Path to Freedom

බුදු දඑම ගැන තවත් දැනගනිමු

noreply@blogger.com (Achira) — Sat, 10 Apr 2010 08:50:00 +0000

ඉස්සර අපේ ආච්චිලගෙ කාලෙ බුද්ධාගම ගැන දැන ගන්නවනම් පන්සලේ හාමුදුරුවන්ගෙන් හරි, පන්සලේ හරි ගෙදර හරි තියන බණ පොතක් හරි එහෙමත් නැත්තම් බුදුසරණ පත්තරෙන් හරි තමයි දැනගන්න වෙන්නෙ. හැබැයි ඒ ඉස්සර. දැන් තාක්ෂණය හරිම දියුණුයි.බුදු දහම ගැන විතරක් නෙමෙයි ඕනැම තොරතුරක් හොයාගන්න දැන් අන්තර්ජාලය තියනවා. මේ අන්තර්ජාලයෙ තියන වැදගත් යොමු කිහිපයක් තමයි මම අද ඉදිරිපත්කරන්නෙ.

1. සෝම හාමුදුරුවන්ගෙ ධර්ම දේශණා අඩංගු වෙබ් අඩවියක් තමයි මේ යොමුවෙන් දැක්වෙන්නෙ. මේ වෙබ් අඩවිය වික්ටෝරියා විහාරයෙන් පාලනය වෙන්නක්.

2. ඔබ සොයන්නේ පිරිත් ද? එසේ නම් මේ අඩවියට ‍ගොඩ වෙන්නග පිරිත් වලට වඩා තවත් දේ මෙතන ඇති.

3. ධර්මය එෆ්.එම් සේවාවක් ලෙස මෙම යොමුවෙන් ලබාගත හැකියි. ප්‍රමුඛ දේශකයන් වහන්සේලාගේ දම් ගග මෙයින් ලබා ගත හැකියි.

ඒ කොන් ගේ සරාගී බැල්ල නැරඹීමි

noreply@blogger.com (Achira) — Wed, 31 Mar 2010 03:44:00 +0000

වර්තමාන ලංකාවේ වඩාත් උද්ගතවී ඇති ප්‍රශ්ණය ඒකොන්ගේ ලංකාගමණය සහ ආන්ඩුවෙන් ඔහුට විසා ලබා නොදීම යයි මම සිතමි. පසුගිය සතියේ පත්තර, ප්‍රවෘත්ති සහ බ්ලොග්වල පට්ටගැසූ මේ සිදුවීම සම්බන්ධයෙන් මමද යමක් එකතුකල යුතුයයි සිතුවෙමි.

යූ ටියුබ් හරහා මමත් ඒ කොන්ගේ සෙක්සි බිච් නොහොත් සරාගී බැල්ල දැක්කෙමි. ( දැක්කා යයි පැවසුවේ වුවමනාවෙන් අසා ගතයුතු හරයක් නැතැයි සිතුන බැවිනි). මගේ ඉංග්‍රිසි දැනුම මද නිසාදෝ එක්වරම ගීතයේ වචන ටික හෝ අර්ථය එකවරම මට ග්‍රහනය කරගත නොහැකි විය. පසුව අන්තර්ජාලයෙන් ගීතයේ ගේය පද ලබාගතිමි.

එහි ඇත්තේ හරසුන් වචන තොගයක් මිස ගත යුතු හෝ වින්දනය කීරීමට දෙයක් ඇතිදැයි මම නොසිතමි. එම පදවල බුදු දහමේ හෝ කිතුනු දහමට අදාල කිසිවක් අඩංගු නොවිනි. (මට තේරෙන විදිහට)
නමුත් වීඩියෝව ගත්කල එහි වර්තමාන සිංහල මියුසික් වීඩියෝවක හැඩය අඩංගුය. එනම් ගීතයේ වචන වලට සම්බන්ධ දසුන් එහි නැත. බුදුපිළිමයක් ඉදිරියේ නටන අඩ නිරුවත් ගැහැනුන් පිරිසක් බුදුන්ට පිටුපාගත් මිසදෙටුවෙක් හැරුණු කොට ගීතයට අදාලපසුබිමක් එතුලින් විද්‍යාමාන නොවේ.
නූතන ශ්‍රිලාංකික මියුසික් වීඩියෝවක කෙරුවාවද මීට දෙවෙනි නොවේ(හැම එකම නොවේ). කුමක් හෝ වචන ටිකක් මැද්දට වේගයෙන් කියවිය හැකි රැප් දමා වීඩියෝවට අඩනිරුවතින් රගන ගැහැනුන්, නග්න දෙපා ආදිය යොදා (වර්තමානයේ නාන ඇදුමින් සැරසුනු ගැහැනුන්ද සිටිති) වීඩියෝවත් තනනු ලැබේ. වෙනසකට ඇත්තේ තවමත් ඔවුන් බුදුපිළිමයක් හෝ ජේසු තුමා තම වීඩියෝවට යොදා නොගැනීමයි.
අපේ සිරි ලංකාව බටහිර කරණය වී ඇත. වර්තමාන පරපුර ගමන් කරන්නේද ඒ කොන්ගේ සරාගී බැල්ලිය ගමන් කල අඩිපාරේය. ඒකොන් නිවැරදියයි මම කිසිවිටක නොකියමි. ඒකොන්ට වීසා නොදීම සිදුවුයේ බුදුදහමට අපහාස කලා යයි යන පදනම මත සිට නම්, ඒ තීරණයට සමගාමීව ඊටත් වඩා දරුණු ලෙස ආගම වනසන රටක (බුදුපිලිම කඩා නිධන් හාරන, අන්‍යාගමීකරණය සිදුවෙන, වැනි) එවැනි පුද්ගලයින් ගැන වඩා නිවැරදි තීරණයක් ගත යුතුය.
නැත්නම් ඒකොන් පිළිබද තිරණය පුස්සක් වනු ඇත.

ද බුඩිස්ට් නාලිකාව

noreply@blogger.com (Achira) — Sun, 14 Feb 2010 05:46:00 +0000

ශ්‍රී ලංකාවේ සිටින බෞද්ධයන් හට ඉතාම අනගි සේවාවක් සලසන රූපවාහිනි නාලිකාවකි ද බුඩිස්ට්. කොළඹ 7 ග්‍රෙගරි පාරේ ශ්‍රී සම්බෝධි විහාරයේ සිට විකාශය කරන මෙය ලංකාවේ සැටලයිට් රූපවාහිනි නාලිකාවකින් නැරඹිය හැකි එකම බෞද්ධ නාලිකාවද වෙයි. හිටපු අගවිනිසුරු සරත් එන් සිල්වා මහතාගේ අදහසක් අනුව මුහුන්තන් කනගේ මහතාගේ ධන පරිත්‍යාගයෙන් ඉදිවුන මෙම නාලිකාව ඩයලොග් ටීවී ඔස්සේ ඔබට නැරඹිය හැකියි.

ඊට අමතරව http://www.thebuddhist.tv යන වෙබ් අඩවිය ඔස්සේද නාලිකාවේ විස්තර සහ සජීවි වැඩසටහන් මෙන්ම බණ, පිරිත්,ධර්ම සාකච්ඡා ආදිය නැරඹිය හැකිය.

පෙබරවාරි 14 වෙනිදා වැදගත් විදිහට ගෙවමුද?

noreply@blogger.com (Achira) — Fri, 05 Feb 2010 04:49:00 +0000

විශෘලනය සදහා රූපය මත ක්ලික් කරන්න.

මඩකඩ අරණ්‍යය සේනාසනය

noreply@blogger.com (Achira) — Sun, 10 Jan 2010 13:48:00 +0000

මේ දවස් වල හම්බවෙච්ච විවේකය වැදගත් විදිහට යොදවා ගන්න අවස්ථාවක් පහුගිය දවසක මට උදාවුනා. ඒක හන්ද කොළඹින් ටිකක් දුරට වෙන්න ඒත් බස්නාහිර පලාතෙම තියන මඩකඩ අරණ්‍යය සේනාසනයට හිත නිවෙන චාරිකාවක් යොදාගත්තා. කොළඹින් කිලෝමීටර් 50ක් විතර ඈතින් පිහිටල තියන මඩක‍ඩ ආරණ්‍යය හුගදෙනෙක් දන්නෙ නාච්චිමලේ නමින්. නම අහපු ගමන් තරුණ අය නම් දන්නවා ඇති. මොකද ගොඩක් තරුණ පිරිස් එක් දින විනොද චාරිකා යන්න එහෙම යොදාගන්න තැනක් නිසා.

කොළඹ ඉංගිරිය පාරෙන් හැරිල ටිකක් විතර දුෂ්කර පාරක කිලෝමීටර් දෙක හමාරක් විතර ගියහම තමයි මේ ආරණ්‍යය හම්බ වෙන්නෙ. හුගක් නිස්කලංක පෙදෙ‍සක පිහිටල තියන හන්ද භාවනා කටයුතු උදෙසාත් මේ ආරණ්‍යය වෙන් කරල තියනවා. වක් ඔයට වැටෙන සුන්දර දොළ පහරක් යන එන හැම සිත් සමාධිගත කරනවා. දොළ පහරෙන්, කුරුල්ලන්ගෙන් ඇතිවන ශබ්දය ඇරුනහම වෙන සද්ද එනවානම් ඉතින් යන එන අය කරන සද්ද තමයි. ඒ දුෂ්කර මාර්ගයේ වාහනයකින් යන්න පුළුවන් ටික ඉවර වුනහම පයින් ගමන් කරන්නත් කොටසක් තියනවා. මේ කොටස මීටර් පන්සීයක් විතර ඇති. ස්වභාව සෞන්දර්යයයෙන් අනූන වන පෙදෙසක් මැදීන් ගමන් කරන්න තියන හන්ද කිසිම මහන්සියක් නැතුව ඒ දුර තරණය කරන්න පුළුවන්.

ආරණ්‍යයට ඇතුල් වෙන තැන ඉදන් උපදෙස් සහිත (ආරණ්‍ය තුල හැසිරිය යුතු ආකාරය සහ ජීවිතයට බුදු දහමෙන් ලබාගත හැකි) වාක්‍යය ඇතුලත් පුවරු එහි ප්‍රදර්ශනය කරල තියෙන්න විශේෂයෙන් එහි එන තරුණ පිරිස් ඉලක්ක කරගෙනයි.

නිහඩ නිසංසල පරිසරය ඇතුලෙ සිමෙන්තියෙන් කළ නිර්මාණ ඔක්කොම ස්වාභාවිකත්වය රැකෙන පරිදි කරල තිබුනා. අලංකාර බුදුකුටියක්, බෝධි වෘක්ෂයක් ඇටසැකිල්ලක් සහිත කුටියක් චෛත්‍යය රාජයෙක් භාවනා කුටි සක්මන් මළුව ආදියෙන් මඩකඩ අරණ්‍යය සමන්විතයි.

අරණ්‍යය ඇතුලෙ දැක්ක තවත් දෙයක් තමයි තරුණ භික්ෂුන් සහ තරුණ ගිහි උපාසක පිරිස්. සුදු සරම් සහ සුදු කමිස ඇදගත් මේ පිරිස කසා වත් ඇදි හාමුදුරුවන් වහන්සේ තරම් ප්‍රසන්නයි. ජීවිතයේ අනිත්‍යය බව මෙනෙහි කරන්න ඒවාගේ නිස්කලංක තැනක් තවත් නැතුව ඇති. අරණ්‍යය ඇතුලේ දහම් පාසලක්. අපි යන දවසේ ඒ පොඩි ඇත්තතො සිල් සමාදන් වෙලා.

නිවාඩු දවසක් හන්ද තරමක පිරිසක් එකතුවෙලා හිටියා. කලිනුත් කිව්ව වගේ තරුණ පිරිස් බොහෝයි. පරිසරයේ නිහඩ තාවය බින්ද ඔවුන් මතෙහි ගැලෙමින් ගී කියමින් විනොද වුනා. කිසියම් දෙයක සීමාවක් තිබිය යුතුයි. නමුත් ඒ සීමා ඉක්මවා යමින් ඔවුන් හිස් බෝතල් ගල්පර වල ගසා කුඩුකර තිබ්බා. සීතල දියපහරේ සුන්දරත්වය විනාශ වෙලා ගිහින් තිබ්බා.

තවත් ගොඩක් ඡායාරූප තිබ්බා. පෝස්ට් කරන්න තියන අපහසුව හන්දා ටිකක් විතරක් දැනට දෙන්නම්.

සෝම සද බැසගොස් සය වස් ගෙවී ගියා.....

noreply@blogger.com (Achira) — Mon, 14 Dec 2009 04:46:00 +0000

දේශයට මහා ශක්තියක් වූ සෝම හිමියන් අපවත් වී ඊයේට වසර හයක් ගෙවී ගියා. ඒත් ඒ දිනය අද ඊයේ මෙන් අපට මතකයි. සෝම හාමුදුරුවන් බලාපොරොත්තුවූ ඒ දේශය ගොඩනංවන්නට අපි හැමෝම කැපවිය යුතුයි.

මේවන විට සෝම හිමියන් පිළිබද වෙබ් අඩවියක් නිර්මානය වී තිබෙනවා. මෙහි සෝම හිමියන්ගේ ජීවිත කතාව, පින්තූර, උන් වහන්සේගේ බණ, අපවත්වීම පිළිබද අප නොදත් දේ අඩංගුයි. පහත සබැදියෙන් එම අඩවිය‍ට පිවිසෙන්න.වෙබ් අඩවිය ගැන තොරතුරු ලබා දුන් ශර්ධාට පිං.

http://somathera.shutterfly.com/

මේ සිරිපා කරු‍ණා කරන සමයයි

noreply@blogger.com (Achira) — Fri, 11 Dec 2009 03:57:00 +0000

එළඹුනු උදුවප් පොහෝ දිනයෙන් සිරිපා කරුණාව ආරම්භ විය. මෙවර ශ්‍රීපාද වන්දනා සමය ආරම්භ කිරීමේ චාරිත්‍රානුකූල පෙරහර නොවැමබර් 30 වැනිදා පැවැත්විනි. පැල්මඩුල්ල ගල්පොත්තාවෙල ශ්‍රීපාද රාජමහා විහාරස්ථානයේ තැන්පත් කැර තිබු සමන් දේව ප්‍රතිමා සහ දේවාභරණ වැඩම කරවීම මෙහිදී සිදුකෙරිනි.

අනිත් හැම වරකදීම මෙවරද සිරිපා කරුණා කරන්නන් මත්පැන් දුම්වැටි සහ පොලිතීන් භාවිතය අත්හැරීමට කාරුණික වන්න.

Buddhist Phone - ආගම විකුණා මුදල් සෙවීම

noreply@blogger.com (Achira) — Fri, 20 Nov 2009 08:24:00 +0000

මේ මට ආපු විද්‍යුත් ලිපියක්. ඒ ලිපිය කොපි කරල මම ඒ විදිහටම දානවා. මේ බුදුන්වහන්සේගෙ ධර්මය විකුණන ආකාරයන්. හැබැයි හදන්නෙ කොහෙද නිර්මාපකය කවුද කියල සදහන් වුනේ නෑ. මේවාට අපි ගන්නා ක්‍රියා මාර්ග මොනවාද?

අනුරාධපුරයේ රාත්‍රියක්

noreply@blogger.com (Achira) — Tue, 10 Nov 2009 09:13:00 +0000

පසුගිය දවසක හදිස්සියේම අනුරාධපුරය නරඹන්න චාරිකාවක් ගියා. ටික දවසකින් ගියෙ නැති හන්ද ගමන ගැන ප්‍රබෝධයක් හැමෝගෙම හිතේ තිබ්බා. නිතරම යන්නෙ දහවල් කාලෙම හන්ද මේ ගමන රෑට ඇවිදින්න තීරනය කරගෙනයි හිටියෙ. උදේ වරුවෙ මිහින්තලේ ගිය අපි එහි ඇති නැවුම් අසිරිය විද ගත්තා. ඉස්සර වගේ නෙමෙයි දැන් මිහින්තලේ. ඇත්ත‍ටම ලස්සනයි. ගිණි රස්නෙ වෙලාවෙ වුනත් අරලිය ගස් හන්දහොද සිසිලසක් තිබ්බා. ලේන්නු දඩුලේන්නු ගොඩක් නිදහසේ හැසිරෙමින් හිටියා. මේ දැහැන බිදින්න රිලව් විශාල ප්‍රමාණයක් හිටියා. මම මිහින්තලේ දැක්ක සුවිශේෂම දෙය තමයි කාගෙවත් හිත රිද්දන්නෙ නැතුව හිතට දැනෙන්න ලියල තිබ්බ පුවරුව. ඔබත් කියවල බලන්න

ඊට පස්සෙ හවස නිස්කලංක වෙලාවක ශ්‍රී මහා බෝධියයි රුවන්වැලි සෑයයි බලන්න ගියා. අපේ ගමන තිබ්බෙ සතියෙ දවස් වල හන්දා ගොඩක් සෙනග හිටියෙ නෑ. හිතේ හැටියට ශ්‍රී මහා බෝධිය වැද පුදා ගත්තා. රුවන්වැලි මහා සෑය විදුලි ආලෝකය මධ්‍යයේ කොච්චර ලස්සනද? ජේතවන විහාරයත් ඒ වගේම ලස්සනයි. මම වෘත්තිය ඡායාරූප ශිල්පියෙක් නොවන නිසා මට පුළුවන් හොදීන් ඡාය‍රූප කීපයක් ගත්තා. පේතවන විහාරයේ මට ඊමේල් එකකින් හම්බවෙච්ච ඡායාරූප ටිකක් මේ සමග ඇති. බුද්ධාලම්බන ප්‍රීතිය ඇතිවෙන්න සිත් පහන් වෙන්න ඔබත් රාත්‍රියකදී අනුරාධපුරයේ කරුණා කරන්න.

වස් විසීම සහ කඨින චීවර පුජාව

noreply@blogger.com (Achira) — Wed, 04 Nov 2009 10:18:00 +0000

වප් පොහොය ගෙවී ගියා. මේ පොහොයේ ඇති වැදගත් කමක්වෙන්නෙ භික්ෂුන්වහන්සේගේ වස් පවාරණය මෙම පොහොය දිනට ප්‍රථමයෙන් සිදුකල යුතුවීමයි. ඒ සමගම තවත් කතා බහට ලක්වෙන දෙයක් තමයි කඨින චීවරය. මේවා ගැන බුදුසරණ පත්තරයෙ පල වෙච්ච ලිපියක් මම ඉදිරිපත් කරනවා. මේ ලිපිය ලියල තියෙන්නෙ දඩපලගමුව, දුනුමඩලාගල විහාරයේ මොරගොල්ලේ නන්දරතන හාමුදුරුවො. මෙන්න ඒ වටිනා කියන ලිපිය.

නාගිතාපදානය දෙස විමසා බලන විට කඨිනයේ අනුසස් කොතරම් ද යනු සිතා ගත හැකි ය. නාගිත හිමියන් පෙර ආත්මයක දී කඨිනයක් පූජා කර, එම ශ්‍රේෂ්ඨ කුසලය අර්හත් මාර්ග ඤාණයට උපනිශ්‍රය වේවා, යි ප්‍ර‍්‍රාර්ථනා කර ඇත. එතැන් පටන් සතර අපායේ නොඉපිද, දෙව් ලොව සහ මිනිස් ලොව ඉපිද දිව්‍ය මනුෂ්‍ය සම්පත් අත් විඳ ඒහි භික්‍ෂු භාවයෙන් සිවු පිළිසිඹියා පත් මහ රහත් බව ට නාගිත හිමියෝ පැමිණියහ.

අනුජානාමි භික්ඛවේ වස්සානෙ වස්සං උපගන්තුං” යනුවෙන් මහාවග්ග පාලියේ දැක්වෙන දේශනා පාඨය තුළින් භාග්‍යවතුන් වහන්සේ විසින් උපසපන් භික්‍ෂූන් වහන්සේට වස් සමාදන් වීම අනුදැන වදාළහ.

මහණනි, වස්සාන කාලයෙහි වස් විසීමට අවසර දෙමි. මහණනි, පෙර වස් එළඹීම පසු වස් එළඹීම යැයි වස් එළඹීම් දෙකකි. ඇසළ අව පෑළවිය දිනයෙහි පෙර වස් එළඹිය යුතුය. නිකිණි අව පෑළවිය දිනයෙහි පසු වස් එළඹිය යුතුය.

තථාගතයන් වහන්සේගේ අවසරයෙන් පසු සෑම වසරකම ඇසළ අව පෑළවියදා වස් එළඹීම භික්‍ෂූන් වහන්සේගේ චාරිත්‍රය විය. රෝගාබාධයක් හෝ උපද්‍රවයක් හේතුවෙන් එම දිනය මග හැරී ගිය හොත් නිකිණි අව පෑළවියදා වස් විසීමට අවසර තිබේ. පසු වස් විසූ භික්‍ෂුවකට කඨිනයක් ලෙස චීවරයක් භාර ගැනීමට අවසර නැත. පෙර වස් සමාදන්ව මහා පවාරණයෙන් වස් පවාරණය කළ භික්ෂුවකට කඨිනය පිළිගැනීමේ අවසරය තිබේ.

ශාසනය ආරක්ෂා වීමටත්, ගුණ ධර්ම වර්ධනයටත් භික්‍ෂූන් වහන්සේ හා ගිහියා අතර මනා අවබෝධයක් සම්බන්ධතාවයක් තිබිය යුතුය.

මෙම අන්‍යෝන්‍ය සම්බන්ධතාව ගොඩනැගෙන කාලය වස්සාන සමය බව ගිහියා විසින් භික්‍ෂූන් වහන්සේට වස් එළඹෙන ලෙස දැහැත් ගොටුවක් දී කරන සැදැහැවත් ආරාධනය තුළින් මනාව පැහැදිලි වෙයි.

සැදැහැති ගිහියාගේ ආරාධනය පිළිගන්නා භික්‍ෂූන් වහන්සේට දායක පින්වතුන් විසින් සිව් පසයෙන් සිය යුතුකම් හා වගකීම් ඉටු කරනු ලැබේ. භික්‍ෂූන් වහන්සේ විසින් ද මේ කාලයේ විශේෂයෙන් ගිහි පින්වතුන්ගේ උභය ලෝකාර්ථය පිණිස අවවාද අනුශාසනා කරනු ලැබේ.

භික්‍ෂූන් වහන්සේ ද දහම් මෙනෙහි කරමින්, පිළිවෙත් ප්‍රගුණ කරමින් විනයානුකූලව භික්‍ෂු ජීවිතය පවත්වාගනිමින්, විමුක්තිය සඳහා කුසල් දහම්හි නිරත වෙති. මෙයින් හොඳින් පැහැදිලි වන දෙය නම්, ගිහි පැවිදි දෙපක්ෂයම එක්ව පින් සිදු කර ගැනීමට කුසල් දහම්හි වැඩියෙන්ම නිරත වන කාලය වස්සාන කාලය බවයි. දෙලෝ සුව කැමැති සැදැහැවත් බෞද්ධයෝ මේ මහා පින්කමට වැඩි උනන්දුවක් දක්වති. මෙලෙස ඇරැඹෙන වස්සාන කාලය ගෙවී ගොස් උදා වන පොහෝ දිනය ‘වප් පෝය’ ලෙස ශාසන ඉතිහාසයේ සඳහන් වෙයි.

මෙලෙස වස් සාර මාසයේ අන්තිම මාසය, ‘කඨින චීවර මාසය’ ලෙස ව්‍යවහාර කරනු ලැබේ. විනය පරිවාර පාලියේ ඒ ගැන මෙසේ දැක්වෙයි

කඨිනස්ස අන්තාර මාංසා ජානිතබ්බොති,
වස්සානස්ස පච්ඡිමො මාසො ජානිතබ්බො’.

වස්සාන සෘතුවේ අවසාන මාසය චීවර මාසය ලෙස දැන ගත යුතුයැයි එහි සඳහන් වෙයි.

වස් එළඹ මහා පවාරණයෙන් පවාරණය කළ භික්ෂූන් වහන්සේට පූජා කරන චීවරය, කඨින චීවරය ලෙස සැලකෙයි. භික්ෂූන් වහන්සේගේ පරිෂ්කාර වන දෙපට සිවුර, තනිපට සිවුර අඳනය යන මින් එකක් කඨින වශයෙන් පිදිය හැකිය. වසරකට එක් වරක් එක් තැනකදී එකක් පමණක් පූජා කළ හැකි පරිෂ්කාරය ද කඨින චීවරයයි.

විශේෂිත නමකින් හඳුන්වන මෙම චීවර පූජාව, බල සම්පන්න උතුම් ගරු කුසල කර්මයක් බව, මෙම ගාථාව තුළින් පැහැදිලි වෙයි.

පඨවිරිව න ජාතු කම්පංත
න චලති මෙරු රිවාති වායුනා
වජිර මීව හිජ්ජතෙ ඝනං
තමිධමතො කඨිනසන්ති මුච්චති

මහ පොළොව මෙන් කිසි විට කම්පා නොවන මහා මේරු පර්වතය මෙන් නොසෙල්වෙන, එක් ඝන වජ්ජ පර්වතය මෙන් නොබිඳෙන ඵල ඇති මහා පුණ්‍ය කර්මයකි.

යමෙකු අතින් පස් පව් දස අකුසල් සිදු වේද එම ඇතැම් අකුසල්වල බලය මැඩලන ශක්තියක්-බලයක් ඔහු විසින් සිදු කරන කඨින පූජාව තුළ තිබෙන බව කඨිනය යන වචනය විග්‍රහ කර බලන කල්හි පැහැදිලි වෙයි. නොබිඳිය හැකි, සිදුරු කළ නොහැකි, තද , සෘජු කුසලය ‘කඨිනය’ බව දේශනාවේ අන්තර්ගත වෙයි. කඨින කුසල කර්මය තුළින් වැළැක්වීමට නොහැකි අකුසල කර්ම වන්නේ, පංච ආනන්තර්ය අකුසල කර්ම පමණකි.

මෙම ආකාරයට කඨින ගැන විස්තර වුවද යමෙකුට කඨිනයක් ලෙස ඉහත දැක්වූ අයුරු සිවුරක් පූජා කර ගැනීමට නොහැකි තත්ත්වයක් තිබුණොත් කඨිනයක් සඟ සතු කර පූජා කරන අවස්ථාවක ඒ සමග යමක් පූජා කළ විට ඔහුට ද කඨිනයක් පූජා කළ පිනම ලැබෙන බව බණ පොතේ සඳහන් වෙයි.

සාකේත නුවර වස් එළඹ මහා පාවාරණයෙන් පවාරණය කර බුදුරදුන් දකිනු කැමැතිව, සැවැත් නුවර දෙව්රම් වෙහෙරට තිස් නමක් පමණ භික්‍ෂූන් වහන්සේ වැඩම කරද්දී අතරමඟදී වැස්සට තෙමුණු නිසා දියෙන් තෙත් වූ සිවුරු වලින් යුතුව බුදුරදුන් වෙත පැමිණියහ. භික්‍ෂූන්ට සිදුවූ එම කරදරය ගැන සලකා භික්‍ෂූන්ට කඨිනය ඇතිරීමට අනුදැන වදාළහ.

‘අනුජානාමි භික්ඛවේ වස්සං වුතරානං භික්ඛුනං කඨිනං අත්තරිතුං’ එතැන් සිට භික්‍ෂූන් වහන්සේට කඨිනය පරිභෝග කිරීමට අවස්ථාව උදාවිය.

මේ මහා පුණ්‍ය කර්මයේ ප්‍රතිඵල ගිහි පැවිදි දෙපක්ෂයටම ලැබෙන බව ධර්මයෙහි විස්තර සහිතව දක්වා තිබේ.

කිරිබත්ගොඩ ඤානානන්ද හාමුදුරුවන්ගේ තවත් ඉ- පොත්

noreply@blogger.com (Achira) — Tue, 15 Sep 2009 04:32:00 +0000

බෞද්ධ පොත්පත් ඔබට

noreply@blogger.com (Achira) — Thu, 10 Sep 2009 05:56:00 +0000

කිරිබත්ගොඩ ඤානානන්ද හාමුදුරුවන්ගෙ මහමෙව්නා දහම් අඩවියට වසර දහයක් පිරිල. මහමෙව්නාවෙ වෙබ් අඩවියත් දැන් අළුත්වෙලා. ඒකෙ දහම් ආකරයක් තියනවා. කිරිබත්ගොඩ හාමුදුරුවන්ගෙ පොත්පත් දැන් මෙම අඩවියෙන් බාගත කරගන්න පුළුවන්. ත්‍රිපිටකය විතරක් නෙමෙයි, තව ගොඩක් දහම් කරුණු සිංහලෙන්ම ඔබට ලබාගන්න පුළුවන්. මේ සමග කිරිබත්ගොඩ හාමුදුරුවන්ගෙ පොත් ටිකක සබැදියන් කිහිපයක් ඇති.

http://www.tipitaka.mahamevna.org/

http://www.mahamevna.org/sinhala_index.htm

තවත්පොත් පසුව බලාපොරොත්තුවන්න..

සිංහල වෙදකම සහ බුදුදහම

noreply@blogger.com (Achira) — Thu, 27 Aug 2009 18:08:00 +0000

අපි ඉතින් තුන්වන පාන්තිකයො හන්දා ගමන් බිමන් හුගක් වෙලාවට සිද්ධවෙන්නෙ බස් වලිනුයි කෝච්චි වලිනුයි. මේවායෙ ගමන් කරනකොට වෙන අනතුරු ආපදා එමටයි. ඉතින් ඔය අතක පයක අමාරුවක් ආවහම මම ගොඩක් වෙලාවට කරන්නෙ සිංහල බෙහෙත් තමයි. ආයෙත් සුපුරුදු පරිදි එහෙම ආපු අමාරුවකට බේත් ගන්න වෙද හාමිනේ කෙනෙක් ලග‍ට ගියා. අනිත් තැන් වලට වඩා එතන මම වෙනසක් දැක්කා. ඒක හන්ද අද කතා කරන්න යන්නෙ බුදු දහම එක්ක ගමන් කරන තවත් වෙනස් මාතෘකාවක්. වෙදකම. දීර්ඝ විදිහට කියනවනම් සිංහල වෙදකම එක්ක බුදුදහමේ තියන සම්බන්ධතාවය.

අපේ සිංහල වෙදකම අවුරුදු දහස් ගනණක් පැරණියි. ඒවා රාම රාවන අතීත කතා දක්වාම දිවෙනවා. බුදුන් වහන්සෙත් වෙදකම ගැන ලෝකයාට කියල දීල තියනවා. අර කුෂ්ඨ රෝගයක් හැදිච්ච පූතිගත්තතිස්ස තෙරුන් වහන්සේගේ කතා වස්තුවෙන් ඒ බව පැහැදිලි වෙනවා.

බුදුදහමයි වෙදකමයි එකිනෙක සම්බන්ධ වෙන තැන් අපේ ඉතිහාසෙ ඕනෙ තරම්. බුද්ධදාස රජ්ජුරුවො රටේ පාළකයා වගේම රටේ අග්‍ර වෛද්‍යවරයා බවට පත්වෙලා හිටියා. ඒ බුද්ධදාස පරම්පරාවෙන් පැවත එන පාරම්පරික වෙද මහත්වරු (ඇත්තටම වචනයේ පරිසමාප්ත අර්ථයෙන්ම මහත්වරු) අදටත් අපි අතර ඉන්නවා. ඒ අතර සිංහල වෙදකම ගැන පොතින් විතරක් ඉගන ගෙන බෝඩ් ගහගෙන බඩගෝස්තරවාදීව බෙහෙත් කරන වෛද්‍යවරුත් අපි අතර ඕනා තරම් ඉන්නවා.

ඉස්සර ඉදන්ම අපේ වෙදමහත්තුරු බොහොමයක් තමන්ගෙ වෙද පරම්පරාවෙ රහස් මෙන්ම පරම්පරාව රැකගත්තෙ කවි ගාථා ශ්ලෝක වලින් වන පොත් කරල. ලේඛන කලාව දියුණු වෙනකොට සහ පරම්පරාව ඉදිරියට නොයන කොට ඒ වෙද විස්තර පුස්කොළ පොත්වල ලියන්න පටන් ගත්තා. මේ හැම දේටම බුදු දහම මෙන්ම බොදු සිරිත් විරිත් මූලික වුනා. ඒකයි වෙදකම පන්සල් තුලම වර්ධනය වුනේ.

මීට අවුරුදු දහයකට විතර කලින් මට වෙද මහත්තයෙක් මුන ගැහුනා බුලත් කොලේ දිහා බලලා ලෙ‍ඩේ විස්තර ඔක්කොම කියන. තත්කාලය නාඩි ශාස්ත්‍රය ගැන විශාරදයෙක්. නම් ගම් බෝඩ්ගහගෙන බෙහෙත් ‍දෙන කෙනෙක් නෙමෙයි. වෙන එකක් තියා අල්ලපු ගෙදර මනුසුසයා දන්නෙ නෑ තමන්ගෙ අල්ලපු වැටේ ඉන්නෙ වෙද මහත්තයෙක් කියල. අපි බුලත් අතක් දුන්නහම මේ වෙද මහත්තය එකපාරටම සංස්කෘතින ශ්ලෝකයක් කියනවා. ඊට පස්සෙ පිරිත් කිය කිය ඉන්නෙ. බෙහෙත් නියම කරනකොට ඒ බෙහෙත් තීරණය වෙන්නෙ මුලින් කියපු ශ්ලෝකය මත.

මම දැකපු ගොඩක් වෙද මහත්වරු ලෙඩාට තෙල් හො වෙනත් ප්‍රතිකර්මයක් කරන කොට පිරිත් කියනවා. සමහර වෙලාවට ඒක තමන්ට විශේෂ වෙච්ච ගාථාවක් හරි ශ්ලෝකයක් හරි. ඒ වගේම බුදු ගුණ වලින් ලෙඩුන් සුවපත් කරන පුද්ගලයන් හාමුදුරුවන් වහන්සේලා ගැන අපි නොයෙක්විට කතා බහ කරනවා. සමහර වෙලාවට 100%ක් ඇත්ත නොවුනත් කිසියම් සත්‍යයතාවයක් තියෙන්න පුළුවන්.

මම බෙහෙත් ගන්න ගිය වෙද හාමිනේ පෝය දවසටත් සිකුරාද හවස් වරුවෙත් බෙහෙත් කරන්නෙ නෑ. ඒ සිකුරාදා පල්ලි යන්න තියන නිසා. ඇත්තටම ඇය ක‍තෝලික ආගමේ. බෙහෙත් ගන්න කලින් සතියෙ ඇය දවස් තුනක් මඩුපල්ලි ගිහින් තිබුනා. ඇය තුවාල අතකට තෙල් තවරන කොට මොනවදෝ මතුරනවා මම දැක්කා. මගේ හිතේ පුංචි නෙමෙයි ලොකු කුතුහලයක් පැන නැංගා. මම ඇයට බුලත් කොළයත් එක්ක පඩුරු දෙන විට ඇය කරුණා බරව මට පැවසුවේ සුවපත්වේවා කියලයි. බෙහෙත් තෙල් ගානවිට ඇය මුමුනන්නේ කුමක්දැයි මට ඇසුනා. මගේ කුතුහලයට මම තිත තැබුවා. අනේක ජාති සංසාරං....... ඉදල බුදුගුණ සියල්ල ඇය කැටි කොට පැවසුවා.... ඒ බුදු ගුණ බලයෙන් මගේ ඇගේ ඇති සියළුම අස්ථි නහර මස් වල ලෙඩ රෝග නිවාරණය වන්නට ඇය ප්‍රාර්ථනා කලා.

බුදු දහමත් වෙදකමත් අතර සම්බන්ධය හොදින් පැහැදිලි වුනා...

පිරිත් සහ පාළි

noreply@blogger.com (Achira) — Mon, 17 Aug 2009 11:49:00 +0000

පහුගිය කාලෙම කිසිම බ්ලොග් එකකට සටහනක් ලියාගන්න බැරුවයි හිටියෙ. ඒ තරම් වැඩ වැඩියි. පසුගිය සතියෙ ආයෙත් වතාවක් බුදුන් වැඩහිටි දේශය‍ට (රාජකාරි) යන්න හම්බ වුනා. ඒ ගිය විස්තර පස්සෙ කියන්නම්. කාලෙකට පස්සෙ වැදගත්වෙන මාතෘකාවක් කතා කරන්න හිතුවා. ඒ තමයි නිතරම ඇහෙන පිරිත් ගැන.

ඕනැම රූපවාහිනි වේවා ගුවන් විදුලි වේවා නාලිකාවක් තමන්ගේ දවසේ වැඩ කටයුතු ආරම්භ කරන්නෙ පිරිත් දේශණාවකින් පසුවයි. පන්සල් විහාර වල හිමිදිරි උදයේ පිරිත් සජ්ජායනාවන් ඇසෙන්නට කටයුතු යොදා තියනවා. ඇත්තෙන්ම මේ පිරිත් මෙහෙම අහන්නට වි‍ශේෂ හේතුවක් තියනවා. ඒ මේ පිරිත් වල විශාල බලයක් ගැබ්වෙලා තියන හන්දයි.

පිරිතක් කියන්න කලින් වතුර කළයක් පිරිත් මණ්ඩප්පය ඇතුලෙ තියනවා. අපි ඒ වතුර තමයි පිරිත් පැන් හැටියට පිරිත අවසානයේ පානය කරන්නෙ. පිරිත් සඣ්ඣායනාව අවසානයේ ඔය කළයේ ඇති පැන් උතුරා යා යුතුයි කියල මතයක් අප අතර තියෙනවා. බොහෝ අවස්ථාවල එසේ සිදුවනවා මම දැකල තියනවා. පිරිතක් කියන කොට ඇතිවන ශබ්ද තරංග කළයේ ඇති ජල අණු සමග අනුනාද වෙලා ජල අණු ප්‍රසාරනය විමක් මෙතනදි සිද්ධ වෙනවා. (හරියටම වෙන්නෙ මේ වගේ දෙයක් වුනාට මම පාවිච්චි කරල තියන වචන නම් හරිද මන්දා. මොකද දැන් උසස් පෙළ ඉවරකරල අවුරුදු ගානක් වෙනවා. ලොජික් ඔළුවෙ තිබ්බට වචන මතක නෑනෙ ) ඔය මොකක් හරි කොහොම හරි එහෙම වෙනවා.ඉතින් ඒ පිරිත් පැන් වලත් සාමාන්‍යය ජලයට වඩා වැඩි ශක්තියක් තියනවා. පිරිත් නූල් ගැන නම් මට විද්‍යාත්මකව පහදන්න අමාරුයි. (මොකද මම ඒ ගැන හරියට දන්නෙ නැති හන්ද)

ඉතින් මම මේ කියන්න යන්නෙ මෙච්චර බලයක් තියන පිරිත් ඇයි අපිට තේරෙන්නෙ නැත්තෙ. මූලිකම හේතුව තමයි පිරිත් තියෙන්නෙ සිංහලෙන් නොවීම. පිරිත් විතරක් නෙමෙයි. අඩුම තරමෙ පන්සිල් වත් සිංහලෙන් නෑ. පොඩිකාලෙ ඉදන් දන්න හන්ද ඔහේ කියවනවා. හැමෝම පාලි සංස්කෘත දන්නෙ නැති හන්ද ඊට වඩා අඩු මට්ටමක් සලකල බලමු. දහම් පාසලේ පාලි උගන්වන්න පටන් ගන්නෙ හය වසරෙදි විතර (ඒ කාලෙ. දැන්නම් දන්නෙ නෑ) අවසාන විභාගෙ වෙනකොටත් යන්තම් පාළි පාඨයක් සිංහලයට පෙරල ගන්න පුළුවන්. හැබැයි ඒකත් අමාරුයි.

ඔය විදිහට අපි බුදුදහම ගැන හිතුවොත් මුළු බුදුදහමම තියෙන්නෙ පාලියෙන්. එතකොට සූත්‍ර පිටකය අභිධර්ම පිටකය විනය පිටකය වගේ බුදුදහමේ මූලික අවස්ථාවන් පරිවර්තනය කරන්න ගියොත් කොච්චර කාළයක් ගතවෙයිද? කියන ප්‍රශ්නෙ අපිට එනවා. අනෙක පරිවර්තනයක් ගත්තොත් පුද්ගලයාගෙන් පුද්ගලයාට පරිවර්තන හැකියාව වෙනස්. එකම පොතක පරිවර්තන දෙකක් ගත්තොත් එක විදිහ‍ට නෑනෙ. මක්සිම් ගෝර්කිගෙ අම්මා පොතේ පරිවර්තන දෙකක් මම කියවලා තියනවා. සමහර අවස්ථාවල අවස්ථාවට දීපු අර්ථකතනත් වෙනස්.

පාලි කියන තනි භාෂාවෙන් පරිවර්තනය වුනත් වෙන්නෙ ඔය හා සමාන දෙයක්. බුදුන් වහන්සේ දේශනා කරපු නිර්මල බුදු දහම විනාශ වෙන්න පටන් ගන්න එක තමයි වෙන්නෙ. ඔය විදිහට පරිවර්තනය කරපු පිරිත් දේශණාවක ශබ්ද ශක්තිය අඩංගු වෙයිද?

ඔය මේ ප්‍රශ්නෙ එක පැත්තක්. කාට හරි කියන්න පුළුවන් ඇයි අපි නොදන්න දෙයක් විස්වාස කරන්නෙ කියල. ඇත්ත. හැම දේම සිංහල හුරුවට හදාගන්න අපිට මේක හරිම ප්‍රශ්නයක්. මොනව කරන්නද? විසදුමක් අවශ්‍යයි තමා. ඒක හන්දා පසුගිය කාලෙ අපේ විද්වතුන් පිරිසත් මේ වෙනුවෙන් කතිකාවතක් ගොඩනල තිබ්බා. මෙතනදි මම ඉදිරිපත් කරන‍්නෙ මගෙ පුද්ගලික මතයයි. නොහොත් මට හරි යයි හැගෙන දෙයයි. අවුරුදු සිය ගානක් තිස්සෙ අපි පාවිච්චි කරන රෝම ලන්දේසි නීතිය ගැන දන්නෙ නීතිඥයො විතරයි. අදටත් ඒ ගැන තියන සම්මුතියක් (Agreement) එකක් කියවන්න අපිට පුළුවන්ද? හුගක් ඒවා තියෙන්නෙ රෝම භාෂාවෙන්. ඉතින් මේ අවස්ථා දෙකම එකක් හැටියට අරගෙන පිරිත් පාලිවලින් ඇති එක සාධාරණිකරනය කරන්න පුළුවන් නේද?

මෙතනදි ඔයගොල්ලන්ට මේක වැරදියි කියල හිතෙනවනම් ඔයගොල්ලන්ගෙ අදහස ගොනුකරන්න. මේ බ්ලොග් සටහන විසිඑක් වන සියවසේ බුද්ධිමත් බෞද්ධයන් වෙනුවෙන්.

Something to think about...

noreply@blogger.com (Achira) — Tue, 21 Jul 2009 06:23:00 +0000

I got this post from an email that sent one of my friend.

For a fashion model who has spent years in the industry,Kohinoor Singh becoming a make-up artist, or photographer would hardly be out-of-this-world.
Becoming a monk however is a completely different cosmic matter.

In a move that gave rise to a combination of shock, dismay, disbelief and admiration in Nepal, one of the Himalayan country's top models, Kohinoor Singh, recently decided to shave her head, discard her make-up, and adorn the drab garb of a Buddhist monk.

Gone is the life of catwalks, photo shoots, sexy bikinis, and glamour-what remains behind is an 'Ani'(monk) smiling pleasantly at the thought of the future.

"For me there are no changes at all, because I have always been like this," she declared recently in an interview on Cybersansar.com, a Nepali website.

"People notice this sudden transition because they have always portrayed me according to my outer looks."

Kohinoor as Ani Lhosang Dolma Kohinoor Singh, now Ani Lhosang Dolma, carved out a name for her self in the small but quickly growing modelling world of Nepal since she was 15 years old with her catwalk shows, brand endorsing ads, TV show hosting and music video hits.

She particularly shot into prominence through her music videos made by Music Nepal .

In 2002 she was credited with giving Cybernepal.com, a major Nepali site for the local cinema and the music industry, a major fillip to its rating.

"After we put the blow ups of Kohinoor Singh," said Abhinav Kasaju founder of the site, "the number of visitors to the site doubled."

"Kohinoor is sensational. She's a unique blend of innocence and sexuality, "declared the Kathmandu Post who rated her one of the "Top 5 models in Nepal " in February this year.

But that has now all changed, overnight. "To be peaceful and happy," she continues, "one needs to be content with whatever one has and I am following this passage."

It was a dream long since planted in her mind ever since as a little girl she encountered a woman monk always calm and smiling in a Swayambu (temple mound)..

A strong spiritual experience in that very same Swayambu years later, some deep soul searching, and Ani was born. "I am ready to cope with anything now, even hunger and thirst. I believe it is desire that leads to expectations and eventually chaos."

In a nation where Buddhism was born, it won't be long then, that from being admired on stage, Ani will be elevated to a young guru of sorts. For now she has broken several hearts and extracted many a sigh even though, as one fan puts it, she has moved from being "a pretty model to one beautiful nun!"

----------
රූපයේ ඇති නිස්සාර ස්වභාවය වටහා ගත් ඇය නිවැරදි මග ගමන් ආරම්භ කලාය. ඒ බුදුන් උපන් රටේ බුදුදහමට ලැබෙන ගෞරවයයි. විද්‍යුත් ලිපියකින් උපුටා ගනු ලැබූවක් හෙයින් නිරවද්‍යතාවය පිළිබද 100% ක් එකග විය නොහැක.

කර්මය සහ ඵලය

noreply@blogger.com (Achira) — Sun, 05 Jul 2009 03:24:00 +0000

පසුගිය සතියෙ මගෙ මිතුරියක් වන ශර්ධා ඉතාම හොද සහ බැරෑරුම් විද්‍යුත් ලිපියක් අපිට එවල තිබ්බා. පිටු 15න විතර දිග ඒ ලිපිය අද මම පළකරන්නයි යන්නෙ. ලිපියෙ කර්මය සහ විපාකය ගැන සිංහල සහ ඉංග්‍රීසි මාධ්‍යයයෙනුත් තියනවා. ඒක ගොඩක් අයට පහසුවෙයි. මේ ලිපිය එව්වාට ශර්ධා සහෝදරියට පිං.

බුදුදහමද බුද්ධාගමද?

noreply@blogger.com (Achira) — Tue, 23 Jun 2009 08:59:00 +0000

වර්තමානයේ උපදින දරුවෙකුගේ ආගම තීරණය වන්නේ කෙසේද යන්න අප ඔබෙන් විමසුවොත් ඔබ වැඩිදෙනෙකුගේ පිළිතුර වන්නේ උපදින දරුවාගේ දෙමව්පියන්ගේ ආගම මත බවයි. ඇත්ත වශයෙන්ම එය බෙහෝදුරට සත්‍යය කියමනකි. දරුවගේ දෙමව්පියන් බෞද්ධ නම් එම දරුවා බෞද්ධයෙකුවන අතර ඉස්ලාම් දෙමාපියන්ගේ සහ ක්‍රිස්තියානි දෙමව්පියව්ගේ දරුවෝ ඒ ඒ ආගම්වල වෙත්. පසු නාලීනව විවිධ හේතු සහ බලපෑම් මත සිංහල බෞද්ධ දරුවෝ සමහරක් තම මව්පියන්ගෙන් දායාද ලෙස ලැබූ ආගම වෙනස් කරති.

මා අද සාකච්ඡා කරන්න යන්නේ මේ ප්‍රවනතාවය නොවේ. මාතෘකාවට ප්‍රවේශයක් ලෙස මේ සටහන යොදාගනිමි. බෞද්ධ අපි බොහෝ දෙනෙකු‍ගේ උප්පැන්න සහතිකයේ ආගම ලෙස දැක්වෙන්නේ කුමක්ද? බෞද්ධ ලෙසද? නැත්නම් බුද්ධාගම ලෙසද? ළදරු පාසල් අවධියේ සිට රැකියාවක් කරන කාළය දක්වාම අපි අපගේ ආගම ලෙස විවිධ පෝරම, ජීව දත්ත පත්‍රවල පුරවන්නේ කුමක්ද? ආගම = බුද්ධාගම. කිසිවෙකු අපෙන් විමසුවොත් ඔබේ ආගම කුමක්ද කියා ඔබගේ පිළිතුර වන්නේ බුද්ධාගම නොවේද?

සැබවින්ම බුද්ධාගම ආගමක්ද? රජයේ පෙළපොත් වල මුද්‍රණය කර ඇති ආකාරය නිසා එසේ ආගමක් තිබේ යයි ඕනෑම කෙනෙකුට තර්ක කළ හැකිය. ආගමකින් සිදුවන්නේ මිනිසුන් යහමගට ගෙන සුචරිතවාදීන් කිරීමයි. එසේ මිනිසුන් යහමගට ගැනීමට විවිධ ආගම් වල විවිධ යාන්ත්‍රන තිබේ. සමූහ ලෙස පල්ලි වලට යාමල නිරාහාරව සිටීම මගින් වතාවත් කිරීම වැනි දෑ තුලින් විවිධ ආගම් කම අදහන්නවුන් ආගමට ඇද බැද තබාගනී.

නමුත් බුද්ධාගම වනාහී මා සිතන ආකාරයට ආගමක් නොවේ. එය දර්ශණයකි. කිසිවෙකුටත් බුදුදහම තුළ නීති රීති නැත. අනිවාර්යය පිළිපැදීම් නැත. පෝයකට හෝ පන්සල් යායුතුය නොයායුතුය කියා නියමයන් නැත. කැමතිනම් බෞද්ධ දර්ශනය තේරුම්ගෙන පිළිපැදිය හැක. කාගේවත් බළපෑමක් නැත. බුදුන්වහන්සේ ප්‍රකාශකලේ “ඒහි පස්සිකෝ” (එව බලව) යනුවෙන් පමණි. අන්ධ විශ්වාසයෙන් ආගමක් අදහනවාට වඩා අවබෝධයෙන් යහපත් දර්ශනයක් හැදෑරීමෙන් මිනිසා හික්මවාගත හැකිය.

බුද්ධාගම යන වචනය බුද්ධ + ආගම සන්ධිවීමෙන් තැනුනකි. මගේ මතය බුදුදහම ආගමක් නොව දර්ශනයක් බවයි. Buddha’s way is path to freedom. “බුද්ධාගම ඇදහු පමනින් හා උප්පැන්න සහතිකයේ තිබූ පමණින් මිනිසුන් හට නිවනට යා නොහැකිය. බුදුන්වහන්සේගේ ධර්මය එසේත් නැතිනම් මාර්ගය (බුදුමග , බුද්ධ + ධර්මය) අවබෝධයෙන් පිළිපැදීමෙන් නිවන ලගාකරගත හැකිය. බුද්ධාගම යන වදන බෞද්ධ පාරිභාශිතයෙන් ඉවත් කළයුතු කාළය එළඹ ඇත. ඒ සදහා වඩාත් නිවැරදි බෞද්ධ දර්ශනය / බුදුදහම යන වචන යයි මගේ පෞද්ගලික හැගීමයි.

බුද්ධිමතුන‍්ගේ දහම වූ බුදුදහම බුද්ධියෙන් ඉගනීමට කාළයයි මේ.

ධර්ම චක්‍රය ගැන තවදුරටත්...

noreply@blogger.com (Achira) — Sun, 14 Jun 2009 06:29:00 +0000

මේ බ්ලොග් අඩවිය ආරම්භ වුනෙත් ධර්ම චක්‍රය කියන මාතෘකාව ඔස්සේම තමයි. නමුත් ඒක ගැන එතරම් දුරට සාකච්ඡා වුනේ නෑ. ගොඩක් දෙනෙක් ඒ සටහන කියවල හොද ආරමභයක් කියල මාව දිරිමත් කලා. ඒ හැමටම හුගක් පිං. ඒක මේ බ්ලොග් අඩවියේ අනාගතයට ගොඩක් හොදවෙයි කියල මම විස්වාස කරනවා.

පහුගිය කාලෙ මම මේ සම්බන්ධයෙන් තියන වෙබ් අඩවි පොත පත ගැන හොයා බැලුවා. අවාසනාවකට වගේ මේ සම්බන්ධයෙන් තියන අන්තර්ජාල සටහන් හරිම විරලයි. තියන සටහන් හුගක් ඒවායෙ පැහැදිලි විස්තර නැතුවා වගේම ඒවායෙ බුදුදහමට විරුද්ධ අදහස් නැතුවාමත් නොවෙයි. බුදුදහම ගැන අනන්ත දේවල් තිබ්බත් මා කියවු එක ලිපියක (අනතර්ජාලයේ) සදහන් වුනේ “බුදුදහම සහ සමලිංගිකත්වය” කියන මාතෘකාවයි. බෞද්ධ දර්ශණය මුළ ඉදන් ඉගෙන ගන්න කෙනෙකුට හොද වෙබ් අඩවි‍යක් නැතුවා වගේම මෙවැනි අදහස් එහෙම කෙනෙකුට හානිකර බවයි මගේ හැගීම.

මගේ මිත්‍ර‍යෙක් වන අචින්ත කිව්වා මේ ගැන විස්තරයක් ඉස්සර ධර්මවිජය වෙබ් අඩවියෙ තිබ්බා කියල. නමුත් දැන් ඒ කිසි දෙයක් ඒ වෙබ් අඩවියෙ නෑ. කිරිබත්ගොඩ ඤානානන්ද හාමුදුරු‍වන්ගෙ අනුශාසකත්වයෙන් පවත්වාගෙන යන මහමෙව්නා වෙබ් අඩවියෙ ඇත්තෙත් මේ කියන (ගරාදි 24 කින් යුතු) චක්‍රයක් සහිත ධර්ම චක්‍රයයි.

මේ සම්බන්ධියෙන් කරුණු සොයන කොට මා මිත්‍ර තිවංක තවත් විද්යු‍ත් ලිපියක් එවල තිබ්බා බුදුදහමේ විවිධ කොටස් ගැන. ඒකෙ ධර්මචක්‍රය ගැන තිබ්බ සටහනක් තමයි මේ දැක්වෙන්නෙ. අපි පෙර සදහන් කරනු ලැබූ ධර්ම චක්‍ර දෙකම මෙහි අඩංගු වෙනවා. ඒ වගේම එවායේ විවිධ අර්ථ නිරූපනයනුත් එහි අඩංගුයි.
නමුත් එහි ඇති ගරාදි 24 කින් යුතු ධර්මචක්‍රයේ ගරාදි (Spoke) එලියට නෙරාවිත් තියන්වා. එයින් පෙනෙන්නෙ එම ධර්මචක්‍රයත් 100% නිවැරදි නොවෙන බවයි. නමුත් එම සටහනෙන් නිවැරදි ධර්මචක්‍රය පිළිබදව බෙහෝ දේ දැනගත හැකියි. මේ සටහන තියන්න උදව් කරපු හැමෝටම පිං.

ඒහි පස්සිකෝ.....

noreply@blogger.com (Achira) — Mon, 01 Jun 2009 05:24:00 +0000

බුදුදහම ගැන අපේ කතිකාවත පසුගිය කාලෙ අප අතර සැරිසැරෑ විද්‍යුත් ලිපියකින්ම ආරම්භ කරමු.

මේ ලිපියේ තියන දේවල් වලට මම පුද්ගලිකව එකග වෙනවා. ඒ හැමදෙයක්ම තර්කානුකූලයි. නමුත් අපි හැමදාම දැනගෙන හිටපු ධර්ම චක්‍රයේත් විවිධ අර්ථ දැක්වීම් තියන‍වා.

විවිධ පඩිවරයන්ගෙ අදහස්වල‍‍ට අනුව ධර්ම චක්‍රයේ ගරාදි 8න් පැවසෙන්නෙ ආර්ය අශ්ඨාංගික මාර්ගයයි. තවත් අය අටලෝ දහම කියලත් කියනවා.

http://www.freewebs.com/universal_buddhism/buddhistsymbols.htm

වෙබ් අඩවියට අනුව තවත් මත ඔබට විමර්ශණය කල හැකියි.

කොහොමත් ඉන්දියාව, තායිලන්තය, නේපාලය වගේ තවත් බෞද්ධ රටවල් බොහොමයක් භාවිතා කරන්නෙ මේ අශෝක අධිරාජ්‍යා භාවිතා කල චක්‍රයයි.

නමුත් විකිපිඩියා එකේ සදහන් වෙන්නෙ පරණ ධර්ම චක්‍රයම තමයි.

http://en.wikipedia.org/wiki/Dharmacakra

පහත සදහන් යොමුවෙන් තවත් විස්තර ඔබට විමර්ශණය කල හැකියි. ඔබගේ වටිනා අදහස් මතින් බුද්ධිමත් මෙන්ම වැදගත් කතිකාවතකට මුළපුරන්න අපිට හැකිවෙයිග