ஓட்டமாவடி அறபாத்

noreply@blogger.com (ஓட்டமாவடி அறபாத்) — Tue, 1 Dec 2020 21:07:00 +0530

முக நூல் இலக்கியம்

ஓட்டமாவடி அறபாத்.

2003ல் Google நிறுவனம் Blog என்ற வலைப்பூவை தொடங்கியது. Blog என்கிற வலைப்பூவும் ஒரு தனி நபரின் களியாட்ட கண்டுபிடிப்பு தளமாகும். இதனையே Google நிறுவனம் அவரிடமிருந்து ஒப்பந்த அடிப்படையில் கபளீகரம் செய்து கொண்டது.

நாளடைவில் வலைப்பூவின் ஊடாக பொழுது போக்கு அம்சங்களை துவக்கத்தில் பரிமாரிக் கொண்டாலும் ,அதன் போதாமைகள் சலிப்படையச் செய்தன.இலக்கிய ஆர்வலர்கள், கல்வியலாளர்கள், சமூகவியல் சார் அறிஞர்கள், பொழுது போக்கிற்காக எழுதுகின்றவர்கள் என பல்வேறு சாரார் தனக்கென்று பிரத்தியேக வலைப்பூக்களை Blog spot உருவாக்கி தகவல்களையும் எண்ணங்களையும் பரிமாறிக் கொண்டனர்.

எனினும் Blogஐ விட வேகமாக செயலாற்றும் ஒன்றின் தேவை அதிகம் உணரப்பட்டது. அமெரிக்காவின் “ஹாவார்ட்” பல்கலைக்கழக மாணவர்கள் ஒரு தீவிர முயற்சியில் இறங்கினர்.

GAM விளையாட்டை நிகர்த்த ஒரு இணையத்தள சேவை ஒன்றை உருவாக்கினர்.2004ல் இந்த விளையாட்டு தீவிரமடைந்தது. ஒரு புகைப்படத்தை பதிவிட்டு Hot or Not என்ற கண்ணியமான விளையாட்டொன்றை அவர்கள் இணையத்தள சேவை ஊடாக உருவாக்கினர். கருத்துக்கள் பகிரப்பட்டன.

இதுவே 2006ல் Face book முகநூல் ஆட்டமாக பரிணாமம் அடைந்தது.

இன்று முகநூல் கணக்கொன்று இல்லாதவர்கள் முகவரியற்ற மனிதர்களாக நோக்கப்படுவதுண்டு. முகநூல் பொழுது போக்கு இணைய சேவையை தாண்டி, சமூக மாற்றத்தின் முதல் நிலை தளத்தில் சாசுவதமாகி உள்ளது.

அரசாங்கமொன்றின் நகர்தலுக்கும் அரசாங்கமொன்றின் தளர்வுக்கும் ஆணிவேராக முகநூலை குறிப்பிட முடியும். தனிமனிதனின் சமூக, சுய வாழ்வில் புஐ பல செல்வாக்கினை நிலைநிறுத்தும் ஆதர்சன சக்தியாக முகநூல் தன்னை நிலை நிறுத்திக் கொண்டுள்ளது.

கடினமான விடயங்களையும் இலகுவாக்கி மூச்சுக்காற்றும் எட்ட முடியாத அண்ட சராசரங்களை மிக அநாயாசமாக கடந்த போகும் அபார துணிவை முகநூல் கற்றுத்தந்துள்ளது.

பல்சுவை தகவல்கள் , சர்வதேச தேசிய விவகாரங்கள் , அரசியல் நகர்வுகள் , இலக்கிய இதிகாசங்கள் போன்ற துறைசார் அம்சங்கள் மக்கள் மயப்படுத்தப்பட்ட பெருமை முகநூலையே சாரும்.

முகநூலில் இலக்கியம் படைப்போர் கணிசமாக பெருகி விட்டனர். Blog என்ற வலைப்பூ காலாவதியாகி Facebook அந்த இடத்தினை தனதாக்கி ஸ்திரமடைந்துள்ளது.

கவிதை, சிறுகதை ,தொடர்கதை , இலக்கிய தகவல்கள் விமர்சனங்கள் ,உரையாடல்கள் ,நேர்காணல்கள் என தமிழ் இலக்கியப் பணியில் முகநூலின் வகிபாகம் கணதியும் காத்திரமுமிக்கது.

லிபி வடிவ இலக்கிய பரிணாமத்தின் நீட்சியாக கணினி வடிவ கலியுக மாற்றம் வளர்ச்சியடைந்துள்ளமை இதன் அபாரத்திற்கு ஒரு பருக்கையாகும். துரிதமாக ஓடும் காலச்சக்கரத்தில் மனிதன் நின்று நிதானித்து ஒரு நூலை வாங்கி வாசிப்பதில் உள்ள இடரினை முகநூல் இலகுபடுத்தி விடுகின்றது. தான் பயணிக்கும் அல்லது ஓய்வெடுக்கும் ஓரிடத்தில் அமர்ந்தபடி தனக்கு விருப்பமான கவிதையை, சிறுகதையை அல்லது விமர்சனத்தை படித்து விடும் வாய்ப்பினை முகநூல் தருகின்றது.

காத்திரமாக எழுதிக் கொண்டிருந்த பலர் முகநூலுக்குள் இடறி விழுந்து தன் காருண்ய எழுத்துக்களால் முகநூல் மணமக்களின் கழுத்தினை அலங்கரிக்கும் பூமாலையாக மாறி விட்டார்கள்.

மிகப்பெரும் ஆளுமைகளை தன் வசீகரத்தினால் வளைத்து போட்ட முகநூலின் சாதுர்யம் கண்டு தமிழ் உலகு பேருவகை அடைகின்றது. எப்படி எழுதுகிறோம் என்பதல்ல, என்ன எழுதினாலும் 100 Like விழுந்து விட்டால் அவன் மகா கவிஞனாகி விடுகிறான். கவிதைக்கென்று பல்லாயிரம் பட்டயங்கள், வட்டங்கள் ,வலம்புரி ஜாலங்கள். இவைகளை ஆளாளுக்கு அணிந்து தம்மைத்தாமே மெச்சுகின்ற சௌபாக்கியம் சகட்டு மேனிக்கு முகநூல் இலக்கியத்தில் வாலாயப்பட்டுள்ளது.

மலினமான சொற்களால் மலினமான எழுத்துக்களை கட்டியெழுப்பி மாபெரும் ஆதர்சன சக்தியாக பீற்றிக்கொள்ளும் சில இலக்கிய கர்த்தாக்களின் பேரிருளை ஜெக ஜோதியாக்கி முகநூல் இலக்கியம் ஆர்ப்பரிக்கின்றது.

எழுத்து மாயா ஜாலங்களின் வர்த்தகர்கள் ,இலக்கிய உலகில் ஒரு முட்டையிட்டு பின் , கொக்கரிக்கும் கோழித் திருடர்களுக்கு முன் காத்திரமான இலக்கிய ஆளுமைகள் தோற்றுத்தான் போகிறார்கள்.

முகநூல் இலக்கியத்தின் மற்றுமொரு சருக்கல் காத்திரமான எழுத்தாளர்களும் தனது படைப்புக்களை முகநூல் நளினத்திற்கேற்றாற் போல் வடிவமைத்துக் கொண்ட துயரம். ஒரு சிலரின் மேதைமைகளை தவிர, முகநூல் இலக்கியத்தின் செல் நெறி மெச்சும்படியாக இல்லை.

விரல்விட்டு எண்ணி விடுவோர் இப்பக்கத்தில் காத்திரமான விவாதங்களையும், கருத்துக்களையும் இறுக்கமாக முன் நகர்த்துகின்றனர்.

எனினும் அதற்கீடாக விமர்சனங்களை முன் வைக்கும் வாசகர் குறைவாக காணப்படுகின்றனர். அல்லது மலினமாக பின்னூட்டங்கள் இடும் வாசகர்களைத்தான் முகநூல் உருவாக்கியுள்ளது. பலஹீனமான தனிநபர் தாக்குதல்களும், மிகைப்படுத்தப்பட்ட துதிப்பாடல்களும் நிறைந்த துர்வாடை வீசும் பூங்காவாக முகநூல் இலக்கிய உலகு சில நேரங்களில் நாறிப் போகின்றது.

இலக்கியத்தின் கடினமான பாதையினை வடிவமைக்கும் பின்புலத்தில் முகநூல் இலக்கியம் காத்திரமான சிந்தனை கருத்தூட்டங்களை மலினப்படுத்தும் தளமாக இன்று பரிணமித்துள்ளது.

கிடைப்பதற்கரிய நூல்கள் படைப்புக்கள் முகநூல் ஊடாக எளிய வாசகனையும் சென்றடைந்து பரவசமூட்டுகின்றது. பிர பஞ்சத்தில் எல்லைகளற்று உரையாடவும், தொடர்புகளை பேணுவதற்குமான பாலமாக முகநூல் இலக்கியம் காணப்படுகின்றது.

அண்டங்களை வெறும் துண்டுகளாக நறுக்கி வாசகனின் இலக்கிய பசிக்கு தீனி போடும் வலைப்பூக்களும், முகநூலும் தமிழ் உலகின் வரப்பிரசாதம் எனில் மிகையல்ல.

இலக்கிய உலகின் ஜாம்பவான்களை உள்ளங்கையில் வைத்து படிக்கவும், கருத்தாடல்கள் செய்யவுமான ஓர்மத்தினை முகநூல் ஏற்படுத்தியுள்ளது. ஏக தளத்தில் நூற்றுக் கணக்கானோர் கூடி ஏற்படும் கால, நேர, பொருளாதாரச் சுமையை நிவர்த்தி செய்து தனி மனிதனை ஒரு ஜனரஞ்ச குழுமத்துடன் இணைத்துக் கொண்டு நேர்மையான விவாதங்களையும், கருத்தாடல்களையும் முன் வைக்கும் அகன்ற வெளியாக முகநூல் இலக்கியம் பரிணாமம் அடைந்துள்ளது.

சில தனியாள் குரோத குத்துச் சண்டையினை தவிர்த்து விட்டு முகநூல் இலக்கிய உலகில் சஞ்சரிப்பின் கணிசமான நல்ல அறுவடைகளை பெற்றுக்கொள்ள ஏதுவான நிலைகள் காணப்படுவதை மறுதலிக்க முடியாது.

முகவரியற்ற ஒரு கிராமத்திலிருக்கும் ஆரோக்கியமான இளம் படைப்பாளியின் நாமம் பிரபஞ்சமெங்கும் ஒரே வினாடியில் பிரகாசிக்கவும்,கவனிக்கவும் செய்யும் வல்லமை முகநூல் இலக்கியம் நமக்கு தந்த வரம்.

சில வருடங்களுக்கு முன் ஒரு படைப்பாளன் தனது நூலை அச்சிட்டு விற்பனை செய்வது முயற்கொம்பு. முகநூலின் வருகை இதனை எளிதாக்கியுள்ளது. ஒரே நொடியில் பல்லாயிரம் பேர் வாசிக்கவும், கருத்தாடல் செய்யவுமான வல்லமையை வசப்படுத்தியுள்ளது.

கட்டற்ற சுதந்திரத்தின் நீட்சி முகநூலின் இலக்கியத் தரத்தினை வரையறை செய்வதும் செம்மைப்படுத்துவதும் இலகுவானதல்ல. யாரும் எதனையும் சொந்தப் பெயரிலும், புனைப்பெயரிலும் இதில் பிரவேசித்து அதிமேதைமையாகவும் அரூபியாகவும் வலம் வரலாம்.

தரமான இலக்கியத்தை வடித்தெடுப்பது தரமான வாசகர் தெரிவில் மட்டும் தான் இத்தளத்தில் சாத்தியப்படும். அல்லது பரிந்துரைக்கப்படும். பக்கங்களையும் நபர்களையும் பின் தொடர்வததன் மூலம் முகநூல் இலக்கியத்தின் காத்திரத்தன்மையை பேணி வர முடியும்.

முகநூலில் குறிப்பெழுதும் ஆளுமைகள் குழுக்களை ஒருங்கிணைத்து தேடல் மிகு புதிய வாசகனை இணைப்பதன் ஊடாக முகநூல் இலக்கியத்தினை செழுமையாக்கி அதன் செல் நெறியை வலிமை மிகு தளமாக மாற்ற முயற்சியினை மேற்கொள்ள வேண்டும்.

இது முகநூல் இலக்கியத்தில் நம்பிக்கையுடன் பயணிக்கும் தரமான வாசகனை, ஆற்றுப்படுத்தும் கைங்கரியமாக அமையும். இதுவும் தமிழுக்காற்றும் தொண்டெனில் மிகையல்ல.

noreply@blogger.com (ஓட்டமாவடி அறபாத்) — Thu, 19 Nov 2020 07:36:00 +0530

நண்பர் நபீலின் முக நூல் பக்கத்தில்

நன்றி நபீல்

மூத்தம்மா இல்லாத காட்டின் அரசன்

"நினைவுகளில் தொங்கும் நீர் ஊஞ்சல்"

-அறபாத்.

அறபாத்தின் கதைகள் புதிய கதையாடல்களை இன்றுள்ள நவீன சாத்தியங்கங்களை உருவாக்க வல்லன;  அதன் ஒரு தொடர்பில் ஒரு துணையெழுத்தாகக் கதா விலாசமாக நான் நினைவுகளில் தொங்கும் நீர் ஊஞ்சலைப் பார்க்கிறேன்.

அறபாத் எப்போதும் என் ஊரைக் கடந்து  செல்லுகின்ற போது ஓர் அழைப்பாவது எடுப்பார்; ஓயாத வேலைப்பளுவும் துரத்தும் பேரிரைச்சலும் தொடரான ஒரு காலப் பகுதியில் கொழும்பில் அடிக்கடி அவர் காரியாலயம் சென்று பேசிவிட்டு வருவதை வழக்கப்படுத்தியிருந்தேன்.
கோடை மழையில் பெருக்கெடுத்து ஓடும் நீரில் எண்ணற்ற பொருட்கள் மிதந்து செல்வதைப்போல பல விஷயங்கள் அவர் உரையாடலில் இணைந்து வரும்; எழுத்தாலும் வாழ்க்கையாலும் நிகழ் காலத்தோடு மோதியபடி இருப்பார்; வரலாற்றில் வாழக்கூடிய ஆற்றல்களைப் பெற்றவர்கள் இவ்விதமானவர்களே.

வாழ்க்கைக்கும் அவரின் புனைவிலக்கியத்துக்கும் பெரிய வித்தியாசம் இல்லாதது போலவே இருக்கிறது; நினைவுகளில் தொங்குவதும் அதுதான்; அறபாத் ஒரு புதிய கதை மொழியை இதன்  மூலம் உருவாக்க முயற்சி செய்கிறார்; அது படிமமும் உருவகமும் இணைந்த ஒன்று; கவிதையின் கதை மொழியிலிருந்து உருவான கதை மொழியது; எளிமையான கதை சொல்லலில் அவரது சிறுகதைகள் மாறுபட்ட தளங்களில் இயங்குவதற்குக் காரணமான அம்சங்கள் நீர் ஊஞ்லில் இருந்து வெளிப்படுகின்றன.    

இதனைப் படிக்கின்றபோது மிக உடற்சாகமாகவே இருக்கின்றது; ஒவ்வொரு அத்தியாயங்களும் ஒரு சவால் அதை எதிர்  கொள்ளும் நிமிடத்தில் மனது கொள்ளும் பரபரப்பும் திகைப்பும் பயமும் சந்தோஷமும் முக்கியமானது.  

உம்மா அவவின் மச்சி முறையான ராவியாப் பெரியம்மாவிடம் குர்ஆன் ஓதக் கொண்டு போய் விட்டதிலிருந்து நினைவுகள் அகல விரிகின்றன.

சுன்னத் எனப்படும் விருந்தேசன நிகழ்வில்  ஒய்த்தா மாமா வருகின்ற காட்சி, உரலில் இருத்துகின்ற நிகழ்வு என்பன மிகச்  சுவராஸ்யம் நிறைந்தது.
அந்தக் கல்யாண வீடு ஒரு சிம்பொனி இசைபோல பல்வேறு எழுச்சிகள் மேல்கீழ்  நிலைகள் மௌனங்கள் கொண்டது.
அதை நாம் திரும்பத் திரும்ப வாசிப்பதன் வழியே முழுமையாக உணர முடியும்.

கனவுகளில் ஓடும் பாம்புகளை நிஜ வாழ்விலும் நேரே கண்டு வியக்கும் (பக்கம்: 29 - 34)  விநோதச் சூழலை நாமும் அனுபவிப்பதுபோல எழுதுகிறார்.
மஞ்சல் வெயில் பரவியிருக்கும் மதியம்; அந்தப் பனை மரத்தின் அடியில் எழுந்திருக்கும் புற்றினுள் சராசரத்து மறையும் நாகத்தின் பார்வை, அந்தக் கண்கள் இன்னும் நீள்கிறது.

வாப்புப்பாவின் கடைக்கு வன்னியனார்  கடை என்றால் பிரசித்தம்; புளிய பரத்தடிக்  கடையாகப் பின்னாளில் மருவிற்று  என்கிறார்; (பக்.36)
சற்றுத் தொலைவில் பரந்து கிடக்கும் வயல்  வெளி, வயலையும் குளத்தையும் பிரிக்குமாற்போல் இராட்சதப் பாம்பாய்  படர்ந்து நீளும் குளக்கட்டு வயலைத் தாண்டி  விழுந்தால் மாந்துறை ஆறு.

உடல் வளராத அவருக்குள் ஓர் உலகம் உடைந்து சிதறி விடாமல் எப்பொழுதும் உரையாடிக் கொண்டே இருந்திருக்கிறது; உம்மா,வாப்பா, முத்தம்மா, வாப்புப்பா, மாமா, சாச்சா, பிள்ளைகள் இப்படி ஒவ்வொருவராக  விழுங்கியபடியே நாட்களைக் கடந்து வந்து இப்பொழுது உயர்ந்து பெரியவரானதும் கொட்டியில் போட்ட ஒடியல் நார்களை அசை போடுகிறார்.

இன்றைய மூத்தம்மாக்கள் கச்சான், வடை, விற்பதையெல்லாம் அறியமாட்டார்கள்; (பக்.51)  அந்த ஆலமரத்தைப்பற்றி எனது மூத்தம்மா கதை கதையாகச் சொல்லுவா;  அதன் விழுதுகள் பேய்களின் ஊஞ்சலாம்;  இரவில் அவைகள் கூட்டாக ஆடிக் கொண்டிருப்பதப் பார்த்தவர்கள் மறுநாள்  எழுந்திருக்க மாட்டர்களாம்.  
முத்தம்மாவின் உறவும் பிரிவும் நேர்ந்திராது போயிருந்தால் இந்தக் கதை வெளியில் ஒர் அரபாத் இல்லாமலே விட்டிருப்பார்.

சிறுvவயதிலிருந்து முத்தம்மாவுடனேயே  வளர்ந்து  திரிந்து  கொண்டிருந்த ஒரு மனிதனுக்கு மூத்தமாவும் அவர் அணிந்திருந்த கிராமமும் அவனுடைய   அவயங்களில் ஒன்றுபோல் ஆகிவிட்டிருந்தது.

இப்படியாகப் பல காலம் கழிந்தது;
பின்பு எப்போதிருந்து என்று தெரியாமல் சிறிது சிறிதாகப் பல புதிய பிரச்சினைகளும்  வினோதமான மனக் கவலைகளும் நட்சத்திரமற்ற வான இருளில் பரவியடிக்கும் போர் மூட்டங்களும் அவனுடைய செவியையும் நாசியையும் எட்ட ஆரம்பிக்கின்றன;    
அவை தன்னையும் தன்னைச் சுற்றியுள்ள  சூழலையும் வேறு வேறெனப் பிரித்துக்  காட்டும் பிரக்ஞையை￶த் தனக்குள் பலவந்தமாகப் புகுத்துவதைக் கண்டு அந்த மனிதன் குழம்பிப் போகிறான்; 
என்னதான் அது என்ற கோபத்துடனும்  ஆர்வத்துடனும் தனக்கு அதிர்வைத் தந்த திசையைக்குறி வைத்து எழுதப் புறப்படுகிறான்.

அம் மனிதன், அந்தப் பயணத்தில் காட்டின் எல்லைகளையும் அதற்கப்பாலான கிராமங்களையும் அங்கே குப்பி லாம்புகளின் வெளிச்சத்தில் உலா வருகின்ற ஜின்கள்,பேய்கள், எழும் இனிமையான இரைச்சலிலும் மெளனத்திலும் அங்கங்கே மரங்கள் வெட்டப்பட்ட வெளியில் பால் உதிரும் மணத்திலும் கண்காணாத மூலைகளிலும் நிரம்பி அலைகின்றான்.  

அந்த மனிதனன்தான் அறபாத்; அவர் நினைவூஞ்சலில் நம்மையும் உட்கார  வைத்து ஆட்டுகிறார்.

கூப்பிடக் குரலற்றுக் காற்ராய் வெளிப்படும்  அவர் சாச்சவுடன் வனத்துக்குள் வந்த நினைவுகள் ( பக்: 64)
காட்டின் உருவம்  இயல்பான வெளிச்சத்தைக் கொண்டதாகவும் செரிமான ஒலியைப்போல அதன் சப்தத் துகள்கள் அனிச்சையாகவே  அவருக்குள் கரைந்து விடுவதாகவும் அதன் அன்பும் அரவணைப்பும் பாதுகாப்பானதாகவும் மாறி விடுவதை நானும் அனுபவித்தேன்.

படைப்பாளி என்பவன் கொள்கை பரப்பும் செயலாளி இல்லை; படைப்பாளி எப்பொழுதும் நினைவுகளை அடையாளப் படுத்துபவனாகவே இருக்கிறான். 

அராபாத் அவர் கொள்கையாளி; ஆனால் பாசாங்குகளை இலக்கியத்தில்  ஆவணமாக்காதவர்; நினைவுகளில் தொங்கிய நீர் ஊஞ்சலை அறுத்து விடாதவர்.

-நபீல்

Anar Issath Rehana, Aaliya Aaliya and 10 others

1 Comment

Comment

noreply@blogger.com (ஓட்டமாவடி அறபாத்) — Thu, 19 Nov 2020 07:34:00 +0530

தோழர் அல்சாத்தின் முக நூல் சுவட்டின் பதிவு

நன்றி அல்சாத்

"நினைவில் தொங்கும் நீர் ஊஞ்சல்" எனும் ஓட்டமாவடி அறபாத் இன் பத்தி எழுத்துத் தொகுதியை படிக்க கிடைத்தது. ஆசிரியரைப் பற்றிய ஓர் சிறு குறிப்பை இவ்விடத்தில் பதிந்துவிட்டு நூலைப் பற்றி சொல்வதே பொருத்தமானது என்று நினைக்கிறேன்.

கிழக்கிலங்கை ஓட்டமாவடியைப் பிறப்பிடமாகக்கொண்ட அறபாத் அவர்கள் கலைப்பட்டதாரியும் பயிற்றப்பட்ட மௌலவியும் ஆவார். தற்போது அரசுப் பணி புரிந்து வருகிறார். இவரது முதல் சிறுகதை தொகுதி "நினைந்தழுதல்" க்கு 'விபவி விருதும்' "உடைந்த கண்ணாடிகளில் மறைந்திருக்கும் குருவி" சிறுகதைத் தொகுதிக்கு 'இலங்கை அரசின் சாஹித்யமண்டலச் சான்றிதழும்' 'கிழக்கு மாகாண சபையின் விருதையும்' வென்றவர்.

கவிதை, கதை, கட்டுரை என பல துறைகளில் இயங்குபவர்.இதுவரை பதினொரு நூல்களை எழுதியுள்ளார்.

2015 முதல் இலங்கை அரசின் 11ஆம் ஆண்டு தமிழ்ப்பாட நூலில் இவரின் சிறுகதை 'மூத்தம்மா' இடம்பெற்றுள்ளது சிறப்புக்குரியது.

இவ்வாசிரியரின் சிறு வயது பராயம் கொண்டு அவரது வாழ்க்கை அனுபவங்களை மிகவும் அழகாக பதியவிட்டிருக்கிறார் இந்நூலில்.

"எங்கள் தேசம்" நாளிதழில் தொடராக வெளிவந்த 50 பத்தி எழுத்துக்களின் கோர்வையே இந்நூல். 

நிச்சயமாக இந்நூலைப் படிப்பவர் மனதில் தமது உசுக்குட்டிப் பருவ நினைவுகள் ஊஞ்சலாடாமல் இருக்க முடியாது. அந்தளவு மிகவும் அழகாகவும் அவரது வாழ்வில் பெற்றுக் கொண்ட இன்பம், துன்பம், கஷ்டம், நஷ்டம், துரோகம் போன்ற பல விடயங்களையும் மிகவும் லாவகமாக படிப்பவர் மனதை வசியப்படுத்தி ஒன்றித்துப் போக செய்திருக்கிறார். 

பின்னட்டையில் நூல் பற்றியும் ஆசிரியர் பற்றியும் Slm Hanifa
 எழுதியிருக்கிறார்.
இந்தியாவின் புகழ்மிக்க காலச்சுவடு பதிப்பகம் பதிப்பித்திருக்கும் இந்நூல் மிகவும் கவனமாக எழுத்துப் பிழைகள் இன்றி அழகிய முன்னட்டையோடும் சுமார் 160 பக்கங்களில் நூலை தொகுத்திருப்பது சிறப்புக்குரியது.

நான் படித்து சுவைத்த இவரது முதல் நூலே இதுவாகையால் ஏனைய இவரது அனைத்து நூல்களையும் படிக்க ஆவலாயுள்ளேன். இருப்பவர்கள் தந்துதவினால் சிறப்பாக இருக்கும்.

இது போன்ற பல ஆக்கங்களை இனியும் தர வேண்டுமென்ற பிரார்த்தனையோடு ஓட்டமாவடி அறபாத் மௌலவிக்கு வாழ்த்துக்களை கூறிக் கொள்கிறேன்.

#அல்சாத்
07-10-2020

noreply@blogger.com (ஓட்டமாவடி அறபாத்) — Thu, 19 Nov 2020 07:30:00 +0530

எஸ். நளீமின்

“பல்லிகள் இல்லா சுவரில் மேயும் வண்ணத்துப் பூச்சிகள்”

உணர்வின் மொழி

-ஓட்டமாவடி அறபாத்

‘தலைசிறந்த சொற்களை தலைசிறந்த ஒழுங்கில் கோர்ப்பது கவிதை.’ என்றான் கோல்ட்ரிஜ். ‘குழம்பிய உணர்வுகளின் தெளிந்த வெளிப்பாடு கவிதை’ என்பது ஆடனின் நிலைப்பாடு.

கவிதையை புரிந்து கொள்ளவும் அதனுடன் நெருங்கிப்பழகவும் மனிதனாக வாழ்வது அவசியம்.மனிதன் என்பது சக மனிதனின் உணர்வுகளைப்புரிந்து கொண்டு அவனை நேசிப்பது மட்டுமன்றி , பிரபஞ்சத்தில்; உள்ள சகல உயிரினங்களையும் பிரமை கொண்டு அதனை நேசிப்பதுதான் மனிதம்.

கலைகளுக்கு இந்த விசாலமான மன விசாரம் உன்னதம் என்பேன்.
ஓவியம்,கவிதை, சிறுகதை,இதழியல் என்ற பல்வகை புலமைகளின் பரிணாம நீட்சியாக எஸ்.நளீமின் பல்லிகள் இல்லா சுவரில் மேயும் வண்ணத்துப் பூச்சிகள் கவிதைத் தொகுதி முகிழ்ந்துள்ளது. கடைசிச் சொட்டு உசிரில்…(2000), இலை துளிர்த்துக் குயில் கூவும் (2008) ஆகிய முன்னிரு கவிதைத் தொகுதிகளும் அவருக்கு விருதுகளைப் பெற்றுக்கொடுத்த தொகுதிகளாகும். பூகோளத்தின் சூட்சுமங்களை நேசிக்கத் தெரிந்த ஒருவரால் மட்டுமே எழுதவல்ல கவிதைகளை பல்லிகள் இல்லா சுவரில் மேயும் வண்ணத்துப்பூச்சிகளில் வாசித்துணராலம்.

நளீமின் கவிதைகளை இன்னதென்று விளக்;குவதைவிட வாசித்து உணரத்தான் முடியும்.

தான் வாழும் சமூகத்தின் மீதான அபரித காருண்யம், இயற்கையுடனான காதலின் வசீகரம், சமூக ஒழுங்கு மீறப்படும்போதும் சத்தியத்தின் கால்கள் முடக்கப் படும்போதும் அவற்றுக்கெதிரான கோபாவேசம், வன்முறைக்கெதிரான சீற்றம் என அவரின் கவிதைகள் பல்வகை உணர்வுகளின் கொந்தளிப்பாக வெளிப்பட்டுள்ளது.

கடந்த காலங்களின் சௌந்தர்யங்களை நினைவூட்டி, உறவுகளின் சிதிலங்களை வேதனையுடன் பேசுகின்றன சில கவிதைகள். அந்த வேதனைகளை கணல்மிகு நினைவுக் குறிப்புகளாக அவர் கவிதையில் சொட்டும் பதகளிப்பு இடையறாத கதறலாக எம் செவிகளில் நுழைந்து மனதை அரிக்கிறது.

பல்லிகள் இல்லா சுவரில் மேயும் வண்ணத்துப் பூச்சிகள், கெடூரங்களால் ஆனது, அறைக்கு வந்த வண்ணாத்தி, வசப்படாத வாழ்வைக் கட்டமைத்தல், வசீகரித்த வாழ்வெழிலை, வரைந்துயர்ந்த, மனத்தீ ஆகிய கவிதைகள் நான் மேற் குறித்த உணர்வுகளை சுட்டும் கவிதைகளாகும்.
அதிகாரத்தின் இரும்புப் பிடியில் சாமான்யர்கள் ஏமாற்றப் படுவதும் ஏய்த்துப் பிழைப்பதும் காலங்காலமாய் பின்தொடரும் அவலங்கள். சர்வாதிகாரத்தின் கொடூரங்களுக்கெதிரான நளீமின் சொற்கள் ஓங்கி ஒலிக்கின்றன. சொற்கள் சம்மட்டிகளாகி சம்ஹாரம் செய்கின்றன. ஒப்பாரி ஓங்கிய தீவு, ஒரு கனிமரம்தேடி, இருள் ஒதுங்கும் மூலை, தனித்த குரலும் வால் மனிதர்களும், விலங்கோடு வாழ்வு, அமர்க்களம், அழுகி நாறும் நீ, குறுக்குக் கோழிக்கு கூந்தல் கட்டி போன்ற கவிதைகளில் அவரின் சூரசம்ஹார தொணி சன்னமாய் கேட்கிறது.அதிகாரத்தின் மையலில் அடகு வைக்கப்படும் ஒரு கையறு சமூகத்தின் ஆவேசக்குரலென இக்கவிதைகளை குறிப்பிடவியலும்.

இனவாதத்தால் எரியூட்டப்பட்ட வாழ்விலிருந்து மீண்டவர்கள் நாங்கள். இன்றைய தேதிவரை இனவாதத்தின் அகன்ற கோரப் பசிமிகு திறந்த வாய்களுக்கருகேதான் எங்கள் இருப்பு பதகளித்துக் கொண்டிருக்கின்றது. இனவாதத் தீயின் உஸ்ணத்தில் நின்று கொண்டே நிழலை யாசிக்கும் நளீமின் சில கவிதைகள் உரத்துப் பேசுகின்றன.

இனவாதம் கோலோட்சும் இந்த தீவில் இனி சௌஜன்யம் என்பது எட்டாக்கனி போலவும் முடவனின் கொம்புத்தேன் கனவு போன்றும் ஆகிவிட்டது. அந்த ஆற்றாமைமிகு துயரங்களை தன் கவிதைகளால் இடித்துக்காட்டுகின்றார். உள்ளத்துள் மிருகம் வளர்த்தல், வசப்படாத வாழ்வைக் கட்டமைத்தல், தீ விதைகள் கவிதைகளில் இந்த ஆதங்கம் சொட்டுகின்றது.

இந்த சமூகத்தின் கையறு நிலை கண்டு அவர் கொண்டுள்ள தார்மீகக் கோபம் ஆங்காங்கு கவிதைகளில் நீக்கமற கர்ச்சித்தபடி கூடவே வருகின்றது.

….” தேர்தல்கள் தோறும்
நிறம் பூசிக்கொண்ட
உன் சின்ன விரலிடம்
வெட்கம் கொள்
வாக்களிக்க நீ பிரஜை
இங்கே வாழ மட்டும் நீ யார்? “

என அவர் ஆவேசப்படும்போது அடக்கு முறையின் கொடூர முகத்தில் காறி உமிழ்வதுபோல் அடங்கியிருப்பவனின் தன்மானத்தை கிளறிவிடுவதுபோல பல்முனை உணர்வுத்தளத்தில் நின்று பேசும். இதனை நிகர்த்த பல கவிதைகள் இத்தொகுதியில் இடம்பெற்றுள்ளமை நளீமின் போர்க்குணத்திற்கோர் சத்திய சாட்சிகளாகும்.

கவிதை என்பது வெறுமனே தனிமனித அனுபவம் அல்ல, தனிமனித அனுபவமாயினும் அது சமுகம்சார் அனுபவமாகவும் இருக்கும்.
கவிஞன் தன் சமுகம்சார் அனுபவத்தையே தன் அனுபவமாக உய்த்துணர்ந்து எழுதுகின்றான்.

நளீமின் கவிதைகள் அகவயப்படுத்தப்பட்ட புறவயக் கவிதைகளெனில் மிகையல்ல. அவர் கவிதைகளைப் புரிந்து கொள்வதற்கு மொழி மட்டும் தெரிந்திருந்தால் போதாது வாசகனின் தயார் நிலையும் மனோ விசாலமும் பிரதானமானது.

நளீமின் கவிதை சொல்லும் மொழி தனித்துவமானது. முன்னிரு தொகுதிகளிலும் சோலைக்கிளியின் கவிதை மொழி ஆங்காங்கு தாக்கம் செலுத்தியுள்ளது. தொன்னூறுகளுக்குப் பின் எந்தக் கவிஞனும் சோலைக்கிளியை தவிர்த்துவிட்டு கவிதை எழுத முடியாது என்ற அடிப்படையில் அத்தாக்கத்தினை புரிந்துகொள்வது கடினமல்ல.

இத்தொகுதியிலுள்ள சில கவிதைகளில் நளீமின் மொழிப் பாய்ச்சல் வேறொரு தளத்தில் பயணிக்கத் தெடங்கியுள்ளது. அகத்துறிஞ்சல்களால் மொழியை செம்மைப் படுத்திய கவிதைகள் இத்தொகுதியில் விரவிக் கிடக்கின்றன. பல்லிகள் இல்லா சுவரில் மேயும் வண்ணத்துப் பூச்சிகள், வற்றிக் கிடக்கும் என் மனக் கடல், சட்டத்தில் அடைக்கும் கோடுகள், கொடூரங்களால் ஆனது. இருள் ஒதுங்கும் மூலை போள்ற கவிதைகள் அவரின் மொழிச் செழுமைக்கோர் பருக்கைகளாகும்.

அறிவினால் விளங்கிக் கொள்ளப்படும் கவிதைகளைவிட உணர்வினால் புரிந்துகொள்ளப்படும் கவிதைகள் இத்தொகுதியில் விரவிக்கிடக்கின்றன. எல்லா மனிதர்களுக்கும் உள்ளே தகிக்கும் தார்மீக உணர்வை தனித்துவமாக அடையாளம் காட்டுபவன்தான் கலைஞன். மனித வாழ்வோடும் , உறவோடும் கலைகளை நெருக்கமாகக் கொண்டு வரும் போது அது இலகுவில் புரிந்து விடும் என்பது பொதுவான யதார்த்தம்.
அந்தக் கலைஞயினூடாக சமூகத்தின் கலைப் பெறுமானங்களையும் சொற் சிக்கனத்துடன் பொருள் கனதியுடன் நளீம் தன் கவிதைக@டாக முன்வைக்கின்றார். செறிவான கவிதைகள் மூலம் விரிவான விவாதங்களை எழுப்பும் நளீமின் கவிதைகள் மனோரதிய பேரின்பத்தை தரவல்லது எனில் மிகையல்ல.

16.10.2020

noreply@blogger.com (ஓட்டமாவடி அறபாத்) — Thu, 5 Nov 2020 12:34:00 +0530

அன்புள்ள சித்தி றபீக்கா பாயிஸ்,

தங்கள் கடிதமும், கவிதை நூலும் 13.10.2020இல் கிடைத்தது. அதிகரித்த வேலைப்பளு, அலுவலகப்பணிகள் காரணமாக உடனடியாக பதில் எழுத முடியவில்லை. உங்கள் கவிதைகளையும் உடனடியாக படித்து விட வேண்டும் என்று மேசையில் வைத்திருந்தேன். ஓவ்வொரு நாளும் அது கண்களை குத்திக்கொண்டே இருந்தது.

இந்த கொவிட் 19 இரண்டாவது அலை தக்கதோர் சந்தர்ப்பத்தினை வழங்கியுள்ளது. வீட்டிலிருந்து என்ன வேலை செய்வது அலுவலகப்பணிகளை 8மணி நேரமாக செய்வதற்கு இங்கு ஒரு ‘பிடுங்கலு’ம் இல்லை,’பீத்தலு’ம் இல்லை. கொஞ்சம் வாசிப்பு கொஞ்சம் எழுத்து என்று பொழுது போகிறது. தவிர எனது பிரத்யேக வாசிகசாலையை ஒழுங்கமைக்கும் பணிகளையும் தொடங்கியிருந்தேன். ஒரு வாரகாலமாக பிள்ளைகள் மனைவியின் உதவியுடன் அவற்றினை செய்து முடித்துவிட்டேன்.நீண்டகால அவா இந்த கொரோனாவால் நிறைவேறியிருக்கின்றது.

சதுப்பு நிலக்கொக்கின் கால்களை வாசித்து முடிப்பதற்கும் இரண்டு நாட்கள் தேவைப்பட்டது. கவிதை மனம் ஊறிப்பிரவகித்தோடுபவர்களிடம் நேசிப்புக்கு பஞ்சமிருக்காது.உயிர்கள் என்ற சட்டகத்தை தாண்டி அஃறிணைகளையும் காதலுறும் நுண்ணிய உணர்வுகளால் பின்னப்பட்டதுதான் கலைஞனின் இதயம்.சமூகத்தின் கண்களாவும் அங்கமாகவும் நிற்பவர்களால்தான் உள்மன அதிர்வுகளை புரிந்து கொள்ள முடியும்.

றபீக்கா உங்கள் ‘சதுப்பு நிலக்கொக்கின் கால்கள்’ உள் மனதின் ஆழித்துயரங்களை உரத்துப்பேசும் சித்திரங்களாகும். ‘வற்றாத ஈரம்’ உலர்வதற்குள் மற்றுமொரு கவிதை தொகுதியை தந்திருக்கின்றீர்கள். இது உங்களின் நீண்டகால நூலுருவாக்க கனவுகளை மெய்ப்பித்திருக்கின்றது. வாழ்வின் அடிமட்டத்திலிருந்து மேலெழுந்த’ பீனிக்ஸ்’ பறவை நீங்கள் . உங்கள் இலக்கிய கனவுகள் மெய்ப்பட்டிருப்பதில் எனக்கும் பேரானந்தம்.வலிகள் மிகுந்த வரண்ட காலங்களை வசந்தமாக உருமாற்றும் அற்புதங்களை கவிதை மூலம் பூக்கச்செய்துள்ளீர்கள்.

உங்கள் கவிதைகள் பிரதானமாக மூன்று விடயங்களை பேசுகின்றன.

1. சிறுவர் உளவியல் சார் அகவியல் பிரச்சனைகள்

2. சமூகப்புறக்கணிப்புக்களானவர்களின் மன அதிர்வுகள்

3. பெண்களின் நுண்ணிய மனக்கிலேசங்களை பிரபலிக்கும் எண்ணங்கள்

சிறுவர் உளவியல் குறித்த பல கவிதைகள் இத்தொகுதிக்குள் விரவிக்கிடக்கின்றன.ஒரு சில கவிதைகளை தவிர்த்திருப்பின் சிறுவர் உளவியல் குறித்துப்பேசும் சிறந்த கவிதைத்தொகுதியாக ‘சதுப்பு நிலக்கொக்கின் கால்கள்’ பேசப்படடிருக்கும்.

ஒரு வேளை உணவுக்காக எதிர்காலத்தையே அடமானம் வைக்கும் சிறுவர்கள்,வசந்தகால கனவுகள் சூன்யமாகி மலரும் போதே கருகிய அவலங்கள் என சிறுவர்களின் உள்ளுலகத்தின் பேரவலங்களை நீங்கள் அற்புதமாக கவிதையில் பதிவு செய்திருக்கின்றீர்கள்.

குப்பையில் குண்டு மணி,ஒரு வேளை உணவு,பளிங்கு வீட்டின் தூசி, நான் இல்லை கொத்தன், எனது நாள், வெளிப்படாத பிஞ்சு மூளை, விளக்கின் விழி, டியூசனுக்கு பிந்திய நான் போன்ற கவிதைகள் சிறுவர் உலகத்தின் அறியப்படாத இருண்ட துயர்மிகு பாடல்களை பேசும் கவிதைகளாகும்.

பாசத்திற்காகவும், அரவணைப்புக்காகவும் ஏங்கும் குழந்தைகளின் அவலக்குரல் உங்கள் கவிதைகளில் மௌன ஒலிகளாக இடையறாது கேட்டுக்கொண்டே இருக்கின்றது.

பெண் என்பவள் சில நேரம் உணர்வுகளால் நெய்யப்பட்ட நூல் வேலி. அவள் நுண்ணிய அதிர்வுகளையும், சிறு ஏமாற்றங்களையும் தாங்கும் மனோதிடம் அற்றவளாக தன்னை தாழ்த்திக்கொள்கின்றாள். அத்தகைய பெண்களுக்கு மாயசக்தியினையும், மனோவலிமையையும் உங்கள் சில கவிதைகள் ஊட்டச்சத்தாக பருகத்;தருகின்றது.சில கவிதைகள் ஆற்றாமையினால் மனம் வெதும்பி புலம்புகின்றது. சில கவிதைகள் தலைகோதி ஆறுதலாக தெம்பூட்டுகின்றது . பிரியாணி,பலாச்சளை,கனவுகளின் சிதைவு, முறிந்த பேனா, இரவின் மழை, தழும்புக்குள் பூச்சிகள், போன்ற கவிதைகளில் பெண் மனத்தின் அவலங்கள் ஏக்கங்கள், ரணங்கள் குறித்து பேசியிருக்கின்றீர்கள்.

உங்கள் உள்மனத்தின் பெருவலி சொற்கட்டுமாணத்தையும் மீறி படிப்போர் மனதில் அவசத்தை தூவி விட்டுச்செல்கின்றது.பெண் விடுதலைக்கான குரல்கள் நீட்சியாக ஒலித்துக்கொண்டே இருக்கின்றன.

ஒரு ஒற்றைக்குருவி நீருக்காக பாலைவனத்தின் மணற்குன்றுகளிலிருந்து கேவுவதைப்போல மனித மனங்களின் சிறு தவிப்பையும் கவிதைகளில் படியவைத்திருக்கும் நீங்கள் இடையறாத வாசிப்பினையும், தேடல்களையும் தக்கவைத்துக்கொள்ள வேண்டும் என்ற நிர்ப்பந்தத்தை உங்கள் கவிதைகள் பெரிதும் வேண்டி நிற்கின்றன.

தொடர்ச்சியான வாசிப்பும் பயிற்சியும் நிலைபேறாக கூடவே இருந்தால் உங்கள் கவிதை திறன் அபரிதமாக வளரும் என்பதற்கு இத்தொகுதியில் உள்ள ‘சதுப்பு நிலக்கொக்கின் கால்கள்’ ஒரு பதமாகும். உங்களை எதிர்காலத்தின் கவிதை வனத்திற்கு அழைத்துச்செல்ல வாசிப்பும் கவிதைப் பயிற்சியும் 'கை விளக்காக' இருக்க வேண்டும் என்று ஆசிக்கின்றேன்.

நன்றி

அன்புடன்

ஓட்டமாவடி அறபாத்.

5112020

noreply@blogger.com (ஓட்டமாவடி அறபாத்) — Sat, 30 May 2020 08:23:00 +0530

1.10.2019
சர்வதேச முதியோர் , சிறுவர் தின நிகழ்வில் வாழைச்சேனை கோரளைப் பற்று மத்தி பிரதேச செயலகத்தின் நங்கூரம் – 12வது இதழ் அறிமுகம்
இடம் : Delma அரங்கு , கும்புறுமூலை

noreply@blogger.com (ஓட்டமாவடி அறபாத்) — Sat, 30 May 2020 08:21:00 +0530

9.12.2019 வியாழன் கோரளைப்பற்று மேற்கு ஓட்டமாவடி பிரதேச செயலகத்தின் கலாசாரப் பேரவையின் ஏற்பாட்டில் மருதோன்றி 8வது மலர் வெளியீடும் , கலாசார விழாவும் நடைபெற்றது. நிகழ்வில் மருதோன்றி சஞ்சிகைக்கான நயவுரை என்னால் நிகழ்த்தப்பட்டது.கிழக்கு மாகாண பண்பாட்டலுவல்கள் திணைக்கள பணிப்பாளர் ச.நவநீதன் முன்னிலையில் ஓட்டமாவடி பிரதேச செயலகத்தின் உதவிப் பிரதேச செயலாளர் . A.C. அப்கர் அஹமட் அவர்களிடமிருந்து சஞ்சிகையையும் பெற்றுக் கொண்டேன்.

noreply@blogger.com (ஓட்டமாவடி அறபாத்) — Sat, 30 May 2020 08:19:00 +0530

2018 ஆம் ஆண்டு அரச நிறுவனங்களுக்கிடையில் நடைபெற்ற உற்பத்தித்திறன் போட்டியில் கோறளைப்பற்று மத்தி,வாழைச்சேனை பிரதேச செயலகம்,2018 ம் ஆண்டுக்கான விசேட பாராட்டுதலுக்கான (special Commendation)விருதினை பெற்றுக் கொண்டுள்ளது. இதற்கு பங்களிப்புச் செய்த சகல உத்தியோகத்தர்களுக்கும் இன்று 2020.01.01 திகதி பாராட்டி சான்றிதழ்கள் வழங்கி கௌரவிக்கப்பட்டன. உற்பத்தி திறன் வேலைத்திட்டத்தில் பங்களிப்பு செய்த அடியேனுக்கும் பிரதேச செயலாளர் SHM.முஸம்மில் அவர்கள் பாராட்டுப் பத்திரம் வழங்கி கௌரவித்தார்.

noreply@blogger.com (ஓட்டமாவடி அறபாத்) — Sat, 30 May 2020 08:17:00 +0530

24.01.2020

ஏறாவூர் வாவிக்கரை கலாசார மண்டபத்தில் நடை பெற்ற கவிஞர் அப்துல் ஹலீம் அவர்களின் அடிமன அதிர்வுகள் கவிதை நூல் வெளியீட்டு விழாவில் கலந்து கொண்டு நூல் அறிமுகத்தினை நிகழ்த்தினேன். பேராசியர் செ. யோகராசா ஏறாவூர் பிரதேச செயலாளர் திரு. Sm ,அல்அமீன் உள்ளிட்ட முக்கிய பிரமுகர்கள் கலந்து கொண்டனர். கவிதை நூல் வெளியீடு என்பதாலோ கவிஞர்களும் தாமதித்தே வந்தனர்.. ஏறாவூர் வாசக வட்டத்தின் நிழல் கூட அங்கு படவில்லை - வாப்பா இந்தியாவுல என்பதால் பிள்ளைகளும் ஆற்றங்கரை பக்கம் ஜன்னல் வைத்த ஜாக்கட்டுக்களில் மெய் மறக்கப் போயிருக்கலாம். அடிவானத்தின் நீல நிறத்தையும், ஏறாவூர் ஆற்றையும் பார்த்த படி நூல் நயவுரை செய்தது. நான் செய்த மகா புண்ணியமே'.
பட உதவி : நடமாடும் தகவல் களஞ்சியம் நஸீர் ஹாஜியார். ( திடீர் மரண விசாரணை அதிகாரி) நன்றி ஹாஜியார்.

noreply@blogger.com (ஓட்டமாவடி அறபாத்) — Sat, 30 May 2020 08:11:00 +0530

2020.02.13 கல்முனை அல் மிஸ்பாஹ் வித்தியாலய அதிபர், மற்றும் தமிழ் பாட ஆசிரியர்களின் அழைப்பின் பேரில் குறித்த பாடசாலைக்கு சென்றிருந்தேன். தரம் - 11 தமிழ்மொழி பாடப் புத்தகத்தில் இடம் பெற்றுள்ள எனது "மூத்தம்மா" சிறு கதை தொடர்பான விசேட செயலமர்வு தரம் 10-11 மாணவர்களுக்கு நடைபெற்றது

மூத்தம்மா கதைப் பின்புலம் ,உருவாக்கம் மற்றும் அது தொடர்பான விளக்கத்தினையும் , அறிவுரைகளையும் மாணவர்களுக்கு வழங்கினேன்.

இந்நிகழ்வில் தமிழ் பாட ஆசிரியர்களும் பகுதிப்பிரிவு பொறுப்பாசிரியர்களும் கலந்து கொண்டமை குறிப்பிடத்தக்கது.

noreply@blogger.com (ஓட்டமாவடி அறபாத்) — Sat, 30 May 2020 08:09:00 +0530

மகிழ்ச்சி - குதூகலம்
பிரதேச செயலக வருடாந்த ஒன்று கூடல் -2020

noreply@blogger.com (ஓட்டமாவடி அறபாத்) — Sat, 30 May 2020 08:05:00 +0530

நூல் விமர்சனம்

ஓட்டமாவடி அறபாத் 'பல்லிகள் இல்லா சுவரில் மேயும் வண்ணத்துப் பூச்சிகள்" கவிதை நூல் தொடர்பான தனது விரிவான அவதானத்தை வழங்கினார். நளீமின் முன்னைய இரு தொகுதிகளுடன் ஒப்பிட்டுப் பேசியதுடன் கவிஞரின் கூர்மையான பார்வைகள் இயற்கையின் மீதுள்ள நாட்டம் சுயம் இழந்த தலைவர்களின் இழிநிலை சமூகத்தின் மீதுள்ள பச்சாதாபம் இளைஞர்களின் போக்கு தொடர்பான அதிருப்தி என பலவகையான விடயங்களின் மீதான வார்த்தைகளின் கோர்வை நேர்த்தி அழகு என தனது கருத்துரையை வழங்கினார்.

noreply@blogger.com (ஓட்டமாவடி அறபாத்) — Sat, 30 May 2020 08:01:00 +0530

2018.12.15

ராபிததுஸ் ஸஹ்வியீன் ஸஹ்வா பட்டதாரிகள் சங்கம் கடந்த வாரம் நடாத்திய முல்தகுஸ்ஸஹ்வியின் நிகழ்வில் நினைவு மலர் வெளியீடு மற்றும் தாபக வித்துக்கள் கெளரவிப்பும் இடம் பெற்றது. அட்டாளைச்சேனை பென்க்குயிஸ்ட் மண்டபத்தில் நடை பெற்ற இந்நிகழ்வில் காலத்தால் அழிக்க ,மறக்க முடியாத நட்புக்களை சந்தித்தது மிகப் பெரும் சந்தோஷமே!

noreply@blogger.com (ஓட்டமாவடி அறபாத்) — Sat, 30 May 2020 07:54:00 +0530

27.01.2018

செங்கலடி விஸ்டம் கல்லூரியில் எனது மூத்தம்மா சிறுகதை தொடர்பான விரிவுரை நடாத்தப்பட்டது. மூத்தம்மா கதையில் முஸ்லிம்களின் பண்பாடு கலை கலாச்சாம் கிராமிய வாழ்க்கை தொடர்பான விடயங்களை மாணவர்களுக்கு எடுத்துரைத்தேன். ஓட்டமாவடி . தேசிய கல்லூரியின் தமிழ் பாட ஆசிரியர் கிருஷ்ணா இதனை ஏற்பாடு செய்திருந்தார்.

noreply@blogger.com (ஓட்டமாவடி அறபாத்) — Sat, 30 May 2020 07:50:00 +0530

இலங்கை என்றால் இயற்கை வனப்பு மிக்க ஆறுகளும்..கால்வாய்களும் .பசும் புற்களூம் ..அடர்காடுகளும் செழித்த வனப்பு மிக்க பூமி....என்று எப்பவும் தெரியும்...

ஆனால்...அங்குள்ள மக்கள் பலரும் 19-ம் நூற்றாண்டு வாழ்க்கையையே இந்த நவீன காலத்திலும் வாழ்ந்திருப்பார்கள் போல...என்றுதான் நான் வாசித்த பெரும்பாலான இலங்கை தொடர்பான நூற்கள் எனக்கு உணர்த்தியிருக்கின்றன...

சர்வ சாதாரணமாக தமிழகத்தில் எப்பவோ வந்து விட்ட வசதிகள் கூட அங்கு அப்பவும் வரவில்லையோ..?என்று எண்ணத் தோன்றும்...அதற்கு இந்த நூலும் விதிவிலக்கல்ல...

காடுகள்...சரியான சாலைகள் வசதியின்மை...போக்குவரத்து வசதிகள் பெரிதாக இல்லாமை..இன்னபிற குறைகளுடன்தான் அம்மக்கள் எப்போதும் அல்லுபட்டிருக்கின்றனர்.

இப்போது ஒருவேளை நிலைமை மேம்பட்டிருக்கலாம்.

இயற்கைச் செழிப்பின் பசுமையில்...அம்மக்களுக்கு நிலைபேறான வாழ்வு எக்காலத்திலும் கிட்டியதில்லையோ...? என்று எண்ணத் தோன்றும்...

#ஓட்டமாவடிஅறபாத்தின் இந்த நினைவுகளின் ஊஞ்சலும் இவ்வாறான எண்ணத்தையே என்னுள் ஆரம்பமாக விதைத்தது...போகட்டும்.

காடுகளும்..காட்டினுள் வாழ்ந்த பசுமை வாழ்வுமாக துவங்கும் அறபாத் மெல்ல...மெல்ல...தனது அரபுக் கல்லூரி வாழ்க்கை...அதன் இறுக்கமான ...அதேசமயம் துடிப்பான ஓட்டம் என வேகமெடுக்கிறார்...

பெற்றோர்களைப் பிரிந்து கல்வியின் நிமித்தம் ஊர் ஊராக திரிகிறார்...ஜின்களோடும்...பேய்களோடும் மானசீகமாக கட்டிப் புரள்கிறார்...சாமியாட்டத்தையும் எவ்வித மனத்தடையின்றியும் ரசிக்கிறார்...

இனமுரண்கள் நிறைந்த இலங்கை கிழக்குமாகாண முஸ்லிம்களின் வாழ்க்கையில் புலிகள் ரத்த சாட்சியாக குறுக்கிடுகிறார்கள்...

அறபாத்தின் எழுத்தை வைத்து பார்க்கும் போது...அக்காலத்தில் கிழக்கு மாகாணத்தில் அரசு என்ற ஒரு அமைப்பே...செயலில் இல்லையோ...என்றுதான் நினைக்கத் தோன்றுகிறது...

புலிகளும்...ராணுவமும் ஆளாளுக்கு தாங்கள் நினைத்த பகுதியில் அராஜகம் செய்திருக்கிறார்கள்...எந்த விதியும் இல்லை...எந்த ஒழுங்கும் இல்லை...கேட்பார்யாரும் இல்லை. தடியெடுத்தவன் எல்லாம் தண்டல்காரன்.

இதில் அமைதிப்படையாக இங்கிருந்து சென்ற இந்திய ராணுவம் வேறு அடடகாசம் புரிகிறது...

மனித உயிர்களுக்கு ஒரு மயிர் அளவேனும் கூட மதிப்பில்லை...

கட்டுப்பாடற்ற ஒரு வன்முறைக் கும்பலின் கைகளில் ஆயுதம் கிடைத்தால் என்னவாகும் ...?என்பதற்கு முதலும் முடிவுமான அகோர சாட்சி புலிகள்தான்.

புலிகளின் அமைப்பில் ஆரம்பக்காலத்தில் நிறைய முஸ்லிம்களும் பங்கெடுத்திருக்கிறார்கள் .அவர்களும் புலிகளின் இயல்பான வெறிக் குணத்தையே பிரதிபலித்திருக்கிறார்கள் என்பதற்கு இந்நூலில் வரும் புகாரியே சாட்சி.

பிரபாகரனுக்கு பிற்காலத்தில் எது நடந்ததோ...அதுவே புகாரிக்கும் முன்பே நடந்தது...கத்தி எடுத்தவன்..............

புலிகளுக்கும் ரணிலுக்கும் சமாதான ஒப்பந்தம் அமுலில் இருந்த காலத்தில் புலிகள் முஸ்லிம்களை ரண வேட்டையாடி இருக்கிறார்கள்.

ராணுவம் கைகட்டி வேடிக்கை பார்த்த வண்ணம் இருந்திருக்கிறது. அவர்களூக்குத்தான் புலிகளோடு சண்டையில்லையே...? பிறகு எவன் எப்படிச் செத்தால் அவர்களுக்கு என்ன...?கேட்க நாதியில்லாத அவலம்.

ராணுவமும் புலிகளும் ஆக்ரோசமாக மோதிக்கொண்ட அக்காலங்களில் நூலாசிரியரும் அவரது நண்பர்களும் அவர்கள் பணியாற்றும் அட்டாளைச்சேனை என்ற ஊரிலிருந்து வாகன வசதியின்றி நடந்தே அவரவர் ஊர்களுக்குச் செலலும் சமயம் புலிகளால் மறிக்கப்படவும்...அவர்களை அந்த இக்கட்டான நிலையில் இருந்து ஒரு பாதிரியார் மீட்டு வாகனத்தில் ஏற்றி அவரவர்கள் சொந்த ஊருக்குப் பத்திரமாக அனுப்பி வைத்திருக்கிறார்.கிட்டத்தட்ட அனைவரின் உயிர்களையும் காப்பாற்றி இருக்கிறார்

அவரது பெயர் வண. T.கிங்ஸ்லி றொபர்ட் ...

இந்தப் பெயரை முன்பே எங்கோ படித்திருக்கிறோமே...என்ற ஒரு சந்தேகத்தில் புத்தகத்தை புரட்டினால்...இப்புத்தகமே..அந்த பாதிரியாருக்கத்தான் சமர்ப்பணம் செய்யப்பட்டிருக்கிறது...

இன்றைக்கு ஈஸ்டர் தின கொடிய நிகழ்வுகளை இத்தோடு ஒப்பிட்டுப் பார்த்து சஞ்சலம் கொள்ளாமல் இருக்க முடியவில்லை....!!

பிரபாகரன் பற்றிய ஆசிரியரின் ஒரு குறிப்போடு முடித்துக் கொள்ளலாம் என்று நினைக்கிறேன்...

"அவர் உலகமகா கோழை என்பதற்கு அவரின் சரணடைதலும் இழிவான சாவும் கண்கண்ட சாட்சி. ஒரு வீரன் எதிரியுடன் பொருதி மடிவதுதான் வீரத்திற்கு இலக்கணம் தப்பியோடும் போது சாவைத் தழுவுவது எவ்வளவு அவமானம்...?! (பக் -123)

பட்டு அனுபவித்த ஒரு நொந்த மனத்தில் அல்லாது வேறு எந்த மனத்திலும் இந்த வார்த்தை வராது.

இலங்கை #எங்கள்தேசம் வாராந்திர இதழில் வெளிவந்த இந்த தொடர் கட்டுரை தொகுப்பை அழகுற நூலாக பதிப்பித்திருப்பது #காலச்சுடு நிறுவனம்.

பாராட்டுககள் ஓட்டமாவடி அறபாத்

நன்றி காயல் சுஹைப் முஹ்ம்மது காக்கா

noreply@blogger.com (ஓட்டமாவடி அறபாத்) — Sat, 30 May 2020 07:48:00 +0530

துயருழந்து ஆடும் நினைவுச் சரடுகள்
அறபாத்தின் நினைவுகளில் தொங்கும் நீர் ஊஞ்சல்.

எஸ்.எல்.எம் ஹனீபாவும், அறபாத்தும் துள்ளி அலைந்து திரியும் பதின் பருவத்தை முறையே உசுக்குட்டிப்பருவம் என்றும், குதியான் பருவம் என்றும் குறிப்பிட்டிருப்பர். கிராமமும் அதன் மணமும் பழைய நினைவுகளாக திரண்டெழும் போது உண்டாகும் பேரதிக இன்பம் அவ்விளமையின் உசுப்பையும் குதிப்பையும் மீட்டி மீட்டி பரவசமூட்டுவன. அப்பரவச நினைவின் நதியிலிருந்து பாய்ந்து முன்னகரும் உணர்வுகளின் குவியமாக அறபாத்தின் நீர் ஊஞ்சல் ஆடுகிறது.

எஸ். ராமகிரஷ்ணனின் 'பதின்' என்ற நாவலைப் படித்த பின் உண்டான நினைவுக்கிளர்தலைப் போல, காப்காவின் இளமையின் நினைவுகுறிப்புக்களை வாசித்த பின் உண்டான மன அவத்தை போல அறபாத்தின் நினைவுக்குறிப்புக்களை வாசிக்கும் போதும் மனக்கிளர்ச்சியும் அவத்தையும் ஒருங்கு தோன்றுகிறது. அது அவரது நினைவுக்குறிப்புக்களாக மட்டுமல்லாது அவர் வாழ்ந்த காலத்து மனிதர்களின் நினைவுகளாக, துயரங்களாக, ஏமாற்றங்களாக, துரோகங்களாக நீள்கின்றன.

காடும் வயலும் குளமும் ஆறும் மணக்கும் வட்டுவான் வெளியில் உலாவும் அறபாத் அவ்வெளியில் அலைந்து திரிந்த அழகியலை மனவெளியில் சின்னச் சின்ன சித்திரங்களாக வரைந்து செல்கிறார். ஓட்டமாவடியை அண்டி நீண்டு நெடுத்துச் செல்லும் வயல்வெளிகளுக்கிடையில் சிறுசிறு திட்டுக்களாக அமைந்துகிடக்கும் முஸ்லிம் கிராம வாழ்வியலையும் அழகையும் நினைவுச் சித்திரங்களாகத் தரிசிக்கச்செய்கின்றார்.

இப்பிரதேச மக்களின் வெவ்வேறுபட்ட பொருளாதார, அரசியல், பண்பாட்டு அம்சங்கள் குறித்து முதன்முதலாக இலக்கிய ஆவனமாக்கியவர் வை.அஹமட். அவரது தரிசனம் நாவல் கரையாக்கன் என ஒதுக்கப்பட்ட முஸ்லிம் மீன்பிடித் தொழிலாளர்களின் வாழ்வையும், அவர்களிடையே ஏற்பட்ட செல்வப் பெருக்கத்தால் பள்ளி தலைமைப் பதவிகள் வழங்கப்பட்டு அதிகார ஆசனங்களில் அமர்த்தப்படுதலையும் விபரித்துச் செல்கிறது. இந்நாவலைத் தவிர எஸ்.எல்.எம் ஹனீபாவின் 'மக்கத்துச் சால்வை' இப்பிரதேச மக்களின் மண்வாசனையை வெளிப்படுத்திய மற்றுமொரு படைப்பாக்கமாகும். பாலைக்காட்டு கிராம வாழ்வு, கல்வி, வறுமை, போரவலம் என்பவற்றை வெளிப்படுத்தும் ஜிப்ரி ஹசனின் 'போர்க்குணம் கொண்ட ஆடுகள்' என்ற சிறுகதைத் தொகுதியும குறிப்பிடத்தக்கது. இப்பின்னணியில் ஓட்டமாவடிப் பிரதேச கிராமிய மக்களின் போருக்கு முந்தியதும் போருக்கு பிந்தியதுமான வாழ்வு, தொழில், நம்பிக்கைள் என்பவற்றை அறபாத் மீட்டிக்கொண்டு செல்கிறார். அவ்வகையில் அவரது நினைவுக்குறிப்புக்கள் இப்பிரதேசமக்களின் வரலாற்று எழுதுகையின் ஒரு பதிவாக அமையும்.

போருக்கு முந்திய தமிழ் முஸ்லிம் உறவில் பிணக்குகள் இருந்ததில்லை என எழுதிச்செல்லும் அறபாத் தமிழரது சமயப் பண்பாட்டு அம்சங்களோடு முஸ்லிம்கள் ஒன்றாய்க் கலந்து ஈடுபட்டார்கள் என்கிறார். இப்போதுள்ளது போல அக்கால தமிழ் வேடுவ கிராம மக்களின் திருவிழாக்கள் அமையாது இயற்கையோடு இயைந்த கொண்டாட்டமாக அமைந்தது என்கிறார்.
முஸ்லிம்களிடமும் சமயதூய்மைவாதங்கள் எதுவுமில்லாத பமழமையும் மூடநம்பிக்கைகளும் தேங்கிக் கிடந்தன என்கிறார். அந்நம்பிக்கைகளோடு கலந்து வாழ்ந்த அறபாத் அவை மாற்றப்பட வேண்டும் என்கின்ற சமய தூய்மைவாத சீர்திருத்த சிந்தனையைக் கொண்டிருக்கிறார்.

ஈழப்போராட்ட எழுச்சி கிழக்கில் மிக வீச்சுப் பெற்ற காலத்தில் முந்திக்கொண்டு அவ்வியக்கச் செயற்பாடுகளில் மிகத்தீவிரமாக ஈடுபட்டவர்கள் முஸ்லிம் இளைஞர்கள். அவர்கள் விடுதலைப்புலிகளின் இயக்க எழுச்சிக்காக தம்மை அர்ப்பணித்தனர். ஊரின் அதிகாரம் அவர்களது துப்பாக்கிகளில் இருந்தது. அவர்கள் கொடுங்கோன்மை மிகு குறுநில மன்னர்கள் போல உலாவினார்கள். புலிகளுக்காகவே தம் மக்களையே கொன்றார்கள், அப்பாவிகளை சித்திரவதை செய்தார்கள், தம் உறவினர்களை காணாமலாக்கினார்கள், பள்ளிச்சிறுவர்களை கூட இயக்கத்தில் இணைத்து ஆயுதக்கலாசாரத்தை பரப்பினார்கள். பின்னர் தாம் விசுவாசித்து பின்தொடர்ந்த புலிகளாலேயே கொல்லப்பட்டார்கள். தப்பியவர்கள் இனந்தெரியாதவர்களால் படுகொலைசெய்யப்பட்டனர். அவ்விளைஞர்களால் பட்டுத்துயர்ந்த பெருந்துன்பம் தொடர்ந்தும் புலிகளால் நிகழ்த்தப்பட்டே வந்தது. கொல்தலாகவும் ஆட்கடத்தலாகவும் கப்பமாகவும்.

புலிகளின் துரோகமும் வஞ்சனையும் தொடங்கிக் கவிவதற்கு முன் இந்திய அமைதிப் படையினரின் கொடுஞ்செயல்களும் கொலைகளும் தாங்கிப்பொறுத்திடவியலாத துயர நினைவுகளாக நீள்கின்றன. இந்நீள் நெருக்கடியில் சிக்கி உழன்றவர் அறபாத். தான் பட்டுத் துயர் கொண்ட அந்நினைவுகளையெல்லாம் மனத்தில் வந்து வந்து விழும் சிறுசிறு அதிர்வுகளாகச் சொல்லி கடந்து செல்கிறார். தாங்கிப்பொறுத்திடவியலாத துயர நினைவுகளாக விபரிக்கிறார்.

வறுமையில் உழன்று, ரயில் பெட்டியெல்லாம் அப்பம் விற்று, பட்டு துயர்கொண்ட வாழ்வும், போர்க்காலச் சிரமங்கள் நிறைந்த நீண்ட பயண அனுபவங்களும், இலக்கிய நண்பர்களின் ஒட்டும் உறவும், சில நல்ல மனிதர்களின் தரிசனமும், தனது பழைய நினைவுச் சுழல்களும்தான் அறபாத்தின் புனைவு வெளியின் ஆதர்சனங்கள். வாழ்வின் இன்ப துன்ப அகல் வெளிகளைக் கடந்த அனுபவ முதிர்ச்சிதான் அறபாத்தின் கதைகளின் உயிராக பரவி நிற்கிறது என்பதை அவரது இந்நினைவூஞ்சலில் ஆடித்தெளியலாம்.

வாசிப்பும், எழுத்தும், பயணங்களும் எனக் கலந்து நகரும் அறபாத்தின் நினைவுக்குறிப்புகளுக்குள் அவரது இலக்கியச் செயற்பாடுகளுக்கு கிடைத்த ஏற்புடைமை 'வேட்டைக்குப் பின்' கவிதை தொகுதி வெளிவந்த பின்னர் ஏற்பட்ட புலி ஆதரவு சார் எதிர்ப்பலைகளால் மறுதலிக்கப்படுகிறது. ஆயினும் எதிர்ப்புக்களையெல்லாம் கடந்து துணிவுடன் எழுதும் ஓர்மம் அறபாத் போன்ற எழுத்தாளர்களுக்கு இயல்பாகவே அமைய வேண்டிய ஒன்றாகும். ஏனனில் அவர் கடந்து ஓடி தப்பி வந்த பாதை அவ்வாறானதாகும்.

அறபாத்தின் பத்திகளை வாசிக்கும் போது அது அவரது நினைவூஞ்சலாக மட்டும் ஆடாது அவரது கால எல்லா மனிதர்களினதும் நினைவுகளாக அசைகிறது. மிகைப்படுத்தல்லில்லாத உணர்ச்சி வேகத்தோடு தன்நினைவுகளை எழுதியிருப்பது மேன்மை
நன்றி:றமீஸ் சாலி முகநூல் பக்கம்

noreply@blogger.com (ஓட்டமாவடி அறபாத்) — Sat, 30 May 2020 07:46:00 +0530

நண்பர் சாளை பஷீர் எனது நினைவுகளில் தொங்கும் நீர் ஊஞ்சல் குறித்து அவர் வலைப்பூ பக்கத்தில் குறிப்பொன்றை எழுதியுள்ளார். நன்றியுடன் அதனை Uகிர்கின்றேன்.

போர்ப்படலம் நீங்கிய ஒரு தேசத்து மைந்தனின் வாழ்க்கை கணக்கு. நாட்காட்டிகள் அவற்றை பழங்கணக்காக மாற்றிய போதிலும்...

SALAIBASHEER.BLOGSPOT.COM

நினைவுகளில் தொங்கும் நீர் ஊஞ்சல் --- ஓட்டமாவடி அறபாத்தின் நூல்

போர்ப்படலம் நீங்கிய ஒரு தேசத்து மைந்தனின் வாழ்க்கை கணக்கு.…

noreply@blogger.com (ஓட்டமாவடி அறபாத்) — Sat, 30 May 2020 07:45:00 +0530

க.பொ.த. சா த பாடத்திட்டத்தில் “மூத்தம்மா“ சில குறிப்புகள்

எனது சிறுகதைகள் குறித்த ஆய்வொன்றினை சிறப்புக் கலை மாணிப் பட்டத்திற்கென . யாழ் பல்கலைக்கழக மாணவி றமீஸ் பாத்திமா யுஸ்ரா 2018 இல் சமர்ப்பித்திருந்தார். யாழ் . பல்கலைக்கழக தமிழ்த்துறை தலைவர் .பேராசிரியர் ம.இரகுநாதன் அவர்களின் சான்றுப் பத்திரத்துடன் 72 பக்கங்கள் அடங்கிய ஆய்வினை யுஸ்ரா எனக்கு அனுப்பியிருந்தார். மிகுந்த கரிசனையுடன் தொகுக்கப்பட்டு நேர்த்தியாக நூல் வடிவில் இந்த ஆய்வு எனக்கு கிடைத்ததில் மகிழ்ச்சி நன்றி யுஸ்ரா.
எனது சிறுகதைகள் குறித்து ஆய்வு செய்பவர்களுக்கு பின்வரும் குறிப்புகளையும் நினைவு Uடுத்துகின்றேன்.

1_ இலங்கை தமிழ் சிறுகதைகளில் அரபு மொழிச் செல்வாக்கு ஓட்டமாவடி அறபாத்தின் சிறுகதைகளை துணையாகக் கொண்ட ஆய்வு .ஆய்வாளர் : முகைதீன் ஹஸன் MA. ஆய்வுக்காக சமர்க்கப்பட்டது

2. ஓட்டமாவடி அறபாத்தின் மூத்தம்மா சிறுகதையில் வெளிப்படும் கிழக்கிழங்கை முஸ்லிம்களின் பண்பாட்டுக் கூறுகள் .N.சுபராஜ். தென் .கி. பல்கலைக்கழகம் மொழித் துறை

3. ஓட்டமாவடி அறபாத்தின் மூத்தம்மா சிறுகதை | புலோலியூர் வேல் நந்தகுமார்.
தெரிதல் 17 வது இதழ் .

4. மூத்தம்மா சிறுகதை சில குறிப்புகள்
தாஜஹான் அதிபர் (பொத்துவில்)

5.மூத்தம்மா சிறு கதை ஓர் அறிமுகம். இல.. நிசாந்தன்,ஆசிரியர்,யாழ்ப்பாணம் மத்திய கல்லூரி

இவைகள் ஆய்வு நிலை மாணவர்களுக்கு Uயன்படும் என்பதற்காக சமர்ப்பிக்கின்றேன். இது தவிர இன்னும் சில குறிப்புகள் வெளிவந்திருப்பதாக அறிகிறேன். இதுவரை அவைகள் எனது பார்வைக்கு வரவில்லை. தெரிந்தவர்கள் அறியப்படுத்தினால் நன்றியுடன் ஏற்றுக் கொள்வேன்

noreply@blogger.com (ஓட்டமாவடி அறபாத்) — Sat, 30 May 2020 07:37:00 +0530

தொகுப்பு:நினைவுகளில் தொங்கும் நீர்
கதையாளர்: ஓட்டமாவடி அறபாத்
வெளியீடு: காலச்சுவடு பதிப்பகம்(இந்தியா)

ஊஞ்சல்.

ஓட்டமாவடி அறபாத் கிழக்கிலங்கையின் முக்கியமான இலக்கியவாதிகளில் ஒருவர். ஆரம்பத்தில் 'எரிநெரிப்பிலிருந்து' என்ற கவிதைத் தொகுதியின் மூலம் கவிஞராக உருவெடுத்து, பின்னர் கவிதைக்கு முழுக்கு போட்டு விட்டு முழு நேர கதைசொல்லியாக மாறியவர். மாகாண தேசிய ரீதியில் பலதரப்பட்ட விருதுகளால் கௌரவிக்கப்பட்டவர்.
அவரின் 'நினைவுகளில் தொங்கும் நீர் ஊஞ்சல்' எனும் நினைவுகளின் திரட்டை வாசிக்க கிடைத்தது. தனது குஞ்சும பருவத்திலிருந்து பிரவாகித்த அனுபவங்கள் வாயிலான நினைவுகளின் ஒட்டுமொத்த நினைவுத்திரட்சையை காகிதங்களில் படியவைத்துள்ளார். இவ்நினைவு குறிப்பேட்டில் சாலப் பொருத்தமான முதும் கதையாளர் எஸ் எல்எம் ஹனிபா அவர்கள் பின்னட்டை குறிப்பை கொடுத்திருப்பது இப்புத்தகத்திற்கு மேலும் ஒரு சிறப்பைக் கொடுக்கின்றது.

இலங்கை தமிழ் வாசகர்களுக்கு தாரளமான படைப்புகள் வந்துகொண்டு இருக்கின்றன, அவற்றில் சில படைப்புகள் வாசகங்களை ஏமாற வைக்கின்றன. எழுதியவைகள் எல்லாவற்றையும் அச்சகத்திற்கு ஏற்றும் ஒரு சர்வசாதாரண நிலை காணப்படுகின்றது. எழுத்தாளர்களின் அபரிமிதமான கற்பனை வளர்ச்சியாக நடைமுறை சாத்தியமற்ற கருத்துக்களை கதைக்களமாகவும், வரலாற்றை திரிவுபடுத்தும் புனைவுகளையும், சமத்துவம் என்றும் வளர்ச்சி என்ற பெயரிலும் காமத்தையும் சராமாறியாக நுழைத்து விடுகிறார்கள்.
வாழ்க்கையை சித்தரிக்கும், வாழ்க்கையை அதன் அசலோடு ஒப்புவிக்கும் எழுத்துக்கள் விரல் விட்டு எண்ணுபவையாகவே இருக்கின்றது.
அந்த விரல் விட்டு எண்ணுவதில் தான் நான் இத்தொகுப்பை காண்கின்றேன்.

மனிதனின் வாழ்க்கை எத்தனை நிலைகளை கடந்து வருகின்றது, காடு எவ்வளவோ ரகசியங்களை தன்னுள் பதுக்கி வைத்திருப்பது போல், வாழ்வு முழுவதும் அவலங்களையும் அபத்தங்களையும் துரோகம் ஏமாற்றம் துயரம் மகிழ்ச்சியையும் கொண்டிருக்கின்றது.
நினைவாளனின் வாழ்வின் துளிர்த்து வளர்ந்து காய்ந்து போன நினைவுச் சருகுகளுக்கு மறுபடியும் நீரூற்றும் போது, அதன் ஈரத்திலேயே நான் மீண்டும் மீண்டும் துளிர்த்து நின்றேன்.

சமூக அரசியல் சார்ந்த பத்தி முறை எழுத்துக்களாக ஒவ்வொரு சம்பவங்களையும் சுருக்கமாகவும், வாசகர்கள் எளிமையாக புரிந்து கொள்ளக் கூடியதாகவும், நினைவாளன் சம்பவங்களின்போது உணர்ந்து கொண்ட அதே உணர்வுகளை வாசகர்கள் மனதில் பிரதிபலிக்கக் செய்வதாகவும் இருக்கின்றது. தனக்குரிய வட்டார பேச்சு நடையில் அவர் பேசியிருப்பது அவருக்கு உரிய தனித் தன்மையைக் காட்டுகிறது.
காலத்தால் மருகிப்போன சொற்களை பலவற்றை சமூகத்திற்குள் மீள் செய்து இருக்கின்றார்.
"வாப்புப்பா, வராந்தா, அடுப்படி, உலை, குப்பிலாம்பு, சிம்மினி, அச்சிலம்,துலா, கையிப்பு, லாந்தர், லாம்பெண்ண ...."

நினைவாளன் தன் வாழ்வியல் அனுபவங்களை அடுக்கும் போது பல சிசுக்களை பிரசவித்து இருக்கின்றார், இறந்த காலத்திலிருந்து நிகழ்காலத்திற்கும், எதிர்காலத்திலிருந்து கடந்த காலத்திற்கு மாறிமாறி பயணிக்கிறார். தான் சார்ந்த, தன்னைச் சூழ இருந்த இயற்கை, சுற்றுச் சூழல், சமூக கலாச்சார பின்னணி, மற்றும் அரசியல், மதம் சார்ந்த விடயங்களை அச்சுப்பிசகாமல், எந்த பிடிகளும் இல்லாமல் சமூகத்தின் மத்தியில் ஒப்புவித்து இருக்கின்றார்.
கிழக்கிலங்கையின் குறிப்பாக ஓட்டமாவடி பிரதேசத்தில் சமூக வாழ்வியல் அரசியல் ஆகியவற்றின் மூன்று தசாப்தகால ஆவணப் பதிவாக இத்தொகுப்பு இருக்கின்றது.

ஒவ்வொரு சம்பவங்களும் காட்சி விவரிப்புகளும் வெவ்வேறு விதமான உணர்வுகளில் ஏற்ற, இறக்கங்களை உண்டு பண்ணுகின்றது.
இங்கு சந்ததியினர் காணாத புயலையும் போரையும் நம் கண்முன்னே நிறுத்துகிறார்.

அந்த காட்டையும் சுற்றுச்சூழலையும்,

"பரந்து கிடக்கும் வயல் வெளி. வயலையும் குளத்தையும் பிரிக்குமாற் போல் இராட்சத பாம்பாய் படர்ந்து நீளும் குளக்கட்டு, வயலை தாண்டி விழுந்தால் மாந்துறை ஆறு."

"இரவில் பூமியில் அதன் மலர்கள் உதிர்ந்து கிடக்கும், ஆற்றுநீர் அமைதியாக ஓடிக்கொண்டிருக்கும்."

சம்பவங்களில் அடிக்கடி தொட்டுப் போகின்றார்.

அவரைச் சுற்றியிருந்த காடுகளுக்கிடையிலான பிணைப்பினூடாக, அதை ஒரு ஆசானாகவும் ஏற்றுக்கொள்கிறார்.

"காடுகள் வாழ்க்கையின் குறிக்கோள்களை கற்றுத்தந்தது. காடுகளின் அரவணைப்பில் பல இரவுகள், பகல்கள் தூங்கியிருப்போம்."

அத்துடன் நினைவாளன், நினைவு குறிப்பேட்டில் இரண்டு தசாப்தங்களுக்கு முன்னுள்ள வாழ்வியலை அதன் பாணியிலேயே பதிவிடுகிறார்.

"கிடுகு வெயப்பட்ட முகடு, முற்றத்தில் பெரிய மாமரம், சற்று தொலைவில் கிணறு, கிணற்றில் சூழவும் கமுகு மரங்கள், தண்ணீரள்ளத்துலா, கிடுகுவேலி நாலாபக்கமும் நுழைவாயில், வட்டரும் ரொட்டியும் நிறைந்த புளியமரத்தடி தேனீர் கடை"

இந்தச் சந்ததி விரட்டி விட்ட கத்னா ஊர்வலம், விருத்த சேதன அழைப்பு, ஒய்த்தா மாமா, விராத்துக் கத்தம்.

கண்கள் கண்டிராத விசித்திரமாக தும்பு மிட்டாய், கலர் விசிறி, அன்னமினா பழம், இலுப்பைப்பூ கொளுக்கட்டை, உழுவை மீன் திராய்ச் சுண்டல், பொன்னாங்கண்ணி கீரை சுண்டல், கோல்டன் மீன் பாலாணம், முருங்கையுடன் சுங்கான் கருவாட்டுக் கறி...
இவைகளை கண்களால் பார்த்து உதடுகள் வாசிக்கும் போது மனம் ருசிக்கின்றது.
நினைவாளன் தனது நினைவுகளின் ஊடாக வாழ்வின் ஒவ்வொரு நிலையாக கடந்து வருகின்றனர். ஒரு நிலையை கடந்ததும் நினைவுகள் முழுவதும் துரோகம், ஏமாற்றம், துயரம், பிரிவுகள், கொலைகள் என்று ஒரு விதமான மானுடத்தின் மீதான விரக்தியை உண்டு பண்ணுகிறது, இடையில் வரும் அந்த வயோதிபத் தாயின் குரல்
"ஒங்கலுக்கு தேத்தண்ணி தாரத்துக்கு ஒரு சுரங்கச்சீனியும் இல்லையே தங்கம்கள்"
பாதர் ரோபோட் கிங்ஸ்லி போன்றோர்களும் மீண்டும் மானிடத்தின் மீதும் உறவுகள் மீதும் நம்பிக்கையை வளர்க்கிறார்கள்.

முஸ்லிம் சமூகம் எவ்வாறு புலிகள்-இந்திய படைகள்-இலங்கை இராணுவம் இப்படி மும்முனையால் எப்படி நெருக்கப்பட்டது என்பதை கண்ணுற்று, அனுபவித்த கீற்றுகளின் கதறலாக முன்வைக்கிறார்.

அதிலும் மிகவும் விரக்தி அடைந்த நிலையில் ஒரு துரோகத்தை எதிர் கொண்டவராக 'ஓட்டமாவடி வீட்டுக் கதவுகளை புலிக்கொடி போர்த்திய சந்துக்குகள் தட்டி நின்றபோதும், அவர்களது எதிர்களின் மீது கொண்ட பயத்தை போக்க முஸ்லிம் சமூகத்தின் மீது மிலைச்சத்தனத்தை காட்டியதுடன், இயக்கத்திலிருந்த புஹாரி போன்றவர்கள் இயக்கத்திற்காக ஓடோடி ஆட்கள் சேர்ந்தவர்களையும் சுட்டு புதைத்து மாமிச பசியைத் தீர்த்துக் கொண்டார்கள் என்றும்,
பிரபாகரனுக்கு எதிராக தனது குற்றச்சாட்டையும், கண்டனத்தையும் அவரின் படைப்புக்கள் மூலம் அப்பொழுதுகளிலேயே நேரடியாக முன்வைக்கின்றார்.
இந்த முப்பது வருட கால போராட்டம் எதைத்தான் சாதித்தது, ஒரு முதலமைச்சரையும், ஒரு அரை அமைச்சரையும் தவிர என்று யதார்த்தை சொல்லி இருக்கின்றார்.
அவரின் வாழ்க்கையின் படிநிலை ஊடாக கிழக்கிலங்கையிலிருந்து தலைநகரை நோக்கி நகர்கிறது, அப்போதிருந்த பிரயாணத்தின் இடர்பாடுகளையும், அதனோடு சேர்ந்த பத்திரிகை அனுபவங்களையும் விபரிக்கின்றார்.

நினைவேட்டின் ஆரம்பம் இயற்கையையும் வாழ்வியலையும் முன்னிறுத்தி, நமக்கு ஒரு அழகிய கற்பனை கிராமிய வாழ்க்கையை உண்டு பண்ணுகிறது, அதன் அடுத்த பகுதி இரத்தமும் சதையுமாக திளைக்க வைக்கிறது, இறுதி சில அத்தியாயங்கள் சோர்வடைந்து போவதைப் போல இருக்கிறது,
இதற்குக் காரணம் வாசித்த எனது மனநிலையை தான் குற்றம் சாட்டுவேன். எப்போதும் நமது மனம் கற்பனையையும், இரத்த வாடையை நிறைந்த சம்பவங்களை உச்சாக்கொட்டி கேட்க வைப்பதால், இறுதி சம்பவங்கள் மனதில் ஒரு சோர்வு சூழ்நிலையை தோற்றுவிக்கின்றது.

ஓட்டமாவடி அரபாத் நினைவு ஊற்று இத்துடன் முடியவில்லை என்றுதான் நினைக்கின்றேன், அவர் வாழ்வியலின் அனுபவங்களில் சில துளிகளைத்தான் பதிந்திருக்கிறார். ஒருவரின் வாழ்க்கையை சில பக்கங்களில் அடக்கிவிட முடியாது.

'நினைவுகளில் தொங்கும் நீர் ஊஞ்சல்' ஒரு முகக் கண்ணாடி, அவரின் நினைவுகளின் ஊடாக நமது வாழ்க்கையின் கடந்தகாலத்தில் பயணிக்கச் செய்கிறது.

Thanks hanees Mohamed

noreply@blogger.com (ஓட்டமாவடி அறபாத்) — Tue, 27 Nov 2018 06:55:00 +0530

25/11/2018
நேற்றிரவு உண்ட பின் நூறடி உலாவு என்பதற்கொப்ப வீட்டிலிருந்து வீதிக்கு வந்தேன் . முற்றமும் அது தான். கூடவே எனது சின்ன மகளும் 3 1/2 வயது.
நிலவு வானத்தில் ஏகமாய் குந்திக் கொண்டிருந்தது.
மகளிடம் நிலவைக் காட்டினேன். மேகம் வந்து அதனை மூடிப் போனது
அபீ நிலவ அழிக்கிது என்று வருத்தப்பட்டாள்.
இப்ப பாருங்க நிலவு வெள்ளயா போகும் என்று அவள் துயரத்தை துடைத்தேன் . சற்று நேரத்தில் மேகம் விலக பளீரென நிலவு பிரகாசித்தது.
அபீ மேல பாரு என்னப் போல நெலா வெள்ளயா இருக்கு . அவள் கண்களுக்குள் ஓராயிரம் பெளர்ணமிகள் ததும்பி பிரவகிக்க பொங்கித்தான் போனேன்

Ajwa

noreply@blogger.com (ஓட்டமாவடி அறபாத்) — Tue, 27 Nov 2018 06:53:00 +0530

26.11.2018

மழை நாளில் எழுத்தும் வாசிப்பும் கூடிக்குலாவும் .இன்று மாலை வாசித்து முடித்த என்னை ஆகர்ஷித்த நாவல் சரவணன் சந்திரனின் அஜ்வா .

"அஜ்வா என்பது நம்பிக்கையின் மீளுதலின் அடையாளம்' இங்கே மீட்சிக்காகத் தவிக்கும் மனிதர்கள் நாவல் முழுக்க நிரம்புகிறார்கள் "

noreply@blogger.com (ஓட்டமாவடி அறபாத்) — Tue, 27 Nov 2018 06:48:00 +0530

ஒரு சொட்டு வைரம் உன் அன்பு

---------------------------------------------------
எனது இனிய நண்பர் ஓட்டமாவடி அரபாத், ''நினைவுகளில் தொங்கும் நீர் ஊஞ்சல்" எனும் அவர் பத்தி எழுத்துக்களின் தொகுப்பை என் வாசல் தேடி வந்து தந்து விட்டு, "ஒரு சொட்டு வைரம் உன் அன்பு" என்று நிரூபித்துச் சென்றார்.

அரபாத் - 'மூத்தம்மா' என்ற கதையை அன்று வெளி வந்த, 'சரிநிகரி"ல் படித்து நான் அழுதிருக்கிறேன்; இதே போல் பாடப் புத்தகத்தில் அந்தக் கதை வந்திருக்கும் போது, எனது இளைய மகன் படித்து விட்டுக் 'கண் கலங்குது வாப்பா' என்கிறான்.
இப்படிப் பலரையும் தகர்த்த உங்கள் கதைகளுக்குப் பின் சோவெனக் கொட்டிய மழைதானா அரபாத் இந்த நீர் ஊஞ்சல்?

எஸ்ஸெல்லம் சொல்வது போல்
"படிப்பவர் மனதில் பரவசத்தையும் தமது உசுக்குட்டிப் பருவத்தின் நினைவுகளையும் நம் ஒவ்வொருவரின் மனத்திலும் பிரவாகமாக ஓடச் செய்திருக்கிறார்."

உங்களின் முதல் அத்தியாயத்தின் சிலும்பில் சிலாகித்து உங்களை உச்சி முகர்ந்திருக்கிறது வறுமை.
கொடூர வறுமையின் காலம் அது.
பொழுது விடிந்தால் டீக்கும் உணவுக்கும் கடன் கேட்க ஆள் தேடும் காலத்தில் நீங்கள் ரெயில் ஏறி வியாபாரம் செய்து சில்லறைகளைச் சேர்த்து அற்ப சொற்பமாகப் பசியாறும் நிலையிலும் இடைவிடாது நீங்கள் கவிதை மனதுடன் வாழ்வும் சாவுமாய் இருந்தீர்கள்.
உங்கள் வாழ்க்கைக்கான ஒரே ஒரு ஆன்மத் துணையாக எழுத்து மட்டுமே இருந்தது. அதனை எந்தக் கணத்திலும் விடாது உங்கள் விரல் பற்றியபடியே வந்து கொண்டிருந்தது அது.
உங்களால் அதைக் கேடயமாகவும் கொள்ள முடிந்தது.

தொப்புள் கொடி அறுபடும் முன்பே ஆர்வத்துடன் தூக்கும் குழந்தையைப் போன்று ஒவ்வொரு அத்தியாயங்களையும் படிக்க முடிகிறது அரபாத்.

பள்ளிப் பருவச் சித்து விளையாட்டுகளில் எல்லாச் சிறுவர்களையும் போல் இறங்கிய நீங்கள் அரசியல் வாழ்பனுபங்கள் என்ற நிழல்களோடும் பயணிக்கிறீர்கள்.
நடு வழியில் நம்மை ஆழப்படுத்திய உங்கள் கதைகளுடன் கழித்த எண்ணற்ற இரவுகளின் மனப்பூர்வீகமான ஒரு பெருமிதம் இந்த நினைவுகளில் தொங்குகின்றது.

நன்றி அரபாத்.

-நபீல்.

எஸ்.எல்.எம். ஹனீபாவின் முக நூல் பக்கத்திலிருந்து ....

noreply@blogger.com (ஓட்டமாவடி அறபாத்) — Thu, 14 Jun 2018 16:50:00 +0530

எஸ்.எல்.எம். ஹனீபாவின் முக நூல் பக்கத்திலிருந்து ....

கடந்துபோன சென்னைப் புத்தக சந்தையில் காலச்சுவடு பதிப்பகம் மூலம் வெளிவந்த ஓட்டமாவடி அறபாத் அவர்களின் “நினைவுகளில் தொங்கும் நீர் ஊஞ்சல்” பற்றிய ஒரு சிறு குறிப்பை நண்பர்களுடன் பகிர்ந்து கொள்கிறேன்...

நினைவுகளில் தொங்கும் நீர் ஊஞ்சல் பத்தி எழுத்துக்களின் தொகுதி. அறபாத் நூலின் முன்னுரையில் சொல்வது போல உசுக்குட்டிப் பருவத்து நினைவுகளை மீட்டிப் பார்க்கும் அழகிய காட்சிப் படிமங்கள்.

நினைவுகளில் தேங்கி நிற்கும் ஒரு சொட்டு நீரும் திரும்பிப் பார்க்கையில் என்னமாய் தக தகவென ஜொலிக்கின்றது.

கிடுகு வேயப்பட்ட முகடு, முற்றத்தில் பெரிய மாமரம், சற்றுத் தொலைவில் கிணறு, கிணற்றைச் சூழவும் கமுகு மரங்கள், தண்ணீரள்ளத் துலா, வீட்டைச் சுற்றி அடைக்கப்பட்ட கிடுகு வேலி, அக்கம்பக்கம் சாச்சிமார்களும், மூத்தம்மாமாரும், ஒவ்வொரு வீட்டுக்கும் போய்வர கோடியில் ஒரு நுழைவுவாயில், இது அறபாத்தின் வாக்குமூலம்.

தனது எழுத்துக்கள் மூலம் படிப்பவர் மனதில் பரவசத்தையும், தங்களின் இளமைப்பருவத்தின் மறக்கமுடியாத நினைவுகளையும் நம் ஒவ்வொருவர் மனத்திலும் பிரவாகமாக ஓடச் செய்திருக்கிறார். அவரின் அனுபவங்கள் நமது அனுபவங்களாகி நமது மனசும் அவரின் எழுத்துக்களோடு அள்ளுன்டு போகிறது.

1996 “எரிநெருப்பிலிருந்து” எனும் கவிதைத் தொகுப்பின் மூலம் அறிமுகமான அறபாத் 20 வருட எழுத்தூழியத்தின் மூலம் தன்னை சிறப்பாக அடையாளப்படுத்திக் கொண்டவர்.

கதை, கவிதை, விமர்சனம், பத்தி எழுத்துக்கள் என்று 11 நூல்களின் சொந்தக்காரர். தனது படைப்புக்களுக்கு மாகாண, தேசிய ரீதியிலும் பல விருதுகளைப் பெற்றவர்.

அறபாத்தின் ஒவ்வொரு காலடிமண்ணின் ஈரமும், வாசனையும் ஒவ்வொரு பத்தியிலும் கண்சிமிட்டி களிப்பூட்டுகிறது.

நூலிலிருந்து ஒரு பத்தி...

ரணிலும், பிரபாகரனும் சமாதானம் செய்து கொண்ட பின் வெடிச் சத்தங்கள் தற்காலிகமாக ஓய்ந்திருந்தன. இலங்கை ஆர்மியுடன் தான் சண்டையை நிறுத்தினார்கள் புலிகள். கிழக்கு முஸ்லிம்களோ இக்காலத்தில் தான் அதிகம் இழப்புக்களை எதிர்கொண்டனர். ஆட்கடத்தல், கப்பம் பெறல், கொலை, கொள்ளை என புலிகள் சமாதானத்தை முஸ்லிம்களுக்கு எதிரான போராயுதமாக பயன்படுத்திக் கொண்டனர்.

வாழைச்சேனையிலிருந்து கல்குடா, கல்மடு போன்ற இடங்களுக்கு சமையலுக்கு சென்ற இரு முஸ்லிம்களை (ஹயாத்து முஹம்மது அய்னுத்தீன், ஹயாத்து முஹம்மது ஜனூஸ்தீன் ஆகிய இருவரும் ஒரே குடும்பத்தைச் சேர்ந்த சகோதரர்கள்) கொலை செய்து (2002 ஜுன் 27ம் திகதி) ஜனாஸாவை (உடலம்) இராணும், பொலிஸார், சட்டத்தரணிகள், நீதிபதி முன்னிலையில் எரித்து சாம்பலாக்கிய நெஞ்சை உறைய வைத்த கொடூர நிகழ்வும் இக்காலத்தில்தான் நடந்தது.

அறபாத் நூலில் தமிழ், முஸ்லிம் உறவு, புலிகளுடனான தனக்குள்ள அந்நியோனியம், புலிகளை வெறுத்த தருணங்கள் என்று ஒரு கழைக்கூத்தாடியின் நிதானத்துடனும் பக்கசார்பின்றியும் பதிவு செய்திருக்கிறார்.

இந்த நூலைக்கூட தனது உயிரைப்பாதுகாத்து வழியனுப்பி வைத்த திருகோணமலை மறை மாவட்ட குரு முதல்வர் வண. T. கிங்ஸ்லி றொபர்ட் அவர்களுக்கு சமர்ப்பணம் செய்திருக்கிறார்.

காலச்சுவடு பதிப்பகம், நாகர்கோயில், விலை - ரூ. 180

noreply@blogger.com (ஓட்டமாவடி அறபாத்) — Thu, 14 Jun 2018 16:40:00 +0530

ஏறாவூர் வாசிப்பு வட்டத்தின் பதினான்காவது அமர்வான ஓட்டமாவடி அறபாத்தின் "நினைவுகளில் தொங்கும் நீர் ஊஞ்சல்" நூல் அறிமுகமும் உரையாடலும் இன்று சிறப்பாக இடம்பெற்றது.

நூலாசிரியர் அறிமுகத்தை மூத்த எழுத்தாளர் எஸ்.எல்.எம்.ஹனீபாவும், நூல் தொடர்பான தனது பார்வையை தோழர் மலர்ச்செல்வனும் முன்வைத்தனர். அதனைத் தொடர்ந்து அறபாத்தின் எழுத்துக்கள் எனும் தலைப்பில் தோழர் ஜிப்ரி ஹாசனும், வாசிப்பு வட்ட செயற்பாடுகள் தொடர்பில் கலாசார உத்தியோத்தர் அஷ்ஷெய்க் நழீம் அவர்களும் தங்களது கருத்துக்களைப் பகிர்ந்தனர்.

நூலின் ஆசிரியர் ஓட்டமாவடி அறபாத்தினால் ஏற்புரை நிகழ்த்தப்பட்டது.

இறுதியாக நூல் வெளியீடு இடம்பெற்றது.

இவ்வமர்வுக்கு என்னோடு ஒத்துழைத்த தோழர்களான பைறூஸ், ஜெம்ஸித் ராபி, அஃப்ழல், அஸ்லம், பதுறுஸ்ஸமான்,அல் அமீன், EEDI கல்வி நிறுவனத்துக்கும் மற்றும் அழகாக புகைப்படம் பிடித்துத் தந்த குலாம் முஸம்மில் அவர்களுக்கும் கலந்து கொண்ட அத்தனை உள்ளங்களுக்கும் மிகுந்த நன்றிகள்.

உருட்டிப்பழம் எனப்படும் உக்குரஸ் காய் நாலைந்து கொண்டு வந்த பகிர்ந்த எஸ்.எல்.எம்.ஹனீபா மாமாவுக்கு விஷேட நன்றிகள்.

வழங்கப்பட்ட வாழைப்பழம் கொஞ்சம் பச்சையாக இருந்தமைக்கு மன வேதனைகள்.

தொடர்ந்து பயணிப்போம் தோழர்களே

ஓட்டமாவடி அரபாத்தும் ஏறாவூர் சப்ரியும்

noreply@blogger.com (ஓட்டமாவடி அறபாத்) — Thu, 14 Jun 2018 16:37:00 +0530

ஓட்டமாவடி அரபாத்தும் ஏறாவூர் சப்ரியும்
“””””””””””””””””””””””””””””””””””””””””””””””””””””””””””””””””

மே மாதம் மூன்றாம் திகதி……வெறித்தனத்தில் ஜஸ்டின் பீபரின்வெஸ்டர்ன் ஆடிக் கொண்டிருந்தது வெயில்…..அவிந்து துடிக்கின்ற கடல் படு பயங்கரமாக ஆவியாகிக் கொண்டிருக்கின்ற நடுப்பகல் பொழுது….இரண்டு மணியிருக்கும்,…..வழமைக்கு மாறாக நேரத்தோடு கோர்ட்டிலிருந்து வீட்டுக்கு வந்து விட்டேன்…வியாழக் கிழமைகளில் வழமையாக வீடு வர ஐந்து அல்லது மணியாகி விடும். இன்று நீதவான் நீதிமன்றத்தில் துலக் முதலியார் எனப்படுகின்ற மொழிபெயர்ப்பாளர் கல்தா என்பதால் எல்லா விளக்க வழக்குகளும் வாயிதா………அதனால்தான் இந்த ஏர்லி ரிட்டேர்ன்………….மனைவியின் அண்ணல் நகர் உம்மா வீட்டில் மூத்தவன் அரீப் முராதிடம் மழலை பாஷை கற்றுக் கொண்டிருந்தேன்.

“அஸ்ஸலாமு அலைக்கும்…சபருள்ளாஹ் எங்கே இருக்கிறீங்க” செல்லின் மறு முனையில் ஓட்டமாவடி அரபாத்….”

வஅலைக்குமுஸ்ஸலாம்…எப்படி இருக்கீங்க…எங்க இருக்கீங்க……” சடர்ன் சேர்ப்ரைஸ்

“ட்ரின்கோக்கு ஒரு வேலையா வந்தேன்……வேல முடிஞ்சி ஒன் த வே ட்டூ ஊர்………இப்ப கிண்ணியாவ நெருங்கிக்கிட்டு இருக்கேன்….சந்திக்கலாமா”

“வை நொட்…….வித் ப்ளெஷர்” உற்சாகமானேன்.

ஓட்டமாவடி அரபாத்தை நீண்ட காலமாகத் தெரிந்தாலும் பத்து பதினைந்து வருட இடைவெளியில் இரண்டாம் தடவை சந்திக்கப் போகின்றேன்…..இந்த முறை ஃபுல் பெக்கேஜில்………………இலக்கியர்களை சந்தித்து உரையாடுகின்ற தருணங்கள் நுரைக்கின்ற ஷாம்பைன் சமாச்சாரம்…..அதுவும் ரியல் இலக்கியக்காரர்கள் என்றைக்குமே ரெஃப்ரெஸ்ஷிங் மோட்……அவர்களை சந்தித்து உரையாடுதல் என்பதே போன்விட்டா ப்ளஸ் ஹோர்லிக்ஸ் கலவையில் இம்மீடியட் எனர்ஜி.

கிண்ணியாப் பாலத்தைக் கடந்து அப்படியே மட்டக்கிளப்பு வீதியால் முச்சந்தியைக் கடந்து வந்தால் தோனா பீச்சுக்கு முன்னால் வடிகட்டப்பட்ட காற்றை வாசித்தவாறு இருக்கின்றது கிண்ணியா பாயிஸா அலியின் வீடு. அங்கு வந்து பாயிசா அலியோடு பேசிக் கொண்டிருப்பதாக தகவல் தந்தார்கள். மகன் அரீபையும் அள்ளிக் கொண்டு கவிதாயினி பாயிசா அலி வீட்டுக்கு சென்றேன். அல்ஹம்துலில்லாஹ் ஓட்டமாவடி அரபாத்..அவருக்கு அருகாமையில் முகத்தில் தாடிக்கு வெளியே எட்டிப்பார்க்கின்ற புன்னகையோடு ஏறாவர்ர் சகோதரன் சப்ரியும்….இரண்டு பேருக்கும் கை கொடுத்து சலாம் சொல்லி “கிளாட் ட்டூ மீட் யூ”

அரபாத் சகோதரர் சப்ரியை அறிமுகப்படுத்தினார். ஃபேஸ் புக்கில் சப்ரி எனது ஃப்ரென்ட் லிஸ்டில் இருக்கின்றார். ஆனால் இன்றுதான் லைவ் இன் கன்சேர்ட். நிஜத்தில் பார்த்து பேசுவதென்பது அலாதியானது. அதனை ஃபேஸ் புக்கால் என்றைக்குமே தர முடியாது. சாரி மார்க் சக்கர்பெக்.

நெடு நேரம் அங்கே பேசக் கிடைக்கவில்லை…அப்போதுதான் பாயிசா அலியும் அவரது கணவரும் பாடசாலை விட்டு வந்திருக்க வேண்டும்…பாடசாலைக் களைப்பை முகத்தில் ப்ளாஸ்திரி போட்டு ஒட்டி வைத்திருந்தனர். இருவரும் கற்றுத் தருனர்கள். ஆனாலும் அலுப்பில்லாத புன்னகை…..அதற்கிடையில் பாயிசா அலியின் தயாரிப்பில் பப்பாளி ஜூஸ்……கொஞ்ச நேரம் அங்கிருந்து பேசி விட்டு அதே மட்டக்கிளப்பு வீதியால் பயணம் செய்து கடலூருக்கு அருகில் கடலை அண்டிய படி பிரதான வீதியில் இருக்கின்ற அகன்று விரிந்த ஆல மரத்தின் கீழ் வந்து சேர்ந்தோம்.

எங்களோடு கவிதை நண்பர்கள் பெரோஸ்கானும்…அதற்கப்புறம் நஸ்புல்லாவும் பட்டியலில் இணைந்து கொண்டார்கள். ஐவரும்….மன்னிக்கவும்…என்ட மோனோடு சேர்த்து ஆறு பேரும் வட்டமாக கலர் மங்கிப் போன ப்ளாஸ்டிக் கதிரைகளில் அமர்ந்து கொண்டு……வேறு என்ன…இலக்கியம்…இலக்கியம்…இலக்கியம்………இலக்கியத்தைத் தவிர வேறொன்றுமில்லை என்கின்ற ஜோனருக்குள்ளே அடுத்து வருகின்ற இரண்டு மணித்தியாலத்துக்கு தேசப் பிரதிஷ்டம் செய்யப்பட்டோம்.

அரபாத் கடந்த காலத்தைய நினைவுகளை ஃப்ளாஷ்பேக் அடித்தார். சகோதரர் சப்ரியின் வார்த்தைகளில் அவர் ஆழமான வாசிக்கின்றார் என்பதனை கண்டு பிடிக்க அவ்வளவு நேரம் பிடிக்கவில்லை எனக்கு அரபாத்தும் சப்ரியும் நிறையப் பறிமாறினர்…..,நஸ்புல்லாவும் பெரோஸ்கானும் தீராத்தாகத்தோடு இலக்கியத்தில் கை தேர்ந்த இன்னிங்சை ஆடிக் கொண்டிருந்தனர். அதிகம் பேசினோம்…..எல்லாமும் தேவையானவையாகவே இருந்தன.

ஐந்து இலக்கியக்காரர்களின் சுவாரஸ்யமிக்க உரையாடல் எதுவும் “சாரி பாஸ் என்னை பாதிக்கவில்லை” என்ற கணக்கில் எனது மகன் அரீப் அவனது குழந்தை உலகத்தை அங்கே கூட்டி வந்திருந்தான். கொஞ்ச நேரத்தில் கடற்கரையில் நிறுத்தி வைக்க்ப்பட்டிருந்த படகுக்கருகில் சென்று எதையோ உற்று நோக்கிக் கொண்டிருந்தான்…எங்களது உரையாடல் தொடர்ந்தது. அவ்வப்போது செல்போன் கமராக்கள் ‘ஸ்மைல் ப்ளீஸ்” என்று சொல்லிக் கொண்டிருந்தன.

காலச்சுவடு வெளியீடாக வந்திருக்கின்ற அரபாத்தின் பத்தி எழுத்துகளின் தொகுப்பான “நினைவுகளில் தொங்கும் நீர் ஊஞ்சலினை அரபாத் அன்பளிப்பித்தார். அப்புறம் ஏற்கெனவே ஓர்டர் பண்ணியிருந்த தெம்பிலி, சீனி, தேசிக்காய் ஆகிய இன்க்ரீடியன்கள்டங்கிய ஜுசை கடைப் பையன் மரியாதையோடு பரிமாறினான். வாவ்..வாவ்…….கொளுத்துகின்ற வெயிலின் கொடுங்கொலுக்கு செங்கோல் புரிகின்ற இந்த மாதிரி இயற்கை ஃப்ரென்ட்லி பானங்கள் டயறியில் குறித்து வைக்கப்பட வெண்டியவை.

வெயிலெரிக்கினற காலங்களில் கிண்ணியாவில் காளான்கள் லெவலில் திடீரென்று முளைக்கின்ற இந்த மாதிரி சீசனல் பானக்கடைகள் எத்தனையோ இருந்தாலும் இந்த தெருவொரக் கடையில் தருகின்ற தெம்பில் ஜுசுக்குன்னு ஒரு இது இருக்கு…..இதுன்னா ஒரு அது….நுனி நாக்கு ஜென்ம சாபல்யம் அடைந்து தொண்டைக்குழி கண்டாங்கி கட்டிக் கொள்ளுகின்ற கொண்டாட்டம். இந்தக் கடைக்கு அடிக்கடி வந்து தாகத்துக்கு தண்ணி காட்டுவது எனது வழக்கம். அவ்வப்போது சில நாட்களில் தாக சாந்திக்காக எனது ஆட்டம் இங்கேதான் தற்காலிக நிறுத்தம்.

நினைவுகளில் தொங்கும் நீர் ஊஞ்சலை அரபாத் திருகோணமலை மறை மாவட்ட குரு முதல்வர் வண. டீ. கிங்ஸ்லி றொபர்ட் அவர்களுக்கு டெடிக்கேட் பண்ணியதற்கான ஜஸ்டிஃபிக்கேஷனை கடந்து போன காலத்தோடு சேர்த்து சொன்ன போது “ஹேட்ஸ் ஓஃப் அரபாத்” என்று சொல்லிக் கொண்டேன்.

இலக்கியம் பேசுகின்ற பொழுதுகளில் நேரம் கடத்தப்படுவது தெரிவதே இல்லை…அந்த மாதிரித்தான் இன்றும்…..பேசிப் பேசித் தீர்த்து….பெரும் சந்தோஷத்தோடு பிரிந்து போது மாலை இருளின் டைட்டில் கடற்கரையில் ஓடிக் கொண்டிருந்தது. நேரமும் தூரமும் இலக்கியக்காரர்களுக்கு எப்போதுமே கணக்கில் இருந்தது கிடையாது.

இன்ஷா அல்லாஹ் மீண்டும் சந்திப்போம்…பேசுவோம்…..நமது வார்த்தைகளை அல்லாஹுத்தஆலா பொறுந்திக் கொள்ளட்டும்.

கிண்ணியா சபருள்ளாஹ்