பயணங்கள் Payanangal

வழித்தடங்கள் : 06 நவம்பர் 2009 : அரசு மருத்துவமனை அறுவை சிகிச்சைகளும், தமிழர் வாழ்வில் திரைப்படங்களும்

2009-11-06T00:55:00.001+05:30

சாதனை
சென்ற வாரம் சென்னை அரசு பொது மருத்துவமனையில் மூளை மரணம் ஏற்பட்டவரின் உறுப்புகள் தானமாக பெறப்பட்டு அவரது சிறுநீரகங்கள் இருவருக்கும் - ஒன்று அரசு பொது மருத்துவமனை பிணியாளர் ஒருவருக்கும் மற்றொன்று ஸ்டான்லி (இசுடானுலி) மருத்துவமனை பிணியாளர் ஒருவருக்கும்- பொருத்தப்பட்டு இரண்டு சிறுநீரகங்களும் நன்றாக இயங்கி வருகின்றன. கண்கள் இரண்டும் எழும்பூர் கண் மருத்துவமனைக்கு அளிக்கப்பட்டுள்ளன.

இருவருக்கு பார்வையும் இருவருக்கு மறுவாழ்வும் கிடைத்திருக்கின்றன

சென்ற வருடம் அப்போலோ மருத்துவமனையில் இருந்து ஹிதேந்திரனின் இதயம் பெறப்பட்டு மற்றொருவருக்கு பொருத்தப்பட்டதை நீங்கள் அறிந்திருப்பீர்கள்.

அதே போல் இந்த முறை அரசு மருத்துவமனையிலிருந்து பெறப்பட்டு அரசு பொது மருத்துவமனைகளுக்கு அளிக்கப்பட்டுள்ளது.

ஏற்கனவே சென்னை அரசு பொது மருத்துவமனையில் இதய மாற்று அறுவை சிகிச்சை வெற்றி கரமாக நடந்து முடிந்து விட்டது. ஸ்டான்லி (இசுடானுலி) மருத்துவமனையில் மூன்று பேருக்கு கல்லீரல்மாற்று மருத்துவ சிகிச்சை நடந்து முடிந்து விட்டது

இந்தியாவிலேயே மாநில அரசு மருத்துவமனைகளில் முற்றிலும் இலவசமாக, சிறுநீரக மாற்று அறுவை சிகிச்சை, கல்லீரல் மாற்று அறுவை சிகிச்சை, மற்றும் இதய மாற்று அறுவை சிகிச்சை எல்லாம் நடப்பது தமிழகத்தில் தான்

தமிழகத்தின் ஆரம்ப சுகாதார நிலைய செயல்பாடுகள் இந்தியாவின் பிற மாநிலங்களை விட பல மடங்கு உயர்ந்திருப்பது நாம் அறிந்ததே. இப்பொழுது சிறப்பு சிகிச்சை அளிப்பதிலும், நாம் பிற மாநிலங்களை விட பல மடங்கு முன்னேறி வருகிறோம்

-oOo-

திரைப்படமும் பேச்சுவழக்கு தமிழும்

அண்மையில் ஒரு நண்பர் குறுஞ்செய்தியில் “அழைக்கலாமா” என்று குறுஞ்செய்தி அனுப்பியிருந்தார். நான் அந்த நேரம் பணியில் இருந்ததால், குறுஞ்செய்தி அனுப்புங்கள் என்று பதிலனுப்பினேன். அவரும் “கையில் ஆணி, என்ன செய்யலாம்” என்று அடுத்த குறுஞ்செய்தி அனுப்பினார்.

“அலுவலகத்தில் நிறைய ஆணி பிடுங்கி விட்டீர்களா” என்று நக்கல் அடிக்கலாம் என்று நினைத்தேன். அந்த குறுஞ்செய்தியை தட்டச்சு செய்வதற்குள் ஏதோ அவசர வேலை வந்து விட்டதால் (அதாவது ஆணி பிடுங்க வேண்டியிருந்ததால்) முடியவில்லை !!

யோசித்து பார்த்தால், தமிழ் திரையுலகம் (ஆணி பிடுங்குவது போல்) பல சொற்தொடர்களை நம்மிடம் அறிமுகப்படுத்தியிருக்கிறது

தங்கமணி என்ற சொல் மனைவியை குறிக்க பயன்படுத்தப்படுகிறது. இது எதிலிருந்து ஆரம்பித்தது. அக்னி நட்சத்திரம் படத்திலிருந்தா, அல்லது வேறு மூலமா ??

ஏதாவது காரியத்தை “சொதப்பு”பவர்களை “மேண்டில் வேலை பார்த்துட்டான்” என்று கூறுகிறோமே…. இந்த சொல் புழக்கத்திற்கு வர காரணம் கவுண்டமணியும் செந்திலும் தானா ?? ... (படம் வைதேகி காத்திருந்தாள் என்று நினைக்கிறேன்)

ஒரு சிறு வாய்ப்பு கிடைத்தாலும் பயன்படுத்தி காரியம் சாதிப்பவர்களை பார்த்து “சைக்கிள் கேப்பில் ஆட்டோ ஓட்டுகிறான்” என்ற சொல்லும் பழக்கம் வந்தது துள்ளாத மனமும் துள்ளும் படத்திலிருந்து தானா ??

மன்னார் அண்ட் கம்பெனி என்றால் என்ன என்பது தெரியாதவர்கள் குறைவாகத்தான் இருப்பார்கள்

இது போன்ற சொற்களின் / சொற்தொடர்களின் முழு பட்டியலை முரளி கண்ணன் விரைவில் நீரோடையில் அளிப்பார் என்று நினைக்கிறேன்

-oOo-

கனவு, நம்பிக்கை, நிதர்சணம்
பலரும் இடுகை எழுதிவிட்டு கடைசியில் கவிதை ஒன்றை இணைக்கிறார்கள். எனக்கு கவிதை எல்லாம் எழுத வராததால் அதற்கு வாய்ப்பில்லை. தப்பித்தீர்கள். எனவே இலவச இணைப்பாக நான் வடிவமைத்த படங்கள் ஏதாவது சேர்த்து விடலாம் என்று நினைக்கிறேன்

இது 2001ஆம் ஆண்டு நான் வடிவமைத்த படம் (போட்டோஷாப் 5ஆ, 6ஆ என்று சரியாக ஞாபகம் இல்லை). எங்கள் கல்லூரி ஆண்டு மலரின் முன் அட்டையில் இடம் பெற்றது

அடுத்த படம் புத்தகத்தின் முதல் பக்கம் (அப்துல் கலாம் கனவு காண சொல்லும் முன்னரே நாங்கள் கனவு காண சொல்லிவிட்டோம் !!)

இராபர்டு கோத்தர்தின் வரிகளுடன் நிறைவு செய்கிறேன்

எதையும் இயலாதது என்று தீர்மானிப்பது கடினம்

ஏனென்றால் நேற்றைய கனவுதான் இன்றைய நம்பிக்கை

அதுவே நாளைய நிதர்சனம்

தமிழ்மணம் விருதுகள் 2009 - வெற்றி வாய்ப்புள்ள இடுகைகள் - சில கருத்துக்கள் !!

2009-11-03T19:32:00.001+05:30

சென்ற வருடம் நடைபெற்ற தமிழ் மணம் விருதுகள் 2008 முடிவுகளின் படி பயணங்கள் வலைப்பதிவில் இருக்கும் மூன்று கட்டுரைகள் மூன்று பிரிவுகளில் முதலிடத்தை பெற்றுள்ளன

பிரிவு: பயண அனுபவங்கள், ஊர்/வாழ்வு நினைவோடைகள்

பிரிவு: செய்திகள்/நிகழ்வுகளின் அலசல்கள்

பிரிவு: தமிழ் மொழி, கலாச்சாரம், வரலாறு, தொல்லியல்

அந்த சமயம், பிரபல எழுத்தாளர் பரிசல்காரன் அவர்கள் மறுமொழியில்

வாழ்த்துகள் டாக்டர்..

அள்ளீட்டீங்க போங்க!

எந்தப் பிரிவுல கலந்துக்கலாம்.. எந்தப் பதிவ முன்மொழியலாம்னு எவ்ளோ தூரம் யோசிச்சிருப்பீங்கன்னு தெரியுது!

ஒரு பதிவப் போட்டு தெரிவியுங்க,... இண்ட்ரஸ்டிங்கா இருக்கும்!!

என்று கூறியிருந்தார். அப்பொழுதே எழுதவேண்டும் என்று நினைத்து பல காரணங்களால் தாமதமாகியது

தற்சமயம் “2009 ஆண்டுக்கான தமிழ்மணம் விருதுகள்” குறித்த அறிவிப்பு வெளியாகியுள்ளது. சென்ற வருடம் இந்த விருது வழங்கப்பட்ட போது கடை பிடிக்கப்பட்ட அதே நடைமுறை கடைபிடிக்கப்படும் என்று தெரிவித்துள்ளபடியால், விதிகள் குறித்து (நான் புரிந்து கொண்டவகையில்) சில கருத்துக்களை எழுதலாம் என்று நினைக்கிறேன்.

தமிழ்மணம் விருதுகள் குறித்த சில விதிகளை மட்டும் எடுத்து, அது குறித்த சில கருத்துக்களை பதிகிறேன் / பகிர்கிறேன்

பொறுப்பு துறப்பு : இது அனைத்தும் என் கருத்துக்களே. தமிழ் மண நிர்வாகத்தின் கருத்துக்கள் அல்ல. நான் தமிழ்மணம் நிர்வாகத்துடன் எனக்கு பதிவர் என்பதை தவிர எந்த சம்மந்தமும் கிடையாது

உதாரணங்களுக்கு எனது இடுகைகளை மட்டுமே பயன்படுத்தியுள்ளேன்

விதி : தனிப்பட்ட இடுகை (post) அல்லது இடுகைத் தொடர்களே விருதுக்கு தேர்வு செய்யப்படும். வலைப்பதிவு முழுமைக்குமான விருது என்று எதுவும் இல்லை.

இதன் அர்த்தம் என்னவென்றால், இந்த விருது தனிப்பட்ட நபருக்கானது அல்ல. ஒரு வலைப்பதிவிற்கு மொத்தமாக ஆனது கிடையாது. இந்த விருதுகள் குறிப்பிட்ட இடுகைக்கு உரியதே.
அப்படியென்றால், உங்களது பல இடுகைகள் மொக்கையாக இருந்தாலும் கூட நன்றாக இருக்கும் இடுகைக்காக நீங்கள் வெற்றி பெறும் வாய்ப்பு உள்ளது.
எனவே கட்டாயம் கலந்து கொள்ளுங்கள்.
மூன்று இடுகைகளை பரிந்துரையுங்கள்.
வாசித்து வாக்களியுங்கள்.

விதிமுறை : எந்தவொரு இடுகையையும் எழுதிய பதிவரே பரிந்துரை செய்யவேண்டும். ஒரே பதிவர் அதிகபட்சமாக மூன்று வெவ்வேறு பிரிவுகளுக்குப் பரிந்துரை செய்யலாம். ஆனால் ஒரு பிரிவுக்கு ஒரே ஒரு இடுகையை மட்டுமே பரிந்துரை செய்ய முடியும். மேலும் குறிப்பிட்ட இடுகையை ஒரு பிரிவுக்கு மட்டுமே பரிந்துரை செய்யலாம்.

மொத்தம் மூன்று இடுகைகளை பரிந்துரைக்கலாம். மூன்றும் வெவ்வேறு பிரிவாக இருக்க வேண்டும்.
எந்த இடுகையை பரிந்துரைப்பது என்று சிறிது சிந்தித்து பரிந்துரையுங்கள்
எந்த பிரிவிற்கு பரிந்துரைப்பது என்பதையும் யோசித்து பரிந்துரைக்க வேண்டும்
இது குறித்து மேலும் விரிவாக கீழே விலக்கியுள்ளேன்

விதிமுறை : விருதுத் தேர்வுக் குழு (நடுவர் குழு) என்று எதுவும் இல்லை.தமிழ்மணத்தில் இணைந்துள்ள அனைத்துப் பதிவர்களும் முதற்கட்ட நடுவர்களே. ஒரு பதிவருக்கு ஒரு பிரிவுக்கு ஒரு வாக்கு என்னும் அடிப்படையில் வாக்குரிமை இருக்கும்.

எனவே நீங்கள் பரிந்துரைக்கும் இடுகை அடுத்த கட்டத்திற்கு நகர வேண்டுமென்றால் பதிவர்களுக்கு பிடித்திருக்க வேண்டும். (அவர்களது அறிவிற்கோ அல்லது உணர்ச்சிக்கோ அல்லது இரண்டிற்குமோ!!)
எனக்கு எனது / உங்களுக்கு உங்கள் அனைத்து இடுகையும் பிடித்திருக்கலாம் (காக்கைக்கும் தன் குஞ்சு பொன் குஞ்சு அல்லவா). ஆனால் அனைவருக்கும் நமது அனைத்து இடுகையும் பிடித்திருக்க வேண்டும் என்பது அவசியம் அல்லவே
ஒரு இடுகையை பரிந்துரைப்பதற்கு முன்னர், அது பதிவர்களுக்கு பிடித்த இடுகையா என்று பார்த்து விட்டு பரிந்துரைப்பது நல்லது.
பரிந்துரைக்கப்படும் இடுகையின் கருப்பொருள் / கூறப்படும் கருத்துக்கள் :
தமிழ் பதிவுலகம் என்பது ஒரே சீரான தன்மையுடையது அல்ல. பல்வேறு வகையினரு, பல்வேறு அரசியல் சார்பு நிலையுடையவர்களும், பல்வேறு பணியில் இருப்பவர்களும் நிறைந்திருக்கிறார்கள். அதே நேரம், இதில் பெரும்பாண்மை என்பது அனைத்து பிரிவிலும் இருக்கிறது. உதாரணமாக பதிவர்களில் ஆண்கள் அதிகம், பெண்கள் குறைவு. ஆங்கிலம் தெரிந்தவர்கள் அதிகம். ஆங்கிலம் தெரியாதவர்கள் குறைவு. பட்டதாரிகள் அதிகம். அலுவலகத்தில் வேலை பார்ப்பவர்கள் அதிகம் [அலுவலக கணினியில் பார்ப்பவர்கள் அதிகம் :) :) :) ]
இந்த மக்கள் வாழ்க்கைக் கணக்கியல் (டெமொகிராபி) என்பது உங்கள் இடுகைக்கு கிடைக்கும் வாக்கில் பிரதிபலிக்கும்.

உதாரணமாக ஆப்பிள் மரத்திற்கு என்ன உரம் வைக்க வேண்டும் என்பதை விட கணினி திரையை தொடர்ந்து பார்ப்பதால் ஏற்படும் கண் எரிச்சலை தவிர்ப்பது எப்படி என்ற இடுகை அதிக வரவேற்பை பெரும் !! ஆப்பிள் மரத்திற்கு உரம் வைப்பது குறித்து எழுதுவது தவறா என்று கேட்காதீர்கள். கண்டிப்பாக எழுதுங்கள். தமிழ் வலையுலகிற்கு உங்கள் பங்களிப்பு அவசியம். அந்த இடுகை கண்டிப்பாக பலருக்கும் பயன் பெறும். ஆனால் அது பரிசு பெறுவதற்கான வாய்ப்பு குறைவு என்பதை புரிந்து கொள்ளுங்கள். எனது பல இடுகைகள் வெகு ஜன ரசனைக்கு வெகு தொலைவில் இருப்பவையே. நான் எழுதுவதில் தயங்குவதே இல்லை.
தொழில் முறை நடுவர்கள் / அல்லது அந்த துறையை சார்ந்த போட்டி என்றால் அது போன்ற இடுகைகளை சமர்ப்பிக்கலாம்.
இது போல் அனைவரும் வாக்களிக்கும் போட்டியில் “வெகு ஜன ரசனை”யை பிரதிபலிக்கும் இடுகைகளே வெற்றி பெரும் வாய்ப்பு அதிகம் என்பது கசப்பான உண்மை. உண்மை கசக்கும். உண்மை சூடும் !!

எனவே நீங்கள் உங்கள் இடுகையை பரிந்துரைக்கும் முன்னர் தெரிந்து கொள்ள வேண்டிய / க்வனத்தில் கொள்ள வேண்டிய முக்கிய விஷயம் : பரிந்துரைக்கப்படும் உங்கள் இடுகையின் கருப்பொருள் / மையக்கருத்து பலருக்கு பிடித்திருக்க வேண்டும் / பயன்பட வேண்டும் :

உதாரணமாக வலைப்பதிவர்களில் அரசு ஊழியர்கள் குறைவு. எனவே எனது ஆறாவது ஊதிய குழு பரிந்துரைகள் - 5 - பயணப்படி மற்றும் தினப்படி இடுகையை நான் பரிந்துரைத்து, அதற்கு நீங்கள் வாக்களிப்பீர்கள் என்று எதிர்பார்க்க முடியுமா. அந்த இடுகையில் இருப்பது சரியாக தகவல்கள். அந்த இடுகையை எழுதியதில் எனது உழைப்பு இருக்கிறது. ஆனால் இந்த இரு காரணங்களுக்காக அது தமிழ் பதிவர்கள் அனைவரையும் கவர வேண்டும் என்று அவசியம் இல்லையே. ஒரு வேளை அரசு ஊழியருக்களுக்கான வலைப்பதிவு போட்டி என்றால் அந்த இடுகை வெற்றி பெரும் வாய்ப்பு அதிகம் :) :)

இதே அளவு கோலை, அரசியல், திரைப்படம், சமூகம் போன்ற விஷயங்களுக்கும் பயன்படுத்தி பாருங்கள். (திரைப்படம் குறித்த மற்றொரு உதாரணம் கீழே உள்ளது).
அடுத்து கவனத்தில் கொள்ள வேண்டியது : காலத்தை தாண்டி நிற்கும் தலைப்புகள் / கருத்துக்கள் அதிக வரவேற்பை பெறும்

சில இடுகைகள் எழுதப்பட்ட நேரம் பயங்கர பிரபலமாகும். உங்களை கவர்ந்திருக்கும். ஆனால் பல மாதங்கள் கழித்து இன்று வாசித்து பார்த்தால் அதில் சிறப்பாக ஒன்றும் இருப்பது போல் தெரியாது.
அது போன்ற இடுகைகள் வெற்றி பெரும் வாய்ப்பு குறைவு என்பது என கருத்து : உதாரணம் : புள்ளியியல், குட்டை பாவாடை, ஏ.ஐ.ஐ.எம்.எஸில் 49 குழந்தைகளின் மரணம் – ஊடகங்களில் சொல்லப்படாத உண்மை என்ன என்ற இடுகைக்கு 2008 ஆகஸ்ட் மாதம் இருந்த வரவேற்பு இன்று இருக்காது அல்லவா

அதே போல் நக்கல் / நையாண்டி இடுகைகள் என்றால் அவை பலருக்கும் புரிய வேண்டியது அவசியம்

பரிந்துரைக்கும் இடுகையில் நக்கல் / நையாண்டி இருந்தால் அது பலருக்கும் (பெரும்பாண்மையானவர்களுக்கு) புரிய வேண்டியது அவசியம். கீழுள்ள இரண்டு இடுகைகளுமே நையாண்டி செய்பவை தான். இதில் எது உங்களுக்கு புரிகிறது
- விமர்சனங்களை விமர்சிப்பவர்களை விமர்சித்தொரு விமர்சனம் !!
- இரண்டாவது கற்பனை கதை

அடுத்த விஷயம், ஒரே தலைப்பில் / ஒரே விஷயம் குறித்து எழுதப்பட்ட இடுகைகளில் கூட சில இடுகைகள் அதிகம் பதிவர்களை கவரும். சிலவற்றிற்கு வரவேற்பு இருக்காது
ஒரு குறிப்பிட்ட இடுகை பல பதிவர்களுக்கு பிடித்ததா இல்லையா என்பதை எப்படி கண்டுபிடிப்பது என்ற கேள்வி உங்களுக்கு தோன்றுகிறதா - வெகு எளிதான நடைமுறை உள்ளது. மறுமொழிகளை வைத்து கண்டுபிடித்து விடலாம்.

உதாரணமாக இதில் இரண்டு இடுகைகளுமே ஊர்/வாழ்வு நினைவோடைகள் என்ற பிரிவிற்கு பொருத்தமானதே. இந்த இரண்டில் எதை பரிந்துரைக்கவேண்டும் என்று நீங்கள் நினைக்கிறீர்கள் (இது உதாரணம் மட்டும் தான். இதில் ஒரு இடுகை 2008ல் எழுதப்பட்டதால் அதை போட்டிக்கு பரிந்துரைக்க முடியாது என்பது வேறு விஷயம்)

மருத்துவம் குறித்த இந்த இரு கட்டுரைகளில் (அறிவியல், பொருளாதாரம், தொழில்நுட்பக் கட்டுரைகள் பிரிவில்) இந்த இரண்டு இடுகைகளில் எதை பரிந்துரைத்தால் வெற்றி அடுத்த கட்ட செல்ல வாய்ப்பு அதிகம் என்று நினைக்கிறீர்கள்.

மேலே கூறியவை உதாரணங்கள் தான். இதிலிருந்து எந்த இடுகைகளை பரிந்துரைத்தால் வெற்றி பெறும் வாய்ப்பு அதிகம் என்பதை நீங்கள் புரிந்து கொள்வீர்கள் என்று நினைக்கிறேன்
ஒரு வழியாக நீங்கள் பரிந்துரைக்க வேண்டிய இடுகையை / இடுகைகளை தேர்ந்தெடுத்து விட்டீர்கள் என்று வைத்துக்கொள்ளுங்கள். சில இடுகைகளை ஒரே பிரிவில் தான் பரிந்துரைக்க முடியும். பல இடுகைகள் பல பிரிவுகளில் பரிந்துரைக்க தக்கவாறே உள்ளன. அப்படி பல பிரிவுகளுக்கு பொருத்தமான் இடுகை என்றால்...
அடுத்த கேள்வி, ஒரு இடுகையை எந்த பிரிவில் பரிந்துரைப்பது என்று எப்படி முடிவு செய்வது ??

ஒரு போட்டியில் வெற்றி வாய்ப்பு என்பது அதில் பங்கு பெறுபவர்களின் எண்ணிக்கையை பொறுத்து அமையும். ஒரு பிரிவில் இரண்டு பேர் மட்டும் பங்கு பெற்றால் கட்டாயம் பரிசு உண்டுதானே.
2008 விருதுகளின் போது பங்கு பெற்ற இடுகைகளின் எண்ணிக்கை இது தான். (புள்ளி விபரங்கள் சேர்த்து வைப்பது எப்படியெல்லாம் பயன்படுகிறது பாருங்கள் :) :) ) இந்த வருடம் எண்ணிக்கை அதிகரித்தாலும், விகிதாச்சாரத்தில் அதிகம் மாற்றம் இருக்காது என்றே எண்ணுகிறேன்

படைப்பிலக்கியம் (கதை, கவிதை, போன்றவை) : 150
காட்சிப் படைப்புகள் (ஓவியம், ஒளிப்படம், திரைப்படம்) : 42
நூல், திரைப்படம் அறிமுகம்/திறனாய்வுகள் : 54
அறிவியல், பொருளாதாரம், தொழில்நுட்பக் கட்டுரைகள் : 61
பயண அனுபவங்கள், ஊர்/வாழ்வு நினைவோடைகள் : 96
செய்திகள்/நிகழ்வுகளின் அலசல்கள் : 61
அரசியல், சமூக விமர்சனங்கள் : 84
பெண்கள் பிரச்னைகள், திருநங்கைகள் வாழ்வியற் சிக்கல்கள், தலித்திய சிக்கல்கள் : 25
ஈழ மக்களின் சமூக-பொருளாதாரச் சிக்கல்கள் : 18
தமிழ் மொழி, கலாச்சாரம், வரலாறு, தொல்லியல் : 40
நகைச்சுவை, கார்ட்டூன் : 58
சுயதேடல், பகுத்தறிவு, ஆன்மீகம் : 66

இதிலிருந்து புரிந்து கொள்ள வேண்டியது உங்கள் கடமை :) :) (அல்லது திறமை) குதிரையை ஆற்றங்கரை வரை தான் கொண்டு செல்ல முடியும் !! என்று ஒரு பழமொழி உள்ளது

விதிமுறை : முதற்கட்ட வாக்கெடுப்பில் ஒவ்வொரு பிரிவிலும் முதல் 10 இடங்கள் பெறும் இடுகைகள் இரண்டாம் கட்டப் பொது வாக்கெடுப்புக்குத் தெரிவு செய்யப்படும். இரண்டாம் கட்டத்தில் அனைத்து வாசகர்களும் (பதிவு இல்லாதவர்களும்) வாக்களிக்கலாம்.

பதிவர்களில் பெண்கள் குறைவு. ஆனால் வாசகர்களில் அந்த அளவு குறைவாக இருக்காது. அதே போல் வாசகர்களில் அனைத்து பிரிவினரும் உள்ளனர் (என்றே நினைக்கிறேன்)
எனவே உங்களது இடுகை இரண்டாவது கட்டத்திற்கு வந்த பிறகு வெற்றி பெற வேண்டுமென்றால், அது வாசகர்களுக்கும் பிடித்திருக்க வேண்டும் என்பதை நினைவில் வைத்து பரிந்துரையுங்கள். உதாரணமாக பதிவர்களில் எம்.ஜி.ஆர் ரசிகர்கள் குறைவு. ஆனால் வாசகர்களில் அதிகம் இருக்கலாம். எம்.ஜி.ஆர் ரசிகர்களுக்கு பிடிக்காத இடுகை ஒன்று பதிவர்களால் தேர்ந்தெடுக்கப்பட்டு இரண்டாவது கட்டத்திற்கு வந்தாலும் வாசகர்களால் நிராகரிக்கப்படும் வாய்ப்பே அதிகம்
பதிவின் நீளம் : பெரும்பாலான பதிவர்கள் அனைத்து பதிவுகளையும் படிப்பதில்லை (விதிவிலக்குகளை விட்டு விடுவோம்). வாசகர்கள் அப்படி அல்ல. எனவே அவர்கள் அதிகம் இடுகைகளை படிக்க விழைவார்கள். ஆக மிகப்பெரிய்ய்ய்ய்ய்ய...... இடுகைகள் வெற்றி பெரும் வாய்ப்பு குறைவு என்றே எண்ணுகிறேன்
பொதுவாகவே பதிவில் எழுதும் போது எழுத்துப்பிழை, சந்திப்பிழை போன்றவற்றை தவிர்ப்பது நலம். (இந்த அறிவுரையை கூற எனக்கு தகுதி இருக்கிறதா என்பது வேறு விஷயம் !!) குறைந்த பட்சம், பரிந்துரைக்கும் இடுகையையாவது மறுமுறை வாசித்து பார்த்து இயன்ற அளவு, பிழைகளை திருத்தலாம். நடையை சீர்படுத்த முயலலாம்.
சுருங்க சொன்னால், நீங்கள் பரிந்துரைக்கும் இடுகையில் பொருட்குற்றமும் இருக்க கூடாது, சொற்குற்றமும் இருக் கூடாது

விதிமுறை : ஒவ்வொரு கட்டத்திலும் விரிவான அறிவிப்புகள் தமிழ்மண முகப்பில் வெளியிடப்படும். மின்னஞ்சலிலும் பதிவர்களுக்கு அறிவிக்கப்படும்.

இதில் முக்கியமான விஷயம், நீங்கள் தமிழ்மணத்தில் இணையும் போது அளித்த மின்னஞ்சல் முகவரிக்கே அவர்கள் அனுப்புவார்கள். எனவே உங்களது மின்னஞ்சல் முகவரி மாறியிருந்தால், தமிழ்மணம் நிர்வாகத்திடம் தெரிவியுங்கள்

இந்த மூன்று அதிகாரிகளுடன் ஒப்பிட்டால் ஹிட்லர் நல்லவரே !!

2009-10-19T18:20:00.001+05:30

மும்பையிலிருந்து வெளிவரும் மிட்-டே இதழில் ஒரு செய்தி

ஒரு தனியார் நிறுவனத்தில் முக்கிய பொறுப்பிலிருக்கும் மூவர், அவர்களின் அதிகாரி அளித்த ஒரு விருந்தில் கலந்து கொள்ள சீருந்தில் சென்றுள்ளார்கள். சீருந்தை ஓட்டுனர் கோவர்த்தனன் வைத்யா ஓட்டி சென்றுள்ளார்

அவருக்கு சிறிது நெஞ்சு வலி இருந்துள்ளது. கூப்பரேஜ் அருகில் வரும் போது வலியானது அதிகரித்து நெஞ்சில் சம்மட்டியால் அடிப்பது போல் இருக்கவே, அவர் வண்டியை நிறுத்தியுள்ளார். நிறுத்திய சில நொடிகளில் அவர் வண்டியிலியே சாய்ந்து விழுந்துள்ளார். அவரது கதவை திறந்து அவரை வெளியே தள்ளி, அவரை நடைமேடையில் அமர வைத்து விட்டு, அந்த மூவரும் சீருந்தை கிளப்பி சென்றுள்ளனர்

அவரது நல்ல நேரம், விஜய சேகர் என்ற தொலைகாட்சி நிறுவனத்தில் பணிபுரிபவர் அந்த பக்கம் வந்துள்ளார். அதை விட நல்ல நேரம் அவரிடம் ஆஸ்ப்ரின் மருந்து இருந்துள்ளது. அதை அளிக்க வேண்டும் என்று அவரது மனைவிக்கு தெரிந்துள்ளது

விஜய சேகரும், அவரது மனைவியும், ஆஸ்பிரின் மருந்தை அளித்து விட்டு உடனடியாக வைத்யாவை மருத்துவமனைக்கு விஜயின் சீருந்தில் அழைத்து சென்றுள்ளனர்

புனித ஜார்ஜ் மருத்துவமனயில் வைத்யாவிற்கு சிகிச்சை அளித்த மருத்துவர்கள், மேலும் காலதாமதம் ஆகியிருந்தால் அவரை காப்பாற்றியிருக்க முடிந்திருக்காது என்று கூறியுள்ளனர்

சேகரின் மனைவி அந்த மூவரையும் தொலைபேசியில் அழைத்து கேட்ட போது “அவருக்கு வெளிக்காற்று கிடைத்தால் நன்றாக ஆகிவிடுவார்” என்று விட்டு விட்டு சென்றதாக கூறியுள்ளனர்.

மேலும் வாசித்து எரிச்சலடைய முழு விபரமும் உள்ள சுட்டி இங்குள்ளது

இவ்வளவையும் கூறும் மிட்-டே இதழ், அந்த மூவரின் பெயரையோ அவர்களின் நிறுவனத்தின் பெயரையோ கூறாதது ஏன் என்று உங்களுக்கு தெரியும் தானே

மருத்துவத்தில் ரகசியங்கள் மற்றும் ரகசியங்களுக்கு விலக்குகள்

2009-10-17T16:29:00.001+05:30

பிணியாளர்களுக்கு சிகிச்சை அளிக்கும் போதோ, அல்லது பிற சமயங்களிலோ எனக்கு தெரியவரும் விபரங்களில், வெளியிடப்படக்க்கூடாதவைகளை நான் வெளியிடமாட்டேன்

- ஹிப்போகிரேட்டஸ் உறுதிமொழி(யின் ஒரு ப்குதி)

ஒரு நோயாளி பற்றியோ அவரது நோயை பற்றியோ விபரங்களை மருத்துவர் வெளியிடக்கூடாது என்பது மிக முக்கிய விதிமுறையாகும். இது குறித்து சில விஷயங்கள்

நோயாளியின் அனுமதியின்றி மருத்துவர் நோயாளி குறித்த விபரங்களை மற்றவர்களுக்கு தெரியப்படுத்தக்கூடாது
நோயாளி 18 வயதிற்கு மேற்பட்டவர் என்றால் அவரது பெற்றோரிடம் தெரிவிக்கக்கூட நோயாளியின் அனுமதி வேண்டும்
கணவன் மனைவி என்றால் கூட ஒருவர் பற்றிய விபரங்களை அடுத்தவரிடம் அனுமதியில்லாமல் தெரிவிக்க கூடாது
ஒரு பணியாளருக்கு சிகிச்சை அளிக்க அவரது முதலாளி பணம் செலுத்தினால் கூட அந்த பணியாளரின் அனுமதி இன்றி அந்த முதலாளிக்கு நோயின் விபரங்களை தெரிவிக்க கூடாது
அரசு மருத்துவமனைகளுக்கும் இந்த விதி பொருந்தும்
விசாரணை கைதிகளின் நோய் குறித்த விபரங்களை அவர்களது அனுமதியில்லாமல் காவல்துறையினரிடம் தெரிவிக்க முடியாது. ஆனால் தண்டனை அளிக்கப்பட்டு விட்டால் அந்த நோயாளியின் உடல் நிலை குறித்து அதிகாரிகளிடம் தெரிவிக்க நோயாளியின் அனுமதி தேவையில்லை
மருத்துவ கட்டுரைகள் எழுதப்படும் போது நோயாளியின் பெயர் மாற்றப்படவேண்டும் / மறைக்கப்படவேண்டும்.

இது போல் விதிகள் இருக்கும் நேரத்தில் சிறப்புரிமை கருத்துப்பரிமாற்றம் (Privileged Communication) அதாவது நோயாளியின் அனுமதியின்றியே மருத்துவர் அந்த நோய் குறித்த விபரங்களை வெளியிடக்கூடிய சூழல்கள் சிலவும் உள்ளன

தொற்றுநோய்கள் : உதாரணமாக ஒரு உணவக சமையல்காரர் / உணவு பரிமாறுபவர் டைபாய்டினால் பாதிக்கப்பட்டுள்ளார். (அவர் சமையல் செய்வதின் மூலம் அல்லது பரிமாறுவதன் மூலம் பல நூறு பேர்களுக்கு நோய் பரவ வாய்ப்புள்ளதால்) மருத்துவர் அவரை ஒரு வாரம் விடுப்பு எடுக்க கூறுகிறார். ஆனால் சமையல்காரர் தனது பணியை தொடர்ந்து செய்தால் அந்த நிலையில் பொது நலன் கருதி மருத்துவர் தகவலை வெளியிடலாம்
அறிவிக்கப்பட்டுள்ள தொற்று நோய்கள் : மருத்துவரிடம் சிகிச்சை பெறும் ஒருவர் அறிவிக்கப்பட்டுள்ள தோற்று நோய்களில் ஏதாவது ஒன்றினால் பாதிக்கப்பட்டிருந்தால், அந்த தகவலை மருத்துவர் அதிகாரிகளிடம் தெரிவிக்க நோயாளியின் அனுமதி தேவையில்லை (உதாரணம் ஒருவருக்கு பரிசோதனையின் பன்றிக்காய்ச்சல் இருப்பது தெரியவந்தால், அந்த விபரங்களை அரசிடம் தெரிவிக்க வேண்டும்)
சட்டத்திற்கு புறம்பான சம்பவங்கள் என்ற சந்தேகம் இருந்தால் : உதாரணம் ஒருவர் வயிற்றில் துப்பாக்கி குண்டுடன் / கத்திக்குத்துடன் வந்தால் காவல்துறையினரிடம் தெரிவிக்க நோயாளியின் அனுமதி தேவையில்லை
பணியில் குறைபாடுகளை ஏற்படுத்தக்கூடிய நோய்கள் : உதாரணமாக ஒருவருக்கு நிறக்குருடு (நிறங்களை பிரித்து பார்ப்பதில் பிரச்சனை) என்று வைத்துக்கொள்ளுங்கள். அப்படிப்பட்டவர் நிறங்களை அடையாளம் காண வேண்டிய ஒரு தொழிலில் (உதாரணம் ஓட்டுனர்) இருந்தால், அதனால் பலரும் பாதிக்கப்படலாம் என்ற பட்சத்தில் மருத்துவர் அந்த தகவலை அந்த நபர் பணிபுரியும் இடத்திற்கு வெளியிடலாம்.
பிணியாளரின் நலன் கருதி : உதாரணமாக தற்கொலை எண்ணம் கொண்டவர் என்றால் அந்த நோயை பற்றி மட்டும் பெற்றொரிடம் தெரியப்படுத்த அனுமதி தேவையில்லை. ஆனால் தற்கொலை எண்ணம் கொண்டவரின் புகை பிடிக்கும் பழக்கத்தை அவரது பெற்றொரிடம் தெரியப்படுத்துவது தவறு !
நீதிமன்றங்களில் விசாரணைகளின் போது அல்லது பிற வழக்கு விசாரணைகளின் போது

அரசு ஆரம்ப சுகாதார நிலைய மருத்துவர்களின் வேலை நேரம் திருத்தி அமைக்கப்பட்டுள்ளது

2009-10-15T06:28:00.001+05:30

14.10.2009 வெளியான அரசு ஆணை எண் 339 (சுகாதாரம் மற்றும் குடும்ப நலத்துறை)யின் படி அரசு ஆரம்ப சுகாதார நிலைய மருத்துவர்களின் வேலை நேரம் திருத்து அமைக்கப்பட்டுள்ளது

அப்படியென்றால் தற்போதைய வேலை நேரம் என்னவென்று உங்களுக்கு தெரியுமா. என்னவாக இருக்கும் என்று எண்ணுகிறீர்கள்...தொடர்ந்து படிக்கும் முன்னர் என்னாக இருக்கும், ஒரு அரசு மருத்துவம் வாரம் எவ்வளவு நேரம் வேலை செய்ய வேண்டியுள்ளது என்று ஒரு நிமிடம் நீங்களே ஊகித்து / யோசித்து பாருங்கள்... இனி தொடர்ந்து படிக்கலாம்

ஒரு ஆரம்ப சுகாதார நிலையத்தில் இரு மருத்துவர்கள் மட்டுமே உள்ளனர்

இவர்கள் இருவரும் காலை 8 முதல் மாலை 5 வரை பணியில் இருக்க வேண்டும்.

அதன் பிறகு ஒருவர் மாலை 5 மணி முதல் அடுத்த நாள் காலை 8 வரை பணியில் இருந்து விட்டு தொடர்ந்து மாலை 8 மணி வரை களப்பணி செய்ய வேண்டும்

அதாவது

மருத்துவர் 1, மருத்துவர் 2 என்று எடுத்துக்கொண்டால்

மருத்துவர் 1 பணி நேரம் - வாரத்திற்கு 99 மணி நேரம்

திங்கள் காலை 8 முதல் செவ்வாய் மாலை 5 வரை - தொடர்ந்து 33 மணி நேரம்
புதன் காலை 8 முதல் வியாழன் மாலை 5 வரை - தொடர்ந்து 33 மணி நேரம்
வெள்ளி காலை 8 முதல் சனி மாலை 5 வரை - தொடர்ந்து 33 மணி நேரம்

மருத்துவர் 1 பணியில் இல்லாத நேரம் - வாரத்திற்கு - 69 மணி நேரம்

செவ்வாய் மாலை 5 முதல் புதன் காலை 8 வரை - 15 மணி நேரம்
வியாழன் மாலை 5 முதல் வெள்ளி காலை 8 வரை - 15 மணி நேரம்
சனி மாலை 5 முதல் திங்கள் காலை 8 வரை - 39 மணி நேரம்

மருத்துவர் 2 பணி நேரம் - வாரத்திற்கு 123 மணி நேரம்

செவ்வாய் காலை 8 முதல் புதன் மாலை 5 வரை - தொடர்ந்து 33 மணி நேரம்
வியாழன் காலை 8 முதல் வெள்ளி மாலை 5 வரை - தொடர்ந்து 33 மணி நேரம்
சனி காலை 8 முதல் திங்கள் மாலை 5 வரை - தொடர்ந்து 57 மணி நேரம்

மருத்துவர் 2 பணியில் இல்லாத நேரம் - வாரத்திற்கு - 45 மணி நேரம்

திங்கள் மாலை 5 முதல் செவ்வாய் காலை 8 வரை - 15 மணி நேரம்
புதன் மாலை 5 முதல் வியாழன் காலை 8 வரை - 15 மணி நேரம்
வெள்ளி மாலை 5 முதல் சனி காலை 8 வரை - 15 மணி நேரம்

பிற மாநிலங்களுடன் ஒப்பிட்டால்

மாநிலம்	வேலை நேரம்
கேரளா	9 am முதல் 1 pm / 2 முதல் 3 pm. அழைப்பு பணி கிடையாது
கர்நாடகம்	9 am முதல் 1 pm / 2 முதல் 4.30 pm. அழைப்பு பணி கிடையாது
மத்திய அரசு நிறுவனங்கள்	பிற மத்திய அரசு அலுவலகங்களை போலவே. அழைப்பு பணி கிடையாது
தமிழகம்	வாரத்திற்கு 123 மணி நேரம்

அதே நேரம் பிற மாநிலங்களின் ஊதியம்

மாநிலம்	பணியில் சேரும் போது	ஊதிய விகிதம் மற்றும் ஊதிய உயர்வு
மாநிலம்	பணியில் சேரும் போது	1	2	3
ஆந்திர பிரதேசம்	உதவி மருத்துவர் 11250	உதவி குடியுரிமை மருத்துவர் 14300 8 வருடம் கழித்து	குடியுரிமை மருத்துவர் 17035 16 வருடத்தில்	இணை இயக்குனர் 18355 காலியிடம் பொருத்து
கர்நாடகம்	மருத்துவ அலுவலர் 14050	மூத்த மருத்துவர் அலுவலர் 15200 6 வருடத்தில்	உதவி முதன்மை மருத்துவ அலுவலர் 18150 13 வருடத்தில்	இணை இயக்குனர் 23200
கேரளா	உதவி மருத்துவர் 11910-19350	குடியுரிமை மருத்துவர் 16650- 23200 8 வருடத்தில்	துனை இயக்குனர் 23200 – 31150 16 வருடத்தில்	கூடுதல் இயக்குனர் 25400 – 33100 காலியிடம் பொருத்து
தமிழகம்	உதவி மருத்துவர் 8000	மூத்த உதவி மருத்துவர் 9100 காலியிடம் பொருத்து - சுமார் 17 வருடம் கழித்து	குடியுரிமை மருத்துவர் 10000 காலியிடம் பொருத்து - சுமார் 20 வருடம் கழித்து	மூத்த குடியுரிமை மருத்துவர் 12000 காலியிடம் பொருத்து - சுமார் 22 வருடம் கழித்து

இந்த வேலை நேரம் தற்சமயம் மாற்றி அமைக்கப்பட்டுள்ளது

இந்த அரசாணையின் படி வேலை நேரம் திருத்தி அமைக்கப்பட்டுள்ளது

மூன்று மட்டும் அதற்கும் குறைவான மருத்துவர்கள் பணிபுரியும் அரசு ஆரம்ப சுகாதார நிலைய மருத்துவ அலுவலரின் வேலை நேரம்

காலை 9 மணி முதல் மாலை 4 மணி வரை
மாலை 4 மணி முதல் காலை 9 மணி வரை - தொற்றுநோய், உணவுநஞ்சேறல், தடுப்பூசி பாதிப்புகள், பேரிடர் போன்ற நிகழ்வுகளுக்கு மட்டும் அழைப்பு சுழற்சி பணி

இது தவிர சில சுகாதார நிலையங்கல் மேம்படுத்தப்பட்ட சுகாதார நிலையங்கள் என்று அழைக்கப்படுகின்றன. அங்கு பணி நேரம் முறைப்பணியின் அடிப்படையில் இருக்கும்

காலை 8 மணி முதல் மாலை 2 மணி வரை - நிலைய பொறுப்பு மருத்துவ அலுவலர் + 1 / 2 மருத்துவர்கள்
மாலை 2 மணி முதல் இரவு 8 மணி வரை - ஒரு மருத்துவர்
இரவு 8 மணி முதல் மறுநாள் காலை 8 மணி வரை - ஒரு மருத்துவர்

மேம்படுத்தப்பட்ட சுகாதார நிலையங்களில் மட்டும் 24 மணிநேரமும் ஒரு மருத்துவர் கட்டாயம் பணியில் இருப்பார்

விமர்சனங்களை விமர்சிப்பவர்களை விமர்சித்தொரு விமர்சனம் !!

2009-10-09T04:02:00.013+05:30

உரையாடல் போட்டிக்கு அனுப்பப்படாத கற்பனை உரையாடல்

அண்ணே, நம்ம ஊருல முருகன் ஸ்வீட் ஸ்டாலுன்னு திறந்திருக்காங்களாமே, போய் பாத்தீங்களா

ஆமாம் தம்பி, புதுசா வந்திருக்கு, கலர் கலரா இருக்கு, இனிப்பு நல்லாயிருக்கு,

அப்படியா

ஆமாம், சுத்தமான நெய்யிலதான் செய்றாங்களாம்

அட

டேஸ்ட் எல்லாம் சூப்பர்

அப்படியா

விலை கூட அதிகமில்லையாம், ஆனா....

ஆனா என்னன்னே

ஆனா, இனிப்புக்குள்ள விஷம் இருக்குன்னு சொல்றாங்கப்பா. அதான் யோசனையா இருக்கு

அடப்போங்கன்ன, இனிப்புக்குள்ள விஷம் இருந்தா என்ன கேடு

என்ன தம்பி இப்படி சொல்ற

நான் மட்டுமான்ன சொல்றேன், நம்ம டேபிள் சங்கர் இருக்காருல்ல

யாரு, புதுசா ஸ்வீட் கடை ஆரம்பிக்க போறாரே அவரா

ஆமாம் அவருதான், அவரு கூட என்ன சொல்றார் பாருங்க

ஒரு ஸ்வீட்டை பற்றி அந்த கடை முதலாளியோ, சமையல்காரரோ, விற்பவரோ உட்கார்ந்து யோசிக்காத பிரச்சனைக்ளை, பாயிண்டுகளை அந்த ஸ்வீட்டில் அவர் சயனைட்டை நுழைக்கிறார், ஆசிட்டை நுழைக்கிறார் என்று எதையாவது அதற்குள் நுழைத்து ஆக வேண்டிய கட்டாயத்தில், உட்கார்ந்து யோசித்து பதிவெழுதுவது, அது அந்த இசம், இந்த இசம் என்று எழுதுவது.. ஏன் என்று எனக்கு புரியவில்லை. நான் ஒரு பாமரன்.. என்னை போன்று கடையில் ஸ்வீட் வாங்கும் பாமரன்களுக்கு, ஸ்வீட் கலரா இருக்கா இலலையா? என்பதே முக்கியமாய் இருக்கும். அப்படியிருக்க, தேவையில்லாமல், உள்ளிருக்கும் சயனைட், ஆர்சனிக் பற்றியெல்லாம் எழுதி ஏன் தனிமனித தாக்குதல் நடத்தி, ஒரு புதிய கலவரத்தை உண்டாக்குகிறார்கள். என்றே புரியவில்லை.

அடப்பாவி, அப்படியா சொல்றார்,

அது மட்டுமில்லன்ன, நம்ம படகுக்காரர் கூட

உங்களுக்கு எல்லாம் தெரிந்திருக்கிறது. ஒரு ஸ்வீட் விற்கிறார்கள். இரண்டு வாங்கி சாப்பிடுகிறீர்கள். அதை ரசிக்கிறீர்கள். பிடிக்கிறது, பிடிக்கவில்லை என்ற இரண்டு கோணங்களுக்கு மேல், மூன்றாவது கோணமாய் அதில் என்ன இருக்கிறது என்று அலசி ஆராய்கிறீர்கள்.

ஆராய்ந்ததன் பயனாக உங்களுக்குக் கிடைத்ததெல்லாம் அதிர்ச்சிகள்தான். அதிலிருக்கும் சாயம், வெறும் சாயமல்ல, .. அது ஆர்சனிக் என்கிறீர்கள். இசம் என்கிறீர்கள். ஆசிட் என்கிறீர்கள். விஷம் தெரிகிறது, வன்மம் தெரிகிறது என்கிறீர்கள். நீங்கள் மெத்தப்படித்தவர்கள்.

எங்களுக்கு ஸ்வீட்டுடன் காம்பிமெண்டாக கோக் கிடைக்குமா , இல்லை வெறூம் தண்ணிதானா என்ற விவாதம்தான் ஓடுகிறது மனதில். நாங்கள் அறிவிலிகள்.

ஸ்வீட் வாங்கி முடிந்ததும் என் வாகனத்தை பிற வாகனங்கள் மோதாமல் எடுக்க முடியுமா, வீட்டுக்கு வரும்போது ஏதோ வாங்கிவரச் சொன்னாளே என்றெல்லாம் கேள்விகளோடு வெளிவருகிறோம் நாங்கள். இடையே ஸ்வீட் தந்த சில தித்திப்புகளின் நினைவுகள் இதம் தருகிறது எங்களுக்கு. நீங்கள் அதையெல்லாம் விடுத்து, வேறேதோ சிந்தனைகளில் உங்கள் நிகழைத் தொலைத்துக் கொண்டிருக்கிறீர்கள். முன்னர் நடந்த நிஜ நிகழ்வுகளும், ஸ்வீட்டில் இருப்பது என்ன என்று யோசித்து யோசித்து கடை முதலாளி, சமையல்காரர், விற்பவர், சாப்பிட்டவர், விமர்சனம் எழுதினவன் என்று போட்டுத் தாக்குகிறீர்கள். தாக்குவது என்று தீர்மானித்தபின் நாசூக்காவது மண்ணாவது. இருக்கவே இருக்கிறது வார்த்தைகள். வந்து விழுகின்றன உங்களுக்கென்றே....

எங்களுக்கு ஒன்றுமே தெரிவதில்லை.

நாங்கள் சொல்வது பொதுப்புத்தி. அதாவது அதிகமான பேரால் ஏற்றுக் கொள்ளப்படுவது பொதுப்புத்தி. அதை எதிர்ப்பதே அறிவுஜீவித் தனம். அது எங்களுக்கு வாய்க்கவில்லை. இதையே வேறுவிதமாய் சொல்வதானால் எல்லாவற்றிலும் நேர்சிந்தனையை மட்டுமே நினைத்துக் கொண்டிருப்பது பொதுப்புத்தி. இல்லை அதில் எதாவது விஷம் இருக்கிறதா என்றும் நான் பார்ப்பேன் என்பது உங்கள் இசங்களும், தத்துவார்த்த சிந்தனைகளும் உங்களுக்குச் சொல்லிக் கொடுத்த அல்லது தானாய் உங்களுக்கு அமைந்த வரம். எங்களுக்கு அது கைகூடி வரவில்லை. நாங்கள் சாபம் பெற்றவர்கள்.

ன்னுதான் சொல்றார்

இப்ப என்ன பண்னனுங்கிற

அடப்போங்கன்ன, ஸ்வீட்டுக்குள்ள விஷம் இருந்தா கண்டுக்கக்கூடாதுன்னு இவங்களாம் சொல்றாங்கள்ள.. நம்ம டேபிள் சங்கர் இதே தொழில் இருக்கிறவருண்ணா... அவர் என்ன சொல்றார். விஷம் இருக்கான்னு ஏன் பாக்குறீங்க. இருந்தா என்ன, கலர் நல்லாயிருந்தா, சுத்தியிருக்கிற அலுமினிய பேப்பர் நல்லாயிருந்த ஸ்வீட்டை சாப்பிட சொல்றார்..... படகுகாரர் எவ்வளவு பெரிய ஆள் தெரியுமா... கிட்டத்தட்ட ஐநூறு பேர் அவர் படகுல போறாங்க (இன்றைய கணக்கு படி 469) ... அவர் கூட என்ன சொல்றார் பாருங்க.... ஸ்வீட்டில விஷம் இருந்தா பரவாயில்லை. நாம ஸ்வீட் வாங்க கடை முன்னால வண்டிய பார்க் பண்ணும் போது அதை யாரும் இடிக்காதது தான் முக்கியமுன்னு சொல்றார்..... பிறகு நீங்க ஏன் வருத்தப்படுறீங்க.... ஸ்வீட் இனிப்பாக இருக்கான்னு பாக்குறது நேர் சிந்தனை / பொது புத்திங்கீறார். அதில் விஷம் இருக்கான்னு பாக்குறது தப்புங்கிறார்.....பிறகு என்ன...பொது புத்திபடியே செய்ய வேண்டியது தான். சாப்பிட்டுட்டு கொஞ்சம் கொஞ்சமா எல்லாரும் அவஸ்தைப்பட வேண்டியது தான்

-oOo-

மிட்டாய் கடையில் மிட்டாய்களின் மேல் ஈ வரக்கூடாது என்று

பூச்சி மருந்து அடிப்பது நகைச்சுவை நடிகர் என்றால் அது காமெடி.
ஆனால் அதையே ஒரு கதாநாயகன் செய்வது........ என்னத்த சொல்ல .....

-oOo-

பழம் தருபவன் நண்பன்
விஷம் தருபவன் எதிரி
பழத்தினுள் விஷத்தை மறைத்து தருபவன்...... துரோகி
பழம் என்று காய்ந்து போன கொட்டையை ஏமாற்றி விற்பது ... மோசடி / பிராடு (ஹி ஹி ஹி இந்த கடைசி பாய்ண்ட் மட்டும் வேற விஷயம்.... புரியவில்லை என்றால் அதிகம் குழம்பிக்கொள்ளாதீர்கள்)

-oOo-
2004ல் ரஜினி ஒரு படத்திற்கு பூஜை போட்டு விளம்பரம் தந்தார். வார்த்தைகள் ஞாபகம் இல்லை. ஆனால் கிட்டத்தட்ட - என் எதிரிகளை நான் பார்த்துக்கொள்கிறேன். என் நண்பர்களிடமிருந்து என்னை காப்பாற்று. அதே பாணியில் சொல்வதானால்

விஷம் தருபவர்களை நாங்கள் பார்த்துக்கொள்கிறேன்.
பழம் தருபவர்களிடமிருந்தும், (உள்ளே விஷம் இருக்கிறாதா என்று) பழத்தை ஆராயக்கூடாது என்று சொல்பவர்களிடமிருந்தும், இறைவா, எங்களை காப்பாற்று

செயற்கை கால் (ஜெய்ப்பூர் கால்), ஊன்றுகோல்கள் இலவச விநியோகம்

2009-09-26T06:31:00.000+05:30

மீள்பதிவு, மின்னஞ்சல் மூலம் இந்த தகவல் பலரையும் சென்றடையுமாறு பரவலாக்க வேண்டுகிறேன்

தொடர்பதிவு - A முதல் Z வரை !!

2009-09-14T07:00:00.000+05:30

தமிழ்வலையுலகில் அரசியல், சினிமா, கதை என்று பலதுறைகளிலும் கலக்கும் ஆல்ரவுண்டர் “கனவுகளே” மருத்துவர்.சுரேஷ் அவர்களின் அழைப்பை தொடர்ந்து...

The Rules:
1. Link the person who tagged you.
2. Post the rules on your blog.
3. Share the ABC s of you.
4. Tag 4 people at the end of your post by linking to their blogs.
5. Let the 4 tagged people know that they have been tagged by leaving a comment on their website.
6. Do not tag the same person repeatedly but try to tag different people, so that there is a big network of bloggers doing this tag.

விதிமுறைகள்

உங்களை அழைத்தவரின் பதிவிற்கு சுட்டி அளிக்கவும்
விதிகளை உங்கள் பதிவில் எழுதுங்கள்
உங்களை பற்றி கூறுங்கள்
நான்கு (அல்லது அதிகமாகவோ) வலைப்பதிவர்களை அழையுங்கள்
அவர்களை அழைத்தை அவர்களுக்கு தெரியப்படுத்துங்கள்
ஏற்கனவே அழைக்கப்ட்டவர்களை மீண்டும் அழைப்பதை தவிர்த்து புதியவர்களை அழைக்க பாருங்கள்

The Tag:

A – Available/Single? : Not available :) :)
B – Best friend? : பலர் இருக்கிறார்கள்
C – Cake or Pie?: கேக் தான். பை என்றால் என்ன ?? 22/7ஐ சாப்பிட முடியுமா ??
D – Drink of choice? : குளிர்ந்த தண்ணீர் / இளநீர்.
E – Essential item you use every day? : பேனா, பந்தம்
F – Favorite color? : பச்சை
G – Gummy Bears Or Worms?: என்னது ??
H – Hometown? : தூத்துக்குடி
I - Internetல் அதிகம் பார்ப்பது - மின்னஞ்சல்
J – January or February? : தமிழ் வருடப்பிறப்பு சனவரிதான்
K – Kids & their names?: தகவல் பாதுகாப்பு !!
L – Life is incomplete without?: பிரச்சனைகள் :)
M – Marriage date ? : தகவல் பாதுகாப்பு !!
N – Number of siblings ? : தகவல் பாதுகாப்பு !!
O – Oranges or Apples ? : ஆரஞ்சுதான்
P – Phobias / Fears ? : Psemaphobia. பொய்யை பார்த்து பயம்
Q – Quote for today ? : Winning is important to me, but what brings me real joy is the experience of being fully engaged in whatever I'm doing.
R – Reason to smile? : மன இறுக்கத்தை குறைத்து கொள்ள
S – Season ? : குளிர்காலம்
T – Tag 4 People?

சே.வேங்கடசுப்ரமணியன் http://thogamalaiphc.blogspot.com/
குசும்பன் http://kusumbuonly.blogspot.com/
எம்.எம்.அப்துல்லா http://mmabdulla.blogspot.com/
DR.ராம் http://sakalakaladr.blogspot.com/

U – Unknown fact about me ? : அது சொன்னா அது known fact ஆகிவிடுமா
V – Vegetable you don't like ? : யோசித்து பார்த்தால் ஒன்றும் இல்லை
W – Worst habit ? : சோம்பல்
X – X-rays you've had ? : எண்ணிக்கை ஞாபகம் இல்லை !! வாரம் குறைந்தது 150 :) :)
Y – Your favorite food ? :

இது தான் பிடித்தது என்று ஒரு உணவு மட்டும் கிடையாது. சாம்பாரும் பொரித்த மீனும், ரசமும் மாசி கட்லட்டும், சிக்கன் பிரியாணி, மோர் குழம்பும் முட்டை பொரியலும், தயிர்சாதமும் எலுமிச்சை ஊறுகாயும், மற்றும் கீரை, கருவாடு, முட்டை (பாதிஅவித்தது அல்லது ஆப் பாயில்) என்று பல உணவுகள் இருப்பதால் ஒன்றை மட்டும் குறிப்பிட இயலவில்லை

Z - பிடித்த Zen தத்துவம் ஒன்று - புல்லின் இதழையும் புத்தராக பாவித்துக்கொள்

Iம் Zம் என்ன பாவம் செய்தது ?? ஏன் அந்த இரு எழுத்துக்களையும் விட்டு விட்டார்கள். நான் தான் சேர்த்துள்ளேன்

Influenza இன்ஃப்ளுயென்சா A (H1N1) உலகம் பரவு நோய் - பறவை காய்ச்சல் / பன்றி காய்ச்சல் / Swine Flu Bird Flu

2009-09-06T13:57:00.001+05:30

இன்ஃப்ளுயென்சா A (H1N1) உலகம் பரவு நோய் - பறவை காய்ச்சல் / பன்றி காய்ச்சல் / பற்றி நான் எழுதிய 64 பக்க புத்தகம் இது

இந்த புத்தகம் குறித்து மேலும் அறியஇங்கே சுட்டவும்

28 மே 2009, கிழக்கு மொட்டைமாடிக் கூட்டத்தில் “இன்ஃப்ளுயென்சா A (H1N1) உலகம் பரவு நோய்” (Influenza A(H1N1) Pandemic) என்ற தலைப்பில் எனது உரையும் அதன் பின்னர் தொடர்ந்த கலந்துரையாடலும் ஒலிவடிவில் இங்கே கேட்கலாம்.

மரு.யெ.ச.ராஜசேகர ரெட்டி - அஞ்சலி - மருத்துவத்துறையில் இரு முக்கிய சாதனைகள்

2009-09-03T21:49:00.003+05:30

மருத்துவத்துறையில் நாம் வெகுவாக முன்னேறியுள்ளோம்

அமெரிக்க அதிபருக்கு இதயத்தில் அடைப்பு ஏற்பட்டால் கிடைக்கும் மருத்துவ சிகிச்சை சென்னையில் (காசு கொடுத்தால்) கிடைக்கிறது !!

காத்ரீனா புயலால் பாதிக்கப்பட்டவர்களுக்கு கிடைக்காத பொது சுகாதார மேலாண்மை கூட நாகை மக்களுக்கு சுனாமிக்கு பின் (காசு கொடுக்காமலே) கிடைத்தது.

ஆனால்

அமெரிக்காவில் ஒரு சாதாரண மரம் வெட்டும் தொழிலாளி மரம் வெட்டிக்கொண்டிருந்த போது அவர் மீது மரம் விழுந்து விட்டது என்றால் அவருக்கு கிடைக்கும் அவசர சிகிச்சை - உடனடியாக ஒரு பிணியாளர் ஊர்தி (சீருந்து அல்லது உலங்கு வானூர்தி - ஹெலிகாப்டர்), பிணியாளர் ஊர்தியிலேயே சுவாச சிகிச்சை, இரத்தம் அல்லது பிற திரவங்கள் ஏற்றுதல் போன்றவை இங்கு (பாரதத்தில்) ஒரு சாலை விபத்தில் சிக்கிக்கொண்டால் அம்பானிக்கு கூட கிடைத்ததில்லை :( :( :(

முதல்வரோ, பிரதமரோ வந்தால் அங்கு பிணியாளர் ஊர்தி (என்ற பெயருடன் வாகனம்) ஒன்று இருக்கும். ஆனால் அந்த வாகனத்திற்கும் பிற வாகனகங்ளுக்கும் வெளியில் எழுதியிருக்கும் பெயரை தவிர வேறு எந்த வித்தியாசமும் கிடையாது

இது நாள் வரை நாம் பிணியாளர் ஊர்திகளை ஒரு “வாகனமாகத்தான்” (நோயாளியை ஒரு இடத்திலிருந்து வேறு இடத்திற்கு மாற்ற) பயன்படுத்தினோமே தவிர பிணியாளர் ஊர்தியில் சிகிச்சை என்பது கிடையாது

மிக சமீபகாலங்களில் தான் சில தனியார் மருத்துவமனைகளில் முழு வசதிகளுடன் பிணியாளர் ஊர்திகள் வாங்கப்பட்டன.

-oOo-

பிணியாளர் ஊர்தியில் அவசர சிகிச்சைக்கு தேவை யான கருவிகள் இருந்தால் போதுமா, அதை யார் உபயோகிப்பார் ? ஓட்டுனரா....

துரதிருஷ்டவசமாக இது நாள் வரை பிணியாளர் ஊர்தியில் பயிற்சி பெற்றவர் கிடையாது.

மேலே நாடுகளில் ஈ.எம்.டி - எமர்ஜென்ஸி மெடிக்கல் டெக்னிசியன் - அவசர கால மருத்துவ நுட்பனர் என்று தனியாக நபர்கள் உண்டு,.

அவர்கள் முதலுதவியில் மட்டுமே பயிற்சி பெற்றிருப்பார்கள். நமது நாட்டில் இது நாள் வரை அப்படி கிடையாது.

ஒன்று ஒட்டுனர் மட்டுமே இருப்பார். அல்லது அவசர சிகிச்சை அளிக்க போதிய பயிற்சி இல்லாத எப்.என்.ஏ அல்லது எம்.என்.ஏ போன்றவர்கள் இருப்பார்கள். சில இடங்களில் செவிலியர் இருப்பார்கள் (செவிலியரின் பணி மருத்துவமனையிலும் தேவைப்பட்டால் அன்று அவரி பிணியாளர் ஊர்தியில் இருக்க மாட்டார்). அன்று விபத்தில் சிக்குபவர் பாடு திண்டாட்டம் தான்.

-oOo-

இந்த நிலையை மாற்றி முதன் முதலில் ஆந்திராவில் எம்ரி நிறுவனத்தின் மூலம் அவசர கால பிணியாளர் ஊர்தி திட்டத்தை அறிமுகப்படுத்தியவர் ராஜசேகர ரெட்டிதான்

அவர் அறிமுகப்படுத்திய திட்டத்தின் சிறப்புகள்

1. முற்றிலும் இலவசம்
2. ஒரே எண் 108 - எந்த தொலைபேசியிலிருந்தும் தொடர்பு கொள்ளலாம் (நடைமுறைபடுத்தப்பட்ட பின்)
3. பிணியாளர் ஊர்தியிலேயே வைத்தியம் ஆரம்பம்
4. கட்டுப்பாட்டு அறையில் உள்ள மருத்துவரிடம் (ஊர்தி பணியாளர்) சந்தேகம் கேட்கலாம்.
5. மாநிலம் முழுவதும் ஒரே கட்டுப்பாட்டு அறை மூலம் கண்காணிக்கப்படும்
6. ஒட்டுனர் மற்றும் மருத்துவ நுட்பனருக்கு பணியில் சேரும் பொழுது பயிற்சி மட்டும் அதன் பின்னும் தொடர்ந்து பயிற்சி (6 மாதங்களுக்கு ஒரு முறை அல்லது வருடம் ஒரு முறை)
7. ஒரு ஓட்டுனரோ அல்லது மருத்துவ நுட்பனரோ விடுப்பு அல்லது வார ஓய்வு அல்லது பயிற்சியில் இருந்தாலும் ஊர்தி சேவை பிற பணியாளர்களை வைத்து தொடர்ந்து நடக்கும்

-oOo-

அது மட்டுமல்ல, அமெரிக்க அதிபருக்கு இதயத்தில் அடைப்பு ஏற்பட்டால் கிடைக்கும் மருத்துவ சிகிச்சை சென்னையில் (காசு கொடுத்தால்) கிடைக்கிறது என்று எழுதியிருந்தேன் அல்லவா

அதை மாற்றியவர் அவர்தான் !!

ஆரோக்யஸ்ரீ என்ற திட்டத்தின் மூலம் புற்றுநோய், நரம்பு தொடர்பான நோய்கள், இதய நோய்கள், சிறுநீரக நோய்கள், தீப்புண்கள், விபத்து ஆகிய நோய்களுக்கு இலவச சிகிச்சை கிடைக்க செய்து, மருத்துவத்துறையில் மலர்ச்சியை ஏற்படுத்தியதும் அவர்தான்

-oOo-

கல்வி என்பது பணக்காரர்களுக்கும், மேல்தட்டு மக்களுக்கும் மட்டும் உரித்தான சொத்து, என்பதை காமராஜர் - எம்.ஜி.ஆரின் சத்துணவு திட்டம் மாற்றி, கல்வி என்பது அனைவருக்கும் பொதுவானது என்று மலர்ச்சியை ஏற்படுத்தியதை போல், ஏழை என்பதால் ஒருவருக்கு கல்வி கிடைக்காத நிலை கிடையாது என்ற நிலை போல்
ஏழை என்பதால் ஒருவனுக்கு உடல்நலம் மறுக்கப்படாது, கிடைக்காமல் இருக்காது, சுகாதாரம், மற்றும் தரமான சிகிச்சை என்பது பணக்காரர்களுக்கு மட்டும் உரித்தான் சொத்து அல்ல, அது அனைவருக்கும் பொதுவானது என்ற நிலையை ஏற்படுத்தியவர் ராஜசேகர ரெட்டி

-oOo-

அவர் அறிமுகப்படுத்திய இரு நல்ல திட்டங்களையும், உடனடியாக ஆராய்ந்து தமிழகத்தில் சுகாதார துறையில் கொண்டு வந்து விட்டனர்

-oOo-

அஞ்சலி :( :(

மென்பொருள் நிறுவன ஊழியர்களை ஏமாற்றும் கும்பல்

2009-09-01T00:25:00.000+05:30

மென்பொருள் நிறுவன ஊழியர்களை ஏமாற்றுவது சுலபம் (காசு நிறைய வைத்திருக்கிறார்கள் செலவழிக்க தயங்க மாட்டார்கள்) என்று நினைத்து இப்பொழுது அடுத்தவரை ஏமாற்றி பிழைப்பு நடத்துபவர்கள் அனைவரும் மென்பொருள் நிறுவனங்களை குறி வைத்திருக்கிறார்கள்

ஊடகங்களில் சில விஷயங்கள் வெளிவந்து நீங்கள் அறிந்திருக்கலாம்.

இது மற்றொரு சம்பவம்

சென்னையில் உள்ள ஒரு மென்பொருள் நிறுவனத்தில் அலுவலகத்திற்கு சென்ற சில நபர்கள், தாங்கள் -----------ல் இருந்து வருவதாகவும், ஊழியர்கள் அனைவருக்கும் இலவசமாக மலிவு விலையில் மொத்தமாக இதய பரிசோதனை செய்ய தயாராக இருப்பதாகவும், இதற்காக விடுப்பு எடுக்க தேவை யில்லை என்றும் அலுவலகத்திலேயே பரிசோதனை செய்யலாம் என்றும், ஒரு நபருக்கு 500 ரூபாய் மட்டும்தான் என்றும், 5 நிமிடங்கள் கூட ஆகாது, இரத்தம் எடுக்க தேவையில்லை, உடனிருக்கும் மருத்துவர் முடிவுகளை உடனடியாக கூறி விடுவார் என்றும் கூறியதில் அங்குள்ள 2000 நபர்களில் 1500க்கும் மேற்பட்டவர்கள் உடனடியாக சம்மதித்து விட்டதாக தெரிகிறது

அவர்கள் செய்த பரிசோதனை ஈ.சி.ஜி,

பொதுவாக ஒருவருக்கு ஈ.சி.ஜி பரிசோதனை 12 லீடுகளில் செய்யப்படுகிறது. அப்பொழுது தான் அதை முழுமையான சோதனையாக நம்பலாம். ஒரு லீடு மட்டும் என்றால் அது முழுமையான சோதனை ஆகாது !!

உதாரணமாக நீங்கள் வெளியூர் செல்ல வேண்டுமென்றால் வாகனத்தின் நான்கு சக்கரங்களிலும் அதே போல் மாற்றுச் சக்கரத்திலும் (தமிழ் இணையப் பல்கலைக்கழக அகரமுதலியில் இந்த ஆங்கில சொல்லின் தமிழ் பதங்களை பார்த்த பொழுது அதிர்ந்தது நிஜம். ஆங்கிலத்தில் இப்படி இருப்பதாக தெரியவில்லை) காற்று இருக்கிறதா என்று பார்ப்பீர்களா அல்லது ஒரே ஒரு சக்கரத்தை மட்டும் சோதிப்பீர்களா

ஒரே ஒரு சக்கரத்தை மட்டும் சோதித்து மீதி சக்கரங்களை சோதிக்காமல் போனால் என்னவாகும் :) :) :)

ஆனால் இதய சோதனை என்ற பெயரில் அங்கு ஒரே ஒரு லீடில் மட்டுமே ஈ.சி.ஜி எடுக்கப்பட்டு 500 ரூபாய் வாங்கப்பட்டுள்ளது.

ஒரு நபருக்கு சோதனை செய்ய ஆகும் நேரம் மற்றும் நுகர்பொருட்களை வைத்து (தாள், பாகு போன்றவை) போன்றவைகளை வைத்து 12 பேர்களுக்கு சோதனை முடித்தவர்களின் புத்திசாலித்தனத்தை என்ன வென்பது

அது மட்டுமல்ல, அந்த ஒரே ஒரு லீடை மாத்திரம் வைத்துக்கொண்டு, பெரும்பாலானவர்களிடம் நீங்கள் “நார்மல்” என்று கூறிவிட்டார்கள்.

அதில் ஒருவர் என்னிடம் பேச்சுவாக்கில் அந்த ஈ.சி.ஜியை காட்டியபோது தான் மீதி 11 லீடுகள் எங்கு என்று கேட்டேன். அவர் இது மட்டும்தான் அளிக்கப்பட்டது என்றார். பரிசோதனை செய்ததாக கூறப்பட்ட நிறுவனத்தில் இருக்கும் எனக்கு தெரிந்த ஒருவரை சந்திக்கும் பொழுது இது குறித்து கேட்டால் நாங்கள் அப்படி சோதிப்பது இல்லை. இது போல் பலரும் எங்களிடம் கேட்கிறார்கள். பழைய சோதனை முடிவுகளை கொண்டு வந்து ”உங்களிடம் எடுத்தது ” என்று கூறும் பொழுது தவறாக கூறுகிறார்கள் என்று நினைத்தோம். ஆனால் இது மோசடி போல் உள்ளது என்று நொந்து விட்டார்

இதய சோதனை என்பது ஈ.சி.ஜி மட்டும் அல்ல. அதாவது நீங்கள் வெளியூர் கிளம்பும் பொழுது 5 சக்கரங்களிலும் காற்று இருக்கிறதா என்று மட்டுமா சோதிப்பீர்கள். பெட்ரோல் இருக்கிறதா, மின்கலம் சரியாக இருக்கிறதா என்றெல்லாம் பார்ப்பீர்கள் அல்லவா, அது போலத்தான் இதய சோதனை என்றால் ஈ.சி.ஜி, டிரட்மில், எக்கோ, இரத்த சோதனைகள் என்று பல இருக்கின்றன

ஒரே ஒரு லீடை மட்டும் வைத்துக்கொண்டு நார்மல் என்று கூறுவது அயோக்கியத்தனம்

இதில் பாதகமான விஷயங்கள்

1. இது போன்ற போலிகளை நம்பி பலர் தாங்கள் ஆரோக்கியமாக இருப்பதாக தவறாக நினைக்க வாய்ப்பு உள்ளது

2. போலிகள் உபயோகித்த நிறுவன பெயரை கொண்ட நிறுவனத்திற்கு கெட்ட பெயர்

3. பண விரயம்

4. நேர விரயம்

முக்கியமான செய்தி
இது போல் “சோதிக்கிறேன்” என்று யாராவது உங்கள் நிறுவனத்திற்கு வந்தால் உஷாராக இருங்கள்.

பின்குறிப்பு 1:
1500 x ரூபாய் 500 = ரூபாய் 7,50,000
அதில் அவர்களுக்கு செலவு 30,000 கூட இருக்காது
மோசடி செய்தவர்களுக்கு கண்டிப்பாக 7 லட்சம் லாபம் தான்

பின்குறிப்பு 2:
இது போல் நீங்கள் ஏமாற்றப்பட்டிருந்தால் பின்னுட்டத்தில் தெரிவிக்கவும் :) :) :) (அனானியாக கூட தெரிவிக்கலாம்)

பிருத்வி சம்புக்தாவை இஸ்துகினு பூட்டான் / நூட்டன் பூமி புட்ச்சு இயிக்கும் போர்ச கண்டுக்கினார் - சென்னை தமிழில் பள்ளி பாட நூல்கள் எழுத வேண்டிய அவசியம்

2009-08-29T17:24:00.001+05:30

சென்னை தமிழ் கற்பது பாவச்செயலா

சிறிது சிந்தித்து பார்த்தால் தமிழர்கள் அனைவரும் சென்னைக்கு வரும் அவசியம் இருக்கிறது.

உறவினர்கள் / நண்பர்கள் திருமணம், வேலை, வியாபாரம் என்று ஏதாவது காரணத்திற்காக சென்னைக்கு வருவது அவசியமே

அது மட்டுமல்ல, அரசு வேலையில் சேர வேண்டுமென்றால் சென்னைக்கு வரவேண்டியது அவசியம். தலைமை செயலகத்தில் மனு அளிக்க வேண்டுமென்றாலும் சென்னைக்கு வர வேண்டும்

திரைப்பட கதாநாயகன் ஆக விரும்புபவர்கள், திரைப்பட இயக்குனராக விரும்புபவர்கள், பத்திரிகை நடத்த விரும்புபவர்கள், பத்திரிகைகளில் எழுதுபவர்கள், என்று பல தரப்பட்ட மக்களும் சென்னைக்கு வருவது அவசியம்

இது மட்டுமல்ல, பல விளையாட்டு போட்டிகளில் பங்குபெறுபவர்களும் சென்னைக்கு வர வேண்டிய கட்டாயம் இருக்கிறது

பணிநிமிர்த்தமாகவோ அல்லது சுற்றுலா போன்ற இதர காரணங்களுக்காகவோ தன் சொந்த ஊரை தாண்டி சென்னை செல்லும், தாம்பரத்தில் இருக்கும் மேம்பாலத்தை தாண்டிச்செல்லும் ஒருவர் சென்னைத்தமிழ் தெரியாத போது தான் அனுபவிக்கும் சிரமங்களை சொல்லித்தெரிய வேண்டியதில்லை.

சென்னைக்கு முதலில் வந்த போது நான் அனுபவித்திருக்கிறேன். தாம்பரத்தை தாண்டி வந்து விட்டால், சென்னைத்தமிழ் மட்டுமே மொழியாக இருக்கிறது. சென்னைத்தமிழ் என்ற ஒரு மொழி பேச தெரிந்தால் சென்னை முழுவதும் சிரமமின்றி தம் தேவையை நிறைவேற்றிக்கொள்ளலாம்.

சென்னையில் பெரும்பாலானோர் பேச்சு மொழியாக கொண்டிருக்கும் மொழியை சென்னைக்கு வந்து போக வேண்டிய அவசியம் இருக்கும்அனைவரும் பேச கற்றுகொள்ளுதல், அவரவர் வாழ்வில் நன்மைபயக்கும்.

நம் அண்டை மாநிலத்தவர் எப்போதோ இதை ஏற்றுக்கொண்டு விட்டனர் என்பது குறிப்பிடத்தக்கது.

உலகப் பொது மொழியான ஆங்கிலத்தையே கற்கலாமே, சென்னைத்தமிழ் எதற்கு? என்ற வாதமும் கூடவே வருகிறது. ஆங்கிலம் கற்பதற்கு யார் தடை விதித்தார்கள்? தாராளமாக கற்கலாம். சர்வதேச தொடர்பில் தொழில் செய்பவர்களுக்கு கட்டாயம் ஆங்கிலம் தெரிந்திருக்க வேண்டும் என்பது போலவே, சென்னைக்கு வருபவர்களுக்கு, தொழில் தொடர்பு செய்பவர்களுக்கு சாமானியர்களோடு பேச சென்னைத்தமிழ் அவசியமாகிறது.

ஆனால் தமிழர்களில் எத்தனை பேருக்கு சென்னை தமிழ் தெரிகிறது.. மிக மிக குறைவே என்பது வருத்தப்படவேண்டிய விஷயம் அல்லவா

நம் அரசியல் வாதிகளை பாருங்கள். அவர்கள் குழந்தைகள் எல்லாரும் சென்னைத்தமிழ் நன்றாக பேசுகிறார்கள். ஆனால் மற்றவர்களை சென்னை தமிழ் படிக்கவிடாமல் ஒரு தலைமுறையே சென்னைக்கு வந்தால் கஷ்டப்பட வேண்டியுள்ளது

தாய் மொழி தவிர பிற மொழிகள் கற்றுக்கொள்வது தவறா? பாவச் செயலா? அட, என்னங்க… உலகமயமாக்கலின் பலன்களை அனுபவித்து வரும் இந்த காலத்திலும், கற்றலுக்கு தடைவிதிப்பது கட்டுப்பெட்டித்தனம் இல்லயா? கல்விக்கு ஏது எல்லை, கற்கும் சூழலும் வாய்ப்பும் இருப்பவன் கற்கட்டும், அதை தடுக்கக்கூடாது.

இதற்கெல்லாம் என்ன தீர்வு -- > பள்ளி பாடபுத்தகங்கள் அனைத்து சென்னைத்தமிழிலேயே எழுதப்பட வேண்டும்

அப்படி எழுதினால் அனைவரும் சென்னை தமிழ் நன்றாக கற்பார்கள். சென்னைக்கு ஒரு நாளோ இரு நாட்களோ வந்து போகும் போது கவலைப்படவேண்டியதில்லை !!

நான் சென்னைக்கு வந்த போது சென்னை தமிழ் தெரியாமல் கஷ்டப்பட்டேன்

அதனால் நான் அனுபவித்த கஷ்டத்தை யாரும் அனுபவிக்க கூடாது என்பதற்காகவே அனைவரும் சென்னை தமிழ் கற்க வேண்டும் என்று கூறுகிறேன் ; பாடப்புத்தகங்கள் அனைத்தும் சென்னை தமிழில் தான் எழுதப்பட வேண்டும் என்று வலியுருத்துகிறேன்

உதாரணமாக புவிஈர்ப்பு விசை என்பதற்கு பதிலாக “பூமி புட்சு இய்க்கும் போர்ஸ்” என்று தான் அறிவியல் பாட நூல்களில் எழுதப்பட வேண்டும்

அசோகர் ரோட்டுக்கு அந்தாண்ட மரம் நட்டுக்கினா என்று சரித்திரப் பாடப்புத்தகங்களில் எழுதப்பட வேண்டும்

இப்படி எல்லாம் பாடப்புத்தகங்களில் மாற்றுவதன் மூலம்

தலைமைச்செயலகத்தில் வேலை செய்ய விரும்புபவர்களுக்கும், திரைப்படத்தில் நடிக்க, திரைப்ப்டங்களை இயக்க, வருபவர்களும் சென்னை வந்தால் கவலைப்பட தேவையில்லை

ஒரேயடிகாக சென்னைத்தமிழை ஒதுக்கி தள்ளாமல் பள்ளி பாடப்புத்தகங்களை சென்னைத்தமிழில் எழுதுவதில் உள்ள சாதக பாதகங்கள் அலசப்பட வேண்டும்

சென்னை தமிழை படிக்கவிடாமல் ஒரு தலைமுறையே பாழ் பட்டு கிடக்கிறதே.. ஐயகோ.. இந்த கொடுமையை நான் எங்கே போய் சொல்வேன்

சென்னைக்கு ஒரு முறையாவது வந்திருக்கும் யாரிடம் வேண்டுமானாலும் கேட்டுப்பாருங்கள் சென்னை தமிழ் தேவை என்று கூறுவார்கள்

அது தெரியாததால் பெற்ற சிரமங்களையும் பட்டியலிடுவார்கள்

உங்களுக்கு சென்னையில் வேலை கிடைக்கிறது என்று வைத்துக்கொள்ளுங்கள். பள்ளியில் சென்னைத்தமிழை பாடமாக கற்காத உங்களுக்கு சென்னையில் எவ்வளவு சிரமங்கள்

நினைக்கவே பதறுகிறதே சார் !!

அது தான் சொல்கிறேன் : பிருத்வி சம்புக்தாவை இஸ்துகினு பூட்டான் என்றே பள்ளி வரலாற்று புத்தகங்களில் எழுதப்பட வேண்டும்

இந்த இடுகையை வாசித்து உங்களுக்கு முழுவதும் புரியவில்லை என்றால் பதிவர் பீர் அவர்களின் ஹிந்தி கற்பது பாவச்செயலா? என்ற இடுகையை வாசிக்கவும்

இந்த இடுகையை பாராட்ட விரும்பினால் கூடவே இதை விட அருமையாக எழுதப்பட்டிருக்கும் பதிவர் ரவியின் F இடுகையையும் பாராட்டுங்களேன்