Sustatu.eus - Aktualitatea

UEU uztailean: euskarazko komunikazio digitalaz hausnartzeko bi topaketa

Fri, 19 Jun 2026 07:08:04 +0000

Udako Euskal Unibertsitateak antolatu dituen ikastaro eta jardunaldian artean, bi aipamen uztailean izango diren biri, euskarazko komunikazio digitala rdatz izango dutenak: Uztailaren 9an Tolosan, Euskararen jauzi digitala, eta biharamunean Errenterian: Komunikazioa sare sozialen erresuman.

Uztailak 9 (Tolosako Kultur Etxean): Euskararen jauzi digitala: hausnarketak eta elkarguneak. UEUren era Kontseiluaren artean antolatua, helburu hauekin:

Euskarak eremu digitalean duen egoera eta presentzia aztertzea, egungo testuingurua ulertu eta etorkizunerako joerak identifikatzeko.
Eremu digitalak euskararen normalizazio eta biziberritzerako eskaintzen dituen aukerak eta erronkak identifikatzea, ikuspegi estrategiko bat garatzeko.
Hizkuntza-burujabetzaren eta teknologia-burujabetzaren arteko loturetan sakontzea, globalizazio eta algoritmoen testuinguruan euskararen tokiaz hausnartuz.
Euskal hiztun-komunitate digitala indartzeko bideak aztertzea, eduki sortzaileak, arnasgune digitalak eta aktibazio soziala sustatuz.

Matrilulazio argibideak eta egitaraua, hemen.

Uztailak 10 (Errenteria, Torrekua gunean): Komunikazioa sare sozialen erresuman: nola izan burujabe(ago)?

Sare sozialen alorrean polemikak eta kezkak nagusitzen ari diren unean, galdera batzuei erantzuteko aukera: Benetan zein trafiko dator sare sozialetatik? Zein da sare sozialek dakarten etekina? Zein da benetan duten pisua? Nola sortu euskal komunitatea online? Nola izan burujabe eta gure xede-publikoarengana iritsi? Beste komunikazio bide batzuk behar ditugu?

Egutarauan, sare sozial eta komunikaziorako tresnen aurkezpen laburrak; baita hedabide, erakunde, enpresa eta elkarteen esperientzien berri, eta tailer bat, "komunikazio burujabea(goak) marrazteko".

Matrikulazio eta informazio gehiago hemen,

Euskara azterketan zero biribilak

Thu, 18 Jun 2026 15:37:35 +0000

Albiste dugu egunotan kexu direla zenbait ikasle, irakasle, ikastetxe eta guraso talde, A ereduan ikasi duten ikasle zenbaiti 0 (zero) emaitza eman dietela euskara eta literatura ikasgaian, USaP esaten den azterketan (Unibertsitatera sartzeko azterketa, selektibitatea), EHUk kudeatzen duena EAEn (Bizkaiko ikastetxe kontzertatu batzuetan gertatu da batik bat nonbait). Hemen albiste bat kontuari buruz, interesa baduzue. Guk hona euskalgintzatik sortutako erreakzio batzuk bildu ditugu.

Berrikuspena bai, osoa ahal bada

Ion Ansak Twitterren: "Bat nator unibertsitatera sartzeko azterketak zorrotz berrikustearekin, eskubide hori badute proba egiten duten guztiek. Berrikus ditzatela, aldi berean, beren kolegioetan egindako azterketak eta ateratako emaitzak. Berrikuspena izan dadila osoa." Eta erantzun batean ñabardura gehitu du: "Berrikuspenerako eskubidea dute beti, gai guztietan. Baina, eskatzen ari direna da pribilejioa, bidezidorra, salbuespena. Eta EHUren izena zikintzea, bide batez. Errespetu falta galanta ikasleak ondo prestatzeko lan egin duten eskolekiko!".

Euskarazko azterketaren zailtasuna zein den benetan

Gorka Bereziartuak nabarmendua Mastodonen: "Selektibitateko Gaztelaniako azterketan ikasleei galdetzen zaie ea Machadok poema batean García Lorcaren estiloa imitatzen duen. Selektibitateko Euskara azterketan Lazkao Txikiren bertso baten mezu nagusia laburbiltzeko eskatzen da. Baina ei, zaila bigarrena da." Eta beste batzuek berretsia, nola testu batean esaten den "Durangarra da Amaia" eta gero galderetako bat den, adibidez, "Nongoa da Amaia" (Sustatun agertua aspaldi).

Euskarafobia azpian

Twiterren anonimo bati irakurria: "Zero hauek oso agerian uzten dutena euskarofobia da. Ingelesez, frantsesez edo gaztelaniaz maila hori erakutsi eta hizkuntzaren ezagutza duela aldarrikatzen duenari, burla egingo litzaioke, ez aitortzarik eman."

Konparazioa baxoa euskaraz egin dutenekin

Miren Arantzazu Aranzabal Beitiaren iritzia Argian. "Pasa den ostiralean Etxepare lizeoko ikasleek Baxoko froga euskaraz erantzun zuten, azterketak zuzenduak ez izatearen arriskua hartu zuten, jakitun ziren zero bat ateratzeko arriskuan zeudela, baina beraien hizkuntzarekiko atxikimendua erakutsi dute, baita mugiezina zirudiena mugitu ere". Aranzabalek lizeoko gurasoen konpromisoa nabarmendu du bereziki: "Haien gurasoek haurrak ikastoletan eman zituzten duela 15 bat urte, jakinda ere ikasketa amaierako mugarrian trabak izanen zituztela, eta euskaraz ikastearen ekarpena notaz haratago doan zerbait dela erakutsiz". Eta horrekin kontrastatu, A eredukoen gurasoena: "Haien gurasoak, duela 15 urte, euskaraz ahalik eta harreman gutxien zeukan ereduan eman zituzten, A ereduan alegia. Arestian aipatutakoak bezala hautu kontziente eta politiko bat egin zuten, baina kasu honetan euskararen aurkakoa. A ereduak ez du euskalduntzen, telebistan ikusi dugu ikasle horien euskara maila."

Irudia: 0 emaitza Egunean Behin jokoan, gauza zaila lortzen nahita ere.

Txikipedia 10.000 artikuluetara iritsi da eta etapa berri bati ekin dio

Thu, 18 Jun 2026 13:22:33 +0000

Euskal Wikilarien Kultur Elkarteak garatutako Txikipedia ekimena 10.000 artikulutara iritsi da. Mugarri hau ospatzeko, berrikuntzak ekarri dituzte Wikipediaren azpi-atal didaktikora: azal berritua, atari tematiko berriak eta edukiak aurkitzeko modu errazagoak. Txikipedia 8-13 urte bitarteko haurrentzako entziklopedia bat da, Euskarazko Wikipediaren barruan txertatua, adin-tarte horretako umeentzako moduko lexiko eta sintaxiarekin egina.

Txikipediak, 8-12 urtekoentzako euskarazko entziklopedia libre eta kolaboratiboak, 10.000 artikuluen langa gainditu du. Mugarri hori ospatzeko, proiektuak hainbat berrikuntza aurkeztu ditu, erabiltzaileentzako esperientzia hobetzeko eta edukien antolaketa indartzeko.

Azken urteetan etengabe hazten joan den proiektuak urrats berria eman du bere garapenean. 10.000 artikuluen kopurura iristearekin batera, Txikipediaren azala berritu da, ordenatuagoa eta orekatuagoa izan dadin. Eduki dinamikoek protagonismo handiagoa hartu dute, hala nola ausazko hitzek, IKUSGELAko “Zortziko Txikian” bideoek edo “Ba al dakizu?” atal ezagunak. Era berean, “Euskal Herriko historia 100 objektutan” proiektuak ere presentzia nabarmenagoa izango du hemendik aurrera.

Berrikuntzarik garrantzitsuenetako bat atari tematikoen sorrera izan da. Astronomia, Bizia, Euskal Herria, Historia eta eskolarako oso erabilgarriak diren gaiak antolatzeko gune berriak sortu dira, etxeko txikiek edukiak modu antolatuagoan eta erakargarriagoan esploratu ahal izan ditzaten. Atari horiek ez dira bilatzailearen ordezko gisa sortu; aitzitik, ikasleei, irakasleei eta familiei jakintza-arlo jakin baten inguruko edukia modu egituratuan aurkezteko tresna gisa pentsatu dira.

Helburua ez da artikulu solteak pilatzea, baizik eta edukien arteko loturak agerian jartzea eta irakurketa-ibilbide esanguratsuak eskaintzea. Horrela, erabiltzaileak ez du artikulu bakar bat kontsumitzen; testuinguru zabalago batean murgiltzeko aukera du, gai baten inguruko ezagutza modu progresiboan eraikitzeko.

Azal berriak eta atari tematikoek estrategia bera partekatzen dute: ezagutza modu antolatu, bisual eta eskuragarrian eskaintzea. Azaletik abiatuta, erabiltzaileak atari tematikoetara irits daitezke, eta handik artikuluetara. Horrek bisiten sakontasuna handitzen du eta ikaskuntza-esperientzia aberasten du.

10.000 artikuluen mugarriak erakusten du euskarazko ezagutza librearen komunitateak duen indarra eta proiektuak etorkizunean hazten eta berritzen jarraitzeko duen gaitasuna.

Txikipedia ezagutu edo bertako edukiak arakatu nahi dituztenek hainbat bide dituzte eskura. Entziklopedia zuzenean bisita daiteke txikipedia.eus helbidean, edo euskarazko Wikipediaren azalean dagoen Txikipedia botoiaren bidez. Proiektuaren eguneroko jardunaren, artikulu berrien eta bestelako berrikuntzen berri izateko, berriz, Txikipediaren Mastodon kontua jarraitu daiteke: @txikipedia@mastodon.eus.

Bisitatu Txikipedia eta erabili app bitartez ere:

Hamarratz: ingurune digitalari buruzko eskola-programa Euskararen Etxean

Thu, 18 Jun 2026 07:42:49 +0000

Hamarratz ingurune digitalari buruzko eskola-programa abiatuko du Azkue Fundazioak Euskararen Etxean 2026/27 ikasturtean, baina izena emateko unea orain da. Euskararen Etxea Bilbon dago eta Azkue Fundazioa Bizkaiko Foru Aldundiaren egiturapekoa da, baina ekimen honetara aurkez daitezkeen ikastetxeak Euskal Herri osokoak izan daitezke.

Eskola-programa berritzailea da; teknologia modu kontziente eta arduratsuan, eta, euskaraz erabiltzen ikasteko espazioa da. Bi orduko saio dinamikoan, ikasleek ingurune digitala ulertu, zalantzan jarri eta eraldatzeko baliagarriak izango zaizkien tresnen berri izango dute.

Hamarratzen helburuak dira:

Euskararen erabilera digitala sustatzea
Fake news, algoritmoak eta pribatutasuna kritiko aztertzea
Komunikazio digital arduratsua lantzea
Autonomia eta ahalduntze teknologikoa indartzea
Teknologia sormen tresna gisa ulertzea

Interesa duten eskolek datorren ikasturtean astelehenetik ostiralera 10.00etatik 14.00etara hartu ahal izango dute tartea, erreserba eginez hemen.

Informazio gehiago, hemen.

Hiztegi bat, Gorka Urbizuren omenezko gauza bat

Wed, 17 Jun 2026 06:32:46 +0000

Beñat Erezuma teknologia dibulgatzaile eta AA aditua Berri Txarrak eta Gorka Urbizuren kantuen eta hitzen zaletua ere bada. Eta nola Urbizuk egin duen bakarkako diskoa Hasiera Bat den, Erezumak Hiztegi Bat egin du, baliabide digital interesgarria.

Gorka Urbizuren kantu-jotzetan oinarritutako hiztegi digitala da Hiztegi Bat, euskaraz trebatzeko eta hitz berriak deskubritzeko sortua. Erezuma pedagogoa ere bada eta uste du euskara ikasten ari direnentzat baliagarri izan daitekeela.

Berri Txarrak taldearen eta Urbizuren bakarkako ibilbideko kantuetan agertzen diren hainbat hitz bildu dotu, definizioekin, adibideekin... 399 hitz oraingoz.

Hiru atal ditu webguneak: Alfabetoa, Hutsunea bete jokoa eta abestien atala. Jokoaren itxura eta mekanika pantaila honekin ulertuko duzue:

Erezumak beste euskal garatzaile baten lana izan du inspirazio, Bermeoko hitzen Bermiotarra hiztegi digitala, Zital izeneko garatzaileak sortua: bere Mastodon kontutik, egunero doa hitz bat hiztegi horretakoa. Erezuma bezala, Zital ere ezagutzen dugu lehenagotik, adibidez itzultzaile automatiko honengatik.

Bermiotarra kode irekiz egin zen bezala, Hiztegi Bat ere bai; hemen duzue software biltegia.

Ezagutu eta probatu: https://hiztegibat.berezuma.com/

Anthropic-en Fable 5 AAren debekua, 5 ondorio ateratzeko

Tue, 16 Jun 2026 14:23:48 +0000

Asteko albistea izan da adimen artifizialaren (AA) alorrean Anthropic enpresak bere eredu berri indartsuak aurkeztu zituela, eta berehala Estatu Batuetako gobernuak debekatu egin zizkiola. Honen azpian dauden azpi-joko, diru-interes eta abantaila teknologiko estrategikoen inguruan, nekez asmatuko dugu zerbait zuzen esaten, baina gertakarietatik puntu batzuk nabarmentzera ausartuko gara.

Gure buletak jarraian:

Fable 5 delakoaren iragarpena. Anthropic enpresaren AA produktu ezagunena Claude da (inoiz Sustatun komentatua), baina orain Mythos 5 izeneko azpiegitura bat garatu dute, eta horren isla edo marka erabilgarria Fable 5 izendatu eta aurkeztu zuten joan den astean. Anthropicen arabera, orain arteko AA indartsuena omen.
Hain da indartsua non badaezpada... Anthropic-ek berak esan zuen hain zela indartsua tresna, non maltzurkerietarako erabili zitekeelakoan, babes berezi batzuk ezarrita dituen, baina gainera, argiki esan zuten hau, erabilpen baldintzetan erabiltzaileen input-a espreski gordeko zuten, okerrik egiten badugu erabiltzaileoi egozteko errua, ez makinari. "Mesedez erabili Fable 5 eta Mythos 5, baina adi, gordeko ditugu zure log guztiak." Ustez Fable 5ekin egin daitezkeen erabilpen okerrak dira, adibidez, eraso zibernetikoetarako sarbidea eskaintzea, nonbait gizakiek aurkitu ez dituzten zuloak topatuko dituelako AAk, eta hori erabiliko omen dutelako gaizkileek.
AEBetako gobernuaren erabaki bat-bateko bat etorri zen astebururako: hain dela arriskutsua Fable? Ba esportaziorako debekua ezarri zioten. Alegia, Estatu Batuetatik arma jakin batzuk ezin esportatu daitezkeen bezala, ba teknologia batzuk ere ez, eta kasu honetan txat adimentsu moduko bat denez hau, saretik zerbitzua kentzea da "ezin inportatu" horrek dakarrena. Anthropic-ek agindutakoa bete behar izan zuen. Orain negoziatzen ari omen dira, Anthropic-eko buru eta inbertsoreak, eta Etxe Zuriko jauntxoak.
AEBetako AA produktuak ezin direla erabili herrialde hartatik kanpo? ba aukera irekiko da AA txinatarrarentzat. Izatez, Kimi 2.7 eredu txinatarra amerikarren pare dagoela argitaratu da, eta GLM 5.2 deritzon beste bat ere bai (Zhifu izeneko enpresa batena). Merkeagoak izango dira gainera...
Txina aurrera doa, bai, baina AEBetako gobernuak duen indarraz jabetu gaitezen. Etxe Zuriaren agindu bat aski da enpresa indartsu batek (Anthropic) moztu dezan zerbitzu baten eskaintza mundu osoan. Eta okurritzen bazaio Donald Trumpi agindu bera ematea Google, Apple edo Microsoft-i? Ormuzko itsasartekoa baino ito-gune indartsuagoa dute hor, munduko ekonomia pikutara bidaltzeko. Gmail eta Google kontuak, iOS eta Android telefonoak, Windows sistema eragiledun sistemak geldiarazi badaitezke agindu soil batekin... Ez dago deskonexio hori, edo eraso tekno-militar hori azken batean, jasan dezakeen herrialderik.

Google Translate eta Gemini: zuzeneko ahots itzulpen berehalakoa (euskaraz ere bai)

Tue, 16 Jun 2026 08:17:07 +0000

Gemini 3.5 Live Translate izendatu duten garapena zabaldu zuen joan den astean Googlek, iragarpen honen bitartez. "Istanteko itzulpena" deitu diote, euskarazko bertsioan. Eta zera egiteko balio du, esan zerbait mugikorrari A hizkuntzan, eta berehalako ahots itzulpena egiten dizu B hizkuntzara. Euskaraz badabil. Aukera harrigarria esku-eskura mugikorrean.

Aukera berria Google Translate aplikazioaren bidez jar daiteke martxan. Funtzio berri honek 70 hizkuntza baino gehiago hautematen eta itzultzen ditu ia denbora errealean, eta euskara barne dago.

Google Translate aplikazioak uzten dizu ahotsez zerbait esaten eta hori testu bihurtuta itzulpena irakurtzen edo entzuten, baina Gemini AArekin garatu duten gauza ondo ikusteko beheko menuko elkarrizketa aukera klikatzea duzu onena.

Ondoren interfazean aukeratu sarbide hizkuntza (hauteman hizkuntza ematen badiozu, berak igarriko du), eta helburu hizkuntza. Eta ekin, esan zerbait euskaraz adibidez honako adibidean bezala, eta adi nola ematen duen alemanez (eman play beheko bideoan):

Beste norabidean ere probatu dugu. Txinerazko ahots batekin elikatu dugu sistema (esan gabe txinera zela, hauteman du), eta euskarara itzuli du. Txinako atzerri ministroaren adierazpen bat da, hemen duzue ingelesez azpidatzita Instagrameko bideo laburra. Horren pasartea pasatu diogu itzulgailuari, eta uste dugu zuzen ematen digula, ulergarri, Txinak bakea eta negoziazioak nahi dituela.

Probatzeko, instalatu Google Translate:

Android
iOS

Sortzaile sarelarien pregoi digitala Iruñeko Euskaltzaleon Martxan

Mon, 15 Jun 2026 07:05:30 +0000

Larunbatean (ekainak 13 Iruñean egindako Euskaltzaleon Martxan, hiru bidetatik elkartu ziren euskaltzaleak azken helmugara. Bide horietako bakoitza "pregoi" batekin hasi zen, eta bat Interneteko euskarazko eduki sortzaileen izenean irakurri zuten zenbait lagunek, beste hainbaten atxikimenduarekin.

Euskarazko eduki sortzaileak

Gaur hemen gaude sarean euskaratik eta euskaraz sortzen dugunon izenean. Pantaila baten bestaldean, mikrofono baten aurrean edo ordenagailu parean orduak pasatzen ditugunon izenean. Baina batez ere, komunitate baten izenean; sareko komunitate euskaldunaren izenean.

Maiz entzuten da internet mundu osoa lotzen duen espazio irekia dela. Bertan, bizitza errealean bezala, hizkuntza batzuk erraldoiak dira, eta beste batzuk, gurearen antzera, txikiagoak. Hizkuntza hegemonikoen nagusitasunaren aurrean, ezinbestekoa da euskarak sarean ere bere lekua izatea. Eremu digitala gure bizitzako espazio garrantzitsua izanik, guk euskaraz bizi nahi dugu bertan. Sarean euskaraz barre egin nahi dugu. Euskaraz eztabaidatu. Euskaraz jolastu. Euskaraz maitatu. Euskaraz dantzatu. Euskaraz sortu. Euskaraz izan.

Zoritxarrez, askotan entzun izan dugu euskarak ez duela lekurik sareetan; ez dagoela nahikoa jenderik, ez dagoela merkaturik, ez dagoela interesik. Baina kontrakoa frogatzen ari gara etengabe. Teknologia berriei esker, kamera batekin, mugikor batekin edo mikrofono xume batekin, ehunka sortzailek erakusten ari gara espazio honetan ere euskarak ez duela existitzeko baimenik behar. Bide horretan, batzuetan bakarrik sentitu arren, hor gabiltza buru-belarri, gaztelera, frantsesa eta ingelesa bezalako hizkuntza erraldoien artean gure tokia egiten. Eta, zaila izan arren, ez dugu amore ematen. Elkarrekin eraikitako sare honetan beti topatzen dugu gure edukia eskertu, partekatu edo iruzkindu egiten duena, eta horrek gogorarazten digu egiten dugunak zentzua duela. Gaur, komunitate horren parte zareten guztiei eskerrak eman nahi dizkizuegu, zuen babesari esker jarraitzen baitugu aurrera. Eskerrik asko!

Gaurkoa ez da hutsetik hasi den mugimendu baten ospakizuna. Duela urte batzuk, sare sozialak oraindik hastapenetan zeudenean, baziren sarean euskaraz bizitzea posible zela sinetsi zutenak. Hor zeuden Sarean, Sustatu, Librezale, Irratia.com, Euskaljakintza, Luistxo, Teketen, Teknopata, Txargain, iPatx, Gabi de la Maza, Arkkuso, Aiora Probatxoa, beste askoren artean, arnasgune digitalak sortzen. Haiei esker ikusi genuen interneten euskaraz ere aritu zitekeela. Hor daude, halaber, euskarazko Wikipediaren alde orduak eman dituztenak, edo #3000Twitz bezalako ekimenak, komunitate txiki batek ere zarata handia egin dezakeela erakutsi dutenak.

Sare sozialen hastapenetan lanean aritu ziren guztiek bazuten zerbait komunean: gustuko zutelako egiten zuten. Prozesuan dibertitzen zirelako. Ez algoritmoengatik. Ez diruagatik. Ez ikusgarritasunagatik. Pasioz baizik. Eta hor dago gakoa. Euskara ez da algoritmo bat. Egunero aukeratzen da. Egunero elikatzen da. Horregatik dira hain garrantzitsuak arnasgune digitalak: bertan ere euskarak arnasa hartu eta arnasa eman dezakeelako. Noski, arnas emate horrek erronka handi bat ere badakar, euskarazko edukiek sare sozialetako algoritmoetan beste hizkuntzetako edukiek duten presentzia eta indarra lortzea, hain zuzen ere. Honi lotuta, ideia bat argi utzi nahi dugu: benetako helburua ez dago zenbakietan. Hau ez da ikustaldi edo jarraitzaile kopuru kontua soilik. Sareetan euskaraz aritzea elkar babestea da, elkar ikusaraztea eta gure esentzia bizirik mantentzea. Elkar aitortze horretan baitago benetako indarra.

Zorionez, dagoeneko belaunaldi berri bat hemen da; euskaraz bizi nahi duen gazte komunitate anitza. Hortaz, euskarazko eskaintza askotarikoa izatea ezinbestekoa da. Euskarak denetarik behar eta merezi du. Gamer batek zuzeneko bat euskaraz egitea bezain garrantzitsua eta beharrezkoa da kulturaz, zientziaz, musikaz, politikaz, literaturaz, modaz edota sukaldaritzaz hitz egitea; umorea sortzea, entretenitzea, aldarrikatzea edota hezkuntzari buruz hausnartzea.

Euskarak ez digu soilik komunikatzeko tresna bat eskaintzen; mundua ulertzeko eta ingurura begiratzeko modu propioa ematen digu. Hizkuntzaren baitan daude gure herriaren historia, gure memoria kolektiboa, gure ohiturak, gure lurraldea, gure kultura eta baita urteetan zehar bizi izan ditugun borrokak ere. Horrek guztiak baldintzatzen du zer kontatzen dugun eta nola kontatzen dugun. Horregatik, garrantzitsua iruditzen zaigu edukia euskaraz sortzeaz gain, gure erreferentzia propioetatik eta gure bizipenetatik abiatuta egitea. Euskaraz sortzen dugunean ez gara beste hizkuntza batzuetan dagoena itzultzera mugatzen; gure ikuspegitik mundua interpretatzeko eta kontatzeko aukera ere badugu. Eta hori da, hain zuzen ere, sareari benetako aberastasuna ematen diona, guretik eta guretzat egiteak.

Gaur egungo testuinguruan, sareak eta plataforma digitalak dira belaunaldi berrien topagune nagusi. Garai honetan, gazte askorentzat sarea ez delako soilik “egoteko beste espazio bat”. Sare sozialak dira plazak. Dira tabernak. Dira ikasgelak. Dira lagunak. Dira kulturarekin duten lehen kontaktua. Eta espazio horietan euskararik ez badago, hutsune handia izango dugu. Ondorioz, hizkuntza hegemonikoen aurrean ezin gara geldirik geratu. Euskaratik sortutako askotariko edukia behar dugu. Erreferenteak behar ditugu. Eta, batez ere, komunitatea behar dugu. Eta hau guztion esku dago! Hor dago sareak eskaintzen digun aukerarik handiena: mugak gaindituz komunitatea sortzea eta saretzea. Euskal Herria mapatik harago eramatea. Herri txiki bateko gazte eta ez hain gazte batek beste puntako euskaldun batekin komunitatea eraikitzea. Sareek geografikoki kokatzen gaituzte, baina baita kulturalki eta emozionalki ere. Eta guk argi dugu: Euskal Herria euskalduna izateko, euskarak sarean ere ikusgarritasuna izan behar du. Elkarlanean. Konpromisoz. Maitasunez.

Hitz hauekin gure ekarpena balioan jarri nahi dugu: izan zirenena, garenona eta izango direnena. Eduki sortzaileok ere euskalgintzaren parte garelako. Euskararen presentzia handitzen ari garelako, espazio berriak irekiz. Eta agian ez gara guztiz konturatzen, baina etorkizuneko arnasguneak eraikitzen ari gara. Ez gara algoritmo baten ondorio. Ezta marketing estrategia baten emaitza ere. Komunitate bat gara. Euskaraz edukia sortzen duen pertsona bakoitzak ate bat irekitzen dio beste bati. Eta agian bideo, meme edo podcast horrek norbaiti euskaraz bizitzeko hautua egiteko ausardia emango dio.

Guztiontzat dago lekua sarean, eta guztiok nahi zaituztegu bertan euskaraz. Euskalki orotan, euskara batuan zein euskara ikaste prozesuan. Zuen pasioak, iritziak, emozioak, bizipenak… euskaraz transmititzean jendeak zuengan, gugan, haien buruaren islada ikusteko aukera zabaltzen dugulako, eta euskaraz bizi daitekeela erakusten dugulako.

Zuen kamera hartzeko unea heldu da! Hasi sortzen, zuen etxetik, zuen herritik, zuen auzotik, euskaraz. Hasi bilatzen, ikusten, iruzkintzen, partekatzen, jarraitzen… asko gara eta, dagoeneko, geure hizkuntzan edukia sortzen dugunak! Ez dezagun itxaron. Ez dezagun pentsatu txikiegiak garenik. Gure aurretik bidea egiten hasi zirenei esker gaude gu hemen. Euskara gehiago nahi dugulako etorri gara. Ausartagoa. Libreagoa. Zentralagoa. Euskaraz bizitzeko baldintza duinak nahi ditugu Euskal Herri osoan eta baita Sarean ere!

Euskaraz bizi nahi badugu, sareak euskaraz ikusi, entzun, sortu eta gozatzen hasteko tenorea da! Izan gaitezen olatu, eta bihur gaitezen tsunami!

PANTAILEN AROAN EUSKARAK AHOTSA IZAN DEZAN!

Gora sareko komunitate euskalduna.

Gora sareko euskaltzaleak.

Eta gora euskaratik eta euskaraz sortzen duen herria.

Atxikimenduen zerrenda, hemen.

Oroimenaren harra eta beharra: memoria historikoa lantzen Gasteizko institutu batean

Fri, 12 Jun 2026 06:48:27 +0000

Oroimenaren Harra Gasteizko Koldo Mitxelena Institutuko irakasleek prestatu duten baliabide interesgarri bat da. Oroimen historikoa eskolara eramateko ahalegin bat da. Gaurko garaien zeinua da, edo horrela entzuten ari gara behintzak, gazteak eta ikasleak ezjakin ageri direla iragan hurbilarekiko, edo are jarrera atzerakoi edo mespretxagarrien biltegi bihurtzen ari direla gazte koadrila zenbait. Ba horri ezagutzaz aurre egiteko ekimena da Oroimenaren Harra.

Hala aurkeztu dute ekimena irakasleek: "Azken bolada honetan irakasleon artean gai honen inguruko kezka nabarmen handitu da, ikasleek gero eta gutxiago ezagutzen baitute gure aurreko belaunaldiek 1936ko gerran eta Francoren diktaduran bizi behar izan zutena. Horretarako egokia iruditu zaigu Euskal Herrian egin diren makina bat lan gune bakar batean biltzea, hain zuzen ere, hezkuntzan lanean gabiltzanok oroimen historikoa eskolara eramatea errazago izan dezagun."

Aurre egiteko, ezagutzaren transmisioa: "transmisioak bermatzen du jakintza belaunaldi batetik bestera pasatzea. Esan liteke garai ezberdinak lotzeko balio duen katea dela transmisioa, garai ezberdinetako katebegiak lotzen dituena."

Eta materialak horretarako:

Unitate didaktikoak, testuen lanketa, sareko baliabideen aurkibideak...

Gai konkretuak landu izan dituztenak, besteak beste:

LGBTIQ+ komunitetaren jazarpena, Martxoaren 3ko gertakariak, euskararen zapalkuntza, Gerra Zibilean erbesteratutako haurrak, Otxandioko edo Gernikako bonbardaketak, genero arrakasla eta emakumeen zapalkuntza...

Ekimen zehatzen zerrenda bat dator, Koldo Mitxelena institutukoak eta baita beste euskal ikastetxe batzuetakoak, ez baitira Gasteizkoak bakarrik ari honetan. Eta hain zuzen ere, webgunearen lehen orrian gonbidapeba dago beste material batzuk landu dituztenentzat, kontaktuan jartzeko.

Duela gutxi izandako Udaltop jardunaldietan, Institutuko Josean Bueno irakasleak hain zuzen Oroimenaren Harra ekimenaren barruan euskararen memoria historikoa nola landu duten azaldu zuen. Hemen daukazue bideoa.

Ikus https://oroimenarenharra.koldomitxelena.net

BanIKAko zerbitzubatutzara, argazki bat haragi-tamainakoa (??)

Thu, 11 Jun 2026 16:24:55 +0000

Gasteizko udal lanpostu batzuetarako oposizioetan, euskarazko azterketetan akats nabarmenak izan direla salatu dute deialdira aurkeztu diten oposagile batzuek, eta kasua dokumentatu du Argiak, adibide erridikuluak agerira ekarriz. Test bateko erantzun posible bat adibidez: Derrigorrezkoa da paperezko argazki bat eramatea, haragi-tamainakoa. (Gaztelaniaz hauxe zen alegia: Una fotografía tamaño carné)

Beste adibide batzuk:

Pertsona gortasun bat (gorra behar luke)
Atezaindegietako sareak (redes de porterías, kirol ekipamenduaz ari dira)

Ulergaitzak diren terminoak, nondik harrapatu ez daudenak:

Zerbitzubatutzara
BanIKAko errolda

Argiak egindako analisian, argibide eta kontrolerako lanpostuko azterketan, adibidez, 100 galderetatik 36 ziren akatsarekin. Oker portzentaia horrekin ez diegu aprobatua emango ezta?

Nonbait Udalak bazekien zerbait oker samar joan zela galderen itzulpenean (horixe baita kontua: gaztelaniaz sortzen da gauza, eta euskarara itzuli egiten da), zeren eta oposizioetara aurkezturikoei gomendioa ere egin zuen Udaleko funtzio publikoko sailak azterketak gaztelaniaz egiteko, arren, "prestaketa berme guztiekin egin ahal izateko" (beste albiste honetan kontatzen da hori). Horren gainetik euskaraz egin nahi izan zutenek aurkitu zituzten disparate horiek galdetegietan.

Argiak lortu ditu Gasteizko Udalaren azalpen batzuk, eta akatsen onarpena, gaztelera bidalitako komunikazioan, albistean bertan diotenez.

Gaur ireki dute Bilboko Euskal Museoa

Wed, 10 Jun 2026 13:56:22 +0000

Lau urtez obretan egon ondoren, gaur ireki ditu berriro ateak Bilboko Euskal Museoak. Bilboko alde zaharrean zenbait eraikinetan kokatutako museoak 4 espazio ditu, eta bat irail-urri artean irekiko dute, baina gainerakoak gaurdanik bisitagarri daude.

Museoaren funtsa 50.000 pieza inguruk osatzen dute, Euskal Herri osoan dutenak jatorria, eta berrirekiera mila inguru egongo dira ikusgai. Miserikordia eta Klaustroa aretoetan euskal lurraldea, ondare historikoa eta antropologia agerrarazten dituzten piezak daude erakusketa "erdi-iraunkorrean" (adierazi dutenez hiru urtean behin edo berrituko dira erakusketa iraunkorreko elementuak). Udazkenean irekiko den Unamuno espazioan Bilboko historia izango da gai nagusia. Beste espazio bat jada irekia dago, Kurtze esan diotena, non ekitaldi-aretoa, liburutegia, eta jardueretarako gela desberdinak dauden.

Museoa bisitatzea ekainaren 21a arte dohainik izango da (astearteetan salbu, itxita dagoelako). Geroago ere, bisita gidatu doakoak izango dira abuztuaren 21a arte: euskarazkoak asteazkenetan 12.00etan eta 18.00etan, eta larunbatetan 11.00etan. Gainera, sarrera ere dohainik izango da asteazkenetan ekainaren 21tik aurrera ere.

Bestalde, atzo jakinarazi Bilbao Bizkaia Museoak erakundeak zuzendari berria duela, Xabier Paya, bertsolaria eta Donostia 2016 Hiriburu Kulturaleko zuzendari izandakoa. Goiko argazkia Bizkaie agerkaritik atera dugu, eta Euskal Museoo Klaustroko espazioko pieza ezagunenaren aurrean dago Paya (Mikeldi idoloa da atzean duena). Bilbao Bizkaia Museoak erakundeak areto eta biltegi zenbait kudeatzen ditu, baina Bilboko Euskal Museoa da bere agertoki eta adierazgarri nagusia.

Kike Amonarrizen webgunea eta bloga (gehi beste blog bat)

Wed, 10 Jun 2026 08:43:23 +0000

Kike Amonarriz (Tolosa, 1961) soziolinguista eta showmanak webgunea eta bloga ireki ditu (!). Harridura zeinua jarri dugu zeren webgune pertsonal bat eta are blog pertsonal bat irekitzea 2026an ekintza ez-ohiko eta agian ausarta ere bada.

Honela aurkeztu ditu webgune edukiak Kike Amonarrizek: "Material berriak eta zaharrak. Artikuluak, audioak, bideoak eta argazkiak. Han-hemenka barreiatuak nituenak apalategi honetan bildu ditut, denon eskura jartzeko asmotan. Baliagarriak bazaizkizue, helburua beteta." Ikus lanen atala webgunean Amonarrizen ekarpen hori apreziatzeko,

Amonarrizen webguneak bloga ere badauka: Bidegurutzetik du izena eta 2025ean datatutako 3 sarrera dauden arren, badirudi orain inauguratzen dela logikoki webgunearekin batera. Liburu iruzkin batekin dator blofa, hizkuntza erresistentziari buruz soziolinguista valentziar batek idatzitakoa komentatuz.

Bide batez, blog batekin aktibo dabilen euskalgintzako beste beterano bat ere ekarriko dugu hona: Mikel Irizarren Ekin eta Ikasi bloga. Erretirotik, bere bizibide eta jardunari errepaso sakon bat egiten ari da Irizar azken asteetan. Besteak beste 2015-2017 tartean Hizkuntza berdintasuneko zuzendari izan zen Gipuzkoako Foru Aldundian, eta kargu horretan bizitakoak blog-artikulu honetan errepasatu ditu.

Bisitatu blogak:

Mikel Irizarrena, Ekin eta Ikasi.
Kike Amonarrizena, Bidegurutzetik, eta webgunea: https://kikeamonarriz.eus/

Gaztetxoen mugikorren erabilera masiboa da, baina moderazio gogo eta zantzuak nabari dira

Wed, 10 Jun 2026 07:20:45 +0000

Unicef España erakundeak 'Haurrak, nerabeak eta ongizate digitala' izeneko txostena garatu du, zeinean beste batzuen artean EHUko talde batek hartu duen parte, EAEko 10 eta 20 urte bitarteko 7.000 gazte inguru kontsultatuta. Beste datu batzuen artean, laburpen azkar bat: Lehen mugikorra 11 urterekin iristen da pre-nerabe eta nerabe horien eskuetara, eta pornoa 12 urterekin (3 kasutik batean ustekabean).

Era berean,10-20 urte arteko Araba, Bizkaia eta Gipuzkoako gaztetxoen %93 dago sare sozialen batean. Horietarik %77,7 hiru edo gehiagotan dago. Sarbidea ere goiztiarra da sare hauetan: 13 urtetik beherakoen %73,7 sare sozialetan dabil. Gainera gaztetxo hauetariko asko profil bat baino gehiago daukate, bat "zuria" gurasoek ikusi ahal izan dezaten, eta beste bat ezkutuan.

Erabilpen orduen aldetik, %7.1k astegunetan 5 ordu baino gehiago egoten da pantailetara begira, eta asteburuetan bikoiztu baino gehiago egiten da portzentaia ghori (%16). EAEko haur eta nerabee horien % 95,2k mugikor propioa dute (2021eko datu bera da).

Ikerketak 2021eko beste azterketa bat hartzen du erreferentziatzat, eta behintzat parametro batzuetan osasun digitalerako ohitura batzuk hobetu egin dira nolabait. Adibidez, gailua logelan edukita lo egiteko ohiturak (egunero edo ia egunero) beherakada nabarmena izan du, % 55,3tik % 39ra igarota. Era berean, sare sozialetan izena emanda dutenen kopurua pixka bat jaitsi da (% 98,8tik % 93ra), eta plataforma berean profil bat baino gehiago izatea % 62,5etik % 50,9ra igaro da (ikus goiko grafikoa). Kontzientziazio maila bat ere badago: gazteen erdiak baino gehiagok onartzen du neke digitala sentitzen dutela, eta esaten dute deskonexio digitalerako beharra badutela,

Azterketak beste faktore batzuk ere aztertu ditu: jazarpena eta indarkeria digitala, eta bideojokoen erabilera ere bai. Datu horiek eta grafikoak ondo azalduta EITBren Orain.eus agerkarian. Bertatik hartu dugu goiko grafikoaren irudia.

Diotenez, Osasuna taldeak apostu-etxe debekatu batean asegururako apostua egin zuen

Tue, 09 Jun 2026 12:25:57 +0000

Apostuen merkatuak zaintzen dituen webgune baten arabera (Semafor), Espainiako gizonezkoen futboleko Lehen Mailako Ligan maila galtzekotan zen futbol talde batek dirutza bat jarri zuen jokoan, maila galdu zuelakoaren alde apostu eginez. Teknologia gaietan aditu espainiarra den Antonio Ortizen arabera, Osasuna izan daiteke talde hori. Osasunak mailari eutsi zion eta hortaz, apostua galdu egin zuten (!), baina ez zen hori koxka, baizik eta galduz gero, Bigarren Mailara jaitsita, jasan zezaketen diru-galera handiagoa estaltzeko mugimendua zen. Polymarket bezalako webgune batean gertatu zen jokaldia: Kalshin.

Semafor agerkariaren webgunea ordainpekoa da (albiste horri dagokionez), baina beste webgune honetan kopiatu dute muina, iruditu zaigunez.

Apostua Kalshi.com webgunean gertatu zen, Hego Euskal Herritik ezin erabil daitekeen joko-webgune batean. Kalshiren funtzionamendua Polymarket-ena bezalakoa da, eta hori azaldu genuen Sustatun: apostuak egin, baina ez bakarrik kirol emaitza eta halakoekin, baizik eta edozein gertarkarirekin, baita gerra bat noiz hasiko den, lider politiko bat kenduko duten ala ez... Apostuak, teknologia eta geopolitika modu arriskutsuan nahastuta.

Espainiako Ligako albisteari dagokionez, taldeak berak jarri zuen apostua, baietz jaitsi, eta diru kantitate jakin bat jokatu. Semaforren albistearen arabera, lehiako azken partida doi-doi eutsi zion taldeari 1-0 galduta, eta horrela Lehen Mailari eutsi zion talde bakarra egon zen: Osasuna, azken unera arte larri ibili zena. Horixe nabarmendu du kasuari erreparatu dion Antonio Ortizek (duela gutxi Donostian izana dugu AA mintegi batean).

Osasunak dirua galdu zuen, baina konpentsatuko zaio Lehen Mailan jarraituta. Bigarren Mailara jaitsita, galera estrukturalak larriak izango ziren (telebista eskubideak eta abar), baina apostuarekin dirua irabaziko zuen.

Nonbait, Osasunaren apostuari beste aldetik eutsi ziona inbertsio-funts bat izan zen, Susquehanna izeneko nazioarteko enpresa marrazo moduko bat. Semaforren albistearen arabera milioi bat dolar pasa irabaziko zuten.

Albisteak dio halaber gertaturikoa legala dela. Bizitza edo istripu aseguru baten parekoa dela apostuak horrela egitea... Auskalo, bitartean, kontuan izan, Kalshi debekatua dago Iruñean, Osasunaren egoitzan.

Euskal Herriko Bertsolari Txapelketa, Nafarroa Arenara bidean

Tue, 09 Jun 2026 10:35:50 +0000

Gaur aurkeztu du Bertsozale Elkarteak 2026ko Bertsolari Txapelketa Nagusia... barka: Euskal Herriko Bertsolari Txapelketa, izena aldatu baitiote 4 urtean behin jokatzen den txapelketa honi. Irailaren 19tik abenduaren 20ra izango da txapelketa, 15 saiorekin, eta abenduaren 20an izango da finala, iragarri zen bezala eszenatokia aldatuz: Nafarroa Arenan (eta ez BEC-en, non Maialen Lujanbiok jantzi zuen txapela 2022an, bere bigarrena).

15 saio izango ditu txapelketak, aurrekoak baino bat gehiago, eta bertsolari partehartzaileak ere gehiago dira, 50 non eta aurrekoan 44 izan ziren. Bina bertsolari gehiago sailkatu dituzte aurtengorako Arabako, Nafarroako eta Xilaba txapelketetatik.

Saioei dagokienez, lehen sailkapeneko zazpiak zazpi herrialdeetan izango dira, Hazparnen hasita irailaren 19an.

Ikus bertsolari parte-hartzaileen zerrenda, eta saioen egutegia: bakoitzaren kartelak prest daude, hutsuneekin noski lehen fasetik aurrera.

Txapelketako saio guztietarako sarrerak ekainaren 17an jarriko dira salgai BertsoSarrerak.eus zerbitzuan. Bertsozale Elkartearen bazkide direnek finalerako sarrera erreserbatuta izango dute ekainaren 17tik 24ra. "Aste horretan sarrera erosteko aukera bermatuta izango dute honela", gaur prentsaurrekoan Elkarteak jakinarazi duenez. Horrez gain, bazkideek txapelketa osoko bonoa erosteko aukera ere izango dute, eta saio guztietarako beherapena ere bai.

Gogoratu, ez BTN baizik eta Euskal Herriko Bertsolari Txapelketa (hona txapelketaren webgune berezia).

Gotzon Garate beka, idazle berrien lanari laguntza emateko

Sun, 07 Jun 2026 08:05:18 +0000

Elgoibarko Udalak Gotzon Garate Bekaren bosgarren deialdia egin du. Aurtengo beka deialdiaren helburu nagusia da euskarazko literatura sorkuntza sustatzea eta idazle berrien lanari laguntza ematea. Udalaren laguntzaileak dira bekan Danobat eta Elkar: Danobatek dirulaguntza emango du beka ondo bideratzeko, eta Elkar argitaletxea prest agertu da saridun gertatzen den eleberria argitaratzeko.

Elgoibarko Udalak Gotzon Garate izeneko beka sortu zuen 2009an, euskararen arloko lanak sustatu, eta aldi berean, idazle eta euskaralari elgoibartarra omentzeko asmotan.

Aurtengo beka deialdiaren helburu nagusia da euskarazko literatura sorkuntza sustatzea eta idazle berrien lanari laguntza ematea. Horiek horrela, deialdi honetara, eleberriak idazteko proiektuak aurkeztu ahal izango dira, jatorrizkoak eta euskaraz sortuak, zatika edo osorik inon argitaratu gabeak, sarituak izan ez direnak eta beste inondik moldatu gabeak.

Deialdian hala nahi duten norbanako guztiek parte hartu ahal izango dute, eta eskatzaile bakoitzak nahi adina proiektu aurkeztu ahal izango ditu, ezinbestean, euskaraz. Hala ere, kontuan izan behar da beka egile berrientzat dela eta, horrexegatik, ezin izango dela libururik argitaratuta eduki edo, gehienez, liburu bat argitaratuta eduki ahal izango dela eskaerak aurkezteko epea bukatu arte, hau da, 2026ko uztailaren 30era arte.

Bekaren xede den eleberria egiteko epea, gehienez ere, 12 hilabetekoa izango da, eta zenbatekoa, berriz, 8.000 eurokoa. Bekaren lana euskaraz egingo da, eta originala eta argitaratu gabea izan beharko da. Lana Udalaren ardurapean burutuko da, Jasone Osoro idazlearen mentoretza literarioarekin. Epaimahaia Uxue Alberdi, Danele Sarriugarte eta Mikel Ayllon idazleek osatuko dute.

Deialdiaren esku-orria ikus, eta arretaz irakurri oinarriak.

Fermin Muguruzaren protesta: "175.000 euro 47 taldeentzat versus 300.000 euro talde bakar batentzat"

Fri, 05 Jun 2026 08:56:22 +0000

Fermin Muguruzak protesta egin du duela aste batzuetako albistea dela eta: ETSk 300.000 euro jaso zituela Bihotzen Konkista birako Bartzelona eta Madrilgo kontzertuengatik. Musika biretarako hainbat euskal musikarik jasotako AT! Musika programaren laguntzak alderatu ditu ETSrenarekin. Iaz 175.000 euroko aurrekontuarekin 47 proiektuk jaso zuten laguntza, tartean Muguruzak berak 12.500 €. "175.000 euro 47 taldeentzat versus 300.000 euro talde bakar batentzat. Hau ez da magia, hau pribilegioa da."

Astean Musika Bulegoaren sariak eman dituzte, eta horien artean bat egokitu zitzaion Fermin Muguruzari, Etxepare Euskal Institutua Musika Saria, euskal musika nazioartean hedatzen eta ezagutzera ematen laguntzen duten artisten lana aitortzen duen saria.

Saria jasotzeko, testu bat prestatu zuen Muguruzak, eta ez dakigu ekitaldian osorik irakurriko zuen, baina bai zabaldu du bere edukia Lanarteak, sortzaileen eta Euskararen Langile Profesionalen Elkarteak. Fermin Muguruzak ez du En Tol Sarmiento (ETS) aipatzen testuan, baina argiki 300.000 euroko proiektua haiei emandako laguntza da.

Testua Etxepare Institutuari eskerrak emanez hasten da, eta eskertza gehigarri batzuk daude tartean, anaia zenari, Iñigo Muguruzari, gomuta tarteko. Baina gero erreibindikazio edo protestara doa Irungo artista:

".Mugikortasunerako laguntzen garrantzia azpimarratu nahi dut: AT! Musika programaren bidez, talde askok nazioartean aritzeko aukera izan dutelako. Kasu! Musika-biretarako laguntzak gehienez 5.000, 10.000 edo 15.000 eurokoak izan daitezke, biraren distantzia eta emanaldi kopurua kontuan hartuta. Eta iaz 175.000 euroko aurrekontuarekin 47 proiektuk jaso zuten laguntza hori. Ni neu ere onuradunetako bat izan nintzen, 12.500 € jasoz.

Horregatik, zaila egiten zait magia-trikimailu hau harrapatzea: Eusko Jauralaritzak bere xixteratik nola atera duen untxia, barkatu, "untxi gaiztoa", barkatu, "untxi gaiztoaren etxetxoa", barkatu... 300.000 euro, zuzenean talde bakar bati emateko bi kontzertu eskaintzeagatik Madril eta Bartzelonan. (...) Mesedez: Dirulaguntza publikoek ez lukete Bad Bunnyren etxetxoaren antzik izan behar: publikoa denak plaza ireki bat bezala funtzionatu beharko luke, ez erreserbatua bezala, non bakarrik sartzen den "hatzamarrez" hautatzen dena.

175.000 euro 47 taldeentzat versus 300.000 euro talde bakar batentzat. Hau ez da magia, hau pribilegioa da, exklusibotasuna. Zinez uste dut baliabide horiek gardentasunez, irizpide profesionalekin eta aukera-berdintasuna bermatuz banatu beharko liratekeela Etxepare Institutuaren bidez.

Zaindu dezagun euskal musikaren ekosistema eta atera gaitezen mundurat! Ruper Ordorika maisuak esango lukeen bezala: Zaindu maite duzun hori."

Informazio osatzeko:

Fermin Muguruzaren agiri osoa Lanartearen Twitter kontuan, hemen.
ETSrentzako 300.000 euroen albistea.
Etxepare Insitutuaren orrian, Fermin Muguruzari emandako sariaren berri (argazkia hortik hartu dugu).
Musika Bulegoaren asteko sarien kronika Berrian.

Matx Podcasta berriz abian, goi mailako euskal kirolarien beste aldea erakusten

Fri, 05 Jun 2026 06:30:32 +0000

Matx tokiko kirolaren sare sozialak podkast bat hasi zuen iaz, eta orain abiatu da bere bigarren denboraldia, joan den igandean argitaratu zen lehen atalarekin. Goi mailako euskal kirolarien beste aldea erakusten jarraituko du Matx Podcastak. Iazko denboraldiak izandako harrera ikusirik, bigarren bat egitea erabaki dute. Eta oraingo honetan ere, Basque Team fundazioarekin elkarlanean ekoiztutako saioa izango da. Kirol minoritarioetan gorenean dauden euskal kirolariak izango dira gonbidatuak eta Nahia Zudaire igerilari zubietarra izan da aurtengo lehen protagonista (igandean argitaratua, hemen duzue entzungai eta ikusgai, bideopodkastak baitira Matxenak).

Nahia Zudaire igerilariarena bezala, hurrengoak ere ez dira ohiko kirol elkarrizketak izango; kirolaz hitz egingo bada ere, kirolarien beste aldea ezagutzeko helburua izango du saioak. Berriketaldiaz gain, galdera intimoak edo jolas dibertigarriak ere proposatuko dira. “Ohiko kirol elkarrizketak alde batetara utzi eta kirolariekin ondo pasatzea nahi dugu. Kirol entretenimenduzko saio bat da gurea”, adierazi digu saioko aurkezle Aratz Losadak.

Matx podcastaren bigarren denboraldiak sei kapitulu izango ditu eta hileko azken igandetan estreinatuko dira. Abuztuan eta abenduan izan ezik, gainontzeko hilabete guztietan elkarrizketa berri bat entzuteko edo ikusteko aukera izango dugu.

Kapitulu guztiak Matx sare sozialean egongo dira inon baino lehen, tag edo etiketa honen bidez aurki daitezke. Era berean, Basque Team-en plataforma digitalek, Matx.eus berak eta Tokikom taldeko hainbat toki komunikabidek ere eskainiko dute saioa euren webguneetan, telebistetan eta irratietan.

Ekaitz Santaziliaren 'Euskargazki' ekimenaren emaitza Wikipediara igo dute

Thu, 04 Jun 2026 09:40:55 +0000

Ekaitz Santaziliaren hainbat urtetako proiektua, Euskargazki, Wikipedian dago orain, Wikimedia Commons artxibo biltegian. Hogei urteko ibilbide bat izan da Santaziliak egina, euskararen historia eta euskalarien bizitzak dokumentatuz. Urte batzuez Blogak.eus zerbitzuan ere egon zen Euskargazki, baina orain beste etxe bat aurkitu du Commons-en, 700 argazkirekin.

Euskal filologoa eta hizkuntzalaria da Santazilia, Nafarroako Unibertsitate Publikoko irakasle eta ikertzailea. Gainera, Fontes Linguae Vasconum aldizkariaren zuzendaria da.

Euskargazkirekin egin duena mapa kolektiboa da, Euskal Herriko bazter askotan euskarak historian zehar utzitako aztarnen gure hizkuntzaren presentziaren lekuktza. Azken hogei urteotan, euskararen historiari buruzko ehunka lekukotasun grafiko bildu ditu: hilarriak, inskripzioak, plaka zaharrak, eraikinetako idazkunak eta gure hizkuntzaren presentzia erakusten duten beste hainbat aztarna.

Ondare hori ezagutzeko eta zabaltzeko helburuarekin, Santaziliak bildutako materiala antolatu eta gizarteratzeko urrats garrantzitsua eman da orain. Horretan Euskal Wikilarien Kultur Elkarteak (EWKE) lagundu du, eta Nafarroako Gobernuko hezkuntza saileko lankide batek ere, Uxue Cardenasek. Azken honen ekarpena izan da irudiak sailkatu, geolokalizatu eta lizentzia libreekin argitaratzea, ondare hori mundu osoko erabiltzaileen eskura jarriz.

EWKEk bere oharrean dioenez, lan honi esker, "euskararen historiaren lekukotasun baliotsu hauek ez dira soilik kontserbatuko; ikertzaile, irakasle, ikasle eta herritar ororen eskura ere egongo dira, berrerabili eta zabaltzeko aukera emanez. Ekimen honek erakusten du memoria eta teknologia uztartuz posible dela gure hizkuntza-ondarea zaindu eta mundu osora zabaltzea. Euskargazkiren 700 irudi hauek, azken finean, euskararen historiaren leiho txikiak dira, denon eskura daudenak eta etorkizunerako gordeta geratuko direnak."

Hona Euskargazki bilduma Commons-en. Adibiderako argazkia goian, Inazio Eizmendi Basarriren jaiotetxeko oroigarria, cc-by-sa Ekaitz Santazilia.

Antzoki-TTS: euskarazko ahots sintesi aurreratu eta teatrala

Wed, 03 Jun 2026 10:13:14 +0000

Xabi Ezpeleta programatzaile nekaezinaren beste ekarpen bat (astean bertan Evaleu aurkeztu dizuegu). Kasu honetan garatu duen Antzoki-TTS esperimentua dakarkizuegu hona. TTS bat edo Text-To-Speech testu bat idatzizko testua irakurtzen duen ahots automatikoen sistema bat da. Duela urte batzuk garatzen direla TTSak euskaraz, eta baita praktikan erabili ere, adibidez hedabide askok duten "entzun albiste hau" funtzioan. Sakatu botoi horiek, eta testuak entzuten ahal dira euskaraz, txukun eta ulergarri, baina doinu robotiko bereizgarri batekin. Ezpeletaren esperimentuak haratago joan nahi du: hiztunaren izaera, ezaugarri emozionalak eta paralinguistikoak definituz, naturaltasun gehiago eman TTS euskarazkoari.

Artikulu honetan azaldu du bere prozesua Ezpeletak. Alderdi teknikotik, honakoa irakurri diogu: DramaBox ereduan oinarrituta dagoela Antzoki-TTS, "zeina aldi berean LTX-2 bideo ereduan oinarritua izan den". Jatorrizko ereduaren gainean LoRA moldaketa bat entrenatu du Ezpeletak, euskararen ahoskera eta prosodia hobetzeko asmoz. Saltsa hauekin beharbada zaila da ulertzea nondik nora dabilen teknika, baina alderdi praktikotik, lehen emaitzak lortu ditu Ezpeletak, eta ikusgarriak iruditu zaizkigu.

Ulertu dugunez, bi elementurekin lan egiten du Antzerki-TTS-k:

Erreferentziazko audio bat, apenas 10 segundu, sistemak ahotsaren tinbrea eta estiloa kopiatzen saiatzeko.
"Zuzendari gidoia" deitzen dena, proposatutako irakurketaz gain, testua irakurtzeko instrukzioak ematen dituena, interpretazioa deskribatuz (emozioak, pausak, arnasketak).

Zuzendari gidoi horrek efektu teatralak lortzen ditu sortutako ahotsean, eta hortik jarriko zion izena inbentoari Ezpeletak: Antzerki TTS. Gidoiaren agindu hauek hobeto dabiltza oraingoz ingelesez idatziz gero.

Onena, adibideak irakurri eta entzutea:

A shadowy villain speaks with cold menace, “Nire lurretan sartu zara, morroi” He chuckles darkly, “Erruz ordainduko duzu.” His voice rises with fury, “Belaunikatu, edo suntsituko zaitut!!”

A bright-eyed girl spins in a field of wildflowers, her voice bubbling with pure, breathless wonder: “Aizu, aitona! Entzun duzu?!” She laughs, a sound as clear as a mountain stream. “Makina batek hitz egiten duela dirudi, baina hain da erreala!” She spreads her arms wide, looking up at the sky in disbelief. “Sinestezina da… adimen artifizialak nire ahotsa sortu du!!”

Atera kontuak. Azalpen gehiago, hemen; eta sistema bera euskal AA garapenetara dedikatua dagoen Itzune taldearen biltegian.