன்பழகன், மகளிர் விடுதலை இயக்கம் விடுதலை புலியம்மாள் , திருமா பிரபாகரன், உள்ளிட்ட மேற்கு ஒன்றிய நிவாகிகள் பலரும் கலந்து கொண்டனர்.

தமுக்கம் எதிரேயுள்ள தபால் தந்தி அலுவலகத்தையும், மதுரை மாவட்ட ஆட்சியர் அலுவலகம் எதிரேயுள்ள தபால் நிலையத்தையும், விடுதலைச் சிறுத்தைகள் முற்றுகையிட்டனர். , மேலூர் தபால் நிலையத்தையும் சிறுத்தைகள் விட்டுவைக்கவில்லை.அதுவும் மேலூர் விடுதலைச் சிறுத்தைகளால் முற்றுகையிடப்பட்டது.மதுரை மாப்பாளையத்தில் விடுதலைச் சிறுத்தைகள் ஐந்து நாட்கள் தொடர் உண்ணாநிலை அறப்போராட்டம் நடத்தினர்.

இதேபோல் எஸ்.என்.பி காலனியில் தமிழ் மாரி தலைமையில் உண்ணாநிலை அறப்போராட்டம் நடைபெற்றது. இதில் வெ.கனியமுதன்,காமராசு, தென்னிலவன் உள்ளிட்ட ஏராளமான விடுதலைச் சிறுத்தைகள் கலந்து கொண்டனர். மதுரை வானொலி நிலையத்தை முரளி(எ)தமிழாளன் தலைமையில் , அழகேசன், திருமா பிரபாகரன் , முகாம் செயலாளர் முருகேசன், மாயகிருஷ்ணன், தாமஸ், ஆதிவளவன் உள்ளிட்ட சிறுத்தைகள் பலர் முற்றுகையிட்டனர்.

24-03-13 அன்று அலங்காநல்லூர் கேட்டுக்கடையில் தொல்காப்பியர் ஆட்டோ தொழிலாளர்கள் உண்ணாநிலை அறப்போராட்டத்தை ஆட்டோ சங்கத்தலைவர் கடல்கேசவன் தலைமையில் மேற்கொண்டனர். இப்போராட்டத்தில் தி.மு.க. மதுரை மாவட்ட செயலாளர் பி.மூர்த்தி கலந்து கொண்டு உரையாற்றினார். இதே போல் மாவட்டம் முழுவதும் விடுதலைச் சிறுத்தைகள் கட்சியினர் போராட்டங்களை வ்லுப்படுத்தியிருப்பதால் , தென்மாவட்டங்களில் மாணவர்கள் உள்ளிட்ட தமிழீழ ஆதரவு அமைப்புகளுக்கு இப்போராட்டம் ஊக்குவிப்பாகவும், அதே நேரத்தில் மக்களிடையே ஒரு மாபெரும் எழுச்சியை நேரடியாகவே ஏற்படுத்தியிருக்கிறது என்பதை நம்மால் அறியமுடிகிறது

திருமா.இன் செய்திக்காக

மதுரையிலிருந்து....

- ஓவியர்.நா.அழகர்சாமி

புரட்சியாளர் அம்பேத்கர் பிறந்த நாளில் சென்னையில் மக்கள் ஒற்றுமைப் பேரணி, விருதுகள் வழங்கும் விழா

noreply@blogger.com (S R E E) — Sat, 23 Mar 2013 05:41:58 PDT

புரட்சியாளர் அம்பேத்கர் பிறந்த நாளில் சென்னையில் மக்கள் ஒற்றுமைப் பேரணி, விருதுகள் வழங்கும் விழா

தொல்.திருமாளவன் அறிவிப்பு

மார்ச் 22ந்தேதி சென்னையில் விடுதலைச் சிறுத்தைகள் சார்பில் மக்கள் ஒற்றுமைப் பேரணி ஒன்றை நடத்துவதெனவும் அதில் பல்வேறு அரசியல் கட்சிகளைச் சேர்ந்த தலைவர்களைக் கலந்துகொள்ளச் செய்வதெனவும் அறிவித்திருந்தோம். ஐ.நா. மனித உரிமைப் பேரவையில் இலங்கை மீதான தீர்மானத்தில் விவாதமும் வாக்கெடுப்பும் நடக்கவிருந்த சூழலில், அது தொடர்பாக இந்திய அரசுக்கு அழுத்தம் தரும்வகையில் தொடர்ந்து பல்வேறு போராட்டங்களை நாம் முன்னெடுக்க நேர்ந்தது. அதன் காரணமாக ஏற்கனவே அறிவிக்கப்பட்டிருந்த மக்கள் ஒற்றுமைப் பேரணி தேதி குறிப்பிடப்படாமல் தள்ளி வைக்கப்பட்டது. தற்போது அதனை புரட்சியாளர் அம்பேத்கர் பிறந்த நாளான ஏப்ரல் 14ஆம் நாள் சென்னையில் நடத்துவதெனத் தீர்மானிக்கப்பட்டுள்ளது. பேரணியின் முடிவில் விருதுகள் வழங்கும் விழா நடைபெறும். பேரணியிலும், விருதுகள் வழங்கும் விழாவிலும் பல்வேறு அரசியல் கட்சித் தலைவர்களும் கலந்துகொள்ள இருக்கிறார்கள்.

தமிழ்ச் சமூகத்தில் நல்லிணக்கத்தை உருவாக்குவதற்காகப் பாடாற்றும் ஆளுமைகளை ஊக்குவிக்கும் வகையில் ஆண்டுதோறும் விருதுகளை வழங்கி விடுதலைச் சிறுத்தைகள் சிறப்பித்து வருகிறது. அம்பேத்கர் சுடர், பெரியார் ஒளி, அயோத்திதாசர் ஆதவன், காமராசர் கதிர், காயிதே மில்லத் பிறை, செம்மொழி ஞாயிறு ஆகிய ஆறு விருதுகள் ஆண்டுதோறும் வழங்கப்பட்டு வருகிறது. விருதுபெறும் சான்றோருக்கு பட்டயமும், ரூபாய் 50 ஆயிரம் பணமுடிப்பும் வழங்கப்பட்டு வருகிறது.

இதுவரை திமுக தலைவர் கலைஞர், தி.க. தலைவர் கி.வீரமணி, தோழர் ஆர்.நல்லக்கண்ணு, தோழர் வரதராசன் போன்ற தலைவர்கள் உள்ளிட்ட பலருக்கு விருதுகள் வழங்கப்பட்டிருக்கிறது. இந்த ஆண்டும் விருதுக்குரியவர்கள் தேர்வு செய்யப்பட்டிருக்கிறார்கள். அந்த அறிவிப்பு விரைவில் வெளியிடப்படும். விருதுக்குத் தேர்வு செய்யப்பட்ட சான்றோருக்கு அம்பேத்கர் பிறந்த நாளான ஏப்ரல் 14ஆம் நாள் விருதுகள் வழங்கிச் சிறப்பிக்கப்படவுள்ளது என்பதைத் தெரிவித்துக்கொள்கிறோம்.

இவண்

தொல்.திருமாவளவன்

ராஜபக்சேக்கு பாடை கட்டி ஆர்பாட்டம்

noreply@blogger.com (எழுச்சி தமிழர்) — Fri, 22 Mar 2013 08:01:42 PDT

21.03.2013 விழுப்புரம் மாவட்டம் வானூர் வட்டம் கோட்டகுப்பம் நகர விடுதலைச் சிறுத்தைகள் இலங்கை தமிழர்களுக்கு ஆதரவு தெரிவித்தும், இலங்கை அதிபர் ராஜபக்சேவை போர்குற்றவாளியாக அறிவிக்கக்கோரியும் போராட்டம் நடைபெற்றது. இந்நிகழ்வில் ராஜபக்சேவின் கொடும்பாவியை பாடையாக கட்டிக்கொண்டு ஊரெல்லாம் வலம் வந்து தமிழீழத்திற்கான கோசங்களை இட்டு கடைசியில் ராஜபக்சேவின் கொடும்பாவியை தீயிட்டு கொளுத்தினர்,

தமிழர்களை இந்திய அரசு ஏமாற்றிவிட்டது

noreply@blogger.com (S R E E) — Thu, 21 Mar 2013 07:26:48 PDT

ஐ.நா. அவையில் இலங்கைக்கு எதிரான அமெரிக்க தீர்மானம்

தமிழர்களை இந்திய அரசு ஏமாற்றிவிட்டது

தொல்.திருமாவளவன் கண்டனம்

ஐ.நா. மனித உரிமைகள் பேரவையில் அமெரிக்கா முன்மொழிந்த தீர்மானத்தில் சர்வதேச விசாரணைக்கு ஆணையிடும் வகையிலும் இலங்கையில் நடைபெற்றது இனப்படுகொலைதான் என்பதை அறிவிக்கும் வகையிலும் இந்திய அரசு திருத்தங்களை முன்மொழிய வேண்டுமென தமிழகத்தில் உள்ள அனைத்துத் தரப்பினரும் ஒரே குரலில் வலியுறுத்தி வந்தோம். அதற்கான ஆலோசனைகளில் ஈடுபட்டிருப்பதாகவும், உரிய திருத்தங்கள் கொண்டுவரப்படும் என்றும் மத்திய அரசு கூறிவந்தது. திமுக தனது ஆதரவை விலக்கிக் கொண்ட நேரத்திலும்கூட மத்திய அமைச்சர்கள் இதே கருத்தைத்தான் தெரிவித்து வந்தனர். தாங்கள் முடிவெடுப்பதற்கு முன்பாகவே திமுக அவசரப்பட்டுவிட்டது என்றும் குற்றம்சாட்டி வந்தார்கள். ஆனால், அவர்கள் கூறிவந்ததற்கு மாறாக, ஐ.நா. மனித உரிமைகள் அவையில் இன்று நடைபெற்ற விவாதத்தின்போது இந்திய அரசு நடந்துகொண்டுள்ளது. இலங்கையில் நம்பகமான விசாரணை நடத்தப்பட வேண்டும் என்றும், வடக்கு- கிழக்கு மாகாணங்களில் தேர்தல் நடத்தப்பட வேண்டும் என்றும் மட்டுமே இந்தியா கருத்துத் தெரிவித்தது. இலங்கையில் நடைபெற்றது இனப்படுகொலை என்றோ, சர்வதேச விசாரணை வேண்டுமென்றோ இந்தியா கோரவில்லை. அது மட்டுமின்றி, அமெரிக்கத் தீர்மானத்தில் எந்தவொரு திருத்தத்தையும் முன்மொழியவில்லை. இது தமிழக மக்களின் உணர்வுகளையும் கோரிக்கைகளையும் அலட்சியப்படுத்தி அவமதிக்கிற செயலாகும். இந்திய அரசின் இத்தகைய தமிழர் விரோதப் போக்கை விடுதலைச் சிறுத்தைகள் வன்மையாகக் கண்டிக்கிறது.

இந்திய அரசு தொடர்ந்து இலங்கைக்கு ஆதரவாகவே செயல்பட்டு வருகிறது. அதற்கு பல்வேறு சாக்குப் போக்குகள் கூறப்படுகின்றன. ஆனால், ஐ.நா. அவையில் நிறைவேற்றப்பட்டிருக்கும் ஒப்பந்தங்கள், தீர்மானங்கள் பலவற்றில் இந்தியா கையெழுத்திடவில்லை. சர்வதேசக் குற்றவியல் நீதிமன்றத்தை அமைப்பதற்காக ஏற்படுத்தப்பட்டிருக்கும் ரோம் ஒப்பந்தத்திலும் இந்தியா இதுவரை கையெழுத்திடவில்லை. இவ்வாறு சர்வதேச அளவில் மனித உரிமைகள் தொடர்பாக நிறைவேற்றப்படும் ஒப்பந்தங்களை மதிக்காத ஒரு நாடாகவே இந்தியா இருந்து வருகிறது. அதனால்தான் இனப்படுகொலை நாடான இலங்கையை இந்தியா ஆதரிக்கிறது.

ஈழத் தமிழர்களுக்கு நீதி வழங்கப்பட வேண்டும் என்று தமிழகத்தில் எழுச்சியோடு போராடிக் கொண்டிருக்கிற மாணவர்களும் பொதுமக்களும் இந்தியாவை சனநாயகப்படுத்துவதற்கு முன்வர வேண்டும். இந்தியா ஒரு சனநாயக நாடாகவே இருந்தால்தான் இன்னொரு நாட்டில் அது சனநாயக உரிமைகளைப் பாதுகாப்பதற்காகக் குரல் கொடுக்க முடியும். எனவே ஈழத் தமிழர்களுக்கு ஆதரவான நம்முடைய போராட்டம் இந்திய அரசின் சனநாயக விரோதப் பண்பினை அம்பலப்படுத்துவதாக நீட்சி பெற வேண்டும். அதற்கு சனநாயகத்தில் நம்பிக்கையுள்ள அனைவரையும் விடுதலைச் சிறுத்தைகள் அறைகூவி அழைக்கிறது.

எதிர்வரும் செப்டம்பர் மாதத்தில் காமன்வெல்த் நாடுகளின் கூட்டம் இலங்கையின் தலைநகர் கொழும்பில் நடைபெறவுள்ளது. அக்கூட்டத்தில் இங்கிலாந்து, கனடா போன்ற நாடுகள் பங்கேற்கக் கூடாது என அந்நாட்டின் சனநாயகச் சக்திகள் தீவிரமாகக் குரல் எழுப்பி வருகின்றனர். அதேபோல இந்தியாவும் சிங்கள அரசின் இனப்படுகொலையைக் கண்டிக்கிற வகையில் அம்மாநாட்டில் பங்கேற்கக் கூடாது என வலியுறுத்தும் வகையில் தமிழ் மக்களின் போராட்டம் அமைய வேண்டும் என்பதை இச்சூழலில் விடுதலைச் சிறுத்தைகள் சுட்டிக்காட்டக் கடமைப்பட்டிருக்கிறது.

இவண்

தொல்.திருமாவளவன்

இலங்கை தமிழர்களுக்கு ஆதரவாக மேட்டூரில் இன்று கடையடைப்பு: மாணவர்கள்-வி.சி.மகளிர் அணியினர் உண்ணாவிரதம்

noreply@blogger.com (S R E E) — Thu, 21 Mar 2013 03:34:55 PDT

சேலம் மாவட்டம் மேட்டூரில் இலங்கை தமிழர்களுக்கு ஆதரவு தெரிவித்தும், இலங்கை அதிபர் ராஜபக்சேவை போர்குற்றவாளியாக அறிவிக்கக்கோரியும் இன்று கடையடைப்பு போராட்டம் நடந்தது.

பொதுமக்கள், வியாபாரிகள் மற்றும் அனைத்து கட்சியினரும் ஒத்துழைப்பு கொடுத்ததால் அனைத்து கடைகளும் அடைக்கப்பட்டு இருந்தன. பஸ் நிலையம் சதுரங்காடி, தினசரி மார்க்கெட் ஆகிய இடங்களில் உள்ள அனைத்து கடைகளும் அடைக்கப்பட்டு இருந்தன.

கடைகள் அடைக்கப்பட்டதால் சுற்று வட்டார கிராம பகுதியில் இருந்து மேட்டூர் நகருக்கு வரும் மக்கள் கூட்டம் குறைந்த பஸ் நிலையம் வெறிச்சோடி காணப்பட்டது. நகரின் அனைத்து முக்கிய பகுதிகளிலும் போலீஸ் பாதுகாப்பு போடப்பட்டு உள்ளது.

மேட்டூர் சின்னபார்க் பகுதியில் கல்லூரி மாணவர்கள் நேற்று உண்ணாவிரதத்தை தொடங்கினர். அவர்களின் போராட்டம் இன்று 2-வது நாளாகவும் நீடித்தது. இதே போல் சதுரங்காடி பகுதியில் விடுதலை சிறுத்தைகள் மகளிர் அணி சார்பில் உண்ணாவிரத போராட்டம் இன்று 2-வது நாளாகவும் நீடித்து வருகிறது.