Sustatu - albiste osoak

Jose Ignacio Munilla dator

2009-11-21T10:20:37Z

Gaur eguerdian egingo omen du publiko Vaticanoak Jose Ignacio Munilla euskalduna izango dela Gipuzkoako gotzain berria. Eta zuek pentsatuko duzue: eta zer? Ba gu bezalakook, eliza katolikotik kanpo gaudenok, dibertituko garela eta, aldiz, eliza horretan izanda, bere korrontekoak ez direnek asko sufrituko dutela. Gaur goizean Radio Euskadin Joseba Egibarrek esan bezala, eskuinago soilik pareta baitauka Munillak (Rouco Varelak bezala, gaineratu du jeltzaleak).

2006an deskubritu nuen Munilla eta haren artikuluak jasotzen dituen webgunea. Nahiz eta beste helbide batean egon, sarean daude irakurtzeko moduan Jose Ignacio Munillaren artikuluak.

Hona hemen 2006an irakurritako bi parrafo homosexualitateari buruzko artikulu batean idatziak:

El cambio en la consideraci�n de la homosexualidad, de trastorno psicopatol�gico a mera condici�n sexual alternativa, se ha debido m�s a las presiones de los influyentes lobbys gays, que a nuevas evidencias cient�ficas. Fue en 1980 cuando estos grupos consiguieron una de sus mayores "victorias", al lograr que la Asociaci�n Americana de Psiquiatr�a retirara la homosexualidad del manual de trastornos comportamentales (Diagnostic and Statistical Manual).

Existen, no obstante, profesionales de primera l�nea que se atreven a continuar afirmando lo que la psiquiatr�a siempre ha afirmado: estamos ante un trastorno neur�tico (Van Den Aardweg, Bieber & Bieber, Aquilino Polaino, etc...)

Oraingoz idatzi duen azken artikuluan, abortuaren inguruan, dio: quien apruebe la Ley del Aborto estar� en situaci�n de complicidad de asesinato". Eta, aizue, Mandela aipatzen du bukaeran.

Barre egingo dugu, baina tristea da horrelako pertsonek agintea izatea edonon daudela ere.

Komite Internazionalisten 30. urtemuga

2009-11-21T09:08:29Z

Orain dela 30 urte, Iraultza Sandinistak piztu zuen itxaropenaren babesean, Euskal Herrian herrialde ezberdinetan zebiltzan tokian tokiko taldeak bildu ziren, Komite Internazionalistak erakundea sortzeko. Nikaragua, Kuba, El Salvador, Palestina, Irak, Chiapas, Sahara, Bolivia, Kolonbia, Seattle, Praga, Kurdistan, Genova, Euskal Herria... Hamaika borroka, borroka bakarra, Gora herriak.

Ordutik, herri honen ehunka lagun kolektibo honen partea izan dira eta, besteak beste, askatasuna lortzeko nikaraguar miliziekin batera borrokatu dute, Kubaren aurkako blokeo kriminala salatu dute, euren bizitzaz estatuaren paramilitarismoak mehatxatutako kolonbiar militanteen bizitza babestu dute, lurreko kolorearen emakume eta gizonekin berba egin dute komunitate zapatistetan, mendebaldeko demokraziaren bonba hiltzaileak konpartitu dituzte Irakeko herriarekin, Gazan sionismoak zerupean eraikitako kartzelan atxilotuak izan dira, baita Pragako kartzeletan politika ekonomiko hiltzailearen bitartez mundua zuzendu nahi dutenak salatzeagatik, Venezuelako herriarekin XXI. mendeko sozialismoari buruz hausnarketa egin dute, edo euskal preso politikoen giza eskubideen urraketa sistematikoa protestatzeko barau egin dute gosezko grebetan�

Inperialismo zaharra zein berriari aurre egin dioten lagunekin ametsak, pozak eta tristurak konpartitzen gure izaera eraiki dugu, hau da, edonon eta edonori egindako bidegabekeria gureak bezala sentitzen ditugun pertsonak gara. Horrexegatik, elkarrekin bizi dugun guztia ospatzeaz gain, beharrezkoa den eraldaketa politiko eta sozialarekin gure konpromisoa berriztatzen dugu gaur; eraldaketa behetik gora eraikita, sistema neoliberalak zapaltzen dituen lagunekin egindakoa.

Datozen 30 urteetan prozesu zaharrak zein berriak, aspaldiko eta eraberritutako borrokak izango dira gure ibilbideak, gure herri eta hirietako kaleetatik edo erresistentzia antolatzen den oihaneko bide lokaztu batetik, beti ere gure alboan bidaiatzen dutenekin sareak eraikitzen. Jakin badakigu nor garen: erakunde txikia, herrialde txiki batean. Gainera, internazionalismoa feminismo, antimilitarismo edo eskubide zibil eta politikoen aldeko borrokarekin betidanik parekatu dugu. Berez, ekimen kolektibo sareak sustatzea eta lan egitea gure nortasunaren berezitasun garrantzitsuenetarikoa izan da. Beti lagunduta sentitu gara, horregatik, gertu izan diren guztiei ere, 30 urte borroka ospatzera gonbidatu nahi diegu.

Gertakari asko pasatu dira munduan azken 30 urte hauetan eta horrenbeste pasatuko dira hurrengo 30 urtetan; horietako batzuk bihotzean daramatzagu jada, horren alde borrokatzea baino ez zaigu falta.

Iragana buruan, geroa eskuan.

Hilaren 28an, 30. urteurrenaren ekitaldi nagusia, Errekaldeko Kukutza gaztetxean (Bilbo): umeentzako tailerrak, ekitaldi politikoa, herri bazkaria, Betagarriren kontzertua, eta abar.

Komite Internazionalistak

Espainiako bandera bat Bermeorako

2009-11-20T14:13:54Z

Banderaren kontuarekin pitin bat tematuta daude ez nazionalistak. Pedro J. Ramirez El Mundo-ko zuzendariak esan du:

Y como en Bermeo no pongan la bandera española, la proxima vez que vaya en su ayuda su tía

Bi minutuko bideoaren bukaeran dator esaldia.

Espainiako bandera bat Bermeorako

Mendiko prakak

2009-11-20T12:52:20Z

Euskaldunak, gauza jakina da, mendizaleak gara, salbuespenak salbuespen. Mendizaletasunak nortasuna eta ohorea ematen dio euskal jendeari. Eta baita ere, estiloa. Arropak aukeratzerakoan behintzat, ze azkenenengo urteetan euskaldun asko mendiruntz irtetear egongo balitz bezala jantzita joan ohi da kalean zehar. Alegia, mendiko jantziek, batez ere mendiko prakek, kaleko giza-paisaia aldatu dutela. Halako eragina izan dute, ezen Euskal Herritik kanpotik datozenak harritzera ere iritxi baitira kaleetan ikusi duten mendiko praken ugaritasunaz.

Praka bakeroen kaltetan, tergalezko prakei muzin eginez, gero eta gehiago dira kalean mendiko prakak erabiltzen dituzten pertsonak. Batez ere mutilak, neskak gutxixeago. Nonahi mendira joateko propio saltzen dituzten praka horiek, gerrian goma, belaun inguruan oihal bikoitzezko adabakia, eta poltsiko mordoska dutenak. Trango, Astore, Ternua edo Quichua markakoak.

Garestiagoak edo merkeagoak, mendiko prakak ikusten dira igande goizean egunkaria erostera joaterakoan, lantokietan, lantegian zein bulego publikoetan, ikasgeletan, umeekin kalean paseatzen, tragoak hartzen goiz, ilunabar zein gauean, herrietako eguneroko paisaia estilistikoan txertatu dira mendira joateko pentsatuta zeuden prakak.

Eroso direlako? Beti mendirako gertu jartzen zaituztelako? Ezin jakin. Ez behintzat polito edo ondo geratzen direlako. Handiak handiegi, txikiak txikiegi egiten dituzte. Ez ipurtaldean ez beste inon ez dira bereziki ondo geratzeko.

Kalerako eta mendirako praka bakarrak erabiltzea, hori baino beste abantailarik ez. Ala bai? Zein da arrazoia bere buruaren jabe diren mutilak eta gizonak noranahi horrelako prakekin joateko? Zergaitik joan zen euskal idazle bat Euskadi Sarietara mendiko prakak jantzita? Zergaitik O�ati moduko herri tradizionaleko elizkizun tradizional batean mezalaguntzaileak, 50 urtetik gorako gizonak, horrelako prakak jantzita pasa zuen diru-poltsa? Zein da zuk mendiko prakak ikusi dituzun toki edo egoerarik harrigarriena?

Promozioko argazkia: Varese prakak, © Ternua

Google Translatek zuzenean egiten ditu itzulpenak

2009-11-20T11:29:52Z

Google Translatek idatzi ahala egiten ditu itzulpenak orain. Euskara ez dute gehitu oraindik, baina gazteleratik katalanera probatu dugu zuzeneko itzulpenak zelan egiten dituen, eta screencast eginez bideoan ekarri dugu hona, ikusteko:

Google Translatek itzulpenak egiteko, zuzenean url bat idazteko aukera ere badago:

http://translate.google.com/#es|ca|hemen idatzi nahi duzun testua

/#es|ca| kodea da gazteleratik katalanera itzultzeko, baina erabilgarri dauden beste hizkuntzen kodeekin ere erabili daiteke:

http://translate.google.com/#en|es|hemen idatzi nahi duzun testua

Hemen ikusten da horrela egindako itzulpen bat, gazteleratik ingelesera.

'Iragarkilaburrak.com', aldaketa eta hobekuntza nabarmenekin

2009-11-20T10:14:50Z

Eraberritze lanak amaitu ostean, abian da iragarkilaburrak.com, aldaketa eta hobekuntza nabarmenekin. Euskarazko hogei bat egunkari, aldizkari eta agerkari digitalek hartzen dute parte proiektuan.

Pasa den urteko azaroan ekin zion bideari iragarkilaburrak.com webguneak, euskarazko hogei bat hedabidek elkarlanean ehunduta. Urtebete geroago, edukia eta itxura aldatu du webguneak, erabiltzaileentzat eta iragarleentzat hobekuntza nabarmenak eskainiz.

"Iragarkilaburrak.com" berria sarean da dagoeneko, erabiltzaile zein iragarleentzat aldaketa hobekuntza eta nabarmenekin. Iaz abiarazi zuten ataria elkarlanean euskarazko hogei bat hedabidek, merkatuan zegoen hutsunea betetzeko helburuarekin.

Bilatzaile zehatz eta garatuagoak, kategoria berriak, abisuak SMS bidez jasotzeko bidea, iragarkiak sare sozialetan zuzenean argitaratzeko aukera, eta beste hainbat aldaketa ditu webgune berrituak.

Orain arte bezala, iragarkiak sarean jartzea doan da norbanakoentzat.

Gainera, iragarkiak ostiraletan paperean argitaratzeko aukera ere izango du iragarleak. Webgunearen aldaketei esker iragarleak erraz hautatu ahal izango du papereko zein ediziotan argitaratu nahi duen iragarkia: hedabide guztietan, ala eskualde edo zonalde zehatz batean soilik, esaterako.

Gaur egun, BERRIA, Uztarria, Txintxarri, Otamotz, Elgoibarren, Behe Bidasoako Hitza, ukberri.net, Oarsoaldeko Hitza, Tolosaldeko eta Leitzaldeko Hitza, plaentxia.com, Busturialdeko Hitza, Lea-Artibai eta Mutrikuko Hitza, Urola Kostako Hitza, Irutxuloko Hitza, Goerriko Hitza, Baleike, Geu Gasteiz, Eta Kitto, larrabetzu.org eta Goiena dira proiektu honetan parte hartzen duten egunkariak, agerkari digitalak eta aldizkariak.

Plazagunea SL enpresak garatu du webgune berria.

EH Tatuajea

2009-11-20T08:42:14Z

Tatuajeen argazki sorta ikusgarria bildu dute Buber.net-en. Beno, egia esan, ikusgarriagoak makina bat dago sarean, baina, onartu behar da horiek baino "euskaldunagoak" zaila dela Interneten aurkitzen.

Bildutako tatuajeak, batez ere, euskal jatorria duten AEBetako neska-mutilen azaletan egindakoak dira. Era guztietakoak daude: etnikoak, modernoak, klasikoak, politikoki ez zuzenak...

Klasikoen artean, "aire-aire" esaten ari dela ematen duen euskal pin-up honek eman digu atentzioa:

Tatuaje zaleen artean hain gustuko diren "etniko" edo "tribal" eratakoak ere badaude batzuk webgune horretan, adibidez, honako hau:

Edo arbasoen eta euskal odolaren omenez egindakoak...

Badago bat, I love ikurri�a eratakoa. Hori bai, ez ziren fin-fin ibili koloreak banatzerako orduan. Begira bestela:

Guri, desastre horrek zuzendu aurreko Galdakaoko frontoiarena ekarri digu gogora.

Baina, segurutik, bildumako tatuaje xelebreena hurrengo hau da:

EAEko mapa da? Zezena Trebi�on dago? Aurretik ere ikusita geneukan era horretako nahasketak: Ikurri�a+ Osborneren zezena baina, egia esan, azalean betikotutakorik ez. Hori bai marka!

Ingurumena eta zinema

2009-11-19T16:39:26Z

Ekologia, ingurumena, fauna, flora, garapen iraunkorra... horixe dena, gezurra badirudi ere, zinearekin harreman estuan bizi da! Eta horixe islatzen du hain zuzen ere Ram�n Herrera kazetari eta zinema-kritiko iruindarrak kaleratu berri duen Eco-cine liburuak.
Liburua bihar bertan aurkeztuko du Donostiako Liburutegi munizipal zaharreko aretoan (Konstituzio plazan dago, baina sarrera atzeko kaletik dauka, San Jeronimo kaletik). Herrerak zine klasikoko eta garaikideko 400 filme baino gehiago aztertu ditu ('Metr�polis', 'Nanook of the north', 'La lengua de las mariposas'...), ingurumenarekin duten harremanaren ikuspuntutik. Kontsulta moduan erabiltzeko eta ingurumen balioak hiztegi moduan biltzen dituen liburu-gida bat da.
Ez galdu aukera!

Noiz: Azaroaren 20an, ostirala
Ordua: 19:00etan
Non: Donostiako liburutegi zaharreko sotoan (San Jeronimo kalea)
Antolatzailea: Cristina Enea Fundazioa

Tuenti euskaraz, oraingoz Goenkalen

2009-11-19T13:08:37Z

Tuenti euskaratuta azaldu da. Momentuz, Goenkalen. Enpresaren marketin ekintza ote? Baque kafeak agertu izan diren bezalatsu, produktua agerrarazteko? Hala baldin bada, benetan garabidean dagoen probetako interfazea ote da?

Abisu pribatu bat ere iritsi zaigu: lagun baten lagun baten lehengusina Madrilera joan da lanera. Zertara? Tuenti euskaratzera... Nahi duzuen fidagarritasuna eman iezaiozue honi.

Tuenti euskaratzeko zain dauden milaka erabiltzaileak albiste pozgarria jasoko dute aurki agian.

Kaixomaitia.com harremanetarako webgune euskaldun eraberritua martxan da!

2009-11-19T10:39:17Z

Kaixiomaitia 2007. urtean sortu zen, lehenengo harremanetarako webgune euskalduna. 2 urte pasatxoko bilakaera arrakastatsuaren ondoren, webgune guztiz eraberritua plazaratu da.

Azken bi urteetan jasotako esperientzia eta eginiko lanaren fruitu izan da webgune berria. Estetikoki, Web 2.0 diseinuan oinarritua eta funtzio gehiago eta osatuagoekin , halanola, argazki gehiago eta haundiagoak zintzilikatzeko aukera, harpidedunen arteko komunikazioa errazteko aukera gehiago, harpidedunentzako postontzi pertsonala etab.

Zozketa eta sari ugari ere izango dira aurrerantzean harpideunen partaidetza sustatzera begira, honela, Bertsolari Txapelketa Nagusiko finalerako 4 sarrera, Ipod Nano bat, Eguberritako Saskia etab. izango dira eskuragarri webguneko harpidedunentzat.

Webgune berriarekin urtebeteko epean, egun dituen 800 harpidetzak bikoiztea da helburu eta 2010 urte amaierarako 2.000 harpidetzatara iristea.