ಈ ಕನಸು

ಜೋಡಿ...ಮೋಡಿ...

2012-06-01T20:18:00.003+05:30

ವೈವಿಧ್ಯ

ಬಾಳೆಗೊನೆಯಲ್ಲಿನ ಒಂದೆರಡು ಕಾಯಿಗಳು ಜೋಡಿಯಂತೆ ಅಂಟಿಕೊಂಡಿರುವದು ಸಾಮಾನ್ಯ. ಆದರೆ ಯಲ್ಲಾಪುರ ತಾಲೂಕಿನ ಮಾಗೋಡ ಗ್ರಾಮದ ಕೃಷಿಕ ಮನೋಜಕುಮಾರರವರ ತೋಟದಲ್ಲಿ ಬೆಳೆದ ಬಾಳೆಗೊನೆಯಲ್ಲಿ 40ಕ್ಕೂ ಅಧಿಕ ಜೋಡಿಬಾಳೆಕಾಯಿಗಳು ಬೆಳೆದಿರುವದು ಅಚ್ಚರಿ. ಯಲ್ಲಾಪುರ ಪೋಲೀಸ್ ಠಾಣೆ ಎದುರು ಚಂದ್ರು ಪಟಗಾರರವರ ಪಾನ್ ಶಾಪ್ನಲ್ಲಿ ಈ ಜೋಡಿ ಬಾಳೆಗೊನೆಯನ್ನು ಕಾಣಬಹುದು.

ಚಿತ್ರ: ಅಚ್ಯುತಕುಮಾರ
ಮಾಹಿತಿ: ಪ್ರಕಾಶ

ವಾತ್ಸಲ್ಯ...

2012-06-01T20:16:00.000+05:30

ಕ್ಲಿಕ್...

ಚಿತ್ರ: ವಾಲ್ಸ್ ಮಸ್ಕರೇನಿಯಸ್

ಸಂಸ್ಕೃತಿಯ ಪುನರುತ್ಥಾನಕ್ಕೊಂದು ಹೊಸ ಹೆಜ್ಜೆ... - ಭಾಗ 4

2012-06-01T17:23:00.005+05:30

ಪುನರ್ ಸೃಷ್ಟಿ...

ಶಿಥಿಲಾವಸ್ಥೆಯ ಹೊಸಗುಂದದ ದೇಗುಲಗಳ ಜೀರ್ಣೋದ್ಧಾರಕ್ಕೆ 1980ರಿಂದಲೇ ಪ್ರಯತ್ನಗಳು ಸಾಗಿವೆ. 1995ರಲ್ಲಿ ಶಿವಮೊಗ್ಗದ ಮಲ್ನಾಡ್ ರಿಸ ರ್ಚ್ ಅಕಾಡೆಮಿ ಹೊಸಗುಂದ ಗ್ರಾಮಸ್ಥರ ಸಹಕಾರದೊಂದಿಗೆ ದಿ.ಹೆಚ್.ಡಿ.ನಾಗರಾಜಪ್ಪ ಗೌಡರ ನೇತೃತ್ವದಲ್ಲಿ ಐತಿಹಾಸಿಕ ವಿಚಾರಸಂಕಿರಣವೊಂದನ್ನು ನಡೆಸಿ ಹೊಸಗುಂದದ ಇತಿಹಾಸದ ಮೇಲೆ ಬೆಳಕು ಚೆಲ್ಲುವ ಕಾರ್ಯ ನಡೆಯಿತು.

ನಂತರದ ದಿನದಲ್ಲಿ ಈ ಪ್ರದೇಶಕ್ಕೆ ಬಂದ ಸಿ.ಎಂ. ನಾರಾಯಣ ಶಾಸ್ತ್ರಿ ಶೋಭಾ ಶಾಸ್ತ್ರಿ ದಂಪತಿಗಳು ನೂರಾರು ವರುಷಗಳಿಂದ ಪೂಜೆಯಿಲ್ಲದೇ ಶೂನ್ಯವಾಗಿದ್ದ ಶ್ರೀ ಉಮಾಮಹೇಶ್ವರ ಕ್ಷೇತ್ರದ ಜೀರ್ಣೋದ್ಧಾರಕ್ಕೆ ಕಠಿಬದ್ಧರಾದರು. ಖ್ಯಾತ ಆಗಮ ಶಾಸ್ತ್ರಜ್ಞ ವೇ.ಬ್ರ. ಶ್ರೀ ಕಟ್ಟೆ ಪರಮೇಶ್ವರ ಭಟ್ಟರ ಸೂಚನೆಯಂತೆ , ತಮ್ಮ ತಂದೆ ಚ.ಮೂ.ಈಶ್ವರ ಶಾಸ್ತ್ರಿಗಳ ದೃಢಸಂಕಲ್ಪ, ಊರಿನವರ ಸಹಕಾರದೊಂದಿಗೆ ಶ್ರೀ ಉಮಾಮಹೇಶ್ವರ ಸೇವಾ ಟ್ರಸ್ಟ್ ಒಂದನ್ನು ಸ್ಥಾಪಿಸಿದರು. 2001ರ ಮೇ.4ರಂದು ಕಾಶಿಯಿಂದ ನರ್ಮದಾ ಬಾಣಲಿಂಗವನ್ನು ತಂದು ಪ್ರತಿಷ್ಠಾಪಿಸಿದರು. ಶ್ರೀ ಗೋಕರ್ಣ ಮಂಡಲಾಧೀಶ್ವರ ಜಗದ್ಗುರು ಶಂಕರಾಚಾರ್ಯ ಶ್ರೀ ಶ್ರೀ ರಾಘವೇಶ್ವರ ಭಾರತೀ ಮಹಾಸ್ವಾಮಿಗಳ ಗೌರವಾಧ್ಯಕ್ಷತೆಯಲ್ಲಿ ಶ್ರೀ ಗುರುಗಳ ಆದೇಶ ಮಾರ್ಗದರ್ಶನದಂತೆ ಈ ಪ್ರದೇಶದಲ್ಲಿ ಲಭ್ಯ ಎಲ್ಲಾ ಸಾನಿಧ್ಯಗಳನ್ನು ಬಾಲಾಲಯದಲ್ಲಿ ಪ್ರತಿಷ್ಠಾಪಿಸಿ ನಿತ್ಯಪೂಜೆಯ ವ್ಯವಸ್ಥೆ ಮಾಡಲಾಗಿದ್ದು, ತದನಂತರ ಧಾರ್ಮಿಕ ಕಾರ್ಯಕ್ರಮಗಳು, ಜೀರ್ಣೋದ್ಧಾರ ಚಟುವಟಿಕೆಗಳು ಸಾಂಗವಾಗಿ ನಡೆಯತೊಡಗಿತು.

ನಾಳೆ : ಪ್ರಪಂಚದಲ್ಲೇ ಮೊದಲ ಪ್ರಯತ್ನ!

- ಹರೀಶ್ ಕೆ.ಆದೂರು.

ಅಂದು ಹಾಗಿತ್ತು... ಆದರೆ...ಇಂದು

2012-06-01T17:11:00.008+05:30

ವೈವಿಧ್ಯ

ಅದು ಸರಿ ಸುಮಾರು 25ವರುಷಗಳ ಹಿಂದೆ...ಕಾಸರಗೋಡು ಜಿಲ್ಲೆಯ ಗ್ರಾಮೀಣ ಪ್ರದೇಶ ಆದೂರು. ನನ್ನ ಅಕ್ಕ ಅರುಣ ಮತ್ತು ನಾನು ಅದೇ ಆದೂರಿನ ಶಾಲೆಗೆ ಜೊತೆಗೆ ಹೋಗೋದು. ಅಕ್ಕನದ್ದು ಮೇಲಿನ ಶಾಲೆ.ಅಂದರೆ ನಾನು ಪ್ರೈಮರಿ.ಅಕ್ಕ ಹೈಸ್ಕೂಲು. ಹೈಸ್ಕೂಲು ಕಟ್ಟಡ ನಮ್ಮ ಶಾಲಾ ಕಟ್ಟಡಕ್ಕಿಂತ ತುಸು ಮೇಲ್ಭಾಗದಲ್ಲಿ ಇರೋದು.ಆ ಕಾರಣಕ್ಕಾಗಿ ಮೇಲಿನ ಶಾಲೆ ಎಂದೇ ಹೆಸರು.ಮತ್ತು ಖ್ಯಾತಿ. ನಾವಿದ್ದದ್ದು ನಮ್ಮ ಕ್ಲಾಸಿದ್ದದ್ದು ಪೊಲೀಸ್ ಸ್ಟೇಷನ್ ಬಳಿಯ ಹಳೆಯ ಶಾಲಾ ಕಟ್ಟಡ. ಸರಕಾರಿ ಶಾಲೆ. ಹೊರಗಡೆ ವೀರೋಜಿ ಮಾಸ್ಟರ್ ಅವರ ನೀಲ ಬಣ್ಣದ ಲ್ಯಾಂಬಿ.

ವೀರೋಜಿ ಮಾಸ್ಟ್ರು ಅಂದ್ರೆ ನಮಗೆಲ್ಲ ಭಯ. ಬರುವಾಗಲೇ ಬೆತ್ತ ಕೈಯಲ್ಲಿರುತ್ತದೆ. ಅಂತಿಂಥ ಬೆತ್ತ ಅದಲ್ಲ. ನಾಗರ ಬೆತ್ತ.ಅದರ ರುಚಿ ನೋಡುವುದೂ ಬೇಡ...ನೆನೆಸಿಕೊಂಡ್ರೆ ಚಡ್ಡಿ ಒದ್ದೆಯಾಗುತ್ತಿತ್ತು. ಆದರೆ ನಾನು ಒಂದೇ ಒಂದು ಬಾರಿಯೂ ಅದರ ರುಚಿ ನೋಡಿರಲಿಲ್ಲ. ಅವರ ಮಗ ಕಿಶೋರ ನನ್ನದೇ ಬೆಂಚ್ ಮೇಟ್... ಅವನ ಕೈಗೆ ಯಾವತ್ತೂ ಚಡಿಕ್...ಚಡಿಕ್... ಎರಡೆರಡು ಚಡ್ಡಿಯ ಹಿಂಭಾಗಕ್ಕೆ ... ಆ ಸದ್ದು ಇಂದಿಗೂ ನೆನಪಿನಲ್ಲಿದೆ...ಹಸಿ ಹಸಿ ನೆನಪು ಮರುಕಳಿಸುತ್ತಿದೆ...

ವೀರೋಜಿ ಮಾಸ್ಟ್ರು ಸದಾ ಶುಭ್ರವಾದ ಬಿಳಿಯಂಗಿ, ಬಿಳಿ ಪಂಚೆಯಲ್ಲಿ ಬರುವವರು. 11ಗಂಟೆಗೆ ಮೇಲಿನ ಶಾಲೆಯಿಂದ ವೀರೋಜಿ ಮಾಸ್ಟ್ರಿಗೆ ಚಹಾ ಮತ್ತು ನ್ಯೂಸ್ ಪೇಪರ್ ತುಂಡಲ್ಲಿ ಕಟ್ಟಿದ ಮೂರು ಚಕ್ಕುಲಿ ಬರುತ್ತಿತ್ತು.ಮಳೆಗಾಲ ಆ ಚಕ್ಕುಲಿ ಪೊಟ್ಟಣ ಅವರ ಮಗನ ಕೈ ಸೇರುತ್ತಿತ್ತು. ಚಹಾ ಮೇಲಿನ ಶಾಲೆಯಿಂದ ಕೆಳಗೆ ಬರುತ್ತಿದ್ದಂತೆಯೇ ತಣ್ಣಗಾಗಿರುತ್ತಿತ್ತು. ಭರ್ರನೇ ಒಂದೇ ಗುಟುಕಿಗೆ ಖಾಲಿಯಾಗುತ್ತಿತ್ತು. ವೀರೋಜಿ ಮಾಸ್ಟ್ರೂ ನನ್ನಪ್ಪನೂ ಜೋಸ್ತಿಗಳು.ನನ್ನಪ್ಪ ಅಡೂರು ಶಾಲೆಯ ಮಾಸ್ಟ್ರು.

ವೀರೋಜಿಯವರು ಅದೇ ಪಕ್ಕದ ಊರಿನಿಂದ ಬರುತ್ತಿದ್ದರು. ಹಾಗಾಗಿ ಪ್ರತಿನಿತ್ಯ ಅವರಿಬ್ಬರು ಮಾತನಾಡುತ್ತಿದ್ದರು.ಆದರೂ ಶಾಲೆಗೆ ಬಂದಾಗ ಅಪ್ಪನ ಬಗ್ಗೆ ಒಂದೆರಡು ವಿಷಯ ನನ್ನತ್ರ ಮಾತನಾಡದೆ ಅವರಿಗೆ ಸಮಾಧಾನವರಿತ್ತಿರಲಿಲ್ಲ. ಲೆಕ್ಕದ ಮಾಸ್ಟ್ರು ಎಂದೇ ವೀರೋಜಿಯವರು ಪ್ರಸಿದ್ಧಿ ಪಡೆದಿದ್ದರು. ನನಗಂತೂ ಅತ್ಯಂತ ಅಚ್ಚುಮೆಚ್ಚಿನ ಮೇಸ್ಟ್ರು ವೀರೋಜಿ. ಇಂದು ಅವರ ಸಂಪರ್ಕವೇ ಇಲ್ಲ....ಎಷ್ಟೋ ವರುಷದಿಂದ ಅವರೆಲ್ಲಿದ್ದಾರೆ...ಹೇಗಿದ್ದಾರೆ...ಏನಾಗಿದ್ದಾರೆ ಒಂದೂ ತಿಳಿಯದು..

ಇಂದು ಜೂನ್ ತಿಂಗಳ ಒಂದನೇ ತಾರೀಕು ... ನಾನಾಗ ಪ್ರೈಮರಿಯಲ್ಲಿರುವಾಗ ಜೂನ್ ಒಂದನೇ ತಾರೀಕೆಂದರೆ ಅದು ಮಳೆಯ ಆರಂಭದ ದಿನ...ಮುಂಗಾರು ಮಳೆ ಬಂದೇ ಬರುತ್ತಿತ್ತು. ಬೆಳಗ್ಗೆ ಏಳುವಾಗಲೇ ಜಿಟಿ ಜಿಟಿ ಮಳೆ... ಆ ಮಳೆಯಲ್ಲಿಯೇ ನಾನೂ ಅಕ್ಕನೂ ಕೊಡೆ ಹಿಡಿದುಕೊಂಡು ಹೋಗುವುದು...ಅರುಣಕ್ಕ ನನ್ನ ಕೈ ಹಿಡಿದುಕೊಂಡು ಹೋಗುವುದು... ಕೊಡೆಯ ಕಡ್ಡಿಯಿಂದ ಬೀಳುವ ನೀರು ನಮ್ಮಿಬ್ಬರ ಕೈ ತೋಯಿಸುತ್ತಿತ್ತು... ರಸ್ತೆಯ ಅಂಚಿನಲ್ಲಿದ್ದ ಮಳೆ ನೀರನ್ನು ಕಾಲಲ್ಲಿ ಚಿಮ್ಮಿಸುತ್ತಾ ರಸ್ತೆಯಲ್ಲಿ ಹರಿದು ಬರುವ ನೀರಿನಲ್ಲಿ ಆಟವಾಡುತ್ತಾ ಶಾಲೆಗೆ ಹೋಗುವುದು...

ಮಧ್ಯಾಹ್ನಕ್ಕೆ ಬುತ್ತಿ. ನನ್ನ ಬುತ್ತಿಯಲ್ಲಿ ಅಮ್ಮ ಹಾಕಿಕೊಟ್ಟ ಕುಚ್ಚಲಕ್ಕಿ ಅನ್ನ...ಎರಡು ಮಿಡಿ ಉಪ್ಪಿನ ಕಾಯಿ. ಒಂದು ನನಗೆ ಇನ್ನೊಂದು ನಮ್ಮ ಟೀಚರ್ ಗೆ .ಅದು ಕುಸುಮಾ ಟೀಚರ್. ಅವರಿಗೆ ನನ್ನ ಬುತ್ತಿಯಲ್ಲಿರುವ ಮಿಡಿ ಉಪ್ಪಿನಕಾಯಿ ಇಲ್ಲದೆ ಊಟವೇ ಸೇರದು... ಅವರಿಗೆ ನಾನಂದ್ರೆ ಅತೀವ ಪ್ರೀತಿ. ಪ್ರತೀ ಶುಕ್ರವಾರ ಮಧ್ಯಾಹ್ನ ಊಟಕ್ಕೆ ಕುಸುಮಾ ಟೀಚರ್ ನಮ್ಮಮನೆಗೆ ಬಂದೇ ಬರುತ್ತಿದ್ದರು. ಶಾಲೆಯಿಂದ ಅಬ್ಬಬ್ಬಾ ಅಂದರೆ ಒಂದು ಕಿಲೋ ಮೀಟರ್ ದೂರದಲ್ಲಿ ನಮ್ಮ ಮನೆ. ಶುಕ್ರವಾರ ಕೇರಳದಲ್ಲಿ 12.30ಕ್ಕೆ ಶಾಲೆ ಬಿಟ್ಟರೆ 2.30ಕ್ಕೆ ಮತ್ತೆ ಆರಂಭ. ಶನಿವಾರ , ಭಾನುವಾರ ಪೂರ್ತಿ ರಜೆ.

ಮಳೆಗಾಲದಲ್ಲಿ ಮಧ್ಯಾಹ್ನ ಶಾಲೆಯ ನೀಲಿಬಣ್ಣದ ಪೇಂಟ್ ಹೊಡೆದ ಕಿಟಿಕಿಯ ಬದಿಯಲ್ಲಿ ಕೂತು ಹಂಚಿನ ಮಾಡಿಂದ ಹನಿ ಹನಿ ಜಿನುಗುವ ನೀರ ಹನಿಗಳನ್ನು ನೋಡುತ್ತಾ ಅಮ್ಮ ಕಟ್ಟಿಕೊಟ್ಟ ಬುತ್ತಿ ಊಟಮಾಡುತ್ತಿದ್ದುದು ಇಂದಿಗೂ ನೆನಪಿಗೆ ಬರುತ್ತದೆ. ಆ ದಿನಗಳು ಇಂದು ಕೇವಲ ನೆನಪು ಮಾತ್ರ. ಅಂದಿನ ಪ್ರತಿಯೊಂದು ಘಟನೆಗಳೂ ಇಂದಿಗೂ ಹಸಿ ಹಸಿಯಾಗಿಯೇ ಉಳಿದುಕೊಂಡಿವೆ...

ಅಂದಿನಂತೆ ಹಸಿರು ಮರಗಳು, ಸಾಲು ಮರಗಳು ಇಂದಿಲ್ಲ...ಆದೂರು ಎಂಬ ಊರು ಮೊದಲಿನಂತೆ ಇಂದಿಲ್ಲ... ಬದಲಾವಣೆಯ ಗಾಳಿ ಬೀಸಿದೆ... ಶಾಲೆಯಲ್ಲಿಯೂ ಅಂತಹ ಪ್ರೀತಿಯ ಶಿಕ್ಷಕರು ಇಂದಿಲ್ಲ...ಎಲ್ಲವೂ ಬದಲಾಗಿದೆ. ಇಂದು ಜೂನ್ ತಿಂಗಳ ಒಂದನೇ ತಾರೀಕಿಗೆ ಮಳೆಯೂ ಇಲ್ಲ... ಆ ಪ್ರೀತಿಯ ವಾತಾವರಣವೇ ಇಂದು ಮರೆಯಾಗಿದೆ. ಕೇವಲ 25 ವರುಷದಲ್ಲಿ ನಾನು ಕಂಡಂತಹ ಬದಲಾವಣೆ ನನಗೇ ಬೇಸರ ತಂದಿದೆ....ಎಷ್ಟೆಂದರೆ ಜೀವನವೇ ಬೇಡ ಎಂಬಷ್ಟರ ಮಟ್ಟಿಗೆ!

- ಎಚ್.ಕೆ.

ಬನ್ನಿ...ಜೊತೆಯಾಗಿ ಚಾತುರ್ಮಾಸ್ಯ ವ್ರತಾಚರಿಸೋಣ

2012-05-31T19:46:00.005+05:30

ಭಕ್ತ ಕೋಟಿಗೆ ಶ್ರೀಗುರುಗಳ ಅಕ್ಕರೆಯ ಕರೆ...

ಈ ಕನಸು.ಕಾಂ ಗೆ ಶ್ರೀ ರಾಘವೇಶ್ವರ ಭಾರತೀ ಮಹಾಸ್ವಾಮಿಗಳ ವಿಶೇಷ ಸಂದರ್ಶನ

ಪೆರಾಜೆ - ಮಾಣಿ : " ಬನ್ನಿ...ಜೊತೆಯಾಗಿ ಚಾತುರ್ಮಾಸ್ಯ ವ್ರತಾಚರಿಸೋಣ..." ಇದು ಹೊಸನಗರದ ಶ್ರೀ ರಾಮಚಂದ್ರಾಪುರ ಮಠದ ಶ್ರೀಮದ್ ಜಗದ್ಗುರು ಶಂಕರಾಚಾರ್ಯ ಶ್ರೀ ಶ್ರೀ ರಾಘವೇಶ್ವರ ಭಾರತೀ ಮಹಾಸ್ವಾಮಿಗಳ ಪ್ರೀತಿಯ ಕರೆ.

ಅವಿಚ್ಛಿನ್ನ ಪರಂಪರೆಯ ಶ್ರೀ ರಾಘವೇಶ್ವರ ಭಾರತೀ ಮಹಾಸ್ವಾಮಿಗಳು ತಮ್ಮ 19ನೇ ಚಾತುಮಾಸ್ಯ ವ್ರತಾಚರಣೆಯನ್ನು ಬೆಂಗಳೂರಿನ ಗಿರಿನಗರದಲ್ಲಿರುವ ಶ್ರೀ ರಾಮಾಶ್ರಮದಲ್ಲಿ ಜುಲೈ 3ರಿಂದ 90 ದಿನಗಳ ಕಾಲ ಕೈಗೊಳ್ಳಲಿದ್ದಾರೆ. ಚಾತುರ್ಮಾಸ್ಯ ಪೂರ್ವದಲ್ಲಿ " ಈಕನಸು.ಕಾಂ "ಗೆ ಶ್ರೀಗುರುಗಳು ವಿಶೇಷ ಸಂದರ್ಶನ ನೀಡಿ ಮಠದ ಭಕ್ತ ಕೋಟಿಗೆ ಚಾತುರ್ಮಾಸ್ಯ ವ್ರತಾಚರಣೆಯ ಸಂದರ್ಭದಲ್ಲಿ ಭಾಗಿಗಳಾಗುವಂತೆ ಅಕ್ಕರೆಯ ಕರೆ ನೀಡಿದ್ದಾರೆ.

ಅವಿಚ್ಛಿನ್ನ ಪರಂಪರೆಯ ಶ್ರೀಮಜ್ಜಗದ್ಗುರುಶಂಕರಾಚಾರ್ಯ ಶ್ರೀ ಶ್ರೀ ರಾಘವೇಶ್ವರಭಾರತೀ ಮಹಾಸ್ವಾಮಿಗಳು ಪರಮಪೂಜ್ಯರೂ ಮಹಾನ್ ತಪಸ್ವಿಗಳೂ ಶ್ರೇಷ್ಠವಿದ್ವಾಂಸರೂ ಅಗಿದ್ದ ಬ್ರಹ್ಮಲೀನ ಶ್ರೀ ಶ್ರೀ ರಾಘವೇಂದ್ರ ಭಾರತೀ ಮಹಾಸ್ವಾಮಿಗಳವರಿಂದ 1994ರ ಏಪ್ರಿಲ್ ತಿಂಗಳಲ್ಲಿ ಸನ್ಯಾಸ ದೀಕ್ಷೆ ಪಡೆದುಕೊಂಡರು.

1999ರ ಏಪ್ರಿಲ್ ತಿಂಗಳಲ್ಲಿ ಪೀಠಾರೋಹಣ ಮಾಡಿದರು. ಅಂದಿನಿಂದ ಜೀವ ಜಗತ್ತಿನ ಶಾಂತಿ ಸಮೃದ್ಧಿಗಾಗಿ ತಮ್ಮನ್ನು ಸಮರ್ಪಿಸಿಕೊಂಡರು. ಆಧ್ಯಾತ್ಮ ಬಲದಿಂದ ಜನಸಮುದಾಯವನ್ನು ಬೆಳಕಿನೆಡೆಗೆ ಕೊಂಡೊಯ್ಯುತ್ತಿರುವ ಜೀವ ಕಾರುಣ್ಯದ ನೆಲೆಯಾಗಿರುವ ಶ್ರೀ ಶ್ರೀಗಳವರು ಈ ಜಗತ್ತು ಅವಿರತವಾಗಿ ಅನಂತಕಾಲದವರೆಗೂ ಪರಮಾನಂದದಲ್ಲಿ ನಿರತವಾಗಲೆನ್ನುವ ಸಂಕಲ್ಪದಿಂದ ಕಾರ್ಯನಿರತರಾಗಿದ್ದಾರೆ.

ಭಾರತೀಯ ಗೋ ತಳಿಗಳ ಸಂರಕ್ಷಣೆ, ಅಭಿವೃದ್ಧಿ ಗಾಗಿ ಶ್ರೀಗಳು ಕೈಗೊಂಡ ಯೋಜನೆ ಇಡೀ ವಿಶ್ವವನ್ನೇ ಇತ್ತ ದೃಷ್ಠಿನೆಡುವಂತೆ ಮಾಡಿದೆ.ವಿಶ್ವಗೋ ಸಮ್ಮೇಳನದ ಮೂಲಕ ಮನೆ ಮನಗಳಲ್ಲಿ ಗೋವಿನ ಕುರಿತಾದ ಅಭಿಮಾನ ಜಾಗೃತಿ ಮೂಡಿಸುವ ಕಾರ್ಯವನ್ನು ಮಾಡಿದರು. ಇದೀಗ ಚಾತುರ್ಮಾಸ್ಯದ ನಂತರ "ಮಹಾ ಗೋ ಅಭಿಯಾನ"ದ ಮಹತ್ಕಾರ್ಯವನ್ನು ಸಾರ್ಥಕ್ಯಗೊಳಿಸುವ ಕಾರ್ಯಕ್ಕೆ ಕೈ ಯಿಕ್ಕಿದ್ದಾರೆ.

ಜನರ ಮನ ಪರಿವರ್ತನೆ ಮಾಡುವ ಮೂಲಕ ಗೋ ಸಂತತಿಯ ಅಭಿವೃದ್ಧಿ, ರಕ್ಷಣೆ ಸಾಧ್ಯ ಎಂಬ ಹಿನ್ನಲೆಯಲ್ಲಿ ಗೋ ರಕ್ಷಕರನ್ನು ಸಿದ್ಧಗೊಳಿಸುವ, ಗೋ ಜಾಗೃತಿಯನ್ನು ಸಮಾಜದಲ್ಲಿ ಮೂಡಿಸುವ ಕಾರ್ಯ ಶ್ರೀ ಗುರುಗಳ ಮಾರ್ಗದರ್ಶನದಲ್ಲಿ ಸಂಪನ್ನಗೊಳ್ಳಲಿದೆ.
ಚಾತುರ್ಮಾಸ್ಯ ವೃತ ಮಳೆಗಾಲದಲ್ಲಿ ನಡೆಸಲಾಗುತ್ತದೆ.

ಮಳೆಗಾಲದಲ್ಲಿ ಆಗಸದಿಂದ ಬಿದ್ದ ನೀರ ಹನಿಗಳು ಜೊತೆಯಾಗಿ ತೋಡು, ನದಿ, ಕಾಲುವೆ, ವಿವಿಧ ಮೂಲಗಳ ಮೂಲಕ ಜೊತೆಸೇರಿ ಸಮುದ್ರಕ್ಕೆ ಸೇರುತ್ತದೆ. ಅದೇ ರೀತಿ ಸಾಗರದ ರೂಪದಲ್ಲಿ ಸಮಾಜದಲ್ಲಿರುವ ಭಕ್ತ ಸಮೂಹ ರಾಮನ ಸನ್ನಿಧಿಗೆ ಚಾತುರ್ಮಾಸ್ಯ ಸಂದರ್ಭದಲ್ಲಿ ಬನ್ನಿ... ನಾವು (ಶ್ರೀ ಗುರುಗಳು) 90ದಿನಗಳ ಕಾಲ ಚಾತುರ್ಮಾಸ್ಯ ವ್ರತದಲ್ಲಿ ಭಾಗಿಗಳಾದರೆ ಶಿಷ್ಯ ವೃಂದ ಒಂದೋ , ಎರಡೂ, ಮೂರೋ ...ಅಥವಾ ಸಾಧ್ಯವಾದಷ್ಟು ದಿನಗಳ ಕಾಲ ಈ ಕಾರ್ಯಕ್ರಮದಲ್ಲಿ ಭಾಗಿಗಳಾಗುವ ಮೂಲಕ ಚಾತುರ್ಮಾಸ್ಯ ವ್ರತಾಚರಣೆಯಲ್ಲಿ ಸೇರಿಕೊಳ್ಳಿ...ಜೊತೆಯಾಗಿ ಚಾತುರ್ಮಾಸ್ಯವ್ರತಾಚರಿಸೋಣ ಎಂದರು.

" ಹಿಂದೆ ನೋಡಿ ಮುಂದೆ ಹೋಗಿ..." ಈ ಮಾರ್ಮಿಕ ಸಂದೇಶವನ್ನು ಶ್ರೀ ಗುರುಗಳು ಸಮಾಜಕ್ಕೆ ರವಾನಿಸಿದ್ದಾರೆ. ಪ್ರತಿಯೊಬ್ಬರೂ ಮುಂದೆ ಹೋಗುವ ಭರದಲ್ಲಿ ಹಿಂದಿನ ಪರಂಪರೆ, ನಡೆದು ಬಂದ ಹಾದಿಯನ್ನು ಮರೆಯುತ್ತಿದ್ದಾರೆ. ಇದು ಸರಿಯಲ್ಲಿ ಹಿಂದಿನ ಪರಂಪರೆಗೆ , ಪಥಕ್ಕೆ ವ್ಯತಿರಿಕ್ತವಾಗದಂತೆ ಎಚ್ಚರದಿಂದ ಮುಂದೆ ಹೋಗಬೇಕಾಗಿದೆ. ಪ್ರಗತಿ ಬೇಕೇ ಬೇಕು.

ಈ ಪ್ರಗತಿಯ ಭರದಲ್ಲಿ ಬಂದ ಪಥವನ್ನು ಮರೆಯಬಾರದು...ಹಾಗೆಂದು ಹಿಂದೆ ನೋಡುತ್ತಾ ಸಾಗಿದರೆ ಎಡವುವ ಸಾಧ್ಯತೆಯಿದೆ...ಮುಂದೆ ಸಾಗಿದಷ್ಟು ಹಿಂದಿನ ಪಥವನ್ನು ನೆನಪಿಸುತ್ತಾ ಅದಕ್ಕೆ ಚ್ಯುತಿ ಬಾರದ ರೀತಿಯಲ್ಲಿ ಮುಂದೆ ಸಾಗಿ...ಸಾಗುವ ರೀತಿಯಲ್ಲಿ ಸಮತೋಲನ ಕಾಯ್ದುಕೊಳ್ಳುವುದು ಮುಖ್ಯ ಎಂಬ ಸೂಕ್ಷ್ಮ ಸಂದೇಶವನ್ನು ಶ್ರೀಗುರುಗಳು ನೀಡಿದರು.

- ಹರೀಶ್ ಕೆ.ಆದೂರು

ಮಳೆಗಾಲ ಆರಂಭಾಯ್ತೇ...?

2012-05-31T07:16:00.004+05:30

ರಾಜ್ಯ - ರಾಷ್ಟ್ರ

ಮಂಗಳೂರು/ಮೂಡಬಿದಿರೆ: ಜೂನ್ 1ನೇ ತಾರೀಕಿಗೆ ಮಳೆಗಾಲ ಆರಂಭ...ಹೌದು...ಇದು ಇಂದು ನಿನ್ನೆಯ ಮಾತಲ್ಲ.ಇದೀಗ ಒಂದು ದಿನಕ್ಕೂ ಮೊದಲೇ ಮಳೆಗಾಲ ಪ್ರಾರಂಭವಾಯ್ತೇ...? ಹೌದು ಎನ್ನುವಂತಿದೆ ವಾತಾವರಣ. ಮುಂಜಾನೆಯೇ ಜಿಟಿ ಜಿಟಿ ಮಳೆ ಬೀಳತೊಡಗಿದೆ. ಮುಂಗಾರಿನ ಎಲ್ಲಾ ಲಕ್ಷಣಗಳೂ ಸ್ಪಷ್ಟವಾಗಿ ಗೋಚರವಾಗುತ್ತಿದೆ. ಮಳೆಯ ವಾತಾವರಣ ಪ್ರಕೃತಿಯಲ್ಲಿ ಮೂಡಿದೆ. ಬೆಳಕು ಹರಿಯುವ ಮೊದಲೇ ಮಳೆಯ ಸಿಂಚನವಾಗತೊಡಗಿದೆ. ವಾತಾವರಣದಲ್ಲಿ ಮಳೆಗಾಲದ ಛಾಪು ಕಾಣತೊಡಗಿದೆ. ಅಂದರೆ ಮಳೆಗಾಲ ದಿನಕ್ಕೂ ಮುಂಚೆಯೇ ಪ್ರಾರಂಭವಾಯ್ತೇ...? ಎಂದು ಕೃಷಿಕರು ಮಾತನಾಡುತ್ತಿದ್ದಾರೆ...

ಮಠ ಎಂದರೆ ತ್ರಿವೇಣಿ ಸಂಗಮ - ಶ್ರೀರಾಘವೇಶ್ವರ ಶ್ರೀ

2012-05-31T06:45:00.006+05:30

ರಾಜ್ಯ - ರಾಷ್ಟ್ರ

ಪೆರಾಜೆ-ಮಾಣಿ: ಮಠ ಎಂದರೆ ತ್ರಿವೇಣಿ ಸಂಗಮ. ಅಲ್ಲಿ ದೇವರಿದ್ದಾನೆ, ಭಕ್ತರೂ ಇದ್ದಾರೆ. ಅವರಿಗೆ ಕೊಂಡಿಯ ರೂಪದಲ್ಲಿ ಗುರುಗಳಿರುತ್ತಾರೆ. ಮಠವೆಂದರೆ ಗುರು - ಶಿಷ್ಯ - ದೇವರು ಈ ಮೂರರ ಸಂಗಮ.ಅರ್ಥಾತ್ ತ್ರಿವೇಣೀ ಸಂಗಮ ಎಂದು ಶ್ರೀಮಜ್ಜಗದ್ಗುರುಶಂಕರಾಚಾರ್ಯ ಶ್ರೀಶ್ರೀರಾಘವೇಶ್ವರಭಾರತೀಮಹಾಸ್ವಾಮೀಜಿಯವರು ನುಡಿದರು.

ಪೆರಾಜೆ - ಮಾಣಿ ಮಠಕ್ಕೆ ಭೇಟಿ ನೀಡಿದ ಶ್ರೀ ಗುರುಗಳು ಸೇರಿದ್ದ ಭಕ್ತರನ್ನುದ್ದೇಶಿಸಿ ಆಶೀರ್ವಚನ ನೀಡಿದರು. ಪೆರಾಜೆಯ ಮಾಣಿ ಮಠದಲ್ಲಿ ಚಾತುರ್ಮಾಸ್ಯ ವೃತಾಚರಣೆಗೆ ಸಂಪೂರ್ಣ ಮನಸ್ಸಿದೆ. ಮುಂದಿನ ಚಾತುರ್ಮಾಸ್ಯ ಈ ಮಠದಲ್ಲೇ ನಡೆಸುವ ಬಗ್ಗೆ ಇರಾದೆಯಿದೆ ಎಂದ ಶ್ರೀಗಳು ಅದಕ್ಕೆ ಪೂರ್ವಭಾವಿಯಾಗಿ ಶಿಷ್ಯವರ್ಗದ ಅನುಕೂಲಕ್ಕಾಗಿ ಬೃಹತ್ ಸಭಾಭವನವೊಂದನ್ನು ಶೀಘ್ರ ನಿರ್ಮಿಸಬೇಕಾಗಿದೆ. ಈ ಕೆಲಸ ಅತ್ಯಂತ ಸರಳವಾಗಿ ಮತ್ತು ಅಷ್ಟೇ ಸುಸೂತ್ರವಾಗಿ ನೆರವೇರಲಿದೆ. ಶ್ರೀ ರಾಮನ ಪೂರ್ಣಾನುಗ್ರಹ ಲಭಿಸಲಿದೆ ಎಂದು ಆಶೀರ್ವದಿಸಿದರು.

ಸಭಾಭವನವೆಂದರೆ ಅದು ಶಿಷ್ಯರಿಗೆ ಸಂಬಂಧಪಟ್ಟದ್ದು. ಮಠದ ಮುಂಭಾಗದಲ್ಲಿ ಮಠಕ್ಕೆ ಮುಖಮಾಡಿದಂತೆ ನಿರ್ಮಾಣಗೊಳ್ಳಲಿದೆ. ಅಲ್ಲೂ ಒಂದು ಅಚ್ಚರಿ ಕಾಣಬಹುದಾಗಿದೆ. ಮಠದ ಮಧ್ಯಭಾಗದಲ್ಲಿ ಶ್ರೀ ರಾಮನ ಗುಡಿಯಿದೆ.

ಶ್ರೀ ರಾಮ ದೇವರು. ಮಠದಲ್ಲಿ ಗುರುನಿವಾಸವಿದೆ. ಮುಂಭಾಗದಲ್ಲಿ ಭಕ್ತರ - ಶಿಷ್ಯರ ಅನುಕೂಲಕ್ಕಾಗಿ ಸಭಾಭವನ,ಯಾತ್ರೀ ನಿವಾಸ.ಅಲ್ಲೂ ಭಕ್ತ - ಶಿಷ್ಯಯ ಹಾಗೂ ದೇವರ ನಡುವೆ ಗುರುಗಳು. ಅದೇ ತ್ರಿವೇಣೀ ಸಂಗಮವಿದ್ದಂತೆ ಎಂದು ಶ್ರೀ ಗುರುಗಳು ವ್ಯಾಖ್ಯಾನಿಸಿದರು.

ಎಳೆಬೊಂಡಕ್ಕೆ ಮಾರುಹೋದ ಅಮೆರಿಕನ್ನರು...

2012-05-30T12:34:00.003+05:30

ವೈವಿಧ್ಯ

ಇದು ಜೀವನೋದ್ದೀಪದ ಪೇಯ... ನೈಸರ್ಗಿಕ ಹಾಗೂ ಆರೋಗ್ಯವರ್ಧಕ ಪಾನೀಯ...ಈ ಕಾರಣಕ್ಕೇ ಅಮೆರಿಕನ್ನರು ಇದನ್ನು ಮುಗಿಬಿದ್ದು ಕೊಳ್ಳುತ್ತಿದ್ದಾರೆ...

ವರ್ಣರಂಜಿತ ತಂಪು ಪಾನೀಯಗಳನ್ನು ವರ್ಜಿಸಿ ಈ ನಿಸರ್ಗದತ್ತ ಪಾನೀಯದತ್ತ ಆಕರ್ಷಿತರಾಗಿದ್ದಾರೆ. ಇಷ್ಟೇ ಅಲ್ಲದೆ ಅತ್ಯಂತ ಪ್ರತಿಷ್ಠಿತರು ಮಾರು ಹೋಗಿದ್ದ ಅಕಾಯ್ ಬೆರಿ ಮತ್ತು ಕಬ್ಬಲಾ ವಾಟರ್ ಸ್ಥಾನಕ್ಕೆ ಇದೀಗ ಕೋಕನಟ್ ವಾಟರ್ ಏರಿನಿಂತಿದೆ...

ಅಮೆರಿಕನ್ನರು ಇದೀಗ ತಮ್ಮ ಆರೋಗ್ಯ ಹಾಗೂ ಸೌಂದರ್ಯದತ್ತ ಹೆಚ್ಚಿನ ಗಮನ ಕೊಡುತ್ತಿದ್ದಾರೆಂದರೆ ತಪ್ಪಾಗಲಾರದು. ಕಾರಣ ಈ ಕೂಲ್ ಡ್ರಿಂಕ್ಸ್ ಹಾಗೂ ಇತರೆ ಸಿದ್ಧ ಪಾನೀಯಗಳಿಂದ ಹೆಜ್ಜಾಗಿ ನೈಸರ್ಗಿಕ ಪಾನೀಯಗಳ ಬಳಕೆಯತ್ತ ಅಮೆರಿಕನ್ನರ ಚಿತ್ತ ನಟ್ಟಿದೆ. ಇದಕ್ಕೆ ಪುರಾವೆ ಎಂಬಂತೆ ವಿಟಾಕೋಕೋ, ಜೀಕೋ ಎಂಬ ಅಮೇರಿಕಾದಲ್ಲಿನ ಅತಿದೊಡ್ಡ ಮಾರಾಟ ಸಂಸ್ಥೆ ಹೇಳಿಕೆ ಪ್ರಕಾರ ತೆಂಗಿನ ಕಾಯಿಯ ಉದ್ಯಮ 53ಶತಕೋಟಿ ಮೌಲ್ಯದ ಅತಿದೊಡ್ಡ ಉದ್ಯಮವಾಗಿ ಬೆಳೆದಿದೆಯಂತೆ...!

ಆಪಿ, ಪ್ರೂಟಿ, ಕೋಲಾ, ಮಾಝ್ಹಾ ಮೊದಲಾದ ಪೇಯಗಳ ಸಣ್ಣ ಪ್ಯಾಕೆಟ್ ,ಶ್ಯಾಶೆಗಳಂತೆಯೇ ಸಂಸ್ಕರಿಸಲ್ಪಟ್ಟ ಎಳೆನೀರಿನ ಪ್ಯಾಕೆಟ್ ಶ್ಯಾಶೆಗಳು ಅಮೆರಿಕದಲ್ಲಿ 3ಯು.ಎಸ್.ಡಾಲರ್ ಗಳಿಗೆ ಭರ್ಜರಿ ಮಾರಾಟ ಆಗುತ್ತಿದೆ.
ಎಳೆನೀರಿನಲ್ಲಿ ಫ್ಯಾಟ್ ಇಲ್ಲ. ಇದರಲ್ಲಿ ಅಲ್ಪ ಪ್ರಮಾಣದ ಶುಗರ್, ಸ್ವಲ್ಪ ಕೊಲೆಸ್ಟ್ರಾಲ್ ಮಾತ್ರವಿದೆ. ಡಯಟ್ ಮಾಡುವಂತಹವರು ಈ ಎಳೆನೀರನ್ನು ಇಷ್ಟಪಡುವುದೊಳಿತು. ಈ ಮಾತು ಚೆರಿಯನ್ ಹಾರ್ಟ್ ಫೌಂಡೇಷನ್ ನ ಡಯಟಿಂಗ್ ಸಲಹಗಾರ್ತಿ ನಿರ್ಮಲಾ ಜೇಸುದಾಸ್ ಅವರದ್ದು.

ಎಳೆನೀರಲ್ಲಿ ಎಲೆಕ್ಟ್ರೋಲೈಟ್ಸ್ ಅಂಶ ಸಮೃದ್ಧವಾಗಿದೆ. ಇದು ಅತ್ಯುತ್ತಮ ಪೋಷಣಾ ವಸ್ತುವಾಗಿ ಕಾರ್ಯನಿರ್ವಹಿಸಬಲ್ಲದು ಎಂಬುದು ಅವರ ವಾದ.
ದೇಹಕ್ಕೆ ಅವಶ್ಯಕವಾಗಿ ಬೇಕಾಗಿರುವ ಪೊಟ್ಯಾಷಿಯಂ ಅಂಶವೂ ಈ ಬೊಂಡದಲ್ಲಿ ಲಭ್ಯವಿದೆ. ವೈರಾಣು, ಶಿಲೀಂದ್ರ, ಬ್ಯಾಕ್ಟೀರಿಯಾ ವಿರೋಧಿಯಾಗಿಯೂ ಎಳೆನೀರಿಲ್ಲಿರುವ ಅಂಶಗಳು ಹೋರಾಟನಡೆಸುವುದರಿಂದ ಇದೊಂದು ಉತ್ತಮ ಆರೋಗ್ಯ ಸಂಜೀವಿನಿಯಾಗಿ ಕಂಡುಬರುತ್ತದೆ. ಮನುಷ್ಯರಲ್ಲಿರುವ ಆತಂಕ, ಖಿನ್ನತೆ, ಒತ್ತಡವನ್ನು ಕಡಿಮೆ ಮಾಡುವುದಲ್ಲದೆ ದೇಹಾಲಸ್ಯವನ್ನು ಹೋಗಲಾಡಿಸಿ ಸದಾ ಉಲ್ಲಾಸಭರಿತರನ್ನಾಗಿಸುವ ವಿಶಿಷ್ಠಗುಣ ಈ ಎಳೆನೀರಿನಲ್ಲಿದೆ ಎಂಬುದು ಸಂಶೋಧನೆಯಿಂದ ದೃಢೀಕರಿಸಲ್ಪಟ್ಟಿದೆ.

ಇದು ಮಲೆನಾಡಿನ ಖಜುರಾಹೋ...

2012-05-30T09:21:00.010+05:30

ವಿಶೇಷ ವರದಿ
ಸಂಸ್ಕೃತಿಯ ಪುನರುತ್ಥಾನಕ್ಕೊಂದು ಹೊಸ ಹೆಜ್ಜೆ - ಭಾಗ : 3
ಕಾಡಗರ್ಭದೊಳಗೆ ನೆಲೆನಿಂತ ಪಾಳುಬಿದ್ದಿ ಶಿಥಿಲ ಶ್ರೀ ಉಮಾಮಹೇಶ್ವರ ದೇವಾಲಯ ಪ್ರಾಚೀನ ಶಿಲ್ಪಿಗಳ ಚಾಣಾಕ್ಷತನಕ್ಕೆ ಹಿಡಿದ ಕೈ ಗನ್ನಡಿ. ಪುರಾತನ ಹಾಗೂ ವಾಸ್ತುವೈಭವಕ್ಕೆ ಒಂದು ನಿದರ್ಶನ ಈ ದೇಗುಲ.

ವಾಸ್ತುಶಿಲ್ಪ ಮತ್ತು ಜ್ಯೋತಿಷ್ಯಶಾಸ್ತ್ರಗಳ ಅಷ್ಟಮಂಗಲ ಪ್ರಶ್ನೆಯಿಂದ ತಿಳಿದು ಬಂದ ಮಾಹಿತಿಯಂತೆ ಕ್ರಿ.ಶ.10ನೇ ಶತಮಾನಕ್ಕೆ ಸೇರಿದ ದೇಗುಲ ಇದಾಗಿದೆ.

"ಕಲ್ಯಾಣ ಚಾಲುಕ್ಯ ಶೈಲಿ"ಯಲ್ಲಿ ನಿರ್ಮಾಣಗೊಂಡ ಈ ದೇಗುಲ 2400 ಚದರ ಅಡಿಗಳಷ್ಟು ವಿಶಾಲವಾಗಿದೆ. ಹಸಿರು ಕ್ಲೋರೈಸಿಸ್ಟ್ ಶಿಲೆಯಿಂದ ಈ ದೇಗುಲ ನಿರ್ಮಾಣಗೊಂಡಿದೆ. ಸಂಪೂರ್ಣ ಶಿಲಾಮಯವಾದ ಈ ದೇಗುಲದಲ್ಲಿ ಬಹಳಷ್ಟು ಬೃಹತ್ ಗಾತ್ರದ ಏಕಶಿಲೆಗಳನ್ನು ಬಳಸಲಾಗಿದೆ.

ದೇಗುಲದ ಮುಂಭಾಗದಲ್ಲಿರುವ ರಂಗಮಂಟಪದ ಕಂಬಗಳು, ದೇಗುಲದ ಗರ್ಭಗುಡಿಯ ಪ್ರವೇಶ ಧ್ವಾರ, ಗರ್ಭಗುಡಿಯ ಹೊರ ಆವರಣ ಮತ್ತು ಒಳಭಾಗದಲ್ಲಿರುವ ಕಲಾತ್ಮಕ ಕೆತ್ತನೆಗಳು, ಬಾಗಿಲ ಜಂಥಿಯಲ್ಲಿನ ಕೆತ್ತನೆಗಳು, ಕಿಟಿಕಿ, ಗೋಡೆಗಳ ಸೂಕ್ಷ್ಮಕೆತ್ತನೆಗಳು ವಾಸ್ತುಶಿಲ್ಪದ ದೃಷ್ಟಿಯಿಂದ ಅತ್ಯಂತ ಮಹತ್ವ ಪಡೆಯುತ್ತದೆ.

ಈ ದೇಗುಲವು ರಂಗಮಂಟಪ, ಸಭಾಮಂಟಪ, ಪ್ರದಕ್ಷಿಣಾ ಪಥ, ಸಾಂದರ ಗರ್ಭಗೃಹವನ್ನೊಳಗೊಂಡಿದೆ . ಸಭಾಮಂಟಪದ ಕಲಾತ್ಮಕ ಕಂಬಗಳು ಭಿನ್ನ ವಿಭಿನ್ನ ಕೆತ್ತನೆ ರಚನೆಗಳು, ಕಕ್ಷಾಸನದ ಮೇಲಿನ ಕಂಬಗಳು, ಮೇಲ್ಛಾವಣಿಯ ಮರದ ಪಟ್ಟಿಕೆಗಳಂತಹ ಶಿಲಾ ರಚನೆಗಳು - ಕೆತ್ತನೆಗಳು ಪ್ರಾಚೀನ ಶಿಲ್ಪಿಗಳ ಅಮೋಘ ಕೈ ಚಳಕಕ್ಕೆ ಸಾಕ್ಷಿಯಾದಂತಿದೆ.

ಅಚ್ಚರಿ ಮೂಡಿಸುವ ಮಿಥುನ ಶಿಲ್ಪಗಳು...

ರಂಗಮಂಟಪವು ಪೂರ್ವ, ಉತ್ತರ ಮತ್ತು ದಕ್ಷಿಣದಲ್ಲಿ ತೆರೆದುಕೊಂಡಂತೆ ರಚಿಸಲಾಗಿದೆ. ದೇವಾಲಯದ ಹೊರಭಾಗದಲ್ಲಿ ರಂಗ ಮಂಟಪದ ಕೆಳಭಾಗದ ಗೋಡೆಗಳ ಮೇಲೆ ಕೆತ್ತಲಾದ ಮಿಥುನ ಶಿಲ್ಪಗಳು ಕಲಾತ್ಮಕತೆಯಿಂದ ಕೂಡಿದೆ.

ಕಾಲಗರ್ಭದೊಳು ಸಿಲುಕಿ ಈ ಶಿಲ್ಪಗಳು ಇಂದು ಕಳೆ ಕಳೆದುಕೊಂಡಿವೆ. ಅಸ್ಪಷ್ಟವಾಗಿ ಹಲವು ವಿಗ್ರಹಗಳು ಗೋಚರಿಸುತ್ತಿವೆ. ಆದರೆ ಈ ವಿಗ್ರಹಗಳ ಕೆಳಭಾಗದಲ್ಲಿರುವ ಕುಸುರಿ ಕೆತ್ತನೆಯ ರಚನೆಗಳು ಇಂದಿಗೂ ಅತ್ಯಂತ ಸ್ಪಷ್ಟವಾಗಿರುವುದು ಮಾತ್ರ ವಿಚಿತ್ರ.
ಈ ದೇಗುಲದ ಹೊರಭಾಗದಲ್ಲಿ ಮಿಥುನ ಶಿಲ್ಪಗಳು ಕೆತ್ತಲ್ಪಟ್ಟಿವೆ.

ಇದು ಮಲೆನಾಡಿನ ಖಜುರಾಹೋ ಎಂದೇ ಖ್ಯಾತಿ ಪಡೆದಂತಿದೆ.
ಇಲ್ಲೂ ಒಂದು ವೈಶಿಷ್ಟ್ಯತೆಯನ್ನು ಗುರುತಿಸಬಹುದಾಗಿದೆ. ದೇಗುಲದ ಹೊರಭಾಗದ ಗೋಡೆಗಳಲ್ಲಿ ಮಿಥುನ ಶಿಲ್ಪಗಳ ಮಧ್ಯೆ ಮಧ್ಯೆ ದೇವರುಗಳ ಶಿಲ್ಪವನ್ನು ಕೆತ್ತಲಾಗಿದೆ. ಕೆಲವೊಂದು ಭಾಗಗಳಲ್ಲಿ ಅಪೂರ್ಣ ಶಿಲ್ಪಗಳನ್ನು , ಇನ್ನು ಕೆಲ ಭಾಗದಲ್ಲಿ ಕೆತ್ತನೆಗಳಿಲ್ಲದೆ ಹಾಗೇ ಬಿಡಲಾಗಿದೆ.

ಈ ಮಿಥುನ ಶಿಲ್ಪಗಳ ಕೆತ್ತನೆಗಳು ಹಲವು ಶಿಲ್ಪಿಗಳ ಕೈಚಳಕದಿಂದ ನಿರ್ಮಾಣವಾಗಿದೆ ಎಂಬುದನ್ನು ಸೂಚಿಸುತ್ತದೆ ಅಥವಾ ಅತ್ಯಂತ ಅವಸರವಸರವಾಗಿ ಈ ದೇಗುಲದ ಕಾರ್ಯ ಪೂರ್ಣಗೊಳಿಸಲಾಗಿದೆ ಎಂಬುದನ್ನು ಸೂಚಿಸುತ್ತದೆಯೋ ಸ್ಪಷ್ಟವಾಗುತ್ತಿಲ್ಲ.

ನಾಳೆ: ಪುನರ್ ಸೃಷ್ಠಿ...

ಚಿತ್ರ - ಲೇಖನ: ಹರೀಶ್ ಕೆ.ಆದೂರು.

ಮಳೆಗಾಲಕ್ಕೆ ಮಲೆನಾಡು ಸಿದ್ಧ...

2012-05-29T16:37:00.005+05:30

ವಿಶೇಷ ವರದಿ

ಇನ್ನು "ಕಂಬಳ"ದ್ದೇ ಕಾರುಬಾರು!

ಹೌದು ಮಳೆಗಾಲಕ್ಕೆ ಮಲೆನಾಡು ಸಿದ್ಧವಾಗುತ್ತಿದೆ.ಮಳೆಗಾಲ ಬಂತೆಂದರೆ ಮಲೆನಾಡ ಮಂದಿಗೆ ಒಂದು ರೀತಿಯ ಖುಷಿ...ಕೆಲಸಗಳಿಗೆ ಒಂದಷ್ಟು ಬಿಡುವು...

ಧೋ ಎಂದು ಸುರಿವ ಮಳೆಯಲ್ಲಿ ಕುರುಕಲು ತಿಂಡಿ ಮೆಲ್ಲುತ್ತಾ ಸಮಯ ಕಳೆಯುವ ಮಜಾ ಇದ್ಯಲ್ಲಾ ಅದು ಮಲೆನಾಡಿಗೆ ಹೋಗಿಯೇ ಅನುಭವಿಸಬೇಕು. ಹೊಸತಾಗಿ ಮದುವೆಯಾದ ಮದುಮಕ್ಕಳು ಮನೆಗೆ ಬಂದು(ಕೊಡೆ ಅಮವಾಸ್ಯೆ) ಒಂದಷ್ಟು ಕಾಲ ನಿಲ್ಲುವುದು ಈ ಮಳೆಗಾಲದಲ್ಲಿ... ಮಲೆನಾಡಿನ ಹಲವೆಡೆಗಳಲ್ಲಿ "ಕೇರಿ"ಗಳು ಕಾಣಸಿಗುತ್ತವೆ.

ವಿವಿಧ ಕೇರಿಗಳಲ್ಲಿ ಸಾಲುಮನೆಗಳು ... ಹೊರಗಡೆ ಅಬ್ಬರದ ಮಳೆ ಸುರಿಯುತ್ತಿದ್ದರೆ ಇತ್ತ ಕೇರಿಯವರೆಲ್ಲಾ ಒಂದೇ ಮನೆಯಲ್ಲಿ ಸೇರಿ ಕಥೆಹೊಡೆಯುವುದು ಮಳೆಗಾಲದ ಮಾಮೂಲು ನೋಟ.

ಮಲೆನಾಡಿನ ಹವೆಯೇ ಹಾಗೆ...ಒಮ್ಮೆ ಮಲೆನಾಡಿಗೆ ಕಾಲಿಟ್ಟರೆ ಅಲ್ಲಿಂದ ಹೊರಬರುವುದಕ್ಕೆ ಮನಸೇ ಬರುವುದಿಲ್ಲ. ಸಮಶೀತೋಷ್ಣ ಹವೆ...ಚಳಿಗಾಲದಲ್ಲಂತೂ ಚಳಿ ಚಳಿ... ಕಂಬಳಿ ಬೇಕೇ...ಬೇಕು...ಇತ್ತ ಮಳೆಗಾಲದಲ್ಲಿ ಜಡಿಮಳೆ...ಮನೆಯೊಳಗೆ ತಣ್ಣನೆಯ ವಾತಾವರಣ... ಬಿಸಿ ಕಾಫಿ ...ಮೆಲ್ಲಲು ಒಂದಿಷ್ಟು ಕುರುಕಲು ತಿಂಡಿ ಇದ್ದರೆ ಸಮಯ ಹೋಗಿದ್ದೇ ಗೊತ್ತಾಗದು...

ಮಲೆನಾಡಿನ ಮನೆಗಳು ಇನ್ನೂ ಹಳೆಯ ಶೈಲಿಯನ್ನುಳಿಸಿಕೊಂಡಿವೆ. ಅಪವಾದಕ್ಕೆಂಬಂತೆ ಹಲವು ಮನೆಗಳು ಆಧುನಿಯತೆಯ ಸೋಗಿಗೊಳಪಟ್ಟಿದ್ದರೂ ಹಳೆಯ ಶೈಲಿಗಳನ್ನು ಪೂರ್ತಿಯಾಗಿ ಬಿಟ್ಟಿಲ್ಲ.

ಮಳೆಗಾಲದಲ್ಲಿ ಜಡಿಮಳೆಯ ಸಮಯದಲ್ಲಿ ಚಾವಡಿಯಲ್ಲಿಯೋ ಮಹಡಿ (ಮೆತ್ತಿಮೇಲೆ ಕುಳಿತು...)ಮೇಲೆ ಕಂಬಳಿ ಹಾಸಿ ಅದರ ಕುಳಿತು ಮಳೆ ನೋಡುತ್ತಾ ಮಾತುಕಥೆ ನಡೆಸುತ್ತಾ ಚಪ್ಪರಿಸಲು ಒಂದಿಷ್ಟು ಹಲಸಿನ ಸೊಳೆಯ ಅಥವಾ ಬಾಳೆಕಾಯಿಯ ಚಿಪ್ಸ್ ಇದ್ದರೆ ಈ ಪ್ರಪಂಚವೇ ಮರೆತಂತೆ...

ಮಲೆನಾಡಿನ ಪ್ರತಿಯೊಂದು ಮನೆಯಲ್ಲೂ ಮಳೆಗಾಲದಲ್ಲಿ ಈ ಚಿಪ್ಸ್ ಇದ್ದೇ ಇರುತ್ತದೆ. ಮಲೆನಾಡಿನ ಮಹಿಳೆಯರಿಗೆ ಮೇ ತಿಂಗಳು ಪೂತರ್ಿ ಬ್ಯುಸಿಯ ಸೀಸನ್. ಮನೆಯಲ್ಲಿ ಹಲಸಿನ ಮರವಿದ್ದರೆ ಸೈ...ಇಲ್ಲದಿದ್ದಲ್ಲಿ ಊರಮನೆಯಿಂದಾದರೂ ಹಲಸಿನ ಕಾಯಿ ತಂದು ಚಿಪ್ಸ್ ತಯಾರಿಸದೆ ಕೂರುವವರಲ್ಲ ಮಲೆನಾಡಿನ ಮಹಿಳೆಯರು.ತೋಟದೊಳಗಿರುವ ಬಾಳೆಗೊನೆಗಳು ಕ್ಷಣಾರ್ಧದಲ್ಲಿ ಚಿಪ್ಸ್ ಆಗಿ ಪರಿವರ್ತನೆಯಾಗುತ್ತದೆ. ಇನ್ನು ಬೇಸಿಗೆ ತುಂಬೆಲ್ಲಾ ಮಲೆನಾಡ ಮಹಿಳೆಯರು ಹಪ್ಪಳ , ಸೆಂಡಿಗೆ ತಯಾರಿಯಲ್ಲಿ ಕಳೆದುಹೋಗಿಬಿಡುತ್ತಾರೆ...

ಮಳೆಗಾಲಕ್ಕೆ ಬೇಕಾದಂತಹ ಚಿಪ್ಸ್ ಅಂದರೆ ಅಂತಿಂಥ ಚಿಪ್ಸ್ ಅಲ್ಲ. ಅದಕ್ಕೆ ಮೆಣಸಿನ ಪುಡಿ, ಇಂಗು, ಜೀರಿಗೆ ಪುಡಿ ಹಾಕಿ ಉಪ್ಪು ಬೆರೆಸಿದ ಮಸಾಲಾ ಚಿಪ್ಸ್... ಗರಮಾರಗಮ್ ಚಿಪ್ಸ್...ಬಾಯಿಗೆ ಹಾಕುವುದು ಬಿಡಿ...ನೋಡಿದರೇ ಬಾಯಲ್ಲಿ ನೀರೂರುವಂತಹ ಚಿಪ್ಸ್...ಅಡುಗೆ ಮನೆಯಲ್ಲಿ ಚಿಪ್ಸ್ ಕರಿಯತೊಡಗಿದರೆ ಇಡೀ ಊರಿಗೇ ಪರಿಮಳ... ಪರಿಮಳಕ್ಕೆ ಹೊಟ್ಟೆಯಲ್ಲಿ ಹಸಿವು ಪ್ರಾರಂಭವಾಗುತ್ತದೆ.

ಹೊರಗೆ ಧೋ ಎಂದು ಮಳೆ ಸುರಿಯುತ್ತಿದ್ದರೆ ಕಂಬಳಿ ಮೇಲೆ ಕೂತು ಹಳೆ ಪುರಾಣಗಳನ್ನು ಮತ್ತೆ ನೆನಪಿಸುತ್ತಾ "ಅಜ್ಜಿ ಕಥೆ"ಗಳು ಹೊರಬರುತ್ತವೆ. ಊರ - ಕೇರಿಯ ಆಪ್ತರು, ಮನೆ ಮಂದಿ, ನೆಂಟರಿಷ್ಟರೊಂದಿಗೆ ಸೇರಿ ಪಟ್ಟಾಂಗದಲ್ಲಿ ನಿರತರಾದರೆ ಚಿಪ್ಸ್ ಹೊಟ್ಟೆಗಿಳಿಯುವುದು ತಿಳಿಯುವುದೇ ಇಲ್ಲ.

ಮಳೆಗಾಲಕ್ಕೆ ಕನಿಷ್ಠ ಮೂರ್ನಾಲ್ಕು ಡಬ್ಬಕ್ಕಾಗುವಷ್ಟು ಚಿಪ್ಸ್ ಪ್ರತಿಯೊಂದು ಮನೆಯಲ್ಲೂ ರೆಡಿಯಿದ್ದೇ ಇರುತ್ತದೆ. ಯಾವ ಮನೆಗೆ ಹೋದರೂ ಬಿಸಿ ಬಿಸಿ ಕಾಫಿಯೊಂದಿಗೆ ಕರಿದ ಹಲಸಿನ ಸೊಳೆಯ ಮಸಾಲಾ ಚಿಪ್ಸ್ ಪ್ರತ್ಯಕ್ಷವಾಗುತ್ತದೆ. ದೊಡ್ಡ ದೊಡ್ಡ ಹಪ್ಪಳವೂ (ಕರಿದ ಅಥವಾ ಕೆಂಡದಲ್ಲಿ ಸುಟ್ಟ) ಕೆಲವೊಮ್ಮೆ ಲಭ್ಯ,.

ಮಳೆಗಾಲವೆಂದರೆ ತೋಟದ ಕೆಲಸಕ್ಕೆ ಕೊಂಚ ರೆಸ್ಟ್... ಮಲೆನಾಡ ಪುರುಷರು ಬಾಯಿಗೆ ಕವಳ ಹಾಕಿ ಇಸ್ಪೀಟ್ ಆಡುತ್ತಾ ಕೂತರೆ ಇತ್ತ ಮಹಿಳೆಯರು ಪಗಡೆಯಾಟದಲ್ಲಿ ನಿರತರಾಗುತ್ತಾರೆ... ಕೆಲವೊಂದು ಕಡೆಗಳಲ್ಲಿ ಮನೆ ಮಂದಿ, ಕುಟುಂಬಸ್ಥರು, ಆಪ್ತರು, ಊರ ಮನೆಯವರು ಸೇರಿ ಚಿಪ್ಸ್ ಕಂಬಳ, ರೋಟಿ ಕಂಬಳ, ಚಕ್ಕುಲಿ ಕಂಬಳ ನಡೆಸುವುದೂ ಉಂಟು...ಅಂತೂ ಮಳೆಗಾಲವನ್ನು ಮಲೆನಾಡಿನಲ್ಲಿ ಅನುಭವಿಸುವುದು ಒಂದು ಹೊಸ ಅನುಭವ ನೀಡುವುದರಲ್ಲಿ ಸಂದೇಹವಿಲ್ಲ...

ನಾಡೋಡಿ.