அகம்-புறம் - COP SPEAK

"கிடைத்தற்கரிய பொக்கிஷம்" - Dinamani TamilNewspaper Article Published on 25.06.2015

noreply@blogger.com (Nataraj) — Thu, 25 Jun 2015 12:21:00 +0530

இனக்கலவரம் தூண்டுவது எளிது ஆனால் ஒற்றுமையை வளர்ப்பது கடினம். ஜீன் 17, இருபத்தியொரு வயதே நிரம்பிய டைலன் ரூஃப், தென் கரோலினாவில் கருப்பர்களுக்கான திருச்சபையில் நுழைந்து அநியாயமாக 9 பக்தர்களை துப்பாக்கியால் சுட்ட சம்பவம் அமெரிக்காவையே அதிர்ச்சியில் ஆழ்த்தியுள்ளது. இனக்கலவரம் மீண்டும் தலை தூக்குமோ என்ற பயம்.

மே மாதம் கராச்சியில் பஸ்ஸில் பயணித்த 43 இஸ்லாமியர்களை மூன்று பயங்கரவாதிகள் துப்பாக்கியால் சுட்டு கொன்றனர். இப்போது ஆப்கானிஸ்தானில் பாராளுமன்ற தாக்குதலில் ஆறுபேர் உயிரிழந்துள்ளனர். இத்தகைய வன்முறைக்கு என்ன காரணம்? டைலன் ரூஃப், மிகப்பழமையான ’மதர் இம்மானுவேல்’ என்ற கருப்பர்களின் சர்ச்சுக்கு கொலை செய்யும் நோக்கத்தோடு சென்றபோது பைபிள் வகுப்பு நடந்து கொண்டிருந்தது. கூடியிருந்தவர்கள் டைலன் ரூஃபை வரவேற்று உட்காரச் செய்தனர். அவர்களது கனிவான உபசரிப்பு அவனிடம் ஒரு கணம் மனமாற்றத்தை ஏற்படுத்தியது. ஆனால் நோக்கம் கருப்பர்களைக் கொன்று இனக்கலவரத்தை தூண்டுதல், அதையே குறிவைத்து பாதகச் செயலில் ஈடுபட்டான். ஒன்பது கருப்பர்களை சுட்டு வீழ்த்தினான்.

இவ்வாறு பயங்கரவாதத்தில் ஈடுபடுவர்கள் ஒரு வித மனநிலைக் குன்றியவர்கள். தன்னலம் மிகுதல், அதன் காரணமாக மனிதர்களை விரோதிகளாக பார்க்கும் மனோபாவம், ஒட்டுரவற்ற வாழ்க்கை, சமுதாயத்தின் மீது வெறுப்பு இவையெல்லாம் பயங்கரவாதிகளின் அடையாளங்கள்.

மனநிலை மாற்றம் என்பது ஒழுக்கமான வாழ்க்கை மூலமும் சிந்தனைகளை நேர்வழியில் ஒரு முகம்படுத்துதல் மூலம் ஏற்படும். ஐக்கிய நாடுகள் சபையில் கடந்த வருடம் செப்டம்பர் 27ல் உரையாற்றிய பிரதமர் பயங்கரவாதம் என்ற அழிவுப்பாதையை தவிர்த்து முன்னேற்றம் என்ற வளமைப் பாதையில் பயணிக்கவும், இயற்கையை நேச உணர்வோடு அணுகி அதன் வளங்களை எல்லோருடைய பயன்பாட்டிற்காக பகிர்ந்து கொள்வதின் அவசியத்தை வலியுறுத்தினார். இயற்கை வளமையும் சுற்று சூழலையும், சமுதாயத்தையும் நேச உணர்வோடு பார்க்கும் பக்குவத்தை ஏற்படுத்தவல்லது யோகா என்னும் உன்னத பயிற்சி. சிந்தனை, ஆழ்மன உணர்வு, செயல்கள் இவற்றை ஒருமுகப்படுத்துகிறது. செயல்களில் நிதானத்தை ஊக்குவிக்கிறது. சமுதாயத்தோடு ஒன்றி வாழும் மனப்பக்குவத்தை வளர்க்கிறது. உலக நாடுகள் யோகா தினம் அனுசரிக்க வேண்டுகோள் விடுத்தார்.

சர்வதேச அளவில் ஜீன் 21 ம் தேதி சக்தி தரும் சூரியன் அதிகமாக பிரகாசிக்கும் நாளில் யோகாதினமாக அனுசரிக்க வேண்டும் என்ற கோரிக்கையை ஐக்கிய நாடுகள் சபை டிஸம்பர் 11 2014ல் ஒருமனதாய் தீர்மானம் மூலம் அங்கீகாரம் அளித்தது. ஜீன் 21 உத்தராயணத்திலிருந்து தக்ஷிணாயத்திற்கு பிரபஞ்சம் சஞ்சரிக்கும் நல்ல நாளில் உலகெங்கிலும் யோகா தினம் அனுசரிக்கப்பட்டது இந்தியாவிற்குப் பெருமை.

தில்லியில் 35985 யோகா ஆர்வலர்கள், 84 நாடுகளிலிருந்து 21 ஆசனங்கள் 35 நிமிடம் செய்து உலக சாதனை நிகழ்த்தினர். கின்னஸ் சாதனை அளவுபடி இதுதான் பெரும் எண்ணிக்கை கொண்ட யோகா வகுப்பு. இரண்டாவது சாதனை 84 நாடுகளிலிருந்து ஆர்வலர்கள் பங்கு கொண்டது.

சாதனை ஒருபுறம் இருக்க சில எதிர்மறைக் குரல்களும் எழுந்தன. இந்துமத கோட்பாடுகள் கொண்ட யோகப் பயிற்சி மதச்சார்பின்மைக்கு எதிரானது என்பது தான் முக்கிய வாதம். யோகா பயிற்சி மதத்திற்கு அப்பாற்பட்டது. மனதையும் சிந்தனையையும் உடலோடு ஒருமுகப்படுத்துவது, கட்டுங்கடங்காத மனம் நினைவலைகளின் பாய்ச்சலை கட்டுக்குள் கொண்டுவருவது யோகப் பயிற்சி. இது எல்லா மனிதர்களுக்கும் எந்த மதத்தை சேர்ந்தவர்களாக இருந்தாலும் பொருந்தும். இஸ்லாம் தோழர்களின் ஐந்து முறை தொழுகை மனம் லயித்து செய்கிறார்கள். யோகா முறையில் இது வஜ்ராசன அமர்வு. யோகா பிரிவுகள் கர்ம யோகம், ஹட யோகம், அஷ்டாங்க யோகம், ஞான யோகம், பக்தி யோகம், லய யோகம். கிறிஸ்துவர்கள் பக்தி சிரத்தையுடன் ஆலயங்களுக்கு செல்வது மனதை கட்டுபடுத்தி ஜெபிப்பதும் ஒரு வித யோக நிலையே ஆகும். யோக பாதையை ஒரு வட்டத்திற்குள் அடைக்க முடியாது. அது எல்லைகளுக்கு அப்பாற்பட்டு ஒருவரை உன்னத நிலைக்கு அழைத்துச் செல்ல வல்லது.

முனிவர் பதஞ்சலி இயற்றிய யோக சூத்திரம் 196 யாப்புகள் கொண்டது. முதன் முதலாக அரேபிய மொழியில் ’அல்பரோனி’ என்ற அறிஞரால் மொழி பெயர்க்கப்பட்டது. அதன் பெயர் ‘கிதாப் பதஞ்சலி’. மொஹமத் கஜினி மொழிபெயர்ப்பிற்கு ஆணையிட்டதாக சரித்திரம்.

திருமூலர் திருமந்திரத்தில் யோகக் கலையைப்பற்றி ஆத்மார்த்தமாக உணர்த்தியுள்ளார். உடம்பார் அழியில் உயிரார் அழிவர், ஆதலால் உடம்பை வளர்க்கும் உபாயம் அறிவோம் உடம்பை வளர்ப்போம் உயிரை வளர்ப்போம் என்கிறார். ஏனெனில் உடம்பினுக்குள்ளே உறு பொருள், உலகத்தை ஆட்டிப்படைக்கும் சக்தி உள்ளது, அந்த உத்தம சக்தியிருப்பதால் உடம்பினை, செய்கைகளுக்கு உகந்ததாக பராமரிப்பதின் முக்கியத்துவம் உணரப்பட வேண்டும். யோக முறையின் மூலம் மனதையும் உடலையும் கட்டுக்குள் கொண்டு வரமுடியும்.

மன அழுத்தம் பலரை பாதிக்கிறது. மன அழுத்தம் நிறைந்த துறை காவல்துறை. அன்றாடம் பதட்டம் சூழ்ந்த உலகில் பணியாற்ற வேண்டிய பொறுப்பு காவலர்களுடையது. கொலை கொள்ளை, களவு, பேரிடர் தாக்கம், உயிரிழப்பு இவற்றையே நாள் தோறும் பார்த்து பிரச்சனைகளை கையாள்வது தீர்வு காண்பது என்பது மிகப்பெரிய சவால், உடல் ரீதியாகவும் மனரீதியாகவும் அழுத்தம் விளைவிக்கக் கூடிய பணி. பரபரப்போடு செயல்பட வேண்டும். உடனடியாக நடவடிக்கை எடுக்க வேண்டும். கால தாமதம் கூடாது. போக்குவரத்து நெரிசலில் பயணிப்பதே மன அழுத்தத்தை கொடுக்கிறது. அதைவிட பன்மடங்கு இறுக்கம் நிறைந்த ஓய்வில்லாத பணி காவலர் பணி.

யோகப் பயிற்சி காவல்துறைக்கு இன்றியமையானது. மன அழுத்தத்தை சீரமைக்கும் நிதானத்தை அளிக்கும். வாழ்க்கையின் அவலங்களை காணும் போது சபலங்களின் வலையில் விழாமல் நம்மையே பாதுகாத்துக் கொள்வது அவசியம். சபல வலையில் வீழ்ந்த பலர் காவல்துறையில் மீள முடியாத நிலையில் மடிந்த சான்றுகள் பல. இத்தகைய நோயாளிகளுக்கு யோகா ஒரு அருமருந்து.

சந்தர்பவசம் காரணமாகவும், ஏழ்மை, அறிவின்மையால் குற்றம் புரிபவர்கள் ஏராளம். இந்தியாவில் 1494 சிறைகள் உள்ளன. தமிழகத்தில் மட்டும் 134 சிறைகள். சராசரி எல்லா சிறைகளிலும் சுமார் நான்கு லட்சம் குற்றம் புரிந்தவர்கள் உள்ளனர். அவர்களில் பொரும்பான்மையோர் ஏதோ ஒரு விதத்தில் மனநிலை பாதிக்கப்பட்டவர்கள். குற்றம் புரிவதே மனநிலை பாதிப்பின் வெளிப்பாடு என்கிறார்கள் மனதத்துவ நிபுணர்கள். சிறைகளில் யோகா பயிற்சி பல தொண்டு அமைப்புகள் உதவியோடு நடத்தப்படுகின்றது. ஈஷா யோகா, வாழும் கலை அமைப்பு, சத்ய சாய், உலக அமைதிகாப்பகம் போன்ற பல தொண்டு நிறுவனங்கள் சிறை இல்லங்களில் யோகா பயிற்சியும் சுவாச அப்யாசங்களும் நடத்துகின்றன. குற்றம் புரிந்தவர்கள் திருந்தி சமவாழ்வில் சமுதாயத்தோடு இணைவதற்கான நல்லியல்புகளை பயிற்றுவிக்கும் இடம் சிறைச்சாலை.

யோகாவின் சிறப்பு என்னவென்றால் அந்த பயிற்சி நம்மை நாமே அறிந்து கொள்வதற்கு உதவுகிறது. தனித்திருந்து அமைதியாக மூச்சைக் கட்டுப்படுத்தி அமரும் போது ஒருவித சாந்தம் சூழ்கிறது. செய்த காரியங்களின் நல்லவை, கெட்டவை புலப்படுகிறது. பூரண தன்னிலை உணர்வு ஓங்கினாலே நேரான பாதையை அடையாளம் காட்டும், திருந்தி வாழ உத்வேகம் பிறக்கும். இது சிறைச்சாலை மட்டுமல்ல நமது அன்றாட வாழ்க்கையிலும் தவறுகளைக் களைந்து சீரான வாழ்க்கையை அமைத்துக் கொள்ள உதவும் என்பது உண்மை. யோக பயிற்சிக்குப் பிறகு பல இல்லவாசிகள் மனதிலிருந்து பாரம் இறங்கியது போல ஆனந்த கண்ணீர் வடித்ததைப் பார்த்திருக்கிறேன்.

யோகி ஜக்கி வாசுதேவ் அழகாக கூறுவார் இமாலய மலைத் தொடர், இந்துமஹா சமுத்திரத்திற்கு இடைப்பட்ட பகுதியில் வாழ்பவர்கள் இந்தியர்கள் என்ற மிகப்பெரிய சமுதாயக் கூட்டமைப்பு, அவர்கள் தொன்று தொட்டு வாழ்க்கையின் உண்மை நிலையை அறிவதற்காக பாடுபட்டனர். ஒரு கோட்பாட்டின் மீது நம்பிக்கையை விட இயற்கையின் பல பரிமாணங்களின் விந்தையை உணர்ந்து தெளிவதே வாழ்க்கையின் லட்சியமாகக் கொண்டவர்கள்.

சொர்கத்தை அடைவதை விட உன்னத விடுதலையே உயரிய குறிக்கோளாக கொண்டவர்கள் இந்தியர்கள் என்று அழகாக குறிப்பிட்டுள்ளார் ஜக்கி வாசுதேவ். யோக பயிற்சி அத்தகைய நிலையை உணர்வதற்கு வழிவகுக்கிறது. யாமம், நியமம், ஆசனம், ப்ராணாயாமம், நல் ஆகாரம், தாரணம், தியானம், சமாதி என்று எட்டு நிலைகள் வழியே நம்மை நாமே உயர்த்திக் கொள்ள உதவுகிறது.

மேற்கத்திய நாடுகளுக்கு யோகக் கலையை பரவச் செய்த மஹான் சுவாமி விவேகானந்தர். சிகாகோ நகரில் சர்வ மதங்கள் கூட்டமைப்பில் உலக ஒற்றுமைக்காக எல்லோரையும் கவரும் விதத்தில் சொற்பொழிவாற்றி இந்தியாவின் அருமை பெருமைகளை உலகிற்கு எடுத்துரைத்தார் விவேகானந்தர். யோகப் பயிற்சியின் உயர் நோக்கத்தையும் அது மனித சமுதாயத்திற்கு நல்லிணக்கம் ஏற்படுத்த வல்லது என்பதையும் உணர்த்தினார்.

வியட்நாம் யுத்தம், அமைதியின்மை நம்பிக்கையிழப்பு 1960,70 களில் பல நாடுகளில் இளைஞர்களை பாதித்தது. ‘போதும் என்ற மனமே பொன் செய்யும் மருந்து’ என்ற அடக்கமான வாழ்க்கை முறையை விரும்பும் இந்தியாவின் மீது மேல் நாட்டவர் பார்வை திரும்பியதில், யோகா என்ற தியான வழி பலரையும் கவர்ந்தது. மேலை நாடுகள் குறிப்பாக அமெரிக்காவில் யோகா பயிற்சி மையம் இல்லாத நகரே இல்லை என்ற அளவில் வளர்ந்துள்ளது. அமெரிக்காவில் சுய உதவியை ஓங்கச் செய்யும் சொற் பொழிவாளர் தீபக் சோப்ரா, யோகா அடுத்த தலைமுறையின் அடையாள மொழியாக உருவெடுத்துள்ளது என்று பெருமிதப்படுகிறார். இளைஞர்களுக்கு ஏற்றவாறு, ’பவர்’ யோகா, கலை யோகா, ’ஆத்லடிக்’ யோகா என்று பல வகையில் யோகாசனப் பயிற்சி அளிக்கும் மையங்கள் உருவாகியுள்ளன.

திருநெல்வேலி பத்தமடையில் பிறந்த குப்புசாமி என்ற தமிழர் மருத்துவர் பட்டம் பெற்று தமிழ்நாடு மலேசியாவில் டாக்டராக பணியாற்றி, 1924ம் வருடம் தியானம் புரிய ரிஷிகேஷ் அடைந்து துறவறம் பூண்டு சுவாமி சிவானந்தராக உருவெடுத்தார். சிவானந்த ஆசிரமக்கிளைகள் உலகில் பல நாடுகளில் உள்ளன. மக்கள் சேவை ஒன்றே தாரக மந்திரமாகக் கொண்ட இந்த அமைப்பில் யோகா பயிற்சி எல்லா இடங்களிலும் அளிக்கப்படுகிறது. சுவாமி சிவானந்தர் கூறியதாவது யோகா ஒருவரை நல்ல மனிதராக்குகிறது நற்செயல்கள் புரிய வைக்கிறது. உண்மைதான்!

யோகக் கலை அறிவுசார்ந்த முன்னோர்கள் தலைமுறை தலைமுறையாக பாதுகாத்து வளர்த்த கலை. ‘அன்மோல் விராசத்’ விலைமதிப்பற்ற பொக்கிஷம் இந்தியா உலகிற்கு அளித்துள்ளது.

Cyber Space: Tread Cautiously

noreply@blogger.com (Nataraj) — Thu, 19 Feb 2015 16:19:00 +0530

Cyber Space: Tread Cautiously

The year was 2012 and the incident took place in Mumbai. Two college girls after the death of a prominent leader posted a comment on Facebook that became the subject of controversy. The followers of the leader were infuriated by the comments and the Mumbai police had to register a criminal case against the girls. This in turn created a hue and cry that this section should not have been invoked for the innocuous expression of views on Facebook that were wrongly construed as expressions having criminal content. The Internet is all-pervading and social media has taken a grip on society. Electronic gadgets like the computer, laptop, audio and video systems have always fascinated the youth and there is hardly any youngster without a mobile phone. With the convenience such gadgets afford, there is also the flip side, the danger of misuse, which can land an individual in trouble. Financial fraud, defamation, offensive content, pornography, identity theft, online fraud have proliferated in cyber space necessitating the enactment of a special Act to deal with such offences. The Information Technology Act came into effect in 2000 and all police stations were empowered to deal with complaints. A simple definition of cyber crime would be ‘any unlawful act wherein the computer is either a tool or a target or both.’ Since youngsters use the gadgets most they should be aware of the pitfalls in the use of this sensitive electronic medium. Cyber crime has assumed great importance not just locally but internationally. Information is power and it is here this is used and misused. In 2011 we had the incident of Blackberry induced messages in London over the death of a youngster allegedly in a confrontation with the police. Riots broke out all over London and spread to various adjoining towns. In 2012 there was a disturbance in several parts of the Middle East, popularly referred as ‘Arab Spring’ when people revolted against the state over various issues of governance. In 2013 Delhi witnessed a disturbance to public order when the anti-corruption agitation demanding implementation of Lokpal led by Anna Hazare led to a riotous situation. Again it was messages through mobile phones and the Internet that gathered people. All this is a form of cyber crime as spreading disinformation, inciting people and engineering anarchy against a lawful government are all illegal activities. Sensitive data is stored on computers by several government and non-government organisations and hacking of such websites poses a huge security problem. Internet security and building fire walls to protect the privacy and integrity of material stored is yet another challenge. 2013 was the year of the mega breach when there was 62 per cent increase in data breaches compared to 2012 according to a government survey. There was also 91 per cent increase in targeted attacks. A new breed of activists in the cyber world, appropriately called ‘hacktivists’, emerged. ‘Spear fishing’ is another form of accessing individual data using emotional appeal to catch people off guard. We get many messages requesting an appeal be forwarded to many people, but it is a clever form of identity theft. Cyber space offers a convenient cover for terrorist organisations and their trans-national terrorist activities, as they cleverly use it to spread disinformation and coordinate terrorist activities. A glaring instance was the 26/11 Mumbai attack in 2008 when 166 people were killed. Identity theft to access net banking, economic offences and pornography are other major areas of cyber crime. US security organisations have identified over 5,000 terror sites and to meet this a specialised team of dedicated cyber warriors has been formed. India has 140 million, or 14 crore, Internet users and the annual growth is nearly 30 per cent. The overall software export of India in 2011-12 was in the range of $68.7 billion. Reported crime compared to the increasing volume of operations is small mainly due to lack of awareness. According to the national crime record data reported cyber related crimes averages 2,000 cases annually. Realising the inadequacy of laws and competency of enforcement agencies the government introduced an amendment to the Information Technology Act, which came into effect in 2009. Section 66(A) of the IT Act, a widely used provision, states that ‘sending any information through an electronic message that is grossly offensive or has menacing character and might cause insult, injury, criminal intimidation, enmity, hatred, or ill will, etc. or sending such mail intended to deceive or to mislead the addressee or recipient about the origin of such messages’. There have been instances of youngsters sending prank messages or offensive messages that would definitely attract the above provision. Pornography and child abuse websites are another growing crime in cyber space. Even visiting a child pornography site is an offence and Internet users have to be wary of the danger in encouraging such sites as a software enabled watch is maintained by enforcement agencies. A centre for COMPUTER EMERGENCY RESPONSE TEAM — CERT IN has been formed by Government of India to regulate Internet usage and to intervene in emergency without compromising the freedom of speech provided under Article 19 of the Constitution. Enjoyment of freedom has limitations and has to be exercised with due caution and responsibility. Cyber crime awareness and eternal vigilance alone can ensure safety and security.

ஊழலற்ற பாதை வகுப்போம்! Dinamani Article 10.11.2014

noreply@blogger.com (Nataraj) — Mon, 10 Nov 2014 13:24:00 +0530

உலகம் ஒரு கிராமம் என்றவாறு நாடுகளிடையே இடைவெளி குறுகி வருகிறது. பன்னாட்டு வணிக ஒப்பந்தம் மற்றும் உலக வணிகமயமாக்கலை தொடர்ந்து பல நாடுகள் இடையே பண்டம் பரிமாற்றல், தொழில் நுட்ப தொடர்பு சுலபமாக அமைந்துள்ளது.

“வெட்டுக் கனிகள் செய்து தங்கமுதலாம்

வேறு பல பொருளுங் குடைந்தெடுப்போம்

எட்டுத் திசைகளிலுஞ் சென்றிவைவிற்றே

எண்ணும் பொருளனைத்தும் கொண்டுவருவோம்” என்று உலக வணிகத்திற்கு அவன் காலத்தே பாரதி பாடி உரைத்தான். ஆனால் குடைதெடுக்கும் தங்கம் என்ன, பல களிமனங்கள் காற்றலைகள் என்று பஞ்ச பூதங்களில் ஊற்றெடுத்து ஆழிபேரலையாய் உருவெடுக்கும் ஊழலை இப்போது பார்த்தால் மனம் வெதும்பி பாடியிருப்பான்.

உலக வணிக முறை சீராக இயங்க தடங்கலாக இருப்பது ஊழல் என்பதை உணர்ந்த ஐக்கிய நாடுகள் சபை ஊழலை தடுக்கவும் தவிர்க்கவும் 1990ல் இருந்து கூட்டு முயற்சி பல கலந்தாய்வு கூட்டங்கள் மூலம் எடுத்துள்ளது. ஊழல் தடுப்பு உடன்படிக்கை 2003ம் ஆண்டு டிசம்பர் 9ம் நாள் கையெழுத்திட்டு டிசம்பர் 14 2005ல் பிரகடனப்படுத்தப்பட்டு அமலுக்கு வந்தது. இதுவரை 140 நாடுகள் ஒப்பந்தத்தில் கையெழுத்திட்டு தத்தம் நாட்டில் அமல்படுத்த துவங்கியுள்ளன. இந்தியா 2011ம் ஆண்டுதான் நாடாளுமன்றத்தில் வைத்து பிரகடனத்தை நிறைவேற்ற நடவடிக்கை எடுத்துள்ளது. பிரிட்டன் போன்ற பல நாடுகள் கையூட்டு தடுக்கும் சட்டம் (ப்ரைபரி ஆக்ட்) அமல்படுத்தியுள்ளது. இன்னும் லோக்பால், லோக் ஆயுக்தா, ஒருங்கிணைந்த ஊழல் தடுப்பு சட்டம் இந்தியாவில் விவாத அளவில் தான் பாராளுமன்றத்தில் உள்ளது. தனியார் முறைகேடுகளையும் ஒருமுகப்படுத்தும் சட்டம் விரைவிலே நிறைவேற வேண்டும்.

1964ம் ஆண்டு அரசு நடவடிக்கைகளில் ஊழலை தவிர்க்க எடுக்க வேண்டிய செயல் முறைகளை ஆராய்ந்து சந்தானம் தலைமையிலான கமிட்டி பரிந்துரைகளை அளித்தது. அதன் அடிப்படையில் உருவானதுதான் சிவிசி எனப்படும் மத்திய விழிப்பணர்வு ஆணையம். ஒவ்வொரு வருடமும் முக்கியமான ஊழல் தடுப்பு செய்தியை முன்நிறுத்தி அதற்கான விழிப்புணர்வை நாடெங்கிலும் எடுப்பதற்கு எல்லா அரசுத்துறைகளுக்கும் சிவிசி அறிவுறுத்தும், ஊழல் ஒழிப்பு உறுதிமொழியும் எடுக்கப்படும்.

2013ம் வருடம் அரசு தனது தேவைக்கான கொள் முதலில் வெளிப்படைத்தன்மையும், ஊழலற்ற முறையையும் கடைபிடிக்க வேண்டும் என்று அறிவுறுத்தியது. வளர்ச்சிப் பணிகளுக்காக அரசுதுறைகள் முலமாக கொள்முதல் மதிப்பு வருடத்திற்கு சுமார் ரூபாய் பனிரெண்டாயிரம் கோடி. இது நாட்டின் பொருளாதார வளர்ச்சிச் குறியீட்டில் முப்பது சதவிகிதம். இதில்தான் அதிக கவனம் செலுத்த வேண்டும். ஊழலற்ற நெறிமுறைகளை கடைபிடிக்க வேண்டும் என்ற நோக்கத்தில் சிவிசி இந்த பொருண்மையை முன் வைத்தது. எந்த அளவிற்கு விழிப்புணர்வு ஏற்படுத்தப்பட்டது அதன் விளைவாக ஊழல் குறைந்தன என்பது கேள்விக்குறி. காற்றலை, நிலக்கரி போன்ற இயற்கை வளங்கள் ஒதுக்கீட்டில் எழுந்த முறைகேடுகள் நீதிமன்றங்கள் பார்வைக்கு வந்துள்ளன.

எட்டு அத்தியாயம் 71 ஷரத்துக்கள் கொண்ட ஐநா உடன்படிக்கையில் எல்லா நாடுகளும் ஊழல் தடுப்பு முறைகளை மேம்படுத்தவும் நன்னெறி வழிகளுக்கு ஊக்கம் அளிக்கவும் வேண்டும் என்று அறிவுறுத்தப்பட்டுள்ளது. மேலும் வெளி நாடுகளில் பதுக்கி வைக்கப்படும் சொத்துக்களை மீட்க பரஸ்பர உதவி நல்க வேண்டும் என்று 54 1A பிரிவில் தெளிவாக உள்ளது. ஊழல் தொடர்பு சொத்துக்களை முடக்க நாடுகளுக்கிடைய சட்ட உதவி புரிந்துணர்வு ஒப்பந்தமும் இருக்க வேண்டும். பல ஆண்டுகளாக கலந்தாய்வு தொடர்ந்து நடந்து சர்ச்சைக்கு முடிவில்லாமல் இருந்தது. வளர்ந்து வரும் நாடுகளில் அரசியல் நிலையாமை, ராணுவ ஆதிக்கம் அரசு அதிகாரிகளின் வஞ்சகம் காரணமாக ஊழல் தறிகெட்டு ஊழல் பணம் பாதுகாப்பான நாடுகளில் பதுக்குவது தொடர்ந்து வருவதால் ஒரு கட்டத்தில் சொத்து மீட்பு முக்கியமான நடவடிக்கையாகிறது. கொள்ளையடிக்கப்பட்ட சொத்துக்களை மீட்க வழிவகை செய்யும் சர்வதேச சொத்து மீட்பு அத்தியாயம் ஐந்தில் உள்ளடக்கிய ஷரத்துக்கள் சேர்க்கப்பட்டதின் அடிப்படையில்தான் வளர்ந்து வரும் பல நாடுகள் இந்த உடன்படிக்கையில் ஒப்புதல் அளிக்க முன் வந்தன.

தற்போது மத்திய அரசு உச்ச நீதிமன்றம் ஆணையின்படி வெளிநாடுகளில் பதுக்கப்பட்ட கணக்கில் வராத பணத்தை மீட்க விஷேச விசாரணை குழாமை நீதிபதி ஷா தலைமையில் அமைத்துள்ளது. உச்ச நீதிமன்றம் இதில் எடுக்கப்படும் நடவடிக்கைகளின் முன்னேற்றதை முனைப்பாக கண்காணிக்கிறது. அதை விட முக்கியம் நாட்டில் புழங்கும் கணக்கில் வராத பணத்தை வெளிக் கொணரும் நடவடிக்கை.

ஊழல் தடுப்பு விழிப்புணர்வு வாரம் இரும்பு மனிதர் சர்தார் படேல் அவர்களின் பிறந்த ஜயந்தியை வைத்து நாடெங்கிலும் அனுசரிக்கப்பட்டு வருகிறது. இந்தியா சுதந்திரம் அடைந்த மறு வருடமே ராணுவத்திற்கு வாகனங்கள் வாங்குவதில் முறைகேடு பரபரப்பை ஏற்படுத்தியது. அப்போதே படேல் அவர்கள் பொது வாழ்வில் தரம் தாழ்ந்து வருவது பற்றியும், ஆளுமையிலும் நிர்வாகத்திலும் நடவடிக்கைகள் திருப்திகரமாக இல்லை, மனவேதனை அளிக்கிறது என்று தனது வருத்தத்தை தெரிவித்தார். நிலமையை சீர்செய்ய தேவை மாற்றம் ஆனால் வீண் சர்ச்சைதான் தொடர்கிறது என்றும் குறிப்பிட்டுள்ளார். அந்த சர்ச்சை முழுநடவடிக்கையின்றி இன்றும் தொடர்ந்து கொண்டுதான் இருக்கிறது!

இந்த வருடம் மத்திய விஜிலன்ஸ் கமிஷன் தொழில் நுட்பம் எவ்வாறு ஊழலை தவிர்க்க முடியும் என்பதை மையக் கருத்தாக அறிவுத்துள்ளது. அரசு நிர்வாகத்தில் பல சட்ட திட்டங்கள் உள்ளன. பல்வேறு துறைகளில் நிர்வாக நெறிமுறைகள் விதிகள் உள்ளன. அதனை புரிந்து கொண்டு அமல் படுத்துவதே அரசு ஊழியருக்கு பிரமிப்பை ஏற்படுத்தும். குழப்பமான விதிகளுக்கும் குறைவில்லை. இத்தகைய குழப்பமான விதிகள்தான் ஊழலுக்கு வித்திடுகிறது.

ஊழலை தவிர்ப்பதற்கு முதல் நடவடிக்கை விதிகளை சுலபமாக்குதல், தேவையற்றவையை நீக்குதல் எல்லோரையும் சமமாக பாவித்து விதிகளை நடைமுறை படுத்துதல். ஆனால் சுலபமாக்குவது சுலபமல்ல என்பதை கண்கூடாக பார்க்கிறோம். உதாரணமாக காவல்துறையில் புகார் கொடுக்க கணினி மூலமாக பதிவு செய்யும் திட்டத்தை நடைமுறைப்படுத்த இயலவில்லை. அரசு விதிகளை புரிந்து கொள்வதை ஜனரஞ்சக அறிவு எனலாம். எவ்வளவுதான் படித்திருந்தாலும் இந்த ஜனரஞ்சக நடைமுறை அறிவை அடைவது பிரம்ம பிரயத்தனம் என்றால் மிகையில்லை. சம்மந்தப்பட்ட துறைகளும் தங்களது உடும்புப் பிடியை லேசில் தளர்த்த மாட்டார்கள்.

இந்த சூழலில் தான் தொழில் நுட்பம் மக்களின் உதவிக்கு வரும் என்ற எதிர்பார்ப்பு உள்ளது. மத்திய விஜிலன்ஸ் கமிஷன் தொழில் நுட்பத்தை கடைபிடிக்க அரசுதுறைகளை அறிவுத்தியது வரவேற்றக்தக்கது. அன்னா ஹசாரே ஊழலுக்கு எதிராக பல போரட்டங்கள் நடத்தி மக்களின் கவனத்தையும் அரசின் பார்வையையும் இந்த முக்கிய பிரச்சனை மீது திருப்பினார். அதில் ஒரளவு வெற்றியும் கண்டார். தெய்வாதீனமாக அதே சமயம் சிஏஜியின் தலைவர் வினோத் ராயின் 2ஜி அறிக்கையும் ஹிமாலய ஊழலை மக்கள் முன் வைத்தது.

அன்றாட வாழ்க்கையில் மக்கள் எதிர்க் கொள்ளும் அரசு துறைகளில் சங்கடமின்றி சேவையைப் பெற தொழில் நுட்பம் அதிக அளவில் உதவியாக இருக்கும் என்பதில் சந்தேகமில்லை. வருவாய், காவல்துறை, கிராம நிர்வாகம், வட்டாட்சியர் அலுவலகம், பதிவுத்துறை, போக்குவரத்துத்துறை, பல்வேறு அன்றாட நடவடிக்கைகளுக்கு உரிமங்கள் மற்றும் சான்றிதழ்கள் வழங்கும் துறைகள், இவ்விடங்களில் தான் மக்கள் அதிகமாக அல்லல் படுகிறார்கள்.

ஜனத்தொகை அதிகமாக இருப்பதால் தேவைகளும் அதிகம். சம்பந்தப்பட்ட துறைகளுக்கு எண்ணிக்கைகளை சமாளிக்க முடியாத நிலை. இதனால் வேகமாக சேவையை பெற மக்கள் குறுக்கு வழி நாடுகிறார்கள். நப்பாசை பிடித்த ஊழியர்கள் சந்தர்பத்தை பயன்படுத்தி கை நீட்டுகிறார்கள் ஊழல் ஊடுருவுகிறது ஊழியர்கள் கை ஒங்குகிறது. ஒடுங்கும் அப்பாவி மக்கள் மேலும் ஒதுக்கப்படுகிறார்கள்.

மக்கள் நேராக எதிர்க் கொள்ளும் துறைகளில் கணினி மூலம் தகவல்களை பதிவு செய்து நடவடிக்கை எடுத்தல் மக்களுக்கு அரசின் சேவை சுலபமாக வந்தடையும். ‘இ-சேவா’ என்ற முறை பல இடங்களில் வழிமுறைகளை சுலபமாக்கியுள்ளது.

அரசு பணியாளர்கள் நியமனம், பணிமாற்றம், கல்வி நிர்வாகம், மருத்துவமனை நிர்வாகம் இவைகளில் நேரும் தவறுகள் நேர்முகமாக பாதிப்பு தெரியாது, ஆனால் அதன் விளைவின் அழுத்தம் அதிகம். பணியாளர் தேர்வில் வெளிப்படைத்தன்மையும் காலதாமதமின்றி தேர்வுகளின் முடிவுகள் பணிநியமன ஆணை அளித்தால்தான் நம்பிக்கை பிறக்கும். அரசுப்பணியாளர்கள் சுமார் முப்பது வருடம் பணியில் இருக்கக் கூடியவர்கள். அவர்களது தேர்வு நேர்மையாக நடந்தால்தான் அவர்கள் நேர்மையாக பணிபுரிவார்கள் என்று எதிர்பார்க்கலாம். நேர்காணலே கோணலாக இருந்தால் பணியும் சறுக்கல்கள் நிறைந்த கோணலான பாதையில்தான் செல்லும். சம்மந்தபட்ட துறையும் சரியும். கணினிமூலம் தகவல் பரிமாற்றம் நிர்வாக சீர்திருத்தம் வெகுமளவு சறுக்கல்களை தவிர்க்கும்.

தவறு செய்யும் அரசு ஊழியர்கள் மீது ஊழல் தடுப்புத்துறை மூன்று வகையாக குற்ற நடவடிக்கை எடுக்கிறது. கையும் களவுமாக கையூட்டு பெறும்போது பிடிப்பது ஒரு வகை. விதிகளை மீறி சட்ட விரோதமாக நடவடிக்கை எடுத்து லஞ்சம் பெறுவதை கோப்புகளை ஆராய்வது மூலம் கண்டுபிடித்து நடவடிக்கை எடுப்பது இரண்டாவது வகை. மூன்றாவது வருமானத்திற்கு அதிகமாக சொத்து சேர்த்தலை ஆராய்ந்து நடவடிக்கை எடுத்தல். முதல் இரண்டு வழிகளும் தவறு செய்யும் ஊழியரை ஊழல் குற்றத்தோடு நேராக இணைக்கும். மூன்றாவது வழியான வரவிற்கு அதிகமான சொத்து என்பது சுற்றி வளைக்கும் வழி. எந்த ஒரு நபரும் வீட்டில் உள்ள ஒவ்வொரு குந்து மணிக்கும் கணக்கு காட்டுவது முடியாத காரியம். அபாண்டமாக ஜோடனை செய்வதற்கும் நேர்மையற்ற புலன் விசாரணை அலுவலர்களுக்கு சந்தர்ப்பம் அளிக்கும். நேர்மையற்ற விசாரணையும் அதைத் தூண்டி துணை போவதும் ஊழலின் ஒரு பரிமாணம் தானே.

அரசு நிர்வாகம் கோப்புக்களோடு நின்றுவிடாது மக்களின் வாழ்க்கையை கோலமிட வல்லது. அன்றாட வாழ்க்கைக்கு இடையூறின்றி உதவிக்கரம் கொடுக்கும் அரசே வல்லரசு. மத்திய அரசில் உள்துறை,பாதுகாப்பு, தொழில்கள், உணவு,நிதி என்று ஐம்பத்தொரு அமைச்சகங்கள் உள்ளன. சிவிசி, மனித உரிமை என்று கண்காணிப்பு ஆணையங்கள் மத்தியிலும் மாநிலங்களிலும் எல்லா நேர்வுகளையும் பார்வையிடுகின்றன.

நிர்வாக மேல் மட்டத்தில் எடுக்கப்படும் முடிவுகள், சட்ட திருத்தங்கள், நாட்டின் இயற்கை வளங்கள் பயன்படுத்தல், அரசியல் சாசன கட்டமைப்பை பாதுகாத்தல் இவை அரசியல் திறம் சார்ந்தவை. இங்கு தொழில் நுட்பத்தைவிட நேர்மையான சிந்தனையும் மக்கள் பயன்பாட்டை உள்ளடக்கிய நோக்கமும் தான் முக்கியம். அவைதான் ஊழலற்ற பாதையை வகுக்கும்.

இந்தியர்களைத் துயிலெழுப்பிய அன்னி பெசன்ட்! - தினமணி கட்டுரை 16.10.2014

noreply@blogger.com (Nataraj) — Mon, 3 Nov 2014 15:14:00 +0530

அக்டோபர் மாதத்திற்கு என்ன ஒரு மகிமை! நாம் நேசிக்கும் பல மாமனிதர்கள் இவ்வுலகில் அடி வைத்த மாதம் என்ற பெருமை! நமது தேசத் தலைவர்கள் மகாத்மா காந்தி, லால் பகதூர் சாஸ்திரி ஜெயபிரகாஷ் நாராயணன், இரும்பு மனிதர் வல்லபாய் படேல், சுப்பிரமணிய சிவா பிறந்த மாதம் அக்டோபர். ஏன் வால்மீகியின் ஜெயந்தியும் புரட்டாசி மாதத்தில். நம் நாட்டிற்காக அர்ப்பணிப்போடு உழைத்த தேசிய தலைவர் அன்னி பெசன்ட் அம்மையாரின் ஜெயந்தி அக்டோபர் ஒன்று. ஆனால் அவரை நாம் அதிகம் நினைவில் கொள்வதில்லை.

1893-ம் ஆண்டு சுவாமி விவேகானந்தர் சிகாகோவில் உலக சமய மாநாட்டில் “சகோதர சகோதரிகளே” என்று தன் பேச்சைத் துவங்கி கூடியிருந்தவரின் ஆத்மார்த்த வரவேற்பை பெற்ற நிகழ்வை அந்த மாநாட்டிற்குச் சென்ற அன்னி பெசன்ட் நேரில் கண்டார். மனிதப் பிறவியின் நோக்கம் இந்த பிரபஞ்சத்தின் விந்தைகள், மதங்களின் நெறிகள் இவைகளுக்கான விடைகளின் தேடலின் முடிவு இந்தியாவில் கிடைக்கும் என்ற உணர்வு உதிக்க அதே ஆண்டு இந்தியாவின் தென்முனை தூத்துக்குடி துறைமுகத்தில் வந்திறங்கினர்.

அன்னி பெசன்ட் இளம்பருவத்தில் அனுபவித்த கஷ்டங்கள் வேறொருவருக்கு ஏற்பட்டிருதால் விரக்தியின் எல்லைக்கே சென்றிருப்பார். ஐந்து வயதில் தந்தை இறப்பு, சில வருடங்களில் சகோதரன் இறப்பு, இரு சிறு குழந்தைகளை வைத்து அன்னியின் தாயார் தனது உழைப்பால் இன்னல்களுக்கு இடையில் வளர்த்தது என்று அன்னியின் இளம் பிராயம் கஷ்ட ஜீவனத்தில் கழிந்தது. ஆனால் அதுவே மற்றவர்களுக்கு உதவுவதே வாழ்க்கையின் குறிக்கோள் என்ற ஒரு ஆழமான வைராக்கியத்தை அளித்திருக்க வேண்டும்.

வாழ்க்கையின் குறிக்கோள் என்ன என்ற தேடலில் இறங்கினாள். தான் சார்ந்திருந்த மதத்தின் இறுக்கமான கோட்பாடுகள் உறுத்தியது. உண்மையை தேடும் உள்மனதிற்கு ஏற்புடையதாக அமையவில்லை. இந்நிலையில் பத்தொன்பது வயதிலேயே ப்ராங்க பெசன்ட் என்ற போதகருடன் திருமணம். பத்தாம் பசலியான புகுந்த இடத்தில் நிம்மதியில்லை. அடுத்தடுத்து பிறந்த இரு குழந்தைகளின் உடல்நிலை பாதிப்பு, அவர்களை நலம் பெற வைப்பதில் மாதக்கணக்காக போராட்டம் என்று தொடர் கஷ்டங்கள். குடும்ப வாழ்க்கை சகிக்காமல் விவாகரத்து, குழந்தைகள் மீது உரிமை பெற கோர்ட்டில் வழக்கு, அன்புத்தாயாரின் மரணம் கொடுத்த வேதனை மதங்கள் மீது கொண்ட அவ நம்பிக்கையை மேலும் வலுப்படுத்தியது.

1872-ம் வருடம் பிளாவட்ஸ்கி அம்மையாரின் பிரம்ம ஞான சபையில் தன்னை இணைத்துக் கொண்டார். சோஷலிஸ கொள்கைகளில் அதிக பற்று கொண்டு ஃபேபியன் இயக்கத்தில் இணைந்து அப்போதைய உயர்ந்த சிந்தனையாளர்கள் பர்னாட் ஷா, பெர்ட்ராண்ட் ரஸ்ஸல், வெல்ஸ், வெர்ஜீனியா உல்ப். போன்றவர்களோடு சிந்தனைப் பரிமாற்றம் செய்து கொள்ளும் அரிய வாய்ப்பு கிடைத்தது. மனித பிறவி, மதம், அரசியல் சமுதாய ஏற்றத்தாழ்வு பற்றிய நிதர்ஸன உண்மைகள் அவரை மிகவும் பாதித்தது. சமுயத்தில் மனிதப்பண்பு உயரவேண்டும் மனித நேயம் நிலைப்பட வேண்டும் என்ற திடமான முடிவோடு பிரம்ம ஞான சுவையோடு இணைத்துக் கொண்டார்.

எவ்வாறு ராமகிருஷ்ணா பரமஹம்சருக்கு ஞான ஒளி சீடராக விவேகானந்தர் அமைந்தாரோ அதே போல் பிளாவட்ஸ்கி அம்மையாருக்கு அன்னி பெசன்ட் உண்மை தொண்டராக பிரம்ம ஞான சபையின் கொள்கைகளை இந்தியாவில் பல இடங்களுக்கு சென்று மக்களோடு பகிர்ந்து கொண்டதோடு அதே சமயம் இந்தியாவின் பழம்பெருமை, கலாச்சாரம் என்ற பொக்கிஷத்தை சுமந்து கொண்டு அதைப்பற்றி ஸ்மரணையின்றி கொத்த அடிமைகளாக வாழும் இந்தியர்களைக் கண்டு மனம் வருந்தினார்.

கல்வி மூலமாகத்தான் மக்களிடம் விழிப்புணர்வு ஏற்படுத்த முடியும் அதுவும் பெண் கல்வியின் அவலநிலை கண்டு கல்வி முன்னேற்றத்திற்கு பல முயற்சிகள் எடுத்துக் கொண்டார். 1898ம் ஆண்டு வாரணாசியில் பெண்களுக்கான கல்வி கூடத்தை நிறுவினார்.

காசியில் நிறுவப்பட்ட பள்ளி மற்றும் கல்லூரியை மையமாக வைத்து தர்பங்கா மஹாராஜா ராமேஸ்வர பிரதாப் சிங் தலைமையில் காசி இந்து பல்கலைக்கழகம் உருவாக அஸ்திவாரம் போடப்பட்டது. இந்து சமயத்தையும் இந்திய பண்பாட்டையும் அடிப்படையாகக் கொண்ட புதிய கல்வித்திட்டம் அவர் நிறுவிய பெண்கள் கல்லூரியில் 1904ம் அறிமுகப்படுத்தினார். அந்த கல்வித் திட்டம் பல்கலைக்கழகத்தின் அடிப்படை சித்தாந்தமாக அமைந்தது. 1921ம் வரும் காசி பல்கலைக்கழகம் பெசன்ட் அம்மையாரின் சேவையைப் பாராட்டி கொளரவ முனைவர் பட்டம் வழங்கி சிறப்பித்தது.

கல்வி பயில்வது பள்ளி கல்லூரியில் மட்டும் அல்ல வாழ்க்கையும், சூழலும் சுற்றமும் கல்வி புகட்டுகின்ற அதனை கிரகிக்க முயல வேண்டும் என்ற மூதுரையை முற்றிலும் அன்னி செயலாக்கியதினால்தான் அவர் மிகச்சிறந்த சிந்தனையாளர், எழுத்தாளர் பேச்சாளர் என்று பல பரிமாணங்களில் சோபிக்க முடிந்தது.

அன்னி பெசன்ட் முற்றிலும் தன்னை சமுதாயப்பணியில் அர்ப்பணித்தது மட்டுமல்ல உண்மையாகவும் தைரியமாகவும் கருத்துக்களை சமுதாயத்தோடு பகிர்ந்து கொண்டு விழிப்புணர்வு ஏற்படுத்தினார். அவரது கருத்து சுதந்திரத்தால் பல எதிர்ப்புகளை சந்திக்க நேர்ந்தது. அறிஞர் சார்லஸ் பிராட்லோவுடன் சேர்ந்து ஆண் பெண் மணம் புரிதல், கருத்தடை, ஜனத்தொகை அதிகரிப்பால் ஏழைகள் படும் இன்னல் இவை குறித்து இவர்களது மதசார்பற்ற கொள்கைகள், பிற்போக்கான மதபோதகர்கள் மாற்றத்தை சுயநலதிற்காக புறக்கணிக்கும் கனவான்களுக்கு அச்சுறுத்தலாக இருந்தது. நீதிமன்றத்தில் நாத்திகம் பரப்புவதாக அவதூறு வழக்கு தொடரப்பட்டது ஆறுமாதம் தண்டனை விதிக்கப்பட்டது. அதனால் அசரவில்லை அன்னி. மேல்முறையீட்டில் நிரபரதியாக வெளி வந்து, ஆண் பெண் உறவு, விவாகம் பற்றிய கருத்துக்களை துண்டு பிரசுரமாக வெளிட்டடார். அவை லட்சக்கணக்கில் விற்பனையானது. பல மொழிகளிலும் வெளிவந்தது.

முற்போக்கு சிந்தனை நிறைந்த அன்னி இந்தியாவிற்கு வந்தபோது இங்கிருந்த சமுதாய சூழலைக் கண்டு மாற்றம் கொண்டு வர வேண்டும் என்று விழைந்ததில் வியப்பில்லை. சமுதாய முன்னேற்றம், மாற்றம், விழிப்புணர்வு, ஆண் பெண் சம நோக்கு இவைகளை தனது துவக்கப்பணியாக தமிழ்நாட்டில் செயலாக்கியது தமிழருக்கு பாக்கியம். ‘மகன்கள் மகள்கள்’ என்ற அமைப்பை 1912ம் வருடம் ஏற்படுத்தி மகன் மகள் பாகுபாடின்றி குடும்பத்திலும் வெளி உறவுகளிலும் நடத்தப்பட வேண்டும் என்ற குறிக்கோளை வலியுத்தினார்.

இந்தியாவில் முதல் மாமன்ற உறுப்பினர் என்ற பெருமை கொண்டவர் டாக்டர் முத்துலட்சுமி ரெட்டி அவர்கள். இரு சமூக சீர்திருத்தவாதிகள் ஒருமித்த கருத்தோடு இணைந்ததில் வியப்பில்லை. இந்திய பெண்களின் நிலையை உயர்த்தவும் சமுதாய பிற்போக்கான பிணைப்புகளிலுருந்து பெண்களை விடுவிக்கவும் இந்திய மாதர் சங்கம் என்ற அமைப்பை 1913ம் வருடம் ஊருவாக்கினார். டாக்டர் முத்துலட்சுமியோடு இணைந்து பெண்களுக்கு சம கல்வி, ஆண்களுக்கு இணையான உரிமைகளை நிலைநாட்ட பல முயற்சிகள் மேற் கொண்டார்.

இந்தியா சுதந்திரம் பெற வேண்டும் அதற்கு போராட வேண்டும் என்ற எண்ணத்தை வித்திட்டவர் அம்மையார் அவர்கள். “இந்தியாவே விழித்தெழு” என்ற தனது கட்டுரைகளின் தொகுப்பினை 1913ம் வருடம் வெளியிட்டு அதன் மூலம் விடுதலைக்கான விழிப்புணர்வை நாடெங்கும் பரவச் செய்தார்.

நாட்டின் இளைஞர்களை ஒன்றிணைக்க ஒரு அமைப்பு தேவை என்று உணர்ந்து இந்திய இளைஞர்கள் சங்கம்(YMIA) 1914 வருடம் துவங்கினார். எவ்வாறு உடற் பயிற்சிக் கூடம் மூலம் உடலை வலுவடைச் செய்கிறோமோ அதுபோல, கல்வி, விவாதம் மூலம் சீரிய குடிமகனாக அரசியல் உணர்வோடு உருவாகும் மையமாக இச்சங்கம் வளர்ந்திட வேண்டும் என்பதை குறிக்கோளாக வைத்தார். இச்சங்கம் இப்போது நூற்றாண்டு சேவையை கொண்டாடுகிறது.

“சுயாட்சி பேரியக்கம்” என்ற விடுதலை போராட்டத்தை சென்னையில் துவக்கியதற்கு பேருதவியாக இருந்தவர் பாலகங்காதர திலக் அவர்கள். விடுதலை வீரர் தாதாபாய் நௌரோஜி தலைவராக செயல்பட்டார். அடையார் ஆலமரம் போல அன்னி பெசன்ட் தூவிய விடுதலை விருட்சத்தின் விழுதுகள் நாடெங்கும் விழுந்தன. மூதறிஞர் ராஜாஜி,
சர் சி.வி. ராமசாமி, வி.கலியாண சுந்தரனார்,சுப்பிரமணிய ஐயர், இந்து பத்திரிகை ஆசிரியர் கஸ்தூரி ரங்கன் போன்றோர் சென்னையிலும், மோதிலால் நேரு, சாப்ரூ, தாஸ் போன்ற பல பெருந்தலைவர்கள் அகில இந்திய அளவிலும் முனைந்து செயல்பட்டனர். அன்னையின் சுதந்திர முழுக்கம் பல இடங்களிலும் ஒலித்தது. பிரிட்டிஷ் அரசு 1917 ஜுன் மாதம் அன்னையை சிறையிலிட்டது. ஆனால் எதிர்ப்பு மேலும் வளர்ந்தது. அன்னை சிறையிலிருந்து விடுவிக்கப்பட்டார்.

அகில இந்திய காங்கிராஸ் தலைவராக 1917-ம் வரும் கல்கத்தாவில் நியமிக்கப்பட்டார். காங்கிரஸ் கட்சியின் முதல் பெண் தலைவர் அன்னி பெசன்ட் தான் என்பது குறிப்பிடத்தக்கது.

அன்னையின் மனித வாழ்க்கையின் தாத்பரிய தேடல் பிரம்ம ஞான சபையில் ஐக்கிய மானதில் முடிவுற்றது. பிரம்ம ஞான சபை தலைவராக 1907ல் இருந்து மதங்களின் ஒற்றுமைக்காக பாடுப்பட்டார். உண்மை நெறி நேர்மையான பாதை மனித நேயம்,சகோதரத்துவம் இவைதான் பிரம்ம ஞான சபையின் கொள்கைகள். அவைதான் எல்லா மதங்கள் சங்கமிக்கின்ற கோட்பாடுகள்.

அன்னை இந்தியாவையும் இந்தியர்களையும் வெகுவாக நேசித்தார். மகாத்மா காந்தி அவர்கள் அன்னி பெசன்ட் தான் இந்தியர்களை நீண்ட துயிலிலிருந்து தட்டி எழுப்பி சுதந்திர உணர்வை செலுத்தினார் என்று பாராட்டியுள்ளார். தமிழறிஞர் திருவிகா அவர்கள் அம்மையாரால் வெகுவாக கவரப்பட்டார்.

“அம்மையாரின் கிளர்ச்சி என்னுள் கனன்றுக் கொண்டிருந்த கனலை எழுநாவிட்டு எரியச் செய்தது. வெஸ்லி கல்லூரிப் பணியை விட்டு விடத் தூண்டியது. தேசபக்தன் இதழ்க்கு ஆசிரியனாக்கியது. தொழிலாளர் இயக்கத்தில் ஈடுபாடு கொள்ளச் செய்தது. மொத்தமாகச் சொல்ல வேண்டுமானால் என் வாழ்க்கைப் போக்கையே மாற்றி அமைத்தது. என வாழ்க்கைப் போக்கை முற்றிலும் மாற்றி அமைத்த அன்னி பெசன்ட் எனக்கு அன்னை வசந்தை ஆனார்.” என்று மனம் நெகிழ கூறியுள்ளார்.

புனித அக்டோபர் மாதத்தில் “சான்றோர்களை போற்றுதும்” என்று காலச்சுவட்டில் தன் வாழ்வை அர்ப்பணித்த காந்தி, அன்னி பெசன்ட், சாஸ்திரி, ஜெய பிரகாஷ், படேல் போன்றவரை நினைவு கூர்வோம். அவர்கள் சமுதாய இன்னல்களுக்கு எதிராக போராடினார்கள் வெற்றி கண்டார்கள். ஆனால் நமது சுணக்கத்தால் சமுதாயத்தை வலுவிழக்கச் செய்யும் காளான்களாக முளைத்துள்ள சாதி மத பேதம், பாலியல் கொடுமை, குழந்தைகள் வன்கொடுமை நமக்கு சவாலாக இருக்கின்றன.

நாலாந்திர நடிகர்களை பின் தொடர்கிறோம் ஒரு கைலாஷ் சத்யார்த்திக்கு நோபல் பரிசு கிடைத்தபிறகுதான் யார் இந்த இந்தியர் என்று அறிய முற்படுகிறாம். குலையும் சமுதாய மதிப்பீடுகள் முகத்தில் அடிக்கிறது.

இன்னொரு அன்னை வசந்தை, காந்தி, சாஸ்திரி, காமராஜ் அம்பேத்கர் வரமாட்டார்கள். அவர்கள் இட்டுச் சென்ற பாதையில் உபாதைகள் முளைக்காமல் கண்காணித்தலே நாம் செய்யக்கூடிய மிக பெரிய சமூக சேவை.

கைப் பொருள் கல்வியே! -தினமணி நாளிதழ் கட்டுரை தேதி 23.09.2014

noreply@blogger.com (Nataraj) — Tue, 23 Sep 2014 13:19:00 +0530

ஒரு நல்ல பள்ளி இரு வகையாக உருவாகலாம். சாதாரணமாக நடக்கக்கூடியது கடவுளே வந்து அமைத்துக்கொடுப்பது அகஸ்மாத்தாக நடக்ககூடியது சம்பத்தப்பட்டவர்கள் எல்லோரும் ஒத்துழைத்து நிறுவுவது! எதிலும் ஒத்துழைப்பை பெறுவது எவ்வளவு கடினம் என்பதை உணர்த்தும்

பொய்யுரை இது! ஆனால் ஒத்துழையாமை நடைமுறையில் நற்பள்ளிகள் உருவாகுவதில் தடங்கலாக உள்ளது என்பது நிதர்சனம்.

.
சமீபத்தில் கல்வித்துறை அதிகாரிகள் நடத்திய ஆய்வில் நமது பள்ளிகளில் மாணவர்களின் செயல் திறன் , புரிதல், கற்றதை வெளிப்படுத்தும் திறமை மோசமாக உள்ளது என்ற அதிர்ச்சியூட்டும் தகவல் வெளிவந்துள்ளது. மாணவர்களுக்கு எழுத்துக்கூட்டிக்கூட தமிழில் படிக்க வரவில்லை .ஆங்கிலம் கேட்கவே வேண்டாம் . ஆய்வில் நகர் புறத்து இளஞர்கள் ஓரளவு பரவாயில்லை, ஆனால் தர்மபுரி, கிருஷ்ணகிரி விருதுநகர் போன்ற மாவட்டங்களில் மாணவர் திறமை மிக குறைவாக இருப்பது கவலைக்குரிய விஷயம்.

புகழ் பெற்ற ஹார்வேர்டு பல்கலை கழகம் ஆராய்ச்சியாளர் மைக்கேல் க்ராமர் இந்தியாவில் ஆரம்ப பள்ளிகளில் உள்ள தரத்தை ஆய்வு செய்தார். உலக வங்கி பிரதினிகள் அடங்கிய குழுவோடு இந்த ஆய்வு 2003 ஆண்டு மேற்கொள்ளப்பட்டது. ஆய்வில் சராசரி நான்கு ஆசிரியர்களில் மூன்று ஆசிரியர்கள் ஆரம்ப பள்ளிகளில் வருவதில்லை, பணிக்கு வரும் இரண்டில் ஒரு ஆசிரியரும் பாடம் நடத்துவதில்லை என்ற உண்மையை கல்வியாளர்களுக்கு தெரிவித்தனர். நாட்டில் சுமார் பதினைந்து லட்சம் ஆரம்ப பள்ளி ஆசிரியர்களில் ஐம்பது சதவிகிதம் சரியாக போதிப்பதில்லை என்றால் குழந்தைகளின் எதிர்காலம் அவர்களின் அறிவு வளர்ச்சி எவ்வாறு இருக்கும் என்பதை யூகிக்கலாம். பல பள்ளிகளில் நியமனம் செய்யப்பட்ட ஆசிரியர் வேறு ஒருவரை குறைந்த தொகைக்கு அமர்த்திவிட்டு தான் சொந்த வியாபாரத் தொழில் செய்யும் அவல நிலையும் நடக்கிறது . தர்மத்தை போதிக்கும் ஆசிரியர்களே அதர்ம வழியில் சென்றால் சமுதாயம் எந்த நிலையில் இருக்கும்? தர்மம் என்பது தனி மநித உணர்வு மட்டுமல்ல சமுதாயம் மற்றும் அரசியல் நற்பண்பின் பிரதிபலிப்பு , எந்நிலையிலும் கடமை என்னும் தர்மத்தை புறக்கணிக்கலாகாது.

பள்ளிக்கூட சீர்திருத்தம் நாட்டில் உள்ள எல்லோரது பொறுப்பும் முக்கிய பணியுமாகும் என்ற கிரேக்க நாட்டு அறிஞர் ப்ளோட்டோ அறிவுரை இன்றும் பொருந்தும். ஒழுக்கம் கட்டுப்பாடு தார்மீக பணி காவலர்க்கும் ஆசிரியருக்கும் மிக அவசியம். அது கற்றுக்கொடுத்து வருவதில்லை. நன்னடத்தை மூலம் பழக்கத்தில் வரவேண்டும். அலக்ஸாண்டரின் நல்லாசிரியர் அரிஸ்டாட்டிலின் கூற்றுப்படி எவ்வாறு ஒரு சங்கீதம் பயிலப்படுகிறதோ அவ்வாறு நல்லொழுக்கமும் தினந்தோறும் நடத்தை மூலம் பயில வேண்டும்.
கல்வியின் நோக்கம் தெரியாததை அறிவது மட்டுமல்ல எவ்வாறு வாழ்க்கையில் நன்னெறிகளை கடைபிடிப்பது அவ்வழியில் நடப்பது என்பதை பயிற்றுவிக்கும் தளம் பள்ளிக்கூடம். படித்த பண்டிதர்கள் நடமாடுகிறார்கள், ஆனால் நன்னடத்தையுடைய பண்பாளர்கள் இல்லையே என்ற கவி தாகூரின் அங்கலாய்ப்பு இன்றும் பொருந்தும்.

இங்கிலாந்தில் சமீபத்தில் கல்வியின்.தரத்தை உயர்த்த ” டாலண்ட் ரேய்டிட்” திறனை அதிரடியாக கண்டுபிடி என்ற தலைப்பில் ஆய்வு நடத்தப்பட்டது. அதில் பள்ளிகளை, மாணவர் சேர்க்கை, அவர்கள் பெற்ற மதிப்பெண் அதன் அடிப்படையில் தரம் வாரியாக பிரித்து எவ்வாறு சில பள்ளிகள் சிறப்பாக செயல்படுகின்றன , பின் தங்கும் பள்ளிகளின் பின்னடைவுக்கு காரணம் என்ன எவ்வகையில் தரவுயர்வு நடவடிக்கை மேற்கொள்ள வேண்டும் என்ற கொள்கை அறிக்கை தயாரிக்கப்பட்டு வெளியிடப்பட்டது. முக்கியமாக கணிதம் ஆங்கிலம் இவ்விரண்டில் எவ்வளவு மதிப்பெண் மாணவர்கள் பெற்றிருக்கிரார்கள் என்பதின் அடிப்படையில் தரம் பிரிக்கப்பட்டு பின்னடைவடையும் பள்ளிகளுக்கு சிறப்பு கவனம் செலுத்தி முன்னேற்றம் அடையச்செய்வது அடிப்படை செயலாக்கமாக வைத்தது நல்ல பலனை அளித்துள்ளது. பள்ளியில் சேர்க்கப்படும் மாணவர்களின் சமுதாய சூழல், பெற்றோர்களின் வருமானம், அவர்களது படிப்பறிவு மாணவர்களின் செயலாற்றலில் வெளிப்படும். உதாரணமாக பொருளாதாரம் குறைந்த இடம் , கல்வி பயிலும் முதல் தலைமுறை இவற்றை கருத்தில் கொண்டு பள்ளியின் தரத்தை நிர்ணயித்து அதற்கு ஏற்றவாறு வசதிகள் விசேஷ பயிற்சி அளிக்கப்படவேண்டும்.

மாணவர்கள் பெறும் மதிப்பெண் நூறு சதவிகிதம் தேற்சி இதை மட்டும் கணக்கில் கொண்டு ஆசிரியர்களை பாராட்டுவதும் இல்லை சாடுவதும் தவறான அணுகுமுறை. ஒரு பள்ளியில் நடந்த உண்மை சம்பவம். அந்த பள்ளியில் மாணவர்கள் சரியாக வருவதில்லை பல ஆசிரியர்கள் முயன்றும் மாணவர்களை வழிக்குக் கொண்டு வரமுடியவில்லை. இம்மாதிரி நிலை சில பள்ளிகளில், ஏன் பல பள்ளிகளில் சில வகுப்புகளில் பார்க்கமுடியும். ஆனால் பல ஆசிரியர்கள் செய்யமுடியாததை ஓராசிரியர் செய்து வெற்றி கண்டார். படிப்பில் பின் தங்கிய மாணவர்கள் தேர்வில் வெற்றிப் பெற்றது மட்டுமல்ல வாழ்க்கையிலும் பணியிலும் முத்திரை பதித்தனர். வெற்றிக்குக் காரணமாக இருந்த நல்லாசிரியரை கேட்டபோது அவர் தான் ஒன்றும் விசேஷமாக செய்யவில்லை, பின் தங்கிய மாணவர்களுக்கு தன்னம்பிக்கை கொடுத்தேன், அவர்கள் மீது நம்பிக்கை வைத்தேன் அன்பும் பரிவும் காட்டினேன் வழி நடத்தினேன் என்றாராம். இதுதான் கற்றலில் இனிமையை புகட்டும் சூக்ஷமம். பள்ளியில் சேரும் எல்லா பிள்ளைகளும் நல்ல பிள்ளைகள் தான் அவர்கள் வெற்றி பெறுவதும் தோல்வி அடைவதும் ஆசிரியர் வழிநடத்தலிலே என்பது உண்மை.

கட்டாய அடிப்படை கல்வி அடிப்படை உரிமையாக அரசியல் சாசனத்தில் மாற்றம் கொண்டுவரப்பட்டு சட்டமும் இயற்றப்பட்டுவிட்டது , கல்வி உரிமை சட்டப்படி 25 சதவிகிதம் பொருளாதாரத்தில் பின் தங்கியவர் பிற்படுத்தப்பட்ட மாணவர்கள் சேர்க்கப்படவேண்டும் , ஆனால் ஏனோ நடைமுறை படுத்துவதில் சிக்கல். முக்கியமாக சம்பத்தப்பட்ட துறையிலிருந்து மானியம் பெறுவதில் தாமதம், வசதிபடைத்தவரின் எதிர்ப்பு போன்ற பிரச்சனைகள். சில ஐரோப்பிய நாடுகளில் பின் தங்கிய வகுப்பினருக்கு கல்வி மானியம் கடவு சீட்டுகளாக கொடுக்கப்படுக்கின்றன. அதை வைத்து எந்த பள்ளியிலும் சேரலாம் கல்வி நிர்வாகம் கடவுசீட்டை வங்கியில் கொடுத்து கல்வி கட்டணத்தை பெறலாம். இம்முறையில் கல்வி நிர்வாகமோ பெற்றோரோ யாரிடமும் கையேந்த வேண்டியதில்லை , கையூட்டு பிரச்சனையும் இருக்காது.

கிராமங்களில் உள்ள ஆரம்ப பள்ளிகளில் ஓரளவு வயிற்றுக்கு உணவு கிடைக்கிறது செவிக்கு உணவு கிடைப்பதில்லை என்ற நிலை மாற வேண்டும். கட்டாய கல்வி கட்டாந்தரை கல்வியாகக் கூடாது. பள்ளிகளில் உள்ள கட்டமைப்பு மேம்படுத்த வேண்டும். பள்ளி தேர்வுகளில் மாணவிகள் மாணவர்களைவிட பிரகாசிக்கிரார்கள், ஆனால் பல கிராமங்களில் மாணவி பூப்பெய்தினால் மஞ்சள் நீராட்டு, பள்ளிக்கு கால்பூட்டு எப்போது மாறும்?. கல்விப் புரட்சியில் இருந்து இடைநிலையில் நீங்குபவர்கள் எண்ணிக்கை எடுத்தால் சிறுமிகளே அதிகம். அதிலும் பழங்குடியினர் முஸ்லிம் பெண்கல்வி இன்னும் குறைவு.

மாற்றுத்திறனாளி மாணவ மாணவியர் பிரச்சனைகள் பல. “ பிச்சை புகினும் கற்றல் நன்றே” என்பதன்றி கற்பதை விட பிச்சை நன்றே என்றாகி விட்டது மாற்றுத்திறனாளிகளுக்கு விசேஷ பள்ளிகள் குறைவு, ,இருப்பவை அருகில் இல்லை. பார்வை, பேச்சு, கேட்புத்திறன் குறையுள்ள மாணவர்களையும் சாதாரண பள்ளிகளில் சேர்க்க வகை செய்ய வேண்டும்.. அமரிக்காவில் ‘டஸ்கீ’ என்ற பள்ளியில் வாரம் ஒரு நாள் சாதாரன மாணவர்களுக்கும் செயற்கை ஊனம் செய்து ஊனத்தின் வலியை உணரச்செய்வார்களாம். நலிவுற்றவர்களுக்கு உதவும் மனப்பக்குவம், மனித நேயம் வளர்க்க வித்தியாசமான அணுகுமுறை .

இது தவிர கல்வி போதனையில் நீதி போதனை, உடற்கல்வி இல்லாத மனப்பாட தேர்வுக்கல்வி, ஏட்டு சுரக்காய் கரிக்குதவாது என்ற நிலை எப்போது மாறும்? தேர்வு ஒரு சடங்காகி விட்டதே, தேர்வில் அதிக மதிப்பெண் பெற உத்திரவாதம் தரும் பணம் பறிக்கும் கல்விக்கூடங்கள் புற்றீசல் போல் வளர்ந்துவிட்டதே இதற்கு ப்ளாட்டோ கூறியது போல் நாம் தானே பொறுப்பேற்க வேண்டும்!

ஆசிரியர் தினத்தன்று மாணவர்களுடன் கலந்துரையாடலில் பிரதமர், பி ஏ, எம் ஏ படித்த பட்டதாரிகளிடம் ஏதாவது வேலை செய்யக்கூடிய செயல் திறன் இல்லை என்ற முக்கிய கருத்தினை பகிர்ந்து கொண்டார்கள். புத்தகக் கல்வி மட்டும் போதாது புதியதை பயின்று சுய புத்தாக்கம் அவசியம் வாழ்க்கையில் முன்னேற என்பதை பிரதமர் தனது உரையில் வலியுறுத்தினார்.

கல்லூரிகளை எடுத்துக்கொண்டால் தரமான விரிவுரையாளர்கள் பற்றாக்குறை இன்னும் அதிகம். வேலைக்கு உத்திரவாதம் தரும் என்று மாணவர்களை மயக்கி பாட திட்டத்தை சிறிது மாற்றி பட்டப்படிப்பு என்ற சம்பிரதாய கல்வியால் யாருக்கு லாபம்? கல்லூரிக்கு படிக்க வருகிறார்களா அடிக்க பழக வருகிரார்களா என்ற சந்தேகம் எழுகிறது. நாட்டில் உள்ள பல கல்லூரிகளில் காம்பஸ் வையலன்ஸ் என்ற வன்முறை கலாச்சாரம் எப்போது ஒழியுமோ, கல்லூரி தேர்தல் அரசியல் தேர்தல் போல் நடக்கிறது. காலத்தின் அருமை தெரியாமல் இளமை பருவம் வீணாகிறது.

ஆப்பிள் கணினி நிறுவுனர் ஸ்டீவ் ஜாப்ஸ் கூறுவார் ஒரு திட்ட நிறைவேற்றலுக்கு எல்லாமூலதனைத்தவிட மிக முக்கியமான மூலதனம் நேரமும் காலமும். நேரத்தை எவ்வாறு பயனுள்ளவாறு செலவு செய்கிரோமோ அதில் தான் நமது வளர்ச்சி அமையும்.

நமது நாடு தொழில் மற்றும் பொருளாதார முன்னேற்றம் அடைந்து உலகில் வல்லரசாக வளர வேண்டும் என்றால் மனித வளமேம்பாட்டிற்கு கவனம் செலுத்துவது அவசியம். தரமான கல்வி அடிப்படை கல்வி அடித்தட்டு மக்கள் வரை பெற வேண்டும். உலகின் முப்பது சதவிகித் படிப்பறிவில்லாத மக்கள் இந்தியர்கள் என்பது பெருமைக்குரிய குறியீடல்ல. பதினைந்து சதவிகிதம் மாணவர்கள் தான் மேல் நிலை பள்ளி செல்கிறார்கள். அதில் ஏழு சதவிகிதம் பட்டப்படிப்பு முடிக்கிறார்கள். உலக மேற்படிப்பு தர வரிசையில் நமது நாட்டு கல்விக்கூடங்கள் இடம் பெறவில்லை.

நமது இளைய தலைமுறைக்கு நாம் கொடுக்கவேண்டியது பொன் அல்ல மண் அல்ல கல்வி செல்வம் ஒன்று தான்.

“ கல்லா வறியர்க்கு கைப்பொருள் கல்வியே!

இல்லை என்பது கல்வி இல்லாமையே உடையவர் என்பவர் கல்வி உடையவரே” என்ற பாரதிதாசன் பொன்மொழிக்கேற்ப காலத்தை அருமை கருதி தரமான கல்வி விரைந்தளிக்க முனைந்து செயல்படுவோம்.

நீர்மலமே பொதுநலம் - தினமணி கட்டுரை 4.08.2014

noreply@blogger.com (Nataraj) — Mon, 4 Aug 2014 17:22:00 +0530

வறுமையின் எதிர்மறை செல்வமா என்றால் செல்வமல்ல, நீதியும் நியமும் தான் வறுமையை வெல்ல வல்லது என்பது தான் உண்மை.

2011-ன்படி ஜனத்தொகை கணக்கெடுப்பில் ஒரு முக்கியமான புள்ளிவிவரம் கொடுக்கப்பட்டுள்ளது. 67 சதவிகிதம் கிராம குடியிருப்புகளில் உள்ளவர்கள் வெட்ட வெளியில்தான் வெளிக்க வேண்டிய அவல நிலை நமது நாட்டில் தொடர்கிறது. எந்த ஒரு பிரச்சனை எடுத்துக் கொண்டாலும் அதிகமாக பாதிக்கப்படுபவர்கள் ஏழைகள், ஒடுக்கப்பட்டவர்கள் என்பதற்கு இது மேலும் ஒரு எடுத்துக்காட்டு.

நகரங்களில் சகட்டு மேனிக்கு மக்கள் இயற்கை அழைப்பிற்கு பொது இடங்களில் ஒதுங்கிவிடும் அருவருப்பான காட்சி சகஜமாகிவிட்டது. “இங்கு மலம் கழிக்கக் கூடாது” என்று எச்சரிக்கையிட்ட இடங்களிலேயே கூச்சமின்றி இருந்துவிடுகிறார்கள். இதில் ஏழை பணக்காரர்கள் என்ற பாகுபாடு இல்லை. பல லட்சம் பெறுமான காரை நடுரோட்டில் நிறுத்திவிட்டு நடைபாதையில் அசுத்தம் செய்வது, குழந்தைகளை உட்கார வைக்கும் நாகரிக பெண்களையும் பார்க்கலாம்.

2011 ஆண்டு ஜனத்தொகைக் கணக்கெடுப்பின்படி 16.78 கோடி குடியிருப்புகளில் 11.30 கோடி குடியிருப்புகளில் கழிப்பறை வசதியில்லை என்று தெரியவந்துள்ளது. ஜார்கண்ட் மாநிலத்தில் 91.67% கிராம குடியிருப்புகள், சட்டிஸ்கர் மாநிலத்தில் 85.15% கிராம குடியிருப்புகளில் கழிப்பறை வசதி இல்லாதது மட்டுமல்ல அந்த மாநிலங்களில் பொது கழிப்பறை வசதியும் செய்யப்படவில்லை என்றும் தெரியவந்துள்ளது.

திறந்த வெளி அசுத்தமாவதால் அந்தந்த சுற்றுப்புறம் சுகாதாரமற்ற நிலைக்கு தள்ளப்படுகிறது. சென்னையில் சுற்றுலா பொருட்காட்சி மையம் அருகில் உள்ள பிரதான சாலை முத்துசாமி பாலம் அகலமான நடைபாதை உள்ளது. ஆனால் அதில் நடக்க முடியாது. பார்க்க சகிக்காத காட்சி.

ஊட்டச்சத்து குறைவால் இந்தியாவில் உள்ள 45 சதவித குழந்தைகள் பாதிக்கப்பட்டுள்ளார்கள் என்று சில வருடங்களுக்கு முன் பாராளுமன்றத்தில் தெரிவிக்கப்பட்டது. இதற்கு முக்கிய காரணம் பொது சுகாதாரத்தில் உள்ள குறைபாடுகள் மற்றும் திறந்த வெளி கழிப்பிடங்கள்.

இத்தகைய திறந்த வெளிதான் தெரிந்த வழி என்ற நிலை குடிசைவாழ் மக்களை மட்டுமல்ல எல்லோரையும் பாதிக்கிறது. திறந்த வெளி அசுத்தங்களிலிருந்து பரவும் கிருமிகள் சொகுசான ‘அமுல்பேபி’ மாடி வீட்டுக் குழந்தைகளையும் தாக்கும். தாயின் கருவில் இருக்கும் வரை குழந்தையை நன்கு வளரச் செய்து நோய் எதிர்ப்பு சக்தியோடு இயற்கை நமக்கு அளிக்கிறது. நலம் தரும் பாக்டீரியாக்கள் நமது உடலில் ஜீரணத்திற்கும் ஊட்டச்சத்தை உணவிலிருந்து உடல் வளர்ச்சிக்கு கிரகிப்பதற்கும் அசுத்தங்களை வெளியேற்ற பயன்படுகிறது. இயற்கையாக நன்மை பயக்கும் நுண்மங்கள் நல்ல மண்ணிலும் காய்கறிகளிலும் தானியங்களிலும் உள்ளன. சுத்தமான ஆற்று மண்படுகையில் குழந்தைகள் மண்ணில் விளையாட வைத்தனர் நமது முன்னோர்கள். சுத்தமான சுவாசம், ரம்யமான பொழுதுபோக்கு, நன்மை பயக்கும் நுண்மங்களின் சகவாசம் கிடைத்தது. கண்ணன் மண்ணில் விளையாடி அதையே வாயில அள்ளிப்போட்டு யசோதையின் கோபத்திற்கு ஆளான கதை எவ்வளவு தரம் கேட்டாலும் நடன நிகழ்ச்சியாக பார்த்தாலும் அலுக்காது. அதன் உட்கருத்து கண்ணன் தன் பிஞ்சுவிரல்களால் அளாவி வாயில் திணித்த மண்ணில் தான் பிரபஞ்சத்தில் உள்ள அனைத்து ஜீவராசிகளும் அடங்கும் என்பதுதான். அத்தகைய நன்மை பயக்கும் சூழல் இப்போது இல்லை. இருப்பதையும் கெடுப்பது திறந்த வெளி அசுத்தம்.

நமது நாட்டில் விளையும் தானியங்கள் பழவகைகள் காய்கறிகள் அதை வைத்துதான் உணவுப்பழக்கம், உணவு வகைகள் காலங்காலமாக செப்பனிடப்பட்டு உருவாகியுள்ளது. சீதோஷ்ண நிலைக்கு ஏற்றவாறு அதிக ஈரப்பதம் கலந்த உணவு உட்கொள்கிறோம். ஆனால் மேலை நாடுகளில் உலர்ந்த உணவு வகைகள். நமது உணவு வகையில் நன்மை பயக்கும் நுண்மங்கள் உள்ளன, எல்லா ருசியும் கலந்திருப்பதால் ஜீரணிக்க உதவும் பாக்டீரியாக்கள் உணவுக் குழாயிலும் குடல் பகுதிகளிலும் குடி கொண்டு செரிமானத்திற்கு உதவுகின்றன. அத்தகைய உணவு வகைகளை மறந்து வெளிநாட்டு உணவு வகைகளின் மோகத்தால் தேவையான ஊட்டச்சத்து வசதியான குழந்தைகளுக்கும் கிடைப்பதில்லை.

விவசாயத்திலும் அதிகமான ரசாயன உரங்கள் மண்ணின் இயற்கையான வளத்தை பாதிக்கின்றன. போதாதற்கு பூச்சி மருந்து வேறு தெளிக்கப்படுகிறது. பூச்சி கொல்லி எவ்வாறு மருந்தாகும்! மனிதன் உட்கொள்ள முடியுமா? இது சர்வ சாதாரணமாக பயிர்களுக்குத் தெளிக்கப்படுகிறது. அதைத்தான் உட்கொள்கிறோம், இதனால் மேலும் பல உடல் உபாதைகளுக்கு ஆளாகிறோம்.

இயற்கை விவசாயி நம்மாழ்வார் எவ்வாறு ஒவ்வொரு உயிரினமும் இயற்கை பாதுகாப்பிற்கு அவசியம் என்பதை அழகாகக் கூறுவார். ஒரு தும்பியை எடுத்துக்கொண்டால் அது கொசு முட்டையை தின்று கொசுப் பரவாமல் தடுக்கும். ஆனால் பூச்சிக் கொல்லியால் தும்பிகள் அழிந்து விட்டன. கொசு பரவலாக பெருகி அதை அழிக்க மேலும் ரசாயனத்தை உபயோகிக்கிறோம். இதுவும் ஊட்டச்சத்துக் குறைபாட்டிற்கு முக்கிய காரணம்.

1999 –ல் மத்திய அரசு நிர்மல் பாரத் அபியான் என்ற சுகாதார திட்டத்தை அறிமுகம் படுத்தியது. முழுமையான கழிவு நீக்க ஏற்பாடு என்ற திட்டம் இதற்கு முன்னோடியாக இருந்தது. அத்திட்டத்தின்படி 2017 ஆம் ஆண்டுக்குள் திறந்தவெளி கழிக்கும் முறை ஒழிக்கப்பட வேண்டும் என்பது குறிக்கோளாக வைக்கப்பட்டது. அந்தந்த பகுதி மக்களே முன்வந்து சுகாதார முறைகளை கடைபிடிக்க விழிப்புணர்வு ஏற்படுத்துவது, அவர்களுடைய அன்றாட வாழ்க்கை முறையை ஆராய்ந்து சுகாதாரத்திற்கு ஏதுவாக மாற்றம் கொண்டுவருவது, கலாச்சார நிலைகளை மனதில் கொண்டு நல்வாழ்விற்கு வழிவகுப்பது ஆகியவை இந்த திட்டத்தின் முக்கிய அம்சங்கள்.

மராட்டிய மாநிலத்தில் இந்த திட்டம் துவங்கப்பட்டு 2000 கிராம பஞ்சாயத்துகளில் திறந்த வெளி கழித்தல் பிரச்சனை ஒழிக்கப்பட்டு விட்டது வரவேற்கத்தக்கது. இந்த திட்டத்தை நன்கு நிறைவேற்றும் கிராம பஞ்சாயித்துகளுக்கு பரிசு கொடுக்கப்படுகிறது. வறுமைக் கோட்டிற்கு கீழ் உள்ள மக்கள், ஒடுக்கப்பட்ட பிற்படுத்துப்பட்ட மக்கள், மாற்றுத் திறனாளிகள் அவர்களது குடியிருப்புகளில் கழிப்பறை வசதி செய்து கொடுக்க இத்திட்டம் வழிவகுக்கிறது. இது மட்டுமல்லாது கிராம துவக்கப் பள்ளிகள், அரசு பள்ளிகள், அங்கன்வாடிகள், மக்கள் கூடும் இடங்களில் கழிப்பறை வசதி நிர்மாணிப்பது இத்திட்டத்தில் அடங்கும்.

இந்த சமுதாய சுகாதாரப் பிரச்சனைக்கு மனித உரிமை சம்மந்தப்பட்ட பரிமாணமும் உண்டு. மனித மலத்தை தலைச் சுமையாக அகற்றும் பரிதாபம் நமது நாட்டில் தான் இன்னும் நீடிக்கிறது. இந்தியாவில் உள்ள பல கிராமங்களிலும் சிறு நகரங்களிலும் உலர்ந்த கழிப்பறைகளில் உள்ள மலங்கள் மனிதர்களால் அகற்றப்படுவது வேதனை அளிக்கும் விஷயம் மட்டும் அல்ல மனித உரிமை மீறலும் ஆகும். 1993-ம் வருடம் கைகளால் அசுத்தங்கள் அகற்றும் முறை ஒழிப்புச் சட்டம் மத்திய அரசால் இயற்றுப்பட்டு ஆறு மாநிலங்கள் ஆந்திரா, கோவா, கர்நாடகாக, மஹராஷ்ட்ரா, திரிபுரா, மேற்கு வங்காளம், மற்றும் யூனியன் பிரதேங்களிலும் அமலாக்கத்தில் உள்ளது. இவ்வாறு மனிதர்களை மலங்களை அகற்றுவதற்கு உட்படுத்தினால் தண்டனை ஒரு வருடம் அபராதம் ரூபாய் 2000/- என்று விதிக்கப்பட்டுள்ளது. மேலும் சட்டத்தில் இந்த இழிவு முறையை ஒழிப்பதற்கான மாற்று நடவடிக்கைகளை அரசு மேற்கொள்ள அறிவுறுத்தப்பட்டுள்ளது.

நகரங்களில் சாக்கடையில் உள்ள கழிவுப் பொருட்களை அகற்ற இப்போது இயந்திரங்கள் உபயோகத்தில் உள்ளன, முன்பு பணியாளர் குழியில் உள்ளே சென்று அடைப்புகளை கையால் அகற்றுவார். உடம்பில் கிருமிகள் தாக்காமல் இருக்க உப்புப் பசையை உடம்பில் தெளித்து இறங்குவார். கமலஹாசனின் தசாவதாரம் படத்தில் சாக்கடை கழிவு நீக்கும் பணியாளர்களை இணைத்து வயிற்றில் உப்புப் பூசிக் கொள்ளும் காட்சி வரும். நோய் தாக்கமல் இருக்க உப்புப் பசைதான் முதல் பாதுகாப்பு.

1214 ம் வருடத்திலிருந்து ஐரோப்பா நாடுகளில் உலர்ந்த கழிப்பறையிலிருந்து மனிதர்களால் மலங்களை நீக்கும் முறை இருந்துள்ளது. 1596ம் வருடம் ஜான் ஹாரிங்டன் தண்ணீர் மூலம் அசுத்தங்களை வெளியேற்றும் வழியை கண்டு பிடித்தார். இந்தியாவில் சமூகத்தில் ஒரு பகுதியினர் இந்த தொழிலில் ஈடுபடுத்தப்பட்டனர். மஹாத்மா காந்தி அவர்கள் மனிதர்கள் மலம் நீக்கும் முறைக்கு எதிராக முயற்சிகள் எடுத்தார். சபர்மதி ஆசிரமத்தில் தானே முன்நின்று எல்லா கழிப்பறைகளையும் சுத்தம் செய்து, அவரவர் சுத்தம் செய்ய கட்டுப்பாடு விதித்தார்.

நிர்மல் பாரத் அபியான் திட்டத்திற்கு 12-ம் ஐந்தாண்டு திட்டடத்தில் ரூபாய் 37,159 கோடி ஒதுக்கப்பட்டு கழிப்பறை கட்டும் திட்டம் நிறவேற்றப்படவுள்ளது. சமுதாய பங்களிப்பும் ஒத்துழைப்பும் இத்திட்டம் வெற்றியடைய மிக அவசியம். அதிக அளவில் விழிப்புணர்வு ஏற்படுத்தப்பட வேண்டும்.

“சுலப் சௌசாலயா” என்று 1970-ல் டாக்டர் பிந்தேஷ்வர் பாடக் என்பவர் பொது இடங்களில் மக்கள் சுலபமாக உபயோகிக்க கழிப்பிடங்கள் நிறுவினார். இதன் முக்கிய அம்சம் விஞ்ஞான முறையில் கழிவுப் பொருட்களை அகற்றும் தொழில் நுட்பம். குறைந்த கட்டணம், சுகாதார பராமரிப்பு பலருக்கு வேலைவாய்ப்பு என்பதால் பல நகரங்களில் இச்சேவை மக்களால் வரவேற்கப்படுகிறது. ஐக்கிய நாடுகளின் பொது மக்கள் குடியிருப்பு மையம், ‘சுலப்’ சேவையை வெகுவாக பாராட்டியுள்ளது. இச்சேவையின் மூலம் நமது நாட்டில் 240 நகரங்களில் கழிவுப் பொருட்கள் அகற்றும் முறை சுலபமாகிவிட்டது.

மனிதவளம் மேம்பாட்டிற்கு சுற்றுப்புற சுகாதாரம் மிக முக்கியம் என்பதை கருத்தில் கொள்ள வேண்டும். மனிதவள மேம்பாடு குறியீட்டில் உலக நாடுகளில் நமது நாடு 134-ம் நிலையில் உள்ளோம் என்பது நம்மை இடிக்க வேண்டும்.

பொது இடங்களில் அசுத்தம் செய்யும் போக்கு தமிழ் நாட்டில் அதிகம் உள்ளது என்பது மறுக்கப்பட முடியாத உண்மை. அண்டை மாநிலமான கோரளாவில் இந்த அளவில் சாலைகளை மக்கள் அசுத்தம் செய்வதில்லை. கண்ட இடத்தில் குப்பை போடுவதில்லை. முப்பது, நாற்பது ஆண்டுகளுக்கு முன் பொது இடங்களை அசுத்தம் செய்தால் சிறு குற்றமாக கருதி போலீஸ் வழக்குப் போடுவார்கள், பயம் இருந்தது. இப்போது காவல்துறையினருக்கு வாகனத் தணிக்கைக்கே நேரம் போதவில்லை!

சைனாவை பல முன்னேற்ற நடவடிக்கைக்கு உதாரணமாக ஒப்பிட்டு கூறப்படுகிறது. சைனாவில் பொதுக் கழிப்பிடங்களை உபயோகிக்க இலவசம், பொது இடங்களை அசுத்தம் செய்தால் அபராதம். ஆனால் நம் நாட்டில் பொதுக் கழிப்பிடங்களுக்கு கட்டணம் பொது இடங்கள் இலவசம். இந்த நிலை மாறவேண்டும்.

சுகாதாரமான ‘நிர்மலமா’ அல்லது பொறுப்பற்ற நடவடிக்கையால் சுற்றுப்புற ‘நிர்மூலமா’ என்பதை நாம் தான் நிர்ணயிக்க வேண்டும்.

"ஐந்தெழுத்து மந்திரம்" தினமணி கட்டுரை தேதி 16.07.2014

noreply@blogger.com (Nataraj) — Thu, 17 Jul 2014 12:12:00 +0530

ஒரு நாட்டின் பரப்பளவு, உள்ளதை விட அதிகமாக முடியாது. கடல் வேறு சிறுக சிறுக உலக உஷ்ண உயர்வால் நிலத்தை ஆக்கிரமித்துக் கொள்கிறது. ஜனத்தொகை பெருக்கம் வளர்ச்சிப்பணிகளுக்கு தேவையான கட்டுமானங்கள், நிலத்தின் தேவையை அதிகரித்துள்ளன. இதை சரிகட்ட ஒரே வழி செங்குத்தாக அடுக்குமாடி கட்டிடங்கள் கட்டுவதைத் தவிர வேறு வழியில்லை.

ஒப்பளிக்கப்பட்ட நிலங்களில் எந்த அளவு எத்தனை உயரம் அடுக்கு மாடி கட்டிடங்கள் நிறுவலாம் என்பதை பெருநகர வளர்ச்சி கழகம் நிர்ணயிக்கிறது. சில இடங்களில் ஒரு சதுர அடிக்கு ஒரு மடங்கிலிருந்து இரண்டு அல்லது இரண்டரை மடங்கு வரை கட்ட அனுமதி அளிக்கப்படுகிறது. குடியிருப்பு, தொழிற்சாலைகள், வணிக வளாகங்கள் என்று தேவைக் கேற்றவாறு பல்வேறு இடங்கள் பிரிக்கப்பட்டு கட்டிட உரிமங்கள் வழங்கப்படுகின்றன. நீயூயார்க்,சிகாகோ, பாரீஸ்,துபாய் போன்ற பெருநகரங்களில் மிக உயரக் கட்டிடங்களுக்கு அனுமதி அளிக்கப்படுகிறது. துபாயில் புர்ஜ் கலிஃப் என்னும் இடத்தில் சமீபத்தில் நிறுவப்பட்ட வணிக வளாகத்தின் உயரம் 828 மீட்டர் (2,716 அடி, 160 அடுக்குகள்). சிகாகோ சீயர்ஸ் டவர்ஸ், நீயூயார்க் எம்பையர் ஸ்டேட் பில்டிங்க் 100 மாடிகளுக்கு மேல் உயரமான கட்டிங்கள் நிலைத்து நின்று நகரத்திற்கு பெருமை சேர்க்கிறது.

அஸ்திவாரம் வலிமையாக அமையவேண்டும் என்பது மூதுரை, வெளிப்படையான உண்மை. அழகும் பொலிவும் புதுமையும் மேலோட்டமானது, ஸ்திரத்தன்மைதான் கட்டிடத்துக்கு பாதுகாப்பு அளிக்கும். நேஷனல் பில்டிங் கோட் ,தேசிய கட்டிட நிலயாணைகள் 2005ல் இயற்றப்பட்டு, அதில் பாதுக்காப்பாக கட்டிடம் அமைய தேவையான விதிகள் கொடுக்கப்பட்டுள்ளன.

தமிழ்நாட்டில் சுமார் 1720 உயர்மாடிக்கட்டிடங்கள் உள்ளன. சென்னையில் மற்றும் புறநகர் பகுதியில் 1500க்கும் மேற்பட்ட கட்டிடங்கள். 15 மீட்டருக்கு மிகுந்த கட்டிடங்கள் அடுக்கு மாடிக்கட்டிடங்கள் (எம்.ஸ்.பி) என்று பிரிக்கப்பட்டு அதற்கு பெருநகர் வளர்ச்சிச் கழகம் (சிஎம்டிஏ) அனுமதி வழங்குகிறது. கட்டிடம் அமையக்கூடிய சாலையின் விஸ்தாரம், நிலத்தின பரப்பளவு, அதன் சுற்றுப்புறம் எத்தகைய பகுதி அதாவது தொழிற்சாலை, கேளிக்கை, குடியிருப்பு ஆகிய பாகுபாடுகளில் எதில் அந்த இடம் அடங்கும் என்பதை வைத்து அனுமதி வழங்கப்படுகிறது. சாதாரணமாக தரை அளவு குறியீடு நிலப் பரப்பளவிற்கு தகுந்தாற்போல் இரண்டரை மடங்கு வரை வழங்கப்படுகிறது. முழுமையாக கட்டி முடித்த பிறகு அனுமதிக்கப்பட்ட வரம்புக்குள்ளும் அக்கம்பக்கத்திற்கு பாதிப்பில்லாமல் கட்டப்பட்டிருக்கிறது என்பதை உள்ளாட்சி கட்டுமான பிரிவால் தணிக்கை செய்யப்படுகிறது. தீயணைப்பு துறை மற்றும் காவல்துறை தணிக்கை செய்து தீ பாதுகாப்பு மற்றும் போக்குவரத்து போலீஸார் தடையின்மை சான்று வழங்குகின்றனர். தீ பாதுகாப்பு குறித்து தேசிய கட்டுமான விதிகளில் கட்டிடத்தின் தன்மை, பயன்பாட்டைப் பொறுத்து கட்டுப்பாடுகளும் செய்ய வேண்டியவை செய்யக் கூடாதவை பட்டியல் கொடுக்கப்படுகிறது. குடியிருப்புகள், மருத்துவமனைகள் தெழிற்சாலைகள், வணிக வளாகங்கள் திரை அரங்குகள் கல்விக் கூடங்கள் என்ற வகையில் பயன்பாட்டின் அடிப்படையில் கொடுக்கப்பட்ட விதிகள் பின்பற்றப்பட்டுள்ளதா என்பதை தணிக்கை செய்ய வேண்டும். கட்டிடத்தின் ஸ்திரத்தன்மை, கட்டும் போது சிமண்ட் மண் கலவையின் அளவு, அஸ்திவாரம் கட்டிட உயரத்திற்கு ஏற்றவாறு உபயோகிக்க வேண்டிய குறியீடுகளை கணித்து, கண்காணித்து முடிக்க வேண்டியது பொறியாளர் மற்றும் கட்டிடம் கட்டுவதற்கு பெறுப்பேற்றுக் கொண்டவருடைய கடமை. அரசு கட்டிடங்களுக்கு பொதுப்பணித்துறை இதற்கு பொறுப்பேற்கிறது. தனியார் கட்டிடங்களுக்கு சம்பந்தப்பட்ட பொறியாளரும், கட்டிடம் கட்ட உரிமம் பெற்றவரும் பொறுப்பேற்பது தான் நடைமுறையில் எல்லா நாடுகளிலும் உள்ளது. இதற்கு உள்ளாட்சி பொறுப்பில் உள்ளவர்களைக் குறைகூறுவது தவறு. உதாரணமாக பல்வேறு வாகனங்கள் வெவ்வேறு தொழிற்சாலைகளில் தயாரிக்கப்பட்டு சாலைகளில் செல்கின்றன. அந்த வாகனங்கள் சாலைகளில் செல்வதற்கு போக்குவரத்து துறை உரிமம் மற்றும் சான்றிதழ் வழங்குகிறது. ஓட்டுனருக்கும் ஓட்டுனர் உரிமம் கொடுக்கப்படுகிறது. அந்த வண்டிகளில் மெக்கானிகல் பழுது இருந்தால் வாகனம் தயாரித்ததில், வாகனப் பராமரிப்பில் தவறு. விபத்து ஏற்பட்டால் விதிகளை மீறிய ஓட்டுனரின் தவறு, உரிமம் வழங்கிய போக்குவரத்துத்துறையை எவ்வாறு குறைகூற முடியும்? எந்த ஒரு நிகழ்வையும் அரசியலாக்கி எல்லோரையும் குறை கூறுவதில் பயனில்லை. ஆக்கப்பூர்மாக வருங்காலத்தில் எவ்வாறு இம்மாதிரி நேர்வுகள் தவிர்க்கப்பட வேண்டும் என்பது தான் முக்கியம்.

மௌலிவாக்கம் சம்பவத்தில் நிவாரணப் பணிகள் போர்க்கால அடிப்படையில் மேற்கொள்ள முதலமைச்சரே நேரில் சென்று மீட்புப் பணிகளை பார்வையிட்டு, நிவாரணப்பணிகளை துரிதப்படுத்தி, காயமுற்றவறுக்கு ஆறுதல் அளித்து, உயிரிழந்த குடும்பங்களுக்கு நிதிவுதவிக்கு ஆணையிட்டு பல் முனை நடவடிக்கை துரிதமாக எடுத்தது எல்லோருடைய பாராட்டையும் பெற்றது. மேனாள் உயர்நீதிமன்ற நீதிபதி தலைமையில் விசாரணை கமிஷன் ஒருபுறம், விசேஷ போலீஸ் புலன் விசாரணைக் குழு மறுபுறம், தவறு செய்தவர்கள் மீது உடன் நடவடிக்கையும், வருங்காலத்தில் இத்தகைய சம்பவங்கள் தவிர்ப்பதற்கான வழிமுறைகளும் வகுக்கப்படும் என்பது உறுதி.

2004-ம் வருடம் சுனாமி என்ற ஆழிப்பேரலை இந்திய துணை கண்டத்தை தாக்கியபோது தமிழக கடலோரப் பகுதிகள் வெகுவாக பாதிக்கப்பட்டன. உயிரிழப்பு ஏற்பட்டது. சென்னை நகரகடலோரப் பகுதியில் மட்டும் 242 பேரும் மொத்தம் ஏழாயிரத்திற்கும் மேல் உயிரிழந்தனர். இதற்குப் பிறகு தான் தேசிய அளவில் பேரிடர் மேலாண்மை மத்திய அரசு அமைத்தது. பேரிடரை எதிர்கொள்ளவும், சேதாரத்தை குறைக்கவும் உயிர்களை காப்பாற்றவும், நிவாரணம் வழங்கவும், என்டிஆர்ஃப் என்ற தேதிய பேரிடர் பாதுகாப்பு படை, பத்து பட்டாலியன்கள் நாட்டின் முக்கிய இடங்களில் நிறுவப்பட்டன, தென் மாநிலங்களுக்கு அரக்கோணத்தில் ஒரு பட்டாலியன் இயங்குகிறது. ஒவ்வொரு பட்டாலியனிலும் 18 பிரிவுகள் உள்ளன. ஒவ்வொன்றிலும் பிரத்யேக மீட்புப் பணியில் விசேஷ பயிற்சிப் பெற்ற காவலர்கள் உள்ளனர். அவர்களிடம் நவீன இயந்திரங்கள், உபகரணங்கள் உள்ளன. எந்த ஒரு அசம்பாவிதம் நிகழ்ந்தாலும் அங்கு சென்று உதவ வேண்டும். உள்ளூர் நிர்வாகத்திலிருந்து அழைப்பு வரும் என்று அநாவசிய நிர்வாக சிக்கல்களுக்கு இடம் கொடாமல் தாமே முன் வந்து செயல்பட வேண்டும் என்பது இந்த மீட்புப் படையின் சிறப்பு அணுகுமுறை.

2004 ம் வருடம் தீயணைப்பு படையை நவீனப்படுத்தவும் மேம்படத்தவும் நீதியரசர் பக்தவச்சலம் தலைமையில் கமிஷன் அமைக்கப்பட்டது. கமிஷன் தனது பரிந்துரையில் தீயணைப்புத்துறை நவீனமயமாக்கல், மீட்புப் பணிகளில் எவ்வாறு செயலாற்றுவது என்பதை ஆராய்ந்து அதற்காக உபகரணங்கள் வழங்க வேண்டும் என்பதையும், தீ பாதுகாப்பு தற்காப்பு நடவடிக்கைகள் பொது இடங்களில் மேற்கொள்ள வேண்டியது பற்றியும் விரிவாக ஆராயப்பட்டுள்ளது. போர்க்கால அடிப்படையில் மீட்புப் பணிகளுக்கான கருவிகள் வாங்குவதற்கும் அவற்றை பிரத்யேக வாகனங்களில் பொருத்தி அவை நடமாடும் தானியங்கி மீட்புப் பணி மையங்களாக செயல்படுவதற்கான ஏற்பாடு செய்யப்பட்டது.

பேரிடர் இருவகைப்பட்டது. இயற்கையால் உண்டாகும் பேரிடர், மனிதனின் அஜாக்கரதையாலும் சட்ட விரோத செயல்களாலும் ஏற்படும் சேதாரங்கள் என்று இருவகையாக பிரிக்கலாம். பூகம்பம், சுனாமி, புயல், வெள்ளம், கடும்மழை ஆதானல் ஏற்படும் நிலச்சரிவு, இயற்கையால் விளைபவை. அதிலும் மரங்களை அழிப்பதாலும் இயற்கைக்கு மாறாக நாம் செயல்படுவதாலும் இயற்கை அன்னையின் சீற்றம், வெளிப்படுத்தப்படுகிறது. மனிதனின் தீய செய்கைகளால், விதிமுறைகளை மீறுதலால், நாசவேலையில் ஈடுபடுவதால் ஏற்படும் நிகழ்வுகள் கொரூரமானவை.

இந்த இரண்டு வகை அபாயங்களையும் எதிர் கொள்ள தயார் நிலையில் உள்ளது தமிழ்நாடு தீயணைப்புத்துறை. இந்தியாவில் உள்ள மாநிலங்களில் தீயணைப்பு மற்றும் மீட்பு துறைகளின் நிர்வாகம், செயல்திறன், நவீன கருவிகள் கட்டுமானங்கள் பற்றிய ஆய்வு செய்யப்பட்டது. தீயணைப்பு துறை, முதலமைச்சர் அவர்களின் சீரிய நடவடிக்கையால் பக்தவத்சலம் கமிஷன் பரிந்துரை அடிப்படையில் நவீனமாக்கப்பட்டதால், தமிழ்நாட்டில் தீயணைப்புத்துறை மற்ற மாநிலங்களைவிட மெச்சத்தக்க வகையில் செயல்படுகிறது.

மௌலிவாக்கம் கட்டடிடம் இடிந்ததில் தீயணைப்புத்துறை மிக சிறப்பாக செயல்பட்டு காயமுற்ற 27 உயிர்களை காப்பாற்றியது. இத்தகைய இடிபாடுகளில் மீட்புப்பணி சிரமமானது. இடிந்தவற்றை அகற்றும் பொழுதே சிக்குண்டவருக்கு மேலும் காயம் ஏற்பட வாய்ப்புண்டு. விரைவாக செயல்படல், நுணுக்கமாக இடிபாடுகளில் தேடுதல், காயமுற்றுவரை காப்பாற்றுதல், உடனடி மருத்துவ சிகிச்சை, தொழில் நுட்ப அடிப்படையில் ஆராய்ந்து செயலாக்குதல், ஆகியவை மீட்புப்பணியின் முக்கிய அங்கங்கள். தூர திருஷ்டி காமிராக்கள் இடிபாடுகளின் இடையே நுழைந்து காயமுற்றவர்கள் எங்கு சிக்கியிருக்கிறார்கள் என்பதை காணொலி மூலம் பார்க்க முடியும். தீயணைப்புபிரிவில் உள்ள இக்கருவி மிகவும் உதவியாக இருந்தது. மோப்ப நாய்கள் காவல்துறைக்கு மட்டுமல்ல தீயணைப்புத்துறையின் நண்பன். நவீனமயமாக்கம் திட்டத்தில் அமைக்கப்பட்ட மோப்ப நாய்கள் பிரிவு இடிபாடுகளில் சிக்கியவரை மோப்பம் பிடித்து இனம் காண உதவும். மோப்ப நாய் பிரிவில் டால்மேஷியன், டாபர்மேன், லாப்ரடார், பெர்னார்ட் வகை மோப்ப நாய்கள் இடிபாடுகளில் காயமுற்றவரை மோப்பம் மூலம் கண்டுபிடிக்க பயிற்சி பெற்றவை. மௌலிவாக்கத்தில் இந்த நாய் படை காயமுற்றவர்களை காப்பாற்ற பெரிதும் உதவியது.

மீட்புப்பணியில் ஈடுபட்ட தீயணைப்பு பிரிவு, காவல்துறை என்டிஆர்ஃப் படை வீரர்கள் மற்றும் வருவாய்துறை அதிகாரிகளுக்கு முதலமைச்சர் அவர்கள் பிரத்யேகமாக பொதுமேடையில் கௌரவித்தது, எல்லோரையும் ஊக்குவிக்கும் விதத்தில் அமைந்தது. அமெரிக்க ஜனாதிபதி ஓபாமா அவர்கள் பதவியேற்றதும் நீயூயார்க் இரட்டை கோபுரம் தீவிரவாதிகள் தகர்க்கப்பட்ட சம்பவத்தில் பணயாற்றிய தீயணைப்பு, காவல்துறை அதிகாரிகளுக்கு பாராட்டு விழா நடத்தியது நினைவில் வருகிறது. இதுதான் மேலாண்மை பொருந்திய தலைவர்களின் பெருந்தன்மை.

அசம்பாவிதங்கள் நிகழாமல் தவிர்ப்பது ஒருபுறம். அவ்வாறு நிகழ்ந்தால் உடனடி போர்கால நடவடிக்கை எடுக்கப்பட்டு சேதாரத்தை குறைப்பது ஒரு முக்கிய அணுகுமுறையாக பேரிடர் ஆளுமையில் குறிக்கப்படுகிறது. சென்னை போன்ற பெருநகரங்களில் பேரிடர் ஆளுமை மையங்கள்,(டிஸாஸ்டர் ரிலீஃப் சென்டர்) அமைக்கப்பட வேண்டும் என்று மத்திய அரசு நேஷனல் டிஸாஸ்டர் மேனேஜ்மண்ட் அதாரிடி(NDMA) மூலம் அறிவித்துள்ளது. அதற்கான நிதி மாநகராட்சி மூலம் அளிக்கப்படும். சென்னையில் இந்த மையம் அமைப்பதற்கான நடவடிக்கை விரைவில் எடுக்கப்பட வேண்டும்.

நமது நாட்டில் செயற்கை உயரிழப்பு 2013ல் 7,08,478. இதில் கட்டிட குலைவால் 2013-ம் வருடம் 1355 உயிரிழந்தனர்,. அதிகமாக உத்திரபிரதேச மாநிலத்தில் உயிரிழப்பு 279. தமிழ்நாட்டில் இத்தகைய விபத்துக்களால் வருடத்திற்கு சராசரி 70 உயிரிழப்பு ஏற்படுகிறது. அதனால் தான் பேரிடர் மேலாண்மை கழகம் முக்கிய நகரங்களில் பேரிடர் தணிப்பு மையங்கள் நிறுவ வேண்டும் என்று பரிந்துரை செய்துள்ளது.

விபத்துக்கள் தவிர்க்கப்பட வேண்டியவை. அதற்கு பல்முனை நடவடிக்கை அவசியம். எந்த நீண்ட பயணத்திற்கும் துவக்கம் முதல் அடி. கட்டிடங்களுக்கு “அடிதளம்”, “அடிக்கல்”, கிராமங்களில் கூறுவது போல “கடக்கால்” தான் முதல் அடி. இந்த ஐந்தெழுத்து மந்திரம் தான் கட்டிடத்தை உறுதிப்படுத்துகிறது.

போதை ஒருவழி அழிவுப்பாதை- தினமணி நாளிதழ் கட்டுரை தேதி.01.07.2014

noreply@blogger.com (Nataraj) — Tue, 1 Jul 2014 13:35:00 +0530

மகாத்மா காந்தி சரியாகச் சொன்னார், “பாம்பின் விஷம் உயிரைக் குடிக்கும் ஆனால் போதைப் பொருள் என்ற விஷம் ஆன்மாவையே அழிக்கும்”. மது, மாது, பொன், புலால் இதில் எது நல்ல மனிதரையும் படுகுழியில் தள்ளுகிறது என்பதை ஒரு நல்ல மனிதனை வைத்து சோதனை செய்தனராம். உழைத்து சம்பாதிக்காத பணம் வேண்டாம் என்று பொன்னை மறுத்து, மற்ற உயிர்களை அழித்து நமக்கு எதற்கு உணவு என்று புலால் மறுத்து, வன்புணர்ச்சி மகா பாவம் என்று பெண் சபலத்திற்கும் இடம் கொடாத அந்த நல்ல மனிதன் மதுவைப்பார்த்து இதனால் மற்றவர்க்கு தீங்கில்லை உட்கொண்டால் நல்லது கெட்டதெல்லாம் தனக்குத்தான் என்று மதுவில் மயங்கினான். போதை பசியை தூண்ட, புலால் உணவு ருசித்து, மயக்கம் தலைக்கேற வன்புணர்ச்சியில் திளைத்து, இவையனைத்தையும் என்றும் பெற பணத்தை அபகரித்தான். போதைப் பொருள் அத்தகைய அழிக்கவல்ல சக்தி.

உள்நாட்டு கிளர்ச்சி, பொருளாதார பின்னடைவால் பாதிக்கப்பட்ட நாடுகள்தான் சர்வதேச அளவில் போதை பொருள் கடத்தும் குற்றச்சுவான்களுக்கு அறுவடை தளம். உலகெங்கிலும் மனித உரிமைகளை நிலநாட்ட முயற்சி எடுத்து வரும் ஐக்கிய நாடுகள் கூட்டமைப்பின் முக்கிய பணி இத்தகைய நாடுகளை அழிவிலிருந்தும், கடத்தல்காரர்களின் பிடியிலிருந்தும் காப்பாற்றி அமைதி நிலை நாட்டுவது என்று ஐக்கிய நாடுகள் அமைப்பின் தலைவர்
திரு.பன் கி மூன், அறிக்கைவிடுத்துள்ளார்.

போதைப் பொருட்களுக்கு எதிராக நாடுகள் பல்வேறு கட்டங்களில் முயற்சிகள் எடுத்து வருகின்றன 1842-ம் வருடம் சைனா, இங்கிலாந்து நாடுகளுக்கிடையில் போதைப் பொருள் ஓபியம் எனப்படும் ‘அபின்’ சைனாவில் புழக்கத்தில் விடுவதில் ஏற்பட்ட பிரச்சனை போரிடும் அளவிற்கு சென்றது. ‘ஓபியம் யுத்தம்’ என்று இந்நிகழ்வு வரலாற்றுப் பதிவுகளில் இடம் பெற்றுள்ளது.

நமது நாட்டில் மத்திய பிரதேசம், ராஜஸ்தான், ஹிமாசல், பஞ்சாப் பகுதிகளில் கஞ்சா பயிரிடுதல் பண்டிகை கொண்டாட்டங்களில் கஞ்சா புகைப்பது, சோமபானம், ‘பங்க்’ போன்ற போதைப் பொருள் கலந்த மதுரஸங்களை குடிப்பது வழக்கமாக இருந்து வருகிறது. அபின் உள்நாட்டு மருந்து தயாரிப்பதிற்கும் பயன்படுத்தப் படுகிறது. கொடிய நோயால் பாதிக்கப்பட்டவர்களுக்கு வலி நிவாரணமாக அபின் கலந்த மருந்துகளை நாட்டு வைத்தியத்தில் காலங்காலமாக உயயோகத்தில் உள்ளது. நூறு வருடங்களுக்கு முன்பு மருத்துவரின் சான்றோடு அபின் மருந்தகங்களில் வாங்கும் முறை இருந்தது.

பெத்திடின் போன்ற ஆங்கில மருந்து வலியை குறைப்பதற்கு உபயோகிக்கப்படுகிறது. மருந்து மருந்தாக உட்கொள்ளாமல் விருந்தாக அதிலேயே திளைத்தால் விபரீத விளைவுகள் ஒருவரை அழித்துவிடும்.

1908ல் இருந்து முனைப்பாக சைனா ஆப்பிக்கா மற்றும் பல ஐரோப்பிய நாடுகளில் போதைப் பொருட்கள் தடுப்பு நடவடிக்கை எடுக்கப்பட்டது. 1909ல் இருந்து சர்வதேச அளவில் போதை தடுப்பு குற்றங்களுக்கு முத்தாய்ப்பு வைத்தது போல் 1987ல் ஐக்கிய நாடுகள் சபை பிரத்யேக போதை தடுப்பு கூட்டத்தொடர் நடத்தியது. அதில் போதைப் பொருட்கள் தயாரித்தல் கடத்தல் மற்றும் விற்பனை பன்மடங்காக பெருகி வருவதையும் அதன் விளைவாக கிளைத்தெழும் குற்றங்களை தடுக்க போர்க்கால நடவடிக்கை எடுக்க வேண்டிய அவசியத்தை விவாதித்தது. ஜுன் 26ம் நாள் ஒவ்வொரு வருடமும் போதைப் பொருள் ஒழிப்பு நாளாக அனுசரிக்க முடிவெடுக்கப்பட்டது. லின் செக்சு என்ற சைனா மாகாணங்களான ஹியூமென், ஹுவாடோங் பகுதி ஆட்சியர், அபின் புழக்கத்தை முடக்க கடும் நடவடிக்கை எடுத்தார். ஆட்சியர் லின் செக்சு சுமார் 200 அபின் வியாபாரிகளை கைது செய்து 12 லட்சம் கிலோ அபின் கைப்பற்றினார். 1839 வருடம் ஜுன் மூன்றாம் தேதி துவங்கி, 23 நாட்கள் 500 பணியாளர்கள், கைப்பற்றிய அபினை, உப்பு, சுண்ணாம்பு கலந்து அழித்து கடலில் கரைத்தனர். அந்த சரித்திர முக்கியத்துவம் வாய்ந்த நடவடிக்கைகளை போற்றும் வகையில் ஜுன் 26ம் நாள் போதைப் பொருள் ஒழிப்பு தினமாக ஐக்கிய நாடுகள் சபை அறிவித்துள்ளது. 1988ம் வருடத்தில் இருந்து அனுசரிக்கப்பட்டு வருகிறது. ஐக்கிய நாடுகளின் 2007 அறிக்கைப்படி சட்டத்திற்கு புறம்பான போதைப் பொருள்களின் வணிகத்தின் மதிப்பு ஆண்டொன்றுக்கு சுமார் 320 மில்லியன் டாலர், பல ஆயிரம் கோடி ரூபாய் பணம் அதிகம் புரள்வதால் கடத்தல்காரர்களின் பலமும் அதிகம் என்பது சொல்ல வேண்டியதில்லை. சர்வதேச காவல் அமைப்பிற்கு போதைப் பொருள் கடத்தல் மிகப்பெரிய சவால்.

போதைப் பொருட்களுக்கு அதிகமாக அடிமையாவது ஒரு நாட்டில் இளைஞர்கள்தான். இளமைப் பருவத்திலிருந்தே அது தொற்றிக் கொண்டுவிடுகிறது.

சமூக நிலைப்பாடுகளின் தரம் நாளுக்கு நாள் குறைந்து வருவது கண்கூடாக தெரிகிறது. மேலை நாட்டு கலாச்சாரத்தில் கடுமையாக உழைப்பது மற்றவர் உரிமைகளை மதிப்பது போன்றவைகள் போற்றப்பட வேண்டியவை, இருந்தாலும் சுதந்திரம் என்ற பெயரில் மது, போதைப் பொருள்களை உட்கொள்ளும் மேல் நாட்டு கலாச்சாரம் மிகப் பெரிய அழிவிற்கு வழி வகுக்கிறது. போதைப் பொருள் கலாச்சாரம் நாட்டில் பரவி வருவதை தடுத்து விழிப்புணர்வு ஏற்படுத்தி மாற்று நடவடிக்கை எடுக்க வேண்டிய தருணமிது.

இரண்டுங்கெட்டான் இளம் பருவத்தில் உடல் ரீதியாகவும், உணர்வுகளிலும் பல மாற்றங்கள் ஏற்படும். புதிய சுதந்திரம் கிடைத்துவிட்டதாக உணரும் பருவத்தில் சரியாக கவனிக்கப்படவில்லை என்றாலும், சீரிய வழிகாட்டுதல் இல்லாத நிலையிலும் இளைஞர்கள் கெட்ட பழக்கங்களின் பிடியில் சிக்க வாய்ப்புண்டு. எல்லாமே சேர்க்கை தோஷத்தால் ஏற்படுகிறது. சகவாசம் நன்றாக அமைவதும் ஒரு கொடுப்பினை. நல்லியல்புகள் பொருந்திய குடும்பத்து இளைஞர்களும் கெடுவது தீயவர்களின் சகவாசத்தால் என்பது உண்மை.

பள்ளிப்பருவத்திலேயே புகைப்பழக்கம் ஆரம்பித்து விடுகிறது. புகை வலையில் சிக்க வைப்பதில் சிலருக்கு ஆனந்தம், அதுவே சுதந்திரம், வீரம், ஆண்மையின் அடையாளமாக விவரிக்கப்படுகிறது. புகையிலையில் உள்ள நிகோடின் மூளை நரம்புகளை ஆட்கொண்டு பழக்கத்தை பற்றிக் கொள்ள வைக்கிறது. அதோடு தொற்றிக் கொண்ட பழக்கம் மது வகைகள். அந்த போதையும் போதாது என்று ஹிராயின், கஞ்சா ‘கோகேய்ன்’ நச்சுப் பொருட்களுளை நாடும் நிலை ஏற்படுகிறது. போதை வலையில் சிக்கினால் மீள்வது கடினம்.

பெற்றோருக்கும் கல்வி நிர்வாகத்திற்கும் போதை பழக்கத்தை கண்காணிப்பதில் பொறுப்பு இருக்கிறது. நல்லது நடப்பது கடினம், கெடுதல் கச்சிதமாக பரவும் என்பதை பல நிகழ்வுகளில் பார்க்கலாம். கெடுதலை தடுத்தலே முதல் கட்ட நிவாராணம். போதைப் பொருள் ஆண் பெண் பேதமின்றி இருபாலரையும் ஆட்கொள்ளும். அவர்களது நடவடிக்கை வித்தியாசமாக இருக்கும், பசியிருக்காது, சோம்பிருப்பார்கள், குற்றவுணர்வு முகத்தில் தெரியும். போதைப் பொருளை பெறுவதற்கு எது வேண்டுமானாலும் செய்வார்கள். வீட்டிலேயே திருடுவார்கள் தெரிந்தவர்களிடம் கடன் கேட்பார்கள். திடீரென்று கோபப்படுவார்கள் சரியான வேளையில் போதைப் பொருள் கிடைக்கவில்லை யென்றால் எதையோ இழந்து விட்டதைப் போல உருகுலைந்து தத்தளிப்பார்கள், தற்கொலைக்கும் துணிந்துவிடுவார்கள் போதைப் பொருளுக்கு அடிமையான பெண்கள் பாலியல் கொடுமைக்கு தள்ளப்படும் அவல நிலையுமுண்டு.

பள்ளி, கல்லூரி, வீடுகளில் கண்காணிப்பு சீராக இருந்தால் போதை போதைப் பொருள் கொடுமையிலிருந்து இளைஞர்களை காப்பாற்ற முடியும். போதைப் பொருள் தடுப்புச் சட்டம் 1985-ம் ஆண்டு கடுமையாக்கப்பட்டு மத்திய சட்டமாக அமலில் உள்ளது. குறைந்தபட்ச தண்டனை விதிக்கவும் செஷன்ஸ் கோர்ட் விசாரிக்கவும் வழிவகை செய்யப்பட்டுள்ளது.

2012-ம் வருடம் தமிழகத்தில் 1402 வழக்குகள் இச்சட்டத்தில் பதியப்பட்டன, சென்னையில் மட்டும் 110 வழக்குகள், நாடு முழுவதும் 10,272 வழக்குகள் கண்டுபிடிக்கப்பட்டன. அதிக போதை தரக்கூடிய ஹிராயின் 1027 கிலோ, கோகேய்ன் 43 கிலோ மற்ற போதை மருந்துகள் முந்ததைய வருடங்களை விட அதிகமாக கைப்பற்றப்பட்டுள்ளன. 13,459 குற்றவாளிகள் போதை பெருட்கள் தடுப்பு சட்டத்தில் நாட்டில் 2012-ம் வருடம் கைதாகினர், அதில் 216 வெளிநாட்டவர் அடங்குவர். ஆப்பிரிக்க நாட்டைக் சேர்ந்த இளைஞர்கள் இதில் அதிகம். போதை மருந்து பரவலாக புழக்கத்தில் இருப்பது தெரிகிறது.

காபி அருந்தகங்கள், சிற்றுண்டி விடுதிகள் இளைஞர்களை வரவேற்கும் பொழுதுபோக்கு களங்களாக முளைத்துள்ளன. முன்பு ‘ஹுக்கா’ புகைக்கும் வசதியிருந்தது. அங்கு புகை மண்டலம் சூழ்ந்திருக்கும்.

போதைப் பொருள் அதிகமாக தயாரிக்கும் இடம் தங்க வளையம் எனப்படும் ஆப்கானிஸ்தான், ஈரான், பாகிஸ்தான். கம்போடியா, வியட்னாம், பர்மா தாய்லாந்து தங்க முக்கோணம் என்று வர்ணிக்கப்படும் போதை பொருட்கள் புழங்கும் நாடுகள். போதைப்பொருள் கடத்தப்படுவதற்கு இடைப்பட்ட நிலம் இந்திய துணை கண்டம். ஆனால் இப்போது முக்கிய உட்கொள்ளும் தளமாக மாறி வருகிறது.

போதைப் பொருள் தடுப்பு, ஒரு தொடர் நடவடிக்கை. பள்ளிகளிலும் கல்லூரிகளிலும் போதை தடுப்பு சங்கங்கள் அமைத்து விழிப்புணர்வு ஏற்படுத்த வேண்டும். போதைப் பொருளுக்கு மறுப்பு தெரிவிப்பது தனி மனித உரிமை என்பதை இளைய சமுதாயம் உணர வேண்டும்.

நல்ல போதனை மூளைக்கு சென்றால் அறிவு, ஆனால் நச்சு மருந்துகள் மூலம் போதை தலைக்கு ஏறினால் மூளைக்கு சரிவு, உடலுக்கு அழிவு.

----

'குப்பையால் குவியும் குற்றங்கள்" தினமணி கட்டுரை தேதி.18.06.2014

noreply@blogger.com (Nataraj) — Fri, 20 Jun 2014 12:53:00 +0530

இலைபோட்டு சாப்பிடலாம் அவ்வளவு பளிங்கு மாதிரி இருக்கிறது என்றார் மஸ்கட்டிலிருந்து வந்த நண்பர். அவர் சொன்னது மஸ்கட்டின் சாலைகளும் நடை பாதைகளும் அந்தளவு சுத்தமாக இருப்பது பற்றி! இந்தியர்கள் வெளிநாட்டில் விதிமுறைகளைப் பின் பற்றி ஒழுங்கு மரியாதையாக இருக்கிறார்கள், ஆனால் நமது நாட்டில் ஒழுக்கமும் இல்லை சுத்தமும் இல்லை என்ற கூற்று திரும்பத்திரும்ப பலர் அங்கலாய்க்க கேட்டிருக்கிறோம் ஆனால் திருந்தியபாடில்லை.

வாரணாசியில் பேசிய பிரதமர் மக்களின் சுத்த உணர்வைத்தான் வலியுறுத்தினார். கங்கையை சுத்தப்படுத்துவேன் என்று சூளுரைத்திருக்கிறார். அதற்கு மக்களின் ஒத்துழைப்பையும் கோரியிருக்கிறார். நமது பல திட்டங்கள் முழமையாக செயல்படுத்தப்படுவதில் பல சிக்கல்கள் முளைக்கின்றன. அதில் எல்லாதரப்பினரின் ஒத்துழைப்பை வெறுவதில் தான் பெரும் சிக்கல். சர்வசாதாரணமாக குப்பையை கண்ட இடத்தில் போட்டு விடுகிறார்கள். ஊட்டி, கொடைக்கானல், குற்றாலம், கன்னியக்குமாரி கடற்கரை, நதிக்கறை போன்ற சுற்றுலா செல்லும் மையங்களிலும் கோயில்களிலும் கழிவுப் பொருட்கள் மலைபோல் குவிகின்றன.

நதிகளில் பிராணிகளின் சடலங்களையும் ஈவிரக்கமின்றி சுகாதார உணர்வுன்றி போட்டு விடுகிறார்கள். சமீபத்தில் தன்னார்வுக் தொண்டர்கள் தாமிரபரணி நதி சுத்தம் செய்யும் பணியை மேற்கொண்டபோது வண்டி வண்டியாக வருடக்கணக்காக தேங்கிய கழிவுப்பொருட்களை அகற்றினர். ‘மகாத்மா காந்தி வீட்டுக்கு ஒரு வேலை திட்டத்தில்’ வெட்டியாக மம்மட்டியோடு உட்கார்வதை விட்டு இத்தகைய சுத்திகரிப்பு பணிகளில் ஈடுபடுத்தினால் கிராமப்புரங்களுக்கு நல்லது.

பூமியின் சீதோஷ்ண நிலை உயர்ந்து வருவது கவலைக்கிடமாக உள்ளது என்று வானிலை ஆராய்ச்சியாளர்களின் சர்வதேச கருத்தரங்குகளிலும், பயிற்சிக் கூடங்களிலும் விவாதிக்கப்படுகிறது. ஆனால் விவாதத்தோடு நின்று விடுகிறது. மக்கள் மத்தியில் விழிப்புணர்வு ஏற்படுவதில்லை. வெப்ப நிலை உயர்வு உலகை எதிர்நோக்கியிருக்கும் மிக பெரிய பிரச்சனை. சமீபத்தில் பசிபிக் மகா கடல் ஒட்டி அமைந்துள்ள மார்ஷல் தீவிற்கு அருகில் இரண்டாம் உலகம் போரில் உயிரிழந்த ஜப்பான் நாட்டைச் சேர்ந்த வீரர்களின் சவப்பெட்டிகள் கடலில் உருண்டு கரையில் தள்ளப்பட்டு 26 சடலங்கள் மீட்கப்பட்டது அதிர்ச்சியை ஏற்படுத்தியுள்ளது. அந்த அளவிற்கு கடல் நீர் மட்டம் உயர்ந்து நிலத்தை சுவீகரித்துக் கொண்டுள்ளது. இது ஒரு அபாயச் சங்கொலி. மார்ஷல் தீவின் தலைவர் கிரிஸ்தோவர் லீக் கூறுகையில் பழைய கரையோரங்கள் மாறிவருகின்றன, தீவு குறுகி வருகிறது என்று கவலை தெரிவித்துள்ளர். ஐக்கிய நாடுகள் சுற்றுப்புற சூழல் அறிக்கைப்படி 1993ல் இருந்து 2009 வரை மார்ஷல் தீவுப்பகுதிகளில் கடல் உயரம் சுமார் 12 மில்லி மீட்டர் உயர்ந்துள்ளது. உலக அளவு சராசரி கடல் உயர்வைக் காட்டிலும் இது நான்கு மடங்கு அதிகம்.

மனிதனின் தன்னிச்சையான பொறுப்பற்ற இயற்கை அழிப்பு செயல்களால் உலகின் ஐந்து பெரும் கடல்கள் பொங்கி வருகின்றன. இந்த நூற்றாண்டின் இறுதிக்குள் நான்கு அடி உயர்ந்து விடும் பல தீவுகளை விழுங்கி விடும் என்று நிபுணர்கள் கணித்துள்ளனர்.

எந்த ஒரு இன்னல் ஏற்பட்டாலும் அதிகமாக பாதிக்கப்படுவது ஏழைகள்தான் என்பதை பார்க்கிறோம். பூமியின் வெப்ப உயர்வால் அதிகமாக பாதிக்கப்படப்போவதும் ஏழை நாடுகள்தான். நமது அண்டை நாடான வங்கதேசம் இயற்கை பேரழிவில் சிக்கியுள்ளது. வட கிழக்கு பருவ மாற்றத்தில் வரக்கூடிய புயல் கோரமாக கரையை தாக்குவது வங்க தேசத்தைதான். இது போதாது என்று வெப்ப நிலை உயர்வால் கடல் நீர் நிலத்தில் பரவுவதால் கடலோர கிராமங்களிலுருந்து மக்கள் வெளியேறும் நிலை ஏற்பட்டுள்ளது. வங்க தேசத்தில் அடுத்த நாற்பது ஆண்டுகளில் 17 சதவிகித கடலோர நிலப்பரப்பு அழிந்து விடும் என்றும் சுமார் 2 கோடி மக்கள் இடம் பெயர வேண்டிய அபாய நிலை உள்ளது என்று நிபுணர்கள் கூறியுள்ளனர். வங்க தேசப் பிரச்சனை என்று சும்மா இருந்து விட முடியாது. குடிபெயரும் மக்கள் இந்தியாவிற்குத்தான் வரவேண்டும். அழைய விருந்தாளியாக பிரச்சனைகளும் கூடவரும்.

வளர்ச்சியடைந்த நாடுகளும் அங்கு உள்ள தொழிற்சாலைகளும் தான் சுற்றுப்புற மாசு பெருகுவதற்கு முக்கிய காரணம். ஆனால் அதிகமாக மாசினால் ஏற்படும் தாக்கம் உணரப்படுவது ஏழை நாடுகளில்.

வருடா வருடம் ஜுன் 5ம் தேதி உலக பூமிநாள் அனுசரிக்கப்படுகிறது. ‘வெட்’ என்ற வேர்ல்ட் எர்த் டே(World Earth Day) இந்த வருடம் புதன் கிழமை ‘வெட்’ அன்று உதித்தது நம்மை தீர்க்கமாக உணரச் செய்வதற்காகத்தான் என்று கொள்ள வேண்டும்.

பிரசித்திப் பெற்ற கேம்பிரிட்ஜ், ஆக்ஸ்போர்டு பல்கலைக்கழக வளாகங்களில் ஆண்டு தோறும் புகுமுக மாணவர்களும் பட்டம் பெற்று வெளிவரும் மாணவர்களும் இணைந்து மரம் நடும் விழா நடத்துகிறார்கள். அங்கு தழைத்தோங்கும் மரங்கள் காலம் காலமாக கடந்த மாணவர்களின் சாதனைகளை பறைசாற்றும். வரும் மாணவர்களை குளிர்ந்த காற்றோடு நிழல் தந்து ஆசிர்வதிக்கும். நமது கல்லூரிகளிலும் பிரிவு உபச்சார விழாக்களில் மரம் நடுவதை வழக்கமாக கொள்ளலாம்.

பூமியின் வளிமண்டலம் பாதிப்பு ஏற்படுத்தக் கூடிய கிரகணங்களிலிருந்து உயிரினங்களை பாதுகாக்கிறது. ‘கிரீன் ஹவுஸ்’ என்ற இந்த பசுமை வீடுச் சூழல் மாசு ஏற்படுத்தும் புகைகளாலும் தொழிற்சாலைகள் வெளியிடும் நச்சு வாயுக்களாலும் பாழடைகிறது. வளிமண்டலத்தில் ஓட்டை விழுகிறது. பூமியின் வெப்ப நிலை உயர்வதற்கு இதுதான் முக்கிய காரணம்.

நாம் சுவாசிக்கும் உள் மூச்சு மரங்களின் வெளிமூச்சு. மரங்கள்தான் மாசுக் கட்டுப்பாட்டு காவலர். நிர்வாகத்தில் தவறு நிகழ்ந்தாலும் தனது பணிகளை தவறாது செய்வது காடுகளும் அடர்ந்த மரங்களும்தான். ஐக்கிய நாடுகள் அமைப்பு நிலப்பரப்பில் 34 சதவிகிதம் காடுகள் அடர்ந்து இருக்க வேண்டும் என்று நிர்ணயித்துள்ளது. நமது நாட்டில் சராசரி 20 சதவிகிதம் தான் உள்ளது. அருணாச்சல் பிரதேசம், சட்டிஸ்கர் போன்ற அடர்ந்த காடுகள் உள்ள மாநிலங்களிலும் மரங்கள் அழிக்கப்படுகிறது. காடுகள் சுருங்கி வருகின்றன.

வனமஹோத்ஸவம், சமூக காடுகள் என்று பல திட்டங்கள் உள்ளன. முழுமையாக நிறைவேற்றவதில் எல்லோரும் முனைப்பாக செயல்ப்பட வேண்டும். 120 கோடி ஜனத்தொகையுள்ள நமது நாட்டில் ஒவ்வொருவரும் ஒரு மரத்தையாவது பேண வேண்டும் என்று முயற்சி எடுத்தால் நாடு எவ்வளவு வளம் பெறும்! மும்மாரி பெருவாரியாக நிறையும். அவ்வாறு மரம் நடுவதையே உயிர் மூச்சாக கொண்டுவுள்ளார் தமிழ்நாட்டைச் சேர்ந்த திரு.முல்லை வனம் என்ற இளைஞர். இது வரை அவர் 89 லட்சம் மரங்களை நாடெங்கிலும் நட்டுள்ளார். தமிழ்நாட்டில் அவர் வளர்த்த மரங்கள் 24 லட்சம் அதில் சென்னையில் மட்டும் இரண்டு லட்சம் மரங்கள். ‘கலாம் பசுமை திட்ட அமைப்பு’ மூலம் இவரது சேவையை பாராட்டி திரு.அப்துல்கலாம் அவர்கள் விருது வழங்கியுள்ளார்கள்.

கழிவுப் பொருட்கள் மேலாண்மை ஒரு முக்கிய நிர்வாக பிரச்சனையாக கருதப்படுகிறது. சுற்றுப்புறச் சூழல் சட்டங்கள் 1971ல் இருந்து நடைமுறையில் உள்ளது. 1986ம் வருடம் பூரண சுற்றுப்புறச் சூழல் பாதுகாப்பு சட்டம் அமலுக்கு வந்தது.

சுற்றுபுற சூழல் பாதுகாப்பு ஒரு முக்கிய கடமையாக அரசியல் சாசனத்தில் 51A பிரிவில் சேர்க்கப்பட்டுள்ளது. எல்லா ஜீவராசிகளையும் பாதுகாப்பது, மாசு கட்டுபாடு, மரம் வளர்த்தல் குப்பைகளை சுகாதாரமான முறையில் கழிவு செய்தல் இவை எல்லாம் சுற்றுப்புற சூழல் பாதுகாப்பில் அடங்கும்.

சுற்றுப்புற சூழல் சட்டத்தில் சுற்றுப்புறம் என்பது தண்ணீர், காற்று, நிலம் உயிரினங்கள் அவற்றுக்குள் இருக்கும் ஒட்டுறவு அவற்றின் பாதிப்பு இவை எல்லாம் உள் அடக்கும் என்று விவரிக்கப்பட்டுள்ளது. சுற்றுப்புறத்தை பாதிக்கும் எந்த ஒரு செயலும், விதிகளுக்கு உட்படாத நடவடிக்கைகளும் இந்த சட்டப்படி குற்றம். குப்பைகளை ஒழுங்கீனமாக தெருவில் போடுவதும் குற்றம். உரிய வேளையில் உள்ளாட்சி அலுவர்கள் அகற்றாததும் விதிகள் மீறலாகும்.

குப்பை மேடுகள், பாழடைந்த குடியிருப்புகள், அசுத்தமான தெருக்கள் போன்ற இடங்கள்தான் குற்றங்கள் முளைப்பதற்கு உரமிடப்பட்ட தளங்கள். பளிச்சென்று ஒரு இடமிருந்தால் அதற்கு மரியாதை தனித்துவமாக கிடைக்கும். குப்பைகள் அசுத்தமான சூழல்தான் குற்றங்கள் பெருகுவதுற்கு காரணம் என்பதை காவல்துறை உணர வேண்டும். எங்கும் ரோந்து பணியில் இருக்கும் காவல் வாகனங்கள், குப்பை அகற்றப்படாத இடங்களை மாநகராட்சிக்கு தெரிவித்து அவற்றை அகற்றுவது முக்கியமான குற்ற தடுப்பு நடவடிக்கை என்பதை அதிகாரிகளுக்கு வலியுறுத்த சென்னை காவல் ஆணையர் உறுதியளித்துள்ளார்.

தனியார் அலுவலகங்கள் சுத்தமாக பராமரிக்கப்படுகின்றன, ஆனால் அரசு அலுவலகங்களில் அந்த ஒழுக்கத்தை பார்க்க முடிவதில்லை. தனியார் மருத்துவ மனைகளில் அதிகம் கொடுத்தாலும் சுகாதாரம் பராமரிக்கப்படுகிறது. அந்த அளவில் அரசு மருத்துவமனைகளில் ஏன் இருக்கக்கூடாது. மேற்பார்வையிடும் அலுவலர்கள் அர்ப்பணிப்போடு செயல்பட்டால் நிச்சயமாக சாத்தியமாகும்.

சென்னை அரசினர் தோட்டத்தில் நிறுவப்பட்டுள்ள பன்னோக்கு உயர் சிறப்பு மருத்துவமனை, சென்னை அரசு பொது மருத்துவமனையிலும் இந்த சுத்தத்தை பார்க்க முடிகிறது. எல்லா மருத்துவமனைகளிலும் இதனை செயல்படுத்தினால் எவ்வளவு நன்றாக இருக்கும்.

ஒரு நகரத்தின் கலாச்சார பிரதிபலிப்பு சுத்தமான தெருக்கள், மிளிரும் தெருவிளக்குகள், பராமரிக்கப்பட்ட சாலைகள், ஒழுக்கமான போக்குவரத்து. இவைதான் சுற்றுப்புறச்சூழல் பாதுகாப்பிற்கும், பொதுமக்கள், உள்ளாட்சி ஊழியர்களின் சீரிய செயல்பாட்டிற்கும் அத்தாட்சி. இதற்கு பொருளாதார முதலீடு ஒன்றும் தேவையில்லை. அன்றாட பணிகளை சரிவர செய்தாலே போதும். சுற்றுப்புறச் சூழல் பாதுகாக்கப்படும்.

‘காக்கை குருவி எங்கள் சாதி’ என்றார் பாரதியார். சுற்றுப்புறம் பரிமளிக்க இருந்தால் பறவையினமும் பசுமையும் தழைக்கும். பறவைகளின் நண்பர் சலீம் அலி கூறியது போல ‘மனிதன் இல்லாமல் பறவைகள் வாழும் ஆனால் பறவைகள் இல்லாமல் மனிதன் வாழ முடியாது’ என்பது உண்மையான கூற்று. சிந்திக்க வேண்டும்.

நேர்மையாளர்களை ஊக்குவிக்க வேண்டும்

noreply@blogger.com (Nataraj) — Thu, 1 Nov 2012 16:07:00 +0530

இந்தியாவின் இரும்பு மனிதர் என்று போற்றப்படும் சர்தார் வல்லபாய் படேல் அவர்களின் பிறந்த தினமாகிய அக்டோபர் 31 ஊழல் மற்றும் விழிப்புணர்வு அறிதல் தினமாகவும், இது சம்மந்தமாக விழிப்புணர்வு முகாம்கள் நிகழ்ச்சிகள் நடத்த வேண்டிய வாரமாகவும் அனுசரிக்கப்படுகிறது. ஜனநாயக அமைப்பில் மக்களால் தேர்ந்தெடுக்கப்பட்ட அரசின் கொள்கைகளையும், திட்டங்களையும் ஆராய்ந்து செயல் வடிவம் கொடுக்க வேண்டியது நிர்வாக அமைப்பின் முக்கியப் பொறுப்பாகும். நிர்வாக அமைப்பு திறம்பட இயங்குவதற்கும் பாரபட்சமின்றி பொதுநலன் அடிப்படையில் நடவடிக்கை எடுக்க வேண்டும் என்ற உயரிய குறிக்கோளை வைத்து அகில இந்திய சேவைப்பணி அரசியல் சாசனத்தின் 312 பிரிவு படி அமைக்கப்பட்டது. இதில் இந்திய ஆட்சிப்பணி மற்றும் இந்திய காவல் பணி அடங்கும்.

அரசுப்பணியாளர்கள் ஆங்கிலத்தில் “பப்ளிக் சர்வண்ட்” என்று சட்டத்தில் குறிப்பிடப்படுகின்றனர். இதன் அடிப்படைக் கருத்து அவர்கள் பொதுமக்களுக்காக சேவை செய்ய வேண்டும. மக்களின் அடிப்படை உரிமைகளான சுதந்திரம், சமத்துவம், கண்ணியம் பாதுகாப்பதில் அரசு ஊழியர்களுக்கு முக்கியப்பங்கு உண்டு. நிர்வாகம் முகம் அறியாது என்பதற்கேற்ப விதிகளின் அடிப்படையில் நடு நிலமை பிறழாது நடவடிக்கை எடுக்க வேண்டும் என்று அறிவுறுத்தப்படுகிறது.

தொழில்முறை திறமை, நேர்மை, பாரபட்சமின்மை எல்லாவற்றிற்கும் மேலாக மாறிவரும் சவால்கள் மிகுந்த உலகில் செயலாக்கத்தில் சிறப்பு ஆகிய குணாதிசயங்கள் நிரம்பியவர்தான் பொது ஊழியர்களாக பொறுப்பேற்கத் தகுதியானவர். இதன் அடிப்படையில்தான் அரசுப் பணியாளர்கள் தேர்ந்தெடுக்கப்படவேண்டும் என்று 1854-ம் வருடம் பிரிட்டிஷ் அரசால் நியமிக்கப்பட்ட ட்ரவிலியான் கமிட்டி பரிந்துரைத்துள்ளது.

தூய்மையான வழிமுறைகள் பின்பற்றப்படவேண்டும். இதுதான் நேர்மையான நிர்வாகத்தின் அடையாளம். மகாத்மா காந்தி அடிகள் நிர்வாக ஊழலைப்பற்றி குறிப்பிடும் பொழுது தனிநபருக்காக நாடு இயங்கவில்லை தனிநபர் நாட்டுக்காகவும் நாட்டின் உயர்வுக்காகவும் உழைக்கவேண்டும் என்று கூறியிருக்கிறார்கள். தன்னலம் தலைதூக்கும்பொழுது எல்லாம் தனக்கும் தன்னைச் சேர்ந்தவர்களுக்கும் சொந்தம் என்ற வகையில் செயல்படுவதால்தான் பொது நிர்வாகத்தில் ஊழல் பெருகுகிறது.

மத்திய ஊழல் கண்காணிப்பு ஆணையகம் நிர்வாகத்தில் ஊழலை கட்டுப்படுத்துவதற்காக விதிகளையும், வழிகாட்டுதல்களையும், ஆலோசனையும் வழங்கி வருகிறது. ஒவ்வொரு வருடமும் விழிப்புணர்வு வாரமாக அக்டோபர் இறுதி நவம்பர் மாத துவக்கத்தில் அனுசரிக்கப்படுகிறது. ஒரு முக்கிய நிர்வாக சீர்திருத்த நடவடிக்கையை முன்வைத்து விழிப்புணர்வு நிகழ்ச்சிகள் நடத்தப்படுகின்றன. இந்த வருடம் அரசு திட்டங்களுக்கு கொள்முதல் செய்யப்படும் பொருட்கள், டெண்டர் முறைகள் வெளிப்படையான ஊழலற்ற வகையில் நடைபெற வேண்டும் என்பது வலியுறுத்தப்பட்டுள்ளது.

வெளிப்படையான ஒப்பந்தம்புள்ளி விதிமுறைகள் வரையறுக்கப்பட்டுள்ளன. இதன் மூலம் அரசுக்காக கொள்முதல் செய்யப்படும் பொருட்கள் துறைவாரியாக இனணயதளத்தில் வெளியிடப்படுகிறது. அதற்கான படிவங்கள் எளிதாக பெற்றுக் கொள்ளலாம். பொருட்கள் கொள்முதல் செய்யப்படுவதின் நோக்கம், பொருட்களின் தரம், எதிர்பார்ப்பு, எவ்வாறு ஒப்பந்தப்புள்ளி பரிசிலிக்கப்படும், தெரிவு செய்யும் முறைகள், ஆகியவை ஒப்பந்ததார்களுக்கு கலந்தாய்வுக் கூட்டம் மூலம் தெளிவு படுத்த வேண்டும். தொழில்நுட்ப தகுதி முதலிலும் கொள் முதல் செய்யபடும் பொருட்களின் விலைப்பட்டியல் பின்பும் பரிசீலனைக்கு உட்படுத்தப்படும்.

இவ்வாறு பொருள்கள் கொள்முதல் செய்வது, கட்டுமானப்பணிகான ஒப்பந்தம் வழங்குதல், இதர சேவைகள் பங்கிடுதல் போன்ற நடவடிக்கைகளில் ஊழல் ஊடுருவ வாய்ப்புகள் அதிகம் என்பதால் இந்த வருடம் கொள்முதலில் முறைகேடுகள் தவிர்க்கும் நடவடிக்கைகள் மேற்கொள்ளப்பட வேண்டும் என்பது வலியிறுத்தப்பட்டுள்ளது. கொள்முதல் நடவடிக்கையில் வெளிப்படைத்தன்மை, பொறுப்பாளர் கடமை, எந்த ஒரு கேள்விக்கும் பதில் அளிக்கும் திறன், சந்தேகத்திற்கு அப்பாற்பட்ட வழிமுறைகள் பின்பற்றப்பட வேண்டும் என்பதே மத்திய ஆணையத்தின் முக்கிய குறிக்கோள். மெச்சத்தக்க வழிமுறைகளை பயன்படுத்தி கணக்கிடக்கூடிய முன்னேற்றம் அடைந்திட வேண்டும் என்பதும் இலக்காக வைக்கப்பட்டுள்ளது.

சர்வதேச வெளிப்படை நிர்வாக அமைப்பு பொது நிறுவனங்களில் ஊழலை தடுப்பதற்கு ”நேர்மை ஒப்பந்தம்” என்னும் முறையை பரிந்துரைத்துள்ளது. அரசுப்பணிகளில் பங்கெடுக்க விண்ணப்பிக்கும் தனியார் ஒப்பந்ததாரர்கள் பங்கெடுப்பதற்கு முன் நேர்மை கடைபிடிக்க வலியுறுத்தல் ஒப்பந்தத்தில் பரஸ்பரம் கையெழுத்திட வேண்டும் ஒப்பந்தத்தின் முக்கிய அம்சம் டெண்டர் பரிசீலிக்கும் சமயம் மற்றும் முடிவு எடுக்கும் வரையில் எந்தவிதமான ஊழலில் ஈடுபட மாட்டோம் என்ற உறுதியினை அவர்கள் அளிக்கவேண்டும். இம்முறை ஊழலைத்தடுக்க பெரிதும் உதவுகிறது என்று நடைமுறையில் தெரிய வந்துள்ளது. நேர்மையற்ற முறையில் டெண்டர் யாருக்காவது சென்று விடுமோ என்ற அச்சம் நீக்கப்படுகிறது. சுமார் ஐம்பதுக்கும் மேற்பட்ட பொது நிறுவனங்களும், அமைச்சகங்களும் இம்முறையை பின்பற்றுகின்றன என்று மத்திய விழிப்புணர்வு ஆணையம் தெரிவித்துள்ளது.

அன்றாட சிறு ஊழல்கள்தான் சாதாரண மனிதனைத் தாக்குகிறது. இதற்கு கணினி மூலம் மக்கள் பெற வேண்டிய எல்லா பயனளிப்புகளும் பதிவு செய்தால் பொது மக்களுக்கும் கீழ்மட்ட அரசு ஊழியர்களுக்கும் நேரடி தொடர்பு தவிர்க்கப்பட்டு தகுதி அடிப்படையிலும் முதலில் பதிவு செய்தவர்க்கு முன்னுரிமை என்ற அடிப்படையில் மனுக்கள் பரிசீலிக்க வழிவகை செய்ய முடியும்.

வெளிப்படைத்தன்மை எவ்வளவு முக்கியமோ அந்த அளவு விதிகளுக்கு உட்பட்ட முடிவுகளும் முக்கியம். விதிகள் சுலபமாக்கப்படவேண்டும். நடைமுறைகளும் மக்களுக்கு தெளிவு படுத்த வேண்டும். துறை அதிகாரிகள் சுலபமாக மக்களுக்கு அரசுப்பணிகள் சென்று அடைய எல்லாமுயற்சிகளும் எடுக்க வேண்டும். உதாரணமாக பட்டா மாற்றம் என்பது கடினமான முறையாக இருந்ததால் அதில் முறைகேடுகளுக்கு வாய்ப்பாக அமைந்தது. அதனை மாற்றி பட்டா மாற்றம் சமீபத்திய அரசாணை மூலம் சுலபமாக்கப்படுள்ளது. மின் இணைப்பு, குடிநீர், கழிவு நீர் அகற்றும் வசதி, சாதிச்சான்றிதழ், அரசு மானியம் பெறுவதற்கான மனுக்கள், பல்வேறு நலத்திட்டங்கள் கீழ் பயனாளிகள் பெற வேண்டிய பயன்கள், கடன் உதவி பெறுதல், முதியோர் ஊதியம் போன்ற பல்வேறு சேவைகளை பெறுவதற்கு மக்கள் சம்பந்தப்பட்ட அரசுத்துறையை நாடுகின்றனர். இந்த சேவைகள் சுலபமாக கிடைத்திட வேண்டும். சாதிச்சான்றிதழ் பள்ளிக்கூடங்களே வழங்கலாம் என்ற அரசாணை எல்லோராலும் வரவேற்கப்பட்டுள்ளது.

ஊழல் விவகாரங்களைப்பற்றி தகவல் கொடுக்க வேண்டும் என்று அறிவுறுத்தப்படுகிறது. அதே சமயம் தகவல் கொடுப்பவர்களுக்கு பாதுகாப்பும் தகவல் அடிப்படையில் உடனடி நடவடிக்கையும் அவசியம். 2004 வருடம் தகவல் கொடுப்பவர் பாதுகாப்பு ஆணை அமலுக்கு வந்துள்ளது. மத்திய விழிப்புணர்வு ஆணையம் இத்தகைய புகார்களை கவனிப்பதற்கும், நடவடிக்கை எடுப்பதற்கும் அதிகாரம் கொடுக்கப்பட்டுள்ளது.

ஊழல் குற்றச்சாட்டுகளின் மீது நடவடிக்கை ஒருபுறம் எடுத்தாலும் ஊழல் நடவாமல் தடுப்பது என்பது குறித்தும் ஆய்வு நடத்தப்படுகிறது. தற்போதுள்ள தடுப்பு முறைகள், விதிகள் 1970-ல் வடிவமைக்கப்பட்டன. காலப்போக்கில் பல மாற்றங்கள் வந்துள்ளன, தொழில்நுட்பம் வளர்ந்ததுள்ளது அதற்கேற்றால் போல் நடைமுறையிலும் மாற்றம் வரவேண்டும். அப்போது தான் ஊழல் ஊடுருவலை நிறுத்த முடியும்.

தனியார் நிறுவனங்கள் இழப்பு நிகழக்கூடிய இடங்கள் என்ன என்பதை ஆராய்ந்து தெரிவு செய்து அங்கு அதிகம் கவனம் செலுத்தி இழப்பு தவிர்க்கும் முறைகளை கையாளுகின்றனர். இதே வகையில் பொது நிறுவனங்களில், பொது சேவைகளிலும் எந்த துறைகளில் எந்த நடைமுறையில் தவறுகள் அதிகம் நிகழக்கூடும் என்பதை ஆராய்ந்து தடுப்பு நடவடிக்கை எடுக்க வேண்டும். இத்தகைய இழப்பச்சம் முறையில் கலந்தாய்வு செய்து ஊழல் நடவாமல் தவிர்க்கப்பட வேண்டும் என்று விழிப்பிணர்வு ஆணையம் வலியுறுத்தியுள்ளது.

2005-ம் வருடம் ஐக்கிய நாடுகளின் ஊழலுக்கு எதிரான உடன்படிக்கையில் இந்தியா கையெழுத்திட்டது. அதற்கு முழு அங்கீகாரம் 2011-ம் ஆண்டு மே மாதம் தான் வழங்கியது. ஆனால் இன்னும் சட்ட மாற்றங்கள் கொண்டுவரப்படவில்லை. தனியார் நிறுவனங்களையும் ஊழல் தடுப்பு சட்டத்தின் கீழ் கொண்டு வருவதற்கான திருத்தங்கள் இன்னும் பரிசீலனை நிலையில் உள்ளன.

அரசு அலுவலகங்களில் மூன்று வகையான ஊழியர்களை காணலாம். அப்பழுக்கற்று தம்மை முழுமையாக ஈடுபடுத்தி சுய உந்துதலோடு செயல்படுபவர்கள். அதிக கடமையுணர்வு உடையவர்கள். இத்தகைய பணியாளர்கள் முதல் ரகம். நிர்வாக சுமை தாங்கிகள். போற்றுதலுக்குரியவர்கள். இரண்டாவது வகை குறைந்தபட்சம் எவ்வளவு பணி செய்தால் தம்மீது குறைவராதோ அந்த அளவுக்கு மட்டும் தம்மை ஈடுபடுத்திக் கொள்வார்கள். இவர்கள் சுமை தவிர்ப்பவர்கள். சந்தர்ப்பவாதிகள். மூன்றவது ரகம் ‘எங்கள் வீட்டுக்காரரும் கச்சேரி செய்கிறார்’ என்ற அளவில் பணிக்கு வந்து செல்வார்கள்! நிர்வாகத்திற்கு இவர்கள் சுமைகள். எந்த துறையில் சுய உந்துதலோடு பணி செய்பவர்கள் அதிகமாக இருக்கிறார்ளோ அந்தத்துறை சிறந்து விளங்கும். முதல் வகை பணியாளர்கள் ஊக்குவிக்கப்பட வேண்டும் அவர்களது மெச்சத்தக்கப்பணி பாராட்டப்பட வேண்டும். இத்தகைய பணியாளர்கள் சாதாரணமாக ஊழலில் ஈடுபடமாட்டர்கள். செயல் திறன் உயர்வு, ஊக்கம் இவை குறிக்கோளாக வைத்து பணியில் ஈடுபடுத்த வேண்டிய பொறுப்பு மேற்பார்வையாளர்களைச் சார்ந்தது.

சாதாரணப் பணியாளர்களை அசாதாரண மேன்மையான பணி செய்யும் திறமைசாலிகளாக மாற்றுவதே தலமை வகிப்பவரின் பொறுப்பு. ஏதோ வம்பு தும்பு இல்லாமல் குறந்தபட்சம் பணி செய்கிறோம் என்பது துறைக்கும் பெருமையல்ல. திறமையற்ற குறித்த நேரத்தில் முடிவுறாத, ஒப்புக்கு செய்யப்படும் பணிகளும் ஒரு வகையில் நேர்மைக்கு முரணான பணிகள் என்பது உண்மை.

சர்வதேச வெளிப்படை அமைப்பின் ஆய்வுப்படி ஒன்றிலிருந்து பத்து தர அளவில் இந்தியா மூன்றுக்கு கீழ்தான் உள்ளது. ஐரோப்பிய நாடுகள் ஒன்பது என்ற அளவில் தலை நிமிர்ந்து நிற்கின்றன. மேலும் அந்த ஆய்வில் இந்தியாவில் வருடத்திற்கு சுமார் ரூபாய்.30,000/- கோடி லஞ்சமாக சாதாரண ஊழலில் பரிமாரப்படுகிறது என்ற தகவலும் வெளிவந்துள்ளது. 64 சதவிகிதம் மக்கள் ஏதாவது ஒரு நிலையில் ஊழலுக்கு துணை போகிறார்கள் என்பதும் வேதனைக்குரியது.

ஊழலை கட்டுப்படுத்த பல்முனை முயற்சிகள் தேவை. அதில் மக்கள் ஒத்துழைப்பு இன்றியமையாதது. உண்மையான உழைப்பிற்கு ஒத்துழைப்பு நல்க மக்கள் முன்வருவார்கள். அரசுத்துறை பொதுமக்கள் சேவைக்காக இயங்குகிறது. இரும்புக்கவசம் நிர்வாகத்தின் வலிமையை தெரிவிக்கிறது. அதே சமயம் மக்கள் பணியில் மெழுகாக உருக வேண்டும் என்பதை மறக்கலாகாது.

நேர்மை, நம்பகத்தன்மை, தரம், ஒருபுறச்சார்பின்மை இவையனைத்தும் நேர்மையான பணிக்கு இலக்கணம். நேர்மையான அணுகுமுறையை அன்றாட வாழ்க்கையில் கடைபிடித்தால்தான் விழிப்புணர்வு முழுமையடையும்.

இக்கட்டுரை தினமணி நாளிதழில் 01.11.2012 அன்று பிரசுரிக்கப்பட்டது

காந்திஜிக்கு உண்மையான அஞ்சலி

noreply@blogger.com (Nataraj) — Mon, 15 Oct 2012 13:46:00 +0530

காந்தியடிகளை புத்தகத்திலும் ரூபாய் நோட்டிலும் பதித்துவிட்டு காந்திய கோட்பாடுகளைப் புதைத்துவிட்டோம். காந்தீய சிந்தனைகளில் மிக முக்கியமானது அஹிம்சை மற்ற உயிரினங்களை வதைக்காமல் இருத்தல், பாதுகாத்தல் அஹிம்சை என்று பரவலாக உணரப்படுகிறது. ஆனால் அஹிம்சை என்பது இது மட்டுமல்ல. தன்னடக்கத்தின் உச்சகட்டம் தான் அஹிம்சை என்கிறார் காந்தியாடிகள். அதாவது தன்னைப்பற்றி சிந்தனையை குறைத்து மற்றவர்கள் நலனில் அதிக கவனம் கொடுப்பது உண்மையான சுயநலமற்ற நிலை. தன்னடக்கம் என்பது தன்னைப்பற்றி குறைவாக மதிப்பிடுவது அல்ல. தன்னைப் பற்றியல்லாமல் பிறரைப்பற்றி அதிகமாக நினைப்பதே தன்னடக்கம். பிற ஜீவரசிகளை பரிவோடும் பாசத்தோடும் பாதுகாக்க நினைப்பவன் உயர்ந்த அஹிம்சைவாதி, தன்னடக்கம் மிகுந்தவன். இது தான் அஹிம்சையின் இலக்கணம்.

தனது வாழ்க்கையே இந்தியாவிற்கு தான் அளிக்கும் செய்தி என்றார் காந்தியடிகள். தனது சிந்தனைகளையும், கருத்துக்களையும் நடைமுறைப்படுத்தி வாழ்ந்து காட்டினார். எண்ணங்களும், வாக்கும், செயல்களும். ஒருங்கிணைய வேண்டும். சொல்வது ஒன்று செயல்வேறு என்ற நிலையால்தான் பின்னடைவு ஏற்படுகிறது. உண்மையான ஆளுமை என்பது முன் உதாரண செயல்களில்தான் வெளிப்படும். காந்தி மகான், அன்னை தெரேசா, விவேகானந்தர் போன்றவர்கள் நேர்மையின் அடிப்படையில் உழைத்தால் வெற்றி கண்டனர். சமுதாயம் பயன் பெற்றது. ‘கொடுப்பதில் ஆனந்தம்’, “கனிவான மக்கள் ஆனந்தமான நகரம்” என்று காந்தியடிகளின் பிறந்த நாளையொட்டி பல நிகழ்ச்சிகள் நடத்தப்பட்டது நிறைவு தருகிறது.

வாழ்க்கையில் ஒவ்வொரு நாளும் ஏதாவது ஒரு பிரச்சனைகளை நாம் எதிர் கொள்ள வேண்டியிருக்கும். அந்தப்பிரச்சனைகளைத் தீர்பதற்கான முடிவு நமது கையில். எந்த முடிவு எடுப்பது என்பது அன்றாட போராட்டம். சிறு விஷயங்களிலிருந்து பெரிய பாதிப்பை ஏற்படுத்தக்கூடிய கட்டங்களில் நாம் எடுக்கக்ககூடிய முடிவு திருப்பு முனையாக அமையும். பல நேர்வுகளில் நாமும் எடுத்த முடிவைப்பற்றி வருத்தப்படும் நிலை ஏற்படும். அவசரப்பட்டு எடுக்கும் முடிவுகள், யோசிக்காமல் வருவது வரட்டும் என்று அகங்காரத்தோடு செல்லக்கூடிய பாதையை தெரிவு செய்யும் பொழுது இடர்பாடுகள் நிச்சயமாக வரும்.

பேராசையால் பெரு நஷ்டம் என்பதை கண்கூடாக பல நிகழ்வுகளில் பார்க்கிறோம். ஆனாலும் விட்டில் பூச்சிகள் போல் மனிதர்கள் ஆசை என்ற மாயையில் சிக்கி மடிகிறார்கள். ஈமு கோழிப்பண்ணை என்று விளம்பரப்படுத்தி பல கோடி ரூபாய் ஒரு கும்பல் சுருட்டிவிட்டது. ஏமாறுவதற்காகவே சிலர் காத்துக்கொண்டிருக்கிறார்கள் என்று தோன்றுகிறது. பணம் பாதாளம் பாயும் என்பார்கள். பணத்தாசை நம்மை ஆட்டுவிக்கிறது. பண்டம் பரிமாற்றங்களுக்கு பணம் தேவைதான். உபயோகமானதும் கூட. ஆனால் பணம் நமக்கு கீழ்படிய வேண்டுமே தவிர நாம் பணத்திற்கு அடிமையாகக் கூடாது. பணம் நமக்கு உதவக்கூடிய வகையில் வழியைக் கண்டுபிடித்தால் அது மனித குலத்திற்கே சேவை செய்யும். ஆனால் பணம் பேராசைப் பிடியில் சிக்கியவர்களை கட்டி ஆள்கிறது.

பணம் சேகரிப்பு என்பது ஒரு கொடிய நோய். அது பரவி நம்மை ஆட்கொண்டு விடுகிறது. எவ்வளவு பணம் சேர்ப்பது. ஒரு சேர எவ்வளவு அனுபவிக்க முடியும். இருப்பதோ ஒரு வயிறு, இரு கால்கள், இரு கைகள், ஐம்புலன்கள். அதிக பணம் சேர்ந்தவுடன் ஒரு வித சோகம் படர்கிறது. நெஞ்சு குருகுருக்கிறது. ஏதோ ஒரு குற்ற உணர்வு வாட்டுகிறது. பணம் குறுக்கு வழியில் சம்பாதித்திருக்கலாம். பலரை ஏமாற்றி சேர்த்திருக்கலாம். ஏழைகளுக்கு சேர வேண்டியதை மடக்கி வைத்திருக்கலாம்.

இத்தகைய நிலையில் பணக்கார மனிதன் இரண்டு வகைப்படுகிறான். குற்ற உணர்வைப் போக்குவதற்காக மற்றவர்களுக்கு பண உதவி செய்து தன்னை சமாதானப்படுத்திக் கொள்கிறான். குற்ற உணர்விலிருந்து விடுபட முயற்சிக்கிறான். மற்றொரு வகை பேராசைப் பிடியிலிருந்து தப்ப முடியாமல் மனம் நொந்து தன்னையே மாய்த்துக் கொள்ளும் முடிவை எடுக்கிறான். எவ்வளவு பணக்காரர்கள் மகிழ்ச்சியாக இருக்கிறார்கள்! சந்தோஷம் என்பது பணத்தால் வருவதில்லை பணம் இருந்தும் வருவதில்லை.

வாழ்க்கையில் சிலவற்றை விலைபேச முடியாது. பணத்தால் வாங்க முடியாது. அன்பு, பாசம், பரோபகாரம், தியானம், நன்றி மனப்பான்மை நம்முள் வளர வேண்டும். பணத்தால் வாங்க முடியாது. ஆனால் இவற்றைப் பற்றி பலர் யோசிப்பதில்லை, யோசித்தார்கள் என்றால் இந்த அளவுக்கு நாட்டில் ஊழல் பெருகியிருக்குமா, இயற்கை வளங்கள் அழிக்கப்படுகின்றன, மலைகள் மடுவாகின்றன. பெயர்த்தெடுத்த கிரானைட்டுகளை வெளிநாட்டிற்கு ஏற்றுமதி செய்கிறார்கள், ஏற்றுமதி வளர்கிறது என்று இருமாப்படைய முடியுமா? நமது வளங்கள்தான் அழிகின்றன. ஆந்திர மாநிலத்தில் மலைகள் கொடையப்படுவது எல்லை மீறியது என்பதால், மலைகளைப் பாதுகாக்க பல தன்னார்வு தொண்டு நிறுவனங்கள் தோன்றியுள்ளன. ஆயினும் கிரானைட் க்வாரிகளின் அழித்தொழிப்பு தொடர்கிறது. ஆங்கிலேயர் ஆண்டபோது கூட இந்த அளவு கொள்ளைப் போகவில்லை என்று சில கணிப்புகள் கூறுகின்றன. தேசத்தை நேசிப்பவர்களாக இருந்தால் இவ்வாறு செய்வார்களா?

தாராளமயம், உலகளாவிய வர்த்தகம் என்ற புதிய பொருளதார கொள்கைகள் சில வரவேற்கத்தக்க மாற்றங்களை ஏற்படுத்தியிருந்தாலும் அதன் கூடவே ஊழலும் பெருகியுள்ளது என்பதை ஐக்கிய உலக நாடுகள் அமைப்பு கவனத்தில் கொண்டு, 2000-ம் ஆண்டு ஊழல் ஒழிப்பதற்கான கூட்டமைப்பு ஏற்படுத்துவதற்கான தீர்மானம் பொதுச்சபையில் கொண்டு வந்தது. 2005-ம் வருடம் டிசம்பர் 14-ம் தேதி சர்வதேச ஊழல் ஒழிப்பு ஒப்பந்தம் அமலுக்கு வந்தது. ஊழல் நடவாமல் இருப்பதற்கான தடுப்பு வழிகள், கடுமையான சட்டம் அதன் அமலாக்கம், ஊழல் புரிந்தவர்களின் சொத்துக்கள் முடக்கம், சர்வதேச குற்றவாளிகள் இனம் கண்டு சட்டப்படி நடவடிக்கை எடுப்பதற்கு ஒப்புதல் அளித்தல், பொதுத்துறை நிறுவனங்கள் மட்டுமின்றி தனியார்துறை நிறுவனங்களையும் ஊழல் தடுப்பு சட்டத்தின் கீழ் கொண்டு வருதல் போன்ற பல முக்கியமான பிரிவுகள் ஒப்பந்தத்தில் உள்ளன. 2005-ம் ஆண்டு ஒப்பந்தத்திற்கு இந்தியா 2011-ம் வருடம் மே 9-ம் தேதி தான் ஒப்புதல் அளித்தது. ஆனால் இந்திய ஊழல் தடுப்பு சட்டத்தில் மாற்றம் இன்னும் கொண்டுவரப்படவில்லை.

சமீபத்தில் மத்திய புலனாய்வுப்பிரிவுகளின் தேசிய கூட்டத்தில் பேசிய பிரதமர் அவர்கள் சட்டம் மாற்றப்பட வேண்டியதின் அவசியத்தை வலுயுறுத்தியுள்ளார். லஞ்சம் பரிமாற்றங்களில் தனியார் நிறுவனங்களின் இணக்கமாக துணைபோகும் முறையற்ற நடவடிக்கைகளை சட்ட மாற்றங்கள் மூலம் குற்றங்களாக கருதப்பட்டு கடுமையாக அமல்படுத்தப்பட வேண்டும். இங்கிலந்து நாட்டில் லஞ்ச ஒழிப்பு புதுச்சட்டம் “ப்ரைபரி ஆக்ட்” ஜீலை 1 2011-ம் வருடம் அமலுக்கு வந்தது. இந்த சட்டத்தின்படி தனியார் நிறுவனங்களின் மோசடி நடவடிக்கை உள்நாடு மட்டுமின்றி வெளி நாடுகளில் நடைபெற்றிந்தாலும் சட்டம் பாயும். ஏழு வருடம் முதல் 10 வருடம் வரை தண்டனையும் அபராதமும் விதிக்கலாம்.

சட்ட நடவடிக்கை ஒருபுறம் அதே சமயம் நேர்மையாக செயல்படுவர்களுக்கு ஊக்கம் அளிப்பதும் அவசியம்.

அரசு எடுக்கும் ஒவ்வொரு முடிவும் ஒரு ஏழையின் நிலையை மனதில் இறுத்தி எடுக்கப்படவேண்டும் என்றாரே காந்தியடிகள், எவ்வளவு உண்மை! நாம் ஈட்டுவது நமது முயற்சியில், உழைப்பில் பெற வேண்டும். ஒரு பதவியில் இருப்பதாலோ அல்லது பதவியில் இருப்பவர்கள் உறவினர் என்ற முறையில் ஏதாவது பெற்றால் அது எந்த வகையிலும் நேர்மையான முறை ஆகாது. இதைத்தான் காந்தியடிகள் அவர்கள் திரும்பத் திரும்ப நேர்மையின் உறை கல்லாக ஒவ்வொரு செய்கையையும் நாம் சோதித்து முடிவெடுக்க வேண்டும் என்று வலியுறுத்துகிறார். சத்திய சோதனை செய்யும் மனப்பான்மையை வளர்த்துக் கொள்வது கடினம். நேர்மை பாதையிலிருந்து வழுவா நிலை எய்துவதற்கு கடுமையான பயிற்சியும் சத்தியத்தின் மீது அசையா நம்பிக்கையும் அவசியம்.

உலக நாடுகளில் இளம் வயதுள்ள ஜனத்தொகை அதிகமாக உள்ள நாடு நமது நாடு. உலகிற்கு உழைப்பாளிகளை இந்தியா அளிக்கும். அதற்கு நாம் இளைஞர்களை நல்ல நிலையில் தயார் செய்ய வேண்டும். செயலாக்கத்தையும் தனித்திறன் வளர்ப்பது ஒரு பக்கம். அதே சமயம் ஆத்ம பலத்தை வளர்க்க வேண்டும். வலிமையான பாரதம் உருவாக வேண்டும் என்றால் மனித வளம் உயர வேண்டும். அதற்கு கீழ்கண்ட ஏழு தகுதிகள் அவசியமாகிறது.

n நாட்டுப்பற்று, இந்தியாவைப் பற்றி உயர்வான எண்ணம், நாடு மேன்மையுற தன்னை அர்ப்பணித்தல்.

n ஆரோக்கியமான வாழ்க்கை, நன்நடத்தை, மது, மாது, போதை, முறையற்ற உறவு போன்ற கெட்ட பழக்கங்களை தவிர்த்தல்.

n யோகா, தியானம் மூலம் மனவலிமையை வளர்த்தல், மனவலிமை வளர்ந்தால்தான் தீர்க்கமான முடிவுகள் எடுக்க முடியும்.

n அறிவாற்றல் பெற வேண்டும் அறிவாற்றலை ஆக்கப்பூர்வமாக உயயோகிக்கும் திறன் வளர்க்க வேண்டும்.

n இந்தியாவின் கலாச்சாரத்தை பாதுகாக்க வேண்டும். பேணிப்போற்ற வேண்டும்.

n ஆத்ம பலம் பெற வேண்டும்

n பரந்த விரிந்த பார்வை, உலகளாவிய சிந்தனையை வளர்த்துக் கொள்ள வேண்டும்.

இந்தியாவின் ஒருமைப்பாடு, வேற்றுமையில் ஒன்றுமை, இணைந்திருப்பதற்கு இறைவுணர்வும் ஆன்மீக பலமும் தான் முக்கிய அடிப்படை காரணம் என்பது நிதர்சன உண்மை. சுவாமி விவேகானந்தார் கூறுவார் சகிப்புத்தன்மையே இந்தியாவின் பலம் நாம் சகித்துக்கெள்ள முடியாதது சகிப்புத்தன்மையின்மையே!

காந்தியடிகளின் பிறந்த நாள் உலக அஹிம்சை தினமாக அனுவரிக்கப்படுகிறது. வன்முறையை ஒழித்து அமைதிகாக்க உறுதியெடுக்க வேண்டும். ஊழலின் பாதிப்புதான் கொடுமையான வன்முறை. மனித உரிமை மீறலும் கூட. சத்தியத்தை நம்பவேண்டும். ஆத்ம சக்தியின்றி இலக்கை அடைய முடியாது. அவை இருந்தால் தோல்வி நம்மை தழுவாது.

காந்தி மகானுக்கு நாம் செலுத்துக்கூடிய குறைந்தபட்ச அஞ்சலி ஊழல் ஓழிப்பு ஒன்றுதான்.

000

see the artilce

இக்கட்டுரை தினமணி நாளிதழில் சனிக்கிழமை நாள்.13.10.2012 அன்று பிரசுரிக்கப்பட்டது.

மக்கள் துணையே மகேசன் துணை

noreply@blogger.com (Nataraj) — Mon, 15 Oct 2012 13:36:00 +0530

ஒரு புகைப்படம் ஆயிரம் செய்திகளைச் சொல்லும் ஒடிசா மாநிலத்தில் சமீபத்தில் நடந்த தர்ணா போராட்டத்தில் பெண் போலீஸ் பிரமீளா பதி போராட்டத்தில் ஈடுப்பட்டவர்கள் தாக்கியதால் காயமுற்றார். செய்தியில் வந்த புகைப்படத்தில் பிரமீளாவை ஒருவர் மற்றவர்களிடமிருந்து காப்பாற்றி அழைத்துச் செல்கிறார். பின்னால் இருந்து ஒருவர் உருட்டுக் கட்டையை ஓங்கியவண்ணம் பின் தொடர்கிறார். இன்னொருவர் கண்ணில் அனல் பறக்கிறது, வன்முறை வழிகிறது. மற்றொருவர் கதறும் அப்பெண்ணை வீடியோ காமிரா மூலம் முகபாவங்களை பதிவு செய்கிறார்.

தெருவிற்கு கூட்டமாக வந்துவிட்டால் நல்லது கெட்டது என்ற உணர்வு மறந்து விடுகிறது. சேர்த்திருக்கும் கும்பலின் ஒட்டு மொத்த குணம் வெளிப்படுகிறது. தவறு செய்தாலும் நம்மை யாரும் இனம் கொள்ள முடியாது என்ற தைரியம் வந்து விடுகிறது இந்த உருட்டுக்கட்டை கலாச்சாரம் சென்னையில் கல்லூரித் தேர்தலில் இரு பிரிவினரிடையே நடந்த மோதலில் பிரதிபலித்தது. கூச்சலிடும் மாணவர்களைப்பற்றி தமிழ் ஆசிரியரின் அங்கலாய்பு எவ்வளவு உண்மை “ஒண்ணு சேர்ந்தா குப்பை, தனியா மாணிக்கம்”! எதற்கெடுத்தாலும் போராட்டம் என்று நிலை வந்தால் நாட்டின் முன்னேற்றம் தான் பாதிக்கப்படும். போராட்டங்கள் நடத்துபவர்கள் சிந்திக்க வேண்டும்.

முன்னறிவிப்பில்லாத கூட்டங்கள், போராட்டங்கள், திசை திருப்பும் அறிக்கைகள், அப்பாவி மக்களை வன்முறையில் ஈடுபடுத்துவது, காவல்துறைக்கு பெரும் சவாலாக உள்ளது. ஒடிசா மாநிலத்தில் காவலர் பிரமீளா தாக்கப்பட்ட சம்பவம் இத்தகைய முறையற்ற போராட்டங்களின் விளைவு. ஜனநாயக அமைப்பில் எதிர்ப்புகளை தெரிவிக்க உரிமையுண்டு. அமைதியாக துவங்கும் இத்தகைய கூட்டங்கள் தலைவர்களின் கட்டுப்பாட்டை மீறி சட்டம் ஒழுங்கிற்கு ஆபத்து விளைவிக்கும் பொழுது காவல்துறை நடவடிக்கை எடுக்க வேண்டிய நிலை வரும். பொது இடங்களில் கூட்டங்கள் நடத்துவதற்கு காவல்துறையின் அனுமதி பெற வேண்டும். அனுமதி அளிக்கும் உத்தரவுவில் செய்ய வேண்டியவை, செய்யக்கூடாதவை, கடைபிடிக்க வேண்டிய விதிகள் தெளிவாக போடப்பட்டு கூட்டம் ஏற்பாடு செய்யும் அமைப்பின பெறுப்பாளருக்கு சார்வு செய்யபட்டு பெற்றுக் கொண்டதற்கான கையொப்பமும் பெறப்படும்.

காவல்துறை அனுமதியோடு நடத்தப்படும் கூட்டங்களில் பல முறை விதிக்கப்பட்டுள்ள கட்டுப்பாடுகள் மீறப்படும். உதாரணமாக பொதுப் போக்குவரத்திற்கு இடையூறு இல்லாமல் கூட்டமோ ஊர்வலமோ நடத்தப்பட வேண்டும் என்பது விதி. ஆனால் தடையிருந்தும் தடைகளை தடையின்றி மீறினால் தான் ஆர்ப்பாட்டத்திற்கு வெற்றி என்று கணக்கிடுகிறார்கள்! பாதுகாப்புப் பணியில் இருக்கும் காவல் துறையினருக்கு எப்படியோ நிலமையை சமாளித்தால் போதும் என்று இத்தகைய தடைமீறல்களை கண்டும் காணாமல் இருக்க வேண்டிய நிர்பந்தம். எந்த விதியை கராராக அமல்படுத்துவது, எதை தளர்த்துவது என்பது பொறுப்பில் உள்ள காவல்துறை அதிகாரி முடிவு எடுக்க வேண்டும்.

கூட்டம் ஏற்பாடு செய்பவர்களோடு நயமாக பேசி விதிமுறைகளை நடைமுறைப்படுத்துவது ஒரு விதம். ஆரம்ப முதலே கெடுபிடி செய்து விதிகளை முறையாக கடைபிடிக்க வைப்பது இனொரு வழி. கடனே என்று முறை கழிக்கும் பாதுகாப்பு அலுவலர்கள், விதிகள் மீறப்பட்டாலும் கண்டு கொள்ளாமல் விட்டு விடும் நிலையும் உண்டு. இந்த சொதப்பல் அணுகுமுறைதான் பல பிரச்சனைகளுக்கு வித்திடுகிறது. அமைதியான கூட்டங்களில் கலகக்காரர்கள் கலந்துவிடுகிறார்கள். நிலமை கட்டுக்கடங்காமல் போக காவல்துறை கடைசி யுக்தியான கண்ணீர்புகை, தடியடி துப்பாக்கி சூடு என்ற நடவடிக்கை எடுக்கும் நிர்பந்தத்திற்கு தள்ளப்படுகிறார்கள். சில கூட்டங்கள் தடையை மீறி பிரச்சனை செய்ய வேண்டும் என்றே நடத்திப்படுகிறது. இத்தகைய சமூக விரோத செயல்கள், அரசியல் சாசனம் அளித்துள்ள உரிமைகளின் துஷ்பிரயோகம். எந்த ஒரு அரசும் அராஜகத்தை சகித்துக் கெள்ள முடியாது. சகித்துக் கொள்ளவும் கூடாது.

ஆர்ப்பாட்டங்கள், பொதுக்கூட்டங்கள், பாதுகாப்பு முறைகள், சட்டவிரோத கூட்டங்களை கட்டுப்படுத்த எடுக்க வேண்டிய சட்டத்திற்கு உட்பட்ட வழிமுறைகள் பற்றிய பயிற்சி காவலர்களுக்கு தொடர்ந்து அளிக்கப்படுகிறது. காவல் பணி அடிப்படைப் பயிற்சியிலும், புத்தாக்கப்பயிற்சியிலும் இவை விளக்கப்படுகின்றன. செயல் வழியிலும் பயிற்றுவிக்கப்படுகிறது. பயிற்சியில் வியர்வை சிந்தினால் களத்தில் இரத்தம் சிந்த நேராது என்பது முது மொழி. ஆனால் பயிற்சியில் கற்றவை எந்த அளவிற்கு நடைமுறைப் படுத்தப்படுகிறது என்பதுதான் பிரச்சனைக்குரியது. சில நேர்வுகளில் நடைமுறைப்படுத்த முடியாத நிலையும் ஏற்படுகிறது. இங்குதான் காவல்துறையின் உயர் அதிகாரிகளின் ஆளுமை சோதிக்கப்படுகிறது.

பொது அமைதி என்பது அன்றாட சமுதாய நிகழ்வுகளின் அடிப்படையில் மாறுபடும். ஒரு சீராக இருக்காது. உள்ளூர் சச்சரவுகள், வட்டார நிகழ்வுகள், மாநிலம், நாடு ஏன் உலக அளவில் நடக்கும் சம்பவங்களின் தாக்கம் இவற்றைப் பொறுத்தது. செய்திகள் மின்னல் வேகத்தில் பறக்கும் இந்நாளில் உடையும் செய்திகளை ஆராயாவிட்டால் உறைய வைக்கும் காட்சிகளை எதிர் கெள்ள நேரிடும்.

ஜாதிப் பிரச்சனைகள் அதிகமாக தலைதூக்கும் மாநிலம் பீஹார். அங்கு ஒவ்வொரு ஜாதித்தலைவரும் ஒரு பாதுகாப்புப்படை உருவாக்கி தொண்டர்கள் என்ற பெயரில் வலைய வருவார்கள். அரசியலில் ஜாதிகளின் ஆதிக்கம் பீஹார் மாநிலத்தில் அதிகம். ரணவீர் சேனா என்ற உயர் ஜாதி பாதுகாப்புப்டை தலைவர் பிரம்மேஷ்வர் சிங் இந்த வருடம் ஜீன் மாதம் கொல்லப்பட்டார்.. அதன் விளைவாக பெரும் கலவரம் ஏற்பட்டது. வாகனங்கள் எரிக்கப்பட்டன. சாலைகள் முடங்கயது. மதிப்பிடமுடியாத சொத்து சேதமாகியது.

காவல்துறைக்கு தர்மசங்கடம். கடுமையான நடவடிக்கை எடுத்தால் உயிர் இழப்பு ஏற்பட வாய்ப்புண்டு. அதன் விளைவுகள் மேலும வன்முறையைத் தூண்டக்கூடும்.. உடனடி நடவடிக்கை எடுக்காவிட்டால் மெத்தனப் போக்கு என்று குற்றச்சாட்டிற்கு ஆளாக நேரிடும். ஆனால் நிதானமான நடவடிக்கைதான் பீஉறார் காவல்துறை எடுத்தது. காலப்போக்கில்தான் நிலமையும் கட்டுக்குள் வந்தது. காவல்துறை எடுத்த நடவடிக்கைப் பற்றி விவரிக்கும் பொழுது, பீஹார் டிஜிபி, தனது அதிகாரிகளுக்கு கடுமையான நடவடிக்கை தவிர்த்து, பார்த்து, கவனித்து நிதானமாக செயல்படவேண்டும் என்று அறிவுறுத்தியதாக கூறியுள்ளார். வன்முறை நிகழம் பொழுது கண்டவுடன் சுட உத்தரவு பிறப்பபிக்கப்பட்டுள்ளது என்று ஊடகங்களில் செய்தி வரும். ஆனால் அவ்வாறு ஒரு உத்தரவும் பிஹார் போலீஸ் வன்முறையை கட்டுப்படுத்த எச்சரிக்ககை கொடுக்கவில்லை. இதன்விளைவாக கடுமையான நடவடிக்கை எடுக்க தவறியதாக குற்றம் சாட்டப்பட்டனர்.

மும்பையில் ஆகஸ்ட் 10-ம் நாள் அஸ்ஸாம் மாநில மதவாத வன்முறை சம்பவங்களுக்கு கண்டனம் தெரிவிக்கும் வகையில் பேரணி நடத்தப்பட்டது. இந்த கண்டனக் கூட்டத்தில் வன்முறை வெடித்தது. இரு இளைஞர்கள் உயிர்ழிந்தனர் மேலும் 50-க்கும் மேற்பட்டவர் பத்திரிக்கையாளர்கள் உள்பட காயமுற்றனர். அரசு ஊடக வண்டிகள் சேதப்படுத்தப்பட்டன. மும்பாய் போலீஸ் தீர்கமான உடனடி நடவடிக்கை எடுத்திருந்தால் உயிரிழப்பு மற்றும் பொருள் சேதங்கள் தடுத்திருக்கலாம் என்ற விமர்சனம் எழுந்தது. இத்தகைய சுணக்க அணுகுமுறை கலகக்காரர்களுக்கு ஊக்கம் அளிக்கும் வகையில் அமையும், வரும் காலங்களில் கோரமான கலவரங்கள் நிகழ்வதை தடுக்க முடியாது என்ற வாதங்கள் வைக்கப்பட்டன. இதன் எதிரொலியாக நேர்மையான அதிகாரி என்று பாராட்டப்பட்ட காவல் ஆணையர் ஆரூப் பட்நாயக் மாற்றப்பட்டார். பதவி உயர்வு நிமித்தமாக மாற்றப்பட்டார் என்று அரசு விளக்கம் கொடுத்தாலும், கடுமையான நடவடிக்கை எடுக்க தவறியதுதான் காரணம் என்பது ஊரறிந்த உண்மை.

2011 ஆகஸ்ட் மாதம் லண்டன் மற்றும் அண்மை நகரங்களில் பெரும் கலவரம் வெடித்தது. அப்போது லண்டன் போலீஸார் உடனடியாக கடும் நடவடிக்கை எடுக்கத்தவறினர் என்று அரசே குற்றம் கூறியது. ஆனால் லண்டன் போலீஸ் ஆணையர் எதிர் தாக்குதல் நடத்தக்கூடாது என்ற முடிவில் தெளிவாக இருந்தார். கடும் நடவடிக்கையால் உயிரிழப்பிற்கு வாய்ப்புண்டு, அதன் விளைவுகளை போலீஸார் சந்திக்க வேண்டும் பிரச்சனை பூதாகாரமாக உருவெடுக்கும் என்ற லண்டன் போலீஸார் வாதத்திற்கும் ஆதரவு இருந்தது. பல கோடி டாலர் சொத்து பாழடைத்தது. கலவரக்காரர்கள் வெளிப்படையாக கொள்ளையில் ஈடுபட்டனர். அதையும் புகைப்படம் எடுத்து சமுதாய இணையதளத்தில் வெளியிட்டனர். காலம் தாழ்ந்து லண்டன் போலீஸார் நடவடிக்கை எடுத்தப்பிறகு தான் கலவரம் ஒய்ந்தது.

நுண்ணறிவு தகவல்கள்மூலம் பிரச்சனைகளை அறிந்து ஆராய்ந்து அசம்பாவிதங்களை தடுக்க வேண்டும். சம்பவங்கள் நிகழ்ந்தால் உடனடி நடவடிக்கை மூலம் வன்முறை பரவாமல் தடுத்தல், முக்கியமாக கலவரக்காரர்களை கைது செய்து சட்டப்படி நடவடிக்கை எடுத்தல் என்பது தான் காவல்துறையின் சரியான அணுகுமுறையாக இருக்கவேண்டும். பல சமயங்களில் பிரச்சனைகளை பெரிதாக்க வெளியிலிருந்து தூண்டுவார்கள். மக்களை திசை திருப்ப அறிக்கைகள் விடப்படும். போராட்டம் நடத்துபவர்கள் பெண்களையும் குழந்தைகளையும் முன் நிறுத்தி காவல்துறையை செயலிழக்கக் செய்வார்கள். சமீபதில் கூடங்குளம் போராட்டத்தில் ஒரு சிறுமி காவல் படையினர் முன் நின்று கொண்டிருந்த படம் வெளியானது. ஏதோ சடுகுடு விளையாடுவது போல் அந்த சிறுமி சிரித்துக் கொண்டிருக்கிறாள். காவலர்களும் விளையாட்டாக பார்க்கிறார்கள். சமயோஜிதமாக, மிக கட்டுப்பாடுடனும் அதே சமயம் திறமையுடன் தமிழக காவல் துறை கூடங்குளம் பிரச்சனையை கையாள்வதை பாராட்ட வேண்டும்.

மேலை நாடுகளில் கலவரங்கள் எதிர்கொள்ளும் அணுகுமறை வித்தியாசப்படும். போராட்டத்தில் ஈடுபடுபவர்கள் எதிரிகள் அல்ல நம் மக்கள்தான். ஆதலால் பொறுமையுடன் தற்காப்பு நடவடிக்கை மட்டும் எடுக்க வேண்டும். மனித உயிர் விலை மதிக்க முடியாதது. எந்த விதத்திலும் உயிர் பலி தவிர்க்கப்பட வேண்டும். பொருள் சேதம் ஏற்பட்டாலும் அவை காப்பீடு செய்யபட்டிருக்கும். ஈடு கிடைத்துவிடும் பொருள்களை காப்பாற்ற வன்முறையைதுண்டும் நடவடிக்கை எடுக்கக் கூடாது. அசம்பாவிதங்களை வீடியோ மூலம் பதிவு செய்து, குற்றம் புரிந்தவர்கள் மீது சட்டப்படி நடவடிக்கை எடுத்தால் வருங்காலத்தில் கலவரங்களை தவிர்க்கலாம் என்பது மேலை நாட்டு பாதுகாப்பு அதிகாரிகளின் நிலைப்பாடு.

உடனடி கடும் நடவடிக்கை எடுத்து நிலமையை சமாளிப்பதா, காலம் தாழ்ந்தாலும், சேதம் ஏற்பட்டாலும் நிதானமாக குற்ற வழக்குகள் பதிவு செய்து குற்றவாளிகளுக்கு சட்டப்படி தண்டனைப் பெற்றுத்தருவதா, அல்லது இரண்டு வழிகளையும் கலந்து செய்வதா? இது காவல் துறைக்கு உயர் அதிகாரிகளுக்கு சவால்! எந்தவழி தெரிவு செய்தாலும் விமர்சனங்கலிருந்து தப்ப முடியாது. ஏதற்கெடுத்தாலும் காவல்துறையை பழிப்பதற்கென்றே ஒரு சிலர் இருக்கிறார்கள். மக்கள் நலனைப்பற்றி அக்கறையில்லை. ஊர் இரண்டுபட்டால்தான் அவர்களுக்கு ஆதாயம்.

ஆனால் காவல்துறை எந்த முடிவு எடுத்தாலும் பொது அமைதி காப்பதே முதல் நோக்கம் என்ற அளவில் நேர்மையாக செயல்பட்டால் மக்கள் துணை இருப்பார்கள். மக்கள் துணையே மகேசன் துணை!

----

இக்கட்டுரை தினமணி நாளிதழில் 18.09.2012 அன்று பிரசுரிக்கப்பட்டது

அவசர உலகில்…

noreply@blogger.com (Nataraj) — Mon, 15 Oct 2012 13:33:00 +0530

ஒவ்வொரு நாளும் எவ்வளவோ நிகழ்வுகளைப் பார்க்கிறோம், கேள்விப்படுகிறோம். ஆனால் சில செய்திகள்தான் நெஞ்சைத் தைக்கின்றன, மனம்பதபதைக்கிறது ‘என்ன கொடுமையப்பா’ என்று சீயோன் பள்ளியில் படித்த குழந்தை ஸ்ருதியின் கோர மரணம் எல்லோர் மனதையும் பாதித்தது. இத்தகைய விபத்துகளுக்கு முடிவே இல்லையா என்ற கேள்வி எழுகின்றது. சில நாட்கள் சம்பவத்தைப்பற்றிய சர்ச்சை விவாதிக்கப்படும். அதற்குள் வேறு ஏதாவது சம்பவம் நிகழும். பழைய சம்பவம் மறக்கப்படும்.

கோயம்பத்தூரில் இரண்டு வருடங்களுக்கு முன்னால் தனியார் வேன் ஒட்டும் மோஹன்ராஜ், மிஸ்கின், ரித்திக் என்ற இரண்டு பச்சிளம் குழந்தைகளை பணத்திற்காக கடத்தி பின்பு கொன்ற சோக சம்பவம் மறந்திருக்க முடியாது. கயவன் மோஹன்ராஜ் பின்பு போலீஸாரால் என்கௌண்டரில் சுடப்பட்டு மாய்ந்தான். மோஹன்ராஜ் வழக்கமாக இந்த இரண்டு குழந்தைகளையும் வேனில் பள்ளிக்கு அழைத்து செல்பவன். அவன் மனதில் இத்தகைய குரூர எண்ணம் எவ்வாறு வந்தது! தனிமனித ஒழுக்கச் சீரழிவு இந்த அளவுக்கு போய்விட்டதே!

“தினமும் நூற்றுக்கணக்கான பள்ளிக்கு செல்லும் குழந்தைகள் பல ஆபத்திற்கு உள்ளாகிறார்கள். பள்ளி சென்று வருவதே பெரிய சவாலாக உள்ளது,” என்று சில வருடங்களுகளுக்கு முன் சென்னையில் பள்ளிச் சிறுவன் ஹர்ஷன் விபத்தில் இறந்தபோது பலர் கூக்குரல் எழுப்பினர். அதுவும் அந்த சிறுவன் பள்ளியின் வேனில் வீட்டுக்கு திரும்பி வண்டியிலிருந்து இறங்கி தந்தையின் கண்முன்னாலேயே அதே பள்ளி வேன் சிறுவன் மீது ஏறி உயிரிழந்தான்.

சியோன் பள்ளி சுருதி விபத்திற்கு ஒரு வாரத்திற்குள் ஆவடியில் இன்னொரு விபத்து. ஒன்றரை வயது சஞ்சய் தனது சகோதரர்கள் சந்தோஷ், சுதாகர் பள்ளிக்கு வேனில் செல்வதை பார்க்கையில் பள்ளி வேன் சக்கரத்தில் மாட்டிக் கொண்டு இறந்தான். இதுவும் பெற்றோர் கண்ணெதிரில்.

ஜீலை 27-ம் தேதி மூன்று வயது சுஜிதா ஆம்பூர் ஈச்சம்பட்டு அருகில் பள்ளி வேனில் சிக்கி உயிரிழந்தாள். ஆகஸ்ட் 3-ம் தேதி மதுரைக்கு அருகில் ஆறு வயது ஜெயலஷ்மி பள்ளியிலிருந்து அதிக குழந்தைகளை ஏற்றி வந்த ஷேர் ஆட்டோவிலிருந்து விழுந்து உயிரிழந்தாள்.

சுருதி, ஹர்ஷன் அவர்களது பள்ளி வேனே எமனாக வாய்த்ததுபோல காஞ்சீபுரம் படப்பை அருகில் நடந்த விபத்தில் ஐந்தரைவயது ஆகாஷ் பள்ளி வேனைவிட்டு இறங்கி சாலையைக்கடக்கும் பொழுது அதே வேன் அவன் மீது ஏறியது என்ன கொடுமை.

சில வருடங்களுக்கு முன்னால் நிகழ்ந்த ஹர்ஷன் விபத்திற்குப் பின் எல்லா பள்ளி வாகனங்களிலும் ஒட்டுனரைத்தவிர நடத்துனரும் பணி அமர்த்தப்பட வேண்டும் என்ற உத்தரவு பிறப்பிக்கப்பட்டது. அப்படி இருந்தும் அகாஷ் அவனது பள்ளி ஊர்தியிலேயே சிக்கி உயிரிழந்தான்.

சில மாதங்களுக்கு முன்னால் பஞ்சாப் மாநிலம் அம்பாலா மாவட்டம் பேகதா என்ற இடத்தில் குழந்தைகளை பள்ளிக்கு ஏற்றிச் சென்ற மினி வேன் லாரியோடு மோதியதில் 11 குழந்தைகள் மாண்டன, இருபதுக்கும் மேற்பட்ட குழந்தைகள் காயமடைந்தன. இது தவிர பொது இடங்களில் அரசுத்துறையே மேற்கொள்ளும் பல்வேறு செப்பனிடும் பணிகளில் பள்ளங்கள் நிரப்பபடாமல் விட்டுவிடுவதால் விளையாடும் குழந்தைகள் இத்தகைய குழிகளில் சிக்கி உயிரிழக்கும் விபத்துகள் அதிகமாக நிகழ்கின்றன. இத்தகைய விபத்துகளில் உயிரைக் காப்பாற்றுவது மிக கடினம். அதற்குத் தேவையான உபகரணங்களும் உடனடியாக கிடைப்பதில்லை.

ஹரியானா மாநிலத்தில் மாஹி என்ற 4 வயது சிறுமி தண்ணீருக்காக ஆழமாக தோண்டப்பட்ட குழியில், கடந்த ஜுன் மாதம் தவறி விழந்து சிக்கிக் கொண்டாள். அதுவும் அன்று அவளது பிறந்த நாள். அந்த கொண்டாட்டத்தில் விளையாடும் பொழுது அதள பாதாளத்தில் விழுந்தாள். காவல்துறை, ராணுவவீரர்கள், தேசிய ராணுவவீரர்கள் 70 அடி குழியிலிருந்து குழந்தையை மீட்பதற்காக போராடினர். விழுந்த குழிக்குப் பக்கத்தில் இன்னொரு குழி தோண்டி அடியில் இரண்டு பள்ளங்களையும் இணைக்கும் சுரங்க பாதை அமைத்து குழந்தையை லாவகமாக மீட்கும் நுட்பமான பணி நிறைவேற்ற 48 மணி நேரம் பிடித்தது. இறந்த குழந்தையைத்தான் எடுக்க முடிந்தது. அதன் பிறகு அஜாக்கரதையாக குழி வெட்டியவர் மீது குற்ற நடிவடிக்கை எடுக்கப்பட்டது. ஆனால் விழிப்புணர்வு வந்ததா என்றால் அது கேள்விக்குறி. அடுத்த விபத்து நிகழ காத்துக் கொண்டிருக்கும்.

உயர் நீதி மன்றம் பள்ளிக்குச் செல்லும் குழந்தைகளின் பாதுகாப்பு மேம்படுத்த வேண்டும் என்ற அடிப்படையில் அதற்கு உடனடியாக தக்க நடவடிக்கை சம்பந்தப்பட்ட அதிகாரிகள் எடுக்கக் வேண்டும் என்று அறிவுறுத்தியுள்ளது. குழந்தைகளை ஏற்றிச் செல்லும் பள்ளியின் வேன்களில் கடைபிடிக்க வேண்டிய விதிமுறைகள், பள்ளி நிர்வாகத்தின் கடமைகள், பெற்றோர்களின் பொறுப்பு, சம்மந்தப்பட்ட அரசு அதிகாரிகளின் உரிய நடவடிக்கை இவையெல்லாம் ஒருங்கிணைந்தால் தான் பள்ளிக் குழந்தைகளுக்கு உரிய பாதுகாப்பு உறுதி செய்ய முடியும்.

உச்ச நீதிமன்றம் தில்லிக்கு அருகில் பல குழந்தைகள் உயிரிழந்த சாலை விபத்து சம்பந்தமாக தாக்கல் செய்யப்பட்ட பொது நல வழக்கில் இத்ததகைய விபத்திலிருந்து குழந்தைகளைப் பாதுகாக்கக் கடைபிடிக்க வேண்டிய விதிமுறைகளை பட்டியலிட்டுள்ளது. அதன்படி குழந்தைகள் பயணிக்கும் எல்லா பள்ளி வாகனங்களும் மஞ்சள் நிறம் பூசப்பட வேண்டும். பள்ளி வாகனம் என்ற அறிவிப்புப் பலகை வண்டியின் முன் மற்றும் பின் பகுதியில் வைக்கப்பட வேண்டும். அவசர சிகிச்சைப் பெட்டி இருக்க வேண்டும். வேகக்கட்டுப்பாடுக் கருவி பொருத்த வேண்டும். வண்டியின் ஜன்னலில் பாதுகாப்பு வலை கம்பிகள் இருக்க வேண்டும். வண்டியில் கதவுகள் பூட்டப்பட வேண்டும். வண்டியில் குந்தைகளை கவனிக்க நடத்துனர் அமர்த்தப்படவேண்டும். வண்டி ஒட்டுனர் சுமார் ஐந்து வருடம் பேருந்து ஒட்டும் அனுபவம் பெற்றிருக்க வேண்டும். போக்குவரத்து விதி மீறல்கள் குற்றங்களுக்கான தண்டனை பெற்றிருக்கக் கூடாது. மதுபானம் அருந்தி வண்டி ஒட்டியதற்கான குற்றம் ஒருமுறை புரிந்திருந்தால் கூட அவரை நியமிக்கக் கூடாது. பள்ளியின் ஆசிரியர் அல்லது குழந்தைகளின் பெற்றோர் சந்தர்ப்பம் கிடைக்கும் பொழுது வண்டியில் பயணம் செய்து பாதுகாப்பு விதிகள் பின்பற்றப்படுகின்றனவா என்பதை கண்காணிக்க வேண்டும்.

2011-ம் வருடம் 3,90,884 மக்கள் விபத்துக்களில் உயிர் இழந்தனர். 2001-11, பத்து வருடங்களில் விபத்துகளில் உயிரிழந்தவர்களின் எண்ணிக்கை 44.2 சதவிகிதம் உயர்ந்துள்ளது என்பது கவலைக்குரியது. ஜனத்தொகை கணக்குப்படி 14 வயதுக்குட்ப்பட்ட குழந்தைகளின் எண்ணிக்கை மொத்த ஜனத்தொகையில் சுமார் 30 சதவிகிதம் விபத்தில் மடியும் குழந்தைகள் மொத்த உயிரிழப்பில் சுமார் 7 சதவிகிதம். மேலும் 61 சதவிகிதம் 15 வயதுலிருந்து 44 வயதுக்கு உட்பட்டவர்கள் தான் இம்மாதிரி விபத்துக்களில் சிக்கி உயிரிழக்கின்றனர் உழைக்கும் கரங்களை இழக்கிறோம், பாதிப்பு குடும்பத்திற்கு மட்டுமல்ல மொத்த சமுதாயத்திற்கும் ஏற்படுகிறது.

பள்ளி வண்டிகள் பிரத்யேகமாக நல்ல முறையில் பராமரிக்கப்பட வேண்டும். ஒட்டுனர்களுக்கு பள்ளி வாகனம் கவனமாக ஒட்டுவதற்கான சிறப்புப் பயிற்சி அளிக்க வேண்டும். குழந்தைகள் வண்டியில் ஏறி அமர்ந்த பிறகுதான் நகர வேண்டும். பயிற்சிக் பெற்ற நடத்துனர் ஒவ்வொரு வண்டியிலும் குழந்தைகளை மேற்பார்வையிட இருக்க வேண்டும். குழந்தைகள் பள்ளி வாகனங்களிலிருந்து இறங்கி சாலையை கடக்கும்பொழுது அதிகமான விபத்துக்கள் நிகழ்கின்றன. குழந்தைகள் வாகனத்தின் முன்னால் அல்லது பின்னால் சாலையைக்க கடக்கக் கூடாது. எதிரும் புதிரும் வரும் வாகனங்களை பார்க்க முடியாது. பள்ளியின் வாகனம் நகர்ந்த பிறகு முன்னும் பின்னும் பார்த்து சாலையைக் கடக்க வேண்டும். குழந்தைகள் பயணிக்கும் வாகனங்கள் தனியாருடையதோ அல்லது பள்ளியின் பராமரிப்பில் உள்ளதாக இருந்தாலும் விதிகள் கடைபிடிக்கப்பட்ருக்கின்றனவா என்பதை உறுதி செய்ய வேண்டியது பள்ளி நிர்வாகத்தின் கடமை. பள்ளியின் உயர்மட்டக் குழு மேற்பார்வையிட வேண்டும்.

மாணவர்களுக்கு இலவச பஸ் பாஸ் அரசாங்கம் வழங்குகிறது. அவர்களுக்கென்று காலையும் மாலையும் சிறப்பு அரசு ஊர்திகள் ஏற்பாடு செய்தால் மக்களுக்கு நிம்மதியைத்தரும் குழந்தைகள் தான் நமது நாட்டின் எதிர்காலத்தை தாங்கப்போகிறார்கள். அவர்களைப் பேணுவது நமது கடமை.

தனது பத்திரிக்கைத்துறை அனுபவத்தில் இத்தகைய கோர சம்பவத்தை செய்தியாக அனுப்புவதில் தனக்கு பெரும் தலைகுனிவு ஏற்பட்டது என்று அஸ்சாம் மாநிலம் குவாத்தியில் போன மாதம் அசிங்கமான முறையில் பொது இடத்தில் ஒரு இளம் பெண் மானபங்கம் செய்யப்பட்ட நிகழ்வை விவரிக்கையில் ஒரு செய்தியாளர் மனக் குமுறலுடன் தெரிவித்தார். இந்த தலைகுனிவு போதாது என்று ஜீலை மாதம் மங்களூரில் கடற்கரை ஓர கேளிக்கை விடுதியில் நடந்த ஒரு நிகழ்ச்சியில், கலாச்சார பாதுகாவலர்கள் என்று சொல்லிக் கொண்டு அங்கு கூடியிருந்த விருந்தினர்கள் மற்றும் பெண்களை தாக்கியதாக செய்தி வந்தது. கேளிக்கையில் ஈடுபட்டவர்களை கண்முடித்தனமாக தாக்கியது மட்டுமின்றி தகாதவார்த்தைகளால் திட்டியுள்ளார்கள். காவல்துறையின் தலையிட்டு நடவடிக்கை எடுத்த பிறகு நிலமை சிரானது.

இத்தகைய அத்துமீறல்கள் கடுமையாக கண்டிக்கப்பட வேண்டும். தனி மனித சுதந்திரத்தில் தலையிடக்கூடாது. சுதந்திரம் என்பது மற்றவர்களின் உரிமைகளை பாதிக்காத வகையில் அனுபவிக்க மட்டும் தான் சட்டத்தில் இடமுண்டு. தடியெடுத்தவன் தண்டல்காரன் என்ற நிலை வந்தால் குழப்பம் தான் விளையும்.

அஸ்சாம் மாநிலத்தில் இனக்கலவரம் மலைவாழ் மக்களுக்கும் அண்டை நாடான பங்களாதேசத்திலிருந்து இடம் பெயர்ந்தவருக்கும் பிரச்சனை. பலர் வீடுகள் உடமைகள் இழந்து தவிக்கின்றனர். அடி மேல் அடி ஏழைகளுக்குத்தான். இதன் எதிரொலி மும்பையில் கண்டன ஊர்வலம் ஆயிரக்கணக்கானவர் திரண்டனர். காவல்துறை சமயோஜிதமாக கூட்டத்தை சமாளித்து கலைத்துவிட்டனர். துப்பாக்கி சூடு தவிர்க்கப்பட்டது. கர்நாடகா மாநிலத்தில் அசம்பாவிதம் நிகழ வாய்ப்பிருக்கிறது என்று விஷமிகள் வதந்தி கிளப்பி விட்டனர். அதன் விளைவு வேலை நிமித்தமாக பங்களூரில் தங்கி இருக்கும் பல அஸ்சாமியர்கள் தங்கள் மாநிலத்தை நோக்கி சொல்லத்துவங்கியுள்ளனர்.

நமது நாட்டின் வலிமையே வேற்றுமையில் ஒற்றுமை அவை குலையும் வகையில் இத்தகைய நெருடல்கள். இவை தற்காலிக இடரல்களாக மறைய வேண்டும். அதற்கு மக்களின் ஒத்துழைப்பு அவசியம். நாட்டுப் பற்று, சகோதரத்துவம், பரஸ்பர ஒற்றுமை போன்ற நற்குணங்கள் நாட்டின் இறையாண்மையோடு ஒன்றியவை, இதற்கு அரசை நாட வேண்டியதில்லை. மக்களின் உள்ளக்கிடக்கையிலிருந்து வரவேண்டியவை.

விஷமிகளால் தூண்டப்படும் விபத்துகள் ஒரு புறம். அன்றாடம் கவனக்குறைவால் ஏற்படும் விபத்துகள் மறுபுறம். இரண்டு வகை நிகழ்வுகளாலும் பாதிக்கப்படுவது பொதுமக்கள், அதுவும் நடுத்தரம் மற்றும் ஏழை மக்கள். அவசர உலகில் இத்தகைய விபத்துகள் தவிர்க்க முடியாது என்று விட்டு விடக் கூடாது. விழிப்புணர்வும் விதிகளை மதிக்கும் கவனமும் இருந்தால் விபத்துகள் குறையும். தூண்டப்படும் விபத்துகளை ஒடுக்க வேண்டும். ஏனைய விபத்துகள் தவிர்க்க வேண்டும்.

---

தினமணி நாளிதழ்கட்டுரை 23 ஆகஸ்ட் 2012 அன்று பிரசுரிக்கப்பட்டது

கிராமமே கண்ணாக…

noreply@blogger.com (Nataraj) — Mon, 16 Jul 2012 16:01:00 +0530

இந்தியாவின் ஜீவன் அதன் கிராமங்களில் உள்ளது என்றார் அண்ணல் காந்தியடிகள். அரசியல் ஆடுகளமாகவும் அரசு நிர்வாக மையமாகவும் உள்ளது தில்லி. அதனாலேயே இந்தியா என்றால் தில்லி மற்றவை பாரதம் என்பது எவ்வளவு உண்மையான கூற்று! அண்மையில் நடந்த மக்கள் கணக்கெடுப்புப்படி இந்தியாவின் 68.8% சதவிகிதம் மக்கள் கிராமங்களில் வசிக்கிறார்கள். சுதந்திரம் அடைந்த போது 80 சதவிகித்திற்கும் மேலாக கிராமத்தில் வசித்த மக்கள் படிப்படியாக நகரத்திற்கு குடிபெயர்ந்ததாலும் பல புதிய நகரங்கள் உருவாகுவதாலும் இந்த மாற்றம்.

ஆங்கில கவிஞர் கோல்ட்ஸ்மித் கிராமங்கள் தேய்ந்து வருவதும் பண ஆதிக்கம் ஒங்குவதும் மனித நற்பண்புகள் மங்குவதும் அழிவுப் பாதையைதான் வகுக்கும் என்றும், புதுப் பணக்காரர்கள் தோன்றலம் ஆனால் நிலத்தை நேசிக்கும் விசுவாசியான விவசாயி நொடித்துப் போனால் அது சமுதாயத்திற்கு நிரந்தர இழப்பு என்று நயம்பட இயற்றிவுள்ளார்.

முதல் அடி வைத்தல்தான் தொலைதூர பயணத்தின் முதல் துவக்கம். நாடளாவிய வளர்ச்சிக்கு கிராமங்களின் வளர்சித்தான் துவக்கமாக அமைய வேண்டும்.

கிராம வளர்ச்சிப்பணியில் கிராம நிர்வாக அலுவலர் முக்கிய பங்கு வகிக்கிறார். கிராம நிர்வாக அலுவலர் என்ற பதவி பரம்பரைப் பொறுப்பாக கிராமத்தில் ஒரு குடும்பத்தின் சந்ததியரால் நிமிக்கப்பட்டு வந்தது. தமிழ்நாட்டில் கர்ணம் என்றும் வடமாநிலங்களில் பட்வாரி, படேல், குல்கர்னி என்று பல பெயர்களால் அழைக்கப்பட்டு வந்தது. 1980-ல் தமிழ்நாட்டில் பரம்பரை பதவி முறை ஒழிக்கப்பட்டு கிராம நிர்வாக அலுவலர் அரசுப் பதவியாக மாற்றப்பட்டு மற்ற அரசுப்பணிகளுக்கு தேர்வு செய்வது போல் தேர்ந்த தெடுக்கும் முறை அமல்படுந்தப்பட்டது. இது மிகப்பெரிய சரித்திர முக்கியத்துவம் வாய்ந்த முடிவு எனலாம்.

பரம்பரை நிர்வாக முறையில் நிறை குறை பல இருந்தன. கர்ணத்திற்கு கிராமத்தில் உள்ள எல்லோரையும் தெரியும். அவர்களது குடும்ப நிலவரம் பூர்வீகம் அவர்களது தற்போதைய நடவடிக்கை எல்லாம் அத்துப்படி. கிராமத்தில் எவ்வளவு நிலங்கள் இருக்கின்றன எது யாருக்கு சொந்தம், நிர்வாகம், பயிர் சாகுபடி, வேறு சமுதாய சாதிப்பிரச்சனை எல்லாவற்றையும் முழுமையாக அறிந்து வைத்திருப்பார். பிறப்பு, இறப்பு, சாதிவாரியான கணக்கு, மழையளவு, பொதுச்சொத்து, உள்ளூர் கோவில் நிலங்கள், நில வரிக்கான கணக்கு என்று கிராம சரிந்திரம், நடப்புகள் எல்லாம் பதிவு செய்து வைத்திருப்பார். மாவட்ட ஆட்சியர் மாவட்டத்தில் பல்வேறு இடங்களில் நேரில் ஆய்வு செய்கையில் கிராம கர்ணத்தின் அநுபவபூர்வமான தகவல்கள் பல முடிவுகளுக்கு ஆதாரமாக அமையும்.

“என்ன கணக்கு நான் சொல்றது சரியா” என்று கிராமத்தில் பலம்படைத்தவன் தனது அராஜக செயலுக்கு ‘ஆமாம் சாமி’ போட வைக்கும் காட்சி சினிமாவில் வரும். பரம்பரை கர்ணம் முறையில் இதுதான் பிரச்சனை. சுயநலம், பலம் படைத்தவர்களிடம் பணிந்து போவது, கிராம கணக்குகளை நிர்வாகம் செய்வதில் குறைபாடுகள் போன்றவற்றிற்கு நிர்வாக ரீதியாக நடவடிக்கை எடுப்பதில் சிக்கல்கள். வளர்ந்து வரும் ஜனநாயகத்தில் இத்தகைய பரம்பரை நியமனம் காலத்திற்கு ஒவ்வாது என்ற அடிப்படையில் அரசுப் பணியாளர்களாக கிராம நிர்வாகிகள் தேர்ந்தெடுக்கப்பட்டனர்

வருவாய்த்துறை, நிர்வாக அமைப்பில் மிகப்பழமையானதும் பெருமை வாய்ந்ததுமாகும். வருவாய்த்துறை, நில நிர்வாகம், நில சீர்திருத்தம், போக்குவரத்து, வர்த்தகம் மதுவிலக்கு மற்றும் ஆயத்தீர்வை போன்ற பல துறைகளை உள்ளடக்கிய ‘வருவாய் வாரியம்’ (ரெவின்யூ போர்டு) நிர்வாக ஆளுமைக்கு உயர்ந்த உதாரணமாக திகழ்ந்தது. இப்போது பல்வேறு தனித் துறைகளாக பிரிக்கப்பட்டு இயங்கி வருகிறது. மாவட்ட அளவில் மாவட்ட ஆட்சியர், கோட்ட ஆட்சியர், தாசில்தார், வருவாய் ஆய்வாளர், கிராம நிர்வாக அலுவலர் மற்றும் கிராம உதவியாளர் நிர்வாக அமைப்பில் முக்கிய பங்கு வகிக்கின்றனர். முப்பத்திரண்டு மாவட்டங்களில், 76 கோட்டங்களும், 220 தாலுக்காக்களும், 1127 பிர்கா மற்றும் 16,564 வருவாய் கிராமங்களும் உள்ளன. வளர்ச்சிப்பணியில் கிராம நிர்வாக அலுவலருக்கு மிக முக்கிய பொறுப்பு உண்டு.

குஜராத்தில் தன்னிறைவு மட்டுமல்ல நகரங்களை விஞ்சும் வகையில் வளர்ந்துள்ள கிராமத்தைப்பற்றி செய்தி வந்தது. ஹிம்மத் நகர் என்ற பகுதியில் உள்ள ‘அன்சாரி’ என்ற கிராமத்தில் வறுமையில்லை, வெறுமையில்லை, எங்கும் பசுமையும் வியக்க வைக்கும் வகையில் வளமையும்! குளிர்சானம் பொருத்தப்பட்ட பள்ளிக்கூட அறைகள், சுத்தமான தெருக்கள், குழந்தைகளை பள்ளிக்கு அழைத்துச் செல்ல மினிவேன், தெருக்களில் குப்பை சேராமல் இருப்பதை கண்காணிக்க கேமிராக்கள் என்று அடுக்கடுக்காக நவீன வசதிகள். அந்த கிராமத்தில் இருந்து வெளிநாடு சென்றவர் யாருமில்லை. வெளிநாட்டிலிருந்து பணம் பெறவில்லை. பணக்காரர் பொருள் உதவி செய்யவில்லை. எல்லாம் அந்த கிராம மக்களின் சுயமுயற்சி, சீரிய பஞ்சாயத்து நிர்வாகம். சுத்திகரிக்கப்பட்ட நீர் ஒவ்வொரு வீட்டிற்கும் 20 லிட்டர் குடி தண்ணீர் வழங்கப்படுகிறது. அதற்கு ரூபாய் நான்கு மட்டுமே கட்டணம். கிராம பஞ்சாயத்திடம் ஐந்து வருடங்களுக்கு முன்னால் ரூபாய் 25,000 மட்டுமே வைப்பு நிதியாக இருந்தது. இப்போது ரூபாய்.75 லட்சமாக உயர்ந்துள்ளது. இந்த வளர்ச்சிக்கும் வெற்றிக்கும் காரணம் மக்களின் கூட்டுறவு மூலம் துவங்கப்பட்ட வளர்ச்சிப் பணிகள், பஞ்சாயத்து அமைப்பின் ஒற்றுமை. எல்லோருடைய ஒத்துழைப்பு இருந்தால் உயர்ந்த நிலையை அடையலாம் என்பதற்கு இது ஒரு எடுத்துக்காட்டு.

இந்தியாவில் புதிய பொருளாதாரம் கொள்கை மூலம் தொழில் நுட்பம் தகவல் தொடர்பு வளர்ச்சி அடைந்துள்ளது. ஆனால் வளர்ச்சியின் பங்களிப்பு 15 சதவிகிதம் மக்களையே சென்றடைந்திருக்கிறது. பலகோடி மக்கள் இன்னும் இருந்த இடம் பள்ளம் என்ற நிலை மாறவில்லை. மற்ற மாநிலங்களை ஒப்பிடுகையில் தமிழகத்தில் நகரமயமாக்கல் அதிகரித்து வருகிறது. அது ஒரு விதத்தில் பொருளாதார வளர்ச்சியை குறிக்கிறது. தமிழகத்தில் சுமார் 51.5 சதவிகிதம் மக்கள் கிராமங்களில் வசிக்கின்றனர்.

வருவாய் கிராமங்களுடன் ஒட்டி குக்கிராமங்கள் உண்டு. வருவாய் கிராமங்கள் தாய் என்றால் குக்கிராமங்கள் அதன் குழந்தைகள். தாய் கிராமங்களை முன்வைத்தே நலத்திட்டங்கள் நிறைவேற்றப்படுகின்றன. ஆனால் சிறு கிராமங்களை மையமாக வைத்து ’தாய்’ என்ற அருமையான திட்டத்தை தமிழக அரசு வகுத்துள்ளது. சிறு கிராமங்களுக்கு சாலை, குடி நீர், மின்சாரம், சுகாதாரம் குடும்ப நலம், கல்வி என்ற அத்தியாவசிய தேவைகள் பூர்த்தி செய்யும் வகையில் இத்திட்டம் அமையும். தமிழகத்தில் மொத்த கிராம பஞ்சாயத்துகள் 12,524. இதில் குடியிருப்புகள் உள்ள குக்கிராமங்கள் 79,394. சராசரி ஒவ்வொரு கிராம பஞ்சாயத்திலும் 7 குடியிருப்புகள் உள்ளன. தாய் திட்டத்தில் இத்தகைய குக்கிராமங்களை கணக்கிட்டு கிராம பஞ்சாயத்திற்கு நிதி ஒதுக்கப்படுகிறது. குக்கிராமங்கள் எண்ணிக்கை வைத்து கிராம பஞ்சாயத்துகளில் ஐந்துக்கு கிழ் குடியிருப்புகள், 5 லிருந்து 15, 16 லிருந்து 25, 25ற்கு மேல் என்று நான்கு வகையாக பிரிக்கப்பட்டு அதற்கேற்றால் போல் நிதி ஒதுக்கப்படுகிறது. இதற்கான தேவை ரூபாய்.3,400/- கோடி. ஒவ்வொரு ஆண்டும் ரூபாய் 680/- கோடி என்ற அளவில் இத்திட்டத்தை அடுத்த ஐந்து ஆண்டுகளில் நிறைவேற்றப்பட உள்ளது. எந்த மாநிலத்திலும் இத்தகைய மக்களுக்கு அநுகூலமான அணுகுமுறை நடைமுறையில் இல்லை. இந்த திட்ட அமலாக்கத்தில் கிராம நிர்வாகத்தின் பங்கு முக்கியமானது. வளர்ச்சியின் பயனளிப்பு எல்லோருக்கும் சென்றடைய இது உறுதி செய்யும். ‘தாய்’ திட்டம் நாட்டிற்கே முன்னோடியாக அமையும்.

நிலப்பட்டா என்பது நில உரிமையாளர் முக்கியமாக கருதும் ஆவணம். நிலப்பட்டா மாற்றம் செய்வதில் தாமதத்தை தவிர்க்கவும் மக்களுக்கு உதவும் வகையில் அரசு ஆணை பிறப்பித்திருக்கிறது. அதன்படி கிராம நிர்வாக அலுவலர் ஒவ்வொரு திங்கட்கிழமையும் கிராம மக்களிடமிருந்து பட்டா மாற்றுதலுக்கான மனுக்களை பெற வேண்டும். அதனை பரிசீலித்து வெள்ளிக்கிழமை வட்டாட்சியருக்கு அனுப்ப வேண்டும். குறித்த கால கட்டத்திற்குள் மாற்றம் செய்யப்பட்ட பட்டா துணை வட்டாட்சியர் அலுவலகத்திலிருந்து பெற்றுக் கொள்ளலாம். இதன் மூலம் கால தாமதம் தவிர்க்கப்படுவதோடு தவிர்க்கப்பட வேண்டிய ‘கைமாற்றம்’ தகர்க்கப்படுவதில் மக்களுக்கு நிச்சியமாக நிம்மதி தரும்.

மொத்த உள்நாட்டு உற்பத்தி (ஜிடிபி) நாட்டின் பொருளாதார வளர்ச்சியை குறிக்கிறது. சமீபத்தில் ஒட்டு மொத்த வளர்ச்சி குறைந்ததால் விலைவாசி உயர்ந்துள்ளது, நாட்டின் ஜிடிபி குறைந்த நிலையில் இருந்தாலும் தமிழகத்தில் ஜிடிபி உயர்ந்து வருகிறது என்பது நிறைவைத்தருகிறது, ரிசர்வ் வங்கியின் துணைத்தலைவர் சென்னையில் ஒரு நிகழ்ச்சியில் பேசிய பொழுது தமிழகத்தில் 2011-12க்கான வளர்ச்சி 12.5 சதவிகிதம் என்றும் இந்தியாவின் சராசரி வளர்ச்சியான 6.5 சதவிகிதத்தில் இரண்டு மடங்கு என்பது பெருமைக்குரியது என்று கூறியுள்ளார். ஒவ்வொரு மாவட்ட ஆட்சியரும் தமது மாவட்டம், கிராமங்களின் மொத்த உற்பத்தி (ஜிடிபி) கணக்கிட்டு அது பெருக முனைப்பாக செயல்பட்டால் தமிழ்நாடு மேலும் உன்னத நிலையை அடையும்.

தொழில் உற்பத்தி, சேவை தொழில்கள் அபிவிருத்தியடைந்து வருவது இந்த வளர்ச்சிக்கு அடித்தளமாக அமைந்தது சுகாதாரமான மேல் வளர்ச்சிக்கு வித்திடும் என்பது உறுதி. மேலும் தனியார் முதலீடு அதிகரித்துள்ளது. அதில் 48 சதவிகித தொழில் ஒப்பந்தங்கள் நடைமுறைப்படுத்தப்பட்டு வருகிறது. 42 சதவிகித திட்டங்கள் ஒப்பந்தம் அளவில் உள்ளன. அதன் பயனளிப்பை துரிதப்படுத்துவதோடு, தொழில் முதலீடு செய்பவர்கள் ஊக்குவிக்க சம்மந்தப்பட்ட துறைகள் முனைப்பாக செயல்பட வேண்டும்.

சிறு நகரங்களிலும், கிராமங்களிலும் வாழும் மக்கள் வளம் பெற முயற்ச்சிக்கின்றனர். தமது நிலை உயர வேண்டும். தமது குழந்தைகள் வசதியோடு வாழ வேண்டும் என்ற அவர்களது எதிர்பார்ப்பு நியாயமானது. பூமியைப் பிளந்து நெற் பயிர் மேல் நோக்கி வளர்வது போல் கிராமங்கள் மேன்மையுற ‘தாய்’ திட்டம் வழிவகுக்கும். இந்தியாவின் ஜீவன் பாதுகாக்கப்பட வேண்டும்.

………..

This Article published in Dinamani News paper on 14.07.2012

………..

காலம் பொன்னானது

noreply@blogger.com (Nataraj) — Wed, 16 May 2012 18:52:00 +0530

காலம் பொன்னானது

காலத்தின் அருமைக் கருதி பேச்சை விரைவில் முடிக்கிறேன் என்று நீட்டி முழங்கி மணிக்கணக்கில் அரங்கில் பேசி சோதிப்பவர்கள் இருக்கிறார்கள். காலத்தின் அருமையை நாம் உணர்வதில்லை. காலம் பொன்னானது. எந்த ஒரு செயலாக்கத்திற்கும் தடங்கல் ஏற்பட்டால் இழப்பை ஈடுகட்ட முடியாது. உதாரணமாக சென்னை விமானதளம் விரிவாக்கத்திற்கு 2003ம் வருடம் தமிழக அரசால் சுமார் 1450 ஏக்கர் ஒதுக்கப்பட்டது. ஆனால் சில அமைப்புகளின் எதிர்ப்பால் விரிவாக்கத்தில் தடங்கல் ஏற்பட்டது. விளைவு சென்னையில் தேக்கநிலை, பங்களுரூ, ஐதராபாத் புதிய விமானதளம் அமைப்பதில் முந்திக்கொண்டது,

ஒரு கட்டமைப்பிற்கும் தேவை தீர்கமான திட்டம், போதுமான நிதி, செயலாற்றுவதற்கான நிபுணர்கள், களப்பணியாளர்கள். இவைற்றைல்லாம் ஒருங்கிணைத்து குறிப்பிட்ட காலத்திற்குள் நிறைவேற்ற வேண்டும். கால அளவு நிர்ணயிப்பதுதான் மிக முக்கியம். எவ்வளவோ பயன் தரும் திட்டங்கள் குறிப்பிட்ட காலத்திற்குள் நிறைவேற்றப்படாததால், நிதி விரயமாகிறது. திட்டத்தின் பயனளிப்பு பெறுவதில் தடங்கல், அதைச்சார்ந்த நிறுவனங்களுக்கு இழப்பு, இதனால் பாதிக்கப்படும் குடும்பங்கள் என்று ஒரு இடத்தில் ஏற்படக்கூடிய தாமதம், நேர விரயம் அடுக்கடுக்காக காற்றலையாக பாதிப்பு ஏற்படுத்துகிறது.

ஒரு நாட்டின் வளமையை நிர்ணயிப்பதே அந்நாட்டு மக்கள் எவ்வாறு தமது நேரத்தை செலவிடுகிறார்கள் என்பதைப் பொருத்திருக்கிறது. முன்னேறிய நாடுகளில் வேலை செய்யும் பாங்கு, பணிக்கலாச்சாரம் மெச்சத்ததக்கதாக இருக்கும். அநாவசியமாக வம்பளப்பது, தொலைபேசியில் பேசி காலம் கழிப்பது போன்ற சோம்பேறித்தனமான நடவடிக்கையை பார்க்க முடியாது. இந்தியாவில் உள்ள பல பன்னாட்டு நிறுவனங்களிலும் இந்த ஒழுங்குமுறை கடைபிடிக்கப் படுகிறது. காலத்தின் அருமையை உணர்ந்ததால் தான் வளமான நாடுகளில் செல்வச் செழிப்பு நிலைக்கிறது.

நமது நாட்டில் சுதந்திரம் அடைந்த முதல் 30 ஆண்டுகள் சோஷலிச பொருளாதார கொள்கை கடைபிடிக்கப்பட்டது. பின்தங்கிய பகுதிகளுக்கும், ஏழை மக்களுக்கும் வளர்ச்சியின் பயன் சென்றடைய வேண்டும் என்ற உயரிய நோக்கம் இருந்தாலும், நடைமுறைப்படுத்துவதில் பல சிக்கல்கள். ‘பெர்மிட் ராஜ்’ என்ற வகையில் ஒவ்வொன்றுக்கு அரசு அனுமதி பெற வேண்டும் என்ற நிர்பந்தத்தில் தனி மனித வளர்ச்சியும் ஈடுபாடும் குன்றி தேக்க நிலைதான் தொடர்ந்தது. அப்போது நடைமுறைப் படுத்தப்பட்ட நடவடிக்கைகள் தவறு என்று இப்போது ஒப்புக் கொள்கிறார்கள். ஆனால் விரயமான காலத்தை ஈடு செய்ய முடியுமா? அந்த தேக்க நிலையில் பாதிக்கப்பட்ட மக்களின் இழப்பை திரும்பப் பெற முடியுமா? வறுமையில் இழந்த வாலிபம் தான் திரும்புமா! அதைத்தான் ஜெயகாந்தன் அவர்கள் தைலியின் கிழிந்த ஒத்தப்புடைவையை குளித்துவிட்டு காய்ந்த பிறகு கட்டிக் கொள்ளும் நிலை 1947-ல் எவ்வாறு இருந்ததோ 25-ந்து ஆண்டுகளுக்குப் பிறகும் 1972-ல் மாறவில்லை என்று எழுதியிருந்தார். இன்னும் எவ்வளவோ தைலிகள் நாட்டில் இருக்கிறார்கள். கால விரயத்தின் கொடுமைகளை அனுபவித்துக் கெண்டிருக்கிறார்கள்.

ஆப்பிள் கணினியை உருவாக்கி படங்கள், வீடியோக்கள் மற்றும் டிஜிட்டல் கோப்புகளை பகிர்ந்து கொள்ளும் முறையில்
ஐ–பாட் மூலம் புரட்சி ஏற்படுத்தியவர் ஸ்டீவ் ஜாப்ஸ். விதி அவருக்கு எவ்வளவோ துரோகம் செய்தது. விவாகம் முடிக்காத இளம்மாணவிக்கு கூடா உறவு மூலம் பிறந்து, வேறொரு தம்பதியினரால் தத்து எடுக்கப்பட்டு, அவர்களுக்கு பொருளாதார நெருக்கடி கொடுக்கக் கூடாது என்று தனது உயர் கல்வியை பாதியில் நிறுத்தி சுயமாக தொழில் செய்ய வேண்டும் என்ற உந்துததில் கார் ஷெட்டில் கணினி வடிவமைக்கும் சிறு தொழிலைத் துவங்கி வாழ்கையில் வெற்றிக் கண்டார். பல போராட்டங்களுக்கு இடையில் தன்னம்பிக்கை மற்றும் தனது நேரம், முழு உழைப்பையும் மூலதனமாக வைத்து உருவாக்கப்பட்ட நிறுவனம் தான் ‘ஆப்பிள் மேக்’ கம்ப்யூட்டர். நாலாயிரம் பணியாளர்களைக் கொண்ட இரண்டு பில்லியன் டாலர் கம்பெனியாக இப்போது வளர்ந்துள்ளது. ஐஃபோன், ஐ-பாட் இவையில்லாமல் வாழ்க்கையில்லை என்று உலகில் உள்ள இளைஞர்களை ஆட்கொண்ட சாதனையாளர் ஸ்டீவ் ஜாப்ஸ். நேரத்தின் முக்கியத்துவத்தை உணர்ந்தவர். எங்கு சென்றாலும் இளைஞர்களுக்கு அதன் அருமையை விளக்குவார். பல தோல்விகள் அவரைத் துரத்தின. ஆனால் தோல்வியைக் கண்டு துவளாமல் நேரத்தை புதிய யுக்திகளில் செலுத்தி வெற்றிப்பாதையை அமைத்துக் கொண்டார். நேரம் ஒன்றுதான் வற்றாத செல்வம். எல்லோருக்கும் சமமாக கிடைக்கும் மூலதனம்.

நேரம் எல்லாப் பணிகளுக்கும் முக்கியம் என்றாலும் காவல்துறையை பொறுத்தமட்டில் நேரம் தவறினால் விபரீத விளைவுகள் ஏற்படும். உயிர் உடமைகளைப் பாதிக்கும். குற்றங்கள் தடுப்பதில் கவனம் செலுத்தி வியர்வை சிந்தினால் குற்ற நடப்புகளால் ஏற்படும் ரத்த சிதறல்களைத் தவிர்க்கலாம். எந்த ஒரு குற்ற நிகழ்வை எடுத்துக் கொண்டாலும், உரிய சமயத்தில் நடவடிக்கை எடுத்திருந்தால் குற்ற நிகழ்வை தவிர்த்திருக்கலாமே என்று அந்த சரக அதிகாரிக்கு உள்ளூர நெஞ்சு குறுகுறுக்கும் என்பதில் ஐயமில்லை.

குற்றத்தடுப்பு செயலாக்கத்தில் அதிக கவனம் செலுத்திவதில்லை. நிகழ்ந்த குற்றங்கள் கண்டுபிடித்துவிட்டால் காவல் துறை அதிகாரிகள் மெச்சப்படுகின்றனர். ஆனால் தனது உழைப்பால் குறித்த நேரத்தை தவரவிடாது பணி செய்து குற்ற நிகழ்வை தவிர்த்தவர் பாராட்டப்படுவதில்லை.

மாவோயிஸ்ட் பிரச்சனை இவ்வளவு தலைவிரித்தாடுகிறது. மாவட்ட ஆட்சியர்கள் கடத்தப்படுகிறார்கள். இன்னும் அந்த பிரச்சனைகளுக்கு முனைப்பான தீர்வு எடுக்கப்படவில்லை. மாநில அரசும் மத்திய அரசும் பல்முனை நடவடிக்கைகள் எடுக்கப்பட்டதாக பட்டியலிட்டாலும் பிரச்சனை வளர்ந்து கொண்டுதான் இருக்கிறது. ஒடிசா மாநிலத்தில் மால்காங்கிரி மாவட்டம் ஆட்சியர் வினீல் கிருஷ்ணா கடத்தப்பட்டார். பின்பு இரண்டு இத்தாலி நாட்டு சுற்றூலா பயணிகள், சட்ட சபை அங்கத்தினர் இப்போது சுக்மா ஆட்சியர் அலக்ஸ் பால் மேனன். மேனன் கடத்தலில் கொடுமை என்னவென்றால் அவரது இரண்டு பாதுகாவலர்களும் மாவோயிஸ்டுகளால் கொல்லப்பட்டனர். மேனன் கடத்தல் நாட்டை உலுக்கியதே தவிர இரண்டு காவலர்களின் உயிரிழப்பிற்கு இரண்டு சொட்டுக் கண்ணீர் கூட எவரும்விடவில்லை. காவலர்களின் உயிர் அவ்வளவு துச்சமாகிவிட்டது!

மாவோயிஸ்டுகள் ஆதிக்கத்தில் உள்ள இடங்களுக்கு அரசு அதிகாரிகள் செல்லும் பொழுது பாதுகாப்பு விதிமுறைகள் பின்பற்ற வேண்டும். ஏதோ ஒரு ஆர்வத்தில் சாதிக்க வேண்டும் என்ற எண்ணத்தில் பாதுகாப்பு முறைகளை மறந்து களம் இறங்கிவிடுவதால் இத்தகைய விபரீதங்கள் நிகழ்சின்றன. இரண்டு உயிர்களை இழந்த குடும்பங்களின் நிலை என்ன? வானம் பொழிந்தாலும் பூமி விளைந்தாலும் அந்தக் குடும்பங்களின் வாழ்வு கண்ணீரில்தான் தளும்பும். சட்டம் ஒழுங்குப் பிரச்சனைகள் உரிய சமயத்தில் நடவடிக்கை எடுக்கத் தவறுவதால்தான் பெரிதாக பாதிப்பை ஏற்றபடுத்துகிறது. கணம் தப்பினால் மரண அபாயம் தலை தூக்கும் என்பது காவல்துறைப்பணியில் அன்றாடம் உணரலாம்.

வாழ்வின் சாரம் மின்சாரம் என்ற அளவுக்கு மின்சாரத்தினால் இயங்கும் பல உபகரணங்களுக்கு நாம் அடிமையாகி விட்டோம். மின்சாரப் பற்றாக் குறை ஏற்பட்டதற்க்குப் பல காரணங்கள் இருந்தாலும் உரிய நேரத்தில் திட்டமிட்டு உற்பத்தியைப் பெருக்காதது ஒரு முக்கியக் காரணம்.

அந்த உரிய நேரத்தில் நடவடிக்கை எடுக்காததால் விளைவுகளை இப்போது சந்திக்க நேரிடுகிறது. இப்போது எடுக்கப்படும் முயற்சிகளால் அதுவும் பசுமை சக்தி எனப்படும் சூரிய சக்தியை அறுவடை செய்யும் பல்முனை முயற்சி மின்சாரம் பற்றாக்குறை என்ற நிலை மாற வழி வகுக்கும் மற்ற மாநிலங்களை ஒப்பிடுகையில் தமிழகத்தில் வருடத்திற்கு 310 நாட்கள் சூரிய சக்தி பயனளிப்பிற்கு கொண்டு வரமுடியும் என்று நிபுணர்கள் ஆய்வில் தெரிய வருகிறது. அரசும் அதற்கான நிதி ஒதுக்கீடு செய்துள்ளது. சம்மந்தப்பட்ட பொறியாளார்களும், அதிகாரிகளும், காலந்தாழ்த்தாது போர்க்கால அடிப்படையில் சக்தி ஈட்டும் கதிர் தளங்களை அமைக்க வேண்டும். குஜராத்தில் 16 மாதங்களில் இத்தகைய சூரிய சக்தி ஈட்டக்கூடிய சோலார் கருவிகள் அமைக்கப்பட்டு பயனளிப்பிற்கு வந்துள்ளது. இது நிச்சயமாக நம்மாலும் முடியும்.

“காலத்தி னாற்செய்த நன்றி சிறிதெனினும்

ஞாலத்தின் மாணப் பெரிது” என்றார் வாள்ளுவர். அரசின் நலத்திட்டங்கள் உரிய சமயத்தில் ஏழை மக்களுக்கு அளித்தால் பெரிதும் உதவும். நமது முதலமைச்சர் அறிவித்தப் பல நலத்திட்டங்கள் துரிதமாக நடைமுறைப் படுத்தப்பட்டது நிறைவைத் தருகிறது. பள்ளி, கல்லூரி மாணவர்களுக்கு இலவச மடிக் கணினி, இருபதுக் கிலோ இலவச அரிசி, மாணவர்களுக்கு காலணி, சீருடை, புத்தகங்கள், ஏழை மக்களின் வாழ்வாதாரத்திற்கு ஆடு வளர்க்கும் திட்டம் பேன்ற பல திட்டங்களில் ஏழை மக்களுக்கு தக்க சமயத்தில் உதவி அளிக்கப்பட்டுள்ளது. இதுவரை 1.51 இலட்சம் மடிக் கணினிகளும், 1.85 கோடி குடும்பங்களுக்கு இலவச அரிசியும், 14.38 இலட்சம் மக்களுக்கு இலவச மின்விசிறி, மின் அரைவை இயந்திரம், 81.20 லட்சம் குழந்தைகளுக்கு காலணிகள், புத்தகங்கள் கடந்த ஒரு வருடத்தில் உரியவர்களுக்கு அளிக்கப்பட்டுள்ளது என்பது மகத்தான சாதனை. இது காலத்தினால் செய்த உதவி. ஏழைக் குடும்பங்கள் இதனை சரியாக பயன்படுத்தி ஏதோ இலவசமாக கிடைத்தது என்று சோம்பி இருக்காமல் மேலும் உத்வேகத்துடன் உழைத்தால் தான் குடும்பம் முன்னேறும், சமுதாயம் வளம் பெரும்.

தமிழக அரசு வெளியிட்டுள்ள “தொலை நோக்கும் பார்வை 2023” இசைத்தமிழ்போல் தமிழ்நாட்டிற்கு தொழில் சாதனையாக வடிவமைக்கப்பட்டுள்ளது. இதன் மூலம் அரசு 1.50 லட்சம் கோடி ரூபாய்க்கான திட்டங்கள் முக்கியமாக கட்டமைப்புகளை மேம்படுத்தும் வகையில் அடுத்து வரும் ஆண்டுகளில் நிறைவேற்றப்படும்.. ‘விஷன் 2023’ பொருளாதார, நிர்வாக நிபுணர்களின் பெருமளவு பாராட்டைப் பெற்றுள்ளது.

இவ்வாறு இலக்குகள் நிர்ணயிப்பது அவசியம். இத்திட்டங்கள் முழுமையாக நிறைவேற்றுவதற்கு நிதிமட்டுமின்றி சம்மந்தப்பட்ட அதிகாரிகளின் முனைப்பான செயலாக்கம் அவசியம். சுய ஆர்வத்தோடு செயல்படுபவர்களை தெரிவு செய்து அவர்கள் நிபுணத்துவம் பெற்ற துறைகளுக்கு நியமித்தால் திட்டங்கள் காலதாமதமின்றி நிறைவேறும்.

வாழ்க்கையை நேசிப்பவர்கள் நேரத்தை விரயமாக்கக் கூடாது. வாழ்க்கையில் சாதனைப்படைத்தவர்கள் எல்லோரும் நேரத்தை திறமையாக பயன்படுத்துவதை பழக்கமாகக் கொண்டவர்கள்.

என்னமாய் நேரம் பறக்கிறது என்று அங்கலாய்க்கிறோம். கடந்த நேரம் திரும்பி வராது. ஆனால் தற்கால நேரம் நமது கையில். நேரம் பறந்தாலும் விமான ஓட்டி நாம் தான் என்பது எவ்வளவு உண்மை. நேரத்தை வெறுமையில் ஓட்டாமல் சமுதாயத்திற்கு ஒட்டும் படி பயனளிக்கும் வகையில் செலவிடுவதே விவேகம்.

This article Published in Dinamani Newspaper on 16.05.2012

noreply@blogger.com (Nataraj) — Mon, 5 Mar 2012 19:50:00 +0530

இந்த நந்நாளில் இதயமார்ந்த பிறந்த நாள் நல் வாழ்த்துக்கள் சமர்ப்பிப்பதில் பெருமை கொள்கிறேன். இந்த அளவுக்கு மக்களின் நன் மதிப்பைப் பெற்ற தலைவர் வேறு எவரும் இருக்க முடியாது. அறிவு ஆற்றல், நேர்மை, உழைப்பு, ஒருங்கிணைந்த மக்களின் நலம் பேணும் உத்தம தலைவர் நாம் பெற்றிருப்பது நமது பாக்கியம்.

நமது வேண்டுதல் எல்லாம் பல்லாண்டு காலம் ஆரோக்கியமாக வாழ்ந்து தமிழ் நாட்டை மேன்மையுறச் செய்ய வேண்டும்.

இதயமார்ந்த வாழ்த்துக்கள்.

குடி மக்களாகிய நாம்

noreply@blogger.com (Nataraj) — Tue, 7 Feb 2012 13:42:00 +0530

புது வருஷம் கொண்டாட்டம், பொங்கல் திருவிழா என்று கோலாகலமான மாதம் தான் ஜனவரி. ஆனால் நாட்டின் இறையாண்மையை நிலை நிறுத்தும் முக்கியமான நாள் ஜனவரி 26 குடியரசு தினம். இந்தியாவை அகண்ட பாரதமாக ஆன்மீக சேவை வழியில் இணைத்த ஸ்வாமி விவேகானந்தர் பிறந்தது ஜனவரி 12. இந்தியாவின் சுதந்திரம் கனவில்லை அது மெய்ப்படும் என்று உற்சாகப்படுத்திய இளைஞர்களின் ஒளிவிளக்கு சுபாஷ் சந்திரபோஸ் பிறந்தது ஜனவரி 23. நாட்டின் ஒருமைப்பாட்டிற்காக தன்னை அர்ப்பணித்த அண்ணல் காந்தி உயிர்துறந்த நாள் ஜனவரி 30 தியாகிகள் தினம். குடிமக்களாகிய நாம் நாட்டைப்பற்றி சிந்திக்க வேண்டிய தருணம் இது.

உலக நாடுகளில் எழுதப்பட்ட அரசியல் சாசனங்களில் மிகப் பெரியது என்று கருதப்படுவது இந்திய அரசியல் சாசனம். இதில் 395 உறுப்புகளும், பன்னிரெண்டு அட்டவணைகளும் உள்ளன. சட்ட முகப்புரை (Preamble) என்ற பகுதியோடு நமது சாசனம் துவங்குகிறது. இறையாண்மை கொண்ட சமதர்ம சமயசார்பற்ற மக்களாட்சி குடியரசை அமைத்திட உறுதி பூண்ட இந்திய மக்களாகிய நாம் அனைத்து குடிமக்களும் முழுமையான நீதி, சுதந்திரம், சமநிலை, தனிநபர் கண்ணியம், நாட்டின் ஒற்றுமை, ஒருமைப்பாடு கொண்ட சகோதரத்துவம் பெற்றிட உறுதி செய்து இந்த அரசமைப்பு சட்டத்தை ஏற்றி இயற்றி வழங்குகிறோம் என்று மிகத் தெளிவாக கூறப்பட்டுள்ளது.

‘இறையாண்மை கொண்ட மக்களாட்சி குடியரசு‘ என்ற சொற்றொடருக்கு பதிலாக ‘இறையாண்மை கொண்ட சமதர்ம, சமயசார்பற்ற மக்களட்சி குடியரசு‘ என்ற சொற்கள் 1976-ல் வருடம் 42-வது அரசமைப்புச் சட்டத் திருத்ததால் கொண்டு வரப்பட்டன. இறையாண்மை என்பது ஒரு நாட்டின் தனிப்பட்ட அதிகாரத்தைக் குறிப்பிடுகிறது. யாரையும் தன்னைவிட அதிகாரம் கொண்டவர் என்பதை ஏற்காமல் தன்னுள்ளே முழுமையான அதிகாரத்தை உறைய வைத்துள்ளதோ அதுவே இறையாண்மை கொண்ட நாடாகும் என்பது நிபுணர்களின் விவரிப்பு.

இந்திய அரசியலமைப்பில் மக்கள் தான் அதாரம் அல்லது மூலம். அவர்களிடமிருந்து தான் முழுஅதிகாரம் பொங்கிப் பரவுகிறது. இதுதான் மக்களாட்சியின் வலிமை. அரசியலமைப்பில் எந்த ஒரு சந்தேகமோ உறுப்புகளில் உபயோகிகப்பட்ட சொற்றொடரில் வேறுபாடு இருந்தால் முகப்புரையில் கூறப்பட்டுள்ள சிந்தாந்தங்களின் அடிப்டையில் அர்த்தம் காணவேண்டும். அது தான் முகப்புரையின் சிறப்பும் வலிமையுமாகும்.

இந்திய அரசியல் சாசனத்தின் சிறப்பியல்புகள் பல. மக்களின் தேவைக் கேற்ப சட்ட மாற்றங்களுக்கு இணங்கவல்லது கூட்டாட்சி மற்றும் ஒற்றாட்சி சிறப்புக் கூறுகளின் கலவை, நாடாளுமன்ற அமைப்புள்ள அரசு, அடிப்படை உரிமைகள், ஆட்சியை வழி நடத்திச் செல்லும் நெறிமுறைகள், நீதித்துறை சுதந்திரம், மதச்சார்பின்மை, ஒற்றைக் குடியுரிமை, வயது வந்த அனைவருக்கும் வாக்குரிமை, சிறுபான்மையினருக்கும் தனிப்பட்டவருக்கும் சிறப்புச் சலுகைகள் போன்றவை இந்திய அரசியல் சாசனத்தின் சிறப்பியல்புகள்.

நமது அரசியல் அமைப்பின் தூண்கள் சுதந்திரம், சமத்துவம், தனிநபர் காண்ணியம், உயிருக்கும் உடமைக்கும் பாதுகாப்பு. 1976-ம் வருடம் 42-வது சட்டத்திருத்தம் வாயிலாக அடிப்படைக் கடமைகள் கொண்ட தொகுப்பு சேர்கப்பட்டுள்ளது. பகுதி மூன்றில் குறிப்பிட்டுள்ள அடிப்படை உரிமைகள் அரசயில் சாசனத்தின் உட்கரு என்று உச்ச நீதிமன்றம் பல தீர்ப்புகளில் வலியுறுத்திள்ளது. எந்த சட்ட மாற்றம் கொண்டுவந்தாலும் இந்த அடிப்படை உரிமைகளின் வலிமையை குறைக்க முடியாது. இது மிக சிறப்பு அம்சமாக கருதப்படுகிறது. எவ்வாறு உரிமைகளுக்கு முக்கியத்துவம் கொடுக்கப்படுகிறதோ அதே போல் கடமையாற்றுவதற்கும் முன்வர வேண்டும். மக்களாட்சி உணர்வுடன் கூடிய சமூக, பொருளாதார, கலாச்சார பொறுப்புகள் அடங்கிய பத்து கடமைகள் மக்கள் மனமுவந்து செயலாக்க வேண்டும.

பகுதி மூன்றில் முக்கிய உறுப்புகள் 14-லிருந்து 22 வரை சட்டத்தின் முன் எல்லோருக்கும் சமத்துவம் சட்டத்தில் சமபாதுகாப்பு அளிக்கிறது. உறுப்பு 15 சமயம், இனம், பாலினம், பிறந்த இடம் ஆகிய காரணங்களால் வேற்றுமை பாராட்டுவதை தடை செய்கிறது. உறுப்பு 16 அரசுப்பணிகளில் சமவாய்ப்பிற்கு உத்திரவாதம் அளிக்கிறது. உறுப்பு 17 தீண்டாமையை ஒழிக்கிறது. உறுப்புகள் 19 –லிருந்து 22 வரை சுதந்திரத்திற்கான உரிமைகள் கொடுக்கப்பட்டுள்ளன. பேச்சு உரிமை, அமைதியாக ஆயுதமின்றி கூடும் உரிமை, சங்கங்கள் அமைக்கும் உரிமை, இந்தியாவில் சுதந்திரமாக நடமாடும் உரிமை, இந்தியாவின் எந்த நிலப்பகுதியிலும் வசிக்க குடியேறுவதற்கான உரிமை, தொழில், வேலை, வணிகம் செய்ய உரிமை. இந்த உரிமை சில ஒப்புக்கொள்ளக்கூடிய வரையரைகளும் உட்பட்டவை.

உறுப்பு 20, 21 குற்றம் சம்மந்தப்பட்டவை. ஒரு செயல் குற்றமெனக் கருதப்படுமாயின் அது அமலில் உள்ள சட்டத்திற்கு உட்பட்டதாக இருக்கவேண்டும். ஒரே குற்றத்திற்கு இரண்டுமுறை தண்டனை வழங்கலாகது. தன் செயலால் தானே குற்றச்சாட்டிற்கு உட்படுதலுக்கு தடை, சட்டத்தினால் நிலை நாட்டப்பட்ட நடைமுறையின்றி எவருடைய வாழ்க்கை மற்றும் தனி நபர் சுதந்திரத்தை பறிக்க முடியாது என்பது மிக முக்கிய உறுப்பு.

சுதந்திரமாக நீதிமன்றம் செயல்படுவதற்கு அரசியல் சாசனம் வழிவகை செய்துள்ளது. மேலும் தனி நபரோ அல்லது ஒரு அமைப்போ உரிமை மீறல்கள் குறித்து உயர் நீதிமன்றம் அல்லது உறுப்பு 32-ன் கீழ் உச்ச நீதிமன்றத்தை நாடலாம். உச்ச நீதிமன்றம் மற்றும் உயர் நீதி மன்றங்கள் நீதிப் பேராணைகள் பிறப்பிக்க அதிகாரம் கொடுக்கப்பட்டுள்ளது. ஐந்து பேராணைகள், ஆட்கொணர்விற்கு (Habeas Corpus) செயலுறுத்துவதற்கு (Mandamus), தடை விதிக்கும் ஆணை (prohibition) நெறிமுறை உணர்த்துவது (Certiorari), தகுதி உள்ளதா என்று கேட்பது (Qua-warranto) என்ற ஐந்து வகை ஆணைகள் பிறப்பிக்கும் அதிகாரம் உள்ளது. உறுப்பு 32-ன் கீழ் ஒர் அடிப்படை உரிமை மீறுதலுக்காகவும் உச்ச நீதிமன்றத்தை நேரடியாக அணுகலாம் பொது நல வழக்குகள் இப்போது பரவலாக ஏற்றுக்கொள்ளப்படுகிறது நீதியரசர்கள் பகவதி, கிருஷ்ணயர் போன்றவர்களுக்கு நன்றி சொல்ல வேண்டும். ஒரு நீதிபதி சாதாரண குடிமகன் தன் உரிமை மீறல்கள் பற்றி போஸ்ட்கார்டில் அனுப்பியதையே விசாரணக்கு எடுத்துக்கொண்டு நீதிப் பேராணை பிறப்பித்தார் என நெஞ்சை நிமிர்த்தக்கூடிய செய்தி உண்டு.

தனிமனிதர் சுதந்திரம் பாதுகாப்பதில் தனித்துவம் வாய்ந்த ஆணைகள் உச்ச நீதிமன்றம் உறுப்பு 21 அடிப்படையில் கொடுத்திருக்கிறது. இந்த பாதுகாப்பு இந்திய குடிமகனுக்குமட்டுமின்றி எந்த ஒரு தனி நபருக்கும் இது பொருந்தும், இந்த சுதந்திரம், பாதுகாப்பு உண்டு என்பது மிகச் சிறப்பான அம்சம்.

வணிக வர்த்தகம் மற்றும் வர்த்தகத் தொடர்பு சுதந்திரம் பொருளாதார வளர்ச்சிக்கு மிகவும் அவசியம் உறுப்பு 301-ல் இது குறித்து பொது விதியும் வரையறைகளும் அளிக்கப்பட்டுள்ளன. இந்தியா முழுமைக்கும் வாணிகம், வர்த்தகம் மற்றும் வர்த்தகத் தொடர்பு சுதந்திரமாக இருத்தல் வேண்டும் என்பதாக உறுப்பு 301-ல் வலியுறுத்துகிறது. வரிவிதிப்புச் சட்டங்கள் இந்த உறுப்பின் எல்லைக்கு அப்பாற்பட்டது.

கடந்த 62 ஆண்டுகளில் நவம்பர் 2006-ம் ஆண்டு வரை 94 மாற்றங்கள் அரசியல் சாசனத்தில் கொண்டு வரப்பட்டுள்ளன. காலத்திற்கேற்ற மாற்றங்கள் தேவை.

1975-ம் வருடம் மன்னர்களுக்கு உண்டான மானியங்கள் சம்மந்தப்பட்ட திருத்தங்கள், வங்கிகள் தேசியமயமாக்கல், 51 A என்ற உறுப்பில் அடிப்படைக்கடமைகள் பற்றி விவரிக்கப்பட்டுள்ள திருத்தம், அடிப்படைக்கல்வி கட்டாயமாக்கப்பட்ட 21 A என்ற உறுப்பு இணைப்பில் திருத்தம் ஆகியவை மிக முக்கிமான சாசன மாற்றங்கள் ஆகும்.

இந்தியர்கள் வெளிநாடுகளில் சிறப்பாகப் பணிபுரிகிறார்கள் அமெரிக்காவில் எல்லா முக்கியத்துறைகள் விண்வெளித்துறை நாஸா போன்ற நுணுக்கமான பணிகளில் இன்றியமையாதவர்களாக விளங்குகிறார்கள் என்றாலும் இந்தியாவில் நாம் ஏன் அவ்வாறு முழு ஈடுபாடுடன் பணிபுரிவதில்லை?

சிங்கப்பூரில் ஒழுக்கமாக இருக்கும் இந்தியன் சென்னை வந்தவுடன் துப்பத் துவங்குகிறான் குப்பையை கண்ட இடத்தில் வீசுகிறான் உள்ளாட்சியும் என்ன செய்ய முடியும் பெருக்க பெருக்க குப்பை பெருகுகிறதே. ஒழுக்கமும் கட்டுப்பாடும் பொதுமக்கள் கடைபிடித்தால் எவ்வளவோ சமுதாய பிரச்சனைகளுக்குத் தீர்வு காணலாம். உறுப்பு 51 A வில் அடிப்படைக்கடமைகள் முக்கியத்துவம் பெறுகின்றன.

i) அரசமைப்பை பின்பற்றுதல் ii) சுதந்திரப் போராட்டத்தின் உயரிய கருத்துக்களைப் பின்பற்றுதல் iii) இந்தியாவின் இறையாண்மை, ஒற்றுமை, ஒருமைப்பாடு ஆகியவற்றை ஆதரித்தல் iv) தேசிய சேவைக்கு தன்னை முன் நிறுத்தல் v) மக்களிடையே இணக்கத்தையும் பொது சகோதரத்துவ உணர்வையும் மேம்படுத்தல் vi) இந்திய கலாச்சாரத்தின் பாரம்பரியத்தை மதித்தல், பெண்களின் கண்ணியத்தை காப்பாற்றுதல் vii) சுற்றுச்சூழலைக்காப்பாற்றுதல் viii) மனித நேயத்தை வளர்த்தல் xi) வன்முறையை கைவிட்டு பொதுச் சொத்தை பாதுகாத்தல் x) நாடு மேலோங்க தன்னாலான எல்லா முயற்சியும் நாட்டுக்கு அர்ப்பணித்தல்.

அரசியல் சாசனத்தில் மிக முக்கிய உறுப்பு அரசின் கொள்கைகளை வழி செலுத்தும் நெறிமுறைகள் பகுதி 4-ல் உறுப்பு 36 முதல் 59 வரை குறிப்பிடப்பட்டுள்ளது. பாரபட்சமற்ற வாழ்வாதாரத்திற்கான வழிகள் பொது நன்மையை கருத்தில் கொண்டு மூலவளங்களின் பகிர்வு, தொழில் நிர்வாகத்தில் தொழிலாளர் பங்கேற்பு, சம நீதி, வாழ்க்கை தரத்தை மேம்படுத்துதல், குழந்தைகளுக்கு இலவச கட்டாயக்கல்வி போன்ற சமுதாய முன்னேற்றத்திற்கான நடவடிக்கைகள் இதில் அடங்கும். ஆனால் இந்த நெறிமுறைகளை வழக்கிட்டு பெறமுடியாது.

குடியரசாக 62 ஆண்டுகள் பூர்த்தியான நிலையில் பல நெருடலான பிரச்சனைகளுக்கு இன்னும் தீர்வு இல்லை. ஐந்து வயதுட்குட்பட்ட 42 சதவிகித குழந்தைகளுக்கு ஊட்டசத்து கிடைப்பதில்லை. அதில் 7 சதவிகிதம் குழந்தைகள் இறந்து விடுகின்றன. 30 கோடி மக்கள் உண்ண உணவின்றி பசியால் வாடுகிறார்கள். அவர்களுக்கு போதிய மருத்துவ வசதியில்லை. சுமார் 70 லட்சம் மக்கள் இன்னும் மனித மலங்களை அகற்றும் பணியில் உள்ளனர். பாதி இந்தியர்களுக்கு படிப்பறிவில்லை. இன்னும் 66 சதவிகித மக்கள் திறந்த வெளியில் தான் மலம் கழிக்கும் நிலை. இவ்வாறு எவ்வளவோ பிரச்சனைகள்.

அரசியல் சாசனத்தில் பல உரிமைகள் கடமைகள் கொடுக்கப்பட்டிருக்கின்றன. சட்டங்கள் இயற்றப்படுகின்றன. நிலையாணைகள் விதிகள் உள்ளன, திட்டங்கள் தீட்டப்படுகின்றன, நிதி ஒதுக்கப்படுகிறது. ஆனால் அவை நிறைவேற்றுவதில்தான் எல்லாப் பிரச்சனைகளும்.

என்று அழியும் இந்த அவலங்கள்?

“என்று தணியும் இந்த ‘சுரண்டர‘ மோகம்

என்று வளரும் நம் உழைப்பில் உற்சாகம்” என்ற ஏக்கம் தொடர்கிறது. அதற்கு விடை நேர்மையான உழைப்பு ஒன்று தான். உழைப்பால் உயர்வதே நாட்டுக்கு உயர்வு. ஒவ்வொரு இந்தியனும் கட்டுப்பாட்டுடன் ஒழுக்கமுடன் நாட்டின் முன்னேற்றத்திற்கு தன் பங்களிப்பை உணர்ந்து செயல்பட்டால் தான் உண்மையான சுதந்திரம் மக்கள் அடைய முடியும்.

இந்த கட்டுரை தினமணி 03.02.2012 அன்று பிரசுரிக்கப்பட்டது.

உத்தம புத்திரர்

noreply@blogger.com (Nataraj) — Wed, 18 Jan 2012 13:52:00 +0530

‘கடும் தவத்தினால் பெற்றப் பிள்ளை”, “என்ன தேஜஸ் என்ன அறிவு‘, ‘ஒளிக்கீற்று பாய்வதைப் பார்த்தேன் என்னோடு சமுதாயப் பணிக்கு சீடன் பிறந்தான் என்றுணர்ந்தேன்‘, ‘பாட்டனார் மாதிரி சைவத்தை விருப்புகிறானே அவர் போல் பந்தங்களைத் துறப்பானோ‘, ‘சாஷாத் சிவ ரூபம் சிவ அவதாரம்‘! இந்த விமர்சனங்களுக்கு பாத்திரமானவர் வேறு யாருமில்லை, ‘வீரேஷ்வர்‘ என்று பெற்றோர்களால் பெயர் சூட்டப்பட்டு இந்திய மக்களுக்கு ஒளிவிளக்காக வளர்ந்த சுவாமி விவேகானந்தர் அவர்கள்தான். பெற்றோரின் பத்து குழந்தைகளில் ஆறாவது குழந்தை விவேகானந்தர். 40 வயது எய்துவதற்கு முன்பே அவரை இறைவன் அழைந்துக் கொண்டான். அதற்குள்தான் எத்தகைய இமாலய சாதனை!

ஆதி சங்கர்ருக்குப் பிறகு இந்தியாவை அகண்ட பாரதமாக பார்த்த மகா புருஷர் சுவாமி விவேகானந்தர். அவரது வாழ்க்கை வரலாற்றை எழுதிய பிரசித்தி பெற்ற ரோமேன் ரோலாண்ட், ‘தீ அவரது பூத உடலை அழித்தாலும் அந்த புனித அஸ்தியிலிருந்து இந்தியாவின் புதிய ஆன்மா புத்துயிர் பெற்றிருக்கிறது. இந்தியாவின் தொன்று தொட்டு வரும் கலாச்சாரம், ஒருமைப்பாட்டின் பற்றுதல் பரிமாண வளர்ச்சிப் பெற்று மனித சமுதாயத்திற்கு வழிகாட்ட பிறந்திருக்கிறது‘ என்று உள்ளம் நெகிழ கூறியுள்ளார்.

விவேகானந்தர் அமெரிக்கா சென்று சிகாகோவில் நடந்த அனைத்து சமய மாநாட்டில் கலந்து கொண்டு அபாரமான சொற்பொழிவாற்றினார் என்பது நாம் அறிவோம். அந்த சொற்பொழிவில் எல்லோரையும் கவர்ந்தது அவர் அன்போடு எல்லோரையும் திரும்பத் திரும்ப சகோதர சகோதரிகளே என்று அன்போடு குறிப்பிட்டு தெளிவாகவும் நேர்மையாகவும் கருத்துக்களை வைத்ததுதான் காரணம். உலகத்தில் உள்ள எல்லா ஜீவராசிகளும் ஒன்று அவையாவும் பரம்பொருளின் அம்சம் என்ற வகையில் எல்லோரையும் ஒன்றாக பாவித்து நேசிக்கும் கொள்கையைப் பின்பற்றியதால் அவரது பேச்சில் உண்மை இருந்தது. எல்லோரும் தன்னிச்சையாக கவரப்பட்டனர். அவர் எழுதிய ஒரு கடிதத்தை சிறப்பாக மொழிபெயர்த்த பாரதியார் அவர்கள், 1920-ல் சுதேசமித்திரன் பத்திரிகையில் குறிபிட்டுவுள்ளார் ‘முக்தி அல்லது விடுதலையே என் மதம். இதைக் கட்டுப்படுத்த முயல்வது யாதாயினும் நான் அதை எதிர்ப்பேன்‘.

‘பண்பாடுதான் நாட்டின் வலிமை, பொருளாதார செழிப்பு, நாட்டின் பரப்பளவு வலிமையை நிர்ணயிக்காது‘ என்கிறார் சுவாமி விவேகானந்தர். இந்தியாவின் வலிமையை உணர்ந்தவர். அந்த வலிமையின் பெருமையை உணராதவர்களால் தான் நாடு வலுவிழந்து வருகிறது என்பதை தனது பேச்சுக்களிலும் எழுத்துக்களிலும் தொடர்ந்து வலியுறுத்தினார். பண்பாடு என்பது மனித நேயமும் நல்லியில்புகளும் வெளிப்படுத்தும் மனிதப்பண்பாடு மட்டுமே. இனம், மொழி, மதம், தேசம் எல்லாம் வெறும் பயன்பாடுகள். அவை மாற்றத்திற்குரியவை. உலகம் தோன்றியது முதல் பல நாடுகள், சமுதாயங்கள் தோன்றி மறைந்துள்ளன. மனிதப் பண்பாடு என்றும் நிலைத்து நிற்கும்.

கல்வி ஒன்றுதான் பண்பாடு வளர்வதற்கு அடித்தளமாக அமைகிறது. வகுப்பறையில் கற்பது மட்டும் கல்வி அல்ல பள்ளிகளிலும், கல்லூரிகளிலும் நாம் கற்பவை அல்லது மாணவர்களுக்கு அளிக்கப்படுவது வெறும் தகவல்கள். புரியாத தகவல்களை புரிய வைக்கிறார்கள். சமுதாயத்திலிருந்த பெறக்கூடிய அரிய விஷயங்கள், இயற்கை கற்றுக் கொடுப்பவை, நற்பண்பாளர்கள் மூலம் கற்பவை, முடிவாக அனுபவம் கொடுக்கும் பாடம் இவை எல்லாம் நற்பண்புகளை வளர்க்கும் கல்விக்கு சமானம்.

ஒரு விதை மரமாவது போல பண்பாடு வளருகிறது. விதை ஒன்றுதான். அந்த நல்ல விதை பல விதைகள் அடங்கிய நற்கனிகளைக் கொடுக்கிறது. தேக்கு மரம் போல் உரம் மேவிய மனிதன் என்று நற்பண்புகள் உடைய மனிதருக்கு உவமை காட்டப்படுகிறது. தேய்க்கத் தேய்க்க வாசனைத்தருகிறது சந்தனக் கட்டை. வாசனைப் பூவை மிதித்தாலும் மணம் வீசும். பண்பாளர்களின் குணம் தான் சமுதாயத்தின் வலிமை.

ரவீந்திரநாத் தாகூர் கூறுவார் ‘உலகில் தீர்கமான அறிவாளிகள் இருக்கிறார்கள் ஆனால் தீர்கமான மனிதர்கள் இல்லை!‘ எவ்வளவு உண்மை.

அச்சம் தவிர், ஆண்மை தவறேல், எண்ணுவது உயர்வு, கற்றது ஒழுகு என்ற பாரதியாரின் ஒழுக்க நெறிகளே பண்பாடு. உண்மையான சுதந்திரம் தைரியமான வாழ்க்கை. தைரியத்தை கற்பிப்பதுதான் நேர்மையான கல்வி. நமக்கு எது அச்சம் தரும் என்று நினைக்கிறோமோ அதை முதலில் செய்வதே விவேகம். இந்த பயம் அச்சத்தினால் தான் எவ்வளவோ இன்னல்களையும், அநீதிகளையும் சகித்துக் கொண்டிருக்கிறோம்! உலகம் போற்றும் சிந்தனையாளர் ஜித்து கிருஷ்ணமூர்த்தி, வாழ்க்கை பயம் சூழ்ந்ததாக கருதும் மக்கள் நிலையை மாற்ற வேண்டும் என்று கூறுகிறார். குழந்தைப் பருவத்திலிருந்து பயத்தை நாமே தெரிந்தோ தெரியாமலோ வளர்க்கிறோம். வழிபாட்டிலும் ‘பயபக்கியோடு‘ வணங்குவதை பெருமையாக கொள்கிறோம். பள்ளிக்கூட வகுப்புகளில் பயம், ஆசிரியரைக் கண்டால் பயம், தேர்வு எதிர்கொள்வதற்கு பயம், முழுமையாக படிக்கவில்லையே என்று பயம், போலீசைப் பார்த்தால் பயம் என்று அச்ச உணர்வு மேலோங்குகிறது. நற்கல்வியின் முதல் குறிக்கோள் இந்த அச்சத்தை போக்குவதுதான். குழந்தைகளிடம் அச்சத்தை வளர்த்தால் நாளைக் கோழைகளாக கேள்வி கேட்கும் திறனற்றவர்களாக உருவாகுவது சமுதாயத்திற்கு நல்லதல்ல. அது பண்பாடு சீர்குலைவிற்கு வழி வகுக்கும்.

‘அபாயமற்ற வாழ்க்கை வாழ்வதே அபாயம்‘ என்கிறார் சிந்தனையாளர் எமர்சன். தைரியம் வளர்ந்தால் தான் பண்பாடு சீரடையும் என்பதை முழுமையாக உணர்ந்து இளைஞர்களுக்கு உத்வேகத்தை பரவச் செய்து எழுச்சி நாயகர்களாக வளர வேண்டும் என்று பாடுபட்டார் சுவாமி விவேகானந்தர். அச்சமே நரகம், அச்சம் சினம் இல்லா வாழ்க்கையால் ஆயுள் நீடிக்கும்.

சுதந்திர போராட்டத்தில் லத்தி சார்ஜில் அடிப்பட்ட காயத்தோடு சிறையில் அடைக்கப்பட்டார் பண்டிட் நேரு. சிறையில் காண வந்தார் தாய் சொரூபராணி. இது காயமல்ல எனக்கு அளிக்கப்பட்ட விருது என்றார் நேரு. 1970-ம் வருடம் நயினி சிறையில் இருந்த நேரு தனது மகளுக்கு எழுதிய கடிதத்தில், தைரியமாக இரு எதற்கும் பயப்படாதே. எதை செய்தாலும் வெளிப்படையாக அஞ்சாமல் செய் என்று குறிப்பிடுகிறார். ரகசியமாகவோ பயந்து கொண்டே செய்யும் செய்கைகள் நியாயமற்றவை, நேர்மையற்றவை என்பது எவ்வளவு உண்மை. கூடா நட்பைப் பற்றி சிலாகிக்கும் சிலர் இதை பின்பற்றியிருந்தால் 2ஜீ காற்றலை ஊழல் விசுவரூபம் எடுத்திருக்காதே!

நமது பண்பாட்டில் பெருமைக் கொள்ள வேண்டியவை பல இருக்கின்றன. விஞ்ஞானத்திற்கு நாம் உலகத்திற்கே முன்னோடியாக இருந்தோம். கணிதத்தில் பூஜ்யம் என்பதை கணித்ததே இந்தியர்கள் தான். அராபிய மொழி வலமிருந்து இடம் எழுதப்படும். ஆனால் அரேபியர்கள் கணக்குகளை இடத்திலிருந்து வலமாக குறிக்கின்றனர். இடத்திலிருந்து வலம் எழுதும் முறையுடைய இந்தியர்களிடமிருந்துதான் எண்கள் கணிதம் அராபியாவிற்குச் சென்றது என்பது தெளிவு. விண்வெளியைப்பற்றியும், பிரபஞ்சத்தையும் முற்றும் அறிந்து தெளிவு படுத்தியவர் ஆரியபட்டர். இன்றும் படிக்கப்படாத 10 ஆயிரத்திற்குப் மேற்ப்பட்ட சமஸ்கிருத ஓலைச்சுவடிகள் விண்வெளி ஆராய்ச்சிப்பற்றியும், விஞ்ஞானத்தை பற்றியும் இருக்கின்றன என்பது நம்மில் எவ்வளவு பேருக்குத் தெரியும்?

பாருக்குள்ளே நல்ல நாடாக இருந்த பாரத நாடு வறுமை, போராட்டம், சமூக அநீதிகள் என்ற பிரச்சனைகளை சந்திக்கிறது என்றால் அதற்குக் காரணம் நாம் தான். பண்பாட்டை மறந்து பயனற்ற பயன்பாடுகளில் மனதை செலுத்துகிறோம். வேலை செய்யாமல் இருப்பதை இலவசங்கள் மூலம் ஊக்கவிக்கப்படுகிறது. சில நுற்றாண்டுகளுக்கு முன் உலக பொருளாதார உற்பத்திப் பெருக்கத்தில் சைனாவோடு நமது நாட்டின் பங்களிப்பு 60 சதவிகிதமாக இருந்தது, மூன்று சதவிகிதமாக தேங்கி இப்போது 8 சதவிகிதம் எட்டுவதைப் பெருமையாக பேசுகிறோம். அதிலும் உற்பத்தியின் பயனளிப்பு எல்லா சமூகத்தினருக்கும் சென்று அடையவில்லை. பணக்கார்ரர்கள் மட்டும் கொழுத்திருக்கிறார்கள். 79 சதவிகிதம் மக்கள் வறுமையில் வாடுகிறார்கள். வேலையில்லத் திண்டாட்டம், சுகாதாரம், மருத்தவ வசதி, தரமான கல்வி போன்ற பிரச்சனைகளுக்கு தீர்வு இல்லை.

குழந்தைகள் மேம்பாட்டு சேவை மையம் அளித்த ‘ஹங்காமா‘ என்ற ஆய்வு அறிக்கையில் ஆறு வயதுக்கு உட்பட்ட குழந்தைகள் எண்ணிகை 16 கோடி (மொத்த ஜனத் தொகையில் 15 சதவிகிதம்), இவர்களில் 42 சதவிகிதம் குழந்தைகளில் உடல் எடை குறைவு அவர்களுக்கு போதிய போஷாக்கு கிடைப்பதில்லை என்ற அதிர்ச்சியூட்டும் தகவல் குறிப்பிடப்பட்டுள்ளது. இவர்கள் தான் நாளைய விஞ்ஞானிகள், ஆசிரியர்கள், பொறியியல் வல்லுனர்கள், போர்வீரர்கள்! இந்தப்பிரச்சனைகளுக்கு ஒருமித்த தீர்வு காண விழையாமல் விதண்டாவாதத்தில் நேரம் விரயமாகிறது. அரசுத்துறையில் இருப்பவர் ஒவ்வொருவரும் பொறுப்போடு செயல் பட்டால் தான் திட்டங்கள் நிறைவேறும்.

ஆட்சிப் பொறுப்பு என்பது மிகப்பெரிய வரப்பிரசாதம். மக்களாட்சி என்பது மக்கள் பிரதிநிதிகளின் பொறுப்பு மட்டுமல்ல எல்லாதரப்பட்ட மக்களின் பங்களிப்பு இருந்தால் தான் முழுமையடையும். பல தொழில்களிலும் அமைப்புகளிலும் உள்ளவர் சிறப்பாக செயல்பட்டால் தான் முன்னேற்றம் ஏற்படும். நல்ல திட்டங்களுக்கும் ஆலோசனைகளுக்கும் உரிய வரவேற்பு இருக்க வேண்டும். அதற்கு உடனடியாக செயல் வடிவம் கொடுக்க வேண்டும். அதை விட்டு சில அரசு அதிகாரிகள் யோசனை கூறுபவருக்கு என்ன உள்நோக்கம் என்ற சந்தேகத்தோடு பார்ப்பது வருத்தத்திற்குரியது. சில அதிகாரிகள் இதனால் தனக்கு என்ன லாபம் என்று கணக்கிடுவதும் கண்டிக்கத்தக்கது.

விவேகானந்தர், ரவீந்திரநாத், தாகூர் போன்றவர்களின் 150 வது ஜெயந்தியை அனுசரிக்கும் இவ்வேளையில் அவர்களது கோட்பாடுகளை பின்பற்றுவதை தலையாயப் பொறுப்பாக கொள்ளவேண்டும். வழிகாட்டி தலைவர்களின் அடையாள நாட்கள் காலண்டரிலேயே தங்கி விடுகின்றன. அவர்கள் விட்டுச் சென்ற பாதையை மறந்து விடுகிறோம். தாகூர் இயற்கையை நேசித்தவர். ஆனால் நாம் இயற்கையோடு சண்டையிடுகிறோம் மரங்களை வெட்டுவதின் மூலம்!

கல்வி நம்மில் உள்ள முழுமையின் பிரதிபலிப்பு. மதம் நம்மில் உள்ள புனிதத்துவத்தின் பிரதிபலிப்பு. ஜாதி மத பேதமற்று தனிமனிதனின் வளர்ச்சிக்கும் உயர்வுக்கும் உழைப்பதே நமது கடமையாக கொள்ள வேண்டும் என்றார் விவேகானந்தர். எல்லா இனங்களிலும் உள்ள ஏழைகளே தன் இஷ்ட தெய்வம் அவர்களுக்கு சேவை செய்து உய்விப்பதற்கான பேறு பெறுவேனாக என்றும் மக்கள் சேவையே மகேசன் சேவை என்று வாழ்ந்து காட்டியவர் விவேகானந்தர். அத்தகைய உன்னத நோக்கங்களை செயலாக்குவதுதான் இந்த உயர்ந்த ஆத்மாக்களுக்கு நாம் செலுத்தும் அஞ்சலி.

This Article published in Dinamani on 17.01.2012

சமயம் இதுவே

noreply@blogger.com (Nataraj) — Wed, 18 Jan 2012 13:50:00 +0530

இந்திய அரசியல் சாசனத்தில் துவக்கத்தில் கூறப்படும் குறிக்கோள்கள் சாசனத்தின் அடிப்படை நோக்கங்களை விளக்குகின்றன. இந்திய மக்களுக்கு சமுதாய, பொருளாதார சமத்துவ கோட்பாடுகளைப் பகிர்ந்து கொடுப்பது தான் அரசியல் சாசனம் மூலம் தோற்றுவிக்கப்படும் அமைப்புகளான, பாராளுமன்றம், அரசாங்கம், அமைச்சரவை நீதிமன்றங்கள் அரசு நிர்வாகம் போன்றவற்றின் தலையாய கடமை.

எது சிறந்த நாடு என்று பார்த்தால் எங்கு நல்லாட்சி நடக்கிறதோ, எங்கு மக்கள் சுபிட்சமாக அமைதியாக சந்தோஷத்தோடு வாழ்கிறார்களோ. அதுவே சிறந்த நாடு. ‘வண்மை இல்லை வறுமை இன்மையால், உண்மையில்லை பொய்யுரை இலாமையால்‘ என்ற கோசல நாட்டின் பெருமையை நயமுடன் விளக்குகிறார் கம்பன். அவ்வாறு இருந்த நாடுதான் நமது நாடு. சுய நலம் ஆட்கொண்டதாலும் எல்லோரையும் அணைத்துச் செல்லும் ஒப்புரவு குறைவதாலும் பிரச்சனைகள் தீராமல் நின்ற இடத்திலேயே ஒடிக்கொண்டிருக்கிறோம்.

கிரேக்க நாடு சட்ட வல்லுனர் ஐஸ்டின் கூறும் சட்ட கோட்பாடுகள் மூன்று. அவை நேர்மையாக வாழ்தல், ஒருவருக்கும் கெடுதல் செய்யாதிருத்தல், கடன் பட்டதை திருப்பி அளித்தல்.

எந்த சமுதாயத்தில் பாதிப்பிற்கு உள்ளாகாதவர்கள் மற்றும் பாதிக்கப்பட்டவர்கள் ஒன்று சேர்ந்து பாதிப்பு ஏற்படுத்தியவரை, தவறு இழைத்தவரை தண்டிக்க ஒருங்கிணைந்து முற்படுகின்றனரோ அதுவே வாழ சிறந்த நகரம் என்கிறது பண்டைகால கிரேக்க அடைமொழி. இவை இன்றும் மக்களாட்சிக்குப் பொருந்தும்.

வெளிப்படையான நிர்வாகம், அமைதியான சூழல், திறமையாக இயங்கும் நிர்வாக அமைப்புகள், பயமில்லாத வாழ்க்கை இவற்றை உறுதி செய்தாலே மக்கள் மகிழ்ச்சியடைவார்கள்,

ஆப்பிள் கணினியைக் கண்டுபிடித்த ‘ஸ்டீவ் ஜாப்ஸ்‘ ஹார்வர்ட் பல்கலைக்கழக உரையில் பொருளாதார மதிப்பீட்டில் ஈடுகட்டமுடியாத மூலதனம் நேரம் ஒன்று தான் என்பதை வலியுறுத்தியுள்ளார். காலம் பொன்னானது என்று பெயரளவில் கூறுகிறோமே தவிர நேரத்தை மதிப்பதில்லை. காலம் ஒடிக்கொண்டுதான் இருக்கும். கழிந்த நேரத்தைப்பற்றி அங்கலாய்க்கிறோம், ஒட்டுனர் நாம் தாம் என்பதை மறந்து விட்டு! இல்லாவிட்டால் சுதந்திரம் அடைந்து 64 ஆண்டுகள் ஆகியும் வறுமை ஒழிந்தபாடில்லை, தரமான கல்வி எல்லோருக்கும் சென்றடையவில்லை. நாற்பது ஆண்டுகளாக ஊழல் ஒழிப்பு மசோதாவைப் பற்றி விவாதித்துக் கொண்டிருக்கிறோம். ஊழலும் ஒழியவில்லை. சட்டமும் நிறைவேற்றப் படவில்லை.

சர்வதேச அளவில் சென்னை விமான தளம் விரிவடைய வேண்டும். அதற்கு நிலம் 2002 ல் ஒதுக்கப்பட்டும் சில சுயநலவாதிகளின் போராட்டங்களால் ஸ்தம்பித்தது. ஆனால் ஹைதராபாத், பங்களூரில் புதிய விமான நிலையங்கள் அமைக்கப்பட்டு விட்டன. சென்னை நகரில் உள்ள நெரிசலுக்குத் தீர்வு சாட்டிலைட் நகரங்கள் சென்னையைச் சுற்றி உருவாக்க வேண்டும். அதற்கு திட்டம் 2001-06 ஆட்சியின் போது வகுக்கப்பட்டது. மீண்டும் சில சுய நலவாதிகள் அரசியல் நோக்கத்தோடு தலையிட்டு முன்னேற்றத்தை முடக்குவதிலேயே குறியாக இருந்தனர். இத்தகைய முட்டுக்கட்டைகளினால் விலை மதிக்க முடியாத நேரம் விரயமானது. மற்ற மாநிலங்கள் முந்திக் கொண்டன.

வெளிநாடு சென்று வருபவர்கள் அங்கு இருக்கும் துய்மையையும், வெளிப்படையான நிர்வாகத்தையும், நேர்த்தியான கட்டமைப்புகளையும் புகழ்கின்றனர். நம்மிடம் திறமை இருக்கிறது. பொருளாதாரமும் பெருகியிருக்கிறது. இருந்தும் ஏன் சாதாரண பிரச்சனைகளுக்கும் தீர்வு இல்லை?

சாலைகள் செப்பனிடப்படுகின்றன. சில மாதங்களில் மீண்டும் பழுதடைகின்றன. மெரீனா fகடற்கரை உலகப்பிரசித்திப்பெற்றது. கடல் ஆர்ப்பரிப்பிற்கு முன் வேறு ஏதாவது செயற்கை அழகு எடுபடுமா? பீச் முகப்பை செப்பனிடும் பணியில் கோடிக்கணக்கான பணம் விரயமாகப்பட்டது. புறநகர் பகுதிகளில் சாலைகள் எவ்வளவு மோசமாக உள்ளன. அதை செப்பனிடாமல் வேண்டியவர்கள் வீடுகள் இருக்கும் சாலைகளை அகலப்படுத்துவது, நன்றாக உள்ள நடைபாதைகளில் டைல்ஸ ஒட்டுவது போன்ற பணிகள்தான் திரும்ப திரும்ப நடந்தன. இந்நிலை மாறவேண்டும்.

முன்னேறிய நாடுகளுக்கும் வளர்ந்து வரும் நாடுகளுக்கும் உள்ள முக்கிய வித்தியாசம் அந்தந்த நாட்டு மக்களின் உழைக்கும் திறன். முன்னேறிய நாடுகளில் உழைக்கும் போது முழு கவனம் செலுத்தி உழைப்பார்கள். நேரத்தை வீணாக்க மாட்டார்கள். ஆனால் வளர்ந்து வரும் நாடுகளில் அதற்கு நேர்மாறான அணுகுமுறை. ஈடுபாடின்மை, தாமஸமான செய்கைகள், கவனமின்மை, வம்பளப்பது மொத்ததில் பணி நேரத்தை விரயமாக்குவது போன்ற தரமற்ற குணங்கள் காணப்படும். உழைப்பே உயர்வு என்று போற்றுவதால்தான் ஐப்பான் போன்ற நாடுகள் உற்பத்தியை பெருக்கியுள்ளன.

கடந்த சில வருடங்களில் இலவசங்கள் என்ற மாயையில் மக்களின் உழைக்கும் சக்தியை மங்கடித்து தொலைக்காட்சி மூலம் கேளிக்கைகள், விரசங்கள், அர்த்தமற்ற கொண்டாட்டங்கள் தான் பிரதானம் என்ற நிலை உருவாக்கி விட்டனர். மதுவிலக்கு அறுபதுகளில் தளர்த்தப்பட்டு இளைய சமுதாயம் சீரழிக்கப்பட்டதோ அதே நிலை உருவாகாமால் தெய்வாதீனமாக இப்போது தடுக்கப்பட்டுள்ளது.

நமது நாட்டிற்கு இப்போது தேவை தரமான கல்வி மற்றும் பொருள் உற்பத்தியில் வேலை வாய்ப்பு. குஜராத் மாநில அரசைப் பற்றி பல விதமான விமர்சனங்கள் வந்தாலும் அம்மாநிலம் பல துறைகளில் மற்ற மாநிலங்களை விட முன்னேற்றம் அடைந்துள்ளது என்பதை மத்திய திட்ட கமிஷன் அங்கீகரித்துள்ளது. முக்கியமாக விவசாயத்தில் உற்பத்தி பெருக்கம், விவசாயிகளுக்கு உழைப்பிற்கு ஏற்ற ஈடு, விவசாயிகளின் வாழ்க்கைத் தரத்தை உயர்த்தியுள்ளது. பல கிராமங்களில் மழைநீர் சேகரிப்பு மிக சிறப்பாக திட்டமிட்டு நிறைவேற்றப்பட்டுள்ளது.

‘ஸ்பீட், ஸ்கில், ஸ்கேல்‘ வேகம், திறமை, வளமை என்பதை நிர்வாகத்தின் குறிக்கோளாகக் கொண்டு குஜராத் அரசு செயல்படுகிறது என்று குறிப்பிடப்பட்டுள்ளது. ஊழலும் சோம்பலும் தான் நிர்வாக சக்கரத்தை பழுதடையச் செய்கின்றன, சரி செய்ததால் நிர்வாகம் நிறைவாக செயல்படுகின்றது என்று கூறப்படுகிறது.

நமது முதல்வர் அவர்கள் முன்பு மழைநீர் சேகரிப்பு திட்டத்தை நகர் புறங்களில் முழுமையாக நிறைவேற்றி, வீராணம் குடி நீர் திட்டத்தையும் பூர்த்தி செய்து சென்னைக் குடிநீர் பிரச்சனைக்கு நிரந்தர தீர்வு அளித்தார்கள். அதுபோல் தமிழ் நாட்டில் உள்ள 17,250 ரெவின்யூ கிராமங்கள், 60 அறுபதாயிரத்திற்குப் மேற்பட்ட குக்கிராமங்களில் போர்க்கால அடிப்படையில் மழைநீர் சேகரிப்பு திட்டம் அமலாக்கப்பட்டால் வேளாண்மை பெரும் கிராமங்கள் செழிப்படையும்.

ஒரு மாணவி அரசு அளித்த கணினியை வைத்து படித்துக் கொண்டிருக்கும் படம் மனதைக் கவர்ந்தது. ஆனால் அவள் இருக்கும் வீடோ குடிசை வீடு. இந்த வீடு பசுமை வீடாக மாற்றும் அரசு அறிவித்து இருக்கும் திட்டம் நிறைவேற்றப்பட்டால் சிறப்பாக மக்கள் வாழ்கைத் தரத்தை உயர்த்தும். பசுமை வீடுகளுக்கு லட்சக்கணக்கில் செங்கல் தேவைப்படும். செங்கல் உற்பத்தி கிராம குடிசைத்தொழில். தரிசு நிலத்தில் செங்கல் செய்வது மக்களுக்கு உழைப்புக்கு ஏற்ற தொகையும் கிராம முன்னேற்றத்திற்கு வழிவகுக்கும்.

சூரிய ஒளியில்ருந்து மின்சார உற்பத்தி மிக சிறப்பான திட்டம். வீடுகளில் சோலார் தகடுகள் மூலம் வீட்டிற்கு தேவையான மின் சக்தி கிடைக்கும். மின் வெட்டு வருமோ என்ற கவலை இருக்காது. பல ஐரோப்பிய நகரங்களில் வீடுகளின் மாடியில் சோலார் பேனல் வைப்பதற்காக வாடகை விடப்படுகிறது. அந்த வகையில் சூரிய சக்தி ஈர்க்கும் திட்டம் நகரங்களில் விரிவாக்கப்பட்டால் சோலார் தகடுகளின் விலை குறையும், சூரிய ஒளியின் மூலம் மின்சாரம் அதிக செலவு என்ற நிலை மாறும்.

ஐக்கிய நாடுகள் சபை நாட்டின் நிர்வாகத்தின் ஆளுமையைப்பற்றி விவரிக்கும் பொழுது வெளிப்படையான ஊழலற்ற நிர்வாகம் தான் சிறப்பான அமைப்பிற்கு அடித்தளம் என்று உறுதிபட கூறியிருக்கிறது. நாடெங்கிலும் ஊழல் பிரச்சனை விசுவரூபம் எடுத்துள்ளது. எல்லோரும் ஊழலை எதிர்க்கிறார்கள். ஆனால் அதற்கான சட்டம் நிறைவேற்றுவதில்தான் எவ்வளவு சிக்கல்கள்! ஒவ்வொருவரும் ‘நான் பிடித்த முயலுக்கு மூன்றேகால்‘ என்று விதண்டாவாதம் செய்து கொண்டிருப்பது வியப்பாக இருக்கிறது. ஆனால் சட்டம் நிறைவேற்றுவதில் மட்டும் ஊழல் அடங்குமா என்பது பெரிய கேள்விக்குறி. எந்த செயலை செய்தால் நமக்கு தூக்கம் தொலையுமோ அதுதான் நேர்மையற்ற செயல் என்று முதலமைச்சர் அவர்கள் நேர்மைக்கு தெளிவாக விளக்கம் கொடுத்திருக்கிறார்கள்.

2011-ம் வருடம் போராட்டம் நிறைந்த வருடம் என்று கூறலாம். உலகில் பல நாடுகளில் பல இடங்களில் ஆட்சியாளர்க்கு எதிராக போராட்டம் ஏற்பட்டது. எகிப்து, துருக்கி,லிபியா போன்ற மத்திய கிழக்காசிய நாடுகளில் ஒரு விதமான போராட்டம். பொருளாதார வீழ்ச்சிக்கு எதிராக கிரீஸ், போர்ச்சுகல், ஸ்பெயின் போன்ற நாடுகளில் மக்கள் தெருக்களில் ஆர்ப்பாட்டம் செய்தனர். ஏன் பொருளாதார தலைநகரமாகிய நியூயார்க் நகரத்திலும் தொடர் போராட்டம் ஏற்பட்டது. ஊடகங்கள் விரிவடைந்து விட்டதால் கருத்து பரிமாற்றம் துரிதமாக நடைபெறுவதும் ஒரு காரணம்.

எல்லா மக்களும் விரும்புவது அமைதியான அபிவிருத்திக்கு வித்திடும் சூழல். நிர்வாகத்திறன் பற்றாக்குறையால் பல மாநிலங்களில் பிரச்சனை ஏற்பட்டுள்ளன. இந்த பற்றாக்குறையை சரிசெய்வது ஒன்றும் கடினமல்ல. துறைக்கு உகந்த அமைப்பை உருவாக்க வேண்டும். செயல்பாடுகளையும் முன்னேற்றத்தையும் தெளிவாக மேற்பார்வையிட வேண்டும். குறுக்கீடுகள் இல்லாது நேர்மையான பணிகளை உறுதி செய்ய வேண்டும்.

முன்னேற்றப்பாதையில் தடைக் கற்கள் இல்லாமல் இருக்காது. ஆனால் அவற்றை தகர்த்து வெற்றிப் படிக்கட்டுகளாக மாற்றுவது தான் நிர்வாகத்தின் திறமை. நிர்வாகத் திறமை முக்கியம், ஆனால் அதே நேரத்தில் திண்மையான ஈடுபாடும் மக்கள் மேல் அக்கறையும் இருக்க வேண்டும். நல்லியல்புகளும் நேர்மையும் இல்லாவிட்டால் எவ்வளவுதான் திறமையும் திண்மையும் இருந்தாலும் விழலுக்கு இறைத்த நீர் போல மறைந்து விடும். நேர்மை தான் நிர்வாகத்தை நிமிர்த்தும் முது கெலும்பு.

திறமை, திண்மை, நேர்மை தாரக மந்திரமாக அமைந்தால் மேலை நாடுகளைப்பார்த்து நாம் ஏங்க வேண்டாம். மற்றவர்கள் நம்மைப் பார்த்து வியப்பார்கள், போற்றுவார்கள், கூட்டுச் சேர விழைவார்கள்.

‘தேவி ப்ரோவ சமயமிதே‘ காப்பாற்றும் சமயமிதுதான் என்று தேவியை துதிக்கும் அழகான கர்நாடக சங்கீதப் பாடல். திறமை, திண்மை, நேர்மை இவற்றை அணிகலன்களாக கொண்டு துணிவுடன் நிர்வாகத்தை முன்னேற்றப்பாதையில் இட்டுச்செல்லும் ‘சமயம் இதுவே‘.

Dinamani article

நோக்கு வர்மம்

noreply@blogger.com (Nataraj) — Fri, 16 Dec 2011 15:52:00 +0530

ஐக்கிய நாடுகள் சபை புத்தாயிரத்தில் மக்கள் முன்னேற்றத்திற்கு உலக நாடுகள் மேற் கொள்ள வேண்டிய புத்தாயிர இலக்குகள் ஒன்று நிர்ணயித்தது. வறுமை ஒழிப்பு, கல்வி சுகாதாரம், வாழ்வாதாரம், மனித உரிமைகள் பாதுகாப்பு போன்றவை இதில் அடங்கும். ‘மில்லனியம் கோல்ஸ்‘ என்ற இந்த இலக்குகள் 2015 க்குள் எட்ட வேண்டும் அதற்கு எல்லா நாடுகள் ஒத்துழைப்புடன் செயல்பட வேண்டும் என்ற தீர்மானமும் நிறைவேற்றப்பட்டது.

ஐக்கிய நாடுகள் சபை நாட்டில் நல்லாட்சி எவ்வாறு அமைய வேணடும் என்பதையும் விவரித்துள்ளது. வெளிப்படையான ஊழலற்ற நிர்வாகம், பொறுப்புணர்ச்சி, திறமை, செயல்திறன் நிரம்பிய அரசு அமைப்புகள், வேண்டியவர் வேண்டாதவர் என்ற பாரபட்சமின்றி பல தரப்பினரின் பங்களிப்பிற்கு ஏதுவான நிர்வாகம், குறை நிறைகளை கவனத்தில் கொண்டு பிரச்சனைகளுக்கு உடனடி தீர்வு காணும் இசைவான நிர்வாகம் தான் சிறந்த நிர்வாகம். அதுவே சுயாட்சிக்கு வலிமை சேர்க்கும் நல்லாட்சி.

ஏழாம் அறிவு படத்தில் நோக்கு வர்மக்கலை எவ்வாறு தமிழகத்திலிருந்து சீனவுக்கு சென்று தற்காப்புக்கலைக்கே அடித்தளமாக அமைந்தது என்பது சித்தரிக்கப்பட்டுள்ளது. வர்மக்கலை உடலின் சக்தியை உள்ளிருத்தி மன வலிமை மூலம் வெளிப்படுத்துவது. பண்டைக்கால மருத்தவ முறைகள் சித்த வைத்தியத்தின் நெறிகளை கற்றறிந்த போதிதர்மர் என்ற தமிழனின் வெற்றிப்பயணம் சீன மக்களுக்கு கிடைத்த வரப்பிரசாதம். நோக்கு வர்மம் மூலம் ஒருவரை தன் வயப்படுத்த முடியும். இந்த நோக்கு வர்மம் அவ்வபோது மக்களுக்கும் வருகிறது. நல்லாட்சி நெறிகளிருந்து தவறினால் தமது கோபத்தை தேர்தலின் போது வாக்குச்சாவடியில் காண்பிக்கிறார்கள். துர்க்கி, எகிப்து, லிபியா போன்ற நாடுகளில் மக்களின் நோக்கு வர்மம் தீவிரமடைந்திருக்காவிடில் போராட்டம் வெடித்திருக்காது.

டிசம்பர் 10-ம் நாள் உலக மனித உரிமைகள் பாதுகாப்பு தினமாக அனுசரிக்கப்படுகிறது. உயிர், சுதந்திரம், சமத்துவம், கண்ணியம் அடிப்படை உரிமைகளாக கருதப்படுகிறது. மனித உரிமைகள் பற்றிய விழிப்புணர்வு ஏற்படுத்த வேண்டும் என்று 1997-ல் இருந்து ஐயக்கிய நாடுகள் மனித உரிமைகள் கழகம் வலியுறுத்தி வருகிறது. மனித உரிமைகள் கல்வி பாடமாக பள்ளிகள் கல்லூரிகள் மற்றும் ஆய்வு மையங்களில் அமைத்தால்தான் விழிப்புணர்வு வளரும். மனித உரிமைகள் பற்றிய விழிப்புணர்வும் புரிதலும் பல நாடுகளில் மிககுறைவு. இந்தியாவிலும் இதே நிலைதான். இல்லாவிடில் அடுத்தடுத்து இமாலய ஊழல்கள் தழைக்க விட்டிருப்பார்களா? ‘நோக்கு வர்மம்‘ என்ன சாதாரணப்பார்வையும் மங்கி விட்டதே!

அதனால் தான் மனித உரிமைகள் விழிப்புணர்வை தீவிரப்படுத்த சமுதாய கருத்துப் பரிமாற்ற முறைகள் மூலம் முயற்சிகள் எடுக்க வேண்டும் என்று ஐக்கிய நாடுகள் மனித உரிமை கழகம் அழைப்பு விடுத்துள்ளது. பேஸ் புக், ட்வீட்டர், ப்ளாக் போன்ற சோஷியல் நெட்வொர்க் என்று சொல்லப்படும் சமுதாய இணைய தளங்கள் மூலம் மனித உரிமைகள் பற்றியும், எங்கு எவ்வாறு மீறப்படுகின்றன என்பதை எடுத்துத் சொல்ல வேண்டும். ஆனால் நேர்மாறாக நமது நாட்டில் பொறுப்பில் உள்ள மத்திய அமைச்சர் தனி மனித இணைய தளங்களை தணிக்கைக்கு உட்படுத்த வேண்டும் என்று கூறியிருப்பது பலரால் ஒப்புக்கொள்ளப்படாமல் விவாதிக்கப்படுகிறது.

தகவல் பரிமாற்றம் தடையின்றி தாரளமாக இருந்தால் தான் உண்மை வெளிவரும். உண்மை என்பது ஊமை சொல்லில் வருவது பாதி நெஞ்சில் உறைந்திருப்பது மீதி என்பது நிதர்ஸனம். தர்மத்தை சூது கவ்வும் முடிவில் தர்மம் வெல்லும் என்று எதிர்பார்க்கிறோம் ஆனால் ஏன் அது லேசில் நடவாதிருக்கிறது? ஏன் கெட்டவை எளிதில் தலைதூக்குகிறது நல்லவை மங்குகின்றன? எதை முதலில் செய்ய வேண்டும்? கெட்டவற்றை களைய வேண்டுமா அல்லது நல்லவற்றை ஊன்றி போற்ற வேண்டுமா? இது பற்றி ஆய்வு பிரபல அமெரிக்க பல்பலைக்கழகத்தில் ராய் பாமிஸ்டர் குழுவினரால் மேற்கொள்ளப்பட்டது. காலங்காலமாக சரித்திரத்தில் நல்ல சக்திகள் தீய சக்திகள் இடையே போராட்டம் நிகழ்ந்துள்ளன. நாடுகள் இடையே இனம், ஜாதி, மொழி, மதம், பொருளாதாரம் போன்ற காரணங்களுக்காக போராட்டங்கள் வெடித்துள்ளன. தனி மனிதனிடம் தாமஸம், சாத்வீகம் ஆகிய இரண்டு குணங்களும் உண்டு. அந்த குருஷேத்திரப் போராட்டம் மனதில் தினமும் நிகழும். மேல் குறிப்பிட்ட ஆய்வில், கெட்ட நிகழ்வுகள் நம்மை அதிகம் பாதிக்கின்றது ஆனால் நல்லவற்றை அவ்வளவு நாம் ஆதரிப்பதில்லை என்று தெரியவந்துள்ளது. நன்மைகள் நடக்கின்றன அவை நல்லவற்றை போற்றுபவர்களுக்கு மட்டும் ஆறுதலளிக்கிறது. ஆனால் தீயவை, நன்மைகள் தீமைகள் மட்டுமின்றி நல்லவர்கள் கொடியவர்கள் எல்லோரையும் பாதிக்கின்றது, சும்மாவா சொன்னார் வள்ளுவர் ‘தீயவை தீயன பயப்பதால் தீயவை தீயுனும் அஞ்சப்படும்‘ என்று!

தீயவை, நல்லவை எவ்வாறு நிர்வாகத்தை பாதிக்கிறது என்று பார்த்தால் ஒரு தீய குணம் படைத்த லஞ்சத்தில் உழலும் அதிகாரியால் அந்த நிர்வாகமே குலையும். எவ்வாறு ஆப்பிள் கூடையில் ஒரு அழுகின ஆப்பிள் ஒட்டுமொத்தமாக எல்லாவற்றையும் கெடுப்பது போல. நிர்வாக சரிவிற்கு அந்த ஒரு ஊழல் அதிகாரி போதும். கெட்டுப் போன ஆப்பிளை உடனே தூக்கி எறிவது போல திறமையற்றவர்கள் சுயநலவாதிகளை உடனே களையெடுத்தால்தான் நிர்வாகம் சீராக இயங்கும் என்று ஆய்விலிருந்து தெரிய வந்துள்ளது.

எந்த ஒரு நபர் தன்னை முதலில் இருத்தி சக ஊழியர்களை புறக்கணிக்கிறாரோ, எவர் சுய நலத்திற்காக துறையின் மேலாண்மையை அவமதிக்கிறாரோ அத்தகையவரை உடனே நீக்க வேண்டும். எவ்வளவு நல்ல திறமைசாலிகள் இருந்தாலும் ஒரு சுயநலக்காரர் நிறைவான பணிச் சூழலை கெடுத்துவிடுவார். இத்தகைய களையெடுப்பை திறம்பட செய்த ஒரு அமெரிக்க கம்பனி, திறமையாளர்கள் பிரகாசிக்கும் சூழலை உருவாக்கியதற்கான பரிசைப்பெற்றது.

ஆனால் அரசு நிர்வாகத்தில் சில இடங்களில் நேர்மாறாக நடக்கிறது. நெளிவு சுளிவு தெரிந்தவர்கள் தான் நிலைக்கிறார்கள், வேண்டப்படுகிறார்கள் போற்றப்படுகிறார்கள். இது எதானால் சாத்தியமாகிறது என்று அதிகம் ஆராய வேண்டியதில்லை. ஊழலுக்கு துணை போவது ஒன்றுதான் காரணம்.

தகவல் தொழில் நுட்ப வளர்ச்சியால் ஒவ்வொரு மாதமும் 80 லட்சம் புதிய மொபைல்ile phone இணைப்புக்கள் பதிவாகின்றன. இதில் 90 சதவிகிதம் முன் கட்டணம்(pre-paidpaid) அதுவும் குறைந்தபட்சம் 10 ரூபாய்க்கு டாப் அப்up செய்யும் ஏழைகள். தகவல் பரிமாற்றம் விரிவடைந்தால் வர்த்தகம் பெருகும், உழைக்கும் வர்கம் பயன்பெறும். இதைமேலும் வலுவடையச் செய்வதை விட்டு விட்டு இதில் லஞ்சம் மூலம் அதாயம் தேடுபவர்கள் தேச துரோகிகள்.

ஜெயிலுக்கு செல்வது இப்போது வெற்றியின் அடையாளமாக திரிக்கப்படுகிறது. ஜெயிலிலிருந்து தற்காலிகமாக வெளிவருபவர்களுக்கு கோலாகல வரவேற்பு அளிக்கப்படுகிறது. நாட்டின் நலனுக்காக போராடி சிறைவாசம் செய்து தியாகம் செய்தவர்கள் எங்கே? மக்கள் பணத்தை சூறையாடி சட்டத்தை அவமதிப்பவர்கள் எங்கே? தாழ்ந்துவிட்ட தமிழகமே என்று வேதனைப்படாமல் இருக்கமுடியாது.

தன்னார்வு தொண்டு நிறுவனம் ஒன்று அமைத்து பொது நலத்தில் ஈடுப்பட்டிருக்கும் ஒய்வு பெற்ற உயர் அதிகாரி அரசு அமைப்புகளோடு தொடர்பு கொள்வதில் உள்ள சிக்கல்களை மனம்வெதும்பி தனது இணையதளத்தில் விவரிக்கின்றார். பொதுவாக அரசு நிர்வாகத்தில் சுயநலவாதிகள் தான் அதிகம். தில்லி அரசு அலுவலகங்களில் விளையாட்டாக கூறுவார்களாம் ‘முதலில் என் சொந்த வேலை, பின்பு உன்னுடையது நேரம் இருந்தால் அரசுப் பணி‘ என்று! இந்த நிலை எல்லா மாநிலங்களுக்கும் பொருந்தும் என்பது உண்மை. அரசு நிர்வாக அமைப்பில் எடுக்கக்கூடிய முடிவுகளை எதிர்த்து முறையிட வழியில்லை. எதற்கெடுத்தாலும் நீதிமன்றத்திற்கு செல்ல சாத்தியமில்லை. பல முடிவுகள் தவறு மட்டுமல்ல தார்மீக அடிப்படையில் கொடியவை என்று மனம் வெதும்புகிறார் அந்த உயர் அதிகாரி.

மனித உரிமை மீறல்கள் குறித்து விசாரிக்க மனித உரிமை ஆணையம் உள்ளது. தகவல் அறியும் சட்டம் உள்ளது அதற்கான ஆணையம் இயங்குகிறது. அவ்வப்போது விழிப்புணர்வு நிகழ்ச்சிகள் நடத்துவதோடு இந்த அமைப்புகளின் கடமை முடிந்துவிடுமா? எவ்வளவு சமூக ஆர்வலர்கள் போராடி முடிவுகள் பெற வேண்டியிருக்கிறது. இந்த ஆணையங்களில் உள்ளவர்கள் சுய உந்துதலோடு செயல் படுகிறார்களா? மக்களுக்கு எந்த அளவு உதவுகிறார்கள்?

சுதந்திரம் அடைந்து 64 வருடங்கள் ஆகியும் மலங்களை மனிதர்கள் சுமந்து அகற்றும் நிலை இன்னும் பல கிராமங்களில் இருக்கின்றதே, கை வண்டி இழுத்து உடல் நோக சிலர் உழைத்து ஜீவிக்க வேண்டியிருக்கிறதே, எச்சில் இலைகளில் மீதம் உள்ளவற்றை வைத்து வயிற்றை கழுவ வேண்டியிருக்கிறதே, தங்கும் இடம் இல்லாததால் கல்லறைக்கு அருகில் ஒண்டி குடும்பம் நடத்தும் அவல நிலை இன்றும் இருக்கிறதே, இவை எல்லாம் மனித உரிமை மீறல்கள் இல்லையா? பொதுவான புள்ளி விவரங்கள் சங்கடமில்லா தகவல்கள் தவிர தேவையான தகவல்கள் பெறமுடிகிறதா? தகவல் அறியும் சட்டம் மூலம் தகவல்களுக்காக போராடிய சத்யேந்திர தூபே, நாகராஜன் போன்ற 15 சமூக ஆர்வலர்கள் கடந்த சில ஆண்டுகளில் கொல்லப்பட்டிருக்கிறார்கள் என்பது வேதனையான நிலமை. அவர்கள் செய்த ஒரே குற்றம் நிர்வாகத்தில் ஊழலுக்கு எதிராக குரல் கொடுத்தது ஒன்று தான்.

தனி மனிதனுக்கு உணவில்லை என்றால் ஜகத்தினை அழித்திடுவோம் என்றார் மகாகவி பாரதி. மனித உரிமைகள் தினத்தை ஒட்டியே அந்த மகா கவியின் பிறந்த தினமும் வருகிறது. ஜகத்தினை அழிப்பது அல்லது திருத்துவது ஒரு பக்கம், குறைந்த பட்சம் கேள்வி கேட்பவருக்கு பாதுகாப்பு இருக்கிறதா? அவர் ஏதோ சமூக எதிரிபோல பார்க்கப்படுகின்றார் வன்முறைக்கு பலியாகிறார். இது தான் வேதனை. தமது உரிமைகள் பற்றி போதிய புரிதலைப்பெற்று எல்லோரும் கேள்விக் கேட்க வேண்டும் அப்போது தான் நிலமைமாறும் என்பது தான் மனித உரிமைகள் தினத்தை தொடர்ந்து சர்வ தேச மனித உரிமைகள் ஆணையம் விடுத்துள்ள செய்தியின் மையக்கருத்து.

மூன்றாவது சுதந்திரப் போராட்டம் என்ற வகையில் ஊழலுக்கு எதிரான குரல் ஒங்கியுள்ளது. ஊழல் மிகப்பெரிய மனித உரிமை மீறல். வலுவான சட்டமும், தீர்கமான நடைமுறையும் தான் மனித உரிமைகளை நிலை நாட்ட வழி செய்யும்.

தீய சக்திகளுக்கு எதிரான மக்களின் ‘நோக்கு வர்மம்‘ தீவிரமடைய வேண்டும்.

(ஆர்.நடராஜ்,இ.கா.ப.,)

natarajips@gmail.com

This article published in Dinamani on 14.12.2011

காவலுக்கு மரியாதை

noreply@blogger.com (Nataraj) — Wed, 30 Nov 2011 12:26:00 +0530

‘கொடுத்ததெல்லாம் கொடுத்தார் அவர் யாருக்காக கொடுத்தார். ஒருத்தருக்கா கொடுத்தார் இல்லை ஊருக்காக கொடுத்தார்‘ முதலமைச்சர் அவர்கள் இரண்டு நாள் அரசு அதிகாரிகள் ஆலோசளைக் கூட்டத்திற்குப் பிறகு காவல் துறைக்கு அளித்த அறிவுப்புகளை படித்த போது பழைய அந்தப்பாடல் தான் நினைவுக்கு வந்தது. ஓரு ஆலோசனை கூட்டத்திற்குப் பிறகு இத்தகைய முடிவுகள் அறிவிக்கப்படும் முறை எந்த மாநிலத்திலும் இல்லை. இது நமது முதலமைச்சரின் உன்னத அணுகுமுறை. அதனால் தான் மற்ற மாநில காவல்துறை அதிகாரிகள் நமது மாநிலத்தைப் பார்த்து பொறாமைப்படுகிறார்கள்.

எந்த ஒரு துறையின் முன்னேற்றத்திற்கும் திட்டமிடுதல் மிக அவசியம். திட்டங்கள் மேலிருந்து கிழே வர வேண்டுமா அல்லது களத்தில் ஆராயப்பட்டு மேலே சமர்ப்பிக்கப்பட்டு முடிவு செய்ய வேண்டுமா என்பது முக்கியம். இதை ‘டாப் டௌன்‘ அல்லது ‘பாட்டம் அப்‘ என்று வல்லுனர்கள் இருவகைப்படுத்துவார்கள். திட்டங்கள் உயர் மட்டத்தில் தீட்டப்பட்டு திணிக்கப்படுவதைவிட நடைமுறைக்கு எது உகந்தது, இப்போதைய சூழலில் எந்த திட்டம் உடனே செயல்படுத்த வேண்டும் என்று அராய்ந்து முடிவு செய்வதே தீர்கமான முடிவாக இருக்கும். மக்களையும் திருப்தி அடைய செய்யும். அந்த விதத்தில் மாவட்டங்களில் பணி செய்பவர்கள் உடனே நிறைவேற்றப்பட வேண்டிய பணிகளைப்பற்றி விவரிப்பதை கேட்டு அறிந்து அதற்கு எற்றவாறு ஒப்புதல் உடனே அளிப்பது களத்தில் உள்ள அதிகாரிகளுக்கு ஊக்கம் அளிப்பது மட்டுமின்றி மேலும் பணிகள் சிறப்பாக செயலாற்ற தூண்டு கோலாக அமையும்.

நடந்து முடிந்த சட்ட சபைத் தேர்தலின் போது இரண்டு முக்கிய பிரச்சனைகள் மக்கள் முன் இருந்தது. ஒன்று சட்டம் ஒழுங்கு, பொது அமைதி மற்றொன்று மின்சாரப்பற்றாக் குறை. சமூக விரோதிகள் மீது சட்டம் பாய வேண்டும். மின் வெட்டு வெட்டப்பட வேண்டும் என்பது மக்களின் எதிர்பார்ப்பு. ஏழை விவசாயிகளின் நில அபகரிப்புக் குற்றங்கள் கடந்த சில வருடங்களாக பெருகின அவற்றின் மீது நடவடிக்கை எடுக்கப்பவில்லை. பலம் படைத்தவர்களின் குறுக்கீட்டால்தான் காவல்துறை முடங்கியிருந்தது என்பது எல்லோருக்கும் தெரிந்த உண்மை. உயர் அதிகாரிகளும் பாரா முகமாக இருந்தனர். இப்போது அத்தகைய குற்றங்களை பதிவு செய்து விசாரிப்பதற்கு நில அபகரிப்பு விசாரணைப் பிரிவு மாவட்டங்களில் துவங்கியிருப்பது எல்லோருடைய வரவேற்பையும் பெற்றுள்ளது. முதல் அறிவிப்பாக நடந்து முடிந்த காவல் அதிகாரிகளின் கூட்டத்தில் அந்த அமைப்பை மேலும் பலப்படுத்துவதற்கு நடவடிக்கை எடுக்கப்பட்டுள்ளது. முக்கியமாக கரூர், நாகப்பட்டினம், திருவண்ணாமலை மாவட்டங்களில் அத்தகைய நில அபகரிப்பு தடுப்பு சிறப்புப் பிரிவு துவக்கப்பட இருக்கிறது.

நிலம் பரிமாற்றம் பிரச்சனைகள் சிவில் சம்பந்தப்பட்டதாக இருக்கும் பட்சத்தில் காவல்துறை தலையிடக்கூடாது என்ற விதி இருக்கிறது. ஆனால் மிரட்டி நிலத்தை அபகரித்தவர்கள் மீது நடவடிக்கை எடுக்க வேண்டும். சிவில் பிரச்சனை என்று விட்டு விட முடியுமா? அடிமாட்டு விலைக்கு மிரட்டி வாங்கி விட்டு அவர்களே மனமுவந்து விற்றவர்கள் என்று வாய்கூசாமல் கூறும் கயவர்களை என்ன செய்வது! கடும் குற்ற நடவடிக்கை மட்டுமின்றி, அபகரிக்கப்பட்ட நிலம் மீட்கப்பட்டு உரியவரிடம் ஒப்படைக்கப்பட வேண்டும். மேற்பார்வையிடும் அதிகாரிகள் சட்டப்படி நடவடிக்கை எடுக்கபடுகிறதா என்பதை கூர்ந்து கவனிக்க வேண்டும்.

காவல் நிலையங்களில் வரவேற்பு அதிகாரி ஒருவர் நியமிக்கப்பட்டு காவல் நிலையத்திற்கு வருபவர்களை அலக்கழிக்காமல் புகார்கள் பெற்று நடவடிக்கை எடுக்க வேண்டும் என்ற திட்டம் 2002-ல் அமல் படுத்தப்பட்டது. அதற்கென்று ஒரு பெண் உதவி ஆய்வாளர், பெண் காவலர் எல்லா காவல் நிலையங்களுக்கும் நியமிக்கப்பட்டனர். நகர காவல் நிலையங்களில் பிரதனமாக ‘ரிஸப்ஷன் சென்டர்‘ என்று பிரத்யேக வரவேற்பாளர் அறையும் ஒதுக்கப்பட்டது. இது எல்லா காவல் நிலையங்களுக்கும் படிப்படியாக நிறைவேற்றபடவில்லை. இப்போது அந்த திட்டத்திற்கு புத்துயிர் கொடுக்கப்பட்டு காவல் நிலையத்திற்கு வருபவர் வசதிக்காக நாற்காலியும் கொடுக்கப்பட்டிருக்கிறது. மனுதாரர்களை காக்க வைக்காமல், மனு பதிவு செய்யப்பட்டு விசாரணையும் நியாயமாக செய்தால் மக்கள் ஆதரவு கிடைக்கும்.

போக்குவரத்துப் பிரச்சனை எல்லோரையும் பாதிக்கும் ஒரு பிரச்சனை, எங்கு சென்றாலும் அது நம்மை துரத்துகிறது நம்மை அங்கும் இங்கும் நகர முடியாமல் முடக்குகிறது. எற்கெனவே குறுகலான சாலைகள், வாகன அதிகரிப்பை சமாளிக்க முடியவில்லை. சென்னையில் மட்டும் 45 லட்சத்திற்கும் மேலான வாகனங்கள் இருக்கின்றன. போக்குவரத்து நெரிசலை சமாளிக்க திட்டமிடுதல் அவசியம். சாலைகளை அகலப்படுத்துதல், வளைவுகளை நேராக்குதல், ஒரு வழிப்பாதை அமலாக்கத்திற்கு உகந்த பாதைகளை தெரிவு செய்தல், போக்குவரத்திற்கு இடைஞசலாக நிறுத்தப்படும் வாகனங்களை அகற்றுதல், போக்குவரத்து விதிகளை பாரபட்சமின்றி அமலாக்குதல் சாலை உபயோகிப்பவர்களிடத்தில் சாலைப்பாதுகாப்பு பற்றி விழிப்புணர்வு ஏற்படுத்துதல் என்ற எவ்வளவோ செயல்பாடுகள் ஒருங்கிணை0ந்தால் தான் போக்குவரத்து நெரிசல் ஒரளவுக்கு சமன்படும்.

இது மட்டுமின்றி, மின்வாரியம், சென்னை குடிநீர் வாரியம், தொலை தொடர்பு நிறுவனங்கள், மாநகராட்சி, மெட்ரோ போக்குவரத்து கழகம், காவல் துறை, தீயணைப்புத்துறை இவை எல்லம் ஒன்றாக பணி செய்ய வேண்டும். குப்பை அகற்றாவிட்டால் அதுவும் போக்குவரத்து நெரிசலுக்கு காரணமாகி விடுகிறது. மேலை நாடுகளில் இரவு நேரங்களில் குப்பை அகற்றப்படுகிறது. தெருக்கள் சுத்தம் செய்யப்பட்டு நாள் துவங்கும்போது நகரம் பொலிவுடன் விளங்குகிறது. ஆனால் நமது நகரங்களில் தான் நாள்பூராக குப்பை அகற்றுகிறார்கள் அதுவும் போக்குவரத்து அதிகமாக இருக்கும் வேளையில் குப்பை லாரி ரோடு நடுவில் நின்று இடைஞல் செய்வது வேதனை அளிக்கும் காட்சி.

ஒவ்வொரு துறையும் திட்டமிடாது ரோடுகளைத் தோண்டுதல் பணி முடிந்த பிறகு சாலை சீரமைப்பதில் தாமதம் ஏற்படுத்துதல் மேலும் நெரிசலை அதிகரிக்கும். அறிவிக்கப்பட்ட மேலாண்மை திட்டம் மூலம் இத்தகைய களத்தில் ஏற்படக்கூடிய பிரச்சனைகள் உடனடியாக தீர்க்கப்பட வேண்டும். பல இடங்களில் பொருத்தப்பட்ட காமிராக்கள் மூலம் போக்குவரத்து விதிகளை மீறும் வாகனங்களின் நம்பர் ப்ளேட்டுகள் படம் பிடிக்கப்பட்டு அதிலிருந்து வாகன உரிமையாளர் தகவல்கள் கணினி மூலம் பெற முடியும். போக்குவரத்து காவலர் வாகனங்களை நிறுத்தி சலான் கொடுக்க வேண்டியதில்லை, கணினி மூலம் சென்று விடும். க்ரெடிட் கார்ட் முலமாகவும் அபராதத்தொகை செலுத்தலாம். கண்காணிப்பு காமிராக்கள் பல இடங்களில் செயல் புரிவதன் மூலம் விதிகள் மீறல் மற்றும் சாலைப் பாதுகாப்பு முறைகளை கடைபிடித்தல் மேன்மையடையும் என்று எதிர்பார்க்கலாம்.

போக்குவரத்து அதிகமில்லாத நேரத்தில் தானியங்கி சமிஞைகளின் சிவப்பு விளக்கு நமது பொறுமையை சோதிக்கும். சாலைகளில் நவீன சென்சார்கள் பொறுத்தப்பட்டால், எந்த திசையில் போக்குவரத்து அதிகம், எங்கு குறைவு என்பதை கணித்து சமிஞைகள் அதற்கெற்றவாறு மாறும். அதுவும் மேலாண்மை திட்டம் மூலம் அமல் படுத்த வேண்டும்.

சாலை விபத்தில் காயமுற்றவரை மருத்துவமனையில் ஒரு மணி நேரத்திற்குள் அனுமதித்து சிகிச்சையளித்தால் உயிர் காப்பாற்ற முடியும். இந்த ‘ஒரு மணி நேரத்திற்குள் சிகிச்சை‘ என்று இன்று பேசப்படுகிறதே தவிர நடைமுறைப்படுத்துவதில் பல பிரச்சனைகள். தனியார் முயற்சியாக பல அமைப்புகள் அந்த சிக்கல்களைத் தீர்த்து உதவி செய்ய முன்வந்துள்ளனர். சாலைப்பாதுகாப்பில் ஈடுபட்டிருக்கும் அரசுப் பணியாளர்களுக்கு ‘முதல் உதவி‘ பயிற்சி, அரசு மருத்துவமனைகள், தனியார் மருத்துவமனைகளில் அவசர சீகிச்சைப் பகுதி மேப்படுத்தி உடனடி சிகிச்சை வழங்குதல், ஆம்புலன்ஸ் வசதி பெருக்குதல் இவை எல்லாம் இதில் அடங்கும். இதை சரிவர நிர்வகித்தால்தான் சாலை விபத்து உயிரிழப்பபை குறைக்க முடியும். தமிழ் நாட்டில் சாலை விபத்துக்களில் உயிரிழப்பு ஆண்டு ஒன்றுக்கு சராசரி 15,000, காயமுற்றோர்கள் சுமார் 1,00,000 என்பது மற்ற மாநிலங்களை ஒப்பிடுகையில் அதிகம். மற்ற நாடுகளில் சாலைப்பாதுகப்பிற்கு முக்கியத்துவம் அளிக்கப்படுகிறது இங்கு அரசு அதிகாரிகளின் மெத்தனத்தால் உயிரிழப்பு அதிகாரித்துக் கொண்டே போகிறது.

கிராம கண்காணிப்பு குழுக்கள் 1936-ம் ஆண்டு அமைக்கப்பட்டது. ஒவ்வொரு காவல் நிலையத்திலும் இத்தகைய குழுக்கள் அமைக்கப்பட்டு அந்தந்த சரக பிரச்சனைகளை ஆராய்ந்து மக்கள் ஒத்துழைப்போடு தீர்வு காணும் மிகச்சிறந்த அமைப்பு. இந்த அமைப்பை மேப்படுத்துவதற்காக ரூபாய். 2 கோடி நிதி ஒதுக்கியிருப்பது நல்ல முடிவு.

உழைக்கும் வர்கம் தான் நாட்டின் வலிமை. இளைஞர்களை நல்வழிப்படுதுவதில் எந்த அளவிற்கு பள்ளிகளுக்கும், ஆசிரியர்களுக்கும் பங்கு இருக்கிறதோ அந்த அளவு காவல்துறையினருக்கும் பங்கு உள்ளது. வீடுகளிலும், பள்ளிகளிலும் நல்லியல்புகள் பயிற்றுவிக்கப்படவில்லை என்றால் அதனால் எழக்கூடிய சமுதாயப் பிரச்சனைகளை சமாளிக்க வேண்டியது காவல் துறையின் பொறுப்பாகி விடுகிறது. மாவோயிஸ்ட் பிரச்சனைகள் சிகப்பு தாழ்வார மாநிலங்களில் படர்ந்ததற்கு பல காரணங்களில் இளைய சமுதாயத்தை அரவணைக்க தவறியதும் ஒன்றாகும்.

‘பாய்ஸ் கிளப்‘ என்ற சிறார் மன்றங்கள் சென்னையில் முக்கியமாக குடிசைப்பகுதிகளில் சமுதாயத்தில் நலிவுற்ற குடும்பங்களின் சிறுவர்களை குற்றங்களில் ஈடுபடாதவாறு நல்வழிப்படுத்த அமைக்கப்பட்டுள்ளது. இவை காவல்துறையின் கட்டுப்பாட்டில் அரசு உதவியோடு இயங்குகின்றன, பல தனியார் தொண்டு நிறுவனங்களும் உதவி புரிகின்றன. 2003-ம் ஆண்டு இந்த சிறார் மன்றங்கள் மேலும் மேம்படுத்த அரசு மானியம் வழங்கியது. ஆனால் கடந்த ஐந்து ஆண்டுகள் இவற்றை மேலும் மேப்படுத்த நடவடிக்கை எடுக்கப்படவில்லை. இப்போது இந்த அமைப்பிற்கு வழங்கப்படும் மானியத்தை அரசு உயர்த்தியுள்ளது. குற்றங்கள் நடவாமல் தடுப்பதிலும், குற்றவலையிலிருந்து நலிவுற்ற சிறுவர்களை காப்பாற்றுவதில் காவல் துறையினர் முனைப்பாக செயல்பட வேண்டும்.

காவலருக்கும், இராணுவ வீரர்களுக்கு உள்ளது போல் கான்டீன் வசதி ஒருவரப்பிரசாதம். அகாலவேளையில் பணிபுரியும் காவலர்க்கு பொருள் வாங்க அலைய முடியாது. விற்பனை வரி விலக்களித்து மலிவு விலையில் நிறுவப்பட இருக்கும் பல பொருள் அங்காடியில் தேவையானவற்றை வாங்கலாம். இந்த பயனளிப்பு ஒய்வு பெற்ற காவலருக்கும், மறைந்த காவலர் குடும்பத்தினருக்கும் வழங்கப்பட்டிருப்பது முதலமைச்சரின் பெருந்தன்மையான செய்கை. இவ்வாறு இருபத்தைந்து அறிவுப்புக்கள் மக்கள் நலனுக்கும் காவலர் நலனுக்கும் வழங்கப்பட்டிருக்கிறது.

காவல்துறையினர் அரசு நிர்வாகத்தின் பிரதிநிதிகள். சீருடை அணிந்திருப்பதாலும், சட்டங்களை அமல்படுத்துவதாலும் அவர்களது பணிகள் வெளிப்படையாக தெரிகிறது. அதிக விமர்சனத்திற்கும் உட்படுத்தப்படுகிறது.

“காவல்துறையின் செயல் அப்பழுக்கற்று அமைய வேண்டும். காவல்துறையின் தூய்மையான பணிதான் அரசு நிர்வாகத்தின் மேலாண்மைய பிரதிபலிக்கிறது” என்ற முதலமைச்சரின் பொன் வரிகளை மனதில் கொண்டு காவல்துறை மக்கள் சேவையில் நேர்மையுடனும் கடமையுணர்வோடும் தம்மை அர்ப்பணிக்கவேண்டும்.

-----

This Article published in Dinamani Newspaper on 25.11.2011

வினை தீர்க்கும் வித்தகன்

noreply@blogger.com (Nataraj) — Wed, 30 Nov 2011 12:18:00 +0530

சான்றோர்கள், ஆன்றோர்கள் போன்றோர்க்கு அவர்கள் நல்கிய சமூதாயப்பணியை போற்றும் வகையில் நினைவிடமும், சிலைகளும் வைக்கப்படுகிறன. சிலர் விட்டுச் சென்றதும் இட்டுசென்றதும் ஆன பாதை, வரும் சந்ததியினருக்கு உயர்ந்த வழியையும், ஊக்கத்தையும் உந்துதலையும் அளிக்கிறது. தனி ஒருவருக்கு மட்டுமின்றி காலத்தை வென்று, தொடர்ந்து பணிபுரியும் அமைப்புகளுக்கும் இத்தகைய அடையாளச் சின்னங்கள் உள்ளன.

நாட்டின் எல்லைப் பாதுகாப்பில் பணிபுரியும் இராணுவத்திற்கு இத்தகைய சின்னங்கள் பல உள்ளன. போரில் வெற்றிப் பெற்றால் அதற்கு தனியாக வெற்றிச்சின்னம். உயிர் தியாகம் செய்தவர்களுக்கு நினைவாலயம் பல இடங்களில் உள்ளன. சென்னையில் புனித தாமஸ் மலை அருகில் இரண்டாம் உலகப் போரில் உயிரிழந்த பிரிட்டிஷ் ராணுவத்தினருக்கு நினைவுச் சின்னம் உள்ளது. இது அழகான முறையில் பராமரிக்கப்பட்டும் வருகிறது.

எந்த அளவு இராணுவம் பாதுகாப்புப்பணியில் ஈடுபட்டுடிருக்கிறதோ அதே வகையில் காவல்துறை உள்நாட்டுப் பாதுகாப்பில் தன்னை அர்ப்பணித்துக் கொண்டுள்ளது. இந்தியாவில் ஜாதி, மதம், இனம், மொழி என்ற வேற்றுமை இருந்தாலும் ஒற்றுமை நிலைத்திருக்கிறது என்றால் அதற்கு முக்கிய காரணம் காவல் துறையின் உறுதியான நடவடிக்கை என்பதில் சந்தேகமில்லை.

இந்திய தண்டனை சட்டம், குற்றவியல் நடைமுறை சட்டம், இந்திய சாட்சிய சட்டம் என்பவை இந்திய மாநிலங்கள் எல்லாவற்றிக்கும் பொதுவானது. பொது அமைதி மற்றும் காவல்துறை இந்திய அரசியல் சாசனத்தில்
7-ம் உட் பிரிவில் உள்ளது. சட்டம் ஒழுங்கு பராமரிப்பதில் மாநிலங்களுக்கு முழப்பொறுப்பும் அதிகாரமும் உண்டு. பொது அமைதி காப்பதில் எழும் சவால்களை சமாளிக்க அபரிதமான சக்தியை கொடுக்க வல்ல ஏழாம் அறிவு பெற்றதாலோ என்னவோ காவல்துறை அரசியில் சாசனம் ஏழாம் ஷெட்யூலில் வைக்கப்பட்டுள்ளது! இந்திய ஜனாயகத்தை பாதுகாக்கும் காவல்துறை பல தியாகங்கள் செய்தால் தான் அவர்களுக்கு கொடுக்கப்பட்ட குறிக்கோளை அடைய முடியும். பணிச் சுமை ஒரு பக்கம், இருபத்திநான்கு மணி நேர தொடர்பணி, குடும்பத்தை சரிவர கவனிக்க முடியாத நிலை, வேளைக்கு சாப்பிட முடியாதலால் வரும் உடல் உபாதைகள், உடற் பயிற்சிக்கு நேரம் ஒதுக்க முடியாதபடி அகால வேலை பணிகள், சந்திக்க கூடிய கசப்பான பிரச்சனைகளால் மேலும் மன உளச்சல் அதிகரிப்பு என்று மன அழுத்தம் நிறைந்த அன்றாட பணிகளை ஒரு காவலர் சந்திக்கிறார்

தினந்தோறும் குற்றம் புரிந்தவர்களோடு போராடுவதில் பல ஆபத்துகளை எதிர் கொள்ள வேண்டும். பல நேர்வுகளில் உயிரை பணயம் வைத்து அபாயங்களை சந்திக்க வேண்டும். இத்தகைய சூழலில் உயிரிழப்பு தவிர்க்க முடியாதது. குற்றம் புரிபவர்கள் பல முறை அவர்களது முயற்சியில் தோற்கலாம் ஆனால் ஒரு முறை வெற்றி பெற்றாலும் அது சமுதாயத்திற்கு பேரிழப்பு. ஆனால் காவலன் ஒவ்வொரு முறையும் குற்றவாளியோடு போராடுகையில் வெற்றி பெற வேண்டும். ஒரு முறை தோற்றாலும் செய்த நற்பணி எல்லாம் மறைந்து தோல்வியே மேலோங்கும். இது மேலும் மன அழுத்தத்தைக் கொடுக்கும்.

ஆண்டு தோறும் சுமார் 1000 காவல் களப்பணியாளர்கள் பாதுகாப்புப் பணியில் உயிர் துறக்கின்றனர். போன வருடம் சுமார் 900 களப்பணியாளர்கள் உயிரிழந்தனர். தமிழ்நாட்டில் ஜனவரி 2010 ஆண்டு நடு ரோட்டில் அமைச்சர் பாதுகாப்புப்பணியில் இருந்த SI வெற்றிவேல் சமூக விரோதிகளால் வெட்டப்பட்டு துடிதுடித்து உயிர்ழந்தார். இரு அமைச்சர்கள் அப்போதை மாவட்ட ஆட்சியரும் ஒன்றும் செய்யாமல் வேடிக்கை பார்த்தனர். இது செய்தியாக வந்தது. இந்த வருடம் எல்லா மாநிலங்களையும் சேர்த்து 637 போலீஸர் உயிர் துறந்துள்ளர்கள்.

வருடா வருடம் எல்லா மாநிலங்களிலும் ஆக்டோபர் 21-ம் நாள் காவல் பணியில் உயிர் நீத்தவர் நினைவு நாள் அனுசரிக்கப்படுகிறது. பல மாநிலங்களில் இதுவெகு விரிவாக பொதுமக்கள் ஆதரவோடு இரத்த தானம், காவலர் பொதுமக்கள் நல்லுரவு கருத்தரங்கு, விளையாட்டுப் போட்டிகள், கவிதை கட்டுரை போட்டிகள் என்று பல நிகழ்ச்சிகள் ஏற்பாடு செய்யப்படுகின்றன. சில மாநிலங்களில் மாநில உள்துறை அமைச்சர்கள் கலந்துகொண்டு காவல் நலத்திட்டங்கள் அறிவிக்கப்படுகின்றன. தமிழ் நாட்டில் உள்ள எல்லா மாவட்டங்களிலும், தலமையிடத்திலும் போலீஸ் விசேஷ அணிவகுப்பு, மலர் அஞ்சலி, மூன்று முறை வானம் நோக்கி துப்பாக்கி வெற்று குண்டு சுடப்பட்டு வீரவணக்கம் தெரிவிக்கப்படுகிறது.

ஜம்மு காஷ்மீர் லடாக் எல்லைப் பகுதியில் திரிசூல் என்ற எல்லைப்பகுதி இருக்கிறது. இந்த எல்லைக்கு மேல்புறம் சைனாவின் எல்லை உள்ளது. இந்தப்பகுதிக்கு செல்வதற்கு லடாக் தலைநகர் ‘லே‘ விலிருந்து ஜீப்பில் ஃபோப்ராங்க் என்ற இடம்; அதன் பிறகு 5 நாட்கள் நடை பயணமாக, சோக்சாலு, மார்ஸ்மிக்லா, ஹாட்ஸ்பிரிங்க் போன்ற பனி சூழ்ந்த இடங்களை கடந்து செல்ல வேண்டும். ‘மார்ஸ் மிக்லா‘ சுமார் 19,000 அடி உயரே உள்ளது. இது எப்போதும் பனி சூழ்ந்த இடம், கடும் குளிர். இந்த எல்லைப்பகுதியில் மத்திய ரிசர்வ் படையை சேர்ந்த காவல் வீரர்கள் பணியில் இருந்தனர். 1959-ம் வருடம் ஆக்டோபர் 21-ம் நாள் சைனா தன்னிச்சையாக இந்திய செக் போஸ்ட் மீது தாக்குதல் நடத்தியது. அதில் 10 பாதுகாப்புப் படைவீரர்கள் உயிரிழந்தனர். ஆயினும் மடிவதற்கு முன் எல்லைப்பகுதியை பாதுகாத்து எதிர்தாக்குதல் நடத்தினர். அந்த நிகழ்வில் வீரமரணம் அடைந்த காவல் வீரர்களின் நினைவாக ஹார்ட்ஸ்பிரிங்கில் ஒரு நினைவிடம் நிறுவப்பட்டுள்ளது. 1960-ம் வருடம் நடந்த மாநில காவல்துறை தலைவர்களின் மாநாட்டில் ஒவ்வொரு வருடமும் பணியில் இறந்த காவல் வீரர்களுக்கு அஞ்சலி செலுத்த வேண்டும் என்று முடிவெடுக்கப்பட்டது. எல்லைப்பகுதியில் பாதுகாப்பை பலப்படுத்த எல்லைக் காவல்படை பி.எஸ்.ஃப்(BSF) உருவாக்கப்பட்டது. இப்படை நாட்டின் வடமேற்கு மற்றும் வடகிழக்கு பகுதிகளில் பணிகளை செவ்வனே செய்து வருகிறது.

தலைநகர் தில்லியில் இராணுவத்திற்கு நினைவாலயம் இருப்பது போல வீரமரணம் எய்திய காவல் வீரர்களுக்கும் நினைவாலயம் அமைக்க வேண்டும் என்ற கோரிக்கை பல வருடங்களாக நிறைவேற்றப்படாமல் இருந்தது. திரு.பிரகாஷ்சிங், ரிபைரோ போன்ற ஒய்வு பெற்ற டிஜீபி-க்களின் முயற்சியால் நினைவிடத்திற்கான வடிவமைப்பு வல்லுனர்களிடமிருந்து கோரப்பட்டு அதில் ஒன்று தேந்தெடுக்கப்பட்டுள்ளது.

இந்தியா சுதந்திரம் அடைந்து 64 வருடங்களில் சுமார் அறுபதாயிரம் காவல் வீரர்கள் வீர மரணம் அடைந்த பிறகாவது புது தில்லியில் இந்த நினைவிடம் அமைய முதல் முயற்சி எடுக்கபப்பட்டதில் திருப்தியடையலாம். இன்னும் ஒரு வருடத்திற்குள் கட்டுமானப்பணிகள், புல்வெளித்தடம் அமைவது முடிக்கப்பட்டுவிடும். அதில் இது வரை உயிர் நீத்த எல்லா காவல் ஆளிநர்களின் பெயர்களும் பொறிக்கப்படும். தியாகிகளின் குடும்பத்தினருக்கு இவ்விடம் புனிதமான ஒன்றாகவும் மனச்சுமையை இறக்கி வைக்க ரம்மியமான வனமாகவும் அமையும். நமது மாநில காவல் தலைமையிடத்தில் முதல் முதவில் நினைவிடம் அமைக்கப்பட்டது. ஆனால் போன வருடம் ஏதோ ஒரு நிபுணர் மூலம் மாற்றியமைக்கப்பட்டதில் பழைய நினைவுக்கல் அகற்றப்பட்டது. கருவூலத்தின் வெளிப்பகுதியை அழகுப்படுத்தலாம் ஆனால் காவல் முன்னோர்கள் நிறுவிய ஸ்தூபியை அதே இடத்தில் நிறுவ வேண்டும்.

அவசர உலகில் ஏதாவது ஒரு நாளாவது காவல் முன்னோடிகள் வழிவகுத்த பாதையை நினைவுகூற, ‘’வீர அஞ்சலி’’ ஒரு வாய்ப்பு அளிக்கிறது. துப்பாக்கி குண்டு முழங்க வீர மரியாதைக்குப் பிறகு ஒலிக்கக் கூடிய குழலோசை, நமது நெஞ்சை நிமிரச் செய்து உறுதியாக காவல் பணியில் அர்ப்பணிக்க வேண்டும் என்று ஒட்டு மொத்த காவல் துறையின் சபத ஒலியாக அமைய வேண்டும். வீர மரணம் எய்திய காவலர் ஆண்டவன் அரவணைப்போடு சொர்க்கத்தில் அமர்த்தப்படுவார் என்பதை பிரதிபலிக்கும் கவிதை.

‘மகனே சரியாக செய்தாயா கடமையை

சிறப்பித்தாயா மனிதப் பிறவியை‘

அகால சித்தியடைந்த காவலனை கேட்டார் கடவுள்,

‘தேவனே செய்தேன் கடமையை ஒரளவு

துப்பாக்கி ஏந்திய நான் தூய்மையான துறவியுமல்ல

தூய்மையாக இருக்கவில்லை நான் எப்போதும்

தூக்கமில்லா பணி சீர்தூக்க நேரமேது

தொழுகையில் குனிய பொழுதில்லை

பழுதில்லா பணிச்செய்த நிறைவுண்டு.

காவல்துறை என்றாலே கடுப்புத்துறை

கடுஞ்சொல் தொடுத்தேன் மனம் ஒவ்வாத போதும்

ஏன் பல சமயம் அளவோடு வன்முறை

சரளிவரிசையாக வசைப்பாட தவறவில்லை

கயவரை தலைதட்ட கை ஒங்க தயங்கவில்லை

நேர்மையாக பணியில் கைநீட்ட பழகவில்லை

கைக்கெட்டி வாய்க்கெட்டா கஷ்ட ஜீவனம்

சமூதாய சீர் குலைவை தினம் பார்த்து மனம் வெதும்பி அழுதென் பல நாள்

என் நிலையில் ஏழை உயிர், உடமை பாதுகாத்தேன்

பகைவர் பயம் தகர்த்தேன் திறந்த வெளியில் பணி செய்து

காலனால் வென்ற காவலனாய் ஒய்ந்து வந்துள்ளேன் ஒண்ட இடம் கேட்டு

கிடைத்தால் இருப்பேன் இல்லையென்றால் புரிந்து கொள்வேன்‘ என்றான் காவலன் கதையைக் கேட்ட தேவன்

“காவலனே வா“ என்றழைத்தார்

‘நரகத்தை நுகர்ந்துவிட்டாய் சொர்கத்தில் உலாவு அமைதியாக‘ என்றார்.“

வீர மரணம் எய்திய காவல்துறையினரை நினைவுகூரும் இந்நாளில் காவல் பணியில் வினை தீர்க்கும் வித்தகனுக்கு வீர வணக்கம் செலுத்துவோம்.

This article is published in Dinamani Newspaper on 04.11.2011

வினை தீர்க்கும் வித்தகன்

noreply@blogger.com (Nataraj) — Mon, 24 Oct 2011 19:34:00 +0530

இந்திய தண்டனை சட்டம், குற்றவியல் நடைமுறை சட்டம், இந்திய சாட்சிய சட்டம் என்பவை இந்திய மாநிலங்கள் எல்லாவற்றிக்கும் பொதுவானது. பொது அமைதி மற்றும் காவல்துறை இந்திய அரசியல் சாசனத்தில் 7-ம் உட் பிரிவில் உள்ளது. சட்டம் ஒழுங்கு பராமரிப்பதில் மாநிலங்களுக்கு முழப்பொறுப்பும் அதிகாரமும் உண்டு. பொது அமைதி காப்பதில் எழும் சவால்களை சமாளிக்க அபரிதமான சக்தியை கொடுக்க வல்ல ஏழாம் அறிவு பெற்றதாலோ என்னவோ காவல்துறை அரசியில் சாசனம் ஏழாம் ஷெட்யூலில் வைக்கப்பட்டுள்ளது! இந்திய ஜனாயகத்தை பாதுகாக்கும் காவல்துறை பல தியாகங்கள் செய்தால் தான் அவர்களுக்கு கொடுக்கப்பட்ட குறிக்கோளை அடைய முடியும். பணிச் சுமை ஒரு பக்கம், இருபத்திநான்கு மணி நேர தொடர்பணி, குடும்பத்தை சரிவர கவனிக்க முடியாத நிலை, வேளைக்கு சாப்பிட முடியாதலால் வரும் உடல் உபாதைகள், உடற் பயிற்சிக்கு நேரம் ஒதுக்க முடியாதபடி அகால வேலை பணிகள், சந்திக்க கூடிய கசப்பான பிரச்சனைகளால் மேலும் மன உளச்சல் அதிகரிப்பு என்று மன அழுத்தம் நிறைந்த அன்றாட பணிகளை ஒரு காவலர் சந்திக்கிறார்

‘மகனே சரியாக செய்தாயா கடமையை

சிறப்பித்தாயா மனிதப் பிறவியை‘

அகால சித்தியடைந்த காவலனை கேட்டார் கடவுள்,

‘தேவனே செய்தேன் கடமையை ஒரளவு

துப்பாக்கி ஏந்திய நான் தூய்மையான துறவியுமல்ல

தூய்மையாக இருக்கவில்லை நான் எப்போதும்

தூக்கமில்லா பணி சீர்தூக்க நேரமேது

தொழுகையில் குனிய பொழுதில்லை

பழுதில்லா பணிச்செய்த நிறைவுண்டு.

காவல்துறை என்றாலே கடுப்புத்துறை

கடுஞ்சொல் தொடுத்தேன் மனம் ஒவ்வாத போதும்

ஏன் பல சமயம் அளவோடு வன்முறை

சரளிவரிசையாக வசைப்பாட தவறவில்லை

கயவரை தலைதட்ட கை ஒங்க தயங்கவில்லை

நேர்மையாக பணியில் கைநீட்ட பழகவில்லை

கைக்கெட்டி வாய்க்கெட்டா கஷ்ட ஜீவனம்

சமூதாய சீர் குலைவை தினம் பார்த்து மனம் வெதும்பி அழுதென் பல நாள்

என் நிலையில் ஏழை உயிர், உடமை பாதுகாத்தேன்

பகைவர் பயம் தகர்த்தேன் திறந்த வெளியில் பணி செய்து

காலனால் வென்ற காவலனாய் ஒய்ந்து வந்துள்ளேன் ஒண்ட இடம் கேட்டு

“காவலனே வா“ என்றழைத்தார்

‘நரகத்தை நுகர்ந்துவிட்டாய் சொர்கத்தில் உலாவு அமைதியாக‘ என்றார்.“

00000

பணம் ‘சுருட்டிகள்‘

noreply@blogger.com (Nataraj) — Mon, 24 Oct 2011 19:30:00 +0530

“கொடி அசைந்ததும் காற்று வந்ததா

காற்று வந்ததால் கொடி அசைந்ததா”

என்று கரணம் காரணம் மையமாக கவிநயம் மிக்க கண்ணதாசன் பாடல் மறக்க முடியாதது. மோசடி வலையில் திரும்ப திரும்ப விழும் முதலீட்டார்களின் நிலைமையைப் பார்க்கும் போது

“ஏமாளிகளால் ஏமாற்றுபவர்களா

ஏமாற்றுபவர்களால் ஏமாளிகளா” என்று கேட்கக் தோன்றுகிறது.

1990ல் இருந்து கவர்ச்சிகரமான அறிவிப்புகள் நிறைந்த பத்தாண்டுகள் என்று கூறலாம். முதலீடு செய்பவர்களுக்கு 24 சதவிகிதம் வட்டி, முதலீடு செய்த உடனே முன்வட்டி, தங்க நாணயம், குளிர்சாதனப்பெட்டி, தொலைக்காட்சிப் பெட்டி போன்ற பல பரிசுகள் என பல திட்டங்கள் அறிவிக்கப்பட்டன. இத்தகைய வங்கிசாரா நிதிநிறுவனங்கள் முதலீட்டார்களின் நம்பிக்கையை வளர்ப்பதற்கு முதல் சில ஆண்டுகளுக்கு கூறியபடி வட்டி மற்றும் சலுகைகளை கொடுத்து அதன் மூலம் மேலும் பல சந்தாதாரர்களை வலையில் சிக்கவைப்பார்கள். நீர்குமிழி போல் வெடித்து சிதறும் நிலையில் நிறுவனம் மூடப்படும். பணம் இழந்தவர்கள் காவல் துறையினரிடம் தஞ்சமடைவார்கள்.

இம்மாதிரியான வழக்குகள் அதிகரிக்கவே குற்றப் புலனாய்வுப் பிரிவில் பொருளாதார குற்றப்பிரிவு கூடுதல் காவல் துறை இயக்குநர் தலைமையில் விரிவாக்கப்பட்டது. 1997-ம் வருடம் தமிழ்நாடு முதலீட்டார்கள் பாதுகாப்பு சட்டம் (TANPID ACT) இயற்றப்பட்டது. மோசடி நிறுவனங்களின் அசையும் அசையா சொத்துக்களை முடக்கி பொது ஏலம் மூலம் இழந்த பணத்தை ஓரளவு ஈடுகட்ட வழிவகை செய்யும் அதிகாரம் இந்த சட்டத்தில் கொடுக்கப்பட்டுள்ளது. இந்த சட்டத்தின் மூலம் பொருளாதார குற்றப் புலனாய்வுத் துறை முதலீட்டாளர்களுக்கு அவர்கள் செலுத்திய தொகையில் ஒரு பகுதியாவது நீதிமன்றம் மூலம் பெற்றுத்தர முடிகிறது.

இந்தியாவில் எல்லா மாநிலங்கள் சேர்த்து ஆண்டொன்றிற்கு சராசரி 90,000 மோசடி வழக்குகள் பதிவாகின்றன. இதில் 72 சதவிகித வழக்குகளில் குற்றப்பத்திரிகை தாக்கல் செய்யப்படுகின்றன. ஆனால் 2007ம் ஆண்டில் 25.6 சதவிகித வழங்குகள் தான் தண்டனையில் முடிந்துள்ளது. இந்திய தண்டனை சட்டத்தின் கீழ் 42 சதவிகித மற்ற வழக்குகள் வெற்றிகரமாக முடிக்கப்படும் நிலையில் மோசடி வழக்குகள் சரியாக புலனாய்வு செய்யப்படுவதில்லை என்ற குற்றச்சாட்டை மறுக்க முடியாது. மேலும் பணம் படைத்தவர்கள் சம்பந்தப்பட்டிருப்பதால் திறமையான வழக்காடுதல் மூலம் தப்பித்து விடுகின்றனர் என்பதும் உண்மை. காவல் துறைக்கு புலனாய்வுத் திறனோடு பணம் இழந்த ஏழை முதலீட்டாளர்களின் நம்பிக்கை, ஆதரவு, ஒன்றே பக்கபலம்.

ஒரு சிறிய திரைதான் கிரிமினல் வழக்குகளை மறைத்து சிவில் வழங்குகளாக காண்பிக்கும். தீர்க்கமாக விசாரித்து அப்பாவி மக்களுக்கு உதவி செய்வது காவல்துறையின் பொறுப்பு. மோசடி நிறுவனகள் பற்றி தகவல் சேகரித்து தடுப்பு நடவடிக்கை முலம் முதலீட்டளர்களை பாதுகாப்பதும் காவல்துறையில் கடமை.

சமுதாயத்திற்கு விரோதமாக தனிமனிதன் பணம் சம்பாதித்து தழைக்கமுடியாது. சமுதாயம் நன்றாக இருந்தால் தான் ஈட்டிய பொருள் நிலைக்கும். மனம் ஆழமானது என்றாலும் சஞ்சலம் மிகுந்தது. பாதாளம் பாயும் பணம் மனதை எளிதாக ஆட்கொண்டுவிடும். மனிதன் நோக மனிதன் பார்க்கும் பார்வையால் தான் இத்தகைய மோசடிகள் நீகழ்கின்றன. உழைக்காமல் பணம் சம்பதிக்க முடியும் என்ற மக்களின் பேராசைதான் ஏமாற்றுபவர்களுக்கு மூலதனமாக அமைகிறது. உழைத்து சம்பாதித்தால் உடம்பில் ஒட்டும் இலவசமாக சுலபத்தில் கிடைக்கும் என்பது மாயை. அந்த சபலத்திற்க்கு இடம் கொடுப்பது அழிவுக்கு வழி. அத்தகைய பொருள் பாதாளம் பாய்ந்து மறைந்து விடும்.

-------

விரக்தியின் எல்லை

noreply@blogger.com (Nataraj) — Mon, 24 Oct 2011 19:29:00 +0530

சமீபத்தில் SI மினட்சி மதுரையில் தன்னை சுட்டுக் கொண்டு தற்கொலை செய்து கொண்டது அதிர்ச்சித்தரும் நிகழ்வு. காவல்துறையில் பணி மன அழுத்தம் ‘Stress’ அதிகமாகக் கொடுக்கச்கூடிய பணி. உயர் அதிகாரிகளின் சரியான அணுகுமுறையால் இத்தகைய சம்பவங்களை தவீர்த்துருக்கலாம்.

மனோதத்துவர்கள் ஆய்வுப்படி தற்கொலை செய்து கொள்ளும் முடிவு ஒருவர் விரக்தியின் எல்லைக்குத் தள்ளப்படும் நிலையில் எடுக்கப்படுகிறது என்றும் அந்த நிலையில் எது சுலபமான வழி என்று புலப்படுகிறதோ அந்த வழியில் தற்கொலை செய்து கொள்கின்றனர். இத்தகைய மனநிலையில் அவர்களுக்கு உதவி கிடைத்தால் அவர்களை அந்த நிலையில் இருந்து மாற்றிவிடலாம். சில தனியார் தொண்டு அமைப்புகள் இத்தகைய முடிவு எடுப்பவர்களுக்கு ஆறுதல் அளிக்கும் வகையில் ஆலோசனை வழங்குகிறது.

இளைஞர்கள் தற்கொலைக்கு தள்ளப்படுவதற்கு காரணம் பெரியவர்களின் தவறான அணுகுமுறை எனலாம். அவசர உலகத்தில் இத்தகைய பிரச்சினை உள்ளவர்களிடம் பேசுவதற்கு நேரமில்லை. எடுத்தேன் கவிழ்த்தேன் என்று மனதுக்கு பட்டதை விளைவுகளைச் சிந்திக்காமல் வார்த்தைக் கணைகளால் கொட்டி விடுவது தற்கொலைக்கு மறைமுகமான காரணமாகிவிடுகிறது. கொட்டிய வார்த்தையை அள்ள முடியாது என்பார்கள். பெரும்பாலான தற்கொலைகள் விவேகமற்ற சொல் அம்புகளால் விளைகின்றன என்பது உண்மை.

தற்கொலைகளின் தலைநகரம் பெங்களூரு எனலாம். ஏனெனில் அங்கு 2008ம் ஆண்டு 2396 தற்கொலைகள் பதிவாகியுள்ளன. அதே ஆண்டில் மும்பையில் 1111, தில்லியில் 1107, சென்னையில் 1319 பதிவாகியுள்ளது. சென்னையைவிட அதிகமாக கோயம்புத்தூரில் 1353 தற்கொலைகள் நிகழ்ந்துள்ளன. நகரங்களுக்கே உரித்தான மனதுக்கு அழுத்தம் தரக்கூடிய அவசர உலக அன்றாட வாழ்க்கைப் போராட்டங்கள் தற்கொலைக்கு காரணமாகி விடுகின்றன.

தற்கொலைக்கான காரணங்களை ஆராய்ந்தால் குடும்பம் மற்றும் பொருளாதார பிரச்சனையால் ஆண்கள் பெருவாரியாக தற்கொலை செய்து கொள்கின்றனர். ஆனால் பெண்கள் தனிப்பட்ட காரணங்களுக்காகவும், ஆசாபாசங்களின் பாதிப்பாலும் இத்தகைய முடிவெடுக்கின்றனர். தனிப்பட்ட காரணங்களான டௌரி பிரச்சனை, தகாத உறவால் ஏற்பட்ட கருத்தரிப்பு, மலட்டுத்தன்மை, விவாகரத்து, கற்பழிப்பு என்று பெண்களுக்கே உரித்தான பிரச்சனைகளுக்கு கணக்கில்லை.

ஒருவரது வேலை அடிப்படையில் ஆராய்ந்தால் சுயவேலையில் ஈடுபடுபவர்கள் 39.8 சதவிகிதம் மொத்த தற்கொலைகளில் அடங்குவர். வீட்டை நிர்வகிக்கும் கல்யாணமான பெண்கள் 54.8 சதவிகிதம். ஆனால் அரசு வேலையில் உள்ளவர்கள் 1.7 சதகவிகிதம் தான். மற்றப்பணிகளை ஒப்பிட்டால் அரசுப்பணியில் பணிச்சுமை குறைவு அதனால் மனச்சுமைக் குறைவு என்று கொள்ளலாம். மாணவர்கள் மற்றும் வேலையில்லாதவர்களின் அளவு 12 சதவிகிதம்.

இந்தியாவின் ஜனத்தொகையில் 55 சதவிகிதம் இளைஞர்கள். தற்கொலை என்ற சாபக்கேடு இளைஞர்களை அதிகமாக தாக்குகிறது என்பது கசப்பான உண்மை குழந்தைப் பருவத்திலிருந்து இளமை பருவத்தை அடைவதை இரண்டும்கெட்டான் வயது என்பார்கள். உடல் ரீதியாகவும், மனம், சிந்தனை, உணர்வுகள் வெளி நிகழ்வுகளின் தாக்கம் என்று பலவகைப்பட்ட மாறுதல்கள் இளமை பருவத்தில் சந்திக்க நேரிடும். இந்த இக்கட்டான பருவத்தில் உற்றார் யாருளரோ என்ற ஏக்கம் ஏற்படுவது இயல்பு. அவர்களுக்கு உற்ற நண்பனாக உறுதுணையாக நாம் இருக்கிறோம் என்ற நம்பிக்கை கொடுக்க வேண்டும். பெரியோர்களின் பக்குவமான அணுகுமுறைதான் அதை உறுதி செய்ய முடியும்.

------------