السلام عليكم ..

أسعد الله أوقاتكم أعزائي بكل خير .. وأبارك لكم بالشهر الكريم .. وأعاننا الله واياكم على صيام وقيام ماتبقى منه

في الفترة الماضية غبت عن المدونة وعن الديره وعن البيت  وعن اليابسة بشكل كامل .. في الفتره الماضيه كان هناك مشروع جديد توه بادي وهالمشروع بحري .. وتم اختياري لتغطية هذا المشروع .. وقمت الموافقه بعد تردد بسيط مني ولكن بعد التفكير قبلت من باب الاستفاده وتجريب الجديد ..

قبل توجهي للبحر طلب مني  أخذ كورس خاص بالهاليكوبتر .. وبدون هالكورس ماراح اقدر اروح لوجهتي..و بعد بحثي عن الكورس علشان اعرف وش سالفته انصدمت وطقتني النفضه على خفيف .. وخصوصا اني ما اعرف اسبح .. ولكن الحمد لله حضرت الكورس والامور طلعت هينه وبسيطه على عكس ماوصفولي اللي خذوه قبلي .. والكورس للي حاب يطّلع عليه اسمه helicopter underwater escape training وبتلقون له مقاطع كثير في يوتيوب.
بعد اتامي للكورس جاء موعد الانتقال ..وودعت الأهل وتوجهت للمطار ومنه الى الهاليكوبتر والحمد لله تم الهبوط بسلام على البارجه .. في البدايه كنت شايل هم الشغله الجديده بسبب الأشياء اللي سمعتها من كثير من اللي جربو شغل البحر من قبل.. ولكن الحمد لله الأمور كانت تساهيل ومشت على مايرام .. بديت دوامي كمناوبه ليليه .. تبداء من الساعه العاشره مساء وتنتهي في العاشره صباحاً.. وعانيت في بداية الأمر لأنه استلزم مني اني اغير وقت نومي وهذا الشئ كان صعب جداً .. ففي أول يوم وصلت الساعه 9 صباحا الى البارجه .. واستمريت الى الساعه 12 الظهر وانا اقوم بعملية التسجيل ويعرفوني على المنطقه وطرق السلامه وبعض التوجيهات الإلزاميه اللي تقدم للشخص حال وصوله .. وبعد الانتهاء تم ابلاغي ان دوامي بيكون مسائي؟؟ طيب انا وش ينومني الحين؟ وايش اللي بيخليني اسهر الليل؟ لكن الحمد لله قزرتها على فلمين في الفتره النهاريه ونمت لي كم ساعه قبل الدوام بالغصب .. وبعدها بدا دوامي المسائي .. وفي الليله الأولى اظطريت اني اتعاطى جرعه اكبر من ماكسويل هاوس الكوفي الراقي والمشروب المفضل للعمده يوسف عمر .. والحمد لله ساعد على تصفية المزاج وعلى السهر الى الساعة العاشرة صباحاً.

واستمريت لمدة اسبوعين تقريبا بنفس البارجه .. الى ان تم نقلنا الى بارجه أخرى لأن البارجه الأولى غير مخصصه للمياه العميقه .. وفي البارجه الأخرى استقبلت رمضان واتميت فيها بقية الأيام.

في هذي الفتره مريت بمواقف واستفدت اشياء كثير .. سواء عن اللي حولي او عن نفسي انا شخصياً ..

خلونا ناخذها حبه حبه اذا ماوراكم شئ ..

• نظراً لأني السعودي الوحيد الموجود في البارجه فهذا يتطلب مني الاحتكاك والتكيه مع الجنسيات الأخرى .. طبعا لا يوجد بينهم عرب .. الا في الفتره الأولى كان معاي اثنين من الجنسيه المصريه بس ماكنت اشوفهم الا في المطعم اوقات الوجبات .. واختلاطي بهالجنسيات الغير عربيه لمدة طويله خلاني اعرف اشياء كثير عنهم و عن بعض طبايعهم وعن مدى تأثير الاعلام علينا برسم صورة عن بعض الجنسيات رغم إننا ماتعاملنا معاها.. ومن هالجنسيات كانت الجنسيه الصينيه ..وكانت هذي المرة الأولى اللي أتعامل معاهم عن قرب ولمدة طويله ومن تعاملي معهم اكتشفت انهم شعب عملي جداً وضحوك عكس ماكنت راسم في بالي انهم ثقيلين طينه.. ولكن طلعو ودودين وعمليين وروحهم طيبه وأنا أتكلم عن مايقارب الـ 40 صيني كانو على ظهر البارجه
• نظراً لأن الشركه القائمه بالمشروع شركة أمريكيه .. فالمهندسين والاداريين جميعهم من نفس الجنسيه الأمريكيه .. واعطو بعض الشغلات للمقاولين .. والعمال سواء اللحامين او الصباغين او المساعدين من الجنسيات الأخرى .. لكن كل الوظائف المسؤوله والاداريه امريكيه..يعني رئيس التحميل امريكي والمسؤول عن الراديو امريكي والمسؤول عن الدهان برضو امريكي .. والمقاولين اللي جايبهم ايضاً امريكان.. على الرغم من ان هذي الوظايف ليست وظايف كبيره لكنهم حرصو على ” أمركتها ” لأنها شركتهم وهم الباقيين .. ومفروض كذا تكون السعوده .. الحرص والنظر الى بعيد .. فالامريكان أمركو اي وظيفه عدله ورزو راعيها رغم انها عاديه جداً.
• الأمريكان من الشركة المشغله او البريطانيين اللي من الدوائر الأخرى .. أغلبهم كبير في السن .. وبدون مبالغه بعضهم طق السبعين .. من النوع اللي يفطر على فكس علشان يلين عظامه .. ورغم هذا لازال يشتغل .. والبعض يسمي هذا انجاز وحب للعمل .. لكن انا اشوف ان هذا موت للشخص رغم انه عايش!! هالشيبان اللي بينهم وبين القبر شبر .. يشتغلون في البحر طول السنه ويطلع لهم ثلاث شهور بالسنه اجازه وهم على هالشغله لهم سنين ..ولما كنت اسولف مع بعضهم .. اغلبهم بالاجازه حقته يكون اما في تايلند ولا بديره ثانيه يمارس الصياعه .. واغلبهم لا عيال ولا زوجه ولا أهل  .. واللي عنده عيال برضو مادرى عنهم وهم مادرو عنه .. وحمدت ربي على النعمه اللي حنا فيها .. عندنا الواحد اذا وصل الستين جلس وحوله عياله واحفاده .. وهذول حياتهم حياة حيوانيه ماغير أكل وشرب لا اهل ولا ناس .. وكل همه ملذاته. الترابط الأسري نعمه يفتقدها الكثير
• في البدايه كان الابتعاد عن الاهل والبيت والام والزوجه والاخوان شئ صعب جداً .. وتأثيره قوي .. وتحس بالخنقه والثقل .. وهالشئ بدا يخف مع الوقت .. ماهو لاني قليل خاتمه  ولكن مع مرور الوقت الامور تتغير والانسان يبدا يتعود .. وهالشئ يخلي الواحد مايخاف من المستقبل ومن البعد لانه راح يتعود عليه وهالشئ طبعا سلبي وايجابي .. وهالشغله خلتني اعرف كيف الناس اللي لهم سنين يشتغلون في الاماكن النائيه تعودو على الوضع .. وعلشان كذا المفروض الواحد مايطول الغيبه علشان لا يتعود واخرته مثل الشيبان اللي ذكرتهم بالنقطه السابقه.
• بعد ابتعادي عن الناس وفي اثناء الغياب اكتشفت اشياء في علاقاتي وبعض أصحابي .. البعض كنت اظن اني غالي عليه جداً .. ويفقدني ويحس بغيابي .. والبعض الآخر كنت أظن اني لا أعني له أي شئ .. سواء من الاصدقاء او من بعض اصحاب العمل .. ولكني لما جيت هنا اكتشفت اشياء غير .. اكتشفت ان بعض اللي كنت اعدهم اقرب من الاخوان لما درو بذهابي حتى مسج ما ارسل ولا سلم ولا نشد عن الحال.. والبعض اللي كنت احس اني ما اعني له شئ اغرقني بسؤاله عني وبتفقده لحالي ويحاول تصبيري والتهوين علي .. وهذا الشئ مايخليني احكم على احد طبعاً فلكل شخص أكيد عذرة.. ولكن يخليني اعرف ان الدنيا ماتتغير بغيابي ولا بوجودي الا عند اللي يغليني لوجه الله .. ماهو بقصد الوناسه والسوالف وبس .. والله لا يحرمني من اللي سألو عني وصبروني في ابتعادي
• بعض الروابط الأسريه لا تشعر بها وانت عايشها .. فنادراً ما تشعر بالشوق لأخيك الأكبر أو الأصغر .. او تحن لحظن امك او لمعانقة ابوك .. وهذا الشئ يعود لأنك عايش بينهم ومعهم .. ولكن بعد ابتعادي عنهم حسيت بقيمة الاشياء اللي كانت عندي وماكنت احس بطعمها .. وخصوصا في البارجه كان لا يوجد ارسال للجوال والتلفون الثابت ماهو دايم شغال(ثريا) وهذا الشئ زاد البعد والغربه واحساسي بالشوق لكل لحظه .. اشتقت لصباح الوالده وللجلسه مع والدي نتقهوى .. واشتقت لكل اخواني واشتفت لسوالفهم وجلستهم .. ولأول مره كنت أحس بألم بعدهم .. طبعاً ما أنسى الشوق للزوجه الغاليه .. والله لا يحرمني منكم ولا يريني فيكم مكروه .. ورساله لكل شخص بين أهله .. ترى ماهو لازم تغيب عنهم علشان تشتاق لهم او تعرف قيمتهم .
• رمضان هذي السنة هو أول رمضان يمر علي بعيد عن الأهل وعن الناس .. وكان جداً ثقيل وخالي من أي طعم .. لم أشعر بالجو الإيماني العام .. لم أشعر باحساس الفطور او السحور لأنه غالبا كنت افطر واتسحر في الغرفه .. افتقدت صلاة التراويح ولذة صلاة الجماعه .. أحسست بقيمة المسجد ونكهة صلاة الجماعه .. والحمد لله اني سوف أكون في العشر الأواخر متواجد على اليابسه .. والله يعيني على الصيام والقيام ..
• الأكل من ملذات الدنيا .. ورغم ان النظام المتبع هنا هو البوفيه المفتوح ثلاث مرات في اليوم .. الا انه من بعد رابع يوم بديت افقد الشهيه .. وذلك لأنه مافيه مثل اكل البيت .. وبعد دخول رمضان زادت المعاناه .. فلم أكن أتخيل رمضان بدون سمبوسة الوالده !!! كيف ؟ اظطريت اني اروح واقول للشيف الهندي .. يابن الحلال الحقني .. أبي سمبوسه .. وقلت بما انه هندي فاكيد انه هم اهلها .. ولكن صدمني انه قالي مايعرف للسمبوسه .. ولكن بحمد الله في ثالث يوم صيام لقيت السمبوسه موجوده في وقت الفطور .. وطلع اللي يسويها واحد ثاني غير الشيف .. صح انها ماهي نفس سمبوسة الوالده .. ولكن على الأقل تحس انك تفطر… واللي كنت أبي أوصل له في هذي النقطه إنه مافيه زي اكلنا الخليجي .. طعم ونكهة وبهارات وشغل عدل .. وانا من هنا أعلن توعدي للأكل الخليجي بكافة أنواعه .. جايك بالكبسه جايك
• بعد هذي التجربة البحربة .. استفدت ان الإنسان لا يصدق كل مايسمعه ولا ياخذ بوصف بعض الناس لأنه يبالغ ويخلي من الحبه قبه .. قبل لا اجي هنا سئلت عن عن ظروف العمل .. فرغم ماسمعته عن صعوبة العمل في البحر وحجم المسؤوليه كونك ممثل للشركه والقسم .. وغيره من الأمور الصعبه .. لكن بعد التجربه طلعت الأمور سهالات واسهل بكثير من عملنا على البر .. واكتشفت ان البعض يبالغ في بعض الأمور .. فلا تستفسر اشخاص عن شئ في مستقبلك .. فصعبهم يمكن يكون سهل عندك .. ولكن تخويفهم لك يمكن يخليك تغير قرارك .. إلا إن كان هالاشخاص اللي بتستفسر منهم اشخاص ايجابيين وناصحيين .. وابتعد عن المهوليين اللي يخلون من الحبه قبه

والمواضيع كثير في هالتجربه وأكثر من اني أذكرها كلها في تدوينه وحده ..

ولكن بشكل عام كانت تجربة جميلة واستفدت منها الكثير .. واشكر رئيسي في العمل اللي اقترح علي هالشئ .. لأنها أضافت لي الكثير .. واسئل الله ان ينفعني بها ..

في صباح الأربعاء القادم سيكون موعد رحلتي .. وبرجع اركب الهاليكوبتر وارجع لنفس المطار وأخذ سيارتي وارجع للبيت زي ما بديت ..

____________

وأحب أشكر كل من راسلني وسئل عن سبب غيابي عن المدونه .. والله لا يحرمني منكم

إن منهج القرآن الفريد ، منهج يسعد البشرية كلها ويقودها إلى الكمال المقدر لها في هذه الحياة
وقد وضع القرآن المنهج الدائم لحياة إنسانية متجددة , وإنطلاقاً من الإيمان بهذه المعاني

فقد شهدت العاصمة السعودية الرياض يوم السبت 26 شعبان تدشين فعاليات

حملة “عش حياتك مع القرآن”

وهي أول حملة إعلامية وطنية تعتني بتعزيز القيم القرآنية، وتمتد طوال شهر رمضان المبارك.
تنطلق الحملة بإشراف مؤسسة آسية للاستشارات التربية والأسرية
ومشروع عش حياتك مع القرآن ..مشروع اجتماعي قيمي يهدف إلى

تعزيز القيم القرآنية وتوضيح أهميتها في حياة أفراد المجتمع مع غرس المفاهيم
والقيم والمثل والآداب العامة المستمدة من كتاب الله
بقصد تعزيزها لمعالجة الظواهر والسلوكيات الطارئة على مجتمعنا .
فكلما اقترب المجتمع من قيمة قرآنية فإنه ينعكس إيجابا على

سلوك أفراده فتنخفض المشكلات النفسية وتخف معدلات العنف والجريمة .
للمزيد عن أهداف الحملة تصفح موقع الحملة
http://www.with-quran.net/

تدوينه لدعم الحمله

عزيزي الزوج يجب أن تعلم بأن الزواج هو عالم من العكس عكاس ..
تختلف فيه الأذواق والأفكار والأساسيات لدى كل طرف من أطرافه المتمثله فيك وفي زوجتك ..
لا تتحسر من اختلافك مع زوجتك في بعض الأمور ..
فهذا هو الزواج .. وهذه هي الفطرة ..
لا يصل بك الحال الى أنك تشعر بأنك أتعس مخلوق بذا الأرض ..
اسمع مني وانا اخوك .. ترى هذا حالك وحال الكثير من المتزوجين .. لا تظن انك انت الوحيد اللي بينك وبين زوجتك اختلاف في الهوايات والاهتمامات وفي الطبايع..

• اذا الزوج من النوع اللي يحتر ويقدر شئ اسمه مكيف وغرفه بارده .. بتلقى زوجته تستبرد وتقدر الصيف ولهوبه
• اذا الزوجه رومنسيه وتحب الشموع ومسك الأيادي وتسبيل العيون .. بتلقى الزوج مايفرق في التعامل بين خويه ابو صالح وزوجته .. الا انه مايشيش مع زوجته في مقهى قرنفله
• واذا لقيت الزوج رومنسي ومن النوع اللي يعطس بكلينكس ومرهف الحس .. بتلقى زوجته ما غير مريول المطبخ و ورقة وقلم علشان تكتب الطلبات..ورمنسيتها انها تستقبله والفوطه على كتفها بعد مانشفت يدها من غسيل تقطيع البصل
• اذا لقيت الزوجه راعية طبخ ونفخ وفنانه بالمطبخ .. بتلقى الزوج مايفرق بين البرياني و التريكاي وبين البيض المسلوق
• واذا لقيت الزوج هاوي استطعام الأكل ويقدر النكهات الهندي والصوص الصيني .. بتلقى زوجته راس مالها كبسه حمراء ومكرونه بشمل وماصخه بعد
• اذا لقيت الزوج مدمن انترنت ولغات برمجه ومهووس بذا الأمور .. بتلقى زوجته آخر شئ تعاملت معاه له علاقه بالتكنلوجيا هو الأتاري
• اذا لقيت الشخص راعي بر وبحر وسفر ومقناص .. بتلقى زوجته أقصى طموحها هو زوليه في الحوش وقهوة ورطيبات على حزة العصريه
• اذا لقيت الزوجه مثل الفراشه و ذربه ومرتبه وكل يوم لبس وكل فتره بستايل جديد .. بتلقى زوجها في البيت راعي فلينه علاقي وهاف قصير أبو طقطق ..واذا كشخ لبس طاقيه شخال
• اذا لقيت الزوج ونيس وراعي ضحك وفرفشه .. بتلقى زوجته مكشرة طول اليوم كأنها شامه ريحة خايسه .. وهوايتها تقرى صفحة الوفيات

والحالات كثير والاختلافات أكثر وانا اخوك.. فلا تضيق صدرك .. وهالأمور لها حكمه حنا نجهلها ..

وصدقني هذي الاختلافات هي من اسرار السعاده .. فعن طريقة تبداء المشاكل .. وبعدها يكون التراضي وتبداء تحس بشعور الرضى والسعاده ..

لكن لو حياتك على طول ماشيه عوافي .. بتمل ..وماسمعت عبدالمجيد يوم يقول .. ملح المحبه ياحبيبي زعلنا؟ ..

وشفت حتى هالاغنيه لو تقولها لزوجتك .. يمكن بتجي وتقولك ليه ملح؟ ليه ماتكون سكر المحبه؟ماتدري اني ما احب الملح؟ولا تبي ترفع ضغطي وتذبحني؟

مو قلت لك فيه حكمه حنا نجهلها من هالاختلافات ياسيدي؟

—————

ولا يغرك اذا شفت اثنين متفقين في كل شئ .. لأنهم بيتطلقون قريب .. لأن الناس بتصكهم عين

شفت شلون ان حالك أحسن منهم؟

————–

هالتدوينه اهداء لكل زوج أو زوجه يظن نفسه أتعس الموجودين .. ويتخيل انه توجد حياه أخرى في انتظاره و هو محروم منها .. ويعتقد أنه هناك من يوافقه ويشابهه في كل أموره .. وهذا الشعور يخليه يبدا يمل من حياته الزوجيه ويكون سبب انهيارها .. وكله بسبب وهم حطه في باله ان هناك شخصيه أخرى تشابهني وهي تستحقني وأنا أستحقها ..

بودكاست جديد جمعني بأحمد باقضوض و ماشي صح .. بعنوان “ أرنب نط”

نتحدث فيه عن ظاهرة الأرانب السعوديه .. ومدى انتشارها .. وتم مناقشة :

- أرنب الفقر

- أرنب القطار الأخضر

- أرنب التعليم

وبعض الأرانب العابرة الأخرى

مع كل الشكر لكل من فؤاد الفرحان و شاكر السفياني .. على ابتكارهم الأرنبي .. #Arnab

كل هذا تجدونه في بودكاست حلم سعودي ..

رأيكم يهمنا .. فلا تبخلو علينا

يقولك فيه مواطن سعودي يقاله أبو سعد .. يسكن في راس تنورة .. وعنده ولدين واحد يقاله راشد والثاني اسمه خالد ..

طبعاً بتقولون وشلون يقاله ابو سعد وعياله اسمهم راشد وخالد ..

راشد ياطولين الأعمار توفى إثر أزمة ربو حادة .. تعرض لها بعد معاناه طويلة مع أمراض الرئوية ..

أبو سعد يظن ويعتقد ويكاد يجزم ان سبب هذي الأمراض اللي اصابت ولده و أدت الى وفاتة هي شركة النفط المجاوره الى منزله ..

فأبو سعد كل يوم اذا طلع يصلي الفجر يشوف غمامة سوداء جايه على بيته .. ناتجه عن التلوث الصادر من المعمل المجاور الى منطقتهم السكنيه ..

وبخاطرة يقول ماذبح راشد الا انتي يا شركة البترول .. وبعدم حرصك على مستويات التلوث وعلى مواقع المعامل ..

المهم أبو سعد خف رجله وراح لمحامي سعودي يقالة بندر البندر..

اطلع بندر على القضيه وهي الأولى من نوعها في المحاكم السعوديه …ليس لأنه لا يوجد تلوث بالسعوديه .. ولكن لأن المواطنين سمحين وحبايب ومؤمنين بالقضاء والقدر ويرجعون كل شئ له ..فما يحتاج انهم يشتكون أحد..

بندر اقتنع بالقضية وآمن باحتمالات صحة كلام ابو سعد ..

المحامي بندر استعان بشركة عالمية لقياس كمية التلوث في المنطقه المجاورة لمنزل أبو سعد .. وطلب منهم معرفة الشروط العالميه لتواجد مصافي النفط ومعاملها .. وهل يشترط تواجدها خارج النطاق العمراني .. أم حالها في راس تنورة وبقيق والجبيل وغيرها من المدن السعوديه يعتبر صحيح..

اللي اكتشفه بندر بعد حصوله على التقارير .. ان كمية التلوث أكبر من المسموح فيها .. واحتمال كونها هي السبب الريئسي لوفاة سعد احتمال كبير … وهذا الاحتمال مدعم بالتقارير الطبيه لسعد الله يرحمه ..

والشغله الأكبر هو ان وجود المعمل في هذا النطاق يعتبر مخالفة صريحة للقانون الدولي ..

بندر خذا نفسه وأوراقه ومعاه أبو سعد وراحو لأقرب محكمه .. ورفع القضيه ..وقبلها القاضي .. وحضر محامي الدفاع من الشركة ..واكتملت أركان القضيه ..

وبعد مانثر بندر الدلائل والشهادات والقوانين الدولية والمخالفات الموجوده في القضيه .. انصدم محامي الدفاع وشاف انه ماله الا ان ينتظر حكم القاضي ..

طالع قاضينا ابو سليمان القضيه .. وقام يقلبها براسه .. قال الحين انا لو حكمت للمدعي والشركة عوضته بالمبلغ المطلوب .. وقتها بيغتني أبو سعد ومحاميه .. وبعدها محاكمنا بتمتلي..

باللي يبون يرفعون قضية على شركة الكهرباء وانقطاعات التيار لأنها سببت خطر على ولدهم اللي حياته مرتبطه بالاجهزة الكهربائيه ..

وباللي يبون يرفعون قضية على المطعم الفلاني لأنه سمم ورعهم ..

وباللي بيرفعون قضية على مقاولين مشاريع الدولة لأنهم ذبحو عيالهم على التحويلات الغير مجهزة للاستخدام الآدمي..

وباللي يبون يرفعون قضية على الدفاع المدني لأنه تأخر في تلبية النداء والبيت تفحم قبل لا يوصلون..

وباللي بيشتكي على وزارة الصحه لأنهم نسو فوطه في بطن بنتهم وسببة لها عقم ..

والثاني بيجي بيشتكيني لأني حكمة على ولده بالغلط وخليته حرامي وهو اللي جاي يرفع القضيه ..

وبعد ماقلبها القاضي في باله .. قال مالي الا اروح للخطه “B”ةوهي الخطة التنحيشه ..

طالع ببندر بنص عين وبنظره استفزازيه مصطنعة.. وقاله لم أوراقك وخشرتك واقضب الباب وخل عنك انت وموكلك هالكلام الفاضي .. هالشكاوي ماتمشي عندي ..

وقتها ارتفع ضغط بندر وهذا الشئ المطلوب عندي القاضي .. وقاله بندر في حالة غضب : ماتمشي عندك؟ ليه محكمة أبوك؟

وقتها ابتسم القاضي ابتسامة مخفية .. وقالها بصوت غاضب تمثيلي!! تغلط علي؟ تسبني؟ ياااااعسكري .. شله هو وموكله وارمهم بالتوقيف ..

وقتها تبسم محامي الدفاع .. وقالها بخاطرة .. ماتغيرت يابو سليمان

وبالطريقة هذي  صار بندر وأبو سعد عبرة لكل من تسول له نفسه باستخدام الطرق القانونيه لرفع شكوى ضد جهة حكوميه أو شبة حكوميه أو تجارية ويحاول انه يطالب بتعويض ..أو يحاول يسن سنة “سيئة” بالمطالبة بالحقوق ..

____________

-القصه خيالية-

شغلة غريبه .. بلد يتكفل بتكاليف الدراسه لجميع طلاب الخارج سواء من ذهب على البعثه او على حسابه .. سواء قُبل أم لا ..سواء بمعدل مناسب أو لا ..صالح ولا طالح.. ويتم التكفل بدراستهم ومعيشتهم وسكتهم وكحتهم .. بكل حب وحنان ..

وبنفس الوقت تعقد أمور طلاب الداخل ..وتفرض عليهم رسوم جديده ..والأغلب يدرسون في الجامعات”السعوديه” على حسابهم الخاص ..  بكل قسوة وجفاء ..

هل الشغله حب للعلم وللمواطن ولمخه؟ ولا ؟

هالموضوع يذكرني بالمسابقات ذات الجوائز الضخمه اللي تقوم بها الشركات وبنفس الوقت تمنع موظفينها ومن يعولون من المشاركة في المسابقه ..

بالله مو شغله غريبه؟

_____________

في السابق كتبت تدوينة بنفس العنوان .. وكانت 12 شغلة استغربت منها وحطيتها في تدوينه وحده ..

ولكن شغلة اليوم لغرابتها .. فهي تستحق تدوينه مفرده

عذراً على كلمة “العرق” اللي بالعنوان .. لأنها كلمه مقززة وكريهه ومرتبطه بالروائح الكريهة والزحمه والخياس ..

ولكن القرف من رائحته أكثر بكثير من قرايته .. وعلشان كذا اخترتها بالعنوان..

العرق شئ طبيعي .. وينتج من الانسان الطبيعي بسبب الحرارة او التوتر والقلق وغيرها من الأسباب الطبيعيه ..

والعرق بطبيعته يكون مروح .. والمروح تطلق على الشئ المخيس .. وقالت الأعراب مخيس خايس اذا فاحت ريحته ..

وكل هالأشياء طبيعيه ..

لكن اللي ماهو طبيعي ان الشخص المتعرق يبقى بعرقه وخياسه .. ويأثر برائحته على نفسيات الآخرين .. وبعض الأحيان يصل الحال الى التأثير على النظر .. بحيث يصاب الشخص ببعض الضبابيه في عيونه من شدة رائحة المروح اللي جمبه ..

بعد البحث والتحري مالقيت فتوى تفيد بحرمة مزيل العرق.. ولم أجد من العادات والتقاليد اللي تعيب على الشخص اللي يتروش أويتنظف ..

طيب .. دامها ماهي حرام ولا عيب .. ليه يالمخيس ما تتسبح وتتطيب وتنشر السعاده من حولك بدال مانت خانق العالم؟

من وجهة نظري أشوف ان النظافه جزء كبير منها يجي عن طريق التربيه ..

بعض العوائل توارثت الوصاخه والجلافه .. من كبيرهم الى صغيرهم مايعرفون شئ اسمه مزيل عرق,شامبو,صابون,بودرة ..بل وصل فيهم الحال انهم يظنون اللي يستخدمها ماهو رجال..

اللي يعرفونه من عيد الى عيد يتروشون بالماء بس .. وهذا التصرف,اللي هو التروش بالماء فقط من بعد الخياس .. يساعد على “التحمض” اللي هو وصول مرحلة الحموضه بسبب تكتل طبقات العرق في الشخص .. لأن الماء لا يزيل العرق من الجسم .. وهذا بدورة ينتج الرائحه اللي تسبب الضبابيه اللي ذكرتها بأول الموضوع ..

فيجب أن ننشر ثقافة النظافه ونربي أبنائنا عليها ..

لازم يعرفون أساسيات النظافه والتروش ..لازم الأم تلاحظها على عيالها .. لازم الأبو يكون قدوة لعياله بهالشئ ..

وشئ حلو ان تخلي السباحه بنظام خاص .. وأنا أقترح هالنظام اللي أشوفه من وجهة نظري ناجح ..

اللي هو :

1. الاستحمام بالماء
2. غسل الشعر وفركه بالشامبو مع التركيز على نوعية الشعر المناسبه..يعني الدهني اذا خذا للشعر الجاف بتصير معصرة زيت فوق راسه
3. غسل الوجه بالصابون ..وانصح بصابون ديتول
4. فرك كامل الجسم بالليفه والصابون لأن من دورها ازالة العرق و تفتيح المسام وراح تعطيك احساس جميل .. وانصحكم بليفة القفاز اللي في بودي شوب
5. بعد ما تتنشف .. يجي دور الخطوة الرئيسيه .. وهو استخدام مزيل العرق المناسب لبشرتك ..
6. استخدام بودرة جسم وخصوصاً مع جونا الحار .. وانصحكم ببودرة دهن العود من أجمل
7. وقبل لاتطلع فرش اسنانك بالمجون .. واعتبرها فوق البيعه

وبعد هالخطوات انا اظمن لك انك تطلع من الحمام وانت بنفسيه ممتازه .. والناس اذا قعدو حولك .. قالو لك حمام الهنا,ماشاء الله وش ذا الريحة الزينه.

و وقتها اذا الناس قعدو جمبك قامو يسولفون بدون مايصرفون نفسهم بسبب الخياس ..

عزيزي الخايس.. اتق الله في نفسك وفي الناس اللي حولك وخصوصاً زوجتك..ترى الناس تشم ..لكن مو كلهم بيقولون لك تراك مروح..لكن تأكد تراهم بيقولونها من وراك..وقد يصل فيهم الحال الى ان يطلقو عليك لقب خاص مثل ” أبو الريح” أو “المروح” ..أدري ان الخايس مايشم نفسه..لكن هذا ماهو عذر..في جونا الحار لازم تتروش كل يوم خصوصاً اذا كنت تشتغل في الشمس..ومايكفي تغيير الملابس ولبسها على وصاخه..لأن الناس تشوف ملابسك بعيونهم وتشمك بخشومها..

عزيزتي المروحه .. الكلام السابق يشملك..واذا مشيناها للخاس فتأكدي مستحيل نمشيها لك..لأنك انتي أساس الجمال والنعومه واللطافة ..وهالأشياء ماراح تكمل ان كانك “من برى الله الله ومن داخل يعلم الله” ولمعة عبايتك ومسكرة عينك لن تغش معشر المستنشقين.. فلتكوني مصدر للنظافه ومنتجه لجيل نظيف يعرف معنا الاغتسال والرائحه الجميله..واذا الله بلاك بواحد مروح ..فيجب تعليمه وتربيته من جديد بالشكل المناسب من غير تصادم..لأنه حتى الخايس مايرضى الناس يقولون له ياخايس..وبامكانك استخدام “نصيحة أم خطاب اللي ماتزعل الأحباب” لأن زوجك وعيالك يمثلونك قدام الناس..

نحو حياة جديدة خاليه من المروحين ..

____________

كتبت هذا البوست تحت تأثير رائحة أحد الموظفين اللي مر من جمبي وأشر لي على شئ في السقف .. وبغيت أطيح بسبب الصدمه اللي جاتني من ريحته .. ومن قوة حركتي وابتعادي عن مصدر الريحه .. الرجال حس ونزل ايده

____________

تدوينه سابقة :

نظف ورعانك تحميهم … نظهم يصبحو حلوين

مقطع فديو له علاقه بموضوعنا

رسالة توعوية من السنعوسي ..نحتاجها هذه الايام

قبل مايقارب السنتين كنت اقلب القنوات بسبب الملل اللي كنت احس فيه من متابعتي المستمره لبعض القنوات بحيث اني حفظتها وحفظت برامجها ..

وبما ان القنوات العربيه صارت اكثر من اللي يتاعبونها .. فهالشئ خلاني اشوف قنوات عجيبه غريبه ومتخصصه باشياء اعجب واغرب ..

وبين استغرابي وتعجبي .. طلعت لي قناة خلتني اضحك وغيرت مودي ..

هالقناه ليس لها من اسمها نصيب .. القناه كانت قناة الحقيقة .. لصاحبها الدكتور البروفسور العبقرينو أبو لبيبه الفاهم العالم صاحب العلاج الشامل لكل أمراض الدنيا راعي الشهادات الدوليه الخفيه .. المدعو الهاشمي ..

وهالقناه متخصصه في كل شئ يحبه العجايز والضعوف الجهّال .. من علاج بالاعشاب وفك السحر والعين والحسد وتفسير الأحلام ..

وهالقناه مخصصه لبث الرماد في اعين الناس .. ويجيبون لك مقابلات مع بعض الاشخاص اللي عالجهم الدكتور المزعوم .. ومن باب الصدفه كلهم من نفس الجنسيه العربيه ..

طبعاً بين فتره والثانيه يطلع لنا هالمليح بجائزه غريبه وعجيبه .. ويجيب لك ناس يكرمونه ويكون التكريم بفندق معين وغالباً يكون في اوروبا ..

بس الغريب في الموضوع ان هالتكريم دائماً ماينقله الا قناته الخاصه .. ومايكون فيه أي تغطية اعلاميه من اطراف اخرى ..

ماعلينا .. الموضوع في الجوائز هذي .. المووضع ان الدكتور تحمس وشطح بعيد ..وحب انه يقفز فوق سقف الخيال..

هالمره أعلنها انه فاز بجائزة أفضل طبيب في العالم ( طن طططنننن)

كيف؟ وشلون؟ مين؟ لا تسألوني

أفضل طبيب وبس ..

طبعاً كالعاده مافيه تغطية اعلاميه الا من قناته .. والتكريم كان فيه جنسيات اجنبيه شقراء .. ولابسين بدل رسميه .. بس واضح انهم اول مره يلبسونها .. شف من وين جايبهم..

اللي صار اني ضحكت على هالاعلان والتكريم .. وطلعني من مود الملل

قمت طلعت جوالي وسجلت الخبر .. لأني كنت خايف انه يحس انها قويه قويه ويحذف المقطع والخبر ..فقلت خلني اسجل هذي اللحظه التاريخيه ..

اللي صار اني سجلتها ورفعتها على اليوتيوب .. ومن يومها وانا بين فتره والثانيه استقبل تعليقات على المقطع من ناس يمدحون في الهاشمي ويقولون انه افضل طبيب جد .. واننا حاسدينه .. وان عنده انجازات عجز عنها جميع اطباء العالم ..

اللي صار اني دخلت على قنوات المعلقين على المقطع .. لأكتشف ان قنواتهم مخصصه للهاشمي فقط .. فيها مقاطع للهاشمي وصور له .. وبعض اليوزرات ماعنده اي مقطع مجرد يعلق على مقاطعه فقط ..

وهذا الشئ أكد لي ان هالشخص دجال محترف .. وموظف له ناس يلمعون صورته الكترونياً ..

وهذا الشئ خلاني ارتاح نفسياً اني ما ظلمت الرجال ..

والله يكفينا شره وشر الدجالين امثاله … ويهدي الناس الضعوف والعجايز اللي يقدرون هالسوالف ويقدسونها وخلو امثال هالدجال يسترزق على حسابهم وحساب جهلهم..

—-

• لمشاهدة الإعلان والتعليقات و ادخل على صفحات المعلقين ليتضح لك دجلهم.. ادخل على هذا المقطع
• منتدى عماني يناقش خبر الجائزه
• ديوان المظالم يرفض دعوى مدعي الطب الهاشمي ضد وزارة الصحة
• الهاشمي: حظري في السعودية خشية نزول الخسائر بشركات الأدوية

• في الأمس مرت على الرياض لحظات عصيبه عانو فيها أهلها من كرم الطبيعه بزخات من السماء .. وقابلها فساد إداري متضخم الى درجة انه اغلق كل مجرى للمياه
• وصلتني الأخبار عن طريق تويتر من الجيل الجديد ووافونا بصورة الواقع وكانو يلومون الفاسدين في القطاعات المسؤولة عن أمن المواطن .. وقابلتهم الإخباريه بتلطيف الحدث ونقل الصورة المغلوطه والترقيع بكل ماأوتو من قوة للفاسدين.
• إتفق المحاصرين في شوارع الرياض عن القصور الواضح للجهات الأمنيه وزودونا بالصور اللي تثبت ان المواطنين هم اللي يقومون بالتنظيم .. وقابلتهم الإخبارية بأن التواجد الأمني موجود والكلام اللي يتناقلونه المغرضين غير صحيح رغم ان كاميرا الإخباريه تثبت هذا الشئ ,بدليل نقلهم لجميع مناطق الرياض ولم أشاهد سوى دورية واحده واقفه على طرف شارع “ناشف”
• وافونا الشباب بصورة لشخص مغطى جثمانه على قارعة الطريق .. وخرج المسؤول في الدفاع المدني يزمجر ويقول ” الوضع طيب والناس تبالغ,مافيه ضحايا أبد” وهو صادق لأنه أصلاً مافيه احد بالشارع من طرفه علشان يبلغه بالواقع
• المراسلين الأحرار من الشباب ينقلون الصور من قلب الحدث لأنهم يريدون أن يثبتو للعالم القصور الحادث .. ومراسلين قناة الاخباريه يتنقلون بسياراتهم “من بعيد لبعيد” خوفاً على النشا اللي بشمغهم.
• الشباب على تويتر يرسلون اقوى الرسائل للفاسدين ويلومونهم وحملونهم المسؤولية لما حدث لهم وللمواطنين .. والإخبارية وضيوفها يرسلون كل اللوم على المواطن ويحاولون ان يمررون رساله بأن المواطن لو جلس في بيته كان ما غرقت الرياض.
• في الأمس وعلى القناة الإخبارية كان المسؤولين يجهزون الدواء قبل الفلعه … جميعهم يخرجون ويبررون ما حدث .. وكأنهم يدافعون عن أنفسهم لعلمهم بأن سهام اللوم ستتوجه لهم ولعلمهم بالتقصير الواضح والذي سيكشفه الانترنت القومي لا الاعلام الرسمي.
• في الأمس وضحت لدي الصورة وتبين سبب محاربة وسائل الاعلام الرسميه لما يسمونه بالاعلام غير الموثوق .. ويقصدون فيه تويتر والفيس بوك .. لأنه عن طريق الإعلام الجديد والشباب الواعي .. لايمكنهم الا الركض لمسايرة الموجه .. ونظراً لكبر السن وسوء اللياقه فهذا الشئ يتعبهم وقد يصبهم بالجلطه ..

بعد هذا الحادثه .. آن للشيبان أن يقولو لأبنائهم ” ياولدي حط لنا على تويتر خلنا نشوف آخر الأحداث الصدقيه”

——

يقول الشاعر فهد بن دلباح:

وانا اشوف الحمام يطير ..وارزاق الحمام  اسـراب

وامنـي نفسـي بخيـرك ولكـن طـارت اسرابـك

وانا اشوف المنافق في كتوفك غارس ٍ له ناب

تزيد الـه العطـا ويـروح لصحابـه ويغتابـك

——

يا أهل الرياض وجدة أعانكم الله على ما أصابكم …

——

رسالة الى القائمين على بلدية الدمام .. ملفاتكم ضخمه .. والمطر يحذركم .. فحاسبو أنفسكم قبل أن يأتي اليكم قائد مسيرة الإصلاح المطريه ليحاسبكم

——

بعض ماقيل :

@SaudiLawyer:هذه الكوارث تُخرج المنافقين كما تَخرج الخنافس من أعشاشها بمثل هذه الحالات. تابع الاخبارية لتعرفهم

الرياض تنادي: مطر… مطر مطر مطر

“إعلان حالة الطوارئ” ماذا يعني؟

بعض المواقع الخاصه بكارثة فساد الرياض :

http://www.riyadhrain.com/

http://www.qaym.com/rain/

وعن طريق تويتر :

تابع #RiyadhRain

—–

مصدر الصورة

في الأمس كانت لي تجربة أولى مع البودكاست مع أخوي أحمد باقضوض ..

وتجدون البودكاست على هذا الرابط ..

تعليقاتكم واقتراحاتكم تهمنا .. بامكانك التعليق في نفس صفحة البودكاست

ياحي الكتابه عند التسجيل ..

بعض السعوديين اذا تطوع ما شاء الله عليه .. يصير أكثر إيمانا من بعض الصحابه .. وأكثر فمها للدين من التابعيين .. وباسم الدين والسنه النبويه تلقاه يتصرف بتصرفات ليس لها دخل لا بالدين ولا بالسنه النبويه الشريفه .. ويجد من يوافقونه على فعلته من نفس فئته .. ليس لأن هذا الشئ صحيح ولكن لأنه يوافق هواهم ونفسياتهم ويشفي غليلهم بالناس اللي يصنفونهم “الفسقة و الفجرة”

بغض النظر هذا الشئ صحيح أو خاطئ  .. يفرحون بأي تصرف لأي شخص يمثل الفريق اللي عزلو نفسهم فيه عن بقية المسلمين ..

_____

في الأمس شفت مقطع لشخص لقبوه ” بأسد الهيئه” يظهر فيه وهو يتسلل الى أحد الأفراح كما يبدو من الأنوار والزوالي المفروشه ..

وبدون مقدمات أخذ يهرول بخفة متناهيه وهجم على مجموعة شباب جالسين جلسة طرب .. وخطف العود و ” درررربج ” كسره الى قطع صغيره .. بحيث ان أطلق صانع أعواد مايقدر يعدله ..

بالنسبه لهالأسد المزعوم أنا ما أدري هو من الهيئه ولا لا ..

ولكن مثل هالتصرف يطلق على صاحبه أسد الهيئه أو أسد الاسلام .. والله عيب

حنا ننطلق بتصرفاتنا من أساس ديني , ولنا مراجعنا , ولنا قائد نقتدي به وبسنته صلى الله عليه وسلم..

عليه الصلاة والسلام يغار على الدين أكثر من هذي الأشكال .. وصحابته الكرام أفهم و أعلم من هذا الشخص ومن هم على شاكلته او يوافقونه بتصرفه ..

ولنا في ابن عمر أكبر دليل على التصرف النبوي الكريم في مثل هذه الحالات ..

سمع ابن عمر مزمارا ، قال : فوضع أصبعيه على أذنيه ، ونأى عن الطريق ، وقال لي : يا نافع هل تسمع شيئا ؟ قال : فقلت : لا ! قال : فرفع أصبعيه من أذنيه ، وقال : كنت مع النبي صلى الله عليه وسلم ، فسمع مثل هذا ! فصنع مثل هذا

الراوي: نافع المحدث: الألباني – المصدر: صحيح أبي داود – الصفحة أو الرقم: 4924
خلاصة حكم المحدث: صحيح

لمشاهدة مقطع العربجي

في صغري كان كل شي في حياتي واضح لا يقبل الشك ، كان والدي – أطال الله في عمره – أقوى واحد في العالم .. كانت امي الاجمل و الاكثر أناقه بين كل نساء الارض ، و “مافي زي طبخها ابدا !! ”  كنت اعرف ما احب و ما اكره .. كنت احب المناهل – برنامج تلفزيوني تعليمي – و اكره افلام الكرتون الغير مدبلجه .. القناة الثالثه هي القناة اللي لا اقف عندها و انا اقلب بين القناتين الاخريين .. كنت احب الايس كريم و اكره الحليب .. كل شي ممكن اصنفه بسهول في خانة “احب ” او “اكره” ..

و لان دوام الحال من المحال .. كبرت – وليتني لم افعل – و اضفت في بواكير مراهتي خانه ثالثه بين الخانتين الطفوليتين و اسميتها ” المنطق ” .. و كلما زاد بي العمر زادت موجودات الخانه الجديدة ..  كان المنطق بالنسبه لي الجسر الى عالم الكبار .. كان المنطق هو المنطقه التي تفصل بين الطفوله و الرجوله – و كل ذلك بحسب محدثكم في ذلك الوقت – ..

لم يطل الانتظار كثيرا حتى بدا المنطق في تغيير قناعاتي السابقه .. في البدايه سحبت لقب اقوى رجل في العالم من والدي ، لان المصارعين اقوى منه كثيرا .. و والدتي لم تعد اجمل نساء العالمين فالمنطق يقول ان المغنيه فلانه اجمل من والدتي بكثير بالاضافه الي ان والدتي  لاتجيد عمل  سوى اربع اطباق عصريه تقريبا .. المنطق يقول اني احسن من الهندي الذي يشتغل في البقاله بجانب بيتنا لان بلدي اغني من بلده و من اجل ذلك قدم كي  يعمل في بلدي .. و هو نفسه  - اقصد المنطق – يقول اني استطيع فرض رأيي علي ايا يكن ، فكل ما انا بحاجه إليه  قليلا من العناد و من ثم احصل علي ما اريد .. كان المنطق يقول ان المناهج اللي ادرسها في المدرسه متخلفه جدا و المدرسين مجموعه من الفاشلين و التدريس بالنسبه لهم مصدر رزق لا اكثر .. المنطق يقول انني استطيع ان افعل ما اشاء وقت ما اشاء و حيث ما اشاء ، فالناس لا دخل لهم بي .. كان المنطق عصا سحريه تنسف كل شي في لمحه بصر .. وقتها كنت مثل من دخل قصر قديم ، كل شي فيه مغطى بقطع من القماش الابيض و كان المنطق القوه الخفيه التي تنزع الاقمشه عن تلك الاشياء حتي تخرج كما هي دون اي حجاب ، و كل ذلك بتعويذة المنطق التي اصبحت اجيدها ..

المنطق هو الحق الكامل هو الكلمه التي لا هوى فيها .. هو المرآه التي تعكس ما تراه دون اي تزييف .. لذلك كنت اشعر بكثير من الارتياح عندما اخضع الاشخاص و الافكار و المشاكل لمبضع المنطق حتى اعطي كل ذي حق حقه .. لابد ان اعترف اني في مرحله ما احببت هذا المنطق و اصبحت اغار عليه !!  كنت امقت كل شخص يزيف هذا المنطق او يخالفه .. و كان يزيد بي الغضب -اكثر – عندما يصف ما يقوم به بانه المنطق .. و كأني لا اعرف المنطق و لا اتعامل معه  .. مثل هؤلاء كنت لا اتسامح معهم ابدا ويصبحون في دائرة المنبوذين فكريا .. التي دخل فيها كل من اعرف ، و بقيت وحيدا خارجها !!

غير ان المنطق نفسه يقول بانه لا يصح ان اكون وحيدا خارج تلك الدائره  ، و من هنا بدأت مرحلة جديده في حياتي ، و اضفت الخانه الرابع في حياتي ، انها خانة الشك و التساؤل !!

فاصبحت اشك و اتسأل في و عن كل شيئ و اي شيئ ، اشك في ان منطقي فيما مضي كان يعمل كما يجب ، اتسأل هل كانت قرارتي السابقه قاسيه  في اغلب الاحيان ، اصبحت اشك في قدرتنا علي التطور، و اتسأل هل ما قاله دارووين صحيحا  و هل سنتطور يوما ما كما يزعم دارووين ، اتسأل هل العلمانيه هي الطريق الوحيد لمجتمع مدني ، و اشك اننا نملك خيارنا في كثير من الأحيان ، اتسأل عن الحريه و الحق و العدل هل لهم وجود في هذه الدنيا ، بإختصار زادت مساحه الضباب  و المنطقه الرماديه بين الاشياء .

في البدايه كانت المنطقه الضبابيه موحشه بالنسبه الي ، كنت اجزع من كل تابوه يكسر امامي ، كنت اتسأل هل عدت طفلا يوم فقدت منطقي ام اصبحت كهلا بشكي و تساؤلي ، و اكثر ما كان يخيفني هو انني لم اختر خانه الشك و التساؤل هذه ، بل انني كنت اهرب منها في كثير من الاوقات .

مع مرور الوقت ، اصحبت خانه الشك و التساؤل سبيلا لي حتي افهم نفسي و افهم العالم من حولي بنوع من التجرد ، في خانة الشك لا  اجد جوابا معلبا ، بل كما هائلا من الاجابات ، و في خانه الشك اصبحت اكثر قدره علي التواصل مع ما يحيط بي ، فلا صور نمطيه  و لا كلمات مأثوره – فكل ذلك موضوع شك  - ، ابتعدت عن المدارس التي مررت بكثيرمنها ، و اخترت اكون في مدرسة الشك و التساؤل .

علمتني خانة الشك ان فوق كل ذي علم عليم ، و امنت ان العليم لو شاء لما اختلفنا علي شيئ  ، و لكان القرآن و السنة لا مجال لخلاف حولهما  ، غير ان له  في ذلك حكمه .

لا اعلم هل سأضيف خانة جديدة  الي خاناتي الاربع  ام لا ، غير أني آمل ذلك بكل تاكيد . فتوقف الخانات الجديدة يعني اني توقفت عن التفكير.

مصدر الصورة

• بعض البشر مثل الطاووس مانعرف منه إلا شكله ومانذكره الا وقت الجمال والغرور وهالنوع احس انه خسر نفسه بتركيزه على جانب الشكل فقط
• بعض البشر مثل اشارة المرور يجبرك توقف عنده خوفاً منه ليس احتراماً له ولما تكون الاشاره خضراء الكل مايضرب لها خبر .. وهذا حال الرئيس المتغطرس بعد تقاعده
• بعض البشر مثل المطب الصناعي .. يجبرك تخفف السرعه عنده لكن في نهاية الموضوع مابيده لا حل ولا ربط مجرد محاولة لازعاجك ببعض الاسئله اللي اجوبتها ماتفرق سواء كانت اجابتها بنعم او لا. لأنك بالأخير ماشي ماشي .. عمركم شفتو مطب يحتاج رقم سري؟
• بعض البشر مثل جواد العلي .. عنده كل المؤهلات لكن مايعرف يغني ولا له قبول بين الناس .. وهذا حال بعض المتعلمين اصحاب المال والمنصب والناس تكرههم وتكره جلستهم.
• والبعض الآخر مثل عبادي الجوهر .. ماعنده لا شكل ولا صوت ورغم هذا يطربك وله قبول بين الناس لانه يعرف يغني .. وهذا حاله حال الفقير الشين العطّالي البطّالي والكل يخطب وده ويرغب بمجالسته.
• بعض البشر مثل أصاله نصري .. يعرف القدرات اللي عنده وواثق من نفسه وعند الأداء يكون الأفضل
• والبعض الآخر مثل فايز السعيد .. لا صوت ولا طرب ورغم هذا عايش الدور مع نفسه
• بعض البشر مثل الشاص .. مايخيب رايك فيه ووقت العازه تقدر تشد الظهر فيه
• والبعض الآخر مثل الكيا .. شكل و استعراض ودعايات ولكن اذا بغيته بحاجه مالقيته .. وما تقدر تسنّد عليه
• بعض البشر مثل جدة .. الكل يسميها عروس والكل يقول انها غير .. وبعد ما جات الأمطار ساح مكياج العروس وطلع وجهها القبيح(ورحم الله شهداء الأمطار وجزاء الخونه عند اللي مايضيع عنده حق) وهالنوع ينطبق على فنانات السيلكون والميك أب
• بعض البشر مثل المنخل .. مايمسك شئ واللي تنثره فيه يطيح … وانتبه واحرص انك تعطيه اسرارك لأنه بيكون آخر يوم لها كأسرار
• بعض البشر مثل الجثه .. لا يضحك ولا يعبر ماتدري هو زعلان هو مبسوط هو ناقد عليك ولا مبسوط منك ما يعرف يفرح لك ولا يحزن عليك ولا يتفاعل مع سالفتك السالفه الأكشن والحزينه نفس الانقعال الأمور كلها سواء عنده.. وهذا النوع انتبه تمسك معه خط سفر لأنك اما بتذبحه ولا بتنزله في نص الطريق بسبب حالة الهستيريا اللي بتصيبك من بروده
• بعض البشر مثل الثعل .. حركاته غريبه وأسئلته أغرب تحس انه يبي يسحب منك المعلومه بخبث .. وهذا الطريقه المثلى للتعامل معه هو بضربه بأقرب شئ جمبك وهو بينحاش وبيقعد يراقبك من بعيد لأنه جد مثل الثعل.
• بعض البشر مثل الغراب اللي بغى يقلد مشية الحمامه ولاهو عرف يمشيها ولا هو اللي عرف يرجع لمشيته .. وغالباً تلقاهم لابسين جنز وردي وعاصب شماغه
• بعض البشر مثل اهل الرياض اذا جاو للشرقيه .. تلقاهم يبون الكل يدرون انهم من اهل الرياض عن طريق اسئلتهم الغريبه لمجرد انهم يبون يقولون ” إنّا بالرياض غير ” وهالبشر تلقاهم اذا راحو لكورس في دولة ما لمدة اسبوع تلقاه يلفون اعناق جميع السوالف علشان يتكلمون عن رحلتهم “الكورسيه” بحاجه او بدون حاجه.
• بعض البشر مثل بعض البعض البشر تلقاهم اشكالهم بشر مع انهم بشر … سبحانك يارب البشر

شغله غريبه ..

• ينادي بالعداله والأمانه والناس تدعيله كل يوم ان الله يوفقه ويصير احد المتنفذين في البلد .. وأول ما يمسك المنصب .. يصرف لزوجته أرض كمنحه من وزارته ..
• يدعو الناس الى الزهد والآخره وأن يكونون ربانيين .. ويطلع من مسجده  ويركب سيارته الألمانيه ويروح لبيت زوجته الرابعه
• يتقلد منصب أمني كبير والناس كلهم مرتاحين لأنه واضح من شكله ان الأمن سيستتب على يده .. ولما يرجع لبيته يلقاه مسروق
• مسؤول يدعو الى السياحه الداخليه في كل المحافل … وهو مايعرف من السعوديه الا العليا .. ولكنه حافظ دواعيس باريس
• دكتور جامعي متخرج من اقوى الجامعات الأمريكيه .. قضى عمره يدرّس في جامعه سعوديه .. وبعد انتهاء عقده مع الجامعه يطالبونه بالرحيل عن البلاد لأنه أجنبي .. وفي  نفس المطار اللي رحلوه منه كان صاف في طابور الأجانب وغير السعوديين ..و يشوف بجانبه مغني عراقي سابقاً صاف في طابور مكتوب عليه للسعوديين فقط.
• شاب يقتل بعض الغزلان في محميه سعوديه يتم التشهير فيه في الجرائد بالبنط العريض ويطلب الابلاغ عنه ممن يتعرف على صورته بسبب انه مفسد في الأرض .. بينما من قتلو البشر في جدة أسمائهم محفوظه بالحفظ والصون وبعيداً عن أعين أهالي الضحايا.
• بلد صحراوي من شماله الى جنوبه ومن شرقه الى غربه .. أي نسمة هواء ممكن تسبب عاصفه غباريه في أراضيه .. مواطنينه يقتلون على الطرقات السريعه بسبب زحف الكثبان الرمليه .. ولما يجي الشخص يبني بيت يضطر انه (يسرق) رمل لعدم وجود تصاريح دفن .. وبنفس الوقت يتم منع تصدير الرمل خارج البلاد للحفاظ على البيئه الفطريه
• مواطن صالح يفتتح مصنع ويعطونه فيزا وحده .. و مواطن آخر غير صالح يفتح له مكتب عقار ويعطونه 30 فيزا غير محددة الجنسيه والمهنه
• مواطن كل همه ديرته ويحاول يحارب الفساد يمنع من السفر لانه كتب مقال .. ومواطن آخر سرق الناس وأخذ أموالهم ويتعذر القبض عليه لأنه خرج من البلاد بعد ان تم الابلاغ عنه بشهر بسبب عدم وفائه في تسليم الأراضي للمواطنين .. وأخذ الملايين معه ونسى بعضها على مدرج المطار
• هيئة الاتصالات تمنع التجوال الدولي بسبب ان هذا الشئ في مصلحة المواطن وان هناك من يستغله استغلال خاطئ وان هذا الشئ في صالح الاقتصاد الوطني  .. هذا التبرير أم الشغلات الغريبه كلها
• الهنود يعتبرون ملوك لبس الوزار ووصلو مرحلة الاحترافيه في لبسه .. ولما يروحون للعمره تلقاهم مايعرفون يمشون بالاحرام بسبب سوء لبسه
• رغم ان ابو جوري دايم يواعدنا ويصفطنا … الا اني لا زلت انتظره في كل موعد يعطينا اياه … جد شغله غريبه ( فيه ناس ماتجي الا بالتشهير)

قبل كم يوم كنت جالس مع أبو سالم نتقهوى .. وسألني عن سبب انقطاعي عن المدونه ..

وقلت له يابو سالم مدري وش جايني .. كل ما افتح المدونه ودي اكتب شئ في بالي , تجيني ضيقة صدر واسكرها .. ولي على هالحال اكثر من شهرين ..

قالي لا يكون معمول لك عمل !!

قلت له وش ذا السوالف .. انا ما اصدق بهالامور ..

قالي طيب انت ايش خاسر .. تعال وشوف بنفسك .. و أول وآخر هي تجربه جديده ..

ونظراً لأني ضايق صدري من هالشغله قلت خلني أجرب ..

المهم قلت له انت تخبر لنا ساحر مظبوط؟ قال لي ايواه .. وانت تعرفه بعد .. الساحر هو صاحبنا ابو سعد !! .. أنا هنا انصدمت .. وقلت له مستحيل يكون صاحبنا ساحر .. الرجال مهندس وماهو راعي هالسوالف ..

قالي يابن الحلال انت شايف كيف غلاء الأسعار .. والرجال حب يشتغل أوفر تايم .. قلت بخاطري الله يجازي اللي كان السبب واللي خلا التجار يحدون المهندسين على هالسوالف ..

المهم رحنا لابو سعد .. ولقيته جالس على ذاك المركاز الأحمر وحاط على كتفه فرو ولابس باروكه لزوم السحر .. طبعاً غير الخواتم والمناكير البنيه  .. المهم الرجال اول ما شافني تبسم وقالي حتى انت راعي هالسوالف .. ” أرهبو أرهبو ” قالها بنفس طريقة ممادو ..

المهم شكيت له الحال .. وبدا بسؤالي عن اسم امي .. وبعدين بدا ينثر البخور وقام يخربط بكلمات وخزعبلات شبيهه بتصريح هيئة الاتصالات لما حاولو يبررون قرارا منع التجوال .. ما تفهم شئ ولكنك تهز راسك وتطبق اللي يقولون ..

المهم بعد هذا كله .. قالي انت معمول لك عمل ومدفون في مدونتك عند البنر .. سألته كيف ووين و مين؟؟ قالي ما أقدروو ( باللهجه الأفريقيه برضو لزوم السحر) المهم طلعته له 500 ريال .. وقالي الحين أقدرووو

قالي اللي ساحرك هو ماشي صح .. كيفف خالد ما غيره ؟ قالي اييييواه هواا هوااا .. طيب ليه سوا كذا؟ قالي الرجال مدونة انضربت وحسابه في تويتر محجوب بعد سالفة البيض المقلي والرجال يشوفك مفتل بالمدونه .. وبدافع الحسد سوا لك هالعمل علشان يصدك من مدونتك ..

قلت له طيب من اللي سوا العمل؟ قال أنا يا محاكيك

قلت طيب ومن اللي دل ماشي صح عليك علشان يسوي لي العمل؟ قال خويك أبو سالم

وقتها وبحالة صدمة قلت ” وش ذا الشله الفاسده!! ”

طلعت مغشوش فيهم ..

ومن هنا قررت تغيير الثيم والحمد لله انفك السحر وعادت المياه لمجاريها ..

**النهــــاية **

—————————–

طبعاً الموضوع مزح .. بس حبينا نحرك المياه الراكده .. يعني ماله داعي احد يروح بيلغ على ابو سعد .. ترى بعض الناس متحرشين ويحبون المداهمات ..

تحياتي لكم ولاخواني اللي ذكرتهم بالسالفه السابقه ..

عدنا لديارنا سالمين وحبينا نبدا السنه الثالثه التدوينيه بثيم جديد .. غيرنا في حجم المدونه وطريقة العرض بحيث تكون افضل واريح للقارئ .. وبغيت اضرب البنر سيليكون بس يقولون انه لها أضرار فهونت ..

وشكراً لكل من سئل عني وراسلني وهذا من طيبكم ..

والحين اقدر اقول

Back

• ان كانك طويل القامه عريض المنكبين .. وصاحبك قصير القامه وعلى قد حاله وتدري انه متضايق من هالشئ .. ارفق فيه وخل عنك الاستعراض
• ان كان شعرك مسبسب شعر هندي .. وخويك أقرع ألمع أصلع … وتدري انه يعاني ومتضايق من هالشئ فما له داعي انك تمشط شعرك قدامه
• ان كانك بنت رشيقة القوام والكل يضرب المثل بجسمك .. وصديقتك او قريبتك مالله رزقها بجسم .. وتدرين انها متوهقه بالملابس وماتلقى شئ يقدها … فارفقي فيها وماله داعي الاستعراض بالجديد لما ترجعين من السوق.
• اذا الله رزقك بعيال بارينك وخايفين ربهم فيك .. وتدري ان خويك عياله معذبينه .. فما له اي لزوم انك تستعرض هدايا عيالك وقصص برهم فيك .. علشان لا تزيد علته عله
• اذا انك شخص عندك من الشهادات الشئ الكثير وانسان المعي والشركات تدور رضاك .. وعندك خويك عاطل ومالله رزقه بوظيفه تلمه .. فما له داعي انك تستعرض العروض والإغراءات اللي تجيك وانت داري المراره اللي بداخله ..
• اذا الله رازقك بالخير وعندك من المال الشئ الكثير .. وتدري ان فلان من الناس على قد حاله ودنياه لاعبه فيه .. فما يحتاج انك تغثه بسوالف مطاعم لندن وفلوسك اللي تبخها يمين ويسار .. في الوقت اللي انت داري انه مايدري وش بيسوي بالاقساط اللي بتحل عليه آخر الشهر ..
• ياحكومه اذا انكم ناويين تتبرعون لشعوب العالم .. وانتو داريين ان شعبكم له سنين بالع موس وساكت .. فما له اي داعي انكم تنشرون الخبر والتقارير .. خلوها بالسر .. مو أحسن؟ حتى يقولون أضمن للأجر علشان مايدخل الرياء في الموضوع ..

باختصار .. خلونا نكون حنيّنين على بعض .. والواحد يرفق بمشاعر اللي حوله .. و يبعد عنه أنانية المشاعر

فرفقاً يا بشر

———-

لا تركزون كثير بالصوره

ان صلح .. صلح حال المجتمع .. وان فشل قول على المجتمع السلام ..

والمجتمع ماراح يصلح الا بصلاح شعبه .. والشعب ماراح يصلحون الا بصلاح الزواج

اقصد بصلاح الزواج .. هو ان يكون قناة انتاج لجيل صالح ينفع البلاد بخيره ..

وهالجيل ماراح يصلح الا في جو أسري ناجح ..

لا يشترط أن يكون الجو كله شموع وورود حمراء .. ولكن يكون بيئه صحيه أخلاقيه ..

وعلشان نوصل لهالمرحله .. لازم ياناس تعرفون من تزوجون او تتزوجون ..

أستغرب من البعض اللي يزوج بنته لشاب مايعرفه ولا يعرف أهله ولا يعرف أحد يعرفه ولا سئل عنه .. تقول كأنه بايع له طاوله مو مزوج بنته ..

وأستغرب أكثر من الشخص اللي يروح يتزوج من ناس على العمياني لا يعرفهم ولا يعرف احد يعرفهم ولا سئل عنهم .. بس شافها في الشارع ولحقها وخطبها ..

هالأبو اللي زوج بنته لشخص مايعرفه ولا حاول يعرف عنه شئ .. لو جاه احد بيستأجر منه شقه .. تلقاه بيئل عنه وعن راتبه ومكان عمله وبيطلب معرفين بعد ..

ولكن يوم الموضوع راس ماله زواج وافق وبس ..

والرجال اللي راح وخطب على العمياني .. لو انه رايح بيشتري سياره .. تلقاه مايدفع فلوسها الا وهو فاحص القير والمكينه ومشيك في المرور اذا عليها حادث ولا لا ..

ولكن يوم الموضوع راس ماله زواج خذاها وبس ..

مثلاً .. في أشخاص أعرفهم .. وأدري انهم واصلين مرحله من الدشره والصياعه والسكر والنكر والمغازل بحيث انهم أصبحو من أعلام هذا المجال الواطي .. واصبح نار على علم في مجال السكرجيه .. ومع هذا يجيني خبر انه تزوج ..

يعني  لو ابو البنت وقف اي واحد عند الاشاره وقاله وش رايك في فلان .. بيقوله ” كررررررر ياوجهه ” .. مايحتاج يسئل احد عند الاشاره .. هو لو يركز بوجهه شوي راح يشوف آثار الدمار على ملامحه .. يعني وشلون ترضى على بنتك وترميها هالرميه مع هالشخص …

البعض يقول يمكن مع الوقت الله يهديه .. وأنا أقول والله ماني مخلي بنتي طريق لهدايته .. اذا اهتدا وعقل الله يحييه ..

وأستغرب أكثر من اللي يتزوج من بيت ريحته وريحة بناته فايحه .. وسمعتهم على كل لسان .. لدرجة انه صار يضرب فيهم المثل في المنطقه كلها .. ومع هذا مع الوقت تشوف اللمبات عند بيتهم اشعار انه في شخص خبل خاطب من عندهم وزوجوه .. وهم ماينلامون اذا زوجوه … لكن انت ياللي جاي تخطب ما تفتح ماتشوف؟؟

انا اقصد بكلامي هذا ان الشخص لازم يحسن الإختيار … وهذا زواج ماهو سوق خضره .. تدخل على البقال وتقوله عطني بعشرة ريال خيار وانت ماشي .. لاتصدق , حتى الخيار الواحد يتفحصه قبل ياخذه ..

واذا بغيت تسئل اسئل شخص تثق فيه … مو اقرب واحد في الشارع تسئله ..

يا جماعه علشان يصلح الزواج وينجح … لازم نحسن الإختيار من البدايه … وخلوكم من المظاهر الخادعه … وعليكم بالسؤال ..

ولا يوجد بيت صالح والزوجين اخلاقهم تعبانه ..

صحيح انه لو الواحد مايزوج ولا يتزوج الا من ناس يعرفهم كان محد تزوج … لكن على الأقل يحسن الإختيار ..

والله يوفق بناتنا وعيالنا وخصوصا العزوبيه منهم ..  والمتزوجين ماني داعي لهم … شبعه هي

——-

مواضيع ذات صله:

لو سمحت واحد طلاق سفري

بقلم : الدكتور طفشان

أمضيت الثماني شهور الفارطة في التنقل بين ألمانيا وبلاد العم سام إلى أن استقر بي الحال في كندا

خلال هذه الفترة .. استنتجت التالي:

1. نحتاج إلى بناء هرم جديد من ثقافة الفرد والمجتمع لنزاحم الأمم في الرقي والتطور .. فما زالت العباءة المخصرة أساس الحراك الثقافي لدينا .
2. رحم الله الشيخ الغزالي !
3. لا أكاد أصدق مقدار جهل الغرب عن الإسلام ولا زلت أتسائل لم ندعو عل النصارى بالويل والثبور بعد كل جمعة .. إن كان ولا بد .. لم لا ندعو على حكوماتهم ورجال الدين لديهم فقط ؟  الأولى أن نحاول أن نعرفهم بحقيقة الإسلام  ف 25000 أمريكيا يسلمون سنويا !
4. كانت ولا تزال صناديق الاقتراع في نظرنا قمة في الغباء .. فكنا ولا نزال وسنظل في انتظار عزرائيل ليقوم بالتغييرات في بعض الوزارات .
5. أننا أكثر أهل الأرض عنصرية .. فلا تزال فينا بقايا من ابن كلثوم :ونشرب إن وردنا الماء صفوا .. ويشرب غيرنا كدرا وطينا
6. أننا أكثر الناس رقيا في العلاقات الفردية من صداقة وبر بالوالدين .. الخ و أكثرهم حماقة على الصعيد الاجتماعي من التزام بالقوانين وتعاملات مع الغير .
7. أن أطفال الغرب قمة في الأدب والفصاحة ولا أعلم كيف يتحولون إلى بهائم مراهقة .
8. لا نزال نؤمن أننا محور هذا الكون .. بينما في الحقيقة .. نحن على الهامش . صدق القصيمي حين قال : العرب ظاهرة صوتية !
9. يا للهول .. لديهم خدمة تسمى بالبريد !
10. لا أعلم لم يروق لي- غفر الله لي – ممارسة دور المفتي في الآونة الأخيرة .. هل لأنها فرصة ذهبية للتنظير؟
11. أن القومية العربية هي أكبر وهم في التاريخ .. فمجلس واحد يجمعك بأبناء العمومة من الشام وليبيا يكفي لفضح ذلك
12. لا أعلم أين هي الأمم المتحدة وحقوق الإنسان عما يجري للأطباء خلال فترة التخصص في المملكة .. فلا زالت كوابيس 4 سنوات قضيتها في التخصص تراودني إلى الآن.
13. أن قيلولة العصرية أكبر نعمة حرمت منها منذ غادرت المملكة .
14. أصبحت أنسب يوميا لتيار جديد.. فأصبح ليبراليا وأمسي سلفيا و بعد الظهر علمانيا وخلال الويكند وسطيا ..

قاتل الله الجهل !

لا أنكر أن (بعض) كتابات الليبراليين تستهويني .. لكن نحتاج أن نعرف (اللبررة) أولا ..

نراكم على خير !!

تماشيا مع الانفتاح الاعلامي والثقافي والسياسي والرياضي والهوائي في المنطقه العربيه ..

تم فتح باب الأسئله لزوار المدونه .. والأسئله تكون على هذا الرابط :

http://www.formspring.me/Brhom

عزيزي السائل أرسل لي وانا اكبس لك .. وستكون الإجابه على قد السؤال ..

بس رجاء لحد يسوي لي سوالف الابتدائي والمتوسطه ويقولي وش اسم امك .. ترى ذا السؤال ماني مجاوبه .. اقولكم من الحين

:pP

لكم وللمدونه وحشه

اللي ماعندوش مايلزموش مثل مصري شعبي خطير .. وينطبق على كثير من الناس اللي يتشفقون على الأشياء اللي ماهي عندهم  ويغفلون الأشياء اللي عندهم ..

فمثلاً ..

• إن كانك بنت سمراء البشره .. فما يحتاج انك اذا لبستي النقاب تصبغين خدودك بهالبودر .. يعني الناس عميان مايشوفون اليد؟ وش فيه السمار ؟؟ كل الحلى والقبله في السمر .. عيشي حياتك يا سمارا وترى الجمال والزين ماله لون ..
• إن كانك شخص أصلع أو على طريق الصلع .. فما له داعي انك تربي اطراف الشعر وتقزر حياتك وانت لابس هالطاقيه علشان توهم العالم ان الشعر مسبسب شعر هندي .. أو انك تلبس لي هالباروكه وتصير كأنك فاترينه في محل.. يا عزيزي الأقرع عيش حياتك مثل ما انت .. وبعدين الصلعه والتقريع هاليومين موضه إغتنم الفرصه واحذف الطاقيه..
• إن كانك شخص طبيعي ومافيك اي شئ لكنك ماتضحك الناس .. فما له لزوم انك تستضرف لأنه ماهو لازم العالم تضحك خلك على طبعك الراكد الثقيل .. و الطبيعه حلوه
• إن كانك بنت مليانه ولا خلنا نقول دبه .. فما له داعي انك تلبسين لي هالعبايه الضيقه وتبرزين لنا المطبات الجانبيه … الصيع الضعاف اذا خصرو عباياتهم يبون يبرزون الرشاقه .. لكن انتي وينك والرشاقه وين … وبعدين الستر مهنا أزين منه .. وسعي عباتك وبلاش قرف وخلي الترزز لأهله ..
• اذا نك انسان من منطقه معينه ولكم لهجتكم الخاصه .. فما له أي داعي انك اذا جاء يوم الأربعاء غسلت سيارتك وحلقت دقنك وصرت تتكلم بلهجة أهل الرياض وماغير ” في ذا وفي ذاك ” خلك على لهجتك وافتخر فيها ومافيه احد احسن من احد والقانون كفل لكل شخص كاشخ ان يجلس على اي كوفي يبيه بغض النظر عن لهجته .. فليه التقمص؟؟
• اذا انك دب زي حالاتي فعليك بالثياب وخصوصا التفصال الكويتي فانه للكرش أستر .. واترك عنك الثياب الحجازيه اللي تخلي الواحد كأنه رقاصه اذا مشى .. فعليكم بالتوسيع وخلو التخصير والحجازي لأهله يا اصدقائي الدببه ..
• اذا انك مولود عند الإبل وعايش حياتك بين الدله والفنجال وتشرب حليب نياق على الريق وتفطر عصيده وتصيف في الصمان .. فصدقني لو انك تآكل سندويش نيفيا فهذا الشئ ماراح يخليك ولد نعومه .. خلك على طبعك والتزم الأدب مع الجميع وحلاة الصلخ بغترته وعقاله .. لأن شكله بالتيشيرت البولو الوردي أبد ماهو راكب .. وتلحس الشفايف مايفيد .. فالدهر آثاره باينه عليك ..
• اذا انك شخص بسيط وراعي ضحكه وماعندك تكلف مع الناس وهذا هو طبعك فلا تحاول تصير الثقيل الراكد عاقد الحاجب اللي ابتسامته ماتنشاف .. فكل شخص طبيعته محليته والناس بتتقبل كل شخص على ماهو عليه فعيش حياتك ببساطتها وابتعد عن التكلف وانا اخوك ..
• اذا انك شخص من عائله حالتها الاجتماعيه ضعيفه او مستوره .. فما له داعي القصص الخياليه ومغامرات باريس وجلسات ماربيا .. عيش حياتك والفقر ماهو عيب .. العيب ان الشخص يلبس ثوب غير ثوبه ..
• إن كانك شخص غير مميز وبارز ومن الشخصيات اللي يشار لها بالبنان .. فلا تحاول في كل مجلس انك تبرز نفسك وتذكر انتاجاتك واعمالك .. فالشخص البارز الناس يتكلمون باعماله ومايحتاج هو يوصلها لهم ويذكرهم فيها في كل مجلس .. ياعزيزي لكل شخص نصيبه في هالدنيا وماراح تاخذ نصيب غيرك .. عيش حياتك زي مانت والعالم بتحبك

والأمثله كثير وتطول

ولكن اللي حبيت أوصله .. ان الشخص لازم يعيش حياته بطبيعتها وباللي الله كتبه عليه فيها ويرضى بهالمكتوب .. ولا تشيل هم الناس ولا تحاول تقلد أحد .. فكل شخص على طبيعته له قبوله عند ناس ونفور من ناس ثانيه .. ولن ترضي كل الأطراف فلا تتعب نفسك وعيش حياتك باللي عندك .. واللي ماعندوش صدقني ما يلزموش

——

لكم وللمدونه وحشه

لي طقوس في الكتابه مثلا لازم اكون رايق جدا .. مؤشر المشاعر بكل انواعها في المنتصف تقريبا .. اكون متوقف علي القراءه من ساعه علي الاقل ..  اليوم كسرت كثير من هذي الطقوس ..

فيه أسئله كثيره متعبني ، يمكن ماتكون مهمه بس اتمنى لو الاقي اجابه على بعضها :

ليش اغلب الناس يستنسخون بعض؟ ليش لما تكون بعيد عن النسخه اللي في بالهم تعتبر غريب و يمكن بعد مريض او عميل او علماني او ارهابي  الى آخر الصفات اللي موجوده عندنا .. مثلا لما تقول لاحدهم انك ماقد دخنت في حياتك و لا حتى فكرت في هذا الشي ابدا مو بدافع الخوف من الاهل بس قناعه .. يرد عليك و يقول لك : اكيد و انت صغير كان عندك .. باربي !!

ليش نوصف الاشياء و لا نسميها ؟  لما يصلح واحد شي في البيت يقول لك : عندك زراديه هذيك حقت المواصير .. بينما في الانجليزي تقول بايب رنش و ا نتهى الموضوع ..

ليش في مجالسنا الكل يحب يتكلم و قليل اللي يسمع ؟  اليوم حتى بالنت كثير اللي يتكلمون ، تقريبا نفس المواضيع ، نفس الافكار و نفس الردود ! لازم ترد على البوست حقي عشان ارد علي البوست حقك ! – انا متاكد اني خسرت اغلب القراء اللي كانوا بيردون علي هنا – اذكر مره كان يدرسنا واحد بريطاني و كانوا الطلاب كالعاده غارقين في موجه سواليف عاصفه .. سألني : كيف تقدرون تتكلمون كل هذا الوقت بدون انقطاع ، عندنا – في بريطانيا – النساء بس اللي يتكلمون كذا !!

ليش جماعيتنا مقلوبه ؟ واحد يكون عنده فكره يجند لها الناس اللي يقدر عليها من بائسين و محبطين ، اللي مع الفكره هو الحق المطلق و اللي ضدها هو الشر المستطير ، تنتشر الفكره و يصير الواحد – صاحب الفكره –  صنم جديد ، تتكرر الاصنام و الناس مازالت تقدم ايمان الولاء لهم بدون ما يتعلمون من التاريخ القريب جدا ، من القوميين العرب الى الثوريين الفدائينن الى حزب الله الى حماس ، اتعجب من قدرتهم علي تخدير الانصار !  الجماعه تتحول دائما الى فرد ينصب صنم جديد – في التاريخ  لا جديد – ..

ليش قل الاحترام بيننا ؟ بزعم الحريه نستخدم ابشع الاوصاف و نكيل التهم بدون اي سلطان ، اكثرنا تحررنا هم اللي مافي وجههم ذره حيا .. الشاب يضايق بسيارته كبير السن .. نتقاتل في التقاطعات من اللي يمشي قبل .. البنت تتباهى انها ما تعرف تسلق بيضه و امها مع الشغاله هم  اللي يسوون  كل شي أما هي مشغوله في كتابة  الخواطر !! لما نطلب شي ما عاد صرنا نقول ” لو سمحت ”  ، صرنا نقول ” بفلوسي ” !!

ليش مانعرف نفرح ؟ صار النكد ملازم لنا .. الواحد منا يقول بفرح بس مو اللحين لما تزين الاوضاع ! يروح العمر لا هو اللي فرح ولا الاوضاع زانت .. نسوي حفله بمناسبه نجاح الاطفال نشتري كل شي و ننسى نجيب للاطفال هديه صغيره قيمتها بعض الريالات .. نسوي سفره طويله عريضه و نقول الصغار ياكلون بعد الكبار !! في اليوم الوطني بعض الشباب كانوا فرحانين عشان كذا صار شغب !!

ليش نستحي نقول اننا نحب ؟ عيب الواحد يقول انه يحب بلده ، يخجل يقول كم هو معجب بوالده  .. مايقول انه يحس نفسه يرجع طفل لما يشوف دلال والدته له ..

اعترف – بكل اسف – اني لا اطبق كثيرا من ما ادعوا اليه .. و من هنا يأتي السؤال الاخير .. لم نقول ما لا نفعل ؟

.. وكان شكله في قمة الغضب والخشونه..

وبعد يومين ..

جالس في المجلس عند أصحابه ولما شافو المسلسل الشامي اللي كان بعد المسلسل الخليجي .. قال بأعلى صوته يبي يسمع اللي حوله .. هذول الحريم اللي الواحد يحط عينه فيهم ويردون الروح .. لبس وزين وقصير وضيق ومغري ماهم زي اللي عندنا في البيت ..

وكان شكله في قمة الدنائه والتفاهه..

هذي الأشياء انا على قناعة تامه انها صنعت وتم اختراعها في السعوديه :

• قدر الله علي ( تقال بعد الصلاه وقبل القصه المؤثره اللي يرويها المتسول)

• بناء على طلبه ( تقال لما يخربها أحد المسؤولين وتجيه اقاله من فوق .. ومن باب حسن العشره يقولون بناء على طلبه )

• الوقوف الأفقي عند اشارة المرور ( يقوم بها السعودي عن الاشاره .. علشان يبين لكل اللي واقفين في حالهم وبالنظام بأنهم أي كلام )

• ملف أخضر علاقي ( هذا الطلب الأول لكل معامله حكوميه .. وانا من نعومة أظافري أبي أعرف من وكيله المعتمد؟ )

• إن جميع الموظفين مشغولين لقيامهم بخدمة عملاء آخرين ( هذا المسج تسمعه لما يكون موظفين شركة الاتصلات يبون يطلعون يدخنون لهم كم زقاره)

• مع أحلى الأماني ( هذي الجمله اخترعها المذيع اللامع حسين كراني .. ولما تسمعها لازم تنسى كل اللي سمعته في النشره الجويه لأنها معلومات قديمه وبايته)

• راجعنا الأسبوع الجاي ( هذي جمله حفظها الموظف الحكومي ونسا وين ومتى يتسعملها , فصار يقولها للكل )

• مبالغ غير مفوتره ( كلمة معناها انك بتدفع شئ ماتدري من وين جاك)

• أمامك حفريات ( علامة الجوده للأراضي السعوديه )

• منحه ( هذي الكلمه معناها انك خذيت شئ ماهو من حقك , ولكنك تكسر الخاطر وعلى هالأساس تم اعطائك قطعة الأرض )

• لامانع لدينا من زواج المذكور أعلاه ( هذي الموافقه تحتاجها من الحكومه السعوديه اذا بغيت تتزوج من فتاة غير سعوديه .. مع العلم انك انت اللي بتدفع المهر و ومصاريف العرس و  )

• دفتر العائله ( هي ورقه يذكر فيها اسماء أفراد العائله , ويتم طلبها منك اذا بغيت تسكن في أي فندق في السعوديه إذا كنت مواطن سعودي فقط , ولا يتم طلبها من غيرك !!! وهذي خصوصيه للشعب السعودي دون غيرهم )

• شهادة معترف فيها ( هذا الشئ يتم التأكد منه في حال تقدمت على وظيفه معينه وخصوصاً في الشركات الكبرى السعوديه , مع العلم بأنه تقبل شهادة كل شخص غير سعودي , ويشترط لقبول السعودي ان تكون الجامعه معترف فيها لدى وزارة التعليم .. وهذي خصوصيه ثانيه )

وكالعاده بقول .. اللسته تطول

الشروط كالتالي :

• أن تكون المتقدمه تحمل الجنسيه السعوديه.
• تقدر تقول كلمة ” كذا ” عشر مرات في الدقيقه .
• تجيد لبس البنطلون الضيق.
• تقدر تطلع 120 شعره من غرتها وكأنها ماتدري.

لا يشترط إجادتها للغه العربيه , ولا سرعة البديهه , ولا السلامه اللغويه , ولا الثقافه العامه .. فلأجل جنسيه تكرم وظيفه ..

وبعد القبول في هالوظيفه سوف يطلق عليها رسمياً لقب ” إعلاميه سعوديه ” ..

للتقديم على الوظيفه .الرجاء ارسال الصوره الشخصيه وانتي تقولي “كذا” على الايميل التالي ..

ay.kalam@mbc.com

من عام 2001 تقريبا و اخوي سامي الشمري يعدني بهذا المشروع الوطني ..

المشروع الوطني عباره عن حفره ..

ايش قصة هالحفره؟ الحين اقولكم..

كنا نقعد ونجتمع في كوفي في مجمع الراشد .. وفي بدايات الألفين كانت توها هابه موضة ” طيحني ” وموضة العرابجه الأمريكان .. اللي الواحد فيهم يمشي وكأنه 50 سنت او تو باك ..

وكانت فيه شله معينه اذا شفتهم تقول كانك في دواعيس نيويورك .. تلقاهم لابسين لك هالشورتات الوسيعه اللي طايحه على الخصر .. ورابطين لهم بندانه على الراس .. وحاطين السماعه في الاذن ويهزون راسهم ويمشون بطريقه ” النقر ” …

وقتها كان لما يشوفهم سامي .. يقول والله مايبيلكم الا الحفره ..

قلت له يابو عبدالله وش حفرته؟ قال انا بحفر لي حفره .. وبجمع فيها ذا الأشكال وبصب عليهم بنزين وبولع فيهم وبفك المجتمع من أذاهم ..

و مع مر الشهور والسنين .. وكل شوي تطلع لنا صرعات جديده من الشباب والبنات .. والدنيا تتطور .. والصغير يكبر ..

وكل ما طلعنا طلعه وشفنا لنا شئ .. طالع فيني سامي وقالي .. ” الحفره ” .. وكل ماشفنا من هالخبال والمصاخه .. طالع فيني سامي وقالي ” الحفره ” ..

وفي يوم من الأيام .. قلت له يابو عبدالله وش ذا الحفره اللي يتجمع كل ذا البشر؟ انت لك سنتين وانت تجمع فيها من ذا العاهات ومن ذا الظواهر الخايسه ..

رد علي وفاجئني .. انه عمل توسعه للحفره بعد مرور شهرين من انشائها ..

بس ما ادري كم وصل قطرها الحين يا سامي؟ وخصوصا بعد ماقريت هالتدوينه

———————-

صحيح ان حل الحفره هو حل ساخر وارهابي بنفس الوقت .. بس من يوم سمعت عن فكرتها .. وانا كل ماشفت شئ ماعجبني قلت بخاطري وينك يالحفره

بس لو على كيفي و على الأشياء اللي اشوفها و اللي اتحلطم عليها .. واذا كل شئ برميه بالحفره ..

خلصت الديره وقعدت بالحالي انا وياك يا سامي ..

وبالأخير شكلي بقطك بعد معهم بالحفره وببقى لحالي .. وبسوي زي سالفة ابو سليمان

الله يكفينا شر الحفر

السلام عليكم جميعاً ..

من زمان عن المدونه وعن الكيبورد وعن رفع اصبعي الصغير اذا جيت بكتب ( من باب الدلع)

ماعلينا ..

وصل الى علمي العلوم التاليه :

• أحد المقاتلين القدامى .. وأحد أصدقائي في أيام الطفره الأولى .. والشريك الخاص في تجربة المطاعم الجديده   .. أخوي سامي الشمري فتح له مدونه .. وتلقونها على ذا الرابط ..
• سمعتو عن مسابقة كأس التخيل ؟ هالمسابقه تقوم فيها شركة مايكروسوفت ويشاركون فيها الطلبه من كل انحاء العالم .. وشارك في هالمسابقه كل من المهند الكدم و علاء المكتوم .. وهالثنائي انا اسميهم الثنائي الحديدي .. لانهم مبدعين في هواياتهم وفي تخصصهم .. وراح تكون مشاركتهم هالسنه بفلم متقن عن فكرة ” الجوع في العالم ” .. وهم يطلبون من الكل مشاكرتهم في عملهم هذا لكي يخرجو بفلم قد يساعد في حل مشكلة الجوع في العالم ..للمشاركه في هذا المشروع عليك بزيارة مدونتهم الخاصه لهذا المشروع على هذا الرابط
  

• سوف يتم اغلاق شارع الظهران وشارع بن خلدون .. وذلك تماشياً مع الخطه العشريه لبلدية الدمام وضواحيها .. الداعيه الى رفع ضغط الشعب الشرقاوي .. من هنا أنصحكم بالرجوع الى قديمكم يا أهل الشرقيه .. عليكم بالحناطير والسياكل .. لان الدنيا بتكون مزحومه على الآخر .. وبالنسبه لي انا بلتزم البيت الى اشعار آخر ..
• وزارة الصحه ووزارة التعليم متوهقين مع حالات الانفلونزا .. وكل واحد يحاول يرقع للثاني .. الصحه مايبون يقولون ان وزارة التعليم ماهي جاهزه وما طبقت الخطه المزعومه من حيث توفير المطهرات وغرف العزل وتدريب المعلمين .. والتعليم ماتبي تقول ان ان الصحه نايمه في العسل وماتتعاون معاهم بتزويد المدارس بجولات دوريه وبارسال التقارير الصحيه للطلبه المرضى او المشتبه في اصابتهم .. ومابين هذي وهذي تم اغلاق عدد من المدارس بسبب الاصابات وكان فيه بعض الوفيات .. وهذا الموقف يسجل في لستة المواقف اللي فشلت الدوله في مواجهتها ..
• وصل عدد المتابعين في المدونه الى1004  متابع.. ومابقى الى 2000 متابع زياده .. وانزلها مساهمه عامه .. واودع الفقر .. واصف في صف النصابين والمحتالين اللي لعبو على المواطنين وقاعدين يتنعمون في باموال الشعب قدام العالم .. لا ويتبرعون بسيارات اسعاف لغزه بعد … ولا فيه اي احد يكلمهم .. واذا قالو .. قالو القانون مايحمي المغفلين!! .. اذا القانون مايحمي المغفلين … أجل من يحمي؟ المفتحين في الطحين؟

—————–

العنوان مستنبط من الجمله الشهيره : أخبار أهرام جمهوريه

حنا كشعب احس التطرف في عروقنا يمشي .. وانا ارجع السبب لبيئتنا الصحراويه والجبليه ..

يبدا الواحد حياته كطفل .. (طبيعي .. يعني فيه واحد يبداء حياته رجال)

من يوم يبداء يمشي تلقاه قام يكسر الأغراض ..

واول مايبداء يطلع في الشارع تلقاه يلاحق القطاوه ويحذفهم بما خف وزنه وزاد ألمه .. وغالبا هالصفات تنطبق على النعال الزبيريه اجلكم الله ..

ولما يوصل المتوسطه تبداء الهوشات .. وكل يوم راجع للبيت اما مفلوع راسه ولا فالع واحد ..

وفي المرحله الثانويه تلقاه يتعرف له على شلة ناعمه ويصير نعومي راعي حفلات شكشكه وحف حواجب ..

واذا بغى يسترجل صار عربجي وصار يخطف الورعان ..

واذا بغى يسكر .. لقيته يتهاوش مع العالم

وبعدها اذا بغى يهتدي صار متشدد وبدا يفتي بعد التزامه باسبوع .. وطبعاً كل شئ حرام

كبر شوي وتعرف له على شلة حالقين الشنب لابسين الفلينه العلاقي .. وسمى نفسه ليبرالي وصار ينظر ومايشوف العالم شئ ..

بغى يغير شوي .. وبغى يصير انسان عاقل اكثر ..

وبعد تفكير عميق … ألحد  الرجال

والحاله تستمر ..

يعني يا أقصى اليمين يا أقصى الشمال ..

وهذا من وجهة نظري هو سبب التطرف الموجود عندنا في كل التيارات ..

الهون أبرك مايكون يا جماعه ..

طبعاً هالكلام ماينطبق على الكل ..

___________

مصدر الصورة

طلعت من منفذ نويصيب على الحدود الكويتيه ومتوجه الى الخبر ..

مريت على الخفجي و كانت اللوحة الترحيبيه برعاية ” شركة أرامكو لأعمال الخليج ” وتمنت لي رحلة سعيده ..

وعلى طريق أبو حدريه شدتني إنارة معمل السفانيه .. وبعدها بدقايق لاحت في الإفق إنارة معمل تناجيب ..

وعلى نفس الطريق كانت هناك لوحة ترشدني إلى مشروع معمل منيفه اللي هو إلى الآن تحت الإنشاء ..

وبعد ماعديت النعيريه .. سحرتني أنوار معمل الخرسانيه الجديد ..

وبعدها توجهت إلى طريق الجبيل ..

ولفحتني رائحة الكبريت الصادره من معمل البري .. وكان على يساري أنوار معامل شركة سابك ..

وبعد ماعديت البري والجبيل وشركاته البتروكيماويه ..

مريت على منفذ معمل رأس تنوره ..

وبعدها كانت الدمام ..ولوحة إرشاديه تدلني على بقيق ومعملها

وفي نهاية رحلتي كانت الخبر تنتظرني ..

وعند أول  تقاطع في الخبر وعلى جنبات الطريق ..

شفت مواطنه سعوديه  مسؤوله عن أسره كامله أشقاها الفقر وأهلكها الزمان و حدها الجوع انها تطلب لقمة تآكلها وتأكل أسرتها ..  ..

حتى لو كانت لحم حمار ..

ووقتها أذهلتني هالرحله اللي بدت من منفذ نويصيب وانتهت في غرب الخبر ..

بدايتها معامل نفط وغاز قديمه وجديده وتحت الإنشاء .. وروائح الغازات المنتشره في الجو وأعمدو اللهب اللي أنارت علي طريق العوده .. تدل على عدد الملايين اللي تتدفق ..

وفي نهايتها مواطنه جوعانه أهلكها الزمن ..

تمنيت لحظتها اني أكون ختمت جوازي قبل لا أدخل الخبر .. علشان أقول لنفسي ان هذيك ديره ثانيه ..

ولكن للأسف كان مافيه مكان للجواز لأنها بنفس الحدود ونفس الوطن ..

_______________

للمزيد عن هذه المواطنه : -

أعطوني ولو لحم حمار

__________

مصدر الصوره

أنا من عشّاق البرجر المشوي .. والشئ هذا واضح على جسمي

ومن سنين وانا أتخيل شكل المطعم و ديكوره واللوقو حقه وحتى الصوص اللي بستعمله ..

انا مابي اقولكم عن أمنيتي وهوايتي ..

أبيكم تقولون لي

لو استقلت من وظيفتي .. وفتحت لي مطعم للبرجر المشوي .. واشتغلت فيه بنفسي ..

وش بتقولون عني؟

بدون مجاملات ..

مصدر الصوره