Shane's Diary

每日一字 42

2024-03-24T04:45:00.000+08:00

Communiation - 溝通

Community - 社區

Communism - 共產主義

三個唔同嘅字但字根都係嚟至於拉丁文 communis. Communis 可以再拆成 com- 同埋 unus. Com- 解「一齊」而 unus 解「一」。

Communication 就係一齊傾到一致嘅方向

Community 就係大家一齊分享開心 Share 嘅地方

Communism 就再更加係想資源公平分配嘅主義

但所謂理想很豐滿，現實很骨感。實行共產主義嘅政權大多數都係獨裁政權，好多嘢都係由上而下，同社區同人民溝通基本上都係天方夜譚。最起碼國安法甚或 23 條都無問過你同我。

不能說的咪咪

2024-03-14T03:15:00.003+08:00

呢排喺社交媒體上見到好多人分享啲所謂好好用嘅 prompt，話係可以幫到手提升效率或者創新嘅秘訣。不過，你以為真係咁簡單？我諗真係有用嘅秘訣，行家唔會咁輕易就分享出嚟！

所謂「知識就係力量」，有啲嘢，特別係真正有價值嘅，分享出嚟就等於係將自己嘅競爭優勢交出去。就好似啲大師級嘅人物，佢哋嘅真功夫從來都係藏得深深嘅，係唔會咁易就教人嘅。

噉講唔係話完全反對分享啦，但係要知道，响呢個資訊爆炸嘅時代，真正值得學嘅嘢，多數唔係咁容易就搵到。真正嘅專家，佢哋可能會揀同事下屬、客戶或者要俾錢嘅小圈子分享 (onlyfans???)，咁樣可以確保知識嘅價值唔會被稀釋，同時佢哋自己都可以從中獲得應有嘅回報。

而家好多人都以為上咗幾堂，睇咗幾條 YouTube 片，就以為自己掌握咗技術。但實情係，深度同精髓嘅東西，係需要時間、實踐同反覆琢磨嘅。唔係樣樣嘢都適合公開分享，有時保持住某啲秘訣，對於提升自己嘅價值同建立專業形象嚟講，反而更加重要。

所以，下次你見到有人喺社交平台上分享啲「萬能 prompt」，不妨諗吓：真係咁堅？最緊要係自己試吓先。

紅葉之旅 Day 1

2022-12-13T20:02:00.002+08:00

疫情三年，日本開關，返嚟唔使住酒店，見係11月係紅葉季節，機票又唔算貴，就決定買機票。往後就係 Plan 行程，兌 Yen, 個行李條手帶之前爛咗，拎咗去旺角整一整，又一條好漢。

出發嘅日子，晨咁早起身，就出機場。無得 online check-in, 只可以坐到機身後半段嘅位置。响禁區外坐咗陣，無去旅行好幾年，對機場有少少陌生，但又誤打誤撞下竟然剛剛可以排到頭位登機，實在太好了。飛機餐嘛，一個波籮包，除此之外都無乜驚喜，順利抵步。

入境先係最具挑戰，因為實在係太太太多人，人氣太重，空氣唔太流通，真係要中招嘅話呢度就真係最大機會中，but anyway, 攪咗個幾鐘，終於出機場囉~

第一件事就係去買火車飛去京都，因為唔太識，買錯咗 local 車飛，但經職員協助，買到 Haruka Express 就衝落月台。幸運地係傳聞中嘅 Hello Kitty 車:

內櫳:

嚟個合照先

到達目的地，迎嚟嘅係京都之塔

但天氣已暗，到咗酒店 check-in 後，求其响樓下間拉麵鋪祭好五臟廟，就準備第二日嘅行程

蝴蝶效應 17

2022-09-19T07:30:00.005+08:00

有條茂利講過「與病毒共存，只會共赴黃泉」，要繼續清零。但當繼香港國際馬拉松後，國際龍舟邀請賽亦移師泰國，一連失去兩個大型運動項目，不同界別都叫政府審視防疫政策。

呢兩日開始吹話要今個月就入境0+7, Now, let's thinking about what it means. 0+7 即係唔使住隔離酒店，在家醫學觀察，有黃碼可以搭車返工，但唔可以堂食或者入指定場所。對於外國人嚟講，基本上同3+4無分別，尤其係非商務旅客，佢哋香港無屋企，住酒店就梗，想出街玩又無得堂食，即係買外賣大熱天時企响條街食? It is the worst possible way of leisure travel.

對於香港人，隨住不同國家尤其日本開放自由行，相信會報復式去旅行。香港嘅零售會無咗一舊錢，返嚟又响住返屋企，防疫酒店又無咗一舊錢，Staycation 又無埋，普通酒店又無一舊錢。機票收入或者都有啲增長，不過香港航空公司嘅機隊重未埋班，即係大部份益外資。諗諗吓講話要 0+7 嘅人都真係幾歹毒，相信會係壓垮零售消費市場最後一根稻草。

世界正在開放，所以3+4係柒，0+7都係柒，當打好針，死亡率同流感差不多，任何防疫政策都係柒。

出走

2022-09-04T14:33:00.002+08:00

上個月，一年兩次嘅人口數字公佈，因為移民潮而鬧得沸沸揚揚，不如就分析吓。

幅圖係按年份出生嘅變化百分比，2019至2021其實除咗數值高低外，見到啲條線嘅形狀係大同小異，但2022年條線係完全地唔同，係結構上改變咗。

另外一星期前話小一縮班，睇返5/6歲嘅人口，差不多連續3年都係跌咗2%, 應該就直接反映到响社會層面發生緊咩事，見到適齢學同以基本下跌嘅情況，相信唔使幾年中學都要面臨縮班嘅問題。

或者縮班都可以用小班教學嚟解決，但樓價牽涉嘅層面會更廣。中源有好幾個樓價嘅指數，以1997年嘅樓價做基礎。同樣哋，可以利用1997年嘅人口做基礎，得出人口指數。然後就可以見到人口同下一年嘅樓價指數係有好強嘅正面關係，雖然人口唔係影響樓價嘅唯一原因，Coorelation 亦不等同 Causation, 但需求減少係不爭嘅事實。

由2021年年頭到2022年9月，經機場離境嘅香港居民嘅淨輸出有超過30萬個，原因係乜大家心知肚明。跟據最新公佈，有140,500人係用BNO Visa去咗英國。

人口萎縮迎面而嚟嘅係經濟萎縮，响清零政策下亦唔會有外來嘅錢入嚟投資，人工因為缺乏人材或者會有短期嘅增長，長遠嚟講需求下跌亦難以唯持。除非迎接更多嘅新香港人，又或者融入大灣區，所以香港政府咁積極想同大陸通關。

Deadlock

2022-08-29T14:08:00.001+08:00

話說有日同 Partner 食完飯等巴士嗰陣，有架車嘅車牌好得意

後來有一場小騷動，因為㗎車阻住咗㗎巴士，巴士後面又頂住一架巴士倒唔到車走。乘客不斷同個巴士司機講，大家都有少少勞氣。

既然問題响架私家車度，我就行埋去叫司機駛開，入面原來英文人，話架車壞咗。跟住又有乘客嚟話個司機，好快咁解釋完，好快咁後面架巴士倒車走，好快咁前面架巴士倒車走埋，留底架著咗死火燈嘅車同司機。

無耐咖啡妹到場，司機又一面無耐咁解釋，之後我架巴士就到咗，跟進唔到了。

事情只要知道問題嘅癥結，就好快解決到。問過唔同嘅人，有袖手嘅人，有怕司機係惡人嘅人，有會去拍佢窗嘅人。沒有對與錯嘅方法，只要結果係好就係好方法

民主進步黨

2022-08-19T14:18:00.000+08:00

權力使人腐化，作為台灣民主先峰嘅民進黨，掌權後貪腐不斷，政策將民主自由收緊，只需要選舉嗰陣高舉反共反中旗號，就可以施施然當選。

貪腐事件，以總統家族陳水扁為首，貪完重可以不獲起訴。所謂上樑不正下樑歪，高雄呢個綠色大市，尤其嚴重，趙嘉寶案、慶富案、挪用氣爆捐款等等，都係陳菊掌政年代嘅事情。之前宜蘭高鐵選址變更，亦有炒賣地皮之嫌。

之後將自己爭取嘅公投綁大選廢咗，如今又攪數位中介服務法呢啲類似網絡23條，不禁要問，究竟呢個黨將民主自由擺咗去邊?

有時都會諗，其實民進黨係咪同共產黨夾埋，每次選舉臨近，共產黨都會軍演，幫民進黨拉票?

所以，人要識獨立思考，人信唔過，黨都信唔過，信自己，信制度最好。

不自量力

2022-08-03T14:03:00.000+08:00

美國同台灣係國家 Level, 香港係城市 Level. 一個城市去話一個大國乜乜乜，讉責物物物，一係就越權，一係就當自己係同一個層次 (Maybe 當自己係國家? 國安法 Please).

退一萬步嚟講，裴洛西係國會嘅議長，係美國最高立法權力單位嘅最高領導，最多都係特首發個聲明就算，局長們都好似驚執輸咁去學人發聲明，你老幾呀? 中國香港市咋! 北京上海啲幹部都未講嘢啦!

攪清咗自己嘅位置，唔好無規無距無大無細丟人現眼，咁大個人重要擦鞋擦到咁好核突。

AI畫畫 1

2022-08-03T01:02:00.002+08:00

DALL·E 2 作品: A cute Japanese young boy with cat ears in anime style playing a beach ball

中譯: 正太玩沙灘波

有唔少瑕疵，但都幾好嘢，不過Gen咗個真人出嚟係咩料 😂

The Broken Mirror

2022-07-29T20:52:00.007+08:00

Mirror 開 Show, 安全問題成為焦點，有說外國人响開 Show 之前會祝福大家 break a leg. 但估唔到嘅係 Dancers 受傷，Frankie 差錯腳，到最後連屏幕都跌埋落嚟擲親人，攪到要腰斬，Break a leg 都真係小兒科。

出事後，重傷就梗，會唔會有生命危險當時就未知，大家所謂嘅都「集氣」都只係良好願望。睇返事發片段，一嘢車落頭度，受力嘅係條頸，跟住後腦著地，好大機會斷頸。斷頸嚟講就一係死一係癱，但究竟邊樣無咁差就真係見仁見智。

至於 del 唔 del 片，呢個世界係有創傷後遺症，唔係個個都受得到，要追究責任可以，但就好似新聞相片或者照片自案案唔會影住條屍咁，令人不安嘅嘢少出現為妙，Social Media 都係 Media.

況且追究責任都係政府同公司之間嘅事，唔係有條片就追究到。同埋出事嘅片又影唔到條 Wire 點斷，Forensic 都做唔到，留嚟無用，就只有散播不安。

抗疫一年

2022-06-16T11:42:00.000+08:00

2020年1月23日，武漢封城，香港確診第一宗武漢肺炎，第一波就係經高鐵直送，好彩都係零星個案，第一波都未算係乜嘢，當777响度叫官員戴咗口罩都要除低嘅時候，全香港人都四圍咁撲口罩。

與此同時，正值農曆新年，大家都出門旅行，留學生回流，第二波就殺到埋身，由打邊爐家族同佛堂群組打响頭炮。呢一刻，777無意封關。好多人都好乖好自覺，少咗出街同work from home, 差不多少咗一半人响街。

大家忍咗一季，係除咗好有啲唔識死嘅人，重去酒吧攪到有酒吧群組，777先識去封娛樂場所，當然，依然有人响舞廳跳社交舞，只係當時未有事。鑽石公主號群組之後，大家都以為成件事過咗去，可以正常返少少咁生活。

點知就係因為唔知乜嘢經濟定人道理由，香港做咗全世界貨運人員交更嘅地方，重要無王管地可以周圍走，加上七一有班無腦嘅人無帶口罩唱歌跳舞，就由慶回歸群組率先帶領第三波爆發。

不過今次，大家都有啲攰，過咗高峰，就好快咁出返街，變咗清唔到零。

慶回歸群組到最後顯變成貨櫃碼頭群組，更不幸地出現小規模院舍爆發。雖然清唔到零但好不容易地捱到防疫措拖放寛，但攪埋全民檢測，又安心出行，攪完一輪大能龖又係當你以為有正常返少少有好日子過嘅時候，終於有社交舞群組喇，重要係一個700幾日嘅群組，我真係恭喜你呀! 不幸地，又係外國病毒株，基本上又係無封關所致。

所謂一鼓作氣，再而衰，三而竭，香港人無咩叻，最叻就係習慣，第四波已經適應咗新常態。

今次重係班富豪出事，都真係啋你都有味。

到呢一刻，又因為劏房而出現第五波，攪到要封區。

香港之所以會成功，係因為所有嘢都好有效率。有效率到係一個變態嘅地步，就好似樓價高，就買細啲，又者兩公婆一齊出去工作去供樓，子女請父母或者請個外傭幫手湊。低收入家庭就住劏房。屋企彷彿就係只係用嚟瞓覺嘅地方。因為屋企太細，擺唔到洗衣機，就出現咗自助洗衣店。因為出去搵食，工時長，所以經常出街食飯，幾夜都好，總有幾間深夜食堂為你服務，無嘅話，附近嘅麥記幫到你。落街食嘢多油多糖唔健康，又要去做 gym. 另一邊廂街上好多藥房同找換店，方便大陸遊客買奶粉返大陸。太多大陸遊客，香港人覺得太迫，得閒就會去旅行輕鬆吓。

重有好多好多連帶關係，不能盡錄。總之用最少資源賺最多嘅錢，而所有嘢用錢解決，香港基本上係經濟學嘅教材。

但一個疫症，無遊客、禁堂食，所有嘢好似骨排咁冧檔。無遊客加禁飛，名店先捱唔住，再到藥房，跟住主題公園、航空公司、旅行社，一個接一個嘅壞消息。禁堂食，好多食肆都早收，捱唔到嘅就執粒。

新時代中國特色的差不多先生

2020-10-12T03:09:00.003+08:00

要預防疾病傳播，就要早發現、早隔離、早治理。Given 有無限資源，就可以每個星期做一次全民測試，有結果之前唔俾出街，屬於高成本制作，低效率。做全民測試，但又唔禁足，就會好似香港咁，測試完個個都以為自己無事就出街玩，攪到頭第三波到呢一刻都未斷到尾。

想有效率，當然係集中測試高危群組，其中一個高危嘅群組係同 Contact tracing 有關: 確診個案嘅密切接觸者

做 Contact tracing, 唔係要搵同患者去過同一地方嘅人，係搵同一時間同患者响同一地點，尤其無戴口罩嘅人。That's why 帝苑酒店只係男丁送去檢疫中心，女仔同住客唔使。

話說香港又學大陸攪健康碼，即係貼 QR Code 响某啲地方，去到就 Scan. 呢件事大陸可行，一來個 App 只係一個微信小程式，二來大陸呢啲嘢可以強制一出一入呢啲場所嘅時候去 Scan QR Code. 响香港，要重新寫個 App 之餘，貼咗個 QR Code 都可以無人去 Scan, 無 Scan 過就代表無去過，大家都好健康!

但成件事無咗時間，就所有嘢都唔成立，因為「唔係要搵同患者去過同一地方嘅人」係有時間响入面，大家都响同一個地方，So what?

反觀外國，只需要著個 Bluetooth, 就可以知道有無同確診嘅人接觸過，大大咁縮窄範圍，Usability 同準確性都好過剩係用 QR code.

當然，香港政府緊隨中央，公務員只係聽命做事，就得出個唔好用嘅 Contract tracing app 出嚟又有幾奇?

Let's do it again

2020-07-04T02:45:00.000+08:00

推跌咗一塊骨牌，就停唔到，只會越冧越多。百年基業，就俾一頂綠帽摧毀。

英國收BNO嘅意義，其實就係英國帶頭收BNO, 300萬始終唔係小數目，所以其餘嘅5眼其他成員國收。5眼開咗呢個頭，其他盟友都會跟進，反正大部份人英國收咗，感覺上剩低嘅唔會太多。到最後，有BNO嘅亦可能選擇去第二道，分吓分吓，我覺得英國跟本只需要收一半甚至更少嘅人。政治計算，英國係數一數二，政府內部計到幾多就真係唔知。

聞說7成英國人都贊成，唔係單單因為覺得香港人慘，而係覺得香港人勤力同醒目，可以帶動到英國嘅發展。需知道英國人就係因為移民問題所以想脫歐，難得大部份人支持，到最後就係救返香港人嘅係香港人自己。

去或留，就係個人決定。如果你決定好走而且係去倫敦做IT, 我可以介紹當年幫我搵到份好工嘅Agent過你。

緊急法與選舉

2019-10-09T16:54:00.001+08:00

常言道，投票係最和平合法顛覆政權嘅方法。

如果我係林鄭，區選會如期，用緊急法立公投法，响投票當日投埋五大訴求邊樣要邊樣唔要。邊個係社會一小撮人，邊個係大多數就一目了然。

大家知有得投票，你話重需唔需要上街? 咁樣做，最少响投票日前，都唔會有大型活動，社會立即回復安寧。當然投票係一件事，之後落實係另一件事，落實唔到嘅話，保證會有更大嘅反彈。

太陽與北風，你要人除低件褸，首先要令人覺得可以除低件褸。呢啲先叫非常時期用非常手段，但有無咁嘅魄力同勇氣去做? 林鄭當然無。因為咁會令建制派區選輸到一敗塗地，兼同中央反枱被辭退，解唔解放軍唔知，警隊咩反應唔知。

成功方程式

2019-07-05T13:52:00.002+08:00

呢篇咗會好冷血咁談及生死，不喜物進

毛主席話過：「革命不是請客吃飯，不是做文章，不是繪畫繡花，不能那樣雅緻，那樣從容不迫，文質彬彬，那樣溫良恭讓。」只以和理非方法抗爭，注定失敗。六四、雨革為典型例子。

攻擊永遠係最佳嘅防守，要抗爭成功，就要有勇武派去戰，和理非先有談判籌碼，可戰而不戰，令對方有所顧忌，能量先係最大。

跟住，要有人死諫，絕食自焚等自殺行為，用嚟打公關仗，係一種道得感召，希望將輿論偏向己方，令對方感受到厭力。但單純嘅厭力，係唔會贏，對極權嚟講，佢唔需要理死幾多人，只不過死人會帶嚟國際關注，外國勢力先係主菜。

外國勢力可以做嘅嘢太多，外交召會、凍結資產、貿易制裁，呢哦先係真正嘅厭力。南非政府當年就係响呢個情勢下，結束種族隔離政策。

今次，和理非同勇武派唔割蓆，其實已經成功咗一半。至於有人死諫，只可以講話無可避免，至今已經第四個，有幾唔想都係，歷史話俾我哋知係會有更多，只要件事一日未完結，就會有人陸續去做。

完結都有分喜劇同悲刻兩個結局...

喜劇，抗爭成功，皆大歡喜，每年可能會有紀念烈士嘅行動。
悲劇，尋死嘅人會更多，只係無事可諫，只有控訴。

舊相冊

2019-04-11T00:58:00.000+08:00

舊相，一向都泛黃，scan 完之後，有時只雖然簡單地修改顏色，就可以永久收藏


有時要花費唔少時間，先得出比較理想嘅效果


有時，人手調色，遠遠唔及工業級 scanner 自動調色咁強勁


Lesson learnt: 有時係值得俾錢人賺

Machine Learning 筆記之1

2018-12-28T18:58:00.001+08:00

呢其興玩 Machine Learning, 其中一範，就係 NLP (Natural Language Processing, 唔係催眠嗰啲). 當中有一個 Word2Vec 嘅玩法，就係將字/詞變成一個所謂嘅 embedding, 基本上係一組數字，而每粒數都係字/詞嘅特性強度，基本上有 100 粒數 (即係 100 個 features) 大慨就夠用。一組數字嚟講，數學上叫做 vector, 亦因為係一個 vector, 就可以利用加減去計算相關嘅字/詞出嚟。例如以三國演義為例: 孔明 - 蜀 + 吳 = 周瑜，又或者曹操 - 魏 + 蜀 = 劉備

而 vector 之間嘅距離越近，相應字/詞嘅意思亦越近。例如以 LIHKG 嘅廣東話內容去分析，「啲」係同「D」、「少少」相近。

如果將 vector 嘅數值變成 0 至 255, 就可以變成一個灰階嘅圖，但灰階圖太難睇，加入顏色後，就可以見到特別少少嘅效果。

變咗做圖像之後，就可以玩好多嘢，例如將幅圖縮短，基本上係一篇文章嘅摘要。亦都可以用一啲 image processing 嘅方法去做分析。

Google 嘅 Tensorflow project 外帶一個 embedding projector, 將 100 個 features (dimensions) 計返 3 個 dimensions 出嚟，有興趣可以玩吓: https://x.co/embeddings

民主的褪變

2018-11-24T20:01:00.000+08:00

台灣今日9合1選舉，地方首長、市議會、加上公杸，要排成最少半個鐘先投到票。但今次係一次特別嘅選舉，亦都從中學到唔少嘢。

當中有兩個主角柯文哲同韓國瑜，柯文哲為現任台北市市長並爭取連任，韓國瑜就响高雄民進黨基地以國民黨身份參選。兩個都係人氣王，人稱北柯南韓。

柯文哲別號柯P, 大概台灣人將 Professor 都以 P 作簡稱。柯P作為一位醫生，以實務治理，將高透明度運作引入市政團隊，加入各㮔 SOP, 等市政府運作有規有距，將所有貪污拒諸門外。SOP唔代表冷冰冰，將溫度建設响SOP入面，係最考功夫。柯P作風亦受年輕人嘅歡迎，同各個唔同 YouTuber 合作，宣傳市政，亦被人稱為最大網紅，當中以一日幕僚以千萬點擊率為經典之作。實務管治貫徹始終，到投票日最後兩星期先請假全力投入選舉工程，務求將市政影響減到最低。無特別嘅宣傳口號，「該做的事做好」「把小問題都解決掉就沒有大問題」「嚴守財政紀律」大慨就係柯P嘅管治理念。今次爭取連任，作為白色力量，以打破藍綠作口號，不再以統獨做議題，台北人要選嘅，再唔係一個市長，而係要選一個務實嘅政府，定係一個停留响意識形態上嘅鬥爭。

韓國瑜以前則為臺北農產運銷公司(北農)總經理，被民進黨話係貪污瀆職，接受調查自行下離開。之後柯P曾經邀請加入台北市政府嘅團隊，但被民進黨阻撓。今次被派到高雄出選，本來無人睇好選情，但其非典型國民黨選舉工程，民調由20%升至過50%, 加上國民黨黨產已被凍結，以無錢嘅打法，堅持1支水攪選舉活動，過程相信比同期電視劇《延禧攻略》更有吸引力。如果話柯P用嘅係知識份子嘅語言，咁韓國瑜用嘅就係最市井、最貼地嘅語言。從「高雄又老又窮」到「東西賣得出去，人進得來，高雄發大財」，每一句都點出高雄市問題嘅核心。大慨就係咁，人氣帶動國民黨本身，影響埋其他地方選情。韓國瑜主張選舉要乾乾淨淨，唔攪負面民宣，唔攪意識形態，以政綱為本嘅宣傳，高雄人要選嘅，大慨同台北人選嘅一樣。

今次選舉，亦係民進黨嘅中期考試，中央做得唔好，當然會大大影響選情，再搬統獨議題似乎唔會再有效，賣悲情亦無用，賣愛台灣，難道只有投民進黨先愛台灣?

北柯南韓不約而同地帶出嘅，就係點樣將藍綠惡鬥放開一邊，一切從市民嘅角度出發，以廉能嘅政府服務市民，基本上就係民主嘅本質。如果兩個都當選，大慨台灣嘅民主政治又昇華上另一個層次。當香港人對台灣政治嘅印象重停留响廿幾年前打晒交嘅議會，其實不知不覺間，台灣比香港進步了。今次選舉，係台灣民主政治嘅一個理程碑。

Logo 的藝術

2018-11-12T23:55:00.000+08:00

對於顏色配搭同計設美學嘅認識，我大慨小學之後就無學過，記得當年有位美術老師李Sir, 份功課係叫我哋設計一個 Logo, 咩 Logo 都得，教嗰陣話一個成功嘅 Logo, 就係簡單，珠江橋牌成條珠江橋放入去，係反面教材云云。

而成功嘅 Logo 都係簡簡單單，例如無人會唔認得呢個:

又或者呢個:

同埋呢個:

响 Cyberport 度，好多 Logo 都叫偏向簡單

所以當幫新公司設計 Logo 嘅時候，我第一句同設計師講嘅，就係要簡單，之後先講間公司係咩名，想用咩做主色，公司做咩行業，要咩感覺等等 (事實上設計師問咗好多問題，我記得大慨就係呢啲)。

第一轉嘅設計, 係有3個選擇，第三個基本上就係最簡單，於是就叫設計師再 Develop 落去

將顏色簡化，拋開半透明色，近返少少深藍，再加埋要考慮黑白色嘅因素，新 Logo 第二轉就誕生咗:

超級鐘意，我諗要成功，可能就係要有單一嘅信念同埋相信專業，一個好嘅 Logo 相信係一個好嘅開始。

簡單得最極致嚟講，我最鐘意呢個:

幾個三角形，就算唔識畫畫，隨手都畫到，亦係我講電話隻手無聊嘅時候畫出嚟圖案。而三角形係可以砌出任何形狀，所以諗到砌出成個世界地圖嘅人，真係神來之筆:

工作細胞

2018-09-18T00:49:00.001+08:00

香港嘅基建一流係無可爭議，經過今個世紀最強嘅颱風山竹洗禮，都無人命損傷，都算係咁。

風暴過後，點善後，就係考驗一個城市嘅領導能力嘅時候。通常一個民選市長，都會落區巡視災區，作出適當嘅指示。你可以當作公關 Show, 但呢一刻一個坐响辦公室作出嘅決定，一定唔係好嘅決定。君不見前排台灣中南部因大雨成災，適逢臨近選舉，各候選人不論黨派，都走去視察災情，說穿了就係民主嘅力量。

噚晚個風登陸後，咗街食個晚餐同時亦走一轉，垃圾處處不在話下，街頭一堆碎玻璃，街尾一個爛窗框，加上折技處處，更有連根拔起，情況絕對係差。

返到屋企睇風暴消息，話東鐵西鐵輕鐵都要加緊清理，8號波喎，清條命咩! 天文台話考慮6點前改掛3號風球，即係只有一兩個鐘左右叫做安全情況下可以全力清理，一聽就知無可能。呢啲情況下，進入緊急狀態係好稀疏平常，緊急狀態嘅意思係指政府可以投放資源做要做嘅事，可以同政局問題無關。

唔進入緊急狀態唔緊要，可以宣佈停工停課，等鐵路道路清好先。再退一步，Call銀行、交易所休市，將由新界至中環嘅人流減去，已經對市內交通好大幫助，唔係太迫嘅話，我諗大部份人都唔會有太大怨言。但講到尾都係全面停止運作好，重點係要俾時間個城市復原，要復原就唔可以有loading. 响零流量下，工作人員可以 full speed 攪掂。一有 traffic, 一來有車要過又要等車過咗先攪得，又要顧及安全問題，事倍工半。

依家就好似要一個 IT System 單機做 DR, 0 RTO 又要 100% Performance, 又或者隻手甩骹叫你落街去買包米返嚟，簡單嚟講 Mission Impossible.

友人講得好好：「人和機器的分別，也在於智慧。不運用智慧分析的決策，不叫制度化，而是機械化。」

無軟件，一切硬件都只係廢鐵。電腦如是，城市如是。善後不當唔係天災，係人禍。

獨立國旗國歌

2018-07-05T03:05:00.001+08:00

話說有個國家想獨立，俾人打咗成日，趕走咗人之後，第一件事做嘅唔係乜嘢，而係要做每日嘅例行工事: 升返支國旗。

跟手就有人感觸，作咗首詩，再入埋曲，然後就變咗國歌喇~

而呢個國家，就係美國。

美國第二次獨立戰，英國海軍想攻入巴爾的摩，向麥克亨利堡(Fort McHenry)進攻，由1814年9月13日零晨6點開始進行炮擊。當時美國未有正式軍隊，但守軍依然奮勇低抗，經過長達25小時嘅炮火，堡壘依然屹立不倒。最後英國海軍撤出，由於獨立旗幟喺炮擊期間嚴重受損，加上每日嘅升旗儀式，駐紮士兵掛出一面面積較大的新旗，律師兼業餘詩人 Francis Scott Key 目擊整個攻擊及升旗過程，一時感觸，寫出詩編，詩編分成四節，其中第一節，被 Francis 嘅舅仔 Joseph Hopper Nicholson 提議融入當時流行曲 To Anacreon in Heaven, 並於1930年變成今日美國國歌 The Star-Spangled Banner:

O! say can you see, by the dawn's early light,
What so proudly we hail'd at the twilight's last gleaming,
Whose broad stripes and bright stars through the perilous fight,

O'er the ramparts we watch'd, were so gallantly streaming?
And the rockets' red glare, the bombs bursting in air,
Gave proof through the night that our flag was still there —

O! say, does that star-spangled banner yet wave
O'er the land of the free, and the home of the brave?

當中 broad stripes and bright stars 同 star-spangled banner, 就係指旗桿上嘅旗幟，歌詞中描繪出當時嘅時間，戰況嘅激烈，英勇嘅低抗，轟轟嘅炮火，最後25個鐘頭後，旗幟依舊，豎立在麥克亨利堡嘅旗桿上，隨風飄揚，並歌頌自由嘅大地。

台中高雄之旅 Day 5

2018-06-29T00:20:00.002+08:00

終於到咗最後一日，要 Check-out 了，臨走前，睇一睇個 Gallery, 都幾 Cozy.

Check-out 好，時間尚早，可以去多一個地方。於是就放好行李响酒店，搭巴士去美術館。多得大神指點，响後門入。

返返去正門入口，好寧靜嘅美術館，但來一張成層樓高嘅書法，寧靜之餘又不乏霸氣。

入去第一個展廳，係用霓虹燈做嘅地圖，欣賞宏大嘅作品之時，展廳內嘅水聲潺潺，原來來自於噴泉，真係好舒服


另一個展廳，係以漁民做主題嘅相展，除咗滄桑樸實，無乜特別。

另一幅大作《美哉高雄》，畫出高雄嘅全景


要識欣賞，就唔可以錯過佢嘅導覽


跟住就係雕塑展，唔太識欣賞

戶外其實重有唔少作品，可惜落雨

我鐘意這個擺設

呢個日記好好心機，又影相又寫詩又排版


上到最高一層，係一個休息嘅空間，牆上有啲公仔，睇真啲，係一個故仔嚟㗎!

唔止牆上面，地下都有

再去到另一個展廳，主要睇畫

近排有同事畫水彩，開始識點去欣賞


除咗水彩，重有粉彩

同埋油畫，都畫得好靚，Literally 賞心悅目

時間差不多，係時候要走了，不忘為美術館拍照留念

然係... 真係有人會表演鋼管舞?

美術館外嘅湖

返到去火車站附近，試飲咗一小杯翡翠檸檬，好飲! 就買咗杯嚟飲

本來想四圍搵嘢食，但記得麥記有個50蚊餐，想走之前試一試

雖然係4件雞加一杯細氣水，但其實杯氣水已經係香港嘅中杯，我諗如果香港有呢個餐，我可以日日食都得

食完簡單嘅 Lunch, 就返酒店拎行李，搭捷運去機場，半個鐘左右就到。Check-in, 過安檢，出境... 出境唔係人手櫃位?! 係自助櫃位無須事前登記，Scan 吓本 Passport, 打個手指模，走得!!!

即係話，香港、澳門、中國大陸全部都要登記，唔係技術上做唔到，係另有 Agenda. 哈哈，我又諗到啲恐佈嘢喇~~~

前往登機閘口途中

唔同宗教嘅祈禱

每個登機閘口都有自己特色，呢個利用天然採光，加入植物嘅閘口，主題係賞蝶，

呢個主題係高雄拍過嘅電影

利用最多遊客嘅地方，盡最後一刻去宣傳自己，呢啲咪叫做到嘢。

上機了，起飛了，旅程完了，要說再見了。

台中高雄之旅 Day 4

2018-06-27T01:19:00.000+08:00

難得無落雨，決定去駁二藝術特區行吓，落車後途中經過叫五金街嘅地方，原來又有典故喎

成條街無嘢多，係五金鋪多

作為一個藝術特區擺設藝術品是常識吧。

直到影呢兩幅相，先發現之前部相機影嘅都係手動對焦 -_-

柳暗花明五金鋪

經過一系例嘅五金鋪之後，就到咗~~商業區~~藝術特區，有 Cafe 啦、誠品、紀念品店等等

貨倉區前，有電車軌，路軌一層草皮，散發著清新的感覺。香港嘅話，我諗金鐘可以做得到。

雨後嘅水氹，就嚟個偽天空之鏡


大廈嘅壁畫，實在唔識欣賞

其實，我原本以為電車軌係癈棄咗，但原來真係有車行

跟住嚟到其中一個展館

都係將扭蛋變大嘅擺設


我喜愛的自由女神系列

不過其實都未開始，完全無留意到展出日期，所以入面係佈置緊。

偽天空之鏡習作之二

行行吓見到一塊金屬雕塑，應該係五金街剪影之類

應該係變形金剛

幾靚嘅壁畫


攰攰哋、熱熱哋、渴渴哋，嚟一杯珍珠奶茶先~

無題

經過高雄港牌樓

幾有趣嘅塗鴉

呢度係駁二藝術區嘅另一邊，亦係哈瑪星鐵道文化園區附近，呢度有間細細哋嘅哈瑪星台灣鐵道館

亦可以搭細細哋嘅火車

鐵道文化園區就唔同，好大


不過影咗幾張相就落起雨嚟，要 Plan B 行博物館。去捷運站中途，見到打狗鐵道故事館，就走入去𥄫𥄫。館仔細細，都係一啲陳舊車站擺設


比 Google Map 老點完，搭完捷運，轉巴士，重落緊微微細雨，嚟到國立科學工藝博物館。

呢間博物館5點鐘閂，重有兩個鐘可以行。入到去當然係俾呢件嘢震攝，不過時間不多，要買飛入場了。

職員收咗飛，就問我嚟過未，話邊啲可以 skip 咗佢唔睇住。不過好多都係走馬看花，啲航天科技，工業發展使就真係唔太識欣賞。

我就當然係睇電腦嘢


呢段歷史，係我認識電腦之前無耐嘅事，都幾有趣


除咗電腦，電訊我都啱嘅。成日聽上一代講嘅 Telex, 原來有中文版，個 Keyboard 都幾得人驚。

舊電話一堆

5點鐘，博物館閂門了，要回程了，上巴士了。原來，巴士有 USB 叉電㗎! 雖然粗粗地，但用得就得啦!

前排睇《攪神馬》嘅全聯試食系列，於是就去咗買嚟試吓。其實兩款都麻麻，芒果菠蘿包如果我鐘意食嘅話應該 OK 嘅，但奶酥菠蘿包個餡係乾嘅，真心接受唔到囉。

七仔有珍珠撞奶，好好飲，第二朝又飲咗杯


响酒店房抖咗陣，當然就係去夜市! 又要轉車，但見到人哋巴士站都有 USB 叉電頭，又有實時巴士顯示嘅時候，香港要做 Smart City 真係有排追

本來想去瑞豐夜市，但係原來呢日唔開，只好去光華夜市。唔知點解個個都話林家水餃好食，但其實好普通

呢間約翰碳烤三明治就唔同，真係好好食

入面一啲都唔馬虎

好似欠咗少少嘢，就係串燒，但唔覺有，於是又搭車去咗自強夜市，都係無串燒賣。可能天雨關係，都唔太開鋪，反正都飽飽哋，又買咗包响酒店，就搭巴士返去休息，準備回程。

台中高雄之旅 Day 3

2018-06-26T02:34:00.001+08:00

旅行咁多日，落足咁多日雨，高雄重要落雷雨，落高雄之前，週圍行吓，去咗七仔度買咗杯雪糕，係北海道牛奶味，超正。因為把遮斷咗條骨，所以要買過把，見到有一款有 Telfon coating, 就買咗把，都幾貴，希望襟用啦!

經過一個鐘左右嘅高鐵，有少少餓，就响高鐵站買咗個腐皮壽司做個簡餐

左營高鐵站同高雄捷運相連，所以唔太使濕身就去到高雄火車站。不過呢高雄站係分前站同後站，要攞張飛仔入閘先過到去。

個站其實都幾大，間酒店係平嘅，但係有少少唔方便咁。不過到咗酒店，個感覺太舒服喇，好啦，我原諒你啦!

房入面嘅設施都好好，除咗有畫做裝飾

重有係 USB 直叉，Adapter 都唔使拎出嚟

由於持續大雨關係，於是就去夢時代行吓。間商場，我估應該同 Elements 差唔多，得個大字，特色欠奉


台灣人真係好鐘意唱 K

夢時代最頂層有個摩天輪，不過因為响室外，加上落大雨，相影唔到，係撞到呢隻好假嘅恐龍咁

商場其實無乜嘢行，又唔想入面食嘢，於是就去咗六合夜市，因為落雨，唔多鋪開，行嘅人亦唔多，好彩個個都推薦嘅果汁店有開，算無白行

正當再搵吓有咩好食嘅時候，就落起大雨喎，咁啱去到餃子店嘅位，反到都係等，就叫咗碟餃子食，味道不過不失。

不過食完餃子，雨重係咁大，行夜市嘅雅興完全無晒，只好冒住大雨去捷運站。好彩鞋係防水嘅，遮係跣水嘅，背囊防水笠，所以只係褲管濕濕地，個人整體上都係乾嘅。

返到去火車站，已經停咗雨，原來間酒店夜晚都幾靚仔


是夜開心大發現: 响床頭張櫈度，見到呢張咭片。原來係送耳塞，質料亦都唔錯，難得!

台中高雄之旅 Day 2

2018-06-25T00:25:00.002+08:00

放假是懶洋洋的，懶洋洋的起床，懶洋洋的梳洗，懶洋洋的出門。

本來想去柳川水岸步道行吓，可惜遇著落雨，所以都係打個卡算

反正落雨，想試多次 slow shutter, 但似乎太光了，失敗嘅作品


雨中柳川，其實可以好好影，可惜又要擔遮，又要影相，太麻煩了

因為落雨嘅關係，離開柳川之後，就去睇博物館。台中其實有幾間博物館，但係唔知係因為星期一嘅關係定端午節假期嘅關係，就剩係得自然科學博物館開

其實入面都無乜太多嘢睇，有講晶片呀，太空之類嘅展館，上到去一個有個室外嘅地方，養住啲小動物同植物咁。不過啲小動物通常都匿埋晒，其中一個缸，發現呢隻嘢，算係好彩啩。

去到另一個展館，講好多科學原理，其中一個係凹鏡。令我記起讀書嗰陣嘅一個趣怪現像: real image. 話說 Physics 讀到 Optics 嘅時候，鏡像通常都係响塊鏡入面，稱之為 virtual image. 但有一日啊 Sir 畫咗所謂嘅 real image, 即係個鏡像係响鏡出面，當時班上都為之震驚。但當時係無做到任何實驗，所以跟本想像唔到 real image 為何物。但今次，見到了，就好似啊 Sir 當年所畫嘅咁，可惜唔記得拍片。

行完展館，無乜嘢做，就去咗睇天象電影。嘩，座位向後傾斜嚟講，實就太好坐，亦都好好瞓，於是半個鐘嘅電影，就瞓咗十分鐘。瞓完個人幾精神，諗住出發去夜市，但行行吓突然狂風大驟雨，咁啱有個商場，就走咗入去。

個商場叫第六市場，反正時間尚早，行吓都好

行行吓有少少餓，因為都想去一轉夜市，就叫咗一碗陽春麵同買咗盒生果食

食完嘢，有個健身中心嘅人搵我做問卷，我話我香港嚟，於是就由做問卷變咗吹水，一吹又吹咗十分鐘。不過好彩有佢，正當我猶豫緊落雨去唔去夜市嘅時候，佢就話:「去一去吧，反正應該都不會再下太大的雨。」於是我就搭車過去。

轉車其間，雨已經停咗，有少少口渴，經過飲料店，見到有阿華田奶茶，好奇心驅使下，買咗嚟飲，味道又唔錯喎，見到可以再試吓。

終於到咗逢甲夜市，熱鬧非常，而台灣人推薦嘅明倫蛋餅，日船章魚小丸子同繼光香香雞就喺晒眼前。

但呢一刻，因為成肚水嘅關係，感覺重係好飽，但要揀一樣食嘅話，我決定揀明倫蛋餅。

好多人排隊，拎咗號碼牌等嗌號碼，十分鐘左右就到我喇! 不過太熱，等咗一陣先食。一食落口，好好食，蛋同葱嘅香味剛剛好，又唔會太䶢，果然名不虛傳!

可能天氣太濕熱，無乜胃口，加上之前食咗少少嘢，已經唔想再食。但有啲嘢唔食都睇吓，呢間我見好多人都拎住個盤嚟食，應該幾好食

除咗細細個住响燒味工場附近，好耐未見過成隻燒豬

雪花冰嘅嘢，好難唔買嚟食


行過一間扭蛋鋪，見幾得意，就扭咗隻嚟玩

該食嘅食完，該行嘅行完，係時候返酒店執好啲嘢，第二日 check-out 了。