Ranglerock inviterte Eie til å spela for ungdom i Møllekjellaren i helga, slik me har arrangert fleire konsertar saman med fritidsklubben tidlegare, med blant andre Kvelertak, Bo Milli og Psyko Blasfemi. Dessverre vart ikkje denne konserten gjennomført, sidan Eie ikkje fekk opptre med eit Palestinaflagg på scena.

Men fritidsklubben og artisten har funne ut av dette saman, feilen er beklaga og me er glade for at det er eit gjensidig ønske om å gjennomføra konserten på artisten sine premissar.

Ranglerock er ein dedikert musikkfestival som vel artistar som me tenker harmonerer med våre frilynte verdiar. Me tykkjer det er flott med artistar som tek opp vanskelege spørsmål. Og me ønsker ei verd der musikk vert teke på alvor. Ranglerock vil gjerne igjen vera med og arrangera når Eie kjem tilbake for å spela konserten sin, akkurat slik dei vil.

Tolvte og siste artist til kveldsprogrammet: Velkomen, eie! Og gratulerer med flunkande nytt album!

Tittlelen på debutalbumet er ein munnfull: My Tongue Is Stuck to the Roof of My Mouth And That Is All I Can Think About, og blir gjeve ut på Apollon Records.

Eie kallar uttrykket sitt gotisk grunge og vil tøya grensene for korleis musikk kan sjå og høyrast ut. Kva skjer når ein kombinerer støyimprovisasjon med slampoesi? Elektriske gitarar med autoharpe og theremin? Gjer deg klar for ein konsert full av musikalske og lyriske kontrastar, eit konfronterande clusterfuck/gjørmeslagsmål der destruktive relasjonar og ukritisk idealisering av autoritetar blir slengt veggimellom!

Lokale Per Haarr redebuterer på Ranglerock, denne gong som soloartist.

Per Haarr debuterte på ranglescena som ein boogierockande 17-åring. Nå tolv år seinare vender han tilbake med eit meir ope og utforskande uttrykk. I senter ei varm røyst og sterke tekstar. Ein tanke americana, ei aning Nick Drake, men framleis rockaren som kan dra gitarsoloane ut i Neil Young-proporsjonar saman med ringrevane i bandet sitt: Lasse Fuglestad på gitarar, Christer Espevik på bass og kor og Arne Andersen på trommer og perkusjon. Albumet Days in Vain frå 2024 er ei smakfull, dempa affære, og så legg dei til ein ny dimensjon med kraftfulle liveversjonar.

Ranglerock er skikkeleg glade i artistar som syng på morsmålet, og når dei i tillegg syng på jærsk er det storvegs!

Lokal Valuta leverer så det held med sine ærlege og direkte tekstar, framført med stor overtyding. På debutplata “Din feil” varierer songane frå vare balladar og viser til tung rock, men alltid med ein sterk melodi. Bryne-bandet består av Peter Time, Tjalve Braut Haarr, Ola Solheim og Magnus Ueland, og dei har raskt etablert seg som eit av dei mest spanande banda på Jæren.

brenn. returnerer til Ranglerock som eitt av landets mest relevante og framoverlente rockeband!

Alt ved brenn. viser at rocken framleis kan vera uredd, fri, uhøgtideleg og fargesprakande. Bandet si unike blanding av rockens kompromisslause haldning og popen sin leikne sjarm har gjort at dei skil seg ut i musikklandskapet og trekk til seg stadig nye trufaste fans. Framtida er brennheit!

brenn. består av Edvard Smith og Rémy Malchère Pettersen. Duoen brakdebuterte på den norske musikkscena då dei slapp debutalbumet “Elsker” i 2019. Eit album som dei seinare vann spellemannpris for. Dei har hausta strålande kritikk for både musikken og liveshowa sine. I 2022 kom det etterlengta andrealbumet, “Vandrer på solskinn”, som bekrefta brenn. sin posisjon på den norske musikkscena. Med innfridde milepælar og rockestjernestatusen befesta seier Edvard og Rémy at dei sjølv er heilt uvanlege gutar i midten av 20-åra, med heilt håplause store problem, kjensler og tankar.

Den seinaste plata “Duster 75” skil seg frå det skamlause debutalbumet og den alt-mogleg-rare oppfølgjaren. Dei nye låtane ber preg av eit breitt kjensleregister, der gutane erkjenner at dei ikkje sat med alle svara som 22-åringar og at dei ikkje er så smarte som dei ein gong trudde.

«Jeg tror man blir mer nevrotisk jo eldre man blir. Det tror jeg i hvert fall vi har blitt. Ikke at man alltid går rundt og stresser, men man lærer av egne feil, og reflekterer over hva som gikk galt, hva feil man selv har gjort osv. Så blir man mer avslappet etter man har reflektert over det. Eller ikke, hvem vet?» – Rémy Malchère Pettersen

Sidan debutalbumet har brenn. turnert over heile Noreg med utselde konsertar, i tillegg til at dei har spelt på fleire av Skandinavias største festivalar som Øyafestivalen, Roskilde og Tons Of Rock. I 2022 inviterte dei til sin heilt eigen festival, brennapalooza., med fulle hus i både Oslo og Trondheim.

Amerikansk «natural-born performer» tek turen frå Firenze for å spela på Ranglerock!

Mattiel er ein låtskrivar og musikar med tre kritikarroste album og eit fjerde på veg. Ho syner eit imponerande spenn i låtskrivinga si, frå soulpop i Amy Winehouse sin tradisjon til garage-rock og country. 

Mattiel sin aller første arenaturné i USA var som oppvarming for Jack White, som opphavleg oppmuntra ho til å satse på ein karriere innan musikk. Ho har seinare òg vore med Tame Impala på turné.

NPR skildrar Mattiel som ein “natural-born performer”, og Rolling Stone samanliknar hennar “nydelege, lengtande, fullstemte altstemme” med Nico. Mattiel bur for tida i Firenze i Italia, der ho skriv på sitt komande fjerde album.

Garantert skandale med Det Skandaløse Orkester!

Det Skandaløse Orkester er eit kultband frå Bergen som ikkje liknar på noko anna i norsk musikkhistorie. Dei har blitt omtala som det mest fascinerande, kompetente, løgnaste og tightaste bandet i Bergen, og blir samanlikna med artistar som Tom Waits, Frank Zappa og Gartnerlosjen. Sjangarmessig går det i berg og dalbane frå rock, pop, prog og jazz via punk, folk, ompa og polka. Live byr dei på vill og hensynslaus energi, vakre melodiar, komplekse arrangement, dårleg humor og upassande dansing. 

Nokre av låtane er instrumentale, medan andre har tekstar som ofte tek for seg konflikten mellom dei utstøytte og dei normale i samfunnet. Sommaren 2019 gjorde dei ei legendarisk feit framføring under sin første konsert utanlands på “Zappanale Festival” i Tyskland. Noko som resulterte i konsertfilmen «Legends of Europe». I 2021 feira Det Skandaløse Orkester ti år med ein jubileumskonsert på Kvarteret i Bergen, som blei belønna med 6 av 6 hjarte i Bergens Tidende.

Bandet har gjeve ut albuma «No har de laget skandale igjen!» (2014) og «Tenk om noen ser deg» (2018). Sistnemnde blei kåra til årets album av Prognytt.no.

“Det er ingen tvil om Det Skandaløse Orkester er et av bergens mest kompetente band og at de behersker formelen sin til fulle! 6/6″ (Petter Lønningen, Bergens Tidende)

 

“…is a band that are not only truly progressive, but more important than that are simply brilliantly entertaining. (9/10)” (Andy Wors, Nordic music reviews)

 

“Subtil, hysterisk komikk på detaljnivået (…) Faktisk burde nokon gi dei ein pris fort som råd” (Rasmus Hungnes, Dag og Tid)

Det vestnorske unikumet Oddny kjem til Ranglerock!

Oddny kombinerer det vestlandske underfundige med element frå viser, rock og honningsøt pop. Dei syng, på sin karakteristiske dialekt, om dei evige tema – på ein måte som mange kjenner seg igjen i. Bandet er eit vestnorsk unikum som me tenker har potensiale for å nå langt.

Gutane har hovudkvarter i «Gamlehuset på Håjen» i bygda Bremanger, der dei i periodar bur, musiserer, skriv og spelar inn. Oddny markerte seg i 2023 med låta «Oktober, Bergen by» som i heile 20 veker var A-lista på P1 nasjonalt. I 2024 vann dei Luttprisen i kategorien “Årets nykommar”. 
Oddny er i framovergir, har planen klar og ny musikk er rett rundt hjørnet!