Compártilu

Mal entama, nel pasáu pudo tener unes posiciones razonables sobro la normalización, pero viendo lo que lleva desfechu en so curtiu tiempu parez que la política llingüística en Xixón va quedar como la del so amigu y compañeru Felechosa n’Uviéu pa los cromañones. Ensin sabese’l porqué la Cultura Tradicional y Llingua asturiana qu’hasta el 10 de xunu figuraba como conceyalía propia y con calter tresversalizador fina sumida dientro del organigrama de la Fundación Municipal de Cultura y Universidad Popular perdiendo asina esi papel de canal normalizadora énte toles demás conceyalíes del Ayuntamientu de Gijón/Xixón.

Nun-y prestaben les Ordenances d’Usu de la Llingua Asturiana en Xixón, dicía nunes declaraciones a la prensa, quería reformales, nun se sabe si lo que daveres nun-y presta de les mesmes ye que fueren aprebaes a propuesta y colos votos d’IU y PSOE, los sos primos del PP abstuviéronse y tuvieron una intervención surrealista nel Plenu municipal; o direutamente que nun foi usté mesmu quien les propunsiera. Faígales cumplir, aplíqueles a los sos compañeros de gobiernu, aplíqueseles usté mesmu que no que llevamos de branu más allá d’una presentación nunca nada más se supió. La ciudadanía, anque usté nun lo considere, tien memoria y los derechos llingüísticos y el futuru del asturianu nun pueden tar naguando a qu’un conceyal espierte.

Preside un teatru municipal, que ye públicu y se noma Jovellanos, que nun ye’l nome d’una fábrica de xelaos nin el de nenguna otra marca comercial. Un teatru qu’acueye dende funciones de nivel internacional a cantautores locales, un Teatru con mayúsucules que tien función de serviciu públicu y que si ta ehí ye pola llucha de munches y munchos xixoneses comprometíos con esta ciudá y la cultura. Fuimos munches y munchos los que lu vieron tar sentáu nel Plenu d’agostu, en que’l Teatru foi ún de los puntos principales del curtiu alderique, sentáu porque nun gurgutió, como n’otres tantes coses les y los xixoneses nun sabemos que ye lo qu’usté piensa o como alternativa que ye lo que piensa facer el terciu que mos rixe, cola complacencia de los sos primos del PP.

Cuenten que pasó un llargu tiempu deprendiendo’l cante cultu, al acabar debió ser cuando la so actuación nel teatru Jovellanos, sorprendentemente agora qu’ocupa la conceyalía de cultura finiquita per decretu’l Festival de Lírica de Xixón ¿tampoco-y prestaba, qué ye que nun taba convidáu? Una actuación política, la de so, que mos puede costar munches perres a les y los xixoneses y a la ciudá en so conxuntu. Quiciaves usté nun seya consciente pero coles sos actuaciones polítiques, pa les otres hai críticos, puede mancar económicamente muncho a esta ciudá y por estensión a Asturies Tornando a la desapaición de conceyalíes na estructura del Ayuntamientu de Gijón/Xixón ¿Qué pasó cola Memoria Social? Que ye que tien mieu de dalgo, dalgo que tapecer o cenciellamente pasa d’una cuestión qu’afeuta direutamente a cerca de dos tercios de la ciudadanía xixonesa, ustedes solu son un terciu y de sécute la soterren nuna cuneta. Posiblemente haya dalguién del so grupu que tenga especial interés en que nun apaezan determinaos datos históricos.

Hai cosa d’un mes, durante la presentación del Festival Xixón 5º40’, l’anguaño conceyal de cultura anunciaba, por mor de que lo que taba presentando yera una creación del anterior equipu de gobiernu (IU-PSOE), de la cellebración d’un festival atlánticu pa 2012 nél que’l 5º 40’ quedaría sumíu. Pretende cola ocurrencia, Rubiera, que Xixón se convierta na antoxana del Festival Intercélticu de Lorient, una mui bona idega de nun ser porque precisamente neses dates se cellebra la Semana Negra, qu’en 2012 cellebrará’l so 25 aniversariu, y que sía en Xixón. Surden munches entrugues sobre la intención de supeditar l’actividá cultural de Xixón a la d’otra ciudá, de si tien intención de mover de dates la Semana Negra, organizada por una asociación cultural en función de les dates d’un eventu desenvueltu tamién por una entidá privada. Lo mesmo que podríemos entrugar sobro si esistiere dalguna intención de competir con otros festivales que se fain n’Asturies, cuando la lóxica puxa pola compatibilidá de les programaciones nel país.

Más de dos meses de non gobiernu, una querella, polémiques con otros ayuntamientos asturianos, la cultura pública de Xixón en peligru. Xixón merez muncho más qu’un personaxe qu’ande pelos baños de los chigres poniendo la oreya pa ver si ponen el so cantar. Tola vida queriendo ser conceyal, a la fin depués de 32 años flotando como un corchu parez qu’atopó onde lo conseguir, les consecuencies tán al llegar.

*Adxuntu a la Secretaría d’Organización d’Izquierda Xunida Xixón

Compártilu

Compártilu

xabel diz que pior ye que dende’l gobiernu central s’esixa que comunidaes autónomes y conceyos puxen pol tresporte publicu ensin recibir los fondos afayadizos pa que nun suponga un mayor costu pa les entidaes infraestatales, al tiempu qu’esixe menor endeldamientu por dar los mesmos servicios. que’l gobiernu español reduza los mesmos precios qu’hai dos meses xubía en rellación al tresporte de cercaníes, que tresllade la xestión del mesmu a determinaos puntos de la península, que quiten los revisores de la renfe y de la feve o lo que ye lo mesmo l’atención inmediata al viaxeru, que l’alta velocidá nun llegue a asturies, que de les arriondes a posada de llanes se tarde casi o ensin casi una hora en tren, que de xixón a el ferrol haiga casi que facer nueche, que la feve nun tea electrificada, que quiten los alvia a madrid como hai unos años quitaben l’espresu, que de cabrales a uviéu se siga tardando casi 3 hores en llegar y solo haya dos o tres frecuencies al día pa tola ruta y haiga que facer tresbordu en cangues. lo mesmo que si les concesionaries de les autopistes de peaxe esixan que per elles se pueda dir a 120 o 130 Km/h como en francia n’ares d’ufrir un serviciu “diferenciáu” a quien paga.

xabel diz que nel fondu 110 o 120 nun ye’l problema, la cuestión principal radica en cómo ufrir un tresporte públicu de calidá que favoreza que’l coche quede en casa porque nun ye necesariu, en xixón ye posible, que nun salga’l que diz que tien de llevar un caxón de 120 kilos qué eso ye otra cosa diferente, la cuestión ta en desenvolver una rede potente y posible. asturies carez d’un bon tresporte públicu del centru a les ales y ye necesariu desenvolvelu

Compártilu

xabel diz que los medios occidentales tán considerando tolos procesos de protesta del sur del mediterráneu como un solu elementu ensin atender a cuestiones nacionales, tresmiten lo que ta socediendo dende’l prisma occidental del turnismu políticu, de l’alternancia como únicu sistema políticu válidu aun cuando durante décades nun tuviera importancia la non pluralidá política impuesta y sostenida precisamente por quienes güei reclamen la introducción del turnismu na política d’estos países.

xabel diz qu’europa, los estaos xuníos y l’estáu d’israel ficieren tolo posible dende la II guerra mundial pa qu’áfrica y oriente prósimu siguieren relegaos a la categoría de países estractores, gobiernos títeres rehenes de los interes de les multinacionales, pueblos a los que se sometió pa que nada nun cambiare dende la colonización, la potenciación de los sectores ultrarelixosos de la población envede sofitar a la mayoría laica y organizada… son dalgunes muestres de lo que les potencies occidentales promovieron na rexón. los medios son una cosa, la ciudadanía ye otra mui diferente qu’aspira a la llibertá como tal debemos contribuyir a que los pueblos sean soberanos aceptando les sos víes d’algamar la llibertá y la xusticia social.

Compártilu

xabel diz que nun ye que la mesa nun tenía que ser mui grande, 12 sielles pa los conceyales y secretariu y dalguna otra pa la ciudadanía que quixere asistir a los plenos públicos. pero non, los conceyos van siguir faciéndose fuera de la casa conceyu, preveyendo l’actual alcalde una ampliación de la entovía non perafitada.

xabel diz que l’oriente necesita nuevos estímulos, salir de la coca cola y pepsi cola, conceyos como ribeseya o parres amuesen que ye posible da-y un cambiu a les coses de la politica municipal, que ye posible abrir alderiques positivos pa la ciudadanía, a la participación de la ciudadanía organizada na vida del conceyu. nun hai muncho dicién-y a xabel que daba lo mesmo un qu’otru xabel dicía qu’había más opciones y que nenguna ye descartable, porque nun solo ye xestionar, hai que facer medrar pa toes y pa toos.

Compártilu

xabel diz que lo mesmo que pasó con noriega en panamá ben alí yera ún de los nuesos, de los déllos, formáu en francia y nos estaos xuníos fizo y desfizo elecciones col vistu bonu de la “comunidá internacional” qu’almitía al partíu de ben alí en foros como la internacional socialista o que mantenía unes perbones rellaciones con sarkozi, y que corriendo llegaría a la casa de saud tamién conocida como arabia saudí, que tamién ye un de los nuesos, de los d’ellos, y un país onde los derechos humanos se cumplen lo mesmo o más que nos estaos xuníos.

xabel diz qu’a lo llargo de la so curtia independencia de la metropolí, túnez prosperó como país de turismu baratu, d’ehí la preocupación de la ministra de turismu internacional española, trinidad jiménez. un benidorm na oriella sur del mediterráneu, playes, fiesta, sol a precios asequibles pa economíes en crisis. nada nun dixo trinidad jiménez pol secuestru del  voceru del partíu comunista de los trabayadores e túnez, hamma hamani, o pola seguridá de la ciudadanía tunecina. nun hai sofitu internacional a una verdadera democracia na vieya cartago, cambien cromos y a siguir yendo a tomar el sol.

Compártilu

xabel diz qu’asina turnu tres turnu los primeros ministros de la ue siéntense como’l señor cuesta de la perconocida serie televisiva organizando conceyos de vecinos en casa con resoluciones que a naide nun-y estorben, mientres que los escoyíos desenvuelven les polítiques, les xestiones, de la comunidá.

xabel diz qu’agora llega’l turnu del primer ministru húngaru, un personaxe col que suañen munchos de los premiers europeos, el dirixente d’un gobiernu qu’amordaza la prensa, entovía nun saben de que la meyor mordaza pa la prensa “llibre” ye mercala pa depués mangoniar y decidir qué espublizar y que non. un premier suañáu pola so política espansionista yá antiinmigratoria, suañáu poles sos polítiques neollberales, plegáu a los postulaos de fondos monetarios, bancos mundiales y reserves federales, a la fin el suañu de tou dirixente d’esta europa agonizante.

Compártilu

xabel diz que yá na campaña electoral el pp ficiere esfuerzos por averase al sofitu de los votantes d’esti partíu fascista, el xuegu de matar o cazar inmigrantes, les declaraciones de la so candidata sobre la inmigración, la seguridá entendida como la defensa respectu al que vien de fuera, o lo que ye lo mesmo la xenofobia.

xabel diz qu’otru datu esencial ye la procedencia de les y los votantes de partíos d’ultraderecha, na so mayoría de ciudaes y barrios obreros y lumpen-proletariat, víctimes d’una propaganda basada na ausencia d’educación, de saber entender lo que se llee, que ye aprovechada pa la creación y fomentu d’esta mena de grupos. tiempos de crisis del sistema capitalista, tiempos de gatopardos que van facer tolo posible pa siguir na so mesma posición, como d’otra forma siempres ficieren.

Compártilu

en rempuesta a Vecines roxes en Morís y RESPUESTA A LA VACA ROXA BLOGUERA DE XUAN XOSÉ

Compártilu