من عام 2001 تقريبا و اخوي سامي الشمري يعدني بهذا المشروع الوطني ..

المشروع الوطني عباره عن حفره ..

ايش قصة هالحفره؟ الحين اقولكم..

كنا نقعد ونجتمع في كوفي في مجمع الراشد .. وفي بدايات الألفين كانت توها هابه موضة ” طيحني ” وموضة العرابجه الأمريكان .. اللي الواحد فيهم يمشي وكأنه 50 سنت او تو باك ..

وكانت فيه شله معينه اذا شفتهم تقول كانك في دواعيس نيويورك .. تلقاهم لابسين لك هالشورتات الوسيعه اللي طايحه على الخصر .. ورابطين لهم بندانه على الراس .. وحاطين السماعه في الاذن ويهزون راسهم ويمشون بطريقه ” النقر ” …

وقتها كان لما يشوفهم سامي .. يقول والله مايبيلكم الا الحفره ..

قلت له يابو عبدالله وش حفرته؟ قال انا بحفر لي حفره .. وبجمع فيها ذا الأشكال وبصب عليهم بنزين وبولع فيهم وبفك المجتمع من أذاهم ..

و مع مر الشهور والسنين .. وكل شوي تطلع لنا صرعات جديده من الشباب والبنات .. والدنيا تتطور .. والصغير يكبر ..

وكل ما طلعنا طلعه وشفنا لنا شئ .. طالع فيني سامي وقالي .. ” الحفره ” .. وكل ماشفنا من هالخبال والمصاخه .. طالع فيني سامي وقالي ” الحفره ” ..

وفي يوم من الأيام .. قلت له يابو عبدالله وش ذا الحفره اللي يتجمع كل ذا البشر؟ انت لك سنتين وانت تجمع فيها من ذا العاهات ومن ذا الظواهر الخايسه ..

رد علي وفاجئني .. انه عمل توسعه للحفره بعد مرور شهرين من انشائها ..

بس ما ادري كم وصل قطرها الحين يا سامي؟ وخصوصا بعد ماقريت هالتدوينه

———————-

صحيح ان حل الحفره هو حل ساخر وارهابي بنفس الوقت .. بس من يوم سمعت عن فكرتها .. وانا كل ماشفت شئ ماعجبني قلت بخاطري وينك يالحفره

بس لو على كيفي و على الأشياء اللي اشوفها و اللي اتحلطم عليها .. واذا كل شئ برميه بالحفره ..

خلصت الديره وقعدت بالحالي انا وياك يا سامي ..

وبالأخير شكلي بقطك بعد معهم بالحفره وببقى لحالي .. وبسوي زي سالفة ابو سليمان

الله يكفينا شر الحفر

السلام عليكم جميعاً ..

من زمان عن المدونه وعن الكيبورد وعن رفع اصبعي الصغير اذا جيت بكتب ( من باب الدلع)

ماعلينا ..

وصل الى علمي العلوم التاليه :

• أحد المقاتلين القدامى .. وأحد أصدقائي في أيام الطفره الأولى .. والشريك الخاص في تجربة المطاعم الجديده   .. أخوي سامي الشمري فتح له مدونه .. وتلقونها على ذا الرابط ..
• سمعتو عن مسابقة كأس التخيل ؟ هالمسابقه تقوم فيها شركة مايكروسوفت ويشاركون فيها الطلبه من كل انحاء العالم .. وشارك في هالمسابقه كل من المهند الكدم و علاء المكتوم .. وهالثنائي انا اسميهم الثنائي الحديدي .. لانهم مبدعين في هواياتهم وفي تخصصهم .. وراح تكون مشاركتهم هالسنه بفلم متقن عن فكرة ” الجوع في العالم ” .. وهم يطلبون من الكل مشاكرتهم في عملهم هذا لكي يخرجو بفلم قد يساعد في حل مشكلة الجوع في العالم ..للمشاركه في هذا المشروع عليك بزيارة مدونتهم الخاصه لهذا المشروع على هذا الرابط
  

• سوف يتم اغلاق شارع الظهران وشارع بن خلدون .. وذلك تماشياً مع الخطه العشريه لبلدية الدمام وضواحيها .. الداعيه الى رفع ضغط الشعب الشرقاوي .. من هنا أنصحكم بالرجوع الى قديمكم يا أهل الشرقيه .. عليكم بالحناطير والسياكل .. لان الدنيا بتكون مزحومه على الآخر .. وبالنسبه لي انا بلتزم البيت الى اشعار آخر ..
• وزارة الصحه ووزارة التعليم متوهقين مع حالات الانفلونزا .. وكل واحد يحاول يرقع للثاني .. الصحه مايبون يقولون ان وزارة التعليم ماهي جاهزه وما طبقت الخطه المزعومه من حيث توفير المطهرات وغرف العزل وتدريب المعلمين .. والتعليم ماتبي تقول ان ان الصحه نايمه في العسل وماتتعاون معاهم بتزويد المدارس بجولات دوريه وبارسال التقارير الصحيه للطلبه المرضى او المشتبه في اصابتهم .. ومابين هذي وهذي تم اغلاق عدد من المدارس بسبب الاصابات وكان فيه بعض الوفيات .. وهذا الموقف يسجل في لستة المواقف اللي فشلت الدوله في مواجهتها ..
• وصل عدد المتابعين في المدونه الى1004  متابع.. ومابقى الى 2000 متابع زياده .. وانزلها مساهمه عامه .. واودع الفقر .. واصف في صف النصابين والمحتالين اللي لعبو على المواطنين وقاعدين يتنعمون في باموال الشعب قدام العالم .. لا ويتبرعون بسيارات اسعاف لغزه بعد … ولا فيه اي احد يكلمهم .. واذا قالو .. قالو القانون مايحمي المغفلين!! .. اذا القانون مايحمي المغفلين … أجل من يحمي؟ المفتحين في الطحين؟

—————–

العنوان مستنبط من الجمله الشهيره : أخبار أهرام جمهوريه

حنا كشعب احس التطرف في عروقنا يمشي .. وانا ارجع السبب لبيئتنا الصحراويه والجبليه ..

يبدا الواحد حياته كطفل .. (طبيعي .. يعني فيه واحد يبداء حياته رجال)

من يوم يبداء يمشي تلقاه قام يكسر الأغراض ..

واول مايبداء يطلع في الشارع تلقاه يلاحق القطاوه ويحذفهم بما خف وزنه وزاد ألمه .. وغالبا هالصفات تنطبق على النعال الزبيريه اجلكم الله ..

ولما يوصل المتوسطه تبداء الهوشات .. وكل يوم راجع للبيت اما مفلوع راسه ولا فالع واحد ..

وفي المرحله الثانويه تلقاه يتعرف له على شلة ناعمه ويصير نعومي راعي حفلات شكشكه وحف حواجب ..

واذا بغى يسترجل صار عربجي وصار يخطف الورعان ..

واذا بغى يسكر .. لقيته يتهاوش مع العالم

وبعدها اذا بغى يهتدي صار متشدد وبدا يفتي بعد التزامه باسبوع .. وطبعاً كل شئ حرام

كبر شوي وتعرف له على شلة حالقين الشنب لابسين الفلينه العلاقي .. وسمى نفسه ليبرالي وصار ينظر ومايشوف العالم شئ ..

بغى يغير شوي .. وبغى يصير انسان عاقل اكثر ..

وبعد تفكير عميق … ألحد  الرجال

والحاله تستمر ..

يعني يا أقصى اليمين يا أقصى الشمال ..

وهذا من وجهة نظري هو سبب التطرف الموجود عندنا في كل التيارات ..

الهون أبرك مايكون يا جماعه ..

طبعاً هالكلام ماينطبق على الكل ..

___________

مصدر الصورة

طلعت من منفذ نويصيب على الحدود الكويتيه ومتوجه الى الخبر ..

مريت على الخفجي و كانت اللوحة الترحيبيه برعاية ” شركة أرامكو لأعمال الخليج ” وتمنت لي رحلة سعيده ..

وعلى طريق أبو حدريه شدتني إنارة معمل السفانيه .. وبعدها بدقايق لاحت في الإفق إنارة معمل تناجيب ..

وعلى نفس الطريق كانت هناك لوحة ترشدني إلى مشروع معمل منيفه اللي هو إلى الآن تحت الإنشاء ..

وبعد ماعديت النعيريه .. سحرتني أنوار معمل الخرسانيه الجديد ..

وبعدها توجهت إلى طريق الجبيل ..

ولفحتني رائحة الكبريت الصادره من معمل البري .. وكان على يساري أنوار معامل شركة سابك ..

وبعد ماعديت البري والجبيل وشركاته البتروكيماويه ..

مريت على منفذ معمل رأس تنوره ..

وبعدها كانت الدمام ..ولوحة إرشاديه تدلني على بقيق ومعملها

وفي نهاية رحلتي كانت الخبر تنتظرني ..

وعند أول  تقاطع في الخبر وعلى جنبات الطريق ..

شفت مواطنه سعوديه  مسؤوله عن أسره كامله أشقاها الفقر وأهلكها الزمان و حدها الجوع انها تطلب لقمة تآكلها وتأكل أسرتها ..  ..

حتى لو كانت لحم حمار ..

ووقتها أذهلتني هالرحله اللي بدت من منفذ نويصيب وانتهت في غرب الخبر ..

بدايتها معامل نفط وغاز قديمه وجديده وتحت الإنشاء .. وروائح الغازات المنتشره في الجو وأعمدو اللهب اللي أنارت علي طريق العوده .. تدل على عدد الملايين اللي تتدفق ..

وفي نهايتها مواطنه جوعانه أهلكها الزمن ..

تمنيت لحظتها اني أكون ختمت جوازي قبل لا أدخل الخبر .. علشان أقول لنفسي ان هذيك ديره ثانيه ..

ولكن للأسف كان مافيه مكان للجواز لأنها بنفس الحدود ونفس الوطن ..

_______________

للمزيد عن هذه المواطنه : -

أعطوني ولو لحم حمار

__________

مصدر الصوره

أنا من عشّاق البرجر المشوي .. والشئ هذا واضح على جسمي

ومن سنين وانا أتخيل شكل المطعم و ديكوره واللوقو حقه وحتى الصوص اللي بستعمله ..

انا مابي اقولكم عن أمنيتي وهوايتي ..

أبيكم تقولون لي

لو استقلت من وظيفتي .. وفتحت لي مطعم للبرجر المشوي .. واشتغلت فيه بنفسي ..

وش بتقولون عني؟

بدون مجاملات ..

مصدر الصوره

اليوم طلعت نتائج مسابقة أرابيسك ..

وكانت النتايج كالتالي :

فوز  كل من

• عالم التقنية
• نبراس الشباب
• مدونة أسامة

وكلهم يستاهلون هالفوز ..  وخصوصاً عالم التقنيه ومدونة أسامه .. لأني من متابعينهم الدائمين .. وبالنسبه لموقع نبراس الشباب فهالمسابقه عرفتني عليه وان شاء الله بنتابعه في الفتره الجايه ..

وما أنسى أبارك لمدونة مآرب أخرى .. لأنها كانت في المركز الأول الى فتره قريبه وكانت في منافسه مستمره مع أبو عامر وكلهم يستاهلون.. بس أبو عامر لياقته أقوى وهو من البدايه كان ناوي القمه .. ويستاهلها

ومايفوتني أشكر كل من صوت لي .. وأقول لكل من دعمني والخطاء كان عليه اني متنازل وكل واحد يصلح سيارته ..

وشكراً للأخ محمد الساحلي صاحب الفكره .. وشكراً للجنة التحكيم ..

وأحب أهدي الأغنيه الجايه لأمي وأبوي ومحمد بن سالم وأقوله وين الغيبه يابو سالم وياخوي نبي نروح لمطعمنا حق السمك .. يقولون هذا وقت الصافي

في ثالث ايام العيد اصبت بانفلونزا موسميه .. واستمرت معاي لمدة اربع أيام ..

وكنت وقتها في الكويت .. وتلقيت العلاج اللازم وعطوني من ذا الحبوب والشراب المعتاد ..

ولكن لما استمرت معي الأعراض .. قلت بخاطري .. لا يكون هذي انفلونزا الخنازير وهم ما يدرون ..

قلت خلني امر المستشفى واشوف ..

المهم مريته وقابلت لي دكتور سعودي شباب قام بالفحص اللازم  وماقصر.. وأعطاني دواء لتقوية المناعه .. والحمد لله ثاني يوم وانا طيب وبخير .. لأنه قال لي ان الدواء اللي عطونياه الكويت خفيف وحنين على الفايروسات ..

المهم مالكم بالطويله ..

من تجربتي هذي اكتشفت سبب الانتشار الكبير لانفلونزا الخنازير في السعوديه والكويت بعد ..

اسباب مسؤول عنها وزارة الصحه واسباب مسؤول عنها المجتمع نفسه وعاداته الاجتماعيه .. راح ابداء بالعادات الاجتماعيه المسببه للانتشار :

• أول شئ والسبب الرئيسي هو طريقة السلام عندنا ..وبما ان المرض كان في فترة العيد وهي يكثر فيها السلام … و بما اننا شعب ودود وحبوب .. فنحب نسلم ونظم بعض ونحط وجيهنا في وجيه بعض ونسئل عن الحال .. وكل ما تقرب خشتك من خشة اللي تسلم عليه تكون تحبه أكثر .. وهذا يساعد على انتقال الفايروس لأن المسافه بتكون 12سم بالكثير .. وتزيد وتنقص على مقدار الحب .. والمصيبه الكبيره سلام الخشم .. وهو ان الشخص يحك راس خشمه براس خشم صديقه .. وهذي يقولك ان الفايروس مايشوف الهواء الخارجي .. من الجهاز التنفسي الى الآخر على طول .. وعلشان كذا انا متأكد انهم لو يسوون احصائيه على المصابين بيلقون اغلبهم بدو .. وخصوصاً القحاطين

فنصيحتي للمجتمع السعودي في هذي الفتره أن يقتدو ببعض أهل الجنوب وبعض أهل الشمال ويطبقون نظرية ” السلام نظر ” وهي انك تسلم من عند الباب وترفع ايدك بس

• الشغله الثانيه لما كنت مصاب بالانفلونزا وحرصاً مني اني ما اعادي أحد .. وخصوصاً في هذي الفتره .. كنت ألبس الكمام وانا في البيت .. فكانو اخواني او اللي يزورونا في البيت يقولون ياخي عادي شيله لا تخنق عمرك .. وهالكلام يقولونه من حبهم .. ويبون يحسسوني ان الوضع عادي .. وهذا الشئ مصيبه في نفس الوقت … لأنه لو هالشخص اللي كان لابس الكمام لا سمح الله كان مصاب جد بانفلونزا الخنازير ولكن هو ما يدري مثل اغلب المصابين اللي ما يعرفون بالاصابه الا بعد مرور ثلاث أيام .. فالشئ هذا راح يساعد على انتشار المرض .. فنصيحتي للكل .. اذا شفت واحد مريض ومفلوز اما انك تعطيه كمام او تخليه بكمامه واذا فصخه من باب الميانه لبسه اياه وقله عن الميانه الزايده يا مفلوز … ولا اصلاً انت وش مقعدك معه؟  قوم وخله..
• في خلط عن البعض بين الوسواس وبين الحرص .. فتلقاه خايف ان الناس يقولون عنه موسوس .. علشان كذا تلقاه ما يبي يغسل ايده قبل لا يأكل ومايبي يستخدم المعقمات ويرفض انه يبتعد عن الاماكن المزدحمه واذا شاف شخص مريض وحالته حاله تلقاه يسلم عليه ويقعد جمبه  … وكل خوفه ان الناس يقولون عنه موسوس .. مع انه الواحد مفروض انه مايشيل هم هالامور .. ويقولون عنك موسوس ولا ان خشمك يكبر وتقعد تناخر قدام العالم الله يكفينا الشر .. وترى الحرص زين في مثل هالأزمات ..
• والشغله الرئيسية و المسؤول الأول هي وزارة الصحه .. هناك سوء تعامل مع الأزمه وتجاهل واضح لصحة المواطنين .. ماشفنا اعلانات في الشوارع ولا في التلفزيون الا ان كان واحد بالغلط .. يعني هل يعقل اعلانات هيئة السياحه السعوديه اكثر من اعلانات التوعيه اللي المفروض انها تصدر من وزارة الصحه؟  واذا دخلت المستشفى ماتلقى لك كمام واقي .. والعالم في الانتظار زحمه وصافين سرا .. يعني يمكن الواحد يجي فيه صداع وياخذ معاه الفايروس وهو طالع ويوديه لبيته .. وكل هذا بسبب انه جالس جمب مصاب في المستشفى .. المفروض في مثل هالأزمات يكون المستشفى خصوصاً أحرص من كذا .. ويكون التوعيه والتجهيزات فيه على أعلى مستوى …ولا يعني الدكاتره والممرضين اللي ملبسينهم الكمامات عيال ناس والمواطنين والمقيمين عيال البطه السوداء؟ جد شئ يخوف ومنظر بشع اللي تشوفه في المستشفيات .. عالم خشومها حمر ومتسدحه في الأسياب وقاعة الانتظار وكلن يعاطس بوجه الثاني.. وبعدين يقولون غريبه من وين جاه المرض!!

وكان في بالي كلام كثير بس مدري وين راح … أشغلني هاللي جمبي كل شوي سائلني سؤال الى ان فكك الأفكار اللي كنت بقولها …

بقعااااا تصوعه

والله يكفي الشر .. وعساكم ماترون مكروه ..

وأهديلكم هالأغنيه : إضغط هنا

الصراحه انا في أول يوم انبسطت بالنتايج  وبالاكشن اللي صار في وسط التدوين بشكل عام ..

بس الشئ المحبط الزوبعه اللي صارت بعدها .. من مواضيع تنتقد لجنة التحكيم والمسابقة والقائمين عليها ..

بل وصل الحال في بعضهم ان يشكك في النوايا ..

وكلهم تناسو ان القائمين على المسابقه كانو متطوعين ومالهم اي مصلحه من هالشئ .. إلا إثراء المحتوى العربي وتشجيع للساحه التدوينيه ..

وهالشئ خلاني ما ألوم المرشحين في الانتخابات  الحقيقيه .. الإنتخابات اللي فيها مناصب يرعش لها القلب .. وفيها فلوس تشق الجيب من كثرها ..

اذا مسابقه تطوعيه جوائزها 500 دولار ولابتوب واستضافه مجانيه .. خلت البعض يغش ويشيل ويحط ويجيش الجيوش ..

فما بالك باللي جائزته مفتاح خاص يفتح له كل الأبواب .. نلومه اذا دفع الملايين علشان يشتري الأصوات ..

_____________

يا جماعة الخير .. وعلى قولة استاذ طراد ( ياجماعة الربع ) ترى الموضوع أبسط من كذا ..

ان كانك ترشحت فهذا خير على خير .. وان كانك ما ترشحت فهذا الشئ ما ينقص من حقك أبد .. بل هي مجرد وجهات نظر ..

ولازم ما ننسى ان المسابقه مجهود شخصي من المدون المحترف محمد الساحلي وهو بنفسه يقول ان المسابقه تحتاج الى تطوير .. فان كان عندكم ملاحظات لا تبخلون عليه فيها .. فالمسابقه فكرتها سنويه .. وتحتاج للتطوير المستمر .. وصاحبها يرحب في كل أفكار تطويريه أو نقد بناء

__________________

وكل هالطيبه والكلام الإيجابي ماراح تشوفونه  اذا فاز أسامه .. صدقوني بسوي زي ما سوى موسوي .. يا أفوز يا أكسر قزاز  ..

أمزح أمزح

عزيز وغالي يا أبو كندوره وتستاهل الفوز مقدماً

________________

بعيداً عن المسابقه .. ا كتشفت سبب انتشار انفلونزا الخنازير بالسعوديه بشكل مخيف ..بقول لكم السبب في التدوينه القادمه

بسم الله الرحمن الرحيم ..

بتوفيق من الله ..تم ترشيح مدونتي من ضمن المدونات المرشحه لجائزة آرابيسك , مسابقة أفضل المدونات العربيه .. في قسم التدوين الشخصي ..

وهذا شئ أفخر فيه .. لانه تم اختيار المدونه من ضمن 905 مدونة ..

وبما اني شخص سياسي محنك ومتابع جيد للانتخابات العربيه ..

فبغيت اسوي تكتل مع المدون الاماراتي أسامه .. كتكتل اقليمي خليجي ..  س هونت ..وقلت أبو عامر ما تمشي عليه مثل هالسوالف

وبعدين بغيت أسوي تكتل مع المدونه السعوديه وعد الشدي .. لأكسب ود الجانب النسائي .. وهذا الشئ استفدته من الانتخابات الكويتيه .. فبعد أن كانو ضد تصويت المرأه أصبحو يطلبون ودها .. بس هونت ..

وبعدين فكرت اني ارفع شعارات انتخابيه أتلاعب فيها بمشاعر الناس .. مثل ” الإسلام هو الحل ” أو ” نعم لقيادة المرأه للسياره ” وأحاول اللعب فيها بحيث احصل على دعم التيار الليبرالي او الاسلامي .. مايهم .. أهم شئ اني القى دعم والسلام ..

وبعدها فكرت بشحذ الهمم عن طريق اثارة القبليه  والطائفيه والمناطقيه مثل ما صار في شاعر المليون

بس هونت وتعوذت من ابليس ..

فقررت بالأخير اني انزل الانتخابات مستقل ..بدزن تكتلات وبدون شعارات زائفه .. وقلت في خاطري .. شبعنا من الخبث السياسي في الساحه السياسيه ..

والساحه الانترنتيه والتدوينيه ماهي محتاجه مثل هالسوالف ..

والغرض من هالجائزه هو غرض شر يف .. وهو دعم المحتوى العربي .. وما يحتاج لا شعارات ولا غش ولا غيره

وهنا احب ان أطلب من كل شخص يرى أن هذه المدونه المزيونه تستحق الفوز بهذه الجائزه أن يصوت لها عن طريق هذا الرابط:

http://arabisk-award.com/blogs.php?type=perso

ولا زلت أحمل نفس الشعار ” الهذره رساله .. فاجعلها سهاله “

• علمتني الحياة أنه لايوجد شر محض ولا خير محض ..

• علمتني الحياة إن الدنيا ماتدوم لأحد ..

• علمتني الحياة إن أصاله هي أجمل صوت نسائي ..

• علمتني الحياة أن الشعب السعودي من أكثر الشعوب إهمالاً .. ولا عندنا شباب و شابات لو يتم استغلالهم تصير علووم ..

• علمتني الحياة أن القياده في السعوديه فن من فنون القتال ..

• علمتني الحياة ان المسؤول الحكومي مهما كان منصبه .. اذا ماعاش عيشة المواطن الطبيعي و راح للمدرسه مشئ وعالج في مستوصف حكومي وشرب الماء من برادة المسجد بيده .. فمن الطبيعي انه مايحس بالمواطن ..

• علمتني الحياة ان بعض السعوديين تعود على الوضع واصبح يدافع بكل ماعنده من قوه علشان يمنع اي تغيير في الحال السعودي .. وهالحاله اسمها الترويض

• علمتني الحياة أن الممثله الجميله  والملابس القطنيه تغنيك عن السيناريو والاخراج  .. وخصوصاً لما يكون المسلسل خليجي

• علمتني الحياة أن المسلسل الكويتي .. عباره عن مخرج سوري و بطل ايراني وبطله مصريه ولا يخلو من بعض التواجد العراقي ..

• علمتني الحياة أن أفضل كبسه حمراء تسويها أميمتي الله يحفظها ..

• علمتني الحياة أن الاشكاليه ليست في البنقال .. بل في ديرتنا الكريمه ونظام العمل لدينا ..

• علمتني الحياة أن أي عمل تلفزيوني او سينمائي يستمر لأكثر من ثلاث أجزاء .. مصيره للفشل

• علمتني الحياة أن اليوم الخميس وغداً الجمعه وبعده  بيكون السبت .. أنشر تؤجر ..

تحياتي

وصل الى علمي ان سعادة الوزير وبعض الكتاب الصحفيين محتاريين بسبب عزوف الشباب السعودي عن الوظائف المهنيه ..

ومستغربين ليه الشعب مايبي يشتغل حلاق او خضّار أو بياع في قسم اللحوم أو من هالوظائف اللي سعادة  الوزيرنذر نفسه لها ..

ومن باب الفزعه حبيت ابين لسعادة المحتارين إن الموضوع ومافيه ” فلوس ”

فأنا ومن واقع تجربه ومن مجال عملي اجتمعت مع سعوديين في أصعب الوظائف وفي أصعب الأجواء .. وكان للسعوديين تواجد مشرف ..

وما ضرهم بعد المكان ولا صعوبة التضاريس ولا سوء الجو ..

ولكن اللي خلاهم يسوون كذا هو الفلوس يا سعادة المحتارين ..

دام فيه رواتب تسوى الكل مستعد انه يشتغل ..

شفتهم في المعامل يشتغلون في عز الرطوبه وفوق وعلى ارتفاعات كبيره وفي نص الظهر ..

وشفتهم يشتغلون في البحر ويقعدون بالأسابيع بعيد عن أهلهم وما قالو لا ..

اشتغلت في أماكن نائيه .. تبعد عن المدينه 300 كيلو وشفت الناس هناك وشلون مجتهدين وشاديين حيلهم وما قالو نبي نقعد عند أهلنا ولا محنا مشتغلين ..

ولكن هالشئ ماصار إلا لأنه فيه شئ يسوى جدي والجهد اللي ابذله ..

المشغل في المعمل نقدر نسميه عامل بس راتبه عازه ..

الطيار نقدر نسميه سواق بس راتبه عازه ..

المضيف نقدر نسميه قرسون بس الراتب هو الفارق في التسميه ..

وقيس عليها باقي الوظائف ..

الشعب السعودي مايبي يقعد في البيت ومايبي يقعد على مكتب وكرسي جلد ومايرفض الابتعاد عن بيته وديرته ..

بس أهم شئ المقابل ايش؟ هل هو راتب يعزني ويعز أهلي؟ ولا راتب طفسه لا منها معزه ولا راحه !!

وهذا هو الشئ اللي خلى الأمريكان اللي انتو تضربون فيهم المثل يشتغلون نجارين وبنايين وسباكين .. وهذا الشئ ماجاء ببلاش .. جاء لأن قيمة ساعاتهم تعتبر من أغلى الساعات ..

وهذا الشئ اللي خلى الهندي والبنقالي يجي ويشتغل في أي وظيفه .. لأن راتبه اللي مايجي 800 ريال خلاه يشتري بيت ومزرعه في ديرته

لكن نجي ونقول للشاب الجامعي اشتغل في محل أجبان براتب 1500 ريال , ما تزوجه ولا تفتح له بيت بل حتى ماتعيشه عيشه كريمه كعزابي ..

ولما يرفض نقول لهم السماء لا تمطر وظائف

وان كانك يا سعادة الوزير بتقول ان هذا هو الوضع الراهن ويجب ان نتأقلم .. فاسمح لي أقولك استقيل من منصبك .. لأنك فشلت في مهمتك الرئيسيه .. ودع الفرصه لغيرك ..

وان كانكم يا كتاب الصحف بتقولون .. الحق مع سعادة الوزير .. بقولكم بيجيكم يوم وبشوفكم ضد الوزير وخصوصاً لما  عيالكم يشتغلون بياعين براغي في سوق الحراج .. وبناتكم خدامات في البيوت .. لكن أمثالك ماراح يتعبون لانكم ماراح تعيشون هالحاله .. والسبب ماهو ان ابنائكم فيهم فطانه زايده .. ولكن لأن أبائهم عرفو يكونون بصف مين

وارجو ان فزعتي وضحت لكم بعض الأمور يا باش محتارين ..

طبعاً كلامي مايعني انه مافيه ” بعض ” السمرمد اللي مايبون يصيرون رجال ويشتغلون ويبون يقزرونها بلوت على الكورنيش .. بس انه الأغلبيه تبي تشتغل

قرر التلفزيون السعودي انتاج برنامج جديد بعنوان ” كيف صنعت ” على وزن البرنامج الشهير  How It`s Made اللي يبث على قناة دسكفري ..

وبعد تجيش الجيوش الإعلاميه والإنتشار في أرجاء المملكه العربيه السعوديه .. بدو تصوير البرنامج

وكانت الحلقات بالترتيب التالي..الأولى عن طريقة صناعة السفره البلاستيكيه .. والثانيه عن صناعة أكياس الزباله .. والثالثه عن  صناعة الطواقي الشخال وتم تصوير هالحلقه في مشغل أم صويلح ..

وبعدها توهقو لأنهم مالقو شئ يصورونه ..

وتقرر إلغاء البرنامج .. لأن الدوله النفطيه الأولى في العالم طلعت ما تجمل وما تصلح لمثل هذي البرامج .. وتم الإكتفاء بتحويل ميزانية البرنامج الى برنامج وثائقي يعني ببراطم الإبل ..

ومتى نشوفك يا Made in Saudi Arabia

فيه عينات من الناس ماينزلون لي من زور وما ابلعهم ولا احبهم .. وفي بعض الأحيان أكرههم على خفيف ..

• ما أحب الشخص الحلو أو اللي عامل نفسه حلو .. يعني تلقاه كل يوم جاي يروي لك قصص المعجبات والمعجبين , ومره يجي ويقولك فلان يوم شافني قالي الصراحه شكلك رزه .. والمشكله تلقاه يقولها بكل ثقه .. مع العلم ان شكله يجيب الهم .. ومن الأشخاص اللي اعرفهم شخصياً ويقول نفس هالسوالف شخص قذر مايعرف يكوي ملابسه وما يمشط شعره والقشره مغطيه كتوفه ومع هذا كل فتره يجي يقول قصه من قصص الاعجاب مع العلم ان ما اعلق على سوالف .. لكن ما ادري ومش اللي مخليه يجيني ويقول هالسوالف الماصخه ..
• ما أحب بعض الفتيات اللي يمشون في السوق وتقولك شوفني .. اما بشكل عبايتها أو بطريقة مشيتها أو بالبرمودا اللي بالصدفه تطلع سيقانها وهي ما تدري المسكينه .. أو بلون كوعها .. ايه لا تستغربون .. الحين فيه نوع جديد من البنات طالع يسوون دعاية للكوع وللإبط في بعض الأحيان .. تلقاها مفصله لها عبايه وموسعه أكمامها كأنها في العرضه النجديه .. وبدون ما تقصد ترفع ايدها علشان تحك قمة راسها .. وبالغلط تكون لابسه بلوزه مزلطه .. وعن طريق السهو تطلع ابطها للعالم … الله يقرفكم انتو والعادات والموضات القبيحه .. والموت كل الموت اذا جاتك لابسه نقاب .. يعني ساتره الوجه ومرتزه بكوعك وابطك؟
• ما أحب الشخص اللي من نوع وش رايك؟ .. يعني تلقاه ما غير جايك يسئلك  وش رايك في ساعتي؟ ولا وش رايك في نعالي؟ وش رايك بشماغي .. عجيب لونه صح؟ هالنوعيه من الناس احس انها ناقصه وفيها مشكله مع نفسها .. واحس انه اذا شاف شئ في المحل وقبل لا يشتريه يغمض عيونه ويتخيل شكل الناس وهم يقولون ” وااااااااااو ” ويعيش نشوة الاعجاب ويشتري الشئ بالمبلغ الفلاني .. وينصدم انه لما يطلع للناس مافيه احد يعلق او ينتبه للهباب اللي شاريه فتلقاه يستجديهم بسؤاله بحيث انهم يقولون له اي والله حلو مجامله له … وبالنسبه لي هالنوعيه من الناس اذا سئلوني تلقاني عمداً أقولهم ” اممم .. حلو مش بطال .. بكم شاريه؟ ” واذا قال لي قيمته اقوله الصراحه مايسوى قيمته … رغبتاً مني بتحطيمه .. ورسالتي لهالنوع من الناس .. خل العالم هي اللي تحكم .. لا تقعد تتكلم عن ممتلكاتك ولا عن نفسك .. الزين بيفرض نفسه ..
• ما أحب الشخص الملقوف .. اللي يسئل في كل الأمور .. وين رحت ؟ مع مين؟ وش سويتو؟ وش قلتو؟ فلان ليه يوم سلم عليك ما ابتسم لك.. انتو متزاعلين ؟ .. هالنوعيه من الناس تجيب الحارق .. هالطبع اكرهه في الحريم والرجال .. واكرهه زياده عند الرجال .. عيب عليك متابع الامور وسوالف الناس ..
• ما أحب الشخص اللي يمون بالقوه .. اذا ركب معاك فتش سيارتك .. واذا شاف جوالك خذاه ودرعم على قسم الاستديو  يشوف الصور .. واذا شاف بوكك على الطاوله خذاه وشاف كم معك .. هالنوعيه ودك انه يصدر فيهم حكم قضائي بالسجن في زنزانه فيها ابواكه وتلفونات وسط علبه قزاز .. وفيها دروج مقفله .. علشان تجيه القرحه من قوة اللقافه ..
• ما أحب الشخص المتذاكي واللي حاس انه هو الوحيد اللي فاهم الأمور .. وهالنوع من الناس تلقونهم في كتاب الصحف وخصوصاً اللي يتكلمون باسم الشعب السعودي على انهم الفئه المختاره وهم اللي بيخططون للناس وهم اللي يعرفون وش يحبون الناس وايش يكرهون وايش اللي في مصلحتهم .. والناس كلها غبيه وماتعرف مصلحتها .. هالنخبه اللي يعتقدون نفسهم أولياء على الشعب أكرهم الى النخاع.. وأحب اللي من الناس ويتكلم بلسانهم مع احترامه لوجود من يعارضه من العاقلين ..
• أكره الأشخاص اللي يظنون انهم هم أصحاب الوطنيه الوحيدين .. وكل من ينتقد الحكومه تلقاهم يتكلمون عنه على انه هو الخائن المارق وهم الوطنيين المخلصيين .. ولكن مثل ما قال أخوي فؤاد ” السعودية.. وطن البسطاء أيضاً..”
• أكره التعصب القبلي أو الطائفي أو المناطقي .. إلا منطقه وحده مالله رزقني حبها ولا حب أهلها.. و على كثر اللي عرفتهم من هالمنطقه مافيه ولا واحد يجمل ولا بين فيه المعروف بس الأيام جديره بتغيير احساسي ..
• أكره بوش الأب والإبن والجد بعد لأنه ماعرف يربي عياله
• أكره البروستد بعد ما أشبع منه.. لأني أحس اني كنت اشرب زيت مقلي

واكره نفسي لما اكون متشائم كثير ومحبط وجوعان ..و يازين الشخص لما يكون معنوياته مرتفعه وشبعان ..

وأنا الآن أعاني من زكام وحراره وألم في الظهر وجوعان جداً ..

قرأت اليوم حوار مع  الأمير مشعل بن عبدالعزيز أطال الله في عمره في مقابله له اجرتها معه صحيفة الرياض ووصف بعض المواطنين بالإتكاليه ..

والإتكاليه بمفهومنا الشعبي هو التبطح والتسدح .. و أهالي الشرقيه يسمون الإتكالي .. بالطرح المر .. كنايه عن انه متمددد ولا منه فايده

و أنا أوافق على كلام صاحب السمو ..

وأنا كوني مواطن صالح بطرح بين أياديكم بعض الطرق علشان ما تصير إتكالي ..

وسميتها ” الحلول الجذريه لنزع الإتكاليه ”

عزيزي الإتكالي :

• اذا انك قاعد في بيتكم .. ولنفرض انك من سكان الطائف .. وقمت الصباح تبي تغسل وجهك وتزيل الغمص من عيونك ولقيت الماء منقطع فلا تقعد تنتقد الحكومه .. وتقول وين الماء اللي افدع قيمته؟ ليه مقطوع الماء؟ ليه الحكومه ما تحل مشكلة المياه في السعوديه؟ لأنك اذا قلت ذا الكلام بتصير شخص اتكالي .. ولكن المفروض عليك كمواطن صالح انك تاخذ الشيول والجدوم وتطلع مع عيالك وتحفر لك بير في حوش بيتكم.. بالطريقه هذي يتكون خووووش مواطن.
• اذا كنت ماسك خط ابو حدريه ولقيت قدامه حفره ناسيها المقاول وكليت الحفره وانكسر عندك المساعد وزحفت سيارتك وبغيت تموت انت واهلك بس الله ستر عليك .. لا تقعد تصايح وتلاعن وتقول وين الحكومه ؟ وين وزارة الطرق ؟ وين الوزير؟ هااااااااه تراني احذرك .. لانك بهالطريقه بتصير اتكالي مره ثانيه .. ولكن عليك انك ترجع تاخذ الشيول اللي حفرت فيه البير وتروح لجمب الخط وتاخذ لك تراب وتدفن الحفره .. وان كان قدرت تخلط معها شوي حصى علشان تصير اقوى كثر الله خيرك .. تحفر لك شوي وتدفن حفره ولا يقولون عنك اتكالي؟ هاه وش رايك؟.
• اذا رحت مكتب استقدام فاتح في شارع رئيسي في الخبر وعطيته فلوسك وانتظرت شهر علشان تجيك الخدامه وبعدين كلمتهم علشان تستفسر ومحد رد عليك وقررت انك تروح للمحل اللي فاتح في شارع رئيسي في الخبر لأكثر من خمس سنوات ولقيته مقفل ومافيه احد .. وبعدين اكتشتشفت انه طول هالمده الآدمي هذا ينصب على الناس وماعنده تصريح يجيب خدم وضاعت فلوسك يا صابر .. لا تقعد تقول وين الرقابه ؟ وين البلديه؟ وشلون هالمحل بدون تصريح قدر يسوي لوحة للمحل ويطبع فواتير رسميه وبدون ماينتبهون له البلديه ؟ بالشكل هذا رجعت وصرت مواطن اتكالي وراح تعبك في حفر البير ودفن الحفره على الفاضي .. عليك بالصبر والإيمان بالقضاء والقدر وتروح تنق فلوسك مره ثانيه لمكتب ثاني .. وفلوس تروح ولا اتكالي يجي.
• اذا تخرج ولدك بنسبة 99% وما لقيت جامعه تضفه علشان يفلح ويتخرج وقالو لك ولدك مانقدر نقبله كل الكراسي مليانه وتكتشف ان نص اللي مسجلين نسبتهم اصلا ما تقبلها الجامعه ولكن علشان الواسطه كل شئ يهون …  لا تقعد تصارخ و تخاور عن الجامعه وتقول وش هالظلم وين وزارة التعليم تحل هالمشكله ؟ وين العدل ؟ وين الرقابه ؟ خذ ولدك وابلع لسانك وخله يسجل في معهد فني .. ولد متفوق يطلع نجار أحسن من يوم  يجون وينادونه ويعايرونه  يا ولد الإتكالي .. ويتعقد الولد علشان ابوه مارضى بالوضع ..
• اذا طلعت ولقيت سيارتك مسروقه من قدام بيتك وحاولت تطلع جوالك علشان تكلم الشرطه ومر واحد على دباب ولقط الجوال من اذنك وانحاش وبغيت تلحقه وقمت اشرت لواحد وركبت معه علشان تلحق راعي الدباب .. وقام هاللي ركبت معه وهددك بالسلاح وسرق محفظتك و حذفك على طرف الخط .. لا تقعد تصايح وتقول وين الحكومه ؟ وين الأمن ؟ وين الأمان ؟ وين الرقيب ؟ وش السبب اللي خلى السعوديين سروقين و حراميه … المفروض انك ترجع لبيتك وتحمد ربك على نعمة الثوب اللي عليك وانه ما نسرق .. والله لا يهينك روح واشتر لك سياره ثانيه وجوال غير اللي انسرق بدال ما تكون اتكالي ماعنده اللي التشكي .. وخلك زي الأجنبي المنتج ..
• اذا قعدت في البيت على حزة العصريه وفرشت لك ذيك الفرشه على الساعه اربع وقعدت تتقهوى انت وعيالك الأربعه اللي متخرجين من أمريكا في أحسن التخصصات لكنهم ما لقو لهم وظيفه تنفعهم وصارو مثلهم مثل خواتهم اللي مالقو لهم مدرسة قريبه يدرسون فيها … لا تقعد تتشكى وتقول وش معنى ولد فلان متوظف قبل لا يتخرج ولا بنت فلان توظفت في المدرسه اللي قدام بيتها .. ولكن المفروض انك تاخذ دلة القهوه وتقهوي عيالك وتخلي عنك التشكي والاتكاليه .. وبدال ماتتكل على الحكومه في توظيف عيالك .. سو مثل الأجنبي شغل عيالك في البيت .. واحد سباك وواحد سواق والبنات وحده تطبخ ووحده تغسل .. وحاولو تتأقلمون مع الوضع واتركو عنكم الحكومه ..

وكالعاده بقول واللسته تطول .. ولكن أتوقع انكم فهمتو الخلطه السريه ..

وصحيح انكم يالمواطنين السعوديين اتكاليين .. بس ما اتوقع انكم حمير وما تفهمون باقي الحلول ..

بيني وبينكم خوفي يطلع لي واحد ثاني ويقول ” اصلا المواطنين حمير ” عموماً ما نستبق الأحداث .. الصبر زين ..

عموماً يمكن تشوفون بعض الأخطاء الإملائيه .. وانا مستعجل لأن المباراه بتبداء بعد شوي .. فبدل ما تكونون اتكاليين وتقعدون تطلعون الأخطاء الإملائيه وتقولون ليه هالآدمي ما يهتم بالتدوينه .. كل واحد منكم يصلح  الخطاء اللي يشوف ويسكت

تحياتي

روابط :

الأمير مشعل يدعو المواطنين إلى الابتعاد عن «الاتكالية» والمشاركة الفعلية في التنمية

أكتب هذا الموضوع علشان أعلن للكل بأني من آكلين الكبده .. ويسموني الكبداوي ..

وأنا كبداوي محترف بعد ..

آكلها بالحمص .. وآكلها بالساندوتش .. وآكلها بالجبن .. وبالشطه بعد ..

وحتى سليمان اللي في بوفية البنوك لما يشوفني .. على طول يسئلني ” بالشطه ولا بدون ” وهذا ان دل فيدل على اني معروف بولائي للكبده ..

وأكره أكل البيض .. وخصوصاً المقلي منه ..

وقيل في الأمثال ” يا ماكل المقلي .. لا تااامن الحجبه ”

وتقول العرب .. قلى البيض(و) فحجبوه(و) .. لما عرف عن أصحاب البيض المقلي من الفسق والفجور

وأنا من منبري هذا أعلن بأني ومدونتي كبداويين حتى النخاع ..

ونظراً لهذا الإنتماء أحب أبين لرقيب الكبده حتى لو جاء هذا التبيين متأخر شوي .. بأني قطعت علاقتي بصاحب المقلي المعروف و المدعو بماشي صح .. من أول ما دريت انه يتعاطى المقلي ..

وما كان ناقصني على آخر عمري إلا اني امشي مع ” مقلاوي ”

وعلى هذا الأساس حبيت اني أبين انتمائي .. فالواحد هاليومين ما يدري وش بيصير له .. والدنيا حياة وموت ..

وصلى الله وسلم على نبينا محمد

وهنا تجدون مقابله مع المقلاوي أجراها معه القائمون على موقع المفكره الإعلاميه

———

ذات صله :

التويت المقلي

هناك مشاريع وأفكار كثيره في طور دراسة الجدوى السعوديه

لأنهم خايفين يطبقونها وبعدين يطلع ما منها فايده أو مضره للشعب ..

وأحب أذكر منها هذي المشاريع :

• الهاليكوبتر الطبيه والأمنيه والشخصيه, يدرسون جدواها .. يقولون خايفين انها تطلع مزعجه أو مضرة في البيئه  أو إن أصحابها يطـلـلطون في بيوت الناس وأهم شئ الستر
• القطارات السريعه اللي يسمونها قطار أبو فشقه بحيث تربط بين ” جميع ” مدن المملكه بدل الشحططه بهالسيارات ,بس يقولون انهم سامعين انها ماهي زينه للظهر .. لأن سرعتها الزايده احتمال تجيب الدسك للظهر .. واحتمال تذبح البعارين وأبدى ماعلينا بعارينا
• الكباري المصنوعه من الحديد اللي تكلفتها تساوي عشر قيمة الأنفاق اللي تخر ماء ومدة بناءها قصيره .. ويقولون صحيح انها موجوده في بعض الدول وعمرها اكثر من 200 سنه .. بس وش درانا يمكن لما يصير عمرها 201 تطيح .. وهذي وجهة نظر سليمه
• فتح فروع للجامعات العالميه في السعوديه بدل ما نرسل عيالنا لها .. بس يقولون يمكن تزعل قطر .. وخبركم حنا نمووت في قطر
• تطبيق الحكومه الالكترونيه والانتهاء من الملف العلاقي وخيبته , بس يقولون انه عندهم ختوم كثيرة .. وش يسوون فيها؟
• ترميم الشوارع وانتاج شوارع جديده بدون ارتفاعات وهويات .. بس يقولون يخافون اذا الطريق صار أملس ومافيه حفريات وتحويلات يمين ويسار إن السائق ينام من كثر الهدوء ويطلع من الخط ويصدم له عامود اناره ويموت .. و طبعا انتو عارفين عامود الإناره كم يكلف ..
• وأكبر مشورع هو مشروع وضع اشاره عند التقاطع الخطير اللي في مدخل الدوحه ( للقادمين من جهة إيكيا) .. بس يقولون ان ابو ناصرمتراهن مع  ابو سليمان انه بيمر سنتين بدون مايصير وفيات في هالتقاطع الجديد ومتحدين على مفاطيح لكل موظفين المرور والبلديه ,ويقولون مابقى الا كم شهر على انتهاء الرهان .. أصبرو شوي
• توصيل الماء الحلو لحي الدوحه في الظهران اللي يبعد عن التحليه ما يقارب 30 كيلو .. بس خوفهم ان شعر سكان الدوحه يتساقط من هول الصدمه .. فمثل مانتو عارفين اللي طول عمره متعود على الماء المالح بين يوم وعشرين سنه يجيه الماء الحلو فجاءه صعب شوي عليه وعلى مشاعره
• المشروع الأخير هو مشروع إعطاء المواطن منحة زواج وأرض سكنيه ومبلغ 600 ألف علشان يبني مع تأمين صحي له ولعائلته .. ويخلون التلفون الثابت مجانا والكهرباء اشتراك مقطوع سنوياً .. بس خوفهم ان المواطنين يصيرون فاضين لأنه ماعندهم مشاكلين تشغلهم ويتفرغون لأشياء ثانيه

والله يجيب الجدوى على خير

من أول ما دخلت علينا القنوات الفضائيه وصرنا نستمع لكذا نشرة أخبار عالميه ..

ومن يوم بديت اسمع بخطط الطوارئ والخطط الخمسيه والعشريه..

 وانا كنت حاس اننا بلد ماشي على العمياني ..

لاني ماعمري سمعت أو قريت أوشفت خطط تنفذ عندنا ..

 يمكن نسمع ان الوزير الفلاني يخطط .. لكن الله اعلم وش يخطط ..

واما بالنسبه لنا كشعب فأرض الواقع فاضيه ومحطوط عليها لوحة كتب عليها ” الأرض للإيجار ” لأننا ماشفنا شئ   ..

—————

في السنوات العشر الأخير مرينا بكذا أزمه وبكل فخر ما عدينا ولا أزمه منها ..

وأكتفينا بالإيمانيات العاليه اللي نملكها كشعب .. ورددنا على أنفسنا فؤائد الإيمان بالقضاء والقدر .. والصبر والاحتساب ..

ولكن عند أول نجاح ننسى القضاء والقدر ونقول هذا النجاح بسبب القياد الرشيده والحكمه الوزاريه ..

• بدت العطاله ومن يومها وهي في تتفشي والى يومك مافيه خطه واضحه لمعالجة الحال والوزير فالح بعرض الأزياء الخدميه
• بدت السرقات وعمليات الاختطاف ومن يومها وهي في ازدياد
• طاحت الأسهم واالعالم انجنت وسمعنا عناوين رنانه ومن يومها والسوق منسدح
• ارتفعت أسعار الأغذيه وانبح صوت الناس يدورون عن المنقذ ولا يوجد مجيب
• ارتفعت الإيجارات وأسعار البناء دون مسبب و ماحولك أحد
• انتشر الفساد الإداري و شكلو لجنه خاصه لمكافحة الموضوع ومن يومها زاد الفساد
• انقطاع المياه المتكرر في المنطقه الغربيه والشعب عطشان والمسؤول في وسط حوض الجوكوزي يقول ” مجرد مبالغات “.

( وكالعاده للأسف أقول ” واللسته تطول” )

و آخر الأزمات كانت أزمة انفلونزا الخنازير … وبنفس السيناريو ابتدا المرض واستمر في الانتشار الى ان تصدرنا دول الشرق الأوسط في عدد الإصابات البالغ 595 ..وعدد الوفيات 11 خلال شهرين تقريبا ..

وبدل ايجاد الحلول وتصحيح الأخطاء .. اتخذت وزارة الصحه اجراء عدم الإعلان عن الحالات الجديده ومحاولة تغطية عدد الوفيات والضغط على الصحافه بعد الكتابه عن الموضوع كاإجراء تصحيحي للوضع ..

لأنهم بعد دراسه اكتشفو ان سبب وصول عدد المصابين الى 595 مصاب .. هو إعلانهم عن عدد المصابين .. فوجدو ان افضل طرقه لإيقاف انتشار الوباء هو التوقف عن تحديث الرقم والاعلان بشفافيه عن عدد المصابين ..

والمشكله الكبرى هم المواطنين .. بدل مايغضبون من هذا الاهمال والاستهتار .. قامو يعللون ويدورون الأعذار كعادتنا كسعوديين ..

وبدا البعض يقول طبيعي نكون اكثر دوله مصابه .. لاننا بلد الحرمين وعدد المعتمرين كثيررررر ..وهذا شئ طبيعي .. وكأنهم نسو ان بعض الدول الأفريقيه الفقيره أكثر منا عدداً في المواطنين وعدد الزوار من السائحين يفوق عدد المعتمرين لدينا .. ونفس الشئ ينطبق على الدول الآسيويه ..

 وهذا ان دل فيدل على حالة الترويض اللي وصل لها بعض المواطنين لدرجة انهم اصبحو يبحثون عن الاعذار بدل ان يطالبو ويلومو المسؤول عن ذهاب الأرواح ..

وزبدة الموضوع واللي ابي أوصله .. اننا اثبتنا فشلنا في مقاومة أي أزمه نمر فيها كشعب او تمر فيها البلاد .. وهذا شئ خطير .. وعلى أي غيور على بلده سواء مسؤول أو مواطن أن لا يرضى بهذا الحال ..  وبما اننا الى الآن في وضع بامكاننا نصلحه يجب علينا ان لا ننرضى بمثل هذه التصرفات وأن لا نجعل مثل هذه الأصوات اللي تدعو الى الرضى بالقضاء والقدر والصبر بأن تعلو .. ويجب أن نزيد من وعينا وأن لا نرضى بأي عذر او تبرير .. يجب أن نجبر المسؤولين على احترامنا واحترام مصالحنا … فهم موظفين ودورهم الأساسي أن يقومو بخدمة هذه البلاد ..

ويجب أن نتفق على شئ ..  إما نؤمن بأن اي شئ قضاء وقدر ونكتفي بذلك سواء في الضراء أو في السراء .. أو نكافئ المجتهد ونعاقب المستهتر ..

أما أن تكون الإنجازات بسبب جهودهم وتدهور الحال قضاء وقدر فهذا شئ فيه من ” الخبال ” الشئ الكثير ..

والله يصلح الحال .. قولوا آمين

————————-

شوفو تركي الدخيل شكاتب .. وركزو على الملحوظه اللي في الأخير:

المقال الممنوع من قبل وزير الصحه السعودي

كل ما عدلت واحد يميل الثاني

من عثر حظه يصير القريب بعيدي

والصديق اللي تبيه يستوي قوماني

———————-

نظراً لأموري اللي محيوسه هاليومين ابتعدت عن المدونه .. والله يعدل الأمور على خير
وشكراً لكل من سئل .. واحب اقول للي ممتنعين عن الاكل تقدرون تاكلون .. انا بخير وعافيه ..

لكن انا في دورة من دورات الحياه وهالدوره صايره محيوسه حبتين ..

وان شاء الله بتزيين الأمور وبنرجع نقرق مثل أول

قبل ثلاث أسابيع تقريباً سمعت عن أغرب دراسه في التاريخ .. في تشرة متصف الليل على قناة ام بي سي

هالدراسه تقول ان الشعب السعودي أسعد شعوب العالم !!

وهالدراسه تثبت زيف الدراسات الأخرى … لأني متأكد وأبصم بالعشره اننا كشعب ان كنا في يوم من الايام من الشعوب السعيده .. فمتأكد اننا ما حنا اسعد شعوب العالم

وهالدراسه ماراح تكون صح الا في حاله وحده ..

ان هاللي سوى الدراسه كان مسويها على طريق الرياض  في المحطات القذره الغير قابله للاستخدام الآدمي ..

وسواها على شلة محششين  جالسين في أحد المقاهي الشعبيه وسط الغبار والحر وقاعدين يضحكون ..

فلما شافهم اللي مسوي الدراسه ..

قال هاللي قادرين يضحكون في وسط هالجو الحار اللي يجيب الهم  وهالغبار اللي يجيب الكتمه  وفي وسط هالقذاره ..

أكيد انهم أسعد شعب في العالم ..

—————-

والله يديم السعاده ان شاء الله ..

هالمره أسعد شعب في العالم ..

وقبلها أجمل نساء في العالم

وعقبال  ما نصير أكبر دخل مادي للفرد  في العالم

وفي هالفتره احاول انزل من نسبة ادمان النت في دمي ..

وكانت الاجازه عباره عن اجازة استرخاء وتبطح ..

وكان من المخطط سفره آسيويه .. ولكن انفلونزا الخنازير غيرت المخطط ( الله يجزاها خير )

وتخلل هالتبطح سفره لدبي لمدة 5 أيام ..

وهي الحدث الأكبر في هالاجازه ..

وان شاء الله بكتب عن زيارتي لدبي مع بعض الصور ..

والحين احب اقولكم اني ” باك ”

و ياليت يابو سعد تعطيني مفتاح المدونه لاني رجعت ..

صوتك أمانه  .. فصوت للأطول والأمتن

شعاري ” الهذره رساله فأجعلها سهاله ”

————–

للتصويت لهذه المدونه في جائزة هديل ..

ادخل على هذه الصفحه

http://www.hadeelprize.org/?page_id=207

وقم بادخال ايميلك ..

وبعدها اختر مدونتي في قسم التدوين العام وهي تحت اسم ( I B R A H I M )

وبعدها في اسفل الصفحه اختر ” الخطوة التاليه ” واتبع التعليمات

وشكراً للقائمين على المسابقه

———————

أعدكم في حال فوزي سأقوم بإسقاط القروض ( فاهم غلط)

وصلني قبل كم من يوم إهداء جميل من الأخ المدون الإماراتي خالد السويدي ..

والهديه عبارة عن نسخه موقعه من كتابة الجديد ” بطل رغم أنفي ” ..

والكتاب عباره عن مجموعة من القصص من تأليف الكاتب .. تحكي الواقع اللي يعيشه المواطن ..

وكلنا نعرف خالد واسلوبه الساخر

وأحلى ما في القصص .. قصة ” إسماعيل شاكليته ” هههههههه جد يا خالد وش كثرهم هالأشكال

وشكراً كبيراً كثيراً على هالهديه يا خالد وعقبال ما تهديني بانشي

——————-

في بداية الكتاب كان هناك هذا الإهداء من الكاتب ..

الإهداء

إلى كل من تؤرقه هموم الوطن والمواطن

إلى كل إنسان بسيط ذاق طعم المعاناة

إلى محمد وعائشه وعمر ومريم وأسماء

هذا الكتاب مني لكم

————————–

لمعرفة المزيد عن الكتاب وطريقة الحصول عليه تفضل بزيارة هالموضوع

في تاريخ 24 يونيو 2008 يعني قبل سنه بالضبط .. كان وزيرنا المقدام القصيبي صاحب الفكره الذهبيه في السعوده السفليه .. كان قرسون
والسنه هذي وبنفس التاريخ .. طلع لنا بزي مقدم الطلبات وقدم الجبن والزيتون للمتسوقين ..

وكل هذا من أجل ان ينجح مشروعه في السعوده السفليه ..

طبعاً من يوم طلع لنا وزيرنا الموقر العنيد اللي بالغصب تنجح خططه .. ما سمعته ولا يوم تكلم عن الجنسيات الجنبيه اللي تشغل المناصب في الشركات الخاصه .. والمافيا اللي هي مسويتها من اعلى الشركه الى اسفلها وفي الأخير وعن العين والنفس سعودو الحارس والسواق ..

ما سمعناه يتكلم عن المهندسين العاطلين واللي يشتغلون بوظائف غير وظائفهم بسبب انشغال وظائف الهندسه بالهندي والباكستاني والفلبيني ..

ما قال لنا كيف بيقدر يعيش مقدم الطلبات في ديرتنا؟

ما ادري هل يعرف وزيرنا الموقر ان سعودة مثل هذي الوظائف الدونيه اللي راتبها ما يزيد عن 1500 ريال هو في صالح الشركات فقط .. منها محسوبه لهم سعوده .. وبنفس الوقت اوفر لهم من العامل الاجنبي اللي مكلفين باكله وشربه وسكنه واقامته وتجديد اقامته وتذاكر سفره .. بينما السعودي ماهم ملزومين يوفرون له هالاشياء ..

يا وزيرنا الموقر .. انا على استعداد كامل اني اشتغل زبال واخلي الابتسامه تملى وجهي .. اذا اني داري اني في آخر اليوم راح اركب سيارتي الالمانيه الفاخره وارجع لمكتبي في وزارتي .. وفي نهاية يومي برجع لقصري واشرب لي ذاك الفنجال بين عيالي اللي خدودهم ورديه من زود النعمه ومن زين الوظائف اللي هم فيها .. هذاك مدير شركه والثاني مهندس في اطلقها شركة و بنتي في احلى وظيفه واتخنها ..

فلبس مقدم الطلبات وجلستي ورا الكاشير يوم واحد ماهو ذاك الانجاز .. اذا قارناه بعدد العاطلين من اصحاب الكفاءات ..

ولو انك سائلني كان قلت لك ياليتك رجعت لنفس المطعم اللي صورت فيه العام وقلت لنا وش أخبار السعوديين اللي صورت معاهم العام .. وش اللي صار على حالهم .. وايش اللي تحسن وتغير في حياتهم .. وهالتصرف كان بيثبت لنا انك مهتم في مستقبل الشاب السعودي ..

لكن انا بالنسبه لي اعتبر اللي قاعد تسويه يا وزيرنا الموقر مجرد تمثيل على الشعب وخيانه لهم .. ومجرد محاوله فاشله من قبلكم لإنجاح مشروعكم في السعوده السفليه ..

سعادة الوزير نبيك تنزل للعالم وتسمع منهم وتعرف وش يعانون منه ..

وانت بتصرفاتك هذي تذكرني بسالفة اللي كان يشتكي من ضيق ثوبه للخياط .. والخياط يقوله بس وش رايك في لونه؟؟

وفي حالتك .. المواطن يشتكي من قل الوظايف ومن المافيا في الشركات وانت رايح وراجع على معلم الشاورما ومقدم الطلبات ..

سعادة الوزير ..

خططكم أنتجت لنا ..

سوق سوداء في فيز الاقامه ..

انتشار الرشوه في مكتب العمل ..

ارتفاع رواتب العماله ..

الكثير من المشاريع الصغيره اعلنت افلاسها ..

ارتفاع مستويات البطاله .. مما نتج عنه ارتفاع مستوى السرقه ..

وكالعاده أقول .. واللسته تطول ..

تدري يا سعادة الوزير .. اني تحسفت اني قريت جريدة الوطن اليوم .. لان الموضوع اللي فيه صورتك غثني .. وخصوصاً يوم قلت لي ان الموظف السعودي لا يهمه زيادة الراتب .. بل يهمه معرفة مستقبله ..

سعادة الوزير .. أكرهك وما ابي اصير صديقك

(أدري إن الأغلاط الإملائيه مليون .. بس ماني مراجعها لأني مابي انغث من الكلام اللي كاتبه)

_______

تدوينه سابقة :

في الأمس كنت أتابع فلم WHERE IN THE WORLD IS OSAMA BIN LADEN? .. عن شخص أمريكي يبحث عن أسامه بن لادن ..

وتجول في رحلته في عدة دول منها السعوديه , أفغانستان و باكستان ..

وكان في تتبعه يعتمد على انه يربط بين الناس المتوقع انهم يعرفون مكان أسامه بن لادن .. بحيث انه يبداء من نقطه الى نقطه حتى يصل الى أسامه ..

طبعا كان فيه نوع من الكوميديا .. واخراجه كان جميل ..

ولكن اللي عبته على هالفلم انه كل ما يجيب طاري الارهاب , أو أحد ضيوفه يتكلم عن الارهاب .. يجيب في الخلفيه صوت الأذان وناس تصلي ..

بحيث انه يربط بين الإرهاب وبين الدين ..

عموما سواء هذا قصده أو لا .. فهو شخص أمريكي غير مسلم وغير سعودي بالتأكيد ..

ويهمه انه يطلع صورة أمريكا بأجمل شكل .. و يمكن من مفهومه وتأثره بالإعلام ربط بين الاسلام والصلاه والأذان والإرهاب ..

لكن اللي غثني في الفلم .. إنه وأثناء بحثه عن أسامه بن لادن .. استضاف شخصيه .. والظاهر انه من عشاق النساء وكارهين المطاوعه اللي يسمون نفسهم الليبرالييون السعوديين ..

لأنه كل ما سئل صاحبنا الأمريكي عن أي أمر في السعوديه  .. نقز له ” أبو لبرل ” وقاله .. هذا بسبب المتشددين .. وان السياسه في السعوديه تدخل في المتشددون وسبب الارهاب هم المتشددون ويجب إبعاد “ المتدينون ” من أي شئ له علاقه في السلطه والسياسه .. ولا تنجح أي دوله يوجد فيها متدينون يتقلدون مناصب سياسيه .. وخلى الدنيا واللقاء واسامه بن لادن وضيفه الامريكي وطاح لك في المتدينون ..

طيب يا عزيزي يا أبو لبرل .. ماعاد تقدر تفرق بين الأمور .. خلاص من يوم تشوف كاميرا ومايك تبداء تتكلم عن المتدينون اللي في أول أمرك كنت تقول عنهم متشددون بس بعدين طلع اللي بقلبك وبديت تتكلم عن المتدينون وليس المتشددون ..

طبعاً للعلم في كل اللقاءات كان صاحبنا الأمريكي متفاعل مع الضيوف .. إلا مع هذا الشخص .. لأنه والله العالم حتى الأمريكي حس ان الشخص هذا غير منصف .. وواضح ان بقلبه غل ..

طبعاً الفلم تنقل بين شخصيات مختلفه وجنسات ومواقع مختلفه … وكلهم كان كلامهم منطقي … سواء الفلاح او سواق الباص او الشيخ او العالم او السياسي او الدكتور سواء كان يوافقون أسامه بن لادن أو ضده …

إلا صاحبنا أبو لبرل .. غثيث وكلامه ما ينبلع وممل ولا له لا طعم ولا ريحه .. والأكثر مللاً هو جلسته المنطعجه وثوبه الشفاف ..

بس اللي برد خاطري .. ان حتى المخرج ما كتب اسمه:)

وفي آخر الفلم تكلم صاحبنا الأمريكي ان الموضوع كله مايسوى البحث عنه .. لأن المشكله ماهي في أسامة فقط .. المشكله في الفكر .. وبدا يتكلم عن أمريكا ويقول ان الناس اللي كنا خايفين منهم ونتوقع انهم وحوش مفلوته .. طلعو ناس مثلنا مثلهم يبون يعيشون بسلام .. فيجب علينا ان نصحح فكرتنا تجاه العالم لكي نستطيع ان نعيش بسلام ..

وعاد أدراجه الى أمريكا وزوجته اللي على وجه ولاده … وفي آخر الفلم ولدت زوجته وجابت ولد .. وقربو الصوره على الولد إشاره منهم إن المستقبل هو المهم لهؤلاء الأطفال ..

طبعاً هالكلام بيزعل أبو لبرل

—————————–

هالصنف من عشاق النساء وكارهين المطاوعه .. يجيبون لي الهم ويذكروني بالواحد المتعلث اللي يدور سبه على الشخص .. وكرههم للمطاوعه مخليهم يطلعون بشكل غبي إلا عند الأشخاص اللي على شاكلتهم ..

أذكر واحد منهم كان كاتب مقال يصارخ فيه لدرجة ان الجريده كانت تهتز من حماسه .. والمقال كان يتكلم عن حصة الرياضه في مدارس البنات .. وصدقوني ماطرح في الموضوع اي نقطه .. وما قال اي شئ علشان يوضح الشئ اللي يبيه .. واكتفى بس با ستهزاءه بالمتدينين .. وهذا الشئ اللي خلاني أعرف ان القصد كل القصد من هذا المقال ومن هذا الصراخ هو ان يجد شئ على المتدينين طبعاً الجهه التنفيذيه هي الوزاره والوزير … يعني مفروض يتكلم عن الوزاره حتى لو كانو المتدينين معارضين هالشئ .. مفروض انه يتكلم عن الوزاره ويوجه كلامه للوزير وللمسؤولين .. ولا الموضوع شخصي بينك وبين المتدينين؟

———————–

طبعاً مثل مافيه بهذي الجهه من عشاق النساء وكارهين المطاوعه التافهين .. فيه بالجهه الأخرى كارهين الابتسامه وعاشقين الحزن ممن يتصيدون للشله السابقه الذكر في الرايحه والجايه والطعن في أي قرار جديد بأنه ناتج عن أيدي خبيثه تريد بنا وبأمة الإسلام الشر والفساد .. ويقصد أبو لبرل بكلامه هذا ..

وبين هالفئتين المتقاتلتين الشعب ضايع وماعمري سمعتهم يتكلمون عن شئ لمصلحة الشعب .. فهم يدفع لهم للقيام بهذا الدور فقط

والشرهه ماهي عليهم .. الشرهه على اللي مخليهم يتهاوشون قدام العالم …

وما اقول الا ياليت أمركم في يدي

—————————

عموماً أنا كان قصدي من كل هالتدوينه .. أقولكم شوفو الفلم تراه جيد

—————————

مواضيع قد يكون لها علاقه :

فلاش (5)

سؤال المليون :-

ماهو سبب الإبتسامة الشقاقيه للمليحين الثلاثه اللي في الصوره؟

هالابتسامه سببت للشعب السعودي الزعل .. فهل عرفتو السبب؟

سبق وبينت عن انتمائي وحبي لبرنامج مراحب وهذا الحب قديم ولاعب في قلبي لعب ..

يخرب الحب شو بيزل

بس حب مراحب ما ” يزل ” إلا يثقف ويعلمك اسلوب الحوار وتقبل الأفكار ويفتح أمامك أبواب جديده ..

وبما إني مرحباوي ومتعصب بعد .. وكما جرت العاده على أن عشاق الأنديه يتابعون أخبار ناديهم ويحضرون مبارياته ..

فأنا أيضاً كوني متعصب فأنا أتابع أخباره وأحضر مبارياته .. وقبل اسبوعين كانت لي فرصه لحضور إحدى مبارياته التي كانت في ملعب مجمع المهلب ..

وكانت المباراه بين المذيع المتألق يوسف جوهر وبين محبين برنامج مراحب ..

وكان الحكم هو المخرج عبدالله اليوسف .. وحكم الرايه هو مساعده خليفه محمد صاحب الدردور

وأجمل مافي هذه المباراه هو انه لا يوجد خاسر فالكل فائز ..

وهذا اللقاء الجماهيري يعتبر بادره من اذاعة الكويت ممثله في برنامج مراحب والقائمين عليه .. للتواصل مع متابعين البرنامج .. ويكون هذا التواصل عن طريق لقاء شهري يتم في أحد المجمعات التجاريه ويكون اللقاء على الهواء مباشره ..

ومثل ماقلت لكم كانت لي زياره لهذي الفعاليه .. وهذي أول مره أقابل القائمين وأشوفهم .. فبعد متابعه ومشاركه لمدة سنوات .. تم اللقاء

أول ما دخلت المجمع وشفت من بعيد الشباب قاعدين يجهزون للبث .. لأن الساعه قاربة على الساعه 9:30 اللي هي وقت بث البرنامج ..

ووقتها حسيت بالاحراج .. كأني وحده مخطوبه .. تقولون ليه ؟ والله ما ادري ..

مع اني بالعاده جريئ في مثل هالسوالف بس يمكن لأنه أول مره أحضر حسيت بالاحراج ..

وعلى طول توجهت لجهة المعدين وسلمت عليهم وعرفتهم بنفسي .. و بعدها شفت الشاب الحليوه أبو يعقوب قاعد يجرب المايك ومنشغل في اللابتوب .. وقلت للمخرج اليوسف .. هذا اللي جابنا من السعوديه وضحك وقتها المخرج وعرفني على ابو يعقوب ..

أبو يعقوب كانت تدور بيني وبينه مناقشات أثناء البرنامج .. ومن الأشياء اللي تميز الأستاذ يوسف جوهر .. إنه ما ينسى اللي يشاركون .. فأول ما عرفني عليه المخرج وقاله هذا ابراهيم القحطاني من السعوديه .. كان وقتها مشغول .. لكن أول ما خلص اللي بيده ناداني وجلسني جمبه على الطاوله ورحب و هلا فيني وكأنه يعرفني شخصياً .. وهذا ان دل فيدل على طيب أصله .. وبدون مقدمات سمعته يقدمني بشكل رسمي وحسيت وقتها انهم بدو البث على الهواء .. وكانت أول المشاركات مشاركتي .. وتجاذبنا الكلام عن متابعتي للبرنامج وعن البرنامج وعن موضوع ذيك الحلقه .. اللي هو كان عن ” الحريم وبلاويهم “ وطبعاً كانت لي مشاركة في هالموضوع عقلانيه .. لأني أدري ان خالتي أم المدام تسمع البرنامج  .

وكان من الأشياء اللي حمستني على الحضور .. هو رغبتي في اني اشوف كيف يديرون البرنامج .. وكيف تكون طريقة البث ..

واللي شفته تناغم كبير وتفاهم أكبر بين فريق البرنامج .. يكفي الاشارات .. والى الآن أنا ماني فاهم حركة الاصبعين اللي يسويها المخرج عبدالله اليوسف للمذيع يوسف جوهر .. بس الزبده ان ابو يعقوب فاهمها .. وهذا بالتأكيد من أسباب نجاح البرنامج و هذي الفعالية ..

و قابلت بعض المتابعين القدامى من نساء ورجال .. وكان منهم النوخذه عبدالله الفيلكاوي وتشرفت بمقابلته وبالحديث معه .. وعبدالله الفيلكاوي من يوم وصل للموقع وانا حاس انه هو .. لأنه على طول اتجه لفريق البرنامج ووزع عليهم باقات الورد والابتسامه شقاقي .. واللي يتابع البرنامج بيعرف مدى العلاقه بين عبدالله وبين فريق البرنامج ..

وبعدها دار حديث بيني وبين المخرج عبدالله اليوسف .. وتكلمت معاه عن مشروع خاص لبرنامج مراحب ووافق على فكرتي و إن شاء الله هالمشروع بيشوف النور قريب  ..

وبعد انتهاء الحلقه سلمت على الجميع وخصوصاً الاستاذ يوسف جوهر .. وكان هذا نهاية اللقاء الجماهيري ..

وهنا أحب أن أشكر كل من :

• المخرج عبدالله اليوسف
• مساعده خليفه محمد
• المتألق يوسف جوهر
• المذيعه فريدة دهراب .. واللي كانت في العمره (تقبل الله)
• ياسمين الحسن
• والنوخذه عبدالله الفيلكاوي .. وأقوله تراني الى الآن أنتظر
• و إذاعة الكويت عامه
• وجميع المشاركين

على إنجاحهم لهذا اللقاء ..

وهذي بعض الصوره اللي التقطتها في ذاك اليوم ..

يوسف الجوهر يحاور أحد الضيوف

يوسف جوهر يحاور عبدالله الفيلكاوي( يمين الصوره)

المخرج عبدالله اليوسف ومساعده خليفه محمد و فريق البث الخارجي

المتألق يوسف جوهر يجهز أوراقه قبل بداية البث

سيارة البث الخارجي

عبدالله اليوسف يمين الصوره وخليفه محمد

وشكراً لزوجتي العزيزه اللي سلفتني جوالها علشان التقط هالصور .. لأن جوالي باقي له يومين ويدخل العنايه المركزه بعد معاناه لمدة اسبوعين من مرض الزهايمر .. بدون مقدمات ينسى انه صور .. ويمسح الصوره بكيفه

روابط :

الاحتفال بالملتقى الأول لجمهور «المرحباوية»

تأكيداً للتواصل “مراحب” يكرم مستمعيه

• عزيزي الطالب .. بما إن الإمتحانات على الأبواب أحب أقولك إن كانك تبي تفلح وتتفوق وتتخرج بنسبه زي الناس تؤهلك انك تدخل جامعه سنعه وتتخرج وتلقى لك وظيفه محترمه وتتزوج متى ما تبي وتسافر وين ما تبي .. فأنا أقولك شد حيلك .. وإن كانك ماتبي تذاكر .. بقولك باللي ما يردك والوعد مكتب التوظيف وانت تطر فلان وفلان يشوف لك دبره ..

• عزيزي الموظف : إن كان تبي العمر يعدي على خير وان كان تبي تقوم الصباح مرتاح وتمسك الطريق وانت مبسوط ومبتسم وتوصل دوامك وتسلم على ربعك وتصبح عليهم … فأنا أقولك حب دوامك أو حاول تحبه .. وان كانك مانت قادر قدم استقالتك ودور لك وظيفه ثانيه , وما تدري رزقك وين.
• عزيزتي الزوجه : إن كانك تبين تعيشين حياه سعيده مع زوجك وفيها رومنسيه وطلعه رايقه والزوج مشتاق لشوفتك والقعده معك … فأنا أقولك تسنعي وخلك مَره راعية بيت وخلي عنك نصايح فلانه وعلنتانه ولا تاخذين الشور  من وحده بيتها دمران او عايشه في جحيم .. وتذكري دايم ترى السعيده في بيتها ما تتكلم عن سعادتها في المجالس .. و إن كانك ما تبين باللي ما يردك وابشري بزوج ينكد حياتك ويجيب لك الضغط والسكر ..
• عزيزي الزوج : إن كانك تبي تعيش حياه سعيده رومنسيه فيها راحة البال واذا رجعت البيت لقيت لقمتك جاهزه و اذا صحيت العصر لقيتها مزينه لك ذيك القهوه والشاي واذا ضاق صدرك لقيت من يواسيك ويحن عليك ويطلعك من ضيقتك .. فأنا أقولك عامل زوجتك مثل ما تحب أن تعاملك , وإبتعد عن الفوقيه في التعامل وترى هذي زوجتك ماهي عبده عندك وعزها من عزك وكرامتها من كرامتك .. وان كانك ماتبي ابشر ببيت يضيق الصدر وضيقة خلق من يوم تقبل على بيتك ..

هذي اربع نصايح من اخوك الضعيف وببلاش ..

وان كانك تبي الأربع الباقيه أرسل مسج على الرقم المرادف لبلدك و الظاهر يسار الشاشه

مصدر الصوره

• أن يكون مسلماً
  
• أن يكون سالماً من البدعة المكفرة
  
• أن يكون ذكرا
• أن يكون على طهارة
• أن يكون عاقلاً: فلا تصح الصلاة خلف مجنون
• أن يكون قادراً على الإتيان بأركان الصلاة من قيام وركوع وسجود
• أن يكون قادراً على تلاوة الفاتحة وما تصح به صلاته
• أن لا يكون مأموماً في الحال أو في الأصل كالمسبوق إذا قام لقضاء ما فاته

و هذا اللي لقيته من شروط .. مع وجود بعض التفصيل في بعضها

لكن أنا متأكد انه في كل المراجع مافيه شرط يقول :

• أن يكون سعودياً

من وين جونا بهالشرط؟

—————–

فلاشات

في الامس كنت استمع الى برنامج الافتاء على اذاعة القرآن الكريم السعوديه ..

وكانت الاتصالات كالعاده عن حكم لبس البنطلون للمرأه و حكم التشقير وقيادة المرأه ..

وبعدها كان هناك اتصال من أحد المقيمين وهو سوداني الجنسيه يشتغل راعي في احد العزب ..

وكان سؤاله للمفتي العام .. إن أهل الحلال والعزبه لما يجوون في نهاية الأسبوع علشان يقضون وقت ..

يسهرون في الليل .. و يقول أنا مافيني على السهر فأخليهم واروح أنام ..

وفي ثاني يوم لما اجي محلهم القاهم خلو بعض الاغراض ما خذوها معهم ..

فهل يجوز اني آخذها؟

سئلة الشيخ آل الشيخ عن الأغراض اللي خلوها وش تطلع..

فرد عليه الراعي بأن الأغراض عباره عن مشروبات غازيه وجبن وخبز …

رد عليه الشيخ وبصوته واضحه الابتسامه و قاله يجوز يجوز خصوصا اذا انهم يدرون ان بتجي وتاخذها …

وهنا ارتاح صاحبنا الراعي وقال للشيخ الله يجزاك خير و انقطع الاتصال ..

—————–
بعد سؤال هالراعي جاء في بالي الناس اللي تسرق الملايين وتسرق دول وشعوب ..

وشلون يهنى لهم بال؟؟ وشلون ذا الراعي البسيط كان شايل هم هالجبن والبيبسي ..ولا ارتاح الا لما سمع ان الشئ اللي قاعد يسويه مافيه شئ وانه يجوز

وانتم قادرين تاكلون الحرام وتتفاخرون فيه بعد …

وهالسوداني يبي يتاكد من لقمته هل هي حلال ولا لا … مع انها مجرد بيبسي وجبن ..

وحسيت ان هذا الشئ هو سبب ابتسامة الشيخ ..

————–

الله يجزاه خير هالراعي على حرصه … وياويلكم من الله ياللي كليتو حلال العالم

وخصوصاً انت يا راعي تشغيل الاموال ياللي قاعد تتفاخر بتبرعات وشركاتك ومساهماتك ..

اذا جاء وقت الحساب بتتمى انك الراعي السوداني

—————-

الله يبعدنا عن الحرام

اللي يعرفني بيلاحظ اني شخص قليل التغيير ..

يعني أطبق نظرية ” حطني تلقاني ”

عندي وفاء لممتلكاتي … سواء كان جوال أو نظاره أو ساعه أو طاقيه أو شماغ أو نبيطه … دام الشئ اللي معاي شغال وماشي حاله وماهو مأذيني ما احب أغيره أو أرميه .. يمكن البعض لما قرا سالفتي مع العسكري ظن اني الى الآن أملك جوال برج العرب .. طبعاً السالفه صارت لي قبل 7 سنوات … لكن لو ان الجوال ما مات .. كان الى الآن بتلقونه معي .. واللي معي الحين n70 وشاريه قبل ثلاث سنين تقريباً ولو انه هالأيام ماهو قاعد يخرف ويكحكح ولا ماني مغيره ..

والنظاره والساعه نفس الطريقه … وطبعاً هذا الشئ ناتج عن اني احب احافظ على غريضاتي .. حريص

حتى الأشياء اللي أستعملها أو يكون لها موقف معي أحب أحتفظ فيها .. يعني مثلاً عندي فاتوره لشغله معينه لها 6 سنوات .. وعندي تذاكر سينما لها 5 سنين .. و عندي كرتون كامل فيه دفاتر قديمه من أيام الإبتدائي .. وأغراض مغبره .. أحب أقلب فيه من فتره الى فتره .. مدري ليه بس أحب أستذكر الأيام ..

و عندي وفاء للعادات .. خلاص اذا تعودت اقوم الخميس بدري .. فمعناه اني لازم اقوم الخميس بدري لو ان النوم شاق عيني … ومافيه اشكال ارجع ارقد بعدين .. بس اهم شئ الشكشوكه يوم الخميس .. وخصوصاً اذا اخوي مشعل يشاركني الفطور .

جاتني فترة .. تقريباً حوالي الثلاث سنين … كنا نقعد في نفس الكوفي وفي نفس المكان … الى درجة ان اللي يشتغلون في الكوفي صرت أعرف أسماء أمهاتهم ..

عندي وفاء عجيب للأكل .. يعني اذا حبيت وجبه معينه مستحيل أغيرها ولا أزيد عليها ولا أنقص منها .. وهذا اللي مخليني أجاكر بيكهام في الرشاقه ..

ونفس الشئ ينطبع على أخوياي ( شلة اللهو الخفي ) نفسهم هم هم من 9 سنين .. وما احب ولا يحبون انهم يدخلون ناس جدد في اللسته .. ومالي نيه أغير صحبتهم .. مع إنهم هالأيام طايحين بالهارلي ومخليني بسيكلي الصتي .. ويمكن مع الأيام ألحقهم .. بس يبي لي وقت

وأكثر شئ أكره إني أغيره هو ستايلي ( طيب يا ستايلي ) يعني اذا قرعت فاحط في بالك اني بستمر على هالموضوع اقل شئ 5 سنين , واذا خليت الدقن عوارض نفس الموضوع .. لكن سالفة اني كل اسبوع بشكل هذي انسى .. واستغرب من اللي كل اسبوع يطلع له بشكل .. يوم سكسوكه يوم بدون شنب يوم زلفه شابك مع سنبه ويوم دقنه شابك مع حواجبه .. هالشئ مستحيل أسويه وما أعرف أغير ..

طبعي هذا يخلي البعض يحسون اني انسان ممل .. ويكرر نفسه .. وأنا على العكس أشعر براحه ما تنوصف اذا اني تعودت على شئ معين .. وما اشوف انه فيه اي داعي اني اغير .. سواء كان طبع أو جهاز أو صفه .. وبنفس الوقت أستغرب من الناس اللي يغير شكله ولبسه و طبعه بل بعضهم حتى أخوياه يغيرهم

السؤال :- هل انت تحب التغيير؟ ولماذا؟ و هل كيف ؟

أفيدوني بنظرتكم يامال العافيه

—————————

العنوان مأخوذ من سنفور غضبان