അക്ഷരാശ്രമം

പഴം പോലുള്ള ചൊല്ല് വിശേഷങ്ങള്‍

2011-03-15T23:17:00.000-07:00

വാക്യ വിശേഷങ്ങള്‍

2011-03-02T07:49:00.000-08:00

വാക്യ വിശേഷങ്ങള്‍

ഏതെങ്കിലും ഒരു ആശയത്തെ പൂര്‍ണമായി പ്രകാശിപ്പിക്കാന്‍ പര്യാപ്തമായ ഘടകമാണ് വാക്യങ്ങള്‍ .

പദങ്ങളുടെ അര്‍ത്ഥ പൂര്‍ണമായ സംയോജനം ആണ് വാക്കുകളുടെ സൃഷ്ടിക്കു കാരണമാവുന്നത് .

ചെറുതും വലുതും ആയ പദങ്ങളുടെ പരസ്പര ബന്ധവും നാമം ,ക്രിയ ,വിശേഷണ -വിശേഷങ്ങള്‍

എന്നിവ തമ്മിലും ഉള്ള ബന്ധത്തെ വ്യാകരണ ശാസ്ത്രം "ആകാംക്ഷ " എന്നാണ് പേരിട്ടിരിക്കുന്നത് .

ആകാംക്ഷാ പൂര്‍ത്തി വരത്തക്കവണ്ണം ഘടകങ്ങളെ എല്ലാം വേണ്ട വിധം വിന്യസിക്കുമ്പോള്‍

വാക്യം രൂപം കൊള്ളുകയും പൂര്‍ണമായ ആശയം രൂപം കൈവരിക്കുകയും ചെയ്യും.

ഏതൊരു വാക്യത്തിലും രണ്ടു മുഖ്യ ഘടകങ്ങള്‍ അടങ്ങിയിട്ടുണ്ടാവും .വക്താവ് എന്തിനെ പറ്റി പറയുന്നുവോ

--അതാണ്‌ ഒരു ഘടകം ( ആഖ്യ ).. എന്ത് പറയുന്നുവോ അത് രണ്ടാമത്തെ ഘടകം . (ആഖ്യാതം )

ഒന്നുകൂടി വിശദമാക്കിയാല്‍...ഏതെങ്കിലും ഒന്ന് ഒരു സ്ഥിതിയില്‍ ഇരിക്കുന്നുവെന്നോ , ഒരു പ്രവൃത്തി ചെയ്യുന്നുവെന്നോ

പറയുമ്പോഴാണ് ഒരു വാക്യം പൂര്‍ണമാവുന്നത്‌ .

ചൂര്‍ണിക ( കേവല വാക്യം )

സങ്കീര്‍ണ വാക്യം

അംഗാംഗി വാക്യങ്ങള്‍

മഹാ വാക്യം

ഗര്‍ഭ വാക്യം

കാരക വാക്യങ്ങള്‍ എന്നിങ്ങനെ വാക്യവിഭാഗങ്ങള്‍ പലതുണ്ട് . (വിശദമായ വായനക്ക് ആധുനിക

മലയാള വ്യാകരണം ..കേരള ഭാഷാ ഇന്‍സ്റ്റിറ്റ്യൂട്ട് കാണുക )

മലയാളത്തിലെ വാക്യങ്ങള്‍ സാധാരണയായി ആരംഭിക്കുന്നത് ആഖ്യയില്‍ ആയിരിക്കും .

അല്ലെങ്കില്‍ ആഖ്യ

വാക്യത്തിന്‍റെ ആദ്യ ഭാഗത്തില്‍ വരികയെങ്കിലും ചെയ്യും . വാക്യം അവസാനിക്കുന്നത് മിക്കപ്പോഴും ആഖ്യാതത്തിലാണ് . കര്‍മമോ ,മറ്റേതെങ്കിലും കാരകത്തെ കുറിക്കുന്ന നാമമോ വാക്യത്തില്‍ ഉണ്ടെങ്കില്‍ അത് ആഖ്യക്കും ആഖ്യാതത്തിനും ഇടയ്ക്ക് ,പലപ്പോഴും ആഖ്യാതത്തിനു തൊട്ടുമുന്പ് പ്രയോഗിക്കപ്പെടുന്നു .

അതായത് ആഖ്യ /കര്‍മം (മറ്റു കാരകങ്ങള്‍ ) /ആഖ്യാതം എന്ന ക്രമത്തിലാവും മിക്കവാറും മലയാളത്തിലെ സാമാന്യമായ പദക്രമം.

(തുടരും )

sundar raj sundar

2011-02-15T00:25:00.000-08:00

ഒരു കുത്ത് കേസ്

ചിഹ്നനം ( രണ്ട്‌)

പൂര്‍ണവിരാമം അഥവാ ബിന്ദുവിനെയാണ് അടുപ്പമുള്ളവര്‍ കുത്ത് എന്ന് വിളിക്കു ന്നത്‌.

           ൧)   എല്ലാ പ്രധാന വാക്യങ്ങളു ടെയും ഒടുവില്‍ ഈ അടയാളം    ഉണ്ടാവണം.
   വാക്യാന്തത്തില്‍ ഈ പ്രയോഗം
   നിശ്ശേഷം നിര്‍ത്തണം എന്ന് സൂചിപ്പിക്കുന്നു.
ഉദാ. ഏവര്‍ക്കും എന്‍റെ ഹൃദയം നിറഞ്ഞ നബിദിനാശംസകള്‍.

൨) ചുരുക്കെഴുത്തുകള്‍ക്ക് ശേഷം ബിന്ദു നിര്‍ബന്ധം

   ഉദാ.
                                            മി.( മിസ്റ്റര്‍ )
                                         ഡോ.(ഡോക്റ്റര്‍ )
                                         ക്രി.വി. (ക്രിയാവിശേഷണം)
                                      കേ.പാ. (കേരള പാണിനീയം)
                                          ശ്രീ. (ശ്രീമാന്‍)
                                   സ്വ. ലേ. (സ്വന്തം ലേഖകന്‍ )
                                        കി. മീ. (കിലോ മീറ്റര്‍ )

൩) രൂപയും പൈസയും ദശാംശ ഗുണിതത്തിന് ഉപയോഗിച്ചിരിക്കുന്നതിനാല്‍ പൈസക്ക് മുന്‍പില്‍
പൂര്‍ണ വിരാമം ചേര്‍ക്കാറുണ്ട്.
ഉദാ. 5 .10 , 9 .99

൩) ഗവേഷണ/ നിയമ പ്രബന്ധ ങ്ങള്‍ പോലുള്ളവയില്‍ അദ്ധ്യായം , ശീ ര്‍ഷകം , ഉപ ശീ ര്‍ഷകം എന്നിവ വേര്‍തിരിക്കാന്‍
ബിന്ദു ഉപയോഗിക്കാം
ഉദാ. കേ.ഇ ആര്‍. 8 . 6 .5 (എട്ടാം അദ്ധ്യായം, ആറാം ശീ ര്‍ഷകം , അഞ്ചാം ഉപശീ ര്‍ഷകം ....)

രണ്ടില്‍ രണ്ടും ശരി

2011-02-14T22:02:00.000-08:00

രണ്ടു രൂപങ്ങളില്‍ ഏതു രൂപത്തില്‍ എഴുതിയാലും ശരിയാവുന്ന ചില വാക്കുകള്‍ പരിചയപ്പെടുത്താന്‍ ആഗ്രഹിക്കുന്നു .

ശരിയായ രൂപം ..................ശരിയായ രൂപം

അങ്ങനെ.....................................അങ്ങിനെ.

എങ്ങനെ......................................എങ്ങിനെ

ഇങ്ങനെ........................................ഇങ്ങിനെ

അടക്ക .........................................അടയ്ക്ക

ആക്രമണം..................................അക്രമണം

അടിയന്തിരം .............................അടിയന്തരം

അടിയന്തിരാവസ്ഥ ................അടിയന്തരാവസ്ഥ

അപകര്‍ഷബോധം.................അപകര്‍ഷതാബോധം

ആഭിചാരം ...............................അഭിചാരം

അയല്‍പക്കം ..........................അയല്‍വക്കം

അറുകൊല ...............................അറുംകൊല

അപമാനം ..............................അവമാനം

അസല്‍ ......................................അസ്സല്‍ .

ആകെത്തുക .............................ആകത്തുക

ബാക്കി താല്‍പര്യമുള്ളവര്‍ കണ്ടെത്തുമല്ലോ....?

ചില്ലക്ഷരങ്ങള്‍ക്കു ശേഷമുള്ള ഇരട്ടിപ്പ്

2011-02-13T22:18:00.001-08:00

അടുത്ത കാലത്തായി ഭാഷാ പോഷിണിയിലും മാതൃഭൂമി വാരികയിലും പരമ്പരാഗത രൂപത്തില്‍ നിന്നും വിത്യസ്തമായി ചില വാക്കുകള്‍ കണ്ടപ്പോള്‍ ഈയുള്ളവന്‍ ചില മലയാള ഭാഷാ പണ്ഡിതരോട് അതിന്‍റെ കാരണം അന്വേഷിച്ചപ്പോള്‍ മനസിലായ ഒരു കാര്യം നിങ്ങളുമായി പങ്കു വെക്കുന്നു. ആദ്യം ഞാന്‍ കണ്ട വാക്കുകളും അവ പുതിയ രൂപത്തില്‍ എഴുതപ്പെടുന്ന രൂപവും കാണുക.

നിലവിലുള്ളവ------------------പുതിയ രൂപം

അപര്‍ണ്ണ-----------------------------അപര്‍ണ

അര്‍ബ്ബന്‍-----------------------------അര്‍ബന്‍

അര്‍ദ്ധം--------------------------------അര്‍ധം

അര്‍ത്ഥം-------------------------------അര്‍ഥം

ഊര്‍ജ്ജം -------------------------------ഊര്‍ജം

ഊര്‍മ്മിള -----------------------------ഊര്‍മിള

ഓര്‍മ്മ ----------------------------------ഓര്‍മ

വര്‍ണ്ണം ---------------------------------വര്‍ണം

വിദ്യാര്‍ത്ഥി --------------------------വിദ്യാര്‍ഥി

മര്‍ദ്ദം -------------------------------------മര്‍ദം

നര്‍മ്മം -----------------------------------നര്‍മം

സര്‍ഗ്ഗം ------------------------------------സര്‍ഗം

സ്വര്‍ഗ്ഗം ------------------------------------സ്വര്‍ഗം

സര്‍വ്വകലാശാല----------------------സര്‍വകലാശാല

സര്‍വ്വേ ------------------------------------സര്‍വേ

മാതൃകക്ക് വേണ്ടി ഞാന്‍ ഏതാനും വാക്കുകള്‍ പറഞ്ഞു എന്നു മാത്രം. കൂടുതല്‍ വാക്കുകള്‍ നിങ്ങള്‍ക്കു തന്നെ കണ്ടെത്താം .ചില്ലക്ഷരമായ 'ര്‍' നു ശേഷമുള്ള അക്ഷരം  പുതിയ രൂപത്തില്‍ ഇരട്ടിപ്പിച്ചിട്ടില്ല എന്ന് പുതിയതും പഴയതും    നിരീക്ഷിച്ചാല്‍ നിങ്ങള്‍ക്കു മനസിലാക്കാം.ഇക്കാര്യവുമായി ബന്ധപ്പെട്ട ഒരു നിയമം മനസിലായത്  ഇപ്രകാരമാണ്:

ചില്ലക്ഷരത്തിനു  ശേഷം ഖരാക്ഷരമാണങ്കില്‍  (ക ച ട ത പ) ആ അക്ഷരം   ഇരട്ടിപ്പിക്കണം . അതിഖരാക്ഷരങ്ങള്‍  (ഖ, ഛ, ഠ ,ഥ, ഫ), മൃദു അക്ഷരങ്ങള്‍ (ഗ, ജ, ഡ, ദ, ബ), ഘോഷ അക്ഷരങ്ങള്‍ (ഘ, ഝ, ഢ,ധ, ഭ), അനുനാസിക അക്ഷരങ്ങള്‍ (ങ, ഞ, ണ, ന, മ) എന്നിവയില്‍ ഏതെങ്കിലും ഒന്ന് വന്നാല്‍ ആ അക്ഷരത്തെ  ഇരട്ടിപ്പിക്കേണ്ടതില്ല. അതായത് പ്രാര്‍ത്ഥന എന്നും പ്രാര്‍ഥന എന്നും എഴുതാം എന്നര്‍ഥം.

വിമര്‍ശനങ്ങള്‍ ഉള്ള ഒരു നിയമം കൂടി ആണിത് എന്നും പറയാന്‍ ആഗ്രഹിക്കുന്നു .

തെറ്റാം നമുക്കീ തെറ്റുകളോട്.

2011-02-13T20:44:00.001-08:00

'വന്ജിക്കുക' എന്ന് ചിലരൊക്കെ എഴുതുന്നുണ്ട്. അത് ഗൂഗിളിന്റെ കുഴപ്പമാണോ നമ്മുടെ കുഴപ്പമാണോ എന്ന് ഒരു അഞ്ചു വട്ടമെങ്കിലും ചിന്തിക്കണം. വഞ്ചിയില്‍ കേറുമ്പോള്‍ സഞ്ചി കൂടെയുണ്ടെങ്കില്‍ സഞ്ചാരം കുറച്ചു പ്രയാസം സൃഷ്ടിക്കും. അല്ലെ?

'ത്രുപ്തന്‍' എന്ന് എഴുതിയാല്‍ വായിക്കുന്ന ഒരാള്‍ക്കും ഒരു തൃപ്തിയും തോന്നില്ല നമ്മോട്. നല്ല ആശയമുണ്ടായാലും നല്ല വിഷയമായാലും ഒരു സംതൃപ്തി യുണ്ടാവില്ല . വായനക്കാരെ തൃപ്തി പ്പെടുത്തിയാലെ അവര്‍ തൃപ്തിയോടെ വീണ്ടും വരൂ.. എന്ത് പറയുന്നു?

നല്ല വ്യക്തിത്വം ഉള്ള ഒരാള്‍ എന്ന് തോന്നി സംസാരിച്ചു തുടങ്ങി ഒടുവില്‍ പരിയുമ്പോള്‍ ചിലരെ കുറിച്ച് നമുക്ക് മറ്റൊരു അഭിപ്രായം തോന്നാറില്ലേ? അത് പോലെ തോന്നും 'വെക്തിത്വം' എന്ന് എഴുതിക്കാണുമ്പോള്‍. സംസാരത്തില്‍ മാത്രമല്ല എടുപ്പിലും നടപ്പിലും വാക്കിലും നോക്കിലും ഒക്കെ നമ്മുടെ വ്യക്തിത്വം പ്രകടമാകും. അത് പോലെ എഴുത്തിലും. അത് കൊണ്ട് എങ്ങിനെ എഴുതണമെന്നു വ്യക്തമായും നാം അറിഞ്ഞിരിക്കണം ഇപ്പോള്‍ എല്ലാ വ്യക്തികള്‍ക്കും കാര്യം വ്യക്തമായിരിക്കും എന്ന് കരുതുന്നു.

വായില്‍ തോന്നിയത് വിളിച്ചു പറയുന്നതിന് നാം പലപ്പോഴും ഉപയോഗിക്കുന്ന ഒരു പഴഞ്ചൊല്ലാണ്‌ വായില്‍ തോന്നുന്നത് കോതക്ക് പാട്ട് എന്നത്. ഇത് എഴുതുമ്പോള്‍ 'വാഴില്‍' എന്നായാല്‍ അങ്ങിനെ ഒരു അവയവം കോതക്ക് അല്ല ഒരു മനുഷ്യനും ഇല്ലാത്തത് കൊണ്ട് അങ്ങിനെ ഒരു പാട്ടിനെ കുറിച്ച് പറയുന്നത് അര്‍ത്ഥ ശൂന്യമാണ്. അല്ലെ?

സാഹചര്യം നോക്കി സംസാരിക്കണം. അത് ഒരു ചര്യയാകണം. അനുചിതമായ സാഹചര്യങ്ങളിലെ ചില വാക്കുകളും പ്രയോഗങ്ങളും നമ്മെ വല്ലാതെ വിഷമിപ്പിക്കും. 'സാഹജര്യം ' എന്ന് നാം എഴുതുമ്പോള്‍ അത് നമ്മെ വിഷമിപ്പിക്കില്ലെങ്കിലും അക്ഷരമറിയുന്ന വായനക്കാരനെ വല്ലാതെ വിഷമിപ്പിക്കുക മാത്രമല്ല, മുഷിപ്പിക്കുകയും ചെയ്യും.

പ്രശസ്തന്‍ ആവാന്‍ ഇത്തിരി പ്രയാസമാണ്. പക്ഷെ 'പ്രസസ്തന്‍' എന്ന് ഏത് പ്രശസ്തിയുള്ള ആള്‍ എഴുതിയാലും ഉള്ള പ്രശസ്തി കൂടി പോയിക്കിട്ടും എന്ന ഒരു ഗുണമുണ്ട്!

ഇങ്ങിനെ തൊട്ടതിനും പിടിച്ചതിനുമൊക്കെ കുറ്റം പറയാന്‍ നിന്നാല്‍ തെറ്റ് കാണാനും നോക്കാനും മാത്രമേ നേരമുണ്ടാകൂ എന്നും നിങ്ങള്ക്ക് വേറെ പണിയൊന്നും ഇല്ലേ എന്നും ചോദിക്കുന്ന വരുണ്ടാകും..
അവര്‍ക്ക് നമസ്ക്കാരം.. അങ്ങിനെ തോന്നാത്തവര്‍ക്ക് നല്ല നമസ്ക്കാരം ..! ഞാന്‍ നമസ്ക്കരിക്കാന്‍ പോകുകയാണ്.

ചിഹ്നനം

2011-02-13T08:03:00.000-08:00

സര്‍ഗാന്മക വ്യാപാരങ്ങ ളിലൂടെ ഭാഷയെ സമീപിക്കുന്ന വര്‍ക്ക് ഭാഷയെ കുറിച്ച് അടിസ്ഥാനപരമായ ചില അറിവ് ഉണ്ടാവേണ്ടത് അത്യാവശ്യമാണ് എന്ന ബോധമാണ് അക്ഷരാശ്രമം എന്ന സദ്‌ ഉദ്യമത്തിന് പിന്നില്‍ ..ഭാഷാ ചിഹ്നങ്ങളെ കുറിച്ചുള്ള ഈ കുറിപ്പ്
ചില ചിന്ന സംശയങ്ങള്‍ ദൂരീകരിക്കാന്‍ സഹായിക്കുമെന്ന് കരുതുന്നു. പ്രതികരണങ്ങള്‍ തീര്‍ച്ചയായും പ്രതീക്ഷിക്കുന്നു.
sundar raj sundar .

ചിഹ്നനം

ചിഹ്നം എന്ന നാമ പദത്തിന്‍റെ അര്‍ഥം അടയാളം , മുദ്ര (sign ) എന്നാണ്. ചിഹ്നനം എന്നാല്‍ signification അഥവാ ചിഹ്നങ്ങള്‍ക്ക് അര്‍ഥം കല്‍പ്പിക്കല്‍ എന്നും,
ഭാഷയില്‍ നാം എന്ത് ഉപയോഗിച്ച് ചിഹ്നനം ചെയ്യുന്നുവോ അതെല്ലാം ചിഹ്നകങ്ങള്‍ (signifier ) ആയും കരുതാം.

ഇനി മലയാളത്തിലെ ചിഹ്നകങ്ങളെ പരിചയപ്പെടാം ..

അങ്കുശം(അല്‍പ വിരാമം ) comma ,

ബിന്ദു(പൂര്‍ണവിരാമം) fullstop ,

കോഷ്ട്ടം, ( square bracket )

രോധിനി (അര്‍ദ്ധ വിരാമം),

കാകു(ചോദ്യ ചിന്ഹം )

ഭിത്തിക ( അപൂര്‍ണ വിരാമം) ,

വലയം(bracket ),

സൃമ്ഘല (hyphen ),

രേഖ (dash ),

വിക്ഷേപിണി (exclamation mark ),

ഉദ്ധരണി ( അപൂര്‍ണ വിരാമം ),

പ്രശ്ലേഷം ('f ' sign ),

വിശ്ലേഷം (apostrophe )

എന്നിങ്ങനെ പതിമൂന്നു ചിഹ്നകങ്ങള്‍ ഭാഷയില്‍ സാധാരണയായി ഉപയോഗിക്കാറുണ്ട്. (അടിയില്‍ വരഞ്ഞ പദങ്ങള്‍ മംഗ്ലീഷില്‍ എഴുതുമ്പോള്‍ മാറ്റം വന്നിട്ടുണ്ട്).

ഇവ കൂടാതെ ഒറ്റ ഉദ്ധരണി ,പൂരണി ചിഹ്നം , നക്ഷത്ര ചിഹ്നം, കാകപദം എന്നിവയും ചിഹ്നങ്ങളായി ഭാഷയില്‍
ഉപയോഗിച്ച് കാണാറുണ്ട്.

ചിന്ഹങ്ങള്‍ ഹൃദിസ്ഥമാക്കാന്‍ രചിക്കപ്പെട്ട ഒരു കവിത(?) കൂടി കേട്ടോളൂ

                              അങ്കുശം, ബിന്ദുവും, കോഷ്ട്ടം
                               രോധിനീ ,കാകു, ഭിത്തിക ,
                              വലയം, ശ്ര്മ്ഘലാ രേഖ
                              വിക്ഷേപാനദ്യത്, ഭൂതാത്മകം
പ്രശ്ലേഷം, പിന്നെ ,വിശ്ലേഷം
                              ഉദ്ധരണി തഥാപരം ,
                              ചിന്ഹങ്ങള്‍ പതിമൂന്നത്രേ
                               ഭാഷയില്‍ രാജസമ്മതം..

ഇവയില്‍ ഓരോ ചിഹ്നങ്ങളെ കുറിച്ചും വിശദമായി പ്രതിപാദിച്ചാല്‍ മാത്രമേ ഈ ദൌത്യം പൂര്‍ണമാവുകയുള്ളൂ.
തല്‍ക്കാലം കാകുവിനെ കുറിച്ച് പറയാം..
           കാകു (?)
പ്രധാനമായും നാല് തരത്തില്‍ ആണ് ഇതിന്‍റെ ഉപയോഗം
൧) ചോദ്യാര്‍ത്തമുള്ള പൂര്‍ണ വാക്യങ്ങളുടെ അവസാനം
                            ഉദാ : ആരാണ് നിങ്ങള്‍?
               നിങ്ങള്‍ എപ്പോള്‍ വന്നു?
                                         ഏത് ബ്ലോഗറാണ് ഇത് എഴുതിയത്?
൨) പറയുന്ന കാര്യത്തിലുള്ള നിജസ്ഥിതിയില്‍ ഉള്ള സംശയം
                              ഉദാ: രണ്ടായിരം വര്‍ഷം(?) പഴക്കമുള്ള ഭാഷയാണ്‌ മലയാളം .
           ജിദ്ദയിലാണ് (?) ഏറ്റവും കൂടുതല്‍ ബ്ലോഗര്‍മാര്‍ ഉള്ളത്.
൩) ഘടനാ പരമായി വിധി രൂപത്തില്‍ ആണെങ്കിലും അര്‍ഥം നിഷേധ രൂപത്തില്‍ സൂചിപ്പിക്കുക
                             ഉദാ): ഈ വാര്‍ത്ത നീ നേരത്തേ അറിഞ്ഞു?
          ഇന്നലെ അവര്‍ പോയിരുന്നു?
൪) ഔപചാരികമായ ചോദ്യ വാക്യ രൂപങ്ങള്‍ക്ക്‌ ശേഷം ചോദ്യചിഹ്നം (കാകു) ആവശ്യമില്ല. പൂര്‍ണ വിരാമം ധാരാളം മതി.
                              ഉദാ: ഈ സന്തോഷ വാര്‍ത്ത വീട്ടില്‍ അറിയിക്കാമോ.          ഞാനീ എഴുത്ത് അവസാനിപ്പിക്കട്ടെയോ.
(അവലംബം : ഗ്രന്ഥപ്പുര )

വാക്കുകളിലെ ശരിയും തെറ്റും

2011-02-09T20:45:00.000-08:00

നാമൊക്കെ അറിയാതെ പല മലയാള വാക്കുകളും തെറ്റായി എഴുതുന്നു .തിരുത്താന്‍ വളരെ ചെറിയ ഒരു ശ്രമമാണിത് .പതിനഞ്ചു വാക്കുകളിലെ ശരി തെറ്റുകള്‍ മാത്രം പറയുന്നു

1) അസ്തിവാരം: അസ്തിവാരം ആകുന്നു ശരി, അസ്ഥിവാരം അല്ല. അസ്തിവാരമെന്നാല്‍ അടിത്തറ.

2) അപൂര്‍വം: മുന്‍പില്ലാത്തവിധം എന്നര്‍ഥം. 'വിരളം' എന്ന അര്‍ഥത്തില്‍ ഉപയോഗിക്കാന്‍ പാടില്ല.

3) ഉദ്‌ഘാടനം: ഉദ്‌ഘാടനമാണ് ശരി. ഉത്ഘാടനമോ, ഉല്‍ ഘാടനമോ അല്ല.

4) ഉദ്ദേശം: ഏകദേശം എന്നര്‍ഥം. ഉദ്ദേശ്യം എന്നതിന് ലക്ഷ്യം എന്നും. ഉദാ: ഉദ്ദേശം അമ്പതുപേര്‍ ചര്‍ച്ചയി ല്‍ പങ്കെടുത്തു.

5) ഉദ്ദേശ്യം: ലക്ഷ്യം എന്നര്‍ഥം. ഉദ്ദേശം എന്നതിന് ഏകദേശം എന്നും. ഉദാ: അവന്റെ ഉദ്ദേശ്യം വേറെയാണ്.

6) ഐകകണ്ഠ്യേന: 'ഏകകണ്ഠഭാവം' ആണ് 'ഐകകണ്ഠ്യം'. അതായത് ഒരേ കണ്ഠം എന്ന ഭാവം. 'ഐകകണ്ഠ്യേന' എന്നാല്‍ 'ഒരേ കണ്ഠം എന്ന ഭാവത്തിലൂടെ', അതായത്, ഒരേ അഭിപ്രായത്തിലൂടെ. ഇവിടെ 'ഐക്യ'ത്തിന് ഒരു സ്ഥാനവും ഇല്ല. അതിനാല്‍ 'ഐക്യകണ്ഠ്യേന' എന്ന പ്രയോഗം തെറ്റ്. 'ഐകകണ്ഠ്യേന' ശരി.

7) ഐകമത്യം - 'ഒരേ അഭിപ്രായം'. 'ഐക്യമത്യം' എന്ന പ്രയോഗം തെറ്റ്. ഐകമത്യം മഹാബലം

8) ഐച്ഛികം - 'ഐച്ഛികം' എന്ന് എഴുതണം. 'ഐശ്ചികം' എന്നല്ല.

9) ഐഹികം - 'ഐഹികം' ശരി. 'ഐഹീകം' എന്നെഴുതരുത്.

10) ഗംഭീരം: ഗംഭീരം എന്നാല്‍ ആഴമുള്ളത് എന്നാണ് അര്‍ഥം. ആഴത്തെ സൂചിപ്പിക്കുന്ന 'ഗഹ്' എന്ന ധാതുവില്‍ നിന്നാണ് ആ പദത്തിന്റെ നിഷ്പത്തി. ആഴത്തെ സൂചിപ്പിക്കേണ്ട സന്ദര്‍ഭങ്ങളിലേ 'ഗംഭീരം', 'ഗാംഭീര്യം' എന്നിവ പ്രയോഗിക്കാവൂ. 'ഗംഭീരമായ സമുദ്രം' എന്ന് പറയാം, എന്നാല്‍ 'ഗംഭീരമായ പര്‍വതം' എന്ന് പറയുന്നത് അഭംഗിയാണ്. വിഷയത്തിന്റെ അഗാധതകളിലേക്ക് / ആഴങ്ങളിലേക്ക് ശ്രോതാക്കളെ നയിക്കുന്നതാണ് പ്രസംഗമെങ്കില്‍ 'ഗംഭീരമായ പ്രഭാഷണം' എന്ന് പറയാം.

11) പ്രായപൂര്‍ത്തി: 'പ്രായപൂര്‍ത്തി തികഞ്ഞവര്‍ക്കെല്ലാം' തുടങ്ങിയ പ്രയോഗങ്ങള്‍ ഒഴിവാക്കണം. പ്രായം തികയുന്നതാണ് പ്രായപൂര്‍ത്തി. അതിനാല്‍ , 'പ്രായപൂര്‍‌ത്തി ആയവര്‍ക്കെല്ലാം നമ്മുടെനാട്ടില്‍ വോട്ടവകാശമുണ്ട്' എന്നുമതി.

12) ഭയങ്കരം: 'എനിക്ക് ഭയങ്കരമായി ഇഷ്ടപ്പെട്ടു', 'അതിഭയങ്കരമായ പ്രസംഗം' തുടങ്ങിയ പ്രയോഗങ്ങള്‍ ഇപ്പോള്‍ വ്യാപകമാണ്. ഭയപ്പെടുത്തുന്ന കാര്യങ്ങള്‍ ആണെങ്കില്‍ മാത്രമേ ഭയങ്കരമായ എന്ന വിശേഷണം ചേരുകയുള്ളൂ.

13) വൈതരണി: യമലോകത്തിലൂടെ ഒഴുകുന്ന ഒരു നദിയാണ് 'വൈതരണി' എന്നാണ് സങ്കല്പം. തരണം ചെയ്യാന്‍ - കടക്കാന്‍ - പ്രയാസമുള്ളത് എന്നര്‍ഥം. 'എല്ലാത്തരം വൈതരണികളെയും പൊട്ടിച്ചെറിഞ്ഞുകൊണ്ട്' തുടങ്ങിയ പ്രയോഗങ്ങള്‍ കണ്ടാല്‍ തിരുത്തണം. 'വൈതരണി' നദിയാണെന്നതുതന്നെ കാരണം. ഇനി അല്ലെങ്കില്‍ ത്തന്നെ 'കടക്കാന്‍ പ്രയാസമുള്ളതിനെ' പൊട്ടിച്ചെറിയുകയ്യല്ലല്ലോ ചെയ്യേണ്ടത്.

14) ഷഷ്ടിപൂര്‍ത്തി: അറുപത് വയസ്സ് തികഞ്ഞു എന്ന അര്‍ഥത്തില്‍ പ്രയോഗിക്കുമ്പോള്‍ ഷഷ്ടിപൂര്‍ത്തി എന്നാണ് പ്രയോഗിക്കേണ്ടത്. 'ഷഷ്ഠിപൂര്‍ത്തി' എന്ന് പ്രയോഗിച്ചാല്‍ ആറുവയസ്സ് തികഞ്ഞു എന്ന് അര്‍ഥം വരും. ഷഷ്ടിപൂര്‍ത്തി തികഞ്ഞു എന്നും പ്രയോഗിക്കരുത്. അറുപതുവയസ്സ് തികയുന്നതാണ് ഷഷ്ടിപൂര്‍ത്തി.

15) ചെമപ്പ്: ചുമപ്പ്, ചുവപ്പ്, ചൊകപ്പ്, ചോപ്പ് എന്നിങ്ങനെ വ്യത്യസ്തരൂപങ്ങളില്‍ ‍ സാഹിത്യകൃതികളില്‍ വന്നിട്ടുണ്ട്. ഇവയില്‍ ഒന്നുപോലും തെറ്റാണെന്നു പറഞ്ഞു ഗദ്യത്തില്‍ നിന്നോ പദ്യത്തില്‍ നിന്നോ നീക്കാന്‍ പറ്റുമെന്ന് തോന്നുന്നില്ല. എന്നാല്‍ 'ചെമപ്പ്' ആണ് ശരിയായ രൂപം എന്ന് പറയാന്‍ സ്പഷ്ടമായ യുക്തിയുണ്ട്: ചെമ്മാനം (ചെം‌+മാനം), ചെങ്കൊടി (ചെം+കൊടി), ചെമ്മണ്ണ് (ചെം+മണ്ണ്), ചെന്താമര (ചെം+താമര) ഇങ്ങനെ പല വാക്കുകളുണ്ടല്ലോ. ഇവയിലെല്ലാം രക്തവര്‍ണത്തെ സൂചിപ്പിച്ചിരിക്കുന്നത് 'ചെം'കൊണ്ടാണ്. അതിനാല്‍ 'ചെമപ്പ്' തന്നെ ശരി എന്ന് സ്പഷ്ടം.

അക്ഷരാശ്രമം

2011-02-08T03:58:00.000-08:00

സുഹൃത്തുക്കളെ,

നമ്മുടെ ഗ്രൂപ്പിന്റെ ആഭിമുഖ്യത്തില്‍ നാം ആരംഭിക്കാന്‍ തീരുമാനിച്ച 'അക്ഷരത്തെറ്റ് രോഗ ചികിത്സാ കേന്ദ്രം' ഉടന്‍ പ്രവര്‍ത്തന മാരംഭിക്കുന്നതാണ്. നിലവില്‍ ഇരിങ്ങാട്ടിരി, കൂടരഞ്ഞി, റാണി പ്രിയ എന്നീ മൂന്നു പേരെയാണ് അതിന്റെ ചുമതല അഡ്മിന്‍ ഏല്‍പ്പിച്ചിരിക്കുന്നത്. ഒന്ന് രണ്ടു പേരെ കൂടി ഇതില്‍ ഉള്‍പ്പെടുത്താമെന്നു തോന്നുന്നു. ആ വിഷയത്തില്‍ നിങ്ങളുടെ അഭിപ്രായം അറിയിക്കുമെന്ന് കരുതുന്നു. ഇത് ആരുടേയും കേമത്തം കാണിക്കാനോ, അല്‍പത്തം വെളിപ്പെടുത്താനോ ഉദ്ദേശിച്ചുള്ള പരിപാടിയല്ല. പ്രൂഫ്‌ റീഡിംഗ്, എഡിറ്റിംഗ് എന്നീ അനിവാര്യമായ മിനുക്ക്‌ ക്രിയകള്‍ നടക്കാതെ പോകുന്നു എന്നതാണ് ബ്ലോഗു രംഗത്തെ വലിയ ഒരു അപാകതയായി പലരും പറയുന്നത്. അതിനു ചെറിയ ഒരു പരിഹാരം എന്ന നിലക്കേ ഈ പരിപാടിയെ കാണേണ്ടതുള്ളൂ.

എഴുത്തിനും വായനക്കുമിടയില്‍ നമുക്കുണ്ടാകുന്ന ഭാഷാപരമായ സംശയങ്ങള്‍ക്കും, തീര്‍പ്പുകള്‍ക്കും ഒരു വേദി എന്ന് മാത്രം. ഈ കേന്ദ്രത്തിലെ 'ചികിത്സ' തികച്ചും സൌജന്യവും രഹസ്യവുമായിരിക്കും. സംശയങ്ങള്‍ ഫേസ് ബുക്കിലെ പെഴ്സണല്‍ മെസ്സജ് വഴി നിങ്ങള്‍ക്ക് അറിയിക്കാം. ഇരുപത്തിനാല് മണിക്കൂറിനുള്ളില്‍ ഉത്തരം നിങ്ങള്‍ക്ക് കിട്ടും. എന്ന് വെച്ച് മാറ്റര്‍ മുഴുവനും അയച്ചു തിരുത്താനും എഡിറ്റ്‌ ചെയ്യാനും പ്രൂഫ്‌ നോക്കാനും ആവശ്യപ്പെടരുത്. അത് പ്രായോഗികവുമല്ല. ഈ വേദിയിലൂടെ ഭാഷാപരമായ ചില 'എക്സര്‍ സൈസുകള്‍ ' കൂടി ഉദ്ദേശിക്കുന്നുണ്ട്. അത് എന്തൊക്കെ ആവണം എന്ന് അഭിപ്രായം പറയേണ്ടത് നിങ്ങളാണ്. ഒരു കാര്യം ഒന്ന് കൂടി ഉണര്‍ത്തുന്നു. ഇവിടെ ആരുടെതും അവസാന വാക്കല്ല. ആരും ഭാഷാ പണ്ഡിത രുമല്ല. അറിയാവുന്ന കാര്യങ്ങള്‍ നാം പരസ്പരം പങ്കു വെക്കുന്നു എന്ന് മാത്രം.