Guia Kada Domingo

Ikanapulog-Pito nga Domingo sa Ordinaryong Panahon July 26, 2009

noreply@blogger.com (CIMT) — Sat, 27 Jun 2009 18:13:00 +0000

Unang pagbasa:2 Kg 4:42-44

Salmo: Ps 145:10-18

Ikaduhang Pagbasa:Eph 4:1-6

Tema: Ang Panag-ambitay nagagikan sa madagayaong grasya sa Diyos.

Pasiunang Awit:

Pasiunang Pag-ampo:

Pasiuna:

Sa atong ebanghelyo karon si Hesus miadto sa usa ka lugar nga tabok sa lanaw sa Galilea nga mao ang Tiberias. Nga bisan asa si Hesus moadto mosunod gayod kaniya ang daghanang mga tawo aron sa pagpaminaw sa mga maayong balita nga iyang gitudlo kanila og tungod sa ilang nakita nga mga milagro nga gibuhat ni Hesus; ang pagpasalamat ngadto sa Amahan og pagpanalangin ni Hesus sa diyutay nga pan og pag-apod-apod niini sa tanan. Og kining mga tawhana ilang nakita ang pagkamaayo ni Hesus og pagkadalaygon og sila mituo nga siya gayod ang mesiyas nga gipadala sa Dios Amahan.

Pagbasa sa Ebanghelyo: Sumala ni San Juan

Kapitulo 6, versikulo 1 ngadto sa 15 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)

Ang Ebanghelyo sa Ginoo;

Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Ang atong ebanghelyo nagpahinomdom kanatong tanan nga ang pagpa-ambit nagagikan sa gamay. Og walay tawo nga dili makapa-ambit bisan unsa pa siya ka kabus. Ang pagpa-ambit sa isigkatawo bulahan sa mga mata sa Dios Amahan nga langitnon, pag-ambitay sa tanang butang, pagtoo’g paghigugma sa katumanan sa pangandoy sa kausaban sa tibuok katawhan sa Dios.

Sama sa usa ka bata nga may dala ug pipila lamang kabuok nga tinapay og pipila ka isda, apan tungod kay ang tanan mahimo man sa Ginoo, mao nga pinaagi sa dyutay nga pagkaon ang tanan nangabusog “(even little divided by).” Ang Dios mohatag man sa atong panginahanglan kung kita adunay dako nga pagtoo inubanan sa buhat og duna kita’y pagsalig nga walay dili mahimo ang Ginoo og paglaum nga siya dili mamakak nga ang tanang milagro mamahimo pinaagi sa iyang kabubut-on.

Si Felipe og Andres sila ang duha ka instrumento sa katumanan sa pangandoy sa katawhan, sila mga sumusunod ni Kristo. Ang katumanan sa pangandoy sa ilang espirituhanon og langitnong gawi sa tawo. Diha kanila natawo ang paglaum sa pag-alagad, pagtoo, pagsangyaw sa matuod nga gahum sa Ginoo.

Ang suliran sa duha ka sumusunod ni Kristo (Felipe og Andres) mao ang dali nga paghukom nga nahitabo usahay sa tawo. Apan kini kanunay ang magpadaghan sa problema o suliran sa tawhanong kahimtang sa kalibutan. Ang misteryosong kabag-ohan o kausaban sa dagway sa kinabuhi sa tawo, mga suliran, mga pagsulay nga usahay walay kutamanan.

Ang pagsangyaw og pagmatuod sa pulong sa Dios mao ang katumanan sa eukaristiya. Kay nag-ingon ang Dios, “duol kamo kanako kay papahulayon ko kamo, gaan ang yugo nga akong isangon kaninyo.” Ang yugo nga mao ang paghigugma og pakigdait.

Giyang Pangutana sa Pagpaambit

1. Sa imong inadlaw-adlaw nga pagkinabuhi nasinati ba nimo si Kristo nga kanunay nagpakabana sa imong panginahanglan?

2. Sa imong pagkasumusunod ni Kristo, ang iya bang kabubut-on ang kanunay nimong gisunod?

3. Sa pagpa-ambit nimo sa imong panahon, talento, og bahandi; kinasingkasing mo ba kining ihatag sa uban?

(palihug pagpa-ambit…)

KATILINGBANG PAG-AMPO:

PAG-AMPO SA AMAHAN NAMO UG MAGHIMAYA KA MARIA:

PAGHINATAGAY UG KALINAW:

PLANO:

PAGHALAD:

KATAPUSANG PAG-AMPO:

KATAPUSANG AWIT:

Bro. Ruel Chavez Bro. Cardo Arcillas

Bro. Jessie Tapang Bro. Rafolino Chavez

Str. Ruby Baleña Str. Maria Berdida

Str. Evelyn Magpatoc Str. Elsie Gorgonio

Ikanapulog- Unom nga Domingo sa Ordinaryong Panahon July 19, 2009

noreply@blogger.com (CIMT) — Sat, 27 Jun 2009 18:11:00 +0000

Unang pagbasa:Jr 23:1-6
Salmo: Ps 23:1-6
Ikaduhang Pagbasa:Eph 2:13-18

Tema: Ang kamahinungdanon sa pagpamalandong diha sa atong tawag isip nga magbalantay sa usag-usa.

Pasiunang Awit:
Pasiunang Pag-ampo:
Pasiuna:
Diha sa atong ebanghelyo karon ato nahibaloan nga ang mga apostoles gikan sa ilang misyon og pagpanudlo, mibalik ngadto kang Jesus aron sa pagtaho sa mga nahitabo kanila og sa mga tawo didto sa lugar diin sila gipadala.
Nakita ni Jesus ang kadaghan sa mga tawo busa misugyot siya sa pag-adto sa awa-aw nga lugar aron usab sila makapahulay uban sa mga apostoles. Kay nakita niya ang kakapoy nga gibati sa mga apostoles. Apan hugot gayod ang pagtoo sa mga tawo busa mi-apas sila kaniya. Naluoy si Jesus kanila daw nahisama sila sa mga karnero nga nawad-ag magbalantay.
Kining maong kahimtang nga gibati sa mga apostoles ato usab nga masinati diha sa atong pagpangalagad. Mao nga kinahanglan usab nga maggahin kita og panahon aron makapahulay og makapamalandong. Sa ingon niini nga paagi ato mahibaloan kung ang ato gipangbuhat nahisubay ba sa kabubut-on sa nagpadala kanato nga walay lain kondili si Kristo, kini makatabang usab kanato nga makakita og mas maayong pamaagi aron mas mahimong maayo og mahinungdanon ang atong misyon.

Pagbasa sa Ebanghelyo: Sumala ni San Marcos

Kapitulo 6, versikulo 30 ngadto sa 34 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Ang pagsugilon sa mga kalamboan diha sa atong mga gimbuhaton sa misyon og ang pagpamalandong niini, adunay dako kaayo nga importansya alang sa mas maayo og mahinungdanon nga mga kalihukan og programa. Adunay duha ka mga rason nga kinahanglan kita nga mamalandong; una aron aduna kitay panahon sa pagpaminaw og pag-ampo ngadto sa nagpadala kanato nga mao ang Ginoo mismo. Ang ikaduha mao ang paglikay sa abuso o paggamit sa gahom. Kinahanglan dili nato hikalimtan kung kinsa ang nagpadala og naghatag kanato og gahom.
Ang pagpamalandong diha sa kamingawan o kahilom og pag-ampo makatabang kaayo og dako aron kita makabaton og mas taas nga kadasig diha sa pagpadayon sa atong tagsa-tagsa ka mga tahas og misyon.Kini usab usa ka pamaagi sa pakig-storya sa Ginoo, usa kini sa pinaka-importanteng koneksyon sa pakighiuli og pagkiglambigit kaniya sa atong inadlaw-adlaw nga gimbuhaton.
Ato kanunay nga hinumduman nga bisan ang mga apostoles ni Kristo gibati og kakapoy nga nagkinahanglan silang mangita og lugar aron makapamalandong, makapahulay og maka-ampo. Kita usab makasinati niining ilang gibati og panginahanglan diha sa atong pagkamisyonero o magsasangyaw. Ang pinakamahinungdanon nga bisan pa sa atong masinati nga kakapoy kita magpadayon sa atong pagpangalagad og pagsunod kang Kristo. Ato kanunay hinumduman nga daghang mga tawo ang uhaw sa pagpanudlo sa Maayong Balita nga mao si Kristo.

Giyang Pangutana sa Pagpaambit:

1. Diha sa inadlaw-adlaw nato nga mga gimbuhaton naa ba kitay panahon sa pagpamalandong o pagpangutana sa atong kaugalingon kung asa padulong ang atong gibuhat?
2. Diha sa atong pagpamalandong nakahatag ba kini og kalamboan sa atong pagtuo sa nagpadala kanato?
3. Malipayon ba kita nga nagtuman sa kabubut-on sa Dios isip magbalantay?
4. Isip sumusunod ni Kristo kung adunay tahas nga ihatag kanimo si Kristo imo ba kini hatagan og importansya?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Bro. Alejandro Serato Bro. Alexander Tumampo
Bro. Jupit Tortusa Bro. Edgardo Parilla
Bro. Pastor Maligmat Bro. Eliazar Paclibare

Ika-napulog Lima nga Domingo sa Ordinaryong Panahon July 12, 2009

noreply@blogger.com (CIMT) — Sat, 27 Jun 2009 18:03:00 +0000

Unang pagbasa:Am 7:12-15

Salmo: Ps 85:9-14

Ikaduhang Pagbasa:Eph 1:3-14

Tema: Inubanan ni Kristo magdala kita’g pagbag-o sa kalibutan.

Pasiunang Awit:

Pasiunang Pag-ampo:

Pasiuna:

Ang Ginoong Hesukristo nagpadala sa iyang mga apostoles, aron sa pagsangyaw sa maayong balita, paghingilin sa mga yawa, ug pag-ayo sa masakiton. Sama nga ang Amahan nagpadala sa iyang Anak nga si Hesus, ug ang tinubdan sa ilang gugma mao ang Espiritu Santo. Ang mga apostoles usab gipadala sa Ginoong Hesukristo sa tinagurha, aron magtinabangay. Atong mabasa sa Ecc. 4:8-12; ingon nga ang mga apostoles gipadala sa Ginoong Hesus, kita usab may katungod sa pagsangyaw, tungod kay kita naka-ambit man sa espiritu santo diha sa atong bunyag. Kita propeta sa pagsaksi sa kamatuoran, nahimong Hari sa atong pagkamaalagaron, nahimong pari sa atong pagsangyaw sa maayong balita, nga mao si Hesukristo. Ug pinaagi niini kita gidasig sa pagbuhat sa kabubut-on sa Ginoo. Aron mabatonan nato ang kabag-ohan sa kaugalingon, katilingban og sa tibuok kalibutan.

Pagbasa sa Ebanghelyo: Sumala ni San Marcos

Kapitulo 6, versikulo 7 ngadto sa 13 kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)

Ang Ebanghelyo sa Ginoo;

Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

1. Ang mga tinun-an gihatagan og gahom sa paghingilin sa mga yawa o dautang espiritu nga anaa sa tawo; espirituhanon man o tawhanon. Aron nga ang tawo mahayagan og magiyahan sa mga maayo nga hunahuna og dili na magbuhat og dautan sa iyang isigkatawo. Kita sa atong tagsa-tagsa ka kaugalingon kita gipahimangnoan sa paglikay sa pagbuhat og dautan, aron dili kita puy-an sa yawa.

2. Ang pag-ayo sa masakiton. Ang mga apostoles gihatagan og gahom sa pag-ayo sa sakit; tawhanon man o espirituhanon. Kini gihulagway sa pagdihog og lana sa atong mga kaparian ngadto sa mga masakiton nga nagkinahanglan niini ilabi na sa espirituhanong panabang. Kay ang sakit sa tawo, dunay duha ka hinungdan; espirituhanon og tawhanon. Ang espirituhanon nagagikan sa atong klasi-klasing kasal-anan nga wala nato ikasurender sa Ginoo pinaagi sa atong pagpangompisal ngadto sa mga kaparian. Kini nga sakit ang pinakadelikado tungod kay ang Ginoo nag-ingon “ayaw kahadloki ang makapatay sa lawas, hinonua kahadloki ang makapatay sa kalag.”

3. Isip magtutuo ni Jesukristo sama sa mga apostoles kita naka-ambit sa iyang propetanhong misyon, nga mao ang iyang pagkahari nga kinahanglan gayod nga mugnaon. Og kinahanglan usab ang hugot nga pagtoo, paglaum sa iyang pulong, pagsalig inubanan sa tiunay nga pag-usab, pagbag-o sa atong pagkatawo pinaagi sa paghinolsol sa atong mga sala og pagpakighiuli sa maayong relasyon ngadto sa Dios.

Mga giyang pangutana sa pagpa-ambit:

1. Sa imong kaugalingon andam ka ba nga mahimong magtutudlo o magsasangyaw sa maayong balita?

2. Isip magtotoo andam ka ba magbag-o?

(palihug sa pagpa-ambit….)

KATILINGBANG PAG-AMPO:

PAG-AMPO SA AMAHAN NAMO UG MAGHIMAYA KA MARIA:

PAGHINATAGAY UG KALINAW:

PLANO:

PAGHALAD:

KATAPUSANG PAG-AMPO:

KATAPUSANG AWIT:

Bro. Loloy Serato Bro. Eleazar Paclibare

Bro. Uldarico Cane Bro. Francis Ybaňez

Bro. Allan Abella Bro. Junior Monteves

Bro. Alexander Tumampo Str. Nidas Parilla

Bro. Angelito Arradaza

Ika-napulog - Upat nga Domingo sa Ordinaryong Panahon July 5, 2009

noreply@blogger.com (CIMT) — Sat, 27 Jun 2009 18:00:00 +0000

Unang pagbasa:Ezk 2:2-5
Salmo: Ps 123:1-4
Ikaduhang Pagbasa: 2 Cor 12:7-10
Tema: Ang mga Regalo bunga sa Pagtoo

Pasiunang Awit:
Pasiunang Pag-ampo:

Pasiuna
Kasagaran ang sukdanan sa pagtahod sa tawo mao ag posisyon o kahimtang.Kung ordinaryong tawo ang mopa-ambit sa kaalam, dili kini hatagan og pagtagad tungod sa kabus nga kahimtang niini.
Sama ni Hesus sa iyang pagpanudlo sa sinagoga nga maoy naghatag og kasakit sa mga Hudio. Kay sila dili makatuo o makadawat nga si Hesus nga usa lamang ka panday nakabaton sa maong talagsaon nga kaalam og gahum sa pagpanudlo. Tungod niining gipakita nga kinaiya sa mga Hudio, nga kulang sila sa pagtahod og pagtoo kaniya; busa miingon siya, “ang propeta gisalikway sa iyang nasud taliwala sa iyang kaliwat og pamilya.”
Ang atong ebanghelyo karon nag-awhag kanato sa pagpamalandong sa mga milagro nga gihatag kanato sa atong Ginoo. Nga mao ang regalo sa kaalam. Ang pagpaminaw og pagtahod maoy makaayo sa tawo og ang lig-on nga pagtoo maoy mopahimatuod sa mga milagro.
Ato ba kining gipaambit sa atong isigkatawo? Og mihatag ba kita og pagtahod sa mga tawo nga mipaambit sa ilang kaalam?

Pagbasa sa Ebanghelyo: Sumala ni San Marcos

Kapitulo 6, versikulo 1 ngadto sa 6 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Si Hesus nagdako nga usa ka yano lamang nga panday. Apan sa pagbalik niya sa iyang kaugalingon nga nasod usa na siya ka magtutudlo og gani iyang kauban ang iyang mga tinun-an og nanudlo sila sa sinagoga. Taliwala sa mga gipanudlo ni Hesus nga puno sa kaayo, gisakit gihapon siya mga Hudio tungod kay dili nila madawat nga si Hesus nga usa ka panday nga adunay gahum og igong kaalam sa pagpanudlo. Tungod niini nadismaya si Hesus sa gipakita sa mga tawo, kay sila kulang sa pagtahod og pagtoo kaniya. Nga maoy naka-apekto sa paghimo niyag mga milagro. Igo ra siyang nag-ayo sa masakiton pinaagi sa pagtapi-on sa iyang mga kamot.
Sa tawhanong kinaiya, ang sukdunan sa pagtahod nagdepende sa kahimtang sa kinabuhi. Mas taas ang ilang pagtoo og pagsalig kung kini adunay taas nga posisyon sa kinabuhi. Dinhi gipakita ang pagkamasinahon sa tawo. Apan gimugna sa Ginoo ang tawo uban sa mga regalo niini nga mao:
1. Ang kaalam nga maoy magpalambo sa atong kinabuhi nga angay natong ipaambit sa tanan.
2. Ang pagtudlo. Angay nga atong itudlo sa uban ang atong mga nakat-onan.
3. Ang pag-ayo. Pinaagi sa kina-adman makahimo usab kita sa pag-ayo dili lang sa espirituhanon kondili sa tawhanon usab nga aspeto.
4. Ang pagtoo og pagtahod sa mga kasugoan sa Diyos maoy timaan sa usa ka tinuod nga Kristiyano.
5. Ang pagpangulo. Usa ka mahinungdanon nga regalo, nga maoy mag-agak sa katawhan ngadto sa kaayo.
6. Ang pagtahod. Dili lang sa mga tawo nga dunay kaalam kondili alang sa isigkatawo ilabi na sa atong kaugalingon.
7. Ang paghigugma. Si Hesus nagpakamatay sa krus tungod sa dakong gugma kanato busa angay kita nga maghigugmaay.
8. Ang pagsangyaw. Isip mga binunyagan ni Kristo aduna kita’y misyon sa pagsangyaw sa ebanghelyo sa Ginoo.
9. Ang pagpaminaw. Angay natong paminawon ang maayong balita og nga ato kining puy-an sa atong kasingkasing aron makabaton kitag kalinaw.
10. Ang pagpangalagad. Si Hesus hari nga maalagaron. Busa angay nga mag-alagad usab kita sa mas ubos pa kanato. Og dinhi sa gagmayng simbahang katilingban atong ipakita ang akto sa pagpangalagad.
Kini nga mga regalo mahimong tinuod nga milagro kung kini atong makaplagan og atong puy-an uban sa pagsalig og pagtuo sa Ginoo. Kay ang regalo bunga sa pagtoo.

Mga giyang pangutana sa pagpa-ambit:

1. Sa mga regalo nga gihatag kanimo sa Ginoo. Unsang regaloha ang dali nimong nakat-onan?
2. Sa unsang paagi napa-ambit nimo sa isigkatawo ang mga regalo nga giahatag kanimo sa Ginoo?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Bro. Dante Sagales Bro. Vincent Kiamco
Bro. Jiji Taneo Bro. Amelito Abanilla
Bro. E. Aricayos Bro. Pastor Maligmat
Bro. Arsenio Villar Bro. Crisente Taneo

Ikanapulog-Tulo nga Domingo “Sulod sa Tuig” June 28, 2009

noreply@blogger.com (CIMT) — Thu, 21 May 2009 10:58:00 +0000

Unang pagbasa:Ws 1:13-2:24
Salmo: Ps 30:2-13
Ikaduhang Pagbasa:2 Cor 8:7-15
Tema: Ang pagtuo inubanan sa buhat maoy makaayo.

Pasiunang Awit:
Pasiunang Pag-ampo:
Pasiuna:
Diha sa pagtoo ang babaye sa atong ebanghelyo naluwas sa iyang balatian, nga bisan pa wala siya makaila kang Jesus siya nagsalig og nagtoo nga ang Dios moayo kaniya pinaagi kang Jesus,ang mesiyas nga gipadala sa Dios Amahan aron pagluwas sa katawhan. Sa pag-ingon ni Jesus “giluwas” ka, og dili “naayo”ka. Kini nagpahinumdom nga ang babaye namasin ug sa katapusan iyang nakita nga gimahal siya pag-ayo sa Dios.
Sa laing bahin usab si Jairo usa ka opisyal sa Sinagoga, sa pagkakita niya kang Jesus miluhod siya ug mihangyo sa kinasingkasing nga paga-ayohon ang iyang anak babaye. Kini iyang gibuhat tungod sa iya usab nga pagtoo ug pagsalig kang Jesus nga siya ang manluluwas.
Kini nga bahin sa ebanghelyo ni San Marcos nagbutyag sa dako nga paghigugma kanato sa Ginoo taliwala sa atong mga kalisdanan sa kinabuhi ug usab gipakita ang pagkamanluluwas og pagkamaloloy-on sa Ginoo kanato. Ilabi nga kung kita adunay dako nga pagsalig og pagtoo ngadto kaniya inubanan sa buhat nga mga maayo ngadto sa katawhan og kang Jesus.

Pagbasa sa Ebanghelyo: Sumala ni San Marcos

Kapitulo 5, versikulo 21 ngadto sa 43 ( Kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:
Usahay sa kinabuhi sa tawo adunay panghitabo o mga pagsulay nga modangat sa atong kinabuhi. Kini agig pagsukod kung unsa kalig-on o kahugot ang atong pagsalig og pagtoo sa Dios. Dinhi niining santos nga ebanghelyo naghisgot mahitungod kang Jairo nga usa ka pangulo sa Sinagoga nga nangayo ug tabang sa Dios mahitungod sa iyang anak nga adunay balatian. Ug tungod niini ang atong Ginoong Jesukristo sa walay pagduhaduha mikuyog dayon kang Jairo. Na kung atong pamalandongan ingon ba usab kaha niini ang atong angayan nga pagabuhaton ngadto sa atong isigkatawo nga nanginahanglan ug tabang? Gani tungod kay nakita ni Jesus kung unsa kamatinud-anon si Jairo sa iyang pagsalig kang Jesus sa walay pagduhaduha iyang gihatag ang kaayohan ngadto sa iyang anak. Sama sab sa babaye tungod sa kahugot sa iyang pagtoo dihadiha dayon naayo siya, nga bisan na lang sa paghikap sa bisti ni Jesus. Nga kung kita mismo adunay hugot ug kinasingkasing nga pagtoo sa Dios. Aduna usab kita mapaabot dili lang sa atong kinabuhing lawasnon kondili sa atong kinabuhing espirituhanon. Mao nga kung ang imong pagtoo kulang sa pagsalig dili kini mamahimong mabungahon. Ang dakong pagtoo ug pagsalig nato kang Jesus maoy makahatag kanato og tinuod nga kaluwasan. Sama sa pagtoo ni Jairo ngadto kang Jesus, nga ang garbo sa atong pagtoo og pag-alagad sa Dios ug sa uban natong mga kaigsoonan andam usab kita nga mosakripisyo. Ug ato usab paningkamotan nga sama sa gipakita nga pagtuo sa babaye sa ebanghelyo nato karon nga sulod sa napulog duha nga tuig nga nag-antos sa iyang balatian. Gipakita ang natural nga dagan sa kinabuhi nga kung ikaw makahatag sa uban, ikaw usab maibanan. Apan ang tinuod nga mag-alagad sa Dios ug sa atong isigkatawo dili magpaabot ug balos. Kay matag himo nato ug maayo sa Dios ug sa isigkatawo gantihan kita sa Dios.
Sa dihang nakita ni Jesus ang usa ka bata nga nagbuy-od na sa dihang giingnan “Talitha Kumi” nga sa ato pa “bangon inday”, si Jesus nagbangon sa usa ka patay. Sa atong kahimtang karon isip mga katoliko adunay mga tawo nga nakabangon na gustong mobalik paghigda lang gihapon nga bisag nakabalo na kung unsa ang maayo ug dili. Apan nagpabilin lang gihapon sa sayop nga pagtoo. Aduna usab mga tawo nga naglunang sa sala og gusto nga magbag-o. Hinaut unta nga usa kita nga makapabangon ngadto kanila.
Giyang Pangutana sa Pagpaambit

1. Sa kinabuhi sa tawo basihan ba ang imong hugot nga pagtoo ug pagsalig aron maangkon nimo ang kaayohan?
2. Manginahanglan pa ba ug tukma nga kaayohan aron lang adunay pagtoo kang Kristo?

KATILINGBANONG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Ruel Chavez Brenda Taneo
Alicia Salas Lito Mandras
Nida Parilla

Ikanapulog- Duha nga Domingo “Sulod sa Tuig” June 21, 2009

noreply@blogger.com (CIMT) — Thu, 21 May 2009 10:52:00 +0000

Unang pagbasa:Jb 38:1-11
Salmo: Ps 107:23-31
Ikaduhang Pagbasa:2 Cor 5:14-17

Tema: “Ang Kalibutan anaa sa kamot sa Ginoo.”
Pasiunang Awit:
Pasiunang Pag-ampo:
Pasiuna:

Ang atong ebanghelyo karon naghulagway ug nagpahinumdom kanato nga kita, ikaw ug ako kauban ni Hesus sa paglawig niining kinabuhia. Kung atong lantawon pag-ayo kon unsa ang mga panghitabo sa atong kaugalingon, atong mahibaloan nga ang Dios anaa kanunay sa ulin o unahan nga bahin sa atong sakayan, kay kon moabot ang unos ug bagyo sa atong kinabuhi siya kanunayng magpakalma o mopahunong kay wala gayud siya matulog.
Hinuon usahay naa gayud panahon nga murag mawad-an kita ug paglaum kung moabot ang dagkong unos sa kinabuhi, pero kini usa lamang ka pagsukod sa atong pagsalig ug pagtoo kaniya, kung unsa ba ang mas bug-at nato, ang ato bang pag-ampo o ang atong pagsalig?

Pagbasa sa Ebanghelyo: Sumala ni San Marcos

Kapitulo 4, versikulo 35 ngadto sa 41 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom: Sa pangutana sa mag tinun-an kung kinsa si Hesus? Ato ng nahibaloan nga siya ang Diyos nga nagpakatawo. Aron pag-uban kanato isip usa ka higala, sinaligan ug igsoon. Kita nakaila na nga si Hesus ang Ginoo ug magtutudlo pinaagi sa iyang gipadayag ug sa iyang mga buhat. Apan bisan pa niini, sama sa mga tinun-an kita usab kasagaran walay pagsalig ug gibaliwala na lang ang mga maayo nga miabot sa atong kinabuhi tungod sa mga kasakit ug krisis nga atong nasinati, apan siya nagdasig kanato nga kita mosalig kaniya isip usa ka amigo o higala.
Kay siya gipadala sa Amahan aron mamahimong simbolo o sumbanan sa pagkasinaligan ug magbalantay sa katawhan ug kita usab isip tinun-an ni Hesus, kita gipahinumdoman nga aduna kitay katungod isip piniyalan usab sa Diyos nga ato usab mahalon ug higugmaon ang iyang mga binuhat.
Kay kita gitudloan usab sa pagsalig kaniya isip usa ka igsoon nga pwede nato maduol, masangpit sa bisan unsang sitwasyon ug higayon kay siya nag uban man kanato ug nagtudlo sa maayong mga buhat. Apan dili nato hikalimtan nga ato siyang masinati pinaagi sa atong katilingban nga moabot ang atong gipangayo pinaagi sa iyang gihimong instrumento ug usab nato hikalimtan ang pagpasalamat sa Diyos bisan unsa kagamay sa grasya nga moabot kanato.

Giyang Pangutana sa Pagpaambit:

1. Kinsa man si Hesus sa imong kinabuhi?
2. Nakasinati ka na ba ug unos o mga kalisdanan diha sa imong kinabuhi? Giunsa kini nimo pagsulbad?
3. Sa imong mga kasinatian ug pakiglambigit sa kinabuhi, niabot na ba sa punto na ikaw nawad-an ug paglaum?sa unsang hitaboa?
4. Sa imong paglawig dinhi sa kalibutan kauban ang mga unos sa kinabuhi, imo na bang nahunahuna-an ang higayon na ang Diyos natulog diha sa imong mga pagtawag ug pagsampit kaniya?

KATILINGBANONG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Alejandro Serato Alexander Tumampo
Jupit Tortusa Edgardo Parilla
Pastor Maligmat Eliazar Paclibare

Solemnidad sa CORPUS CHRISTI June 14, 2009

noreply@blogger.com (CIMT) — Thu, 21 May 2009 10:49:00 +0000

Unang pagbasa:Ex 24:3-8
Salmo: Ps 116:12-18
Ikaduhang Pagbasa:Heb 9:11-15
Tema: Ang Lawas ug Dugo ni Kristo nagpahinumdom kanato sa dakong gugma sa Dios

Pasiunang Awit:
Pasiunang Pag-ampo:
Pasiuna:
Tataw gayud sa kasaulogan sa katapusang panihapon ni Jesus nga kini murag pasiugda sa iyang umaabot nga paglansang sa krus. Gihalad niya ang iyang tibuok kaugalingon; lawas ug dugo.
Mipahimatuod sa bag-ong kasabutan ang pag-ula ni Jesus sa iyang dugo. Labaw pa kini sa dugo sa mananap nga ginahalad sa mga Hudio. Ang dugo ni Jesus makahinlo gayod kanato.
Mao kini ang buhing misteryo. Ang paghalad ni Jesus sa iyang kaugalingon ug ang iyang pagtawag sa huyang nga mga tawo aron nga mahimong instrumento sa pagpadayon sa iyang pagpangluwas.

Pagbasa sa Ebanghelyo: Sumala ni San Marcos

Kapitulo 14, versikulo 12 ngadto sa 26 kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:
Ang atong ebanghelyo karon naghandum sa duha ka importante nga selebrasyon. Ang paghandom sa Pasko sa Pagsaylo sa mga Hudio. Ug ang paghandom sa katapusan nga panihapon sa Ginoo.
Ang mga Hudeo nagpadayon nga naghandom sa ilang mga kasinatian sa mga kamot sa Ehiptohanon hangtod sila naluwas. Hangtod usab karon nagpaabot pa sila sa gisaad sa Dios nga Mesiyas o Manluluwas. Kay wala man sila motuo ni Kristo isip Mesiyas nga maoy gipadala sa Dios.
Kita isip mga Kristiano kanunay naghandum sa katapusang panihapon sa atong Ginoo. Diin iyang gipaklaro ang pagsakrispisyo sa iyang lawas alang sa atong kaluwasan.
Gipahinumdum sa pagsaulog sa kapistahan sa pagsaylo ang susamang kaimportante niini sa panihapon sa Ginoo uban sa iyang mga tinun-an. Gihulagway usab sa atong ebanghelyo ang mga importansya sa mga nahimo sa atong Ginoo. Sama sa iyang pagluwas og pagtubos sa mga kasal-anan sa mga tawo, paghimog mga milagro pinasubay sa kabubut-on sa Dios Amahan kay kini usab ang nagpahinumdum sa importansya sa daang kasabutan og bag-o nga kasabutan dinhi usab gipamatud-an ang misteryo sa atong pagtoo, paghatag sakripisyo ni Kristo alang sa iyang katawhan. Nagpakasakit siya sa krus , nagpamatuod usab si Kristo sa iyang presensya pinaagi sa iyang pagkabanhaw og aron sa pagtuman sa iyang mga saad nga hiusahon ang katawhan sa iyang pagbalik. Kini angayan nga atong pangandaman sa kanunay isip sumusunod ni Kristo.
Ang mga katawhan gipakita sa Dios kon unsa sila ka importante alang kaniya og tungod kay mga pinangga man kita sa Dios naghimo siya og mga buhat og pagtulun-an aron mamahimo kitang nga maayong binuhat. Ang tawo dili mabuhi sa pan lamang kon dili sa mga pulong usab sa Dios. Sama nga ang Dios nagkinahanglan usab sa mga katawhan nga moalagad og moserbisyo sa uban aron magkahiusa ang tanan diha sa pulong og mga buhat uban ni Kristo.

Mga giyang pangutana sa pagpa-ambit:
1. Unsa ka mahinungdanon kanimo ang pagkalawat sa lawas og dugo ni Kristo?
2.Sa imong pagsabot, unsa kining pulong Kaluwasan?

KATILINGBANONG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Dante Sagales Lolita Taneo
Sabina Cabantoy Giji Taneo
Francisco Ybañez

Domingo sa Santisima Trinidad June 7, 2009

noreply@blogger.com (CIMT) — Thu, 21 May 2009 10:45:00 +0000

Unang pagbasa:Dt. 4:32-40
Salmo: Ps 33:4-22
Ikaduhang Pagbasa:Rm 8:1d4-17
Tema: Ang atong Dakong Diyos naga uban kanato hangtud sa kahangturan.

Pasiunang Awit:
Pasiunang Pag-ampo:
Pasiuna
Diha sa atong Ebanghelyo karon atong nasayran nga ang Ginoo naghatag sa iyang opisyal ug katapusang habilin og kasuguan ngadto sa iyang mga apostoles. Kini mao ang pinakaimportanteng higayon diin gihatag sa atong Ginoo ang misyon sa atong simbahan pinaagi sa mga apostoles isip simbahan nga sakop sa Kristohanong katilingban nga mao ang pagmantala sa maayong balita sa tibuok kalibutan.
Diin atong makita ang misteryo sa Santisima Trinidad; ang Tulo ka Persona. Lisod kaayo nga tugkaron ang kinatibuk-ang kamatuoran niining maong doktrina sa atong simbahan. Aduna kitay misyon nga mao ang pagsangyaw sa pulong sa Diyos ug pagpaambit sa atong mga nakat-unan mahitungod kaniya ngadto sa atong katilingban. Ug ang pagtudlo ug pagtuman sa tanang sugo sa atong Amahan. Kay siya naga-uban kanato hangtod sa kahangturan.

Pagbasa sa Ebanghelyo: Sumala ni San Mateo

Kapitulo 28, versikulo 16 ngadto sa 20 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo (Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:
Isip mga tinun-an sa atong tagsa-tagsa ka kinabuhi isip mga sumusunod ug magsasangyaw sa atong Ginoo, atong huna-hunaon kung unsa ang atong gimbuhaton, unsa ang iyang gisugo kanato. Siya nag-ingon “Lakaw og panudlo kamo sa tanang kanasuran ug bunyagi sila sa ngalan sa Amahan ug sa Anak ug sa Espiritu Santo.” Dinhi nato masuta ang timaan nga kitang mga katoliko mao ang tinuod nga simbahan nga gitukod ni Jesukristo og siya naga-uban kanato hangtod sa katapusan sa kalibutan.
Sa atong kinabuhi ato kanunayng ibutang sa atong kasingkasing si Jesus aron sa kanunay ato siyang mahinumduman kay wala kita niya gipasagdan. Si Jesus mao kanunay ang maglig-on kanato sa atong mga gimbuhaton isip mga magsasangyaw. Kung kita maningkamot sa pag-alagad kaniya, siya usab maningkamot sa pagpanalipod og paglig-on sa atong pagtuo og pagsalig kaniya. Bisan pa nga daghan ang mga babag, mga pagsulay apan anaa gayod siya kanato sa kanunay.
Atong wad-on ang pagduha-duha. Ang pagsalig kaniya maoy makapalig-on sa atong pagtuo. Kung adunay mga kasakit, problema mga moabot kanato, kini mga pagsulay lamang kanato kung unsa kahugot ang atong pagtoo ug pagsalig kaniya. Kini mao usab ang dalan padulong sa gingharian sa atong Amahan.

Mga giyang pangutana sa pagpa-ambit:

1. Sa atong kinabuhi isip mga magsasangyaw og sundalo sa Dios aduna bay panahon nga nagmahuyang kita sa atong pagtoo og pagsalig sa Dios? Sa unsa nga paagi?
2. Isip usa ka sumusunod ni Kristo, imo ba nasuta nga ikaw kauban sa usa ka matuod nga simbahan?

KATILINGBANONG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Efren Hermones Lea Avila
Evelyn Magpatoc Elsie Gorgonio
Bing Polido

Domingo sa Pentecostes May 31, 2009

noreply@blogger.com (CIMT) — Tue, 05 May 2009 17:40:00 +0000

Unang pagbasa:Buhat 2:1-11
Salmo: Ps 104:1-34
Ikaduhang Pagbasa:1Cor 12:3-13
Tema: Si Jesus nagpakita ngadto sa iyang mga tinun-an human sa Iyang Pagkabanhaw

Pasiunang Awit:
Pasiunang Pag-ampo:
Pasiuna:
Ang pagpakita ni Jesus sa iyang mga tinun-an usa ka timailhan nga aron mahatagan sila og espirituhanong pag-umol ug naghatag sab ni og paglaom sa pagsaksi sa iyang pagkabanhaw.
Nga dili lang sa yano nga pag-ingon nato nga mitoo ta kundili ang pagsalig nato nga nag-ingon: Bulahan ang mitoo bisan wala makakita (Jn 20:29). Dili kinahanglang Makita nato si Jesus sa atong mga mata para kita mutoo, kundili kadtong atong lalom na pagtoo ug pagsalig sa iyang pagkatawo ug pagkaginoo na mao ang makaluwas kanato.
Ug pinaagi kang Jesus nga nabanhaw nasugdan na ang bag-ong kalibutan nga bisag nagpadayon ang atong mga sala si Jesukristo nagpaambit gihapon sa kaayo ug paghigugma sa Dios Amahan kanato.

Pagbasa sa Ebanghelyo: Sumala ni San Juan

Kapitulo 20, versikulo 19 ngadto sa 23 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw o Pagpalawom:

Sa atong ebanghelyo karon naghisgot/nagpamatuod nga aduna gayo’y pagkabanhaw sa kalag og kini napamatud-an sa mga tinun-an ni Hesus. Sa pagpamalandong niining Ebanghelyo adunay duha ka punto o bahin.
1. Si Hesus gipadala sa Amahan nganhi sa kalibutan. Ug usab gipadala ni Hesus ang iyang mga tinun-an aron pagsangyaw sa maayong balita sa kapasayloan sa sala dinhi sa tibuok kalibutan.
Bisan nasayod nang daan si Hesus kon unsa ang iyang dangatan dinhi sa kalibutan iyang gipadayon ang iyang misyon alang sa kaayohan sa tanang katawhan og alang usab sa kabubuton iyang mahigugmaong Amahan. Kay nahibawo si Hesus kong unsa ang kabag-ohan nga mahitabo sa kalibutan og sa simbahan. Ang katawhan maoy naghatag og kabag-ohan sa tibuok kalibutan. Ang katawhan mao ang tingog sa simbahan mao man gali ang katawhan mao ang simbahan. Ang simbahan nagkinahanglan kang Jesus, kay kung wala si Jesus wala usab ang mensahe nga mokaylap sa tibuok kalibutan ug ang matuod nga gahom anaa lamang kang Jesus. Ang katawhan ug simbahan nagsalig kang Jesus. Gawas pa niini maghatag sab kini ug paglaum ug pagsaksi sa iyang pagkabanhaw. Kinahanglan kitang makakita kang Jesus dili lang kaysa mga mata kundili sa pagtuo usab. Atong matngonan ang pagsunod ug paghigugma kang Jesus pinaagi sa Espiritu nga anaa sa atong taliwala.
2. Gihuypan ni Jesus ang mga tinun-an.
Sa pagbuhat sa Diyos sa tawo, gihuypan ni sa kinabuhi. Mao pud kini ang gibuhat ni Jesus sa mga tinun-an. Gihuypan sila sa bag-ong kinabuhi ug sukad niadto nangahimo silang magsasangyaw sa kalinaw. Ug ilang gidala sa yuta ang kapasayloan sa mga sala nga maoy miulipon sa mga tawo.

Mga Giyang Pangutana:

1. Sa unsa nga pamaagi gipakita nimo ang imong pagkasumusunod kang Jesus?
2. Nakapaambit ka ba sa imong kaigsuonan sa tahas nga gisangon kanimo sa atong Ginoo?
3. Nakapasabot ka ba sa imong mga kaigsuonan nga mahinungdanon kaayo ang atong pag-ampo og pagtuo? Sa unsang paagi?

KATILINGBANG PAG-AMPO:

PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Aiza Sacare
Armando jj Taneo
Elsie Gorgonio
Brenda Taneo

Domingo sa Pagsaka sa Langit sa Ginoo May 24, 2009

noreply@blogger.com (CIMT) — Tue, 05 May 2009 17:37:00 +0000

Unang pagbasa:Buhat 1:1-11
Salmo: Ps 47:2-9
Ikaduhang Pagbasa:Eph 1:17-23
Tema: Ang pagpakita ni Jesus sa napulog usa na iyang mga tinun-an

Pasiunang Awit:
Pasiunang Pag-ampo:
Pasiuna:
Gisangonan ni Jesus ang mga tinun-an nga isangyaw ang maayong balita sa kaluwasan mao siya og wala nay lain pa. Nga hangtod karon ang simbahan nagpadayon sa mao nga katuyuan. Og kita usab gisangonan og atong katungod ang pagsangyaw sa maayong balita nga mao si Kristo ngadto sa uban pinaagi sa mga buhat nga maayo og sa pagsunod kang kristo.

Pagbasa sa Ebanghelyo: Sumala ni San Marcos

Kapitulo 16, versikulo 15 ngadto sa 20 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Pinaagi sa bunyag mas milawom ang atong pagkahiusa sa Ginoo og sa mga apostoles (tinun-an ni Kristo). Si kristo miabot sa suba sa Jordan, ug diha iyang gihimo ang balaang tubig nga mamahimong ilhanan o paagi aron kita makasulod sa kinabuhi sa Tulo ka Personas. Si Jesus mipasalig sa iyang mga tinun-an nga sila mabunyagan diha sa balaang Espiriu Santo, ang iyang panaad nga iyang gitiman-an sa adlaw sa Pentecostes. Sa wala pa siya mabanhaw ngadto sa langit, ang atong Ginoong Jesukristo nagsangon sa mga tinun-an nga molakaw sa tibuok kalibutan nga binunyagan sa ngalan sa Amahan ug sa Anak ug sa Espiritu Santo.
Diha sa adlaw sa atong bunyag kita nahimong hini usa kang Kristo Jesus nga midani sa kinabuhing Kristiyanos.Sa adlaw sa pagsaka sa langit sa Ginoo mamatngonan unta nato ang atong mga saad isip mga binunyagan: paglikay sa sala, pagdawat kang Jesukristo, ug pagkinabuhi nga maayo og matinud-anon nga sumusunod sa dako nga gasa sa kinabuhi diha ni Kristo. Sa atong pagpaningkamot nga mamahimong masinogtanong saksi ni Kristo sa pulong ug sa buhat, hinaut nga ang uban madani sa pagbag-o og bag-ong kinabuhi diha kang Jesukristo.

Giyang Pangutana sa Pagpaambit

1. Sa imong pagkabinunyagan imo bang gisunod ang kabubut-on sa Dios sa imong kinabuhi?
2. Sa imong kinabuhi imo bang gisangyaw ang maayong balita sa atong Ginoong Hesukristo, sa unsang paagi?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Ruel Chavez Jaime Constantino
John Thomas Samson Lucille Celeste

Ika-Unom nga Domingo sa Pagkabanhaw May 17, 2009

noreply@blogger.com (CIMT) — Tue, 05 May 2009 17:29:00 +0000

Unang pagbasa:Buhat 10:25-48
Salmo: Ps 98:1-4
Ikaduhang Pagbasa:1 Jn 4:7-10
Tema: Ang Tawag sa Ginoo sa Paghigugma

Pasiunang Awit:
Pasiunang Pag-ampo:

Pasiuna:
Ang ebanghelyo nato karon usa ka kabahin sa pagpanamilit ni Jesus sa iyang mga hinigugmang tinun-an, og mga sumusunod kay siya nahibalo man sa iyang adtoan og dangatan nga siya mawala gayod sa panan-aw sa iyang mga tinun-an pero siya mouban og mopuyo sa ilang tagsa-tagsa ka kasingkasing.
Human maklaro nga kita nagsalig kaniya pag-ayo, gisubli ni Jesus ang iyang sugo sa paghigugma. Apan kining matang sa gugma mas lawom kaysa naandan natong gitoohan kasagaran higugmaon nato ang isigkatawo, kay gisugo kini ni Jesus. Apan kining paagiha malagmit dili magmabungahon kay lain-lain man ang pagsabot nato unsaon paghigugma. Busa mahimong higugmaon ang uban kutob sa atong sukdanan, kutob sa pagsabot sa gugma apan mas lawom pa ini ang gitudlo ni Jesus. Sa awhag sa paghigugma, ang sukdanan dili na ang atong kaugalingon kondili si Kristo mismo. Giunsa niya pagmahal ang isigkatawo ingon sab ini ang atong pagmahal sa uban. Busa importante nga motuhop dinhi kanato ang iyang panglantaw kay gipili kita ni Jesus para magmalipayon. Og karon atong gisaulog ang misteryo sa gugma ni Kristo tungod kay una nga nahigugma kanato ang Dios kay iyang gipadala ang iyang Bugtong Anak kanatong iyang mga pinalanggang mga anak. Og sa atong kaugalingon kita gidasig nga magpabilin sa iyang gugma nga ato usab higugmaon ang atong isigkatawo.

Pagbasa sa Ebanghelyo: Sumala ni San Marcos

Kapitulo 16, versikulo 15 ngadto sa 20 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Gitawag kita sa paghigugma sa Dios og sa atong isig ka tawo nining paagiha mahigala kita ni Kristo Jesus, mamahimo kitang kauban ni Jesus sa iyang misyon sa simbahan og sa katilingban. Mailhan nato siya isip usa ka persona nga misteryosong naglihok uban sa atong misyon dinhi sa simbahan. Tungod niini makatukod tag gugmang lunsay nga ang tinubdan mao si Kristo. Gitawag kita para mamahimong taga sulti ni Jesus isip mga buhing saksi sa kamatuoran dinhi sa kalibutan kita gitawag para ipasundayag, ipahibalo kung kinsa man gayod si Jesus og unsa man ang iyang mga paagi og mga maayong buhat og paghigugma kanatong iyang ubos nga mga anak.
Ang gugma sa Dios gihubad ni Jesus pinaagi sa buhat. Gibudhian siya og gipatay sa mga tawo nga nagpaulipon sa malupigong mga sistema uban sa yawan-ong mithi og baroganan aron matuman ang kasulatan og kabubut-on sa Dios Amahan kini gibuhat sa Ginoong Jesus aron pagpaila sa iyang gugma kanato og mahimong sumbanan sa atong gugma sa atong Dios og isig katawo.
Kay kita dinhi sa atong simbahan usa ka pamilya og kauban kanunay ang Ginoo sa atong mga maayong buhat og bisan unsa ang atong pangayoon sa ngalan sa Ginoong Jesukristo ihatag gayod sa Dios Amahan. Kini mapamatud-an kung kita makasinati og problema o kalisdanan nga ato gihapon malatas og daghan pa nga mga panghitabo nga atong ihalad ngadto sa Amahan.

Giyang Pangutana sa Pagpaambit:

1. Giunsa nimo pagpakita ang imong paghigugma sa Dios og sa kaigsuonan?
2. Gidungog ba ang atong mga pag ampo sa Ginoo? Unsa pamaagiha? ipaambit

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Alejandro Serato Analyn Ligutan
Evelyn Magpatoc Jesie Tapang

Ikalimang Domingo sa Pagkabanhaw May 10, 2009

noreply@blogger.com (CIMT) — Tue, 05 May 2009 17:26:00 +0000

Unang pagbasa:Buhat 9:26-31
Salmo: Ps 22:26-32
Ikaduhang Pagbasa:1 Jn 3:18-24
Tema: Si Hesus ang Matuod nga Balagon

Pasiunang Awit:
Pasiunang Pag-ampo:
Pasiuna:

Ining ikaduhang wali sa panamilit si Jesus nagdapit nato sa pagpabiling makanunayon sa atong relasyon ngadto sa Ginoo. Daghang sambingay ang gigamit sa Ginoo ang punoan sa paras gikan sa Bibliya. Mao sab ang kahulugan sa maayong magbalantay.
Ang Ginoo mao ang nagpugas sa maayong binhi nga mao ang tawo ug gialimahan sa Diyos Amahan basin pa mamunga kinig maayo.
Apan sukwahi sa gidamhan. Ang mga tawo wala magbunga ug maayo. Naggahi ang ulo ug dili mutuman sa mga kasuguan isip mga kristiyano unsay angay buhaton nga makasunod kita niya og kita mahisama sa mga Balagon nga magbungag maayo?

Pagbasa sa Ebanghelyo: Sumala ni San Juan

Kapitulo 15, versikulo 1 ngadto sa 8 kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Ang atong ebanghelyo karon naghisgot mahitungod sa sambingay sa Balagon og ang sanga; si Hesus mao ang punoan, ang katawhan mao ang sanga, ang bunga mao ang mga maayong buhat og ang Dios Amahan mao ang nag-uma niini.

Susama sa pag-atiman sa Paras (balagon) nga kinahanglan og espesyal nga pag-amuma; nga kon adunay sanga nga dili mamunga og maayo moabot ang panahanon nga pul-ongon kini og ilabay. Susama sa atong pagkakristiyano aduna usab mga sanga nga angay putlon nga mao ang mga kristiyano nga dili mutuo sa pulong sa Ginoo, mga tawo nga maminaw apan walay buhat, mga tawo nga maminaw inubanan sa buhat apan huyang, kulang sa pagsalig sa Dios. Dali ra moatras inig abot sa panahon sa problema og kalisdanan. Ang kristiyano nga nagpakabuta bungol sa pulong sa Dios. Angay gayod nga putlon og ilabay. Sakit nga pamalandongon apan mao kini ang sangpotanan ug mao usab kini ang mensahe sa ebanghilyo.
Ang Ginoo miabot nga naghayag kanato og kinabuhi nga atong gipahimuslan karon iyang gihimo nga kita mahado-ul kaniya, nga gihataga’g kinabuhi diha sa relasyon sa Balagon o sanga. Sama nga kung kita konektado kaniya pinaagi sa sakramento sa simbahan atong masinati ang walay sukod nga panalangin og grasya. Atong makita niining maong relasyon ang kahamugaway sa luyo sa kalisod, luwasonon nga kahimtang, panahon sa kagubot og kasadya og sa takna sa kaguol. Kita usab, makasinati sa kahimayaan diha sa pagdala sa iyang ngalan. Angay nga magpasabot kita sa kanunay nga suod kita sa Ginoong Hesus, nga nahimong possible pinaagi kaniya maluwas kita sa kamatayon og mahimayaong mabanhaw kita uban kaniya og makabaton sa kinabuhi walay katapusan. Tungod kaniya namunga ta ug mga maayong buhat og uban kaniya atong nasinati ang kalipay ug kalinaw nga dili mahatag ning kalibutana ug tungod sa iyang gugma kita unta mahimong mga alagad uban sa iyang simbahan ug kita mopanaw padulong sa kaluwasan ug magmalipayon kita kuyog niya hangtod sa kahangturan.

Mga giyang pangutana sa pagpa-ambit:

1. Isip sanga sa balagon,unsay angay nimong buhaton aron mamunga og maayo?
2. Sa imong mga kasinatian. Unsa panghitabo sa imong kinabuhi nga daw naka pahimulag sa atong Ginoo.
Palihug ipa ambit.

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Dante Sagales Rovie Guevero
manilyn Pacaldo Roche Guevero

Ika-upat nga Domingo sa Pagkabanhaw May 3, 2009

noreply@blogger.com (CIMT) — Tue, 05 May 2009 17:23:00 +0000

Unang pagbasa:Buhat 4:8-12
Salmo: Ps 118:1, 8-9, 21-23
Ikaduhang Pagbasa:1 Jn 3:1-2
Tema: Si Hesus ang Maayong Magbalantay nga Nag-atiman kanato.

Pasiunang Awit:
Pasiunang Pag-ampo:

Pasiuna

Ang maayong magbalantay buhaton gayod ang tanan alang sa kaayuhan og kalamboan sa iyang panon o mga ginsakpan. Samtang adunay dakong kalahi-an ang magbalantay nga tag-iya sa panon og magbalantay nga sinuhulan. Ang sinuhulan nga magbalantay; nagtrabaho og nagbantay lamang tungod kay kini ang iyang trabaho og aron makakuha siya sa iyang sweldo. Wala siya’y lawom nga pagbati ngadto sa iyang gibantayan kay lagi dili man siya tag-iya. Mao ni ang rason nga sa higayon nga adunay mga hulga o problema sa panon dili niya buhaton ang tanan bisan pa kini ang kaayohan o makadaut sa tanan.
Ug atong hinumduman nga si Hesus mao ang maayong balantay kanatong tanang iyang mga katawhan. Giisip kita niya nga iyaha kay siya nagpakamatay man alang kanato nga aron kita maluwas. Susama usab sa pagpangita niya sa usa ka nawalang karnero nga mao kita (Mt 18:12-14).
Kita usab mga magbalantay sa nagkalain-laing paagi; kitang mga lideres sa nagkalain-laing kapilya, mga ginikanan nga mga magbalantay usab sa tagsa-tagsa ka pamilya. Apan diha sa atong pagkamagbalantay unsa kaha tang klaseha nga magbalantay tag-iya o sinuhulan?

Pagbasa sa Ebanghelyo: Sumala ni San Juan

Kapitulo 10, versikulo 11 ngadto sa 18 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

Kitang tanan mga magbalantay sa nagkalain-laing kahimtang. Apan kinahanglan nga si Hesus maoy atong himuong modelo sa atong pagkamagbalantay. Kinahanglan atong hibaloan nga sa matag karon og unya adunay mga kaaway nga maningkamot sa pagguba ug pagpatibulaag sa atong panon. Kinahanglan nga isip nga modelo ato likayan ang mga buhat, bisyo ug batasan nga maoy gitan-aw sa atong mga sumusunod. Si Hesus naningkamot nga mahiusa ang tanang sakop sa iyang panon. Gilauman nga ato usab buhaton kutob sa atong mahimo nga diha sa atong katilingban atong isalikway ang dautang mugna sa kaaway sa Dios, nga maoy nakaguba o nagpatibulaag sa kahiusahan sa katawhan sa dios. Ato paningkamotan nga sa bisag pinakasimple nga paagi mamahimo kitang tulay o instrumento sa kahiusahan.
Si Hesus kanunay usab naghatag ug pag-atiman sa atong panginahanglan. Iya usab ta kanunay nga gipanalanginan ug gihatagan sa atong mga panginahanglan ug labaw sa tanan aron kita maluwas ug mabalik ang atong relasyon ngadto sa Ginoo. Kung kita mga matinud-anon og magmapadayonon sa pag-alagad ug pagsunod kaniya, dili kita niya pasagdan.
Adunay dagkong katalagman nga moatake sa maayong magbalantay sa iyang mga karnero nga mao ang pagsunod sa laing tingog. Ang pagsunod sa laing tingog naglarawan sa atong pagtalikod sa awhag sa atong Ginoo sa pagpuyo nga matarong, masinugtanon ug mainampoon nga kinabuhi. Atong ipahilayo ang atong kaugalingon nga maukopado sa mga kalibutanong mga butang sama sa salapi, gahum ug pagdayeg. Kini ang hinungdan nga wala nga kitay panahon sa Ginoo og sa atong isig ka tawo. Sa ingon niini, makapuyo ta sa usa ka yano o simple nga kinabuhi nga maoy gustong mahitabo sa atong Ginoo kanato. Ang Amahan og ang Anak uban sa Espiritu Santo kanunay nagkahiusa og nagkasabot sa ilang mga plano ug buluhaton alang sa atong kahiusahan ug kalamboan. Kita usab giawhag nga makighiusa diha sa atong tagsa-tagsa ka mga kristohanong katilingban diha sa atong mga kumonidad. Pinaagi niini mopatigbabaw ang kalinaw, kadasig og kalamboan alang sa tanang katawhan sa Dios.

Mga giyang pangutana sa pagpa-ambit:

1. Isip usa ka magbalantay diha sa atong katilingban, o diha sa tagsa-tagsa ka pamilya, giunsaa man nimo pagpakita ang pagkamaayong magbalantay?
2. Kitang mga sakop sa panon sa mga karnero ni Hesus, giunsa man nato pagpakita nga kita nakabati sa iyang tingog?
3. Adunay ba’y panahon na naging usa kita ka dili maayo na magbalantay sa atong katilingban ug pamilya? Sa unsang pamaagi?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Efren Hermones Lea Avila
Nida E. Parilla Jimboy Lawag

Ikatulong Domingo sa Pagkabanhaw April 26, 2009

noreply@blogger.com (CIMT) — Mon, 30 Mar 2009 17:09:00 +0000

Unang pagbasa:Ac 3:13-19
Salmo: Ps 4:2-9
Ikaduhang Pagbasa:1 Jn 2:1-5
Tema: Si Jesus nagpakita ngadto sa iyang mga tinun-an Human sa Iyang Pagkabanhaw

Pasiunang Awit:
Pasiunang Pag-ampo:

Pasiuna:
Diha sa atong Ebanghelyo karon naghisgot sa pagpaila ni Jesus nga siya ang Kristo nga naghatag ug kalinaw. Daghang mga pangutana dinhi sa matag usa kanato mahitungod sa Ginoo. Ang Ginoo naghangyo kanato nga dili kita mabalaka og magduha-duha. Gipakita ug gipahikap sa Ginoo ang iyang mga kamot ug mga tiil sa iyang mga tinun-an kay sila nahadlok ug nagduda nga siya Espirito kay ang espiritu walay unod og bukog. Iya kini gibuhat aron sila mutuo nga siya mao siya nga nabanhaw. Bisan pa ug gipakita sa Ginoo ang iyang mga kamot ug ang mga tiil nga mga samdon daghan gihapon ang wala mituo. Ang Ginoo nag-antos alang sa iyang mga katawhan nagpakamatay siya sa krus aron maluwas ang mga sala sa iyang mga katawhan ug naghangyo siya kanato nga dili kita mabalaka og dili kita mag duha-duha kaniya ug sa iyang gahum.

Pagbasa sa Ebanghelyo: Sumala ni San Lucas

Kapitulo 24, versikulo 35 ngadto sa 48 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw o Pagpalawom:

Diha sa atong ebanghelyo naghisgot sa pagkabanhaw ni Jesus, gipasabot usab sa ebanghelyo nga si Jesus mao usab ang Kristo,. Ang pagsulti ni Jesus sa “Ang kalinaw maanaa kaninyo” mao kini ang paghatag ug katumanan sa iyang tahas isip Mesiyas o Manluluwas. Ang iyang pag-antos sa krus nahatala na sa kasulatan pinaagi kang Moises ug sa mga Propeta. Kini mao ang naghatag kanato sa atong kaluwasan. Nahisgutan kini nga mga panghitabo tungod sa mga saksi sa gidangatan ni Jesus. Gipamatud-an sa mga saksi nga si Jesus nabanhaw, ug kini nagpakita o nagpadayag sa pagka importante sa krus, nagpakita nga angay gayod matuman ang iyang mga misyon, ug paghatag sa sekrito sa gahom nga mao ang pagpamalandong, pag-ampo og pagpasalamat sa nahitabo sa iyang misyon. Si Jesus igo lang nagtuman sa kabubut-on sa iyang Amahan nga atoa sa langit.

Mga Giyang Pangutana:

1. Sa unsa nga pamaagi ikaw nagpakita isip sumusunod ni Jesus?
2. Nakapaambit ka ba s a imong kaigsuonan sa tahas nga gisangon kanimo sa atong Ginoo?
3. Nakapasabot ka ba sa imong mga kaigsuonan nga mahinungdanon kaayo ang atong pag-ampo og pagtuo?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Ruel C. Saturnino P. Myrna C.
Arsenia M. Susana H. Luz P.
Bebeth C. Elvie M.

Ikaduhang Domingo sa Pagkabanhaw April 19. 2009

noreply@blogger.com (CIMT) — Mon, 30 Mar 2009 17:04:00 +0000

Unang pagbasa:Ac 4:32-35
Salmo: Ps 118:2-24
Ikaduhang Pagbasa:1 Jn 5:1-6

Pasiunang Awit:
Pasiunang Pag-ampo:

Tema: Nagpakita sa Hesus ngadto sa iyang mga Tinun-an.

Pasiuna:
Ang atong ebanghelyo karun naghulagway sa mga kasamok sa kinabuhi nga possible natong bation sa matag karon og unya ilabi na kung makasinati kita ug mga pagsulay sa kinabuhi. Sa gabii niaanang adlaw sa domingo sa pagkabanhaw nagsagol-sagol ang gibati sa mga tinun-an ni Hesus; adunay kaguol, kasakit, kaligotgot, pagdumot, ug labaw sa tanan ang kahadlok nila sa mga sundalong Romano. Kay sila man ang gipasanginlan sa pagkawat kang Hesus sa lubanganan. Kini nagpakita sa pagbulag o pagbiya sa mga apostoles sa ilang pagka Judio. Dinhi nahimugso ug nagsugod ug milig-on ang Kristianismo. Ilabi na sa ilang pagkakita ni Hesus ug gitugyan kanila ang tahas ug katungod sa pagpadayon sa iyang misyon. Gipakunsad usab ni Hesus ngadto kanila ang iyang Balaang Ispirito nga maoy magtudlo ug magiya kanila kung unsa ang ilang angayan nga buhaton. . Ang pagkabanhaw dili makamugna ug pagtuo kundili ang pagtuo maoy nakahimo nga possible sa pagkabanhaw. Ug kini nagpunting ug nag-aghat sa atong pagtuo sa Ginoo ug sa iyang mga buhat.

Pagbasa sa Ebanghelyo: Sumala ni San Juan

Kapitulo 20, versikulo 19 ngadto sa 31 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

1.Ang kasakit sa Kamatayon ni Hesus
Sa atong kinabuhi usa kita nga nakatampo sa kasakit nga natagamtaman ni Hesus. Gidawat ni Hesus ang mga pagbugal-bugal ug pagsakit kaniya. Tungod sa iyang dakong gugma kanato, bisan pa man sa atong nabuhat nga mga kasal-anan nagpalansang si Hesus sa Krus. Ug nagpakamatay tungod ug alang sa kapasayloan sa mga sala sa iyang mga katawhan. Sa atong mga kasakit nga nasinati sa atong kinabuhi dili kita mahadlok tungod sa atong dakong pagtoo nga anaa si Hesus nga sa Kanunay mohupay ug mohatag ug dakong gugma ngadto sa tawo nga makamao magpaubos og moangkon sa iyang pagkamakasasala.

2. Ang pagdawat sa mga tinun-an nga si Hesus patay na ug wala na silay mahimo; kini nagtudlo kanato sa pagpaubos ug pagsalig sa Dios kay wala usab kitay mahimo kung sa ato lang kinaugalingon nga pagpaningkamot kung wala ang Ginoo.

3. Kanunay natong hinumdoman nga ang kinabuhi sa tawo puno sa sorprisa sama sa mga tinun-an nga nasorprisa sa pagkakita ni Hesus kanila ug mibati sila ug tumang kalipay og dakong paglaum. Kita molaum usab nga kita makadangat sa kalipay nga langitnon ug makabaton sa kinabuhing madagaya-on. Kita dili gayod mahadlok kay ang Ginoo kanunay nagdasig ug nag-ingon sa daghang higayon. Ang kalinaw maanaa kaninyo.

4. Kaligotgot o kayugot sa mga tinun-an nga gipatay si Hesus. Ang mga tinun-an nagplano nga sa ilang pagtoo nga ang ilang gibuhat nagtuo sila nga maayo. Apan ang uban kanila nasuko ug nagligotgot sa gibuhat sa mga kadagkuan sa mga judeo sa ilang pagpatay ni Hesus. Nawala ang ilang kaluoy ug gugma nga unta mahimo pa man pasayloon ang mga Judeo sa ilang gibuhat. Ang atong Dios nagtudlo man kanato sa pagkamahigugmaon ug pagkamaluluy-on. Mao kini ang kahimtang sa atong katilingban karon. Nag-awhag kanato Hesus sa pagtoo kaniya nga siya mao ang Ginoo, og Dios kay bisan pa sa ilang gibuhat kaniya iya lang gihapon sila nga gipasaylo. Busa kinahanglan nga atong batonan ang gugma ug kaluoy sumala sa gibuhat sa atong Ginoo kay siya mao man ang dalan sa katarong ug dalan sa kalinaw. Kinahanglan nga kanunay kita andam sa pagpasaylo sa bisag kinsa nga makabuhat ug dili maayo kanato.

Giyang Pangutana sa Pagpaambit

1. Sa atong kinabuhi, nga daghan ang gisagubang nga mga problema; naminaw ba kita kang Hesus nga nag-ingon “Ang Kalinaw Maanaa Kaninyo! Ayaw kahadlok? Unsa man ang mga kaayohan nga imong nadawat pinaagi niini?

2. Unsa nga pulong o mga pulong diha sa ebanghelyo nga ato gibasa karon ang nakatandog kanimo? Ngano man?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Alejandro Serato Arsenio Villar
Felicitas Lanuza Nida Parilla
MaryGrace Badil Ricardo Arcillas
Jimboy L.

Domingo sa Pagkabanhaw April 12, 2009

noreply@blogger.com (CIMT) — Mon, 30 Mar 2009 16:52:00 +0000

Unang pagbasa:Buhat 10:34-43
Salmo: Ps 118:1-23
Ikaduhang Pagbasa:Col 3:1-4
Tema: Ang Tinuoray nga Katoliko/Kristiyano malaumon.

Pasiunang Awit:
Pasiunang Pag-ampo:
Pasiuna:

Sa mata sa Ginoo og sa tibuok kalibutan nasayod nga si Hesus ang Propeta nga labing gamhanan og manluluwas sa tanang katawhan. Apan gihukman siya sa mga pangulong pari ug gisilotan sa kamatayon pinaagi sa paglansang sa krus.
Gipaila niya ang iyang kaugalinon pinaagi sa kasulatan gikan kang Moises ngadto sa mga propeta apan wala kita mutuo sa mensahe. Miingon si Hesus “pagkabugo gayud ninyo! Pagkamubo sa inyong panabot wala ba masulat nga ang anak sa Dios kinahanglan nga mag-antos niining tanan.
Kita usab kinahanglan atong sundon ang iyang pagkama-antuson, pagkama-paubsanon, pagkama-pasayloon ug pagkamaloloy-on. Hinaut unta nga ato mailhan si Jesus sama sa iyang pagpaila sa iyang kaugalingon diha sa pagpikas-pikas sa pan.

Pagbasa sa Ebanghelyo: Sumala ni San Juan

Kapitulo 20, versikulo 1 ngadto sa 9 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

1. Ang tinuod nga Kristianos/katoliko dili lang maglantaw sa karon kundili maglantaw usab siya sa umaabot. Lantawon nato ang atong mga kaugalingong kinabuhi og ang kinabuhi sa uban ilabi na diha sa atong tagsa-tagsa ka katilingban. Kinahanglan kahibalo kita kung unsa ang angayan ug maayong buhaton ilabi na alang sa atong mga kaigsuonan kung adunay mohapak nga katalagman. Dili nato sila biyaan ug atong dawaton nga sila ato usab mga responsibilidad kay mao kini ang timailhan sa tinuod nga katoliko/kristiano.

2. Sa upat ka mga magsusulat sa Ebanghelyo ila gipakita o gihulagway si Jesus nga nagrespeto sa pinakataas nga regalo sa mga tawo nga mao ang kagawasan o freewill. Giholat ni Jesus nga ma-abli ang panghuna-huna ug kasingkasing sa mga tawo nga iya gika-estoryahanay. Kita usab giawhag ni Jesus nga atong ablihan ang atong tagsa-tagsa ka kasingkasing og mata aron mahibaw-an ug makakita ang kamato-oran diha kang Kristo Jesus. Sa kadugay na sa panahon nga nakig-uban kita ni Hesus diha sa Simbahan ug sa atong inadlaw nga kinabuhi ato na ba siya nailhan? Bisag wala ta makasaksi sa mga kaagi sa Ginoo kay ang iyang mga tinun-an lamang ang nakahimo niini: gilaauman nga ang tanan niyang mga tinun-an o sakop sa Simbahan makaila u8g mutuo kaniya pinaagi sa Balaang kasulatan ug sa mga tradisyon sa mga Apostoles ug sa Simbahan nga iyang gitukod. Gi-awhag usab kita sa Ginoo nga atong himuong mga pagtulun-an ang mga dili maayong paghitabo sa atong kinabuhi alang sa mas hayag ug maayo nga kaugmaon.

3. Si Jesus dili lang makita diha sa Eukaristiya ug sa dagko nga mga simbahan. Makita usab Siya diha sa mga ordinaryong pag-inambitay ug pagpangaon sa mga sakop sa pamilya.

Mga giyang pangutana sa pagpa-ambit:

1. Unsa kamahinungdanon alang kanimo ang pagkabanhaw ni Kristo?
2. Unsa man ang kasagaran ug angayan mong buhaton aron sa pagsusi o pagtuki sa kamatuoran?
3. Unsa nga pulong o mga pulong diha Ebanghelyo nga atong gibasa karon ang nakatandog kanimo? Ngano man?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Dante Sagales Cathy Candia
Elias Mistula Anelyn P.
Orland Tapang Ben N.
Letecia Singahan

Domingo sa Bendita sa Lukay April 5, 2009

noreply@blogger.com (CIMT) — Mon, 30 Mar 2009 16:19:00 +0000

Unang pagbasa:Is 50:4-7
Pasiunang Awit: Salmo: Ps 22:8-24
Pasiunang Pag-ampo: Ikaduhang Pagbasa:Ph 2:6-11

Tema: Ang Pagsulod ni Hesus sa Jerusalem Maoy Katumanan sa Iyang Misyon sa Pagluwas sa Katawhan

Pasiuna

Ang atong Ebanghelyo karong Domingoha naghisgot mahitungod sa pag-adto ni Hesus sa Jerusalem duha ka adlaw kanus-a ang Pasko sa pagsaylo sa mga Judeo. Kining kasaulogan usa ka dako ug importanting okasyon alang sa mga Judeo tungod kay dako kaayo ang kamahinungdanon niini ngadto sa ilang relehiyon ug kultura. Kadaghanan sa mga Judeo nga nagpuyo sa nagkalain-laing nga nasud mangadto sa Jerusalem niining maong panahon aron pag-apil sa mga tulumanon kabahin niining maong kasaulugan.
Dungan sa pagpangandam sa maong kapaskuhan ang mga kadagkuan sa mga Judeo nagplano sa pagpatay kang Hesus kay ilang nakita nga siya hulga sa ilang mga gahum ug pagtuo. Mao usab kini ang panahon diin gibudhian ni Judas Iskariote si Hesus pinaagi sa pagtugyan kaniya ngadto sa mga kadagkuan sa mga Judeo bugti sa salapi nga gihatag kaniya sa mga Judeo.
Kining maong hitabo diha sa Bibliya ug sa kinabuhi sa atong Simbahan nagdapit ug nagpahinumdum kanatong mga sakop niini sa pagsinati sa nakaluwas nga sakripisyo sa atong Ginoong Hesus aron kita maluwas. Kita usab giawhag nga dili nato isakripisyo ang atong pagtuo ug kaluwasan bugti sa mga butang nga lumalabay lamang ug dili makahatag ug tinuoray ug malungtarong kalipay.

Pagbasa sa Ebanghelyo: Sumala ni San Marcos

Kapitulo 14, versikulo 1 ngadto sa 15 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw ug Pagpalawom:

1. Ang Fiesta sa Pasko sa Pagsaylo
Kining maong pasko maoy pinakaimportanting kapistahan alang sa mga Israilita. Kini tungod kay pinaagi sa pasko sa Pagsaylo nahimo sila nga gawasnon gikan sa gahum sa mga Ehiptuhanon. Pinaagi sa Pagsaylo o Pass-over wala patya sa Ginoo ang mga kamagulangang anak sa mga pamilya nga nagtuman sa mga lagda kabahin sa pag-ihaw ug paghalad sa nating karnero ngadto sa Ginoo. Kini mao ang katapusan nga gihimo sa Ginoo aron ang Paraon (hari sa Ehipto) mutugot nga pagawson ang mga Israilita gikan sa Ehipto paingon ngadto sa kamingawan aron makasimba kaniya. Ato mahinumduman ug mabasa diha sa libro sa Exodus sa Daang Kasabutan sa Bibliya nga ang Ginoo naghimo ug napulo (10) ka mga katalagman pinaagi nila ni Moises ug Aaron didto didto sa Ehipto aron tugutan ni Paraon ang mga Israilita sa pag-adto sa kamingawan aron makasimba kaniya. Apan bisan pa sa nagkalain-laing mga katalagman si Paraon nagpabiling gahi ug wala mitugot.
Mao nga ang Ginoo nagmando sa mga Israilita didto sa Ehipto pinaagi ni Moises sa paghalad ug nating karnero ug pagpahid sa dugo niini sa pultahan ug haligi sa ilang mga balay. Pinaagi niini kadtong mga panimalay nga dili motuman sa sugo sa Dios patyon ang ilang mga kamagulangang anak nga lalaki kamagulangang anak sa ilang mga hayopan. Nangamatay ang tanang kamagulangang lalaki sa mga Ehiptuhanon; ang pinakauna mao ang kamagulangang anak ni Paraon ug ang tanang kamagulangang anak nga lalaki sa tanang mga kahayupan sa Ehipto. Tungod niini mitugot na si Paraon nga manglakaw ang mga Israilita ngadto sa kamingawan aron pagsimba sa Ginoo.
Ang kamahinungdanon niining maong kapistahan nadtug-an usab sa kadako sa mga pagpangandam ug mga kalihukan kay pinaagi niini nadawat sa mga Israelita ang ilang kagawasan ug kaluwasan. Sa atong bag-ong panahon karon (Panahon ni Kristo) ato usab madawat ug mabatunan ang kaluwasan ug kagawasan gikan sa sala pinaagi sa pagtuman sa mga kasuguan sa Dios o ni Kristo. Ang atong kaluwasan ato lamang madawat pinagi sa pagtuo ug pagsunod kang Kristo.

2. Gitugyan ni Judas Iscariote si Hesus ngadto sa Pareseo
Kining maong paghitabo diha sa atong balaang kasulatan usa ka makalilisang nga hitabo. Kini tungod kay maglisod kita sa pagdawat sa kamatuoran nga mismo usa sa mga apostoles ni Hesus magbudhi kaniya. Isip usa ka tawo; ang mga kinaiya Hudas: ang pagkamasinahon, seloso, ambisyoso ug ang pagkamatinumanon sa iyang gusto maoy nagtukmod kaniya sa pagbuhat sa ingon. Kining mga kinaiya naa usab sa matag usa kanato. Kinahanglan nga atong kontrolon ang atong mga kaugalingon aron dili kita mahisama kang Judas nga nagbudhi sa Ginoo. Ato itanom sa atong tagsa-tagsa ka kasing-kasing ug huna-huna nga sa matag higayon nga nagbuhat kita ug dili maayo ngadto sa atong mga igsuon ug mga silingan ato usab nga gibudhian ang atong Ginoo.

Mga giyang pangutana sa pagpa-ambit:

1. Unsa ang gikatabang sa mga kasaulogan diha sa atong tinuohan alang sa atong kaluwasan? Palihug sa pagpaambit.

2. Unsa man ang mga angayan natong usbon diha sa atong kaugalingon ug katilingban aron dili kita mahisama ni Judas nga nagbudhi sa Ginoo?

3. Unsa man ang pulong o mga pulong diha sa atong Ebanghelyo nga gibasa karon ang nakatandog kanimo? Ngano man?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Efren Hermones Alvin Sosmeña
Brenda Taneo Enriquita Elias
Maria Berdida Marilyn B.
Jhunriel Guinocor Mary Jane Parilla

IKA-LIMA NGA DOMINGO SA PANAHON SA KWARESMA Marso 29, 2009

noreply@blogger.com (CIMT) — Sun, 01 Mar 2009 14:21:00 +0000

Unang Pagbasa: Jer 31: 31-34
PASIUNANG AWIT: Salmo 51: 3-15
PASIUNANG PAG-AMPO: Ikaduhang Pagbasa: Heb 5:7-9

TEMA :Ang Liso Kinahanglan Mamatay

PASIUNA:

Diha sa atong Ebanghelyo karon nakakita si Hesus ug kahigayunan pinaagi sa pangutana sa mga Greyigo nga ang iyang Gingharian mukaylap sa tibuok kalibutan human sa iyang kamatayon sa krus ug pagkabanhaw.
Sama sa usa kalugas nga trigo magpabilin nga usa ra gayod kini ka lugas gawas kon kini ipugas sa yuta ug mamatay. Kini nagpunting sa kinabuhi ni Jesus, nga kinahanglan siya mamatay aron matawo ang simbahan ug ang tanan nga mutuo kaniya nga siya Anak sa Dios ug siya Dios makadawat sag anti sa kinabuhing dayon. Kinahanglan nga kita mutuo ug motuman sa kabubut-on sa Dios Amahan, Anak ug Espiritu Santo aron ato madawat ang ganti nga gisaag alang niini.

Pagbasa sa Ebanghelyo: Sumala ni San Juan

Kapitulo 12 bersikulo 20 ngadto sa 33 (kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

PAGPATIN-AW UG PAGPALAWOM:
1. Ang Kaluwasan alang sa tanan

Ang mga Greyego mga Gentil ug dili mga Israelita o mga Judeo. Sila gidawat didto sa Templo sa mga pareseo apan sa dapit nga alang lang kanila apan giisip sila nga mga ubos kaysa mga Judeo. Ila nga gipangutana si Hesus mahitungod sa kinabuhing dayon. Kadtong ilang pangutana naghatag kang Hesus ug higayon sa pagpahibalo nga ang kaluwasan alang sa tanan ig ang iyang ssimbahan mukaylap sa tanang dapit sa kalibutan

2. Ang Pagtuo ug Dugo sa mga Apostoles ug mga Martir

Sa panahon sa pagpanglutos, napamatud-an kung unsa kadako ang pagtuo sa mga apostoles. Kay ang ilang mga dugo maoy nagsilbing abuno aron kita o ang simbahan molambo ug moabot hangtod karong panahona. Ang mga marter simbolo ug nagpamatuod o nagpalutaw sa matuod nga simbahan ni Jesus. Sila naghalad sa ilang kaugalingon pinaagi sa pag-antos tungod sa pagdawat sa mga paglutos sa ilang gibarugan nga pagtuo. Kay kon wala pa sila magpakita sa ilang pagtuo pinaagi sa ilang misyon dinhi sa kalibutan dili malig-on ang simbahan ni Jesus nga iyang giula-an sa iyang kinabuhi ug dugo.

2. Ang Kamatayon ni Hesus

Ang kamatayon ni Hesus didto sa Krus maoy nahimong yawe sa atong kaluwasan. Kung iya kini nga gilikayan hangtod karong dili pa nato madawat ang kapasayluan sa atong mga sala ug hanap ang atong pag-angkon sa kinabuhing dayon. Ang iyang kamatayon nasama sa pagtisok sa liso diha yuta. Kung ang liso dili mamatay pinaagi sa pagpugas niini diha sa yuta dili kini mutubo ug mamungag daghan. Piaagi usab sa kamatayon ni Hesus didto sa krus naghatag kanato ug kahayag aron ato maangkon ang kaluwasan
Gihalad ni Hesus ang iyang kinabuhi aron kita maluwas. Kinahanglan maghalad usab kita ngadto sa Ginoo. Ang paghalad sa usa ka butang o sa kinabuhi pinaagi sa atong mga talento, panahon ug mga material nga butang isip iyang mga sumusunod kinahanglan nga atong buhaton agi’g pasalamat sa iyang dakong gugma kanato.

MGA GIYANG PANGUTANA SA PAGPA-AMBIT:

1. Sa atong pagkinabuhi, mahisama ba kita sa usa ka lugas nga trigo, nga sa panahon sa tingpugas mobunga ug daghan? Sa unsang paagi?
2. Andam ba kita nga magsakripisyo sa atong kaugalingon alang sa uban? Sa unsang paagi? Palihug pagpaambit.

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Alejandro Serato Maryjane Parilla
Brenda Taneo Eliasar Paclibare
Gerardo Diaz

IKA-UPAT NGA DOMINGO SA PANAHON SA KWARESMA Marso 22, 2009

noreply@blogger.com (CIMT) — Sun, 01 Mar 2009 14:20:00 +0000

Unang Pagbasa: 1Kro. 36:14-23
PASIUNANG AWIT: Salmo 137: 1-6
PASIUNANG PAG-AMPO: Ikaduhang Pagbasa: Ef 2:4-10

TEMA: Ang Kinabuhing Dayon ato Maangkon diha sa Pagtuo kang Hesus

PASIUNA:

Ang mga Israelita nakalikay sa kamatayon gikan lala sa pinaakan sa bitin pinaagi sa pagtan-aw sa giisa nga bitin ni Moises. Sa atong panahon maluwas usab kita ug makaangkon sa kinabuhing dayon pinaagi sa pagtuo kang Hesus nga namatay didto sa Krus ug nabanhaw human sa tulo ka adlaw.
Ang atong pagtuo kinahanglan nga ato ubanan ug pagbuhat kay ang atong balaang kasulatan nag-ingon man nga ang pagtuo nga walay buhat patay nga pagtuo. Ang tawo nga mutuo lamang ug dili magbuhat sumala sa iyang gituohan mahisama sa usa ka tawo nga mibarog atubangan sa usa ka dakong salamin diin iya nakita ang iyang tibuok nga hulagway ug iyang nakita ang mga buling diha sa iyang nawong. Apan bisan pa man sa iyang nakita nga mga buling sa iyang nawong wala siya mangita ug paagi o mga paagi aron kini mawala ug matangtang.
Ang krus mao lang ang dalan atong kaluwasan. Kinahanglan magsakrisyo kita aron kita maluwas.

Pagbasa sa Ebanghelyo: Sumala ni San Juan

Kapitulo 3 bersikulo 14 ngadto sa 21 (kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

PAGPATIN-AW UG PAGPALAWOM:

1. Mutuo kang Hesus

Si Hesus nagpaila sa iyang Amahan nga ato usab Amahan ug Ginoo. Kining maong Amahan dili Amahan nga tagsilot kon dili Amahan nga mahigugmaon, mapasayluon, ug manggihatagon. Ang klasi sa Amahan nga gipaila kanato ni Hesus dili magpahilak kanatong iyang mga Anak kung dili kinahanglanon. Naay mga panahon nga mutugot siya nga kita muhilak aron mamahimo kitang maayong mga Anak.
Sa daghang higayon diha sa atong balaang kasulatan gipaila sa Dios Amahan sa Hesus isip iyang Anak ug nagdapit ug nag-awhag kanato nga ato siya paminawon ug tuhuan. Si Hesus usab nag-ingon nga siya “Mao ang Dalan, ang Kamatuoran, ug Ang Kinabuhi”. Kining tanan nagpasabot nga kung kita tinuod mga Anak sa Dios ug mga sumusunod Kristo; kinahanglan nga mutuo ug musunod kita kaniya sa walay pagduha-duha aron ato madawat ang kinabuhing dayon.

2. Ang Kinabuhing Dayon.

Ang kinabuhing dayon mao usab ang kinabuhi diha sa kalinaw. Kining kalinaw nagpasabot sa kalinaw o maayong relasyon sa matag tawo ngadto sa Ginoo, sa isig ka tawo, sa kaugalingon, sa kinabuhi, ug kalinaw nga walay kinutuban. Maipakita nato ang atong maayong relasyon sa Ginoo diha sa pagkamaapuon ug pagtuo nga siya makagagahon sa tanan. Ato usab kini maipakita diha sa atong maayong pagpakigrelasyon sa isig ka tawo nga kita andam kanunay sa pagpasaylo, pagsabot ug pagtabang kay una sa tanan gipasaylo na kita sa Ginoo mao nga dili kita magmakuli sa pagpasaylo sa atong isig katawo. Maangkon nato ang kalinaw sa kinabuhi kung mutuo kita nga dili kita pasagdan sa atong Dios Amahan. Maangkon usab nato ang kalinaw sa atong kaugalingon kung atong angkunon ang kamatuoran nga dili kita hari sa atong kinabuhi kun dili sa Hesus. Kining tanan kung ato mahuptan magdala kanato ngadto sa kalinaw nga walay kinutuban.
Apan kung dili kita mutuo kang Kristo dili nato maangkon kining giingon kinabuhing dayon nga iyang gitagana alang kanato.

MGA GIYANG PANGUTANA SA PAGPA-AMBIT:

1. Sa imong kinabuhi sa unsa nga paagi imong maipakita ang imong pagtuo kang Hesus nga Anak sa Dios Amahan?
2. Unsa nga mga pulong ang nakapatandog kanimo pag-ayo diha sa atong Ebanghelyo karon? Ngano man?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Ruel Chaves Jessie Tapang
Evelyn Magpatoc Glecerio Canete
Sabina Cabantoy

IKA-TULO NGA DOMINGO SA PANAHON SA KWARESMA Marso 15,2009

noreply@blogger.com (CIMT) — Sun, 01 Mar 2009 14:19:00 +0000

Unang Pagbasa: Ex. 20: 1-17
PASIUNANG AWIT: Salmo 19: 8-111
PASIUNANG PAG-AMPO: Ikaduhang Pagbasa 1Cor. 1: 22-25

TEMA: Ang Pagpabarog ug Balik sa Templo sulod sa Tulo ka Adlaw

PASIUNA:
Karong Domingoha ang atong Ebanghelyo naghisgot sa usa ka panghitabo sa panahon sa pagpakatawo sa atong Ginoo didto sa Jerusalem. Kini mao ang panahon sa Pasko sa Pagsaylo o Pass-over diin daghang mga tawo gikan sa halayo ug nakalain-laing nga lugar ang mangadto sa Templo sa Jerusalem aron pagtuman ug pagtahud niining adlaw sa pasko.
Nasuko pag-ayo si Jesus sa mga tawo nga mga mapahimuslanon didto sa Templo. Kini bunga o resulta sa iyang pagkamaluluy-on sa daghang mga tawo nga nagmatinud-anon sa ilang pag-alagad sa Ginoo ug pagtuman sa mga balaod nga gilatid sa pagtuman niini. Naluoy siya niining mga tawhana kay gipahimuslan man sila sa mga Pareseo ug mga tigdumala sa Templo pinaagi sa pagpamaligya didto sulod sa templo ug karnero, salampati nga taas kaayo ang presyo ug pag-ilis sa kwarta nga taas kayo ang patung o interes. Ang balay alampuanan nga usa ka balaang lugar nahimo na hinuong lugar sa negosyo diin grabi kaayo ang pagpahimulos ug pagpanglimbong.
Sa atong panahon karon daghan usab ang matang sa mga kahiwian, pagpanglimbong, ug pagpahimulos nga atong makita ug masinati dinhi sa atong katilingban. Apan sama unta ni Jesus isip iyang mga tinun-an ug mga sumusunod; dili unta kita magpabilin nga buta ug bungol. Kinahanglan nga manginlabot kita sa pagpatunhay ug pagpatuman sa kaangayan alang sa tanan.

Pagbasa sa Ebanghelyo: Sumala ni San Juan

Kapitulo 2, bersikulo 13, ngadto sa 25. ( kinahanglan basahon ang ebanghel;yo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

PAGPATIN-AW UG PAGPALAWOM:

1. Ang Templo
Ang templo sa Jerusalem amo ang sentro ug kasing-kasing sa Judeong nasud ug naghulaghway sa ilang relehiyon. Kini dapit diin nakagamot na usab ang kahiwian ug ang kahakog sa gahum. Dinhi sa Templo ang katawhan nag-agad kanunay sa mga serbisyo sa mga pari aron paghalad sa sakripisyo. Ang awtoridad ug gahom sa mga pari naagkon usab nila gimukan sa Templo. Sa Templo gihalad ang mga hayop isip sakripisyo ug gasa sa katilingban. Ang pundo tinubdan sa dakong pundo sa salapi sa mga pangulong pari. Gawas pa nagbuhis ang mga namaligyaay ug nangilisay ug kwarta.
Kining kahimtang ug hulagway sa templo niadtong panahona maoy napasuko kang Hesus kay ang tinuod nga kahulugan sa Templo ug sa Pasko sa Pagsaylo nawala na hinuon. Iyang gibati ang kalouy sa mga tawo nga gipahimuslan u gang kasuko sa mga Pareseo ug mga pangulong pari nga nagpahilus sa higayon. Dili pwedi makapalit ang mga tawo sa mga hayop nga gamiton sa paghalad didto sa gawas kay dili man aprubahan sa mga kaparian ug dili usab sila pwedi nga makapailis ug kwarta sa gawas kay dili kini dawaton isip halad didto sa Templo.

2. Ang Paguba sa Templo ug Pagpabarog ug balik niini sulod sa tulo ka adlaw

Sa pagkakita sa mga Hudeo labina ang mga Pareseo sa gibuhat ni Hesus sa mga namaliyaay ug mangingilis ug salapi ila siya nga gipangayuan ug kamaturan nga aduna siyay gahum sa pabuhat niini. “ Gun-uba kining Templo ug sa tulo ka adlaw pabarugon ko pag-usab.” Kining maong tubag ni Hesus nakamugna kahinangha ug kahibulong sa mga Hudeo kay mikabat man sa 46 ka mga tuig ang pagtukod niini unya ipabarog lang sulod sa 3 ka adlaw. Nahibulong sila kay wala sila makasabot sa mensahi nga gusto ipasabot ni Hesus.
Ang templo nga gihisgutan ni Hesus mao ang iyang kaugalingon. Ang pagkatumpag nga iyang giingon mao ang iyang kamatayon didto sa Krus ug ang pagpabarog ug balik niini mao ang iyang pagkabanhaw human sa tulo ka adlaw.
Makatabang usab kita sa palig-on sa gipabarog na nga Templo ni Hesus diha sa pagpaningkamut nga matinud-anon sa pag-ambit sa pagpangalagad diha sa atong tagsa-tagsa ka katilingban. Kitang tanan mga bahin o sakop sa lawas o Templo ni Hesus ug adunay katungdan sa pag-amping, pagpalambo ug pag-amuma niini.

MGA GIYANG PANGUTANA SA PAGPA-AMBIT:

1. Isip sakop sa katilingban o Templo sa Dios unsa man ang imong bation ug buhaton kung adunay nga pagpahimulos ug mga kahiwian nga imong makita diha sa imong katilingban?

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD
KATAPUSANG PAG-AMPO:
KATAPUSANG AWIT:

Armando Taneo Sharon Vallente
Nida Parilla Jaime Constantino
Diane Carillo

IKA-DUHANG DOMINGO SA PANAHON SA KWARESMA Marso 8, 2009

noreply@blogger.com (CIMT) — Sun, 01 Mar 2009 14:16:00 +0000

Unang Pagbasa: Gen. 22: 1-18
PASIUNANG AWIT: Salmo 116: 10-19
PASIUNANG PAG-AMPO: Ikaduhang Pagbasa: Rom. 8:31-34

TEMA: Ang Pagkausab sa Panagway ni Hesus.

Pasiuna:

Si Moises ug Elias importanting mga tawo sa Biblia, kay si moises ang bangiitan taga hatag ug balaod ug si Ilias naman ang pinakataas na propeta. Karon kauban sila ni Hesus. Kini nagpakita lang nga naa gusto ipamatuod ang Ginoo. Naa kauban sa pinakataas nga magbabalaod ug pinakataas nga Propeta, nagpaila kung kinsa si Jesus ug nagdasig kang Jesus nga magpadayon sa iyang misyon. Ang Dios sa daghang higayon ug sa nagkalainlaing paagi misulti sa mga propeta. Karon ang kaugalingong anak mao na’y iyang gipadala. Ug miingon ang Diyos “kini ang akong anak, pamati-a siya”. Kini nagpamatoud nga igsakto ang direksyon ang gihimo ni Jesus, ug nagdasig nga magpadayon siya iyang gimbuhaton.
Ang panganod ug ang bisting naggilak gipakita ni Hesus ang iyang gloriusong pagkatawo. Ang pagkatawhanon mobalhin ngadto sa pagkabag-ong kinabuhi ug kitang tanan moambit niini. Mao ni ang tubag sa atong Amahan alang sa mga apostoles ng nangandoy sa gingharian sa Diyos sa bag-ong kasaysayan ug bag-ong panahon. Kini ang pagpakita sa kahimtang ug hustisya sa Diyos nga maghari unya dinhi sa kalibutan. Ang pag-ampo mao ang pag-inambitay o ang panagtagbo sa Diyos ug sa tawo. Daghan ang pamaagi sa pag-ampo apan usa ra ang tumong. Pagbutang sa kaugalingon aron maandam atong kaugalingon sa pagpaminaw sa Diyos.

Pagbasa sa Ebanghelyo: Sumala ni San Marcos

Kapitulo 9, bersikulo 2, ngadto sa 10. ( kinahanglan basahon ang ebanghel;yo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

Pagpatin-aw/ Pagpalawom:

Ang pagka-usab sa panagway ni Hesus usa sa mga importanting mga panghitabo nga gihisgutan sa ebanghelyo ni San Markos. Dili sulagma nga gidala ni Hesus and tulo ka tinun-an (Santiago, Juan ug Pedro) sa taas nga bukid. Kini sama usab ni Moises ug si Ilias nga mitungas sa bukid aron masinati ang Diyos.
Didto nakita sa mga tinun-an ang mga inilang tawo sa daang testamento sa Bibliya,sila si Elias ug si Moises nga nakig-istorya ni Hesus. Ug kini nagpakita na sulagma ang gibuhat ni Kristo sa daan na ebanghelyo.
Sa kalit may mitabon nga panganod dungan sa tingog nga nag-ingon “ kini ang akong anak, pamati-a siya.” Sa ilang paglugsong gipinahan sila ni Hesus nga dili ipanulti sa uban ang ilang nakita . Ug ilang gitipigan sa ilang mga kasing-kasing ang tanan nga ilang nakita.
Si Pedro sa kalisang miingon “maayo unta nga dinhi nalang ta”. Dinhi gipakita ni Pedro ang iyang kabalaka ni Hesus. Kay nasayod siya nga si Hesus gipangita ug buot patyon sa mga sundalo ug Pareseo. Dili nila gusto nga mamatay ang mesiyas kay nahadlok sila sa ilang dangatan kung mawala na si Hesus gikan sa ilang pundok. Si Hesus mao’y ilang gilauman nga moluwas kanila sa kamut sa Romano.
Ang pagka-usab sa panagway ni Hesus mao’y senyales sa iyang misyon. Nigilak siya tungod sa Espiritu Santo nga nagpakusog kaniya. Pag-usab sa dagway sa kalibutan ug pagtoo sa katawhan. Pinaagi sa pagpasakit ug pagkamatay sa krus iyang gipakita ug gipaila ang Ginoo nga mahigugmaon, mapahiubsanon ug mapasayloon. Sa iyang kamatayon giluwas niya ang tanang katawhan ug gipasaylo sa ilang mga sala ug nabanhaw usab sama niya.
“Kini ang akong Anak, pamati-a siya”. Awhag kini sa Ginoo nga pagpaminawon ang iyang pulong ug sa pagsunod sa iyang mga binuhatan. Ang pag-ampo mao ang pag-inambitay tali sa Diyos ug sa mga tawo. Daghang paagi sa pag-ampo apan usa ra ang tumong, ang pagpahimutang sa kaugalingon aron maandam sa pagpaminaw sa Diyos. Unsaon ug asa nato mapaminaw ang Ginoo? Kon andam tang maminaw sa Ginoo diha sa atong kaugalingon; ato siya nga mabati diha sa pagbati, problema ug mga pangandoy sa kinabuhi sa atong mga silingan ug mga kaigsuonan.
Ang Ginoo naminaw ug naghigugma kanato nga iyang katawhan. Angay nga mosunod kita kaniya ug maghigugmaay sa usag-usa kay kini ang kalampusan sa iyang misyon.

Giyang mga Pangutana:

1. Kung ang basehan sa kaluwasan mao ang pagbag-o unsa’y angay nimong bag-ohon sa imong kaugalingon ug sa katilingban? Palihug ipaambit.

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:

Enriquita Elias Fe Cayadong
Ricardo Arcillas Dante Sagales

UNANG DOMINGO SA PANAHON SA KWARESMA Marso 1, 2009

noreply@blogger.com (CIMT) — Sun, 01 Mar 2009 14:14:00 +0000

Unang Pagbasa: Gen. 9:8-15
PASIUNANG AWIT: Salmo: :25:4-9
PASIUNANG PAG-AMPO: Ikaduhang Pagbasa: 1Ped 3:18-22

TEMA: Ang Pagpangandam ni Hesus alang sa Iyang Misyon Didto sa Kamingawan

PASIUNA

Diha sa atong Ebanghelyo karon gidala sa Espirito Santo si Hesus ngadto sa kamingawan aron didto iya mapamalandungan ang iyang misyon sa pagluwas sa katawhan. Didto sa kamingawan samtang namalandong siya gitintal siya sa yawa. Daghan ang gihimong mga pamaagi sa yawa aron mapugngan ang plano sa Amahan alang kaniya. Pero bisan sa mga pagtintal sa yawa wala madala si Hesus kay iya man kanunay nga gipaminaw ug gituman ang kabubut-on sa Amahan. Pinaagi sa pag-ampo nalig-on siya ug sa kunanay gipanilipdan sa mga angel ug sa ingon bisag ang mga bangis nga mga mananap daw ug nakig-amigo kaniya.
Ang mga Domingo sa kwaresma karong tuig nagsaysay mahitungod sa kasabutan nga gihimo sa Dios tali kaniya ug sa iyang katawhan. Ang Dios dili gauyod madaug bisana’g pinaagi sa tawhanong kahuyang ug kasaypanan. Bisan pa sa atong pagkamakasasala, ang Dios midugtong pag-usab sa talikala tali kaniya (pinaagi ni Hesu-Kristo) ug kanila.
Sa atong panahon diin nay daghang mga problema ilabi na gyud ang kalisod sa pagpanginabuihi; sama ni Hesus pwedi usab kini nga gamiton ni satanas nga kahigayunan aron mahimulag kita giokan sa atong pasunod kang Hesus ug pagtuman sa kabubut-on sa Dios Amahan. Apan kung sa kanunay ato nga pamalandungan ug huna-hunaon nga ang tanang pagsuway nakaya ni Hesus; way rason nga dili usab nato makaya ang mga problema ug tentasyon sa atong tagsa-tagsa ka kinabuhi.

Pagbasa sa Ebanghelyo: Sumala ni San Marcos

Kapitulo 1, versikulo 12 ngadto sa 15 ( kinahanglan basahon ang ebanghelyo sa makusog nga tingog nga igo madunggan sa tanang manambong sa cluster kon mahimo basahon kini sa sa ikaduhang higayon.)
Ang Ebanghelyo sa Ginoo;
Daygon Ikaw, O Kristo ( Manghilom ug mamalandong sa pulong sa Dios 2-3 ka minuto).

PAGPATIN-AW UG PAGPALAWOM:

Mga punto nga angayan natong tagaan ug pagtagad ug pagpamalandong diha sa atong Ebanghelyo karon;

1. Si Hesus Miadto sa Kamingawan

Si Hesus minunot sa pagdasig sa Espirito Santo sa pag-adto sa kamingawan. Ug didto nag-ampo siya ug pinaagi sa kamingaw iya gipaminaw ang kabubut-on sa Dios Amahan diha sa iyang kinabuhi. Ang iya pag-adto sa kamingawan human sa iyang pagpabunyag kang Juan Bautista maoy naghatag kaniya ug igsaktong kusog aron mamahimong andam ug takos sa pagbuhat sa iyang misyon. Sa ato usab nga tagsa-tagsa ka kanabuhi nagkinahanglan usab kita ug igsaktong panahon sa pag-ampo ug kamingaw sa palibot, huna-huna, ug kasing-kasing aron ato mapamalandungan gusto nga mahitabo sa Ginoo sa atong kinabuhi. Pinaagi niini makasiguro kita ang kabubut-on sa Dios ug dili lang ang atong kaugalingong gusto ang matuman.

2. Ang Pagsangyaw ug ang Pabuhat sa atong Misyon

Human sa 40 ka adlaw didto sa kamingawan diin nabuntog ni Hesus ang gahum ni satanas miadto siya sa Galilea ug nagsugod na sa iyang pagsangyaw ug pagwali. Didto sa mga Sinaguga iya giingnan ang mga tawo kinahanglan nga ilang bag-ohon ang ilang mga kinabuhi ug motuo sa Maayong Balita. Sama sa mga tawo nga didto sa atubangan ni Hesus niadtong higayuna; Siya usab padayon nakigsulti kanato karon ug nag-ingon nga bag-uhon nato ang atong kinabuhi ug atong tuohan ang Maayong Balita. Ang pangutana karon; Andam na kita sa pag-usab sa mga dili maayo natong mga batasan ug binuhatan? Mituo ba kita kang Hesus nga mao ang ato sumbanan ug paglaum aron ato madangat ang kinabuhing walay katapusan?

3. Ang Kabubut-on sa Dios sa Atong Kinabuhi

Ang kabubut-on sa Dios dinhi sa atong kinabuhi mao ang “pag-usab sa ato panmaagi sa pagkinabuhi u gang pagtuo sa Maayong Balita.” Aron kini atong mabuhat kinahanglan ato nga kanunay himuong panig-ingnan ang kinabuhi ni Hesu-Kristo. Bisan pa man sa iyang pagkagamhanan nga kung iyang gustuhon sa usa ka pagpamilok iya mahimo ang gusto nga ipabuhat kaniya ni satanas pero sa tumang pagpaubos wala niya buhata ang hagit ni satanas. Sa iya usab nga pag-antos ug pagpasakit sa Krus pwedi usab nga iya kadto nga likayan apan wala ni niya buhata tungod sa iyang dakong gugma sa Amahan ug kanatong iyang mga tinibos. Wala niya basula ang iyang Amahan sa mga kasakit nga nahiaguman. Kining tanan kung ato usab nga huptan diha sa atong kinabuhi walay rason nga dili nato naangkon ang himaya sa langit.

MGA GIYANG PANGUTANA SA PAGPA-AMBIT:

1. Sa imong kinabuhi, sa unsang paagiha nga imo maipakita ang pagtuman sa awhag ni Hesus sa pagbag-o sa imong kinabuhi? Palihug sa pagpaambit

2. Isip usa ka sumusunod ni Kristo; unsa man ang imong panglantaw sa mga kakulian ug nga problema sa imong kinabuhi? Nakapahiduol ba kini kanimo ngadto sa Ginoo O nakapahilayo ba hinuon? Palihug sa pagpaambit.

KATILINGBANG PAG-AMPO:
PAG-AMPO SA AMAHAN NAMO UG MAGHIMAYA KA MARIA:
PAGHINATAGAY UG KALINAW:
PLANO:
PAGHALAD:
KATAPUSANG PAG-AMPO:
KATAPUSANG AWIT:

Efren A. Hermones Amelito Abanilla
Jennelyn Nodalo Alberto Monteves
Juanito Monteves