albKristian.com

Të krijosh mbresa të mira që zgjasin në kohë

Elvis — Mon, 06 Feb 2012 12:50:07 +0000

Nga Rick Boxx

Vjet isha organizator i nje konference biznesmenësh ku një nga folësit ishte Peter Herschend, bashkëthemeluesi i Silver Dollar City, një qendër argëtimi në Branson, Missouri, U.S.A. Teksa po kërkonim një mikrofon për të, dikush nga salla u ngrit, shkoi drejt tij dhe i dorëzoi një dhuratë të vogël.

Ky veprim iu duk disi i çuditshëm ndaj, pas një hezitimi të shkurtër, Peter Herschend e hapi kutinë. Në të ndodhej një album me foto të punonjësve të Silver Dollar City.

Dhuruesi tha se albumi ishte rezultat i kujtimeve fotografike që kishte grumbulluar familja e tij prej shumë vjetësh gjatë vizitave në qendrën argëtuese të Peterit. Këto foto përbënin një vlerësim nga ana e familjes për orët e këndëshme që kishin kaluar atje.

Siç doli më pas, ky gjest përputhej plotësisht me përmbajtjen e fjalimit të Peterit në lidhje me misionin e kompanisë së tij “Të krijohen kujtime nga ato që mbahen mend”. Për Peter Herschend-in edhe vetë gjesti i dhurimit u shndërrua në një kujtim nga ata që mbahen mend.

A nuk do të ishte mirë që motoja e përmendur më sipër të ishte moto për të gjithë bizneset tona? Ndoshta puna jonë nuk ka si produkt të sajin fotografitë artistike, por ajo duhet të bëhet në atë mënyrë dhe me atë cilësi që të lerë gjurmë të pashlyeshme në memorjen e përfitueve prej saj.

Për shembull, një klient i rregullt i një kafeneje ruan në memorjen e tij aromat dhe shijet e llojeve të ndryshme të kafeve, së bashku me kujtimet e bisedave miqësore të zhvilluara atje. Blerësit e një dyqani ruajnë në memorjen e tyre sjelljen e ngrohtë dhe profesionale e shitësave, të cilët i ndihmojnë ata të gjejë atë që kërkojnë. Një klient biznesmen mbetet i kënaqur dhe mirënjohës ndaj kontributit të një këshilltari finaciar, i cili i zgjidh disa problem të rëndësishme pa kërkuar shtesë shpërblimi etj.

Kuptohet se një vizitë argëtuese si ajo në Silver Dollar City ka më shumë mundësi për të krijuar kujtime të paharrueshme, por edhe një supermarket, ku punonjësit e kasavet i përshëndesin klientët me buzëqeshje rutinore, e ka shansin e vet për të lënë të tilla kujtime. Cilido që të jetë produkti ose shërbimi që ne ofrojmë është mirë që të krijojë një atmosferë të këndshme në mënyrë që, si klientët ashtu edhe furnizuesit, të kenë mendimin se “Ja vlen që të punosh me ta”.

Fajlët e urta 10:7 në Testamentin e Vjetër të Biblës na mësojnë: “Kujtimi i të drejtit do të jetë bekim, por emri i të ligut do të kalbet” Përvojat e këndëshme lenë pas kujtime të mira; ato të pakëndëshmet ose harrohen ose lenë ndjesi negative që e bëjnë bashkëpunëtorin tonë të mos i shkojë më mendja që të punojë me ne.

Atëhere, a do të lemë me punën tonë mbresa që të shndërrohen në bekime apo do të fshijmë gjithçka nga memorja e bashkëpuntorëve tanë?

Reflektim/Diskutime Pyetje

Cilat janë disa nga mbresat më të mira nga ndonjë vend i veçantë që ke vizituar apo nga ndonjë bashkëpunim me ndonjë biznes?
A mendon se qëllimi i motos : ‘Të Lesh Mbresa Të Paharrueshme” vlen edhe për biznesin tënd? Pse, ose pse jo?
Si mund të shndërrohet mbresa në bekim, sikundër pohon vargu nga Fjalët e Urta?
Në rast se do të vlerësoje vendin tënd të punës sipas “shkallës së krijimit të mbresave”, ku do ta vendosje atë? Në rast se ky vend do të ishte shumë poshtë, çfarë veprimesh duhen ndërmarrë që ai të ngrihet sa më lart duke krijuar mbresa të mira të paharrueshme?

SHËNIM: Në Bibël ka edhe të tjera pasazhe që lidhen me këtë temë:

Fjalët e Urta 11:16-17, 13:9; Luka 22:19; 1 Korintasve 4:17, 11:24-25; Filipianëve 4:8

Postime të tjera me interes:

Sudan – Lirohen dy priftërinjtë e marrë peng

Elvis — Fri, 03 Feb 2012 16:34:51 +0000

Rrëmbimi i dy priftërinjve në Sudan (Veri) ka sjellë panik në pakicën e krishterë, ndërsa në Jug të Sudanit, konfliktet mes fiseve paraqesin një sfidë të madhe për Kishën

Ka gjashtë muaj nga ndarja e Sudanit të Jugut, që të krishterët në veri të vendit ndihen gjithnjë e më të kërcënuar. Kështu, në 15 janar, dy priftërinj, Joseph Makway dhe Sylvester Mogga u rrëmbyen të dy ndërsa gjendeshin në kishën katolike të St Jozefinë Bakitas në qytetin e Rabakut, 260 km larg nga Kartumi.

Rrëmbyesit, që janë pjesë e forcave ushtarake të Sudanit të Jugut besnikë të qeverisë së Kartumit i rrahën rëndë para se t’i kthenin nën kërcënimin e armëve. Të dy priftërinjtë u liruan, por kjo ngjarje ka mbjellë panik në mesin e pakicës së krishterë të Sudanit.

Dhuna nuk i kursen të krishterët e Sudanit të Jugut. Konfliktet mes fiseve të Lu Nerit dhe Murlit në shtetin e Xhonglesë, që prej dhjetorit 2011, kanë sjellë largimin e 120 000 vetave. Shumë kisha janë prekur nga përleshjet dhe shumë të krishterë kanë humbur jetën. Përfaqësuesi i qeverisë në vend, Keya Papa, u ka bërë thirrje të rinjve duke u kujtuar që ka ardhur koha për paqe dhe jo më për konflikt.

Në këtë pikëvështrim Dyer të Hapura ka hapur që prej shumë vitesh Qendrën e Formimit Biblik Emmanuel ku thirrja është t’u lejojmë sudanezëve të tejkalojnë konfliktet fisnore dhe të gjejnë një unitet të ri në Krishtin. Dhjetra qendra të tilla janë në ndërtim e sipër në Sudanin e Jugut.

Le të falenderojmë Perëndinë për lirimin e dy priftërinjve Joseph Makway dhe Sylvester Mogga

Le të lutemi për të krishterët në veri të Sudanit, që të mbahen fort në këto vështirësi

Le të lutemi për të krishterët e Sudanit të Jugut dhe të gjitha sfidat që dalin para tyre.

Postime të tjera me interes:

Steve Jobs, rregullat e suksesit dhe Bibla

Elvis — Mon, 30 Jan 2012 17:39:09 +0000

Nga Robert J. Tamasy

Kur Steve Jobs-i vdiq më 2011, ai la një trashëgimi arritjesh që e ndryshuan jetën tonë në mënyrë dramatike. Si bashkëthemelues i Apple, Inc., ai ishte një figurë qendrore në revolucionin kompjuterik. Kompjuteri personal Apple i Macintosh-it, që u prezantua në fillim të viteve 1980, e transformoi mënyrën se si ne i konceptonim dhe përdornim kompjuterat. Po kështu Jobs-i themeloi Pixar Animation Studios, që hapi rrugë të reja për realizimin e filmave të animuar. Para vdekjes së tij, iPads, iPhones dhe iPods bënë që të hapen horizonte të reja në komunikim dhe në argëtimin virtual. Praktikisht, puna e Jobs-it pati ndikim në jetën profesionale të çdo njeriu.

Jobs-i ishte një vizionar, pioner dhe novator i papërsëritshëm, por kjo nuk do të thotë se prej parimeve që udhëhoqën punën e tij nuk mund të përfitojmë edhe ne. Kohët e fundit, Entrepreneur.com publikoi një artikull që radhiste “7 arësyet e suksesit” të Steve Jobs-it. Megjithëse vetë Jobs-i nuk njihet si besimtar i krishterë, secila nga arësyet e tij të suksesit shkon paralel me principet biblike që janë përcaktuar mijra vjet më parë. Le t’u hedhim një sy:

1. Bëj atë që ke pasion të bësh. Jobs-i ka thënë, “Njerzit pasionantë mund të përmirësojnë botën.” Ideja futjes së pasionit në punën e përditëshme përmëndet te Kolosjanëve 3: 23-24: “Gjithçka që bëni, bëjeni me gjithë zemër, bëjeni si për Zotin dhe jo për njerzit, sepse ju e dini se si shpërblim do të merrni prejardhësinë nga Zoti…”

2. Jepi një shtytje botës. Një herë Jobs-i i tha një drejtuesi të lartë të një kompanie të madhe pijesh, “Ti do që ta kalosh jetën duke shitur ujë me sheqer, apo do që të ndryshosh botën?” Me këtë pyetje ai ngacmoi një çështje parimore shumë të rëndësishme në lidhje me vlerat e të pasurit vizione madhështore. Fjalët e Urta 29:18 na japin pak a shumë të njëjtën tablo: “Aty ku nuk ka vizion njerzit rrënohen.”

3. Zhvillo lidhje e mardhënie. Ideja e Jobs-it ishte që të pasuronte mendimin me sa më shumë përvoja konkrete nga fusha të ndryshme të shkencës. Kjo ide del edhe te Romakëve 8:28, ku thuhet, “Por dimë se Perëndia kombinon gjithçka në të mirë të atyre që e duan Atë, që janë thirrur sipas qëllimit të Tij.”

4. Mos u shpërnda në shumë drejtime. Për kompaninë Apple ka qenë shumë e rëndësishme mbajtja në shënjestër e një objektivi të qartë, teksa i shmangej shumë produkteve të tjera që mund të kishin sjellë përfitime të mëdha. Te Fjalët e Urta 4:27, në Testamentin e Vjetër, thuhet: “Mos u largo nga mendimi i drejtë, që këmbët e tua të mos shkojnë në rrugë të gabuar.”

5. Zhvillo metoda të reja. Gjatë ngritjes së rrjetit të dyqaneve, Jobs-i u kujdes që të krijonte përshtypje sa më të mira te blerësit. Jezusi ka diçka të ngjashme me idenë e tij të shprehur në fjalët, “veri të tjerët para vetes”. “Bëju të tjerëve atë që dëshiron të të bëjnë ata ty” (Luka 6:31).

6. Komunikoji mesazhet. Jobs-i mendonte se edhe idetë më të mira, po nuk u komunikuan mirë te të tjerët, e humbasin vlerën e tyre. Të njëjtën gjë ka thënë edhe apostulli Pal,” “Silluni me mend ndaj atyre që janë jashtë bashkësisë… Flisni me ta me ëmbëlsi, por thoni fjalë të kripura që t’i jepni përgjigjen e duhur secilit që pyet” (Kolosianëve 4:5-6).

7. Shit ëndrra jo produkte. Jobs-i e kishte kuptuar rëndësinë e të joshurit të dëshirave, shpresave dhe ambicieve të njerëzve. Një motivim të ngjashëm iu ofronte Jezusi pasuesve të tij: “Shkoni dhe bëjini nxënës të mi të gjithë popujt…mësojini të zbatojnë gjithçka që ju kam urdhëruar” (Mateu 28:19-20).

Reflektim/Diskutim Pyetje

Cili mund të ketë qenë ndikimi i Steve Jobs-it në jetën tënde, direkt ose tërthorazi?
Ç’mund të thuhet për të tjerë njerëz që njeh në lidhje me ndikimin e ideve të Steve Jobs-it tek ata?
Individë të tillë si Jobs-i janë të rrallë në botë, por cilat nga “rregullat e tij të suksesit” përbëjne ndihmë konkrete për ty?
Ka një thënie: Çdo e vërtetë është e vërteta e Perëndisë”. Thënë ndryshe, të vërtetat dhe parimet e shëndosha egzistojnë sepse kështu i ka krijuar Zoti. A pajtohesh me këtë thënie? Pse ose pse jo?

SHËNIM: Po ta kesh Biblën, shiko edhe pasazhet e mëposhtëme që lidhen me këtë temë:

Fjalë të Urta 1:7,20-33, 11:30, 13:20, 14:23, 16:26; Predikuesit 9:10; Gjoni 18:37-38; Romakëve 12:11

Postime të tjera me interes:

Nigeria – Të krishterët vigjilentë më shumë se kurrë

Elvis — Thu, 26 Jan 2012 10:41:34 +0000

Përballë shtimit të sulmeve vrasëse të Boko Haramit, të krishterët janë më shumë vigjilentë se asnjëherë tjetër. Pavarsisht nga kaosi, Dyer të Hapura përpiqet të ndihmojë më mirë viktimat

Kohët e fundit ka qarkulluar një lajm që lajmëron për sulme të reja në të ardhmen. Përgjegjësit e krishterë të Veriut të Nigerisë reaguan menjëherë duke u kërkuar pjestarëve të kishës të luteshin pa pushim për situatën. Pavarsisht nga deklaratat vetësiguruese të qeverisë e cila premton të mbrojë të krishterët dhe të marrë masa kundër islamikëve, të krishterët ndihen gjithnjë e më shumë në rrezik.

Në këtë ambient frike dhe rreziku të përditshëm Dyer të Hapura përpiqet të ndihmojë më mirë të krishterët nigerianë. Edhe pse në kaos, përparësi mbetet përcaktimi se cilët të krishterë kanë më shumë nevojë për ndihmë dhe si të arrijmë deri tek ata.

Në fund të vitit 2011, pjestarë të Dyer të Hapura ishin duke drejtuar një seminar në Majduguri në shtetin e Bornos, në veri të Nigerisë, kur qyteti u godit brenda ditës nga 3 atentate. Dy pjestarë të seminarit, njëri prej të cilëve ishte pastor, vdiqën të vrarë nga plumbat. Pjestarët e tjerë, edhe pse të shokuar, vendosën që ta zhvillonin seminarin ashtu siç kishin parashikuar. Ekipi pohon se që nga fillimi i këtij viti, janë vrarë më shumë se 50 të krishterë nga sulmet vrasëse të pandërprera të islamikëve të Boko Haramit.

Që nga nëntori i vitit 2011 shumë kisha kanë qenë në shënjestër të atentateve dhe të krishterët vazhdimisht kanë qenë një shënjestër, në një vend, ku në 2011 sipas Shkallës Botërore të Përndjekjeve 2012 të hartuar nga Dyer të Hapura, numërohet numri më i madh i martirëve.

Foto : Trupi i tre të krishterëve, të vrarë në 23 dhjetor të vitit 2011 në Kaduna të Nigerisë

Le të falenderojmë Perëndinë për kurajon e përgjegjësve të krishterë që nuk heqin dorë nga vendi i tyre
Le të lutemi për familjet e viktimave nga atentatet, që Perëndia t’i ngushëllojë dhe t’ju japë forcë të shlodhen
Le të lutemi për anëtarët e Dyer të Hapura, për urtësi dhe mbrojtje hyjnore.

Postime të tjera me interes:

Si ta ruash karierën

Elvis — Sun, 15 Jan 2012 20:08:26 +0000

Nga Dr. Rick Warren

“Nga të gjithë që punojnë këtu, ti je personi më i siguruar.” Këto fjalë të shqiptuara nga shefi, që tregonin se vendi i saj i punës nuk rrezikohej, e qetësuan menjëherë recepsionisten e një kompanie të madhe ku po lajmëroheshin shkurtime të shumta nga puna. Në një kohë që punonjësit e tjerë ndiheshin të turbulluar, ajo gjeti qetësinë te fjala “siguri”.

Ndërsa ekonomia botërore vazhdon betejën me krizën, shumë kompani e quajnë të nevojshme pakësimin e fuqisë punëtore në mënyrë që të mbajnë ose të rifitojnë pozitat konkurruese në këto kohra të vështira. Pikërisht, në të tilla kohra, të dish se si ta ruash të paprekur karierën, është një aftësi më vete.

RUAJE PROFILIN E KARIERËS EDHE KUR LARGOHESH NGA PUNA. Ndoshta nuk mund të vazhdosh më në një punë të caktuar, por duhet ta ruash karierën në kuptimin afatgjatë. Një shembull për këtë na e jep Bibla në Testamentin e Vjetër:

Në librin e Zanafillës lexojmë për Jozefin, njeriun besnik me pelerinën e tij shumëngjyrëshe të ëndrrave (dhuratë nga i jati), i cili u rrëzua dy herë nga shkallët e karierës. (Në kllapa po e imagjinojmë sikur është brenda një kompanie) Në fillim përfundoi në një gropë e, më pas, në burg.Vëllezërit e tij (bordi i drejtorëve të familjes) i dhanë goditjen e parë. Më vonë gruaja e bosit të tij i bëri akuza false, prej të cilave Jozefi përfundoi në burg. Gjithçka po punonte kundër karierës së tij në atë kompani imagjinare.

Por, Jozefi dinte se si “ta ruante” karierën dhe, më në fund, e gjejmë në shkallën më të lartë të hierarkisë së Egjiptit. Më pas ai i fali vëllezërit për tradhëtinë që i bënë duke iu thënë këto fjalë: “Ju keni kurdisur të këqia kundër meje, por Perëndia i mori ato si sinjale për të më bërë mirë… (Zanafilla 50:20).

RUAJE KARAKTERIN DUKE MBAJTUR NËN KONTROLL KRENARINË. Krenaria të pengon të shërbesh dhe ndalon rrjedhën e hirit të Perëndisë drejt teje. “Perëndia u kundërvihet mëndjemëdhenjve dhe u jep hir të përulurve” (Jakobit 4:6). Krenaria ka për tendencë që të ta shtrembërojë parjen e realitetit dhe të të çojë deri në verbim. Një tjetër pasojë e krenarisë është se ajo u jep armë e municione armiqve që kërkojnë rrënimin tënd.

RUAJE KARAKTERIN DUKE MBAJTUR PREM TIMET. Njerëzit që dinë të mbajnë premtimet strehohen në tendën e madhe të kodrës së shenjtë! “Ai …që edhe sikur të jetë betuar në dëm të tij nuk tërhiqet” (Psalmet 15:1,4). Mos harro, është më e lehtë t’i mbash premtimet kur nuk bën shumë të tilla sepse ke më shumë mundësi t’i plotësosh ato që premton. Karakteri forcohet sidomos kur premtime të vështira për t’u plotësuar mbahen ndaj njerëzve të thjeshtë, atyre që duken më pak të “rëndësishëm” për qëllimet dhe dëshirat tona.

RUAJE KARAKTERIN DUKE TRAJTUAR ÇDOKËND SIKUR TË ISHTE NJË ENGJËLL. “Mos harroni mikpritjen sepse nëpërmjet saj priten pa e ditur engjëj” (Hebrenjve 13:2). Ti nuk e di asnjëherë se kush mund të bëhet shefi yt. Thuhet dendur se duhet të kesh kujdes se kë shkel gjatë ngjitjes tënde në shkallët e karierës sepse ai person mund të të shtyjë shumë poshtë. Kurrë mos u mërzit për ata që hipin lartë duke shkelur mbi të tjerët sepse ata dikur e pësojnë. “ Njoha dikur një njeri me vese që sillej si tiran; i shtypte të gjithë…por më vonë kalova ty dhe ai s’ishte më; e kërkova po s’e gjeta.”

Reflektim/Pyetje Diskutime

Si e konsideron sigurinë tënde në punë, ndihesh i sigurtë apo ke frikë se nga momenti në moment mund të të pushojnë nga puna?
Ku mendon se e ka fjalën Dr. Warren kur thotë:” Ruaje karierën edhe po të pushuan nga puna”? A të ka rënë rasti ta bësh një gjë të tillë?
Pse krenaria (në kuptimin e mëndjemadhësisë) i prish punë sigurisë së vendit të punës?
A ke parë njerëz që e ndërtojnë karierën e tyre duke shkelur mbi të tjerët. Çfarë ndjesie të shkaktojnë?

SHËNIM: Po ta kesh Biblën, shiko edhe pasazhet si më poshtë që lidhen me këtë temë:

Fjalë të Urta 20:28, 22:29, 25:13, 28:20; Kolosjanëve 3:17, 23; Mateu 5:37; Jakobi 5:12

Postime të tjera me interes:

Këshillë për arrogantët

admin — Thu, 05 Jan 2012 20:30:04 +0000

Nga Rick Boxx

Një studim i cituar nga revista periodike prestigjioze e biznesit Wall Street Journal, tregon se, kur marrin vendime, njerëzit që mbajnë poste të larta i nënvleftësojnë këshillat e vartësve të tyre. Studimi tregon gjithashtu se vendimet finale të tyre shpesh janë më pak efektive se ç’mund të ishin në rast se sa do t’i kishin marrë parasysh këshillat e të tjerëve.

Arsyeja kryesore për mospërfilljen e këshillave qëndron te vetëbesimi i tepruar i këtyre liderëve, gjë që ndryshe quhet arrogancë. “Askush nuk është më i ditur se unë ,” mendojnë ata. Në disa raste liderët nuk kërkojnë këshillat e të tjerëve sepse kanë frikë se mos duken si ‘të dobët” ose të paaftë për të përmbushur përgjegjësitë që kanë. Iu duket se humbasin kontrollin mbi situatat. A keni hasur në njerëz të tillë?

Është interesant fakti se studimi në fjalë zbulon se femrat janë më të predispozuara që të marrin këshilla se sa meshkujt. Duket se meshkujt, teksa ngjiten në majat e larta të hierarkisë, bëhen më arrogantë dhe iu rritet tej mase besimi te vetja. Besimi në forcat e tua është gjë e mirë, por vetbesimi i tepruar çon në humbjen e vigjilencës për kontroll ndaj vetes dhe në shkatërrim.

Ndoshta femrat e dinë me intuitë atë që meshkujt kanë për tendencë ta harrojnë shpejt: faktin se edhe njeriu më i mençur ka nevojë për këshilla. Megjithatë, nuk duhet ndonjë intuitë e veçantë që të kuptohet se është e nevojshme këshilla e të tjerëve për të marrë vendime me efektivitet të lartë. Bibla e përsërit këtë shumë herë. Ja disa shembuj:

Rreziku i vendimeve të precipituara. “Unë e kam ndarë mendjen. Mos më ngatërroni me ide të tjera!” Nganjëherë kjo është qasja që bëjmë kur marrim vendime, qasje që tregon se duam të bëjmë atë që duam dhe në mënyrën se si e mendojmë ne, pavarësisht se vartësit dhe bashkëpunëtorët na këshillojnë të bëjmë ndryshe. Fjalët e Urta 12:15 e përshkruajnë kështu këtë situatë: “Rruga e vet i duket e drejtë budallait, por ai që dëgjon këshillat është i mençur.”

Problemi i të vepruarit në izolim. Krenaria është problem më vete që na mundon në një mënyrë ose në një tjetër. Shpesh krenaria na bën të mos kërkojmë të mbështetemi te të tjerët. Kjo çon në dështim e shkatërrim. Prandaj te Predikuesit 4:10-11 thuhet: “Nëse rrëzohen, njeri ngre tjetrin, por mjerë ai që është vetëm dhe rrëzohet sepse nuk ka kush ta ngrejë…Nëse dy vetë flenë bashkë ata kanë mundësi që të ngrohen, por ai që është vetëm, si do t’ia bëjë që të ngrohet?”

Çmimi për besimin te të tjerët. Kur ne marrim mendimin e të tjerëve, jo gjithmonë ata na thonë atë që ne duam të dëgjojmë. Por këndvështrimet e ndryshme dhe zgjidhjet alternative ndaj problemeve që kemi, japin gjithmonë rezultate më të mira. “Pa udhëheqje populli rrënohet, por shumë këshilltarë garantojnë fitoren” (Fjalë të Urta 11:14). “Planet dështojnë për mungesë këshillimi, por realizohen kur ka një mori këshilltarësh” (Fjalë të Urta 15:22).

Forca e punës në grup. Numrat kanë rëndësi, prandaj urtësia popullore na kujton vlerat e punës në grup ku ndahen talentet dhe përvojat e shumë vetëve për realizimin e një qëllimi të përbashkët. “Dhe le të kujdesemi për njeri tjetrin për t’u nxitur për dashuri dhe vepra të mira” (Hebrejve 10:24).

Reflektim/Diskutime Pyetje

A pajtohesh me mendimin se refuzimi për të pranuar këshillat e të tjerëve përbën shfaqje të arrogancës? Pse, ose pse jo?
Kur je para ndonjë problemi të vështirë ose para marrjes së një vendimi të rëndësishëm a të shkon mendja që të këshillohesh me të tjerë njerëz? Shpjegoje përgjigjen.
A ke punuar ndonjëherë nën urdhërat e ndonjë shefi arrogant? Si je ndjerë kur ke parë se ai i ka shpërfillur mendimet e të tjerëve dhe për këtë shkak ka marrë vendime të gabuara?
Në ç’mënyrë do ta edukosh veten që të jesh më i hapur ndaj këshillës së të tjerëve. Në rast se është e vertetë që femrat janë më të hapura ndaj këshillës se sa meshkujt, pse mendon se ndodh kjo?

SHËNIM: Po ta kesh Biblën dhe dëshiron të lexosh edhe më shumë për këtë temë, shiko pasazhet si më poshtë:

Fjalë të Urta 19:20,27, 20:18, 24:5-6, 27:17; Predikuesit 4:9,12; 2 Timoteut 2:2-7; Jakobit 1:5-7

Postime të tjera me interes:

A mund të bësh një ‘Mulligan’ – një përsëritje?

admin — Tue, 27 Dec 2011 17:58:49 +0000

Nga Robert J. Tamasy

Megjithëse nuk jam lojtar golfi, më tërheq së tepërmi një aspekt i kësaj loje: ajo që quhet “mulligan”. Në ndeshjet miqësore të golfit nganjëherë lojtarët lejohen që të gjuajnë sërisht një top, gjë që ndryshe quhet “të bëjnë një mulligan”. Mulligani bëhet me lejen e lojtarit kundërshtar për të përsëritur ndonjë goditje të gabuar. Sidoqë të jetë, në një aspekt më të përgjithshëm, mulligani është një mundësi e dytë për të korrigjuar një gabim të caktuar.

Do të ishte mirë që, herë pas here, jeta të na ofronte mulliganë të tillë për të rivlerësuar një veprim a vendim që nuk ka pasur pasojat e dëshiruara. Sigurisht që do të ishte diçka e bukur!

Teksa po mbyllet ky vit kalendarik, ti mund të duash që të të jepet mundësia për një “mulligan” për të ribërë diçka që s’të ka pëlqyer ashtu siç e ke bërë më parë: për një vendim financiar të gabuar, për një marrëdhënie të prishur, për një strategji ekonomike të dështuar ose për një rast

të pashfrytëzuar. “A ka mundësi ta ripërsëris?” do pyesnje veten.

Fatkeqësisht, të paktën për sa kohë ndokush nuk ka shpikur “makinën e kohës”, ne nuk mund t’i kthejmë gjërat mbrapsht. Jeta nuk na ofron mulliganë. Na duhet të përballemi me pasojat e veprimeve dhe vendimeve tona të gabuara, ashtu sikurse të korrim frytet e atyre që i kemi bërë mirë. Megjithatë, ndërsa një vit po mbaron dhe një tjetër përgatitet të fillojë, ne kemi mundësi që të bëjmë një “bilanc vjetor”, për të parë se çfarë e kemi bërë mirë dhe çfarë e kemi bërë keq gjatë 12 muajve të shkuar.

Nëpërmjet një vështrimi retrospektiv, ne shohim qartë në të shkuarën. Retrospektiva është e dobishme në rast se i japim mundësinë vetes që të mësojmë nga e kaluara në mënyrë që të marrim vendime më të mençura për të ardhmen. Por vështrimi retrospektiv është i dëmshëm në rast se mbetemi robër të së kaluarës duke vajtuar për gabimet që nuk i zhbëjmë dot më. Prandaj, teksa u gëzohemi arritjeve tona gjatë vitit të kaluar dhe përpiqemi të çlirohemi nga gabimet që kemi bërë, mirë është të kemi parasysh disa parime që dalin prej letrave të shkruara nga apostulli Pal e që ndodhen në Bibël:

Mos u shpërqëndro. Sot njerëzit kënaqen kur marrin mbi shpinë disa detyra njëherësh, por, sikurse thotë një fjalë e urtë, po u more me shumë zanate nuk bëhesh mjeshtër në asnjerin prej tyre. Merru me atë që di të bësh më mirë. Aty përqëndrohu. “Duro pjesën tënde të vuajtjeve si një ushtar i mirë i Jezu Krishtit. Sepse asnjë nga ata që shkojnë ushtarë nuk ngatërrohet me punërat civile – ai kënaq vetëm komandantin e tij.” (2 Timoteut 2:3-4).

Fokusohu në qëllimin kryesor. Pse je këtu (në këtë botë)? Cili është qëllimi i egzistencës tënde? Këto pyetje të çojnë drejt fokusit të duhur. “Jo se unë tashmë e fitova ‘çmimin’ dhe jam bërë i përsosur, por po vazhdoj të rend për të kapur atë në të cilën Jezusi më kapi mua’” (Filipjanëve 3:12).

Shiko gjithmonë para, jo pas. Një vrapues që e mban vazhdimisht kokën pas, nuk mund të vrapojë drejt. Ngjashmërisht, në rast se ne shohim për nga e kaluara dhe nuk fokusohemi te ajo që na rezervon e ardhmja, ka shumë gjasa që të shmangemi nga objektivi kryesor. Më së paku, ritmi ynë i ecjes në jetë do të ngadalësohet “…Por një gjë e bëj: harroj ato që kam lënë pas dhe prirem drejt atyre që janë para” (Filipjanëve 3:13).

Mbaj gjithmonë në shënjestër objektivin e dëshiruar. Një dështim nuk do të thotë fund i gjithçkaje; ai mund të na bëhet mësim për të ardhmen dhe ndihmë në arritjen e suksesit. “Po rend drejt synimit për të fituar çmimin për të cilin Perëndia më ka thirrur drejt qiellit në Krishtin Jezus” (Filipjanëve 3:14).

Reflektim/Diskutim Pyetje

Në rast se do të kishe mundësinë për të bërë një “mulligan”, të ndryshoje një gjë nga ato që ke bërë gjatë vitit të kaluar, cila do të ishte ajo dhe pse do të deshe ta ndryshoje?
Si e pret zakonisht ndërrimin e viteve? A bën bilance, bën plane, vendos objektiva? Si të ndihmojnë konkretisht këto gjëra?
A të ka qëlluar që të mbetesh rob i së kaluarës për një kohë të gjatë? Në rast se po, çfarë efekti ka pasur tek ty aftësia për të shikuar drejt së ardhmes me plane dhe objektiva të reja?
Bibla thekson: “Prandaj nëse dikush është në Krishtin, ai është një krijesë e re; e vjetra shkoi e vate, ka ardhur e reja” (2 Korintasve 5:17). Ç’kuptim kanë për ty këto fjalë në lëmin shpirtëror dhe profesional?

SHËNIM: Po ta kesh Biblën dhe dëshiron të shohësh edhe pasazhe të tjerë që lidhen me këtë temë, referohu si më poshtë:

Psalme 40:3; Fjalë të Urta 3:9-10; Isaia 43:18-19; Ezekieli 18:30-31; Mateu 9:16-17

Postime të tjera me interes:

Dritë për mjediset e punës që shpesh janë të errët

admin — Mon, 19 Dec 2011 09:24:01 +0000

Nga Robert J. Tamasy

Në këto ditë fundviti në qendrën tënde të punës ndoshta janë bërë disa zbukurime. Pjesë e dekorit të këtyre ditëve festive janë dritat: drita shumëngjyrëshe në pemën e Krishtlindjes; drita vezulluese që zbukurojnë shtëpitë, dyqanet e rrugët; qirinj mbi tryeza e pragje dritaresh… Për disa fundviti është një “festival dritash”…

Për disa të tjerë, dritat janë thjesht një traditë e këndshme. Në prag të fundvitit, kur në Hemisferën Veriore netët janë të gjata, dritat shërbejnë për të ndriçuar jo vetëm ato (netët), por edhe ditët e shumta gri që pasojnë njëra tjetrën.

Për besnikët e Jezu Krishtit dritat lidhen me ngjarjet e Krishtlindjes së parë, sidomos me “yjet e Lindjes”, të cilët ndiqeshin nga të urtët, që quheshin Magi, për të kryer adhurimin e fëmijës Krisht. (Mateu 2:1-12).

Për të gjithë ata që besojnë te Jezusi, drita përfaqëson shumë më tepër se yllin e Lindjes. Te Mateu 4:16, në Testamentin e Ri, përsëritet profecia e Testamentit të Vjetër, që përshkruhet kështu te Isaia 9:2: “Populli që ecte nëpër terr pa një dritë të madhe; mbi ata që banonin në vendin e hijes së vdekjes feksi një dritë.” Në këto pasazhe Jezusi mishëron “dritën”. Dhe gjatë shërbesës së tij tre vjeçare në tokë, Jezusi deklaroi: “Unë jam drita e botës, kush më vjen pas nuk do të ecë në errësirë, por do të ketë dritën e jetës” (Gjoni 8:12).

Por cila është domethënia e kësaj “drite” për ne që duam të zhvillojmë karierën tonë në shekullin e 21-të? Ja disa mësime nga Bibla:

Drita e Krishtit premton jetën. Shumë njerëz bazohen te profesioni që të plotësojnë dëshirat dhe nevojat e tyre materiale. Por shpesh ata bien në grackën e këtij proçesi, i cili, në thelb, nuk i çon asgjëkundi. Në vend që të kujdesen për të bërë një jetë sa më luksose, ata duhet të sigurojnë vetëm një jetesë të thjeshtë e normale sepse Jezusi u ka premtuar besnikëve të tij se do t’i japë një qëllim dhe një kuptim jetëve të tyre krahas sigurimit të nevojave të tyre të përditëshme. “Në Atë ishte jeta dhe jeta ishte drita e njerëzve.” (Gjoni 1:4). “Jezusi tha, ‘Unë jam udha, e vërteta dhe jeta; askush nuk vjen te Ati përveçse nëpërmjet meje.’” (Gjoni 14:6).

Drita e Jezusit ofron lirinë prej errësirës. Mjediset e punës po bëhen gjithnjë e më të zymta. Kthetrat e krizave ekonomike kanë kapur shpresat për të ardhmen. Afatet dhe planet e punës po sfidojnë bindjet dhe vlerat tona morale. Liderat, që dikur i admironim, po demonstrojnë anët e errta të karakterit të tyre. Jezusi na ka premtuar që të na japë dritën që do të na ndriçojë rrugën në këto shtigje të vështira.“Dhe drita shkëlqen në errësirë por errësira nuk e kuptoi…drita e vërtetë që ndriçon çdo njeri që vjen në botë.” (Gjoni 1:5,9).

Drita e Krishtit na jep drejtim. “Çfarë duhet të bëjmë?” “Nga të shkojmë?” “Si të çajmë përpara në momente të vështira?” Janë të shumta pyetjet që na mundojnë. Na duhet një udhëheqje e sprovuar. Jezusi i siguron besnikët e tij se do t’iu tregojë rrugën dhe do t’iu japë urtësinë e duhur kur ata t’i drejtohen Atij për ndihmë. “Fjala jotë është një llampë për këmbën time dhe një dritë në shtegun tim” (Psalme 119:105).

Duke festuar Krishtlindjen a je i vendosur që të “ecësh në dritë ashtu sikundër ndodhet në dritë Jezusi? “Të ecim në dritë sikurse Ai është në dritë.” (1 Gjoni 1:7)?

Robert J. Tamasy është nënpresident për Komunikimin i Leaders Legacy, Inc., një shoqatë jo fitimprurëse me bazë në Atlanta, Georgia, U.S.A. Veteran në gazetarinë profesioniste prej më shumë se 38 vjetesh, ai eshte autor i librit Business At Its Best: Timeless Wisdom from Proverbs for Today’s Workplace (River City Press) dhe është bashkautor me David A. Stoddard në veprën The Heart of Mentoring: 10 Proven Principles for Developing People to Their Fullest Potential (NavPress). Për më shumë informacion shiko www.leaderslegacy.com ose blogun e tij, www.bobtamasy.blogspot.com.

Reflektim/Diskutim Pyetje

Kur shikon dritat që vendosen për festa, çfarë mendimesh të vijnë në mend?
Cila është për ty domethënia e deklaratës së Jezu Krishtit se ai është “drita e botës”
Sipas përvojës në punën që bën – a po “jeton” ashtu sikundër ke dashur të jetosh – apo ndjen se vetëm po “egziston” mes streseve dhe shqetësimeve të jetës së përditëshme. Shpjegoje përgjigjen.
A e ke vënë re se marrëdhënia jote me Jezusin të ka ndriçuar për të gjetur udhëheqjen e domosdoshme për zhvillimin e karrierës tënde dhe për marrjen e vendimeve të rëndësishme? Në rast se po, në ç’mënyra?

SHËNIM: Po ta kesh Biblën dhe dëshiron të lexosh edhe pasazhe të tjerë që kanë lidhje me këtë temë, referoju atyre si më poshtë:

Psalme 36:9, 119:130; Isaia 58:6-10; Micah 7:8-9; Mateu 5:16; Luka 11:33-36; Gjoni 3:19-21

Postime të tjera me interes:

Të këqiat dhe të mirat që vijnë nga pasiguria

admin — Sun, 04 Dec 2011 23:58:53 +0000

Nga: Rick Boxx

Shumë biznesmenë besojnë se një nga arsyet që ekonomia globale vazhdon të përpëlitet dhe ka pak gjasa që ta marrë veten është pasiguria. Taksat janë një barrë për këdo. Shumë tregues ekonomikë janë në rënie, kurse panorama politike në pjesën më të madhe të botës është plot të panjohura. Si pasojë, biznesmenët ngurrojnë të ndërmarrin iniciativa të reja, të hapin vende pune ose të futen në aktivitete me risk të lartë.

Nga një pikëpamje, qëndrimet e kujdesshme sjellin siguri. Dhe vërtet, a mund të vazhdohet përpara kur ve re se kushtet e ekonomisë nuk janë të favorshme? Në librin e Fjalëve të Urta, që ndodhet në Testamentin e Vjetër të Biblës, flitet shumë për kujdesin që duhet patur në çdo veprim. Ja si thuhet aty: “Njeriu mëndjemprehtë e shikon rrezikun dhe fshihet, por naivët shkojnë më tej dhe e pësojnë” (Fjalë të Urta 27:12). Me fjalë të tjera, moskuptimi i situatave të rrezikshme dhe mosveprimi në përputhje me to, mund të çojë në pasoja shkatërruese.

Por edhe të presësh deri sa situata të bëhet perfekte nuk është mirë sepse mund të humbasësh kohë shumë të vlefshme. Një fjalë e urtë thotë: “Krimbin e kap zogu që del më herët në gjueti”. Nganjëherë, koha më e mirë për të nisur diçka është pikërisht atëhere kur gjithë të tjerët ndodhen ende në inercinë e pritjes. Ndërsa të gjithë janë shtangur nga frika për të ardhmen, më të guximshmit, me ide të qarta dhe largpamësi, ia dalin që të ngrenë e të zhvillojnë biznese të suksesshme.

Po ku qëndron sekreti? Si mund të dallosh se kur është momenti që duhet pritur dhe kur është koha për t’u hedhur me guxim në veprim pavarësisht se situata duket ende e paqartë?

Askush nuk ta thotë këtë gjë, përveç Biblës, e cila përmban disa udhëzime që duhen marrë parasysh. Libri i Fjalëve të Urta ka disa të tilla që na mësojnë:

Të mbledhim gjithë informacionin e nevojshëm. Një nga shkaqet kryesore të dështimit është mungesa e vullnetit për të studjuar me hollësi situatat para se të hidhemi në veprim. “Zemra e njeriut të matur përfton dituri; veshi i të urtëve e kërkon atë” (Fjalë të Urta 18:15).

Të kërkojmë këshillën e partnerëve të besuar. Një mënyrë për t’u informuar saktë është të këshillohesh me kolegët në lidhje me iniciativën që dëshiron të ndërmarrësh. Ata mund të të thonë gjëra që ti nuk i ke menduar kurrë. “Pa udhëheqje kombi bie, por shumë këshilltarë e bëjnë të sigurtë fitoren” (Fjalë të Urta11:14). “Planet dështojnë kur mungon këshillimi, por realizohen kur ka shumë këshilltarë” (Fjalë të Urta 15:22).

Të hidhemi në veprim me qëllimin për të nderuar dhe kënaqur Perëndinë. Shpesh planet e njerëzve motivohen nga qëllime egoiste. Kjo mund të shmanget vetëm në rast se ata i venë detyrë vetes që të ndjekin rrugën që ua ndriçon Perëndia. Në Testamentin e Ri të Biblës, te Romakëve 8:5 thuhet: “Ata që rrojnë sipas mishit e çojnë mendjen në gjërat e mishit, por ata që rrojnë sipas Frymës (e çojnë mendjen) në gjërat e Frymës.”

Planifikimi i kujdesshëm dhe parashikimi i rreziqeve janë të domosdoshme në biznes, por kur e ndjen me të vërtetë se Perëndia të prin në rrugën tënde, gjëja më e mençur që mund të bësh është t’i nënshtrohesh frymës hyjnore.

Reflektim/Diskutime Pyetje

Si trajtohet në ndërmarrjen ku ti punon çështja e planifikimit për të ardhmen nën presionin që ushtron pasiguria e theksuar në ekonominë lokale dhe atë globale?
Dihet se duhet të jemi të kujdesshëm në ndërmarrjen e iniciativave të reja, por a mbart ndonjë rrezik të qenit “tepër i kujdesshëm”? Shpjegoje përgjigjen.
Kur e ndjen se duhen zbatuar ide të reja, çfarë metode ndjek zakonisht? A ke përdorur ndonjë nga metodat e sygjeruara nga Mr. Boxx? A mendon se ato mund të jenë të frytshme në të ardhmen?
Në botën e sotme pragmatike të biznesit, çfarë do të thotë të kesh dëshirën dhe qëllimin për të kënaqur Perëndinë gjatë bërjes biznes? Si kuptohet kjo në lidhje me pasiguritë që paraqet ekonomia në përgjithësi? A është e logjikshme ta bësh? Pse, ose pse jo?

SHËNIM:Po ta kesh Biblën dhe dëshiron të lexosh më shumë në lidhje me këtë temë, shiko pasazhet si më poshtë:

Psalme 37:4-5, Fjalë të Urta 10:17, 11:2,14, 12:15, 14:15, 15:14, 16:3,9, 27:17; Kolosjanëve 3:17

Postime të tjera me interes:

Të ngremë lart vlerat e krijimtarisë

admin — Wed, 30 Nov 2011 16:42:56 +0000

Nga Jim Mathis

Një nga dallimet më të mëdha midis qenies njerëzore dhe qenieve te tjera te gjalla është aftësia jone krijuese. Bibla thotë se Perëndia na krijoi sipas imazhit të Tij; qysh në fillim Ai na përcaktoi si veten, pra si krijues.

Para pak kohësh po bisedoja me një mikun tim piktor, mbi dallimet midis artit individual dhe atij kolektiv. Duke qenë piktor, miku im punon kryesisht vetëm, ashtu sikundër edhe unë. që jam fotograf. Kur në proçesin e fotografisë hyjnë të tjerë njerëz, ata janë vetëm subjekte për t’u fotografuar.Megjithëse ata luajnë rol të rëndësishëm, proçesi krijues kalon nëpërmjet meje, nëpërmjet syve e zemrës sime. Përsa i takon kamerës, ajo është vetëm një vegël sikundër janë furça për piktorin dhe skalpeli për skulptorin.

Profesionin e muzikantit që zotëroj e shoh si një kontribut më të përshtatshëm për krijimtari kolektive. Ka muzikantë që parapëlqejnë të punojnë vetëm si kompozitorë ose thjesht ekzekutues, por, për mendimin tim, muzika del më mirë kur luhet në grup. Grupi mund të jetë i vogël sa një duo – John Lennon dhe Paul McCartney, për shembull – por mund të jetë edhe një orkestër e madhe simfonike.

Të njëjtat parime vlejnë edhe për botën e biznesit. Një drejtues i lartë kompanie shpesh duhet të punojë vetëm e të marrë vendime për gjëra që vetëm ai ka kompetencën t’i marrë. Shitësit shëtitës udhëtojnë vetëm për të takuar klientët me shpresën për t’i bindur ata që të kontraktojnë mallrat ose shërbimet e ofruara nga firma. Në të tilla raste ata vënë në përdorim krijimtarinë vetjake për të gjetur variantin më të mirë për të tërhequr klientët.

Por shumicën e rasteve trajtimi kolektiv i çështjeve të biznesit është më i frytshëm. Formulimi i strategjive për të ardhmen, përpunimi i planeve specifike për iniciativa të reja ose vlerësimi i performancës së ndërmarrjes janë proçese ku kërkohen medoemos kontribute dhe këndvështrime sa më të shumta.

Pavarësisht nga madhësia e grupit, “magjia” ndodh kur njerëzit e kuptojnë se e tëra është më e madhe se shuma aritmetike e pjesëve të saj. Thënë ndryshe, ti arrin sëbashku me të tjerët pikërisht atë që nuk e arrin dot i vetëm. Këtë të vërtetë e shohim shpesh edhe në botën e sporteve. Kur anëtarët e skuadrës luajnë mirë në grup, kanë gjithmonë shanse për të arritur rezultate që nuk mund të priten prej individëve veç e veç.

Grupi muzikor ku unë bëj pjesë, Sky Blue, u krijua vite më parë sepse ne deshëm të bënim art në formën e muzikës. Kur luajmë, spektatorët shohin katër artistë që dëgjojnë njeri tjetrin, që i përgjigjen asaj çka luan a këndon tjetri dhe që krijojnë një bisedë muzikore të pëlqyeshme për veshin. Nuk jemi grup xhazi, por edhe muzika xhaz kështu funksionon.

Shumicën e rasteve e lemë skenën me fytyra të qeshura e plot gëzim sepse kemi prodhuar diçka që nuk ishte dëgjuar më parë dhe që ndoshta nuk do të dëgjohet kurrë më në të njëjtën mënyrë.

Bibla flet shpesh për vlerën e punës në grup. Në Testamentin e vjetër, te Predikuesi 4:9-12 theksohet: “Dy vlejnë më shumë se një i vetëm sepse kanë një shpërblim më të mirë për punën e tyre. Në fakt, nëse rrëzohen, njeri ngre tjetrin, por mjerë ai që është vetëm dhe rrëzohet!…Në rast se dikush mund të mposhtë atë që është i vetëm, dy veta mund t’i qëndrojnë; një litar tresh nuk këputet aq shpejt.”

Falët e Urta 27:17 thonë, “Hekuri mpreh hekurin, kështu njeriu mpreh imazhin e shokut të tij.” Secili prej nesh zotëron talente dhe aftësira unike, por për të dhënë maksimumin, duhet të bashkëpunojmë me njeri tjetrin.

Jim Mathis është pronar i një studioje fotografike në Overland Park, Kansas, të specializuar për profile teatrore dhe tregëtare dhe drejton një shkollë për fotografi dixhitale. Më parë ai ka qenë menaxher i një kafeneje dhe drejtor ekzekutiv i CBMC në Kansas City, Kansas dhe Kansas City, Missouri.

Reflektim/Diskutim Pyetje

1. Si mund ta përshkruash kreativitetin në punën që bën? Jep disa shembuj.

2. Nga përvoja që ke, cilat punë të kanë rezultuar më të suksesshme, ato që i ke bërë krejt vetë apo ato në të cilat ke qenë pjestar i një grupi?

3. A të ka ndodhur që, kur sheh pas punët që ke bërë dhe arritjet e tua, të mendosh ashtu siç thekson Jim Mathis: “ E tëra është më e madhe se shuma aritmetike e pjesëve të saj përbërëse? Shpjegoje përgjigjen.

4. Sipas mendimit tënd, cilat janë avantazhet e punës në grup përsa i takon krijimtarisë në fusha të ndryshme të jetës?

Nëse dëshiron të shohësh apo të diskutosh mbi pasazhe të tjera të Biblës të lidhura me këtë temë, referohu si më poshtë:

Eksodi 4:10-17, Numrat 13:1-31; Mateu 10:1-16; Marku 6:7; 1 Korintasve 1:1;

2 Korintasve 1:1; 2 Thesalonikasve 1:1