ESQUERDA UNIDA LUGO

AGE ESIXE EXPLICACIÓNS AO GOBERNO POLAS MANOBRAS DA OTAN EN GALICIA

2016-02-10T19:00:00.004+01:00

O deputado de Alternativa Galega de Esquerda Ramón Vázquez esixiu hoxe explicacións ao Goberno Galego polas manobras militares realizadas polo Grupo de Intervención Rapida da OTAN realizadas no Campamento Militar de Parga, nas que interviñeron 6 batallons de 6 paises diferentes coa finalidade de "planificar operacións de alta intensidade, integrando as diferentes funcións de combate" segundo o propio Ministerio de Defensa.

As manobras Azor Lineage da unidade da OTAN VJTF constitúense nuns exercicios preparatorios das operacións previstas na fronteira Rusa para o vindeiro mes de Xuño.

As manobras realizáronse nun espazo e nunhas instalacións non concibidas para este fin, froito dunha "doazón forzosa" de monte comunal realizado durante a ditadura franquista polos veciños da zona. As operacións militares leváronse a cabo a escasos 300 metros das vivendas e provocaron serios destrozos nos camiños e terreos veciñais coa maquinaria militar pesada.

O Deputado de AGE denunciou o proceso de remilitarización da Terra Cha, convertendo esta zona nunha area de especial valor estratéxico pra o o control da Cornixa Atlántica por parte da OTAN.

Ramón Vázquez advertiu ó Vicepresidente do Goberno Galego Alfonso Rueda, das consecuencias que conleva implicar a Galicia nunha 2ª Guerra Fría no que a OTAN, está a preparar un coctel explosivo mesturando a ameaza yihadista, a crise dos refuxiados, o control das fronteiras, a guerra de Ucraína e os conflitos de Oriente Próximo e Africa.

*Premer encima das pantalla para ver os videos das intervencións

O obxectivo da privatización de servizos é o enriquecemento de multinacionais como ACS

2015-10-08T17:29:00.000+02:00

AS CONTAS XERAIS DE 2014 EVIDENCIAN QUE A FINALIDADE DAS CONTRATAS DE SERVIZOS LOCAIS É O ENRIQUECEMENTO DE DETERMINADOS GRUPOS EMPRESARIAIS

Ø Un exemplo claro é o crecemento da multinacional ACS, presidida por Florentino Pérez, nos últimos anos nas concesións da cidade, a través das súas filiais (URBASER, ESYCSA-ETRALUX, CLECE) chegando a facturar en 2014 ao Concello de Lugo máis de 9 millóns de euros.

Ø “A entrega dos servizos locais aos xigantes multinacionais do tipo de ACS só trae consecuencias negativas para a cidadanía, como a desinversión na mellora da infraestructura pública, a diminución da calidade na prestación dos servizos e do control da mesma, e un dos máis feroces a curto prazo, a precariedade laboral e a destrucción de emprego”, explica Carlos Portomeñe, voceiro de ACE-EU.

Ø O caso de CLECE é elocuente: acumula denuncias de sindicatos, traballadores e usuarios por incumprimento das condicións laborais, por deficiencias na prestación do servizo contratado e despedimentos masivos, así como sentencias xudiciais desfavorables e sancións administrativas por toda a xeografía española: Sabadell, Ponferrada, Almería, Cambre, Santiago de Compostela, etc.

Ø O resumo das contas xerais de 2014, tratado na comisión celebrada esta mañá no Concello, confirma a situación de monopolio empresarial no ámbito dos servizos sociais, denunciada hai tempo por Esquerda Unida, na que un mesmo empresario acumulaba ata 11 contratos diferentes, a través das empresas A Billarda e Alalás (ámbalas dúas co mesmo domicilio social), por un valor de preto de 3 millóns de euros.

Lugo, 7 de outubro de 2015. – Alternativa Cidadá de Esquerdas- Esquerda Unidaconsidera que a principal conclusión que se pode extraer da análise dos contratos do Concello de Lugo con empresas privadas para a prestación dos distintos servizos municipais é que a súa finalidade é o enriquecemento de determinados grupos empresariais. Un exemplo claro é o crecemento da multinacional ACS, presidida por Florentino Pérez, nos últimos anos nas concesións da cidade, a través das súas filiais, chegando a facturar en 2014 máis de 9 millóns de euros. Esta cifra é a suma das distintas contratas coas que conta na capital lucense: a recollida de basura e a limpeza viaria a través de Urbaser (polas que o Concello pagou 7.143.346,53 millóns de € o ano pasado), a conservación e mantemento da iluminación pública a través da UTE de ESYCSA e Etralux S.A., e a xestión das actividades deportivas en instalacións como as de FRIGSA ou As Pedreiras, polas que se embolsou a súa filial CLECE S.A. 368.751,66€ e 111.894,75€ respectivamente, dende xuño do ano pasado.

“A entrega dos servizos locais aos xigantes multinacionais do tipo de ACS só trae consecuencias negativas para a cidadanía, como a desinversión na mellora da infraestructura pública, a diminución da calidade na prestación dos servizos e do control da mesma, e un dos máis feroces a curto prazo, a precariedade laboral e a destrucción de emprego”, explicaCarlos Portomeñe, voceiro de ACE-EU. Por exemplo, CLECE, a devandita filial de ACS, que se adica a prestación de servizos de atención a dependentes, de limpeza e actividades socioculturais, entre outros; ten propagado unha epidemia de conflictos laborais por todo Estado a través das concesións das que disfruta tanto a nivel municipal, como autonómico e estatal. “CLECE acumula denuncias de sindicatos, traballadores e usuarios por incumprimento das condicións laborais, por deficiencias na prestación do servizo contratado e despedimentos masivos, así como sentencias xudiciais desfavorables e sancións administrativas por toda a xeografía española: Sabadell, Ponferrada, Almería, Cambre, Santiago de Compostela, etc. Mesmo está a ser investigada por un caso de suborno de cargos militares para obter axuda nos concursos públicos do Ministerio de Defensa e tamén foi denunciada polos sindicatos a presunta prevaricación na súa contrata de limpeza para o CHUS en Compostela” apuntaPortomeñe.

Precisamente, para ACE-EU a privatización de servizos públicos é a porta pola que entran a maior parte dos casos de corrupción que afectan ao noso municipio, no que as concesións dos servizos públicos forman parte das tramas de clientelismo, tráfico de influencias, suborno e enriquecemento ilícito, encabezadas polo Operación Pokémon, que puxo no punto de mira ao grupo Vendex, que en 2014 cobrou do Concello de Lugo preto dun millón de euros vía Doal (ORA) e SERMASA (atención ao público no MIHL, no centro de interpretación da Muralla e a Domus/ensinanza deportiva en As Pedreiras); e a empresa concesionaria do servizo de recollida de vehículos, Cechalva, que o ano pasado ingresou máis de 500.000 das arcas municipais lucenses.

O resumo das contas xerais de 2014, tratado na comisión celebrada esta mañá no Concello tamén confirma a situación de monopolio empresarial no ámbito dos servizos sociais, denunciada hai tempo por Esquerda Unida, na que un mesmo empresario acumulaba ata 11 contratos diferentes co Concello de Lugo, a través das empresas A Billarda e Alalás (ámbalas dúas co mesmo domicilio social), por un valor de preto de 3 millóns de euros, por servizos tan diferentes como as actividades extraescolares nos colexios públicos, a atención de persoas maiores dependentes ou a implementación de programas deportivos.

O PP admite agora que o aeródromo de Rozas é empregado para probas militares

2015-10-05T21:24:00.001+02:00

O deputado de Alternativa Galega de Esquerda (AGE) Ramón Vázquez denuncia as “evidentes mentiras” de Feijóo ao respecto e pregúntase polas razóns últimas destes embustes

Video da intervención do Deputado de AGE Ramón Vázquez

Logo de meses negando evidencias, o Partido Popular admitiu esta mañá que o aeródromo de Rozas, no Concello de Castro de Rei, está a ser empregado para probas con drons de uso militar. Así o recoñeceu o deputado da dereita Jaime Castiñeiras ao amosar o convenio entre a Xunta e o Ministerio de Defensa publicado en maio no Boletín Oficial do Estado (BOE). “Mostra vostede un documento que autoriza o uso para drons civís do aeródromo de Rozas”, explicou o parlamentario de Alternativa Galega de Esquerda (AGE) Ramón Vázquez, “pero este mes vimos que alí se probaba o Searcher, un dron militar en procura de certificación para o uso civil. Vostede admíteo e, polo tanto, admite as probas militares no lugar”.

Porque a do uso militar do aeródromo de Rozas é a historia dunha interminábel sucesión de mentiras, enganos e silenciamentos. “No pasado debate sobre o estado da Nación, Feijóo anunciou un investimento de dez millóns de euros en Rozas para a investigación en avións non tripulados de uso civil”, lembrou Vázquez. A partir dese intre, Alternativa Galega de Esquerda (AGE) denunciou e demostrou que o aeródromo da Terra Cha ía ser empregado para probas militares. Primeiro, de desenvolvemento do proxecto Atlante, un dron militar. “Feijóo mentiu xa daquela”, engadiu no debate da proposición non de lei de AGE –no documento anexo.

Pero é que entre agosto e setembro deste ano transcendeu que sobre Rozas estaba a voar un dron modelo Searcher, de fabricación israelí. “É un aparello idéntico ao que emprega o exército de Israel contra o pobo palestino, nun conflito que, non o esquezamos, se cobrou 2.300 vítimas civís en 2014, o 37% causadas por avións non tripulados”, explicou o deputado, “e imaxino que o exército español non merca armas para uso civil”.

Unha vez que quedaron demostradas en sede parlamentaria as continuadas mentiras de Feijóo e o seu partido ao respecto, só fica, en palabras de Ramón Vázquez, solucionar unha cuestión: por que?. “Por que minte Feijóo? Por que a Xunta paga a perimetraxe dunha base militar, un laboratorio e unha torre de control? Que pinta o Goberno galego investindo 45 millóns de euros para captar socios tecnolóxicos canda o exército español? É unha evidencia que a Xunta de Feijóo nos está a mentir. O que falta é saber por qué”.

Momento en que o voceiro do PP recoñece o emprego de Rozas para probas con drones militares

Todos os grupos parlamentarios agás o PP apoiaron a iniciativa de Alternativa Galega de Esquerda que solicitaba transparencia nos acordos, informes, criterios e convenios entre a Xunta e Defensa.

Medidas de xustiza fiscal: aumento da taxa aos bancos por caixeiros na vía pública

2015-10-01T21:05:00.001+02:00

ACE-EU PROPÓN QUE SE AUMENTE A 3.500 EUROS ANUAIS A TAXA QUE O CONCELLO COBRA ACTUALMENTE Á BANCA POLOS CAIXEIROS CON ACCESO Á VÍA PÚBLICA

Ø Con 40 caixeiros automáticos como mínimo que existen na cidade de Lugo con acceso directo á vía pública, o Concello podería obter 140.000 euros ao ano, cuantía que equivale aos ingresos obtidos pola recadación da O.R.A., que supón unha media de 12.000 euros ao mes para as arcas municipais, polo que se compensarían os recursos perdidos ao establecer a gratuidade da zona azul.

Ø Concellos como os de Ribadavia e O Carballiño, ámbolos dous gobernados polo PSOE e cunha poboación moito menor que a de Lugo (aprox. 5.000 e 15.000 habitantes respectivamente), ingresan dende hai tempo 2.920 euros por caixeiro ao ano. Con preto de 100.000 habitantes, Lugo só cobra á banca 284, 23 euros anuais. “Co exemplo doutros municipios demostramos que é perfectamente viable que pague máis quen máis ten se existe vontade política”, apunta o voceiro de ACE-EU, Carlos Portomeñe.

Ø Os caixeiros automáticos moven cada ano uns 110.000 millóns de euros, e segundo as estimacións de ADICAE, o cobro de comisións por extraccións de efectivo ascenden a 21.000 millóns de euros anuais (o 20% do total).

Ø “Parécenos xusto que os bancos paguen unha taxa máis axustada ao beneficio que obteñen cos cobros aos usuarios. As entidades financeiras teñen unha parte moi importante da responsabilidade da crise, e aínda que foron rescatadas cos cartos públicos seguen executando desafiuzamentos, restrinxindo o crédito, aumentando as comisións (La Caixa, BBVA e Santander queren cobrar 2 euros por uso dos caixeiros aos non clientes en contra do criterio do Banco de España) e recortando plantilla (incluso se atopan agora mesmo negociando á baixa o convenio laboral do sector)”, salientou Portomeñe.

Carlos Portomeñe explicou esta mañá en rolda de prensa a proposta de ACE-EU para a taxa por caixeiros na vía pública

Lugo, 1 de outubro de 2015. – Alternativa Cidadá de Esquerdas- Esquerda Unida propón aumentar ata 3.500 euros a cuantía que o Concello cobra actualmente á banca polos caixeiros automáticos con acceso á vía pública, como medida para aumentar os recursos municipais sen penalizar ao contribuínte medio. O Concello de Lugo só ingresa 284,23€ ao ano por cada caixeiro, tal e como establece a ordenanza fiscal número 156, unha das que ACE-EU considera prioritario modificar para conseguir unha maior progresividade impositiva.

Con 40 caixeiros automáticos como mínimo que existen na cidade de Lugo con acceso directo á vía pública, o Concello podería obter 140.000 euros ao ano, cuantía que equivalería aos ingresos obtidos pola recadación da O.R.A., que supón unha media de 12.000 euros ao mes para as arcas municipais, polo que se compensarían os recursos perdidos ao establecer a gratuidade da zona azul. “Xa que o goberno do PSOE amósase moi preocupado pola inviabilidade de facer pública a xestión do regulamento de aparcadoiros, poñémoslle en bandexa a solución para que a medida non afecte aos orzamentos”, explica o voceiro de ACE-EU, Carlos Portomeñe.

O equipo de goberno e o resto de grupos da oposición, a excepción do BNG, cuestionaron a viabilidade e legalidade das propostas incluídas na moción de ACE-EU para garantir a progresividade nas ordenanzas fiscais do vindeiro ano, entre elas a de subir a taxa por aproveitamento da vía pública con caixeiros automáticos. Sen embargo, a súa legalidade está perfectamente establecida por unha sentenza de febreiro de 2009 do Tribunal Supremo, e son numerosos os exemplos de concellos de todo o Estado que cobran moito máis que Lugo aos bancos por este concepto. Sin ir máis lonxe, municipios como os de Ribadavia e O Carballiño, ámbolos dous gobernados polo PSOE e cunha poboación moito menor que a de Lugo (aprox. 5.000 e 15.000 habitantes respectivamente), ingresan dende hai tempo 2.920 euros por caixeiro ao ano. E foi precisamente o propio PSOE en O Carballiño o que pediu que mesmo se subise esa taxa ata os 3.600 euros anuais.

“Co exemplo doutros municipios demostramos que é perfectamente viable que pague máis quen máis ten se existe vontade política”, apunta o concelleiro de ACE-EU. Outras localidades galegas duplican o imposto anual por caixeiro de Lugo: Vilagarcía con 624 €, Ferrol con 560€ ou Ponteareas con 500€. Son tamén moitos os casos fóra de Galicia que deixan moi atrás a nosa cidade: Barcelona con 855€; Torrevieja, Pizarra (Málaga) e El Campello (Alicante) con 1000€; Sevilla con 693€ ou Málaga con 693€.

Os caixeiros automáticos moven cada ano uns 110.000 millóns de euros, e segundo as estimacións de ADICAE, o cobro de comisións por extraccións de efectivo ascenden a 21.000 millóns de euros anuais (o 20% do total). “Parécenos xusto que os bancos paguen unha taxa máis axustada ao beneficio que obteñen cos cobros aos usuarios. As entidades financeiras teñen unha parte moi importante da responsabilidade da crise, e aínda que foron rescatadas cos cartos públicos seguen executando desafiuzamentos, restrinxindo o crédito, aumentando as comisións (La Caixa, BBVA e Santander queren cobrar 2 euros por uso dos caixeiros aos non clientes en contra do criterio do Banco de España) e recortando plantilla (incluso se atopan agora mesmo negociando á baixa o convenio laboral do sector)”, salientou Portomeñe, que tamén quixo lembrar o caso concreto de ABANCA, con 16 caixeiros na vía pública lucense, que está a desmantelar a obra social das antigas caixas galegas e que “non dubidou en pechar a escola infantil do Sagrado Corazón alegando que non resultaba rentable”.

ACE-EU tamén quere chamar a atención sobre o agravio comparativo existente con respecto a outras taxas que o Concello de Lugo grava por usos que conlevan moito menor lucro ou ningún en absoluto. Por exemplo, a ordenanza número 403, que establece os prezos públicos pola prestación de servizos nas instalacións culturais, establece unha tarifa única de 515 € ao día polo emprego do Auditorio Municipal Gustavo Freire en festivais, actos ou eventos similares. “É inxustificable que unha asociación sen ánimo de lucro ou un grupo de teatro teñan que pagar nun só día ao Concello por realizar unha actividade de carácter sociocultural o doble do que un banco paga por explotar un caixeiro na cidade durante todo o ano”, sinalou o voceiro de ACE-EU.

O PSOE goberna en Lugo en consoancia coas políticas privatizadoras e neoliberais do PP

2015-09-30T20:58:00.000+02:00

“O ÚNICO PACTO EXISTENTE NA CORPORACIÓN PARA TUMBAR PROPOSTAS DE CARÁCTER SOCIAL É ENTRE O PSOE E O PP”

Ø O concelleiro de Alternativa Cidadá de Esquerdas- Esquerda Unida, Carlos Portomeñe, quixo lembrarlle a Miguel Fernández, voceiro do goberno local, que “foi o PSOE o que se aliou co PP para o reparto de cargos de confianza, remuneracións e dedicacións exclusivas, relegando á precariedade laboral a tres dos grupos municipais; para impedir a participación dos colectivos sociais nos plenos ou para rexeitar a nosa proposta de progresividade fiscal, a única que cun coste económico cero permite aumentar os recursos do Concello para garantir os orzamentos e o gasto social”.

Ø “O PSOE confunde coacción coa maioría democrática das votacións do pleno. Son eles os que gobernando en minoría intentan impoñer un modelo privatizado propio da dereita na xestión dos servizos locais, nós limitámonos a defender con coherencia as nosas premisas programáticas a prol dos servizos públicos e gratuítos”, remarcou Portomeñe.

Ø ACE-EU non entende que o PSOE teime en vender unha postura de diálogo e transparencia cando xa se puido comprobar que a alcaldesa mentiu abertamente no pleno ao asegurar que remitira a tódolos grupos municipais un borrador da O.R.A. que nunca chegou e polo que aínda están a agardar, así como que consultara o tema con todos na Xunta de Voceiros. “Solicitamos non só que nos envíen canto antes o cacareado borrador, senón tamén o informe técnico ao que insisten en referirse dende o goberno e do que ninguén ten coñecemento, que supostamente certifica a inviabilidade da remunicipalización do control dos aparcadoiros”, exise o voceiro de ACE-EU.

Lugo, 30 de setembro de 2015. – O concelleiro de Alternativa Cidadá de Esquerdas- Esquerda Unida, Carlos Portomeñe, en resposta ás acusacións contra os grupos de oposición de seguidismo co PP verquidas polo voceiro do goberno local, Miguel Fernández, asegura que “a realidade evidencia que o único pacto existente na corporación para tumbar propostas de carácter social é entre o PSOE e o PP”. O voceiro de ACE-EU lembra que “foi o PSOE o que se aliou co PP para o reparto de cargos de confianza, remuneracións e dedicacións exclusivas, relegando á precariedade laboral a tres dos grupos municipais; para impedir a participación dos colectivos sociais nos plenos ou para rexeitar a nosa proposta de progresividade fiscal, a única que cun coste económico cero permite aumentar os recursos do Concello para garantir os orzamentos e o gasto social”.

“O PSOE confunde coacción coa maioría democrática das votacións do pleno. Son eles os que gobernando en minoría intentan impoñer un modelo privatizado propio da dereita na xestión dos servizos locais, nós limitámonos a defender con coherencia as nosas premisas programáticas a prol dos servizos públicos e gratuítos”, remarcou Portomeñe. “As declaracións de onte de Miguel Fernández recordan ao chiste do tolo da autopista, que acusa a tódolos demáis conductores de ir en dirección contraria cando é el mesmo o que está a conducir polo carril equivocado”.

ACE-EU non entende que o PSOE teime en vender unha postura de diálogo e transparencia cando xa se puido comprobar que a alcaldesa mentiu abertamente no pleno ao asegurar que remitira a tódolos grupos municipais un borrador da O.R.A. que nunca chegou e polo que aínda están a agardar, así como que consultara o tema con todos na Xunta de Voceiros. “Solicitamos non só que nos envíen canto antes o cacareado borrador, senón tamén o informe técnico ao que insisten en referirse dende o goberno e do que ninguén ten coñecemento, que supostamente certifica a inviabilidade da remunicipalización do control dos aparcadoiros”, exise Portomeñe. “A constante referencia ao diálogo debe de ser outro dos chistes de humor negro do PSOE, que non admitiu propostas da oposición nin sequera nalgo tan inocuo como a programación cultural das Festas do San Froilán, aínda que si admite as propostas do fillo da concelleira de Cultura, Carmen Basadre”.

ACE-EU considera dun cinismo absoluto que o PSOE tilde de irresponsables e de dubidosa legalidade as mocións dos demáis grupos cando se atreve a levar ao pleno unha moción para o mantemento con cartos públicos dunha institución como a Cámara de Comercio, cuio funcionamento e xestión é claramente cuestionable non só dende o punto de vista legal, senón do puramente ético. “O goberno local ten unha curiosa forma de priorizar as persoas, a través da protección constante dos intereses das empresas privadas: queren manter o modelo privatizado de xestión dos servizos municipais, só consultan con determinadas asociacións patronais e comerciais o novo sistema da O.R.A., proclámanse en defensores dun organismo tan saqueado como saqueador como é a Cámara de Comercio de Lugo… sen esquecer que foi o PSOE quen deu o pistoletazo de saída aos recortes e ás reformas laborais no Estado e quen modificou o artigo 135 da Constitución para priorizar o pago da deuda sobre o gasto social. É urxente que se paren a reflexionar dunha vez sobre quen está a gobernar facendo seguidismo das políticas neoliberais do PP”, repasou o concelleiro Portomeñe.

ACE-EU pregunta á Alcaldía sobre o estado do servizo de Protección Civil

2015-09-27T20:57:00.000+02:00

ACE-EU PREGUNTARÁ Á ALCALDÍA SOBRE PRESUNTAS IRREGULARIDADES NO SERVIZO DE PROTECCIÓN CIVIL

Ø Alternativa Cidadá de Esquerdas- Esquerda Unida ten coñecemento de distintas denuncias por parte dos propios voluntarios de presuntas irregularidades no funcionamento e prestación de dito servizo, presentadas no rexistro do Concello e que nunca recibiron resposta, así como do impedimento aos mesmos de desempeñar a súa función de voluntariado neste corpo.

Ø Entre as reclamacións atópanse asuntos de tal gravidade como a conducción de vehículos e a realización dos turnos baixo a influencia de bebidas alcohólicas por parte de diversos membros da agrupación de voluntarios, así como a carencia de moitos deles do permiso BTP para a condución de vehículos prioritarios e o emprego de vehículos públicos para usos privados.

Ø O grupo municipal ACE-EU quere saber quen é actualmente o máximo responsable no Concello do servizo de Protección Civil e se dispón da cualificación necesaria para facelo.

Ø ACE-EU preguntará tamén por que un vehículo que foi adquirido recentemente coa aprobación dunha Xunta de Goberno para ser empregado por Protección Civil está en réxime de leasing e sen o correspondente rótulo do servizo municipal, ademais de cal é a partida económica destinada a Protección Civil nos orzamentos do presente exercicio.

Ø ACE-EU inclúe preguntas para saber cantos voluntarios figuran actualmente e con que periodicidade se actualiza o seu censo, e se existe persoal cualificado e coas titulacións necesarias para o emprego do material especializado co que conta o servizo, tales como desfibriladores, equipos de buceo ou lanchas Zodiac.

Lugo, 28 de setembro de 2015. – Alternativa Cidadá de Esquerdas- Esquerda Unida presentará unha batería de preguntas por escrito á Alcaldía sobre o estado do servizo de Protección Civil, ante o coñecemento de distintas denuncias por parte dos propios voluntarios de presuntas irregularidades no funcionamento e prestación de dito servizo, presentadas no rexistro do Concello e que nunca recibiron resposta, así como do impedimento aos mesmos de desempeñar a súa función de voluntariado neste corpo. Entre as reclamacións atópanse asuntos de tal gravidade como a condución de vehículos e a realización dos turnos baixo a influencia de bebidas alcohólicas por parte de diversos membros da agrupación de voluntarios, así como a carencia de moitos deles do permiso BTP para a condución de vehículos prioritarios e o emprego de vehículos públicos para usos privados.

O grupo municipal ACE-EU quere saber quen é actualmente o máximo responsable no Concello do servizo de Protección Civil e se dispón da cualificación necesaria para facelo. O último cargo do que se ten constancia referente a dita función é D. Enrique Camilo Fernández Fraga, que foi nomeado como persoal eventual para o posto de Asesor Especial en materia de Emerxencias e Protección Civil o 12 de xuño de 2011 e cesado con data de 31 de xullo de 2011, un mes despois, para converterse en Asesor Especial de Participación Cidadá, cargo que ocupou ata o día 13 de xuño de 2015. Desde o 14 de xullo de 2015, Fernández Fraga exerce de Colaborador Asesor do Gabinete da Alcaldía para o novo equipo de goberno, realizando “tarefas de confianza e asesoramento especial, coas funcións seguintes: “servirlles de apoio e colaboración directa á Alcaldía e ao grupo de goberno, asesoramento especial, relacións institucionais, información e demais funcións que se lle asigne relacionadas coas propias de confianza e asesoramento especial.” O recente posto carece de denominación específica relacionada con Protección Civil, e a ACE-EU non lle consta o nomeamento en sustitución doutra persoa concreta a cargo deste departamento. “Este servizo, de vital importancia, debería ser dirixido por un técnico cualificado para un cometido de tal responsabilidade, polo que sería convinte que o Concello sacáse a praza a concurso público coa maior celeridade posible. Por outra parte, tamén nos chama a atención que puidera ser persoal eventual e de confianza o que estivese ao frente de Protección Civil, así como que unha mesma persoa puidese desempeñar tres cargos de denominación distinta en só catro anos”, sinala Carlos Portomeñe, voceiro de ACE-EU.

Por outra banda, na Xunta de Goberno Local celebrada o pasado 24 de xuño deste ano, aprobouse o arrendamento sen opción a compra dun Mitsubishi Montero branco de 7 prazas que non foi rotulado para indicar a súa pertenza ao servizo de Protección de Civil do Concello de Lugo. ACE-EU preguntará por que motivo o Concello non o adquiriu en propiedade e como é posible que un vehículo destinado a un servizo municipal fique sen rotular, ademáis de cal é a partida económica destinada a Protección Civil nos orzamentos do presente exercicio.

O propio voluntariado de Protección Civil vén reclamando dende hai tempo a formación, cualificación e profesionalización dos seus integrantes, que consideran deficitaria, ante a pasividade do goberno local. De feito, o regulamento que rexe ao equipo de voluntariado en Lugo é de 1998, e nin sequera se pode acceder ao mesmo dende a páxina web. Nese sentido, ACE-EU inclúe ademáis preguntas para saber cantos voluntarios figuran actualmente e con qué periodicidade se actualiza o seu censo, e se existe persoal cualificado e coas titulacións necesarias para o emprego do material especializado co que conta o servizo, tales como desfibriladores, equipos de buceo ou lanchas Zodiac.

Fóra os drones militares do espazo aéreo de Lugo

2015-09-23T09:00:00.000+02:00

ACE-EU REXISTRARÁ UNHA MOCIÓN CONTRA O EMPREGO DE DRONES MILITARES NO ESPAZO AÉREO DO CONCELLO DE LUGO

Ø “ACE-EU pide ao goberno local que demande do Goberno do Estado e do galego a inmediata paralización das probas con drones militares en Rozas pola súa afectación ó Concello de Lugo e que solicite á Deputación Provincial de Lugo a retirada da sinatura do convenio de utilización do aeródromo por incumprimento dos fins establecidos para o emprego das instalacións, que lembremos que se asinou sendo Lara Méndez vicepresidenta da institución”, explicou o concelleiro Portomeñe.

Ø O deputado de AGE Ramón Vázquez apuntou que “o feito de que o espazo aéreo do Concello de Lugo sexa sobrevoado por drones militares como o que se está a probar en Rozas agora mesmo, o Searcher MKII, un modelo de fabricación israelí empregado contra a poboación palestina na franxa de Gaza ou polo propio Exército Español no conflito bélico de Afganistán, compromete a seguridade dos lucenses e dos habitantes doutros concellos limítrofes, pois as bases de avións militares non tripulados son instalacións dun grande valor tecnolóxico, militar e estratéxico, o que as converte en destacados obxectivos militares e terroristas”.

Carlos Portomeñe e Ramón Vázquez en rolda de prensa

Lugo, 22 de setembro de 2015. – Alternativa Cidadá de Esquerdas- Esquerda Unida anunciou esta mañá en rolda de prensa, na que compareceron o deputado de AGE Ramón Vázquez Díaz e o voceiro de ACE-EU Carlos Portomeñe, que presentará unha moción para que o Concello demande explicacións ao Goberno da Xunta de Galicia sobre o tipo de probas realizadas no aeródromo de Rozas, ante a evidencia do emprego do espazo aéreo do Concello de Lugo para o voo de drones militares, ao estar incluído o noso término municipal no listado de servidumes aeronáuticas de dito aeródromo. Na súa moción, “ACE-EU pide ao goberno local que demande do Goberno do Estado e do galego a inmediata paralización das probas con drones militares pola súa afectación ó Concello de Lugo e que solicite á Deputación Provincial de Lugo a retirada da sinatura do convenio de utilización do aeródromo de Rozas por incumprimento dos fins establecidos para o emprego das instalacións, que lembremos que se asinou sendo Lara Méndez vicepresidenta da institución”, explicou o concelleiroPortomeñe.

Nese sentido, o voceiro de ACE-EU salientou que a Xunta mentiu dúas veces á cidadanía. Unha, ao negar o presidente Feijóo calquera vencello coa industria militar co aeródromo de Rozas cando anunciou no propio parlamento un investimento de 10 millóns para adaptar as instalacións e convertelas nunha base para drones de carácter civil, ao que se engaden os 45 millóns de euros anunciados con posterioridade adicados á captación de socios comerciais que participen no desenvolvemento de programas con avións non tripulados. A outra mentira foi a de dicir que este investimento crearía emprego na comarca, cando tanto o Ministerio de Defensa como as empresas participantes nos voos experimentais con drones desprazan o seu propio persoal técnico e auxiliar ata Rozas, polo que non é posible crear novos postos de traballo na zona. De feito, nas recentes probas realizadas co dron militar israelí, o exército desprazou 40 efectivos responsables da realización das mesmas.

Pola súa parte, o parlamentario Ramón Vázquez apuntou que “o feito de que o espazo aéreo do Concello de Lugo sexa sobrevoado por drones militares como o que se está a probar en Rozas agora mesmo, o Searcher MKII, un modelo de fabricación israelí empregado contra a poboación palestina na franxa de Gaza ou polo propio Exército Español no conflito bélico de Afganistán, compromete a seguridade dos lucenses e dos habitantes doutros concellos limítrofes, pois as bases de avións militares non tripulados son instalacións dun grande valor tecnolóxico, militar e estratéxico, o que as converte en destacados obxectivos militares e terroristas”. O deputado de AGE remarcou que “o establecemento dunha base para a experimentación e desenvolvemento de drones no aeródromo de Rozas, debe ser motivo de profunda preocupación para a poboación de toda a Provincia de Lugo, e máis tendo en conta cada un dos acontecementos que se van coñecendo, que confirman os usos militares do mesmo, a contagotas e con grande escurantismo por parte das institucións implicadas”.

O drone Searcher MKII forma parte das catro unidades mercadas polo Exército Español a Israel, un dos principias países exportadores de drons do planeta, que acapara o 60% das vendas. Os drones israelís causaron 2.400 vítimas civís na invasión do ano 2014 en Palestina, dos que 500 eran nenos. “Mesmo trascendeu aos medios que foron utilizados drones israelíes na guerra en Siria, esa mesma que agora provocou a enorme crise humanitaria en Europa pola fuxida masiva da poboación. Os drones militares que permitimos que se proben aquí son os que provocan alí o sufrimento dos refuxiados que queremos acoller. É dun cinismo absoluto mostrar solidariedade cos refuxiados e a un tempo ser cómplice directo da traxedia que están a vivir”, quixo destacar Portomeñe.

ACE-EU tamén propón na súa moción que o goberno local esixa explicacións e clarificacións ao Goberno de Galicia sobre o tipo de probas realizadas no aeródromo de Rozas e dentro das servidumes aeronáuticas do Concello de Lugo, e que solicite directamente ao Instituto Nacional de Tecnoloxía Aeronáutica (INTA) copia de todas as certificacións necesarias en materia de seguridade para o emprego de drones no espazo aéreo de Lugo, incluíndo as correspondentes da Axencia Estatal de Seguridade Aérea e da Axencia Europea de Seguridade Aérea, como a solicitude de cambio de usos do aeródromo, o rexistro de xestión de riscos para as probas realizadas ata o momento con este tipo de aparellos.

A figura do cronista oficial é innecesaria e de reminiscencias franquistas

2015-09-23T08:58:00.000+02:00

O INFORME DO CONCELLO ELABORADO A PETICIÓN DE ACE-EU CONFIRMA A FALTA DE TRADICIÓN HISTÓRICA REAL DA FIGURA DO CRONISTA OFICIAL EN LUGO

Ø Segundo o informe elaborado polos técnicos de Cultura, dado a coñecer durante a Xunta de Voceiros celebrada esta mañá, o único cronista oficial que tivo Lugo foi José Trapero Pardo, nomeado para o cargo durante o réxime franquista, e sen relevo dende hai 20 anos.

Ø “Este informe reafirma a nosa postura de que non existe unha necesidade social de recuperar esta figura obsoleta, xa que as funcións que se lle atribúen son as de defender os valores culturais de Lugo e promover a investigación e asesorar ás autoridades sobre eles, tarefas todas cubertas de sobra polos traballadores da Área de Goberno de Cultura, Turismo, Xuventude e Promoción da Lingua”, asegura Carlos Portomeñe, voceiro de ACE-EU.

Ø Das grandes cidades de Galicia, só Vigo e A Coruña conservan este cargo, mentres que Santiago, Ferrol e Ourense non o manteñen, ao igual que Lugo.

Lugo, 21 de setembro de 2015. –Esta mañá na Xunta de Voceiros deuse a coñecer o resultado do informe elaborado a petición de Alternativa Cidadá de Esquerdas- Esquerda Unida sobre os antecedentes históricos da figura do cronista oficial en Lugo, e sobre as características e competencias básicas que lle corresponden. Para ACE-EU, o documento vén a confirmar a falta de tradición histórica real da figura do cronista oficial en Lugo, xa que o único que existiu en Lugo foi José Trapero Pardo, nomeado para o cargo durante o réxime franquista, e nunca foi sustituído tralo seu falecemento en 1995.

“Reafirmase a nosa postura de que non existe unha necesidade social de recuperar esta figura obsoleta, xa que as únicas funcións que se lle atribúen ao cronista, segundo o informe, son as de defender os valores culturais de Lugo e promover a investigación e asesorar ás autoridades sobre eles, tarefas todas cubertas de sobra polos traballadores da Área de Goberno de Cultura, Turismo, Xuventude e Promoción da Lingua”, asegura Carlos Portomeñe, voceiro deACE-EU. “Non só contamos con importantes departamentos de Cultura no Concello e na Deputación, temos o Arquivo Histórico Provincial e o labor de diferentes historiadores/as, bibliotecarios e arquiveiros na cidade, ademais do papel divulgativo que xogan as novas tecnoloxías, polo que un cronista oficial ten aínda menos sentido na sociedade da información”.

O concelleiro de ACE-EU insiste en que no actual contexto de emerxencia social existen outras prioridades no municipio antes que "o nomeamento dunha figura do pasado que non aporta nada novo ó presente e que mesmo nos retrotrae ao franquismo". De feito, das grandes cidades de Galicia, só Vigo e A Coruña conservan este cargo, mentres que Santiago, Ferrol e Ourense non o manteñen, ao igual que Lugo.

ACE-EU solicita que Grandío compareza no pleno para explicar as súas funcións como conselleiro do C.D. Lugo

2015-09-23T08:56:00.000+02:00

ACE-EU PIDE A COMPARECENCIA DE DÍAZ GRANDÍO NO PLENO PARA DAR CONTA DO SEU PAPEL COMO CONSELLEIRO DO C.D. LUGO

Ø A principal pregunta que ACE quere que Díaz Grandío responda ante toda a corporación municipal é, se como conselleiro do C.D. Lugo, era coñecedor da contabilidade presentada ante a LFP na que aparece documentada unha débeda existente no clube de máis de 1.600.000 €, así como a razón pola que non se cumpriu a devolución antes do 31 de decembro de 2013 dos 600.000 € prestados polas arcas municipais para a conversión en S.A.D., tal como se acordara no convenio asinado entre o Concello e o clube de fútbol.

Ø “Os 600.000 euros aportados polo Concello ao C.D. Lugo é unha cantidade que triplica as partidas orzamentarias destinadas a urxencias sociais. Tendo en conta que en Lugo seguen a existir 17.000 persoas en risco de exclusión, o mínimo que podemos pedir é explicacións de como se gastaron eses cartos ante as sospeitas de que puidesen ser utilizados en tapar un furado contable agachado á cidadanía, e que se dirima a responsabilidade dos representantes institucionais no Consello de Admón.” apunta Carlos Portomeñe, voceiro de ACE.

Lugo, 21 de setembro de 2015. – Alternativa Cidadá de Esquerdas-Esquerda Unida vén de solicitar a comparecencia no pleno do vindeiro xoves do Tenente de Alcalde Delegado da Área de Goberno de Medio Rural, Infraestruturas e Deportes, José Manuel Díaz Grandío, para dar conta das súas funcións desempeñadas como conselleiro do C.D. Lugo, ante a alarma social creada polas novas informacións acerca das irregularidades nas contas da Sociedade Anónima Deportiva, en cuio balance económico presentado ante a Liga de Fútbol Profesional se indicaba que o clube tiña a día 30 de xuño de 2013 unha débeda de 1.600.000 euros que nunca foi recoñecida públicamente. O convenio do Concello de Lugo co clube é do 28 de maio de 2013, un mes antes da data do balance no que se recolle a débeda, e unha semana antes, o sábado 22 de xuño de 2013, ten lugar a asemblea constituínte da S.A.D. coa presenza de máis de 330 accionistas e na que se aproba a entrada dos tres representantes da Deputación de Lugo e dos dous do Concello no Consello de Administración. Por iso, a principal pregunta que ACE-EU quere que Díaz Grandío responda ante toda a corporación municipal é, se como conselleiro que xa era do C.D. Lugo, era coñecedor da contabilidade presentada polo Lugo ante a LFP na que aparece documentada a débeda existente, así como a razón pola que non se cumpriu a devolución antes do 31 de decembro de 2013 dos 600.000 € prestados polas arcas municipais para a conversión en S.A.D., tal como se acordara no convenio asinado entre o Concello e o clube de fútbol.

“Estamos ante uns feitos de suma gravidade. Os 600.000 euros aportados polo Concello ao C.D. Lugo é unha cantidade que triplica as partidas orzamentarias destinadas a urxencias sociais. Tendo en conta que en Lugo seguen a existir 17.000 persoas en risco de exclusión, o mínimo que podemos pedir é explicacións de como se gastaron eses cartos ante as sospeitas de que puidesen ser utilizados en tapar un furado contable agachado á cidadanía, e que se dirima a responsabilidade dos representantes institucionais no Consello de Admón.” apunta Carlos Portomeñe, voceiro de ACE-EU. “Nun momento en que a Lei actual impide ao Concello a contratación con empresas que teñen débedas, e que mesmo unha das casetas de polbo do San Froilán quedou baleira por este motivo, o feito de que se investisen cartos públicos nunha entidade cunha enorme cifra de débeda oculta faise máis sangrante. Os lucenses merecen explicacións, especialmente os socios do C.D. Lugo”.

ACE-EU xa rexistrara a semana pasada unha batería de preguntas para ser respondidas por escrito por Díaz Grandío, ás que debe responder nun prazo de quince días prorrogable ate vinte días máis se así o solicitase o destinatario, segundo o Regulamento Orgánico Municipal. Por esta razón, ante a urxencia dun asunto que non pode demorarse máis dun mes en ser respondido, e á luz dos novos datos publicados na prensa, Alternativa Cidadá de Esquerdas optou pola solicitude de comparecencia plenaria. Entre as anteriores preguntas rexistradas, están se os representantes do Concello percibiron algunha retribución, directa ou indirecta pola súa labor de conselleiros do C.D. Lugo; se asistían regularmente ás xuntanzas do Consello de Administración e se estudiaban as ordes do día e a as actas das mesmas; así como se tiñan constancia de presuntos pagos para a devolución de créditos, de contratos blindados a membros do equipo técnico ou da facturación de sociedades pertencentes a directivos e técnicos.

Cen días sen proxecto político

2015-09-21T11:06:00.000+02:00

“A ALCALDESA NON QUERÍA ESTE CARGO, FOILLE IMPOSTO, AO IGUAL QUE A OUTROS INTEGRANTES DO SEU EQUIPO, E ISO NÓTASE NO SEU XEITO DE GOBERNAR”

Ø Para o voceiro de Alternativa Cidadá de Esquerdas, Carlos Portomeñe, o novo equipo de goberno “manéxase coma se tivese maioría absoluta, cousa que non é de estrañar, se temos en conta que a alcaldía lle saíu gratis. De feito, Lugo é o único concello onde o cargo dun rexedor en minoría non implicou ningún acordo formal nin compromiso político concreto a cumprir coas forzas que o apoiaron”.

Ø A alcaldesa presume de “diálogo fluído” cando nos temas cruciais para a cidade prefire o silencio sepulcral propio dos gobernos autoritarios, como ante a presunta malversación de nada menos que 600.000€ das arcas municipais na conversión en S.A.D. do C.D. Lugo.

Ø A percepción de ACE é que nos atopamos diante dunha das corporacións máis conservadoras da democracia, non só por parte do goberno, senón tamén da oposición, pois a maioría dos grupos só presentan propostas conxunturais que non transforman o modelo de cidade.

Lugo, 20 de setembro de 2015. – Alternativa Cidadá de Esquerdas lamenta que tras cen días de goberno, a sensación principal que transmite o novo equipo do PSOE encabezado por Lara Méndez é a falta dun proxecto político propio que rexa as decisións tomadas. “A improvisación e a desgana ocupan o lugar da xestión e a ideoloxía neste Concello. A alcaldesa non quería este cargo, foille imposto, ao igual que a outros integrantes do seu equipo, e iso nótase no seu xeito de gobernar”, afirma Carlos Portomeñe, voceiro de ACE. “A única decisión de calado tomada en cen días foi a suspensión temporal do servizo da ORA, e non é máis que o cumprimento tardío do mandato dunha sentenza xudicial”.

O concelleiro de ACE está decepcionado ante o xiro radical que deu Méndez tralo seu conciliador discurso de investidura, no que colocaba o pacto e o diálogo como principais características do que ía ser o seu estilo de goberno. Sen embargo, “manéxanse coma se tivesen maioría absoluta, cousa que non é de estrañar, se temos en conta que a alcaldía lle saíu gratis”, sinala Portomeñe. “De feito, Lugo é o único concello onde o cargo dun rexedor en minoría non implicou ningún acordo formal nin compromiso político concreto a cumprir coas forzas que o apoiaron”.

Son moitos os exemplos que denotan a falta dese “diálogo fluído” do que a alcaldesa insiste en presumir, mentindo abertamente á cidadanía. Un dos máis evidentes foi a programación das festas de San Froilán, sobre a que a oposición foi informada a posteriori e sen nin sequera exercer potestade de opinión sobre os grupos musicais, cando ata pode exercela un parente directo da concelleira de Cultura. “Nos temas realmente cruciais para a cidade Méndez prefire o silencio sepulcral ao diálogo. Só un goberno autoritario pode permitirse eludir explicacións ante unha presunta malversación de fondos públicos coma a da conversión en S.A.D. do C.D. Lugo. Nada menos que 600.000 € das arcas municipais poden ter sido destinados a unha débeda privada, cantidade que triplica as partidas orzamentarias destinadas polo Concello a temas de urxencia social”, recalca o voceiro de Alternativa Cidadá de Esquerdas.

A percepción de ACE é que nos atopamos diante dunha das corporacións máis conservadoras da democracia, non só por parte do goberno, senón tamén da oposición. Nese sentido, para o grupo municipal é positivo que haxa novas propostas, pero estas deben responder a principios políticos. O Concello de Lugo necesita un cambio estrutural, e as propostas que a maioría dos grupos están a poñer enriba da mesa atenden case sempre simplemente a cambios conxunturais, que non transforman o modelo de cidade. "Dá a impresión de que as propostas se venden ao peso. Sobran ideas, pero falta vontade política. Está claro que en cousas como a reparación de baches ou a sinalización horizontal imos estar todos de acordo, pero temos a obriga de abordar os asuntos centrais que realmente poderán cambiar o noso modelo de cidade: a fiscalidade (deben pagar máis os que máis teñen); a economía e a xestión dos servizos (para reverter a situación das 17.000 persoas en risco de exclusión social e ofrecer servizos públicos universais e de calidade), o urbanismo (para que responda ás necesidades dos lucenses e non aos intereses das empresas construtoras), a participación cidadá (para acadar a radicalidade democrática), e as políticas de igualdade (para erradicar o machismo da nosa sociedade e a cada vez máis alarmante violencia contra a muller)”, conclúe Portomeñe.

O PARTIDO POPULAR ASENTE COMPRACIDO AO PECHE DAS ESCOLAS INFANTÍS DE ABANCA

2015-06-24T11:58:00.000+02:00

O deputado de Alternativa Galega de Esquerda (AGE) Ramón Vázquez acusa á Xunta de Feijóo de mirar para outro lado “como sempre que se atacan dereitos fundamentais”

Santiago de Compostela, 23 de xuño de 2015.- Primeiro, o Goberno rescatou as vellas caixas de aforros con 9.000 millóns de euros de todas as galegas. Despois, vendeu a entidade resultante por mil millóns. Os compradores obtiveron, no seu primeiro exercicio, 1.100 millóns de beneficios. “É un atraco perfecto, un roubo descarado”, relatou o deputado de Alternativa Galega de Esquerda (AGE), quen lembrou as implicacións concretas da falcatruada: a venda de preferentes e o posterior impagamento, o peche de 104 oficinas, a desaparición de 4.000 empregos ou o desmantelamento progresivo da obra social. A rede de escolas infantís é unha das primeiras vítimas, á que o Partido Popular asentiu compracido esta mañá no pleno.

“Abanca está a desmantelar as escolas infantís. Apenas queda unha aberta das catro que había”. O banco comezou polo centro de Monforte e agora vén de anunciar o final das garderías do Sagrado Corazón, en Lugo, e do Campelo, en Poio. “Isto é un ataque directo ás cativas e cativos de ate seis anos que se beneficiaban destas escolas e ao intento de conciliación de máis de 70 familias”, denunciou Vázquez, “algo que resulta aínda máis grave se temos en conta que se trata de escolas concertadas e xestionadas pola Xunta, que non fai nada”. E engadiu: “O Goberno de Feijóo cala e miara para outro lado, como sempre que se atacan os dereitos fundamentais da cidadanía”. Todo mentres 3.000 nenas e nenos quedan sen praza nas escolas infantís da Xunta, máis dun cento precisamente na cidade de Lugo onde Abanca pecha un dos seus centros.

“Non é razoábel que unha entidade rescatada con cartos públicos, de todas as galegas e galegos, suprima servizos sociais fundamentais construídos durante anos cos aforros de cidadás e cidadáns”, expuxo Ramón Vázquez, “e que a Xunta asista inmóbil á situación”. É por esta razón que a proposición non de lei –pnl, no documento anexo- de Alternativa Galega de Esquerda (AGE) esixía da Cámara o apoio para esixir ao Goberno galego que instase á Fundación Abanca “manter abertas e en bo funcionamento” as escolas infantís de Lugo e Poio e mais o resto dos “servizos socioeducativos da entidade, e unha “xuntanza urxente” do padroado da mesma para “organizar e planificar os servizos educativos e sociais desta entidade de interese social”.

Polo Partido Popular interveu unha deputada que, en palabras de Ramón Vázquez, apenas achegou “unha restra de mentiras, non dixo vostede nin a máis mínima verdade”. Todo para xustificar o apoio da dereita ao peche de dúas escolas infantís construídas co aforro agora expropiado de milleiros e milleiros de galegas e galegos.

Video da intervención de Ramón Vázquez

AGE ASEGURA QUE O MODELO DE EMPREGO DO PP É A POBREZA E A DESIGUALDADE

2015-06-09T21:11:00.003+02:00

O deputado de AGE, Ramón Vázquez, afirmou que o modelo de emprego defendido e que está a fomentar o PP caracterizase pola desigualdade e a condición de traballadores pobres. Unha situación que ainda peor no tocante as mulleres e a mocidade.

Video da intervención de Ramón Vázquez no Parlamento de Galicia

2015-05-11T10:48:00.000+02:00

Nas eleccións municipais 2015 do vindeiro 24 de maio, Esquerda Unida Lugo participa dentro na candidatura cidadá ALTERNATIVA CIDADÁ DE ESQUERDAS.

Podes seguir a campaña de ACE e baixar o programa electoral nos seguintes enlaces:

Web: chegouahora-ace.blogspot.com.es

facebook: Alternativa Cidadá de Esquerdas

Twiter: @acesquerdaslugo

AGE EXÍSELLE AO GOBERNO GALEGO QUE INTERVEÑA NO CONFLITO ENTRE A EMPRESA MOVISTAR TELÉFÓNICA E AS EMPRESAS SUBCONTRATADAS

2015-04-17T15:31:00.001+02:00

Os deputados de AGE, Ramón Vázquez e Juan Manuel Fajardo, reuníronse cos delegados das distintas empresas subcontratadas en Lugo para coñecer de primeira man a súa situación

Lugo, 16 de abril de 2015.- Alternativa Galega de Esquerda (AGE) insta á Xunta de Galicia a mediar diante da empresa Movistar Telefónica e as contratas e subcontratas para chegar a un acordo que garanta unhas condicións de traballo dignas incluíndo a eliminación dos convenios bucle, a redución drástica das subcontratacións, a eliminación da figura obrigada polas condicións de subcontratación dos falsos autónomos, aplicación dos convenios provinciais do metal entre outras cuestións. Así mesmo o grupo de AGE solicita a apertura dunha mesa sectorial de negociación para regulamentar o sector.

Os deputados de AGE, Ramón Vázquez, e Juan Manuel Fajardo, mantiveron esta tarde un encontro cos delegados das empresas destas subcontratas en Lugo para coñecer de primeira man a súa situación.

Alternativa Galega da Esquerda apoia as mobilizacións, folga indefinida nestes días, dos traballadores das contratas de Telefónica que están a padecer un progresivo deterioro das súas condicións laborais nun marco de crecente precarización e devaluación salarial. Este conflito non se limita a Galicia, abrangue ao Estado, a varios milleiros de traballadores. No noso país están afectados ao redor dun milleiro de traballadores.

Por toda a xeografía galega, de Lugo a Pontevedra, pasando pola Coruña, atopamos as condicións de precariedade extrema que sofren os técnicos que instalan telefonía, ADSL e fibra óptica, e reparacións sometidos a xornadas de traballo extenuantes, de ate 12 horas de traballo, obrigados a adoptar a figura de autónomo (nun obrigado exercicio de fraude de lei) e que con moitas dificultades superan os 700 euros, apenas o salario mínimo interprofesional. Todo elo tendo que custearse o transporte e os gastos anexos a este. Atopámonos diante dos convenios bucle, nos que a matriz Telefónica Movistar vai recortando cada tres anos as condicións nas que subcontrata estas tarefas de instalación e reparación afundindo as condicións laborais do persoal. A situación actual semella unha pirámide onde se van a degradando as condicións laborais, empresas subcontratadas que remuneran de xeito individual co sistema de puntos baremos ate o último eslavón desta semiescravitude que son os traballadores obrigados a faceren de falsos autónomos.

As demandas son o respecto dos convenios asinados, a limitación da infernal cadea das subcontratacións e o recoñecemento dos dereitos de subrogación do persoal. Demandas que se amparan na legalidade que unha nefasta práctica empresarial adoita vulnerar de cote.

Por todo isto, o grupo de AGE entende que a Xunta de Galicia ten que facer valer o seu peso na defensa de condicións de traballo dignas cumprindo as súas obrigas e defender aos traballadores e traballadoras do noso país.

O CONSELLO DE CONTAS REMITIRÁ Á FISCALÍA DO TRIBUNAL DE CUENTAS AS IRREGULARIDADES NA CONTABILIDADE DA CÁMARA DE COMERCIO DE LUGO

2015-03-29T01:20:00.000+01:00

O grupo parlamentar de AGE solicitou o traslado das conclusións do informe do Consello ante as graves irregularidades detectadas e que poden ser constitutivas dun delito contable

O presidente do Consello, Xesús Palmou, anunciou en comisión parlamentar que se remitirá o informe á fiscalía

Video da intervención de Ramón Vázquez

Santiago de Compostela, 27 de marzo de 2015.- Alternativa Galega de Esquerda (AGE) solicitará a remisión das conclusións do informe elaborado polo Consello de Contas sobre a fiscalización da Cámara de Comercio de Lugo ante as graves irregularidades detectadas, algo que semella vai ter lugar tal e como anunciou o propio presidente do Consello, Xesús Palmou, en comisión parlamentar. O deputado de AGE, que xa denunciara a situación en rolda de prensa, considerou imprescindible que a fiscalía do Tribunal de Cuentas analice o informe.

Destácanse entre outras moitas irregularidades a actividade contractual na que se atopa o dobre contrato (a tempo parcial e tempo completo) do director xeral polos que percibe importantes remuneracións anuais, como director xeral e como asesor, os cargos por máis de 250.000 euros na tarxeta visa durante cinco anos xustificados como gastos de viaxes, algún deles realizado durante o mes no que permanece pechada por vacacións a Cámara. Outra das irregularidades salientadas no informe fai referencia á non reserva económica dunha partida para facer fronte a continxencias como é obrigación da entidade que no 2010 tería que ter sido de 1.8 millóns de euros e no 2011 de 1.3 millóns de euros. A Cámara unicamente reservou para este concepto 250.000 euros.

O deputado Ramón Vázquez felicitouse polo anuncio realizado polo presidente do Consello de Contas xa que estamos ante uns feitos moi graves que deben ser investigados pola fiscalía do Tribunal de Cuentas. O grupo parlamentar anunciou que seguirá de cerca a remisión desta información e a espera do resultado das investigacións que leve a cabo o fiscal.

O Concello, Deputación e o Pazo de Feiras en Lugo serán fiscalizados

O grupo de AGE incluíu nas súas recomendacións para o traballo do Consello de Contas a fiscalización do Concello de Lugo, a Deputación de Lugo e o Pazo de Feiras e Exposicións, algo que pese ao voto en contra do Partido Popular onte no Parlamento de Galicia, vaise levar a cabo xa que o propio Consello de Contas recollía no seu plan de traballo para o 2015 os apuntamentos realizados por AGE. O deputado Ramón Vázquez destacou a necesidade de investigar en profundidade qué é o que está a suceder por exemplo no Pazo de feira cun “burato” de máis de 500.000 euros que o coloca en situación de quebra económica.

Auga 100% pública

2015-03-25T16:05:00.003+01:00

EU DEFENDE A REMUNICIPALIZACIÓN DO CICLO COMPLETO DA AUGA

Portomeñe sinala que PSOE, PP e BNG xeneran confusión na súas propias filas pola falla de coherencia con respecto ao modelo de xestión

Para EU, o mellor xeito de millorar o servizo de augas é garantir o seu carácter 100% público. Defendemos unha xestión sustentable, social e participativa do servizo de auga e o saneamento porque a auga é un ben público fundamental, non un negocio.

Carlos Portomeñe sinala que o sucedido onte na Comisión técnico-política para abordar o modelo de xestión do ciclo completo da auga, "reflicte o teatro de máscaras no que se ten convertido a Corporación municipal". Na devandita Comisión, PSOE, PP e BNG modificaron as respectivas posturas mantidas ao longo da actual lexislatura. Por elo, Portomeñe afirmou que "os concelleiros e concelleiras do PSOE, PP e BNG padecen un trastorno de personalidade que mesmo lles leva a confundir o partido no que militan", ademais de xenerar tal confusión nas súas filas que "os seus militantes descoñecen a día de hoxe a posición real dos seus dirixentes con respecto á xestión da auga".

Portomeñe lembrou que a lexislatura se iniciou cun acordo de goberno entre o PSOE e o BNG polo que privatizaban a xestión do ciclo completo da auga a través da creación dunha empresa mixta. O PP, que defendera sempre a privatización a través da concesión a unha empresa privada, modificou a súa postura despois da decisión de PSOE e BNG de crear a empresa mixta e, en contra dos seus principios neoliberais, defendeu entón a xestión directa.

Pero PSOE e BNG tiveron a obriga de renunciar á privatización por esixencias legais, dado que a lei non permitía o nivel de endebedamento que requería a nova empresa. A súa intención continuaba a ser a empresa mixta, á que deberon renunciar por esixencias legais e non por vontade política.

Agora finaliza a lexislatura co PSOE e BNG dicindo defender a xestión directa e desmentindo cinicamente o seu acordo de goberno en 2011. E o PP decide a abstención na comisión técnica porque quedan descolocados e intentan distanciarse da nova posición de PSOE e BNG. "Os tres amosan unha falla clamorosa de coherencia", sinalou Portomeñe.

Para máis confusión, PSOE e BNG ocultan a verdade cando din defender a xestión directa, porque elixiron un modelo de xestión indirecta, tal e como establece no seu artigo 277 d) o Texto Refundido da Lei de Contratos do Sector Público. Os dous partidos están a falar dun modelo que contempla a explotación privada, como mínimo, das plantas depuradora e potabilizadora, e xa que logo, un modelo de xestión que non é directo. De feito, os representantes municipais falan literalmente de "recuperar para a xestión pública unha parte do ciclo da auga".

Seguimos apostando pola remunicipalización do ciclo da auga porque garante un servizo máis económico, de máis calidade e con emprego fixo e estable, como así recoñecen os propios informes municipais.

ESQUERDA UNIDA DECIDE INTEGRARSE EN ALTERNATIVA CIDADÁ DE ESQUERDAS PARA CONFORMAR UNHA CANDIDATURA DE UNIDADE POPULAR EN LUGO

2015-03-20T16:54:00.001+01:00

A asemblea local de EU-Lugo celebrada onte, aprobou por unanimidade sumarse e traballar con Alternativa Cidadá de Esquerdas para concorrer ás vindeiras eleccións municipais.

A asemblea local de Esquerda Unida Lugo celebrada onte á noite, someteu a consideración da súa afiliación e militancia a posibilidade de incorporarse ao traballo dalgunha das dúas plataformas constituídas para presentarse ás vindeiras eleccións municipais.

Esta asemblea comarcal de Esquerda Unida, veu precedida dunha xuntanza mantida o pasado mércores, entre os representantes e voceiros de Alternativa Cidadá e membros do Consello Local de EU-Lugo, na que se valorou positivamente a coincidencia programática do documento elaborado por ACE "70 bases programáticas para un goberno de unidade popular" como premisa sobre a que traballar para configurar unha candidatura cidadá rupturista e sólida para o Concello de Lugo.

Os asistentes a asemblea valoraron a necesidade de impulsar unha candidatura de unidade popular que aglutine as forzas da esquerda rupturista da cidade que por outra banda, levan tempo loitando contra un réxime podre que goberna contra os intereses da maioría social do noso Concello.

Coincidiuse tamén en que dificilmente aqueles que formaron parte do Concello e das institucións durante os últimos anos, poden protagonizar a imprescindible rexeneración democrática que precisa a nosa cidade.

ALTERNATIVA GALEGA DE ESQUERDA VISITOU HOXE OS XULGADOS DE LUGO PARA AVALIAR AS CARENCIAS E NECESIDADES DE RECURSOS HUMANOS E MATERIAIS

2015-03-10T02:22:00.000+01:00

A Vicevoceira de AGE, Yolanda Diaz e o deputado Ramón Vázquez, mantiveron hoxe unha xuntanza de traballo coa Xunta de Persoal de Xustiza de Lugo, para analizar a situación dos xulgados da cidade e avaliar as súas carencias de recursos materiais e humanos.

Entre as principais demandas dos representantes dos traballadores da administración de xustiza constatouse a necesidade de crear un novo xulgado de instrucción, dotar de persoal de reforzo aos xulgados existentes, mellorar a compatibilidade dos diferentes sistemas informáticos, contar con persoal especialista para a xestión e mantemento dos arquivos etc.

Para os representantes de AGE, resulta indecente que se este a provocar unha situación de colapso dos xulgados lucenses como a actual, impedindo o acceso o dereito a xusticia á cidadanía e bloqueando a investigación de importantes casos de corrupción cuxas causas se ven obstruidas.

Alternativa Galega de Esquerda rexistrará no Parlamento de Galicia diversas iniciativas dirixidas a facer que o Goberno Galego cumpra coas súas obrigas e dote dos medios necesarios para garantir o funcionamento do noso sistema xudicial.

Xulgado de Instrución nº1

2015-02-24T18:25:00.002+01:00

EU DENUNCIA O ESTRANGULAMENTO POLÍTICO DO XULGADO DE INSTRUCIÓN Nº1 DE LUGO
Impulsou unha iniciativa no Parlamento de Galicia para garantir os medios necesarios para o seu funcionamento

A corrupción é un tema de especial sensibilidade social na cidade de Lugo. En 2011 máis de mil lucenses saíron á rúa co lema "Contra a corrupción, en defensa da Xustiza", convocados pola Plataforma contra a Corrupción da que forma parte EU Lugo. E se os xulgados lucenses teñen amosado a súa acción decidida para erradicar as prácticas corruptas na nosa cidade, o xulgado de instrución nº1 acadou especial sona en Galicia por levar causas de relevancia social con implicación delictiva de numerosos empresarios, cargos políticos e altos funcionarios, especialmente nas coñecidas operacións Pokémon e Carioca.

Nos últimos meses, o xulgado de instrución número 1 perdeu, sucesivamente, o Xuíz de reforzo que tiña adscrito, a secretaria titular e máis recentemente dúas funcionarias dependentes da Xunta de Galicia.

Para EU resulta unha evidencia que axilizar as causas xudiciais e combater a corrupción investigada polos xulgados lucenses require contar con máis medios. Por contra, segundo denuncia o responsable de política local de EU, Carlos Portomeñe, o PP a través da Xunta de Galicia "somete ao Xulgado nº1 a un estrangulamento premeditado e alevoso para matar por asfixia as operacións en marcha", sempre "cunha finalidade estrictamente política".

Unha obstrución da que sae beneficiado o propio bipartidismo, sinala Portomeñe, "cuxo obxectivo é unha lei de punto final non escrita". Nas causas abertas no Xulgado nº1 existen decenas de imputados por corrupción pertencentes ó PP e ó PSOE. No caso da operación Pokémon, ós alcaldes e concelleiros populares imputados en varios concellos galegos hai que sumar en Lugo a imputación do actual alcalde da cidade, López Orozco, e da súa man dereita no Concello desde 1999, Fernández Liñares. Pero o xulgado nº1 tamén desenvolve a chamada operación Galeón, na que se investiga a Gómez Besteiro, Presidente da Deputación de Lugo, como responsable da urbanización en O Garañón (no Parque Rosalía de Castro), e na que están imputados altos funcionarios do Concello de Lugo.

EU destaca que o PP presenta plans contra a corrupción de xeito propagandístico, mentras pola vía dos feitos obstrúe o labor da xustiza recortando os recursos humanos e materiais.

Neste sentido, o deputado de Alternativa Galega de Esquerda (AGE) e coordinador comarcal de EU Lugo, Ramón Vázquez, anunciou a presentación dunha iniciativa rexistrada hoxe no Parlamento de Galicia para evitar o desmantelamento do xulgado de instrución 1 de Lugo. A devandita iniciativa, presentada pola portavoz parlamentaria e cordinadora nacional de EU, Yolanda Díaz, e Ramón Vázquez, insta ó Goberno Galego a:

1.- Dirixirse ao Consello Xeral do Poder Xudicial a fin de nomear novamente un xuíz de reforzo para o xulgado nº1 de Lugo.

2.- Que cando esto suceda se complemente cun cadro de persoal equivalente a un xulgado de número, é dicir, tres xestores, tres tramitadores e un auxilio xudicial.

3.- Que en tanto non suceda, se repoña de inmediato a situación anterior, dirixíndose á Comisión Mixta e á Dirección Xeral a fin de que revogue a resolución de cese.

ESQUERDA UNIDA CONSIDERA INACEPTABLE O EMPREGO DE PUBLICIDADE INSTITUCIONAL E INSTALACIÓNS PÚBLICAS PARA O INICIO DA CAMPAÑA DO SEÑOR OROZCO

2015-02-23T22:44:00.001+01:00

O Coordinador Comarcal de Esquerda Unida, Ramón Vázquez e o Candidato de EU, Carlos Portomeñe, fixeron hoxe declaracións para denunciar o emprego de recursos e instalacións públicas no inicio de campaña do candidato á alcaldía, López Orozco.

Para Ramón Vázquez “resulta absolutamente inadmisible que os veciños e veciñas paguen sendos anuncios a toda páxina na prensa escrita de hoxe, con anuncios sobre un programa de emprego e outro de ocio e formación, o mesmo día que o actual alcalde fai a presentación pública da súa candidatura”. O coordinador comarcal afirmou ademais que “imos demandar, a través dunha moción, que se faga público o custe dos anuncios publicados e esixir que o señor Orozco se pague a campaña cos recursos do seu partido e non co diñeiro da cidadanía”

Pola súa banda o candidato de EU para as vindeiras eleccións municipais, Carlos Portomeñe., fixo unha valoración da presentación oficial da candidatura de López Orozco realizada hoxe. En verbas de Portomeñe “resulta todo un símbolo da candidatura de Orozco que se tivera presentado no MIHL, unha construción faraónica de mais de 10 millóns de euros, que ten 25 visitantes diarios segundo os datos oficiais, que sofre inundacións e precisa bombas de achique”. Portomeñe afirmou que “EU quere saber se o resto das organización políticas da cidade, van ter a súa disposición as instalación culturais do concello para actos políticos e criticou a dificultade que teñen as organizacións sociais e as asociación culturais para contar con salas e instalacións, mentres o señor Alcalde se reserva un museo municipal para presentar a súa candidatura”.

O candidato de EU rematou afirmando que "o señor Orozco ten iniciado unha precampaña electoral ao mais puro estilo cacique, empregando a publicidade institucional no seu propio beneficio, facendo visitas ás obras e anunciando inauguracións como a realizada este mércores na Ponte de Paradai e poñendo a súa disposición as instalacións publicas” para rematar afirmando que “a maquinaria institucional e clientelar para a campaña electoral de Orozco xa está en marcha, pero non lle vai a servir para manterse no poder”.

CD Lugo

2015-02-10T12:56:00.000+01:00

EU VE INDICIOS DE PREVARICACIÓN NO PROCESO DE VENTA DE ACCIÓNS DO CD LUGO POR PARTE DA DEPUTACIÓN E O CONCELLO

Portomeñe esixe explicacións a Besteiro e Orozco sobre un suposto proxecto de cidade deportiva

EU considera que, tanto no proceso de compra de accións do CD Lugo por parte de Deputación e Concello como no proceso de venta, existen indicios suficientes como para falar dun presunto caso de prevaricación. "Todo o proceso está plagado de mentiras, irregularidades e chanchullos por parte do PSOE e do PP", sinalou Carlos Portomeñe, "desde o momento no que decidiron mercar as accións ata o momento da súa venda".

O CD Lugo viuse obrigado a suscribir un capital social de 3.031.490€ para converterse en S.A.D. en xuño de 2013 e así cumprir coa Lei do Deporte. Durante o proceso inicial de venta de accións, tanto a directiva do clube como a Deputación e o Concello manifestaron a súa pretendida aposta por favorecer aos pequenos accionistas e evitar que o clube pertencese a un único accionista maioritario. De feito, nos estatutos da sociedade enviados á CNMV reservouse o dereito a veto contra calqueira inversor que pretendese controlar a entidade. Ese foi o principal argumento esgrimido polo PSOE e o PP para xustificar a compra de accións pola Deputación e o Concello, das que adquiriron 900.000 € e 600.000 €, respectivamente. As dúas institucións financiaban novamente unha entidade deportiva privada con diñeiro público e entraban no seu consello de administración, a pesares de coincidir no tempo coa crise do CB Breogán e a polémica pola participación da Deputación como accionista maioritaria do clube de baloncesto.

O alcalde López Orozco e o clube afirmaron tamén que se crearía unha fundación como fórmula para devolver o diñeiro aportado polas institucións na compra de accións. Ademais, o convenio entre o Concello e a entidade aprobado en pleno aseguraba que os 600.000 € serían devoltos antes do 31 de decembro de 2013. Ningunha das opcións se materializou.

Un ano despois do acordo plenario, e coa presa das eleccións municipais de maio, Deputación e Concello decidiron desfacerse das 150.000 accións da súa propiedade nun suposto concurso previamente negociado. A venta realizouse a un so accionista que se converte en dono do clube ó xuntar o 58% das accións da entidade, despois dun proceso pragado de irregularidades e opacidade que incluíu o cambio de normas sobre a marcha, logo de ter declarado deserto o concurso por diferencias na forma de pago co empresario co que se pactara anteriormente a adxudicación. Resultado: en xuño de 2013 o clube pertencía á súa masa social; en febreiro de 2015 pertence a un empresario.

Portomeñe afirma que "primeiro debeu garantirse a participación dos socios/as na compra de accións que pertencían ás institucións públicas, porque en realidade eran propiedade de todos/as os/as lucenses". Para Portomeñe, a venta das accións encubre tres grandes mentiras á cidadanía: en primeiro lugar, " PSOE e PP aprobaron na Deputación e o Concello a adquisición das accións sabendo que o clube non devolvería os cartos no prazo estipulado". En segundo lugar, "non querían evitar a pertenencia do clube a un único propietario, porque estiveron negociando nesa liña e evitaron darlle opcións aos accionistas minoritarios". E por último, "non se van recuperar os cartos a curto prazo, porque se aceptou unha modalidade de pago fraccionado feita á medida dos empresarios que optaban á compra".

Pero ademais, a compra vai acompañada dun suposto proxecto de cidade deportiva con sete campos de fútbol, unha zona de ocio e dúas piscinas. EU esixe que Besteiro e Orozco expliquen de inmediato en que consiste este proxecto, se contemplan a cesión de solo público e se pretenden financialo con diñeiro de todos/as os/as lucenses. Para Portomeñe, "estamos diante do típico proxecto especulativo anterior ó estoupido da burbuxa inmobiliariade, con Besteiro e Orozco ("os señores do ladrillo") de protagonistas, mais agora en plena crise económica e a tres meses das eleccións municipais".

CARLOS PORTOMEÑE, ELEXIDO CANDIDATO DE EU Á ALCALDÍA DE LUGO

2015-02-04T16:28:00.001+01:00

Rubén Pérez, Carlos Portomeñe e Ramón Vázquez

Carlos Portomeñe ofreceu hoxe unha rolda de prensa na que presentou a sua candidatura para as vindeiras eleccións mucipais ó Concello de Lugo, acompañado polo cordinador de esquerda Unida Lugo, Ramón Vázquez, e o secretario Nacional de Organización de EU de Galicia, Rubén Pérez.

O Secretario de Organización Rubén Pérez recalcou a importancia destas eleccións municipais para a construcción dun proceso constituínte en todas as vilas e cidades do país, dirixido a devolverlle as institucións á cidadanía e desenvolver políticas ao servizo da maioría social.

Pola súa banda, o cordinador comarcal Ramón Vázquez destacou que Portomeñe recolleu o número máximo de avais permitido neste proceso de primarias abertas, e que o censo contaba cun 26% de simpatizantes inscritos e rexistrados ata o 21 de xaneiro. Vázquez sinalou a necesidade de abrir un profundo proceso de cambio no Concello de Lugo, imprescindible para mudar a situación dun Concello golpeado polas políticas neoliberais dos diferentes gobernos municipais, sinaladamente o goberno de López Orozco que xa vai cumprir 16 anos. E para elo, sinalou a necesidade de acadar a unidade do espazo rupturista na nosa cidade en base a un programa transformador, subliñouando a candidatura de Carlos Portomeñe como como o candidato elexido nas primarias de EU para a converxencia, ademais de seren o máis axeitado pola súa experiencia e polo seu coñocemento dos problemas reais do municipio.

Portomeñe agradeceu, en primeiro lugar, aos seus compañeiros e compañeiras a súa elección como candidato. Lembrou a súa previsión na noite electoral de 2011 cando adiantou que, a raíz do xurdimento do 15-M en plena campaña, as eleccións locais eran un punto de inflexión onde xa nada sería igual e se aventuraban procesos de cambio profundos nos que a cidadanía ía reclamar cada vez máis o seu protagonismo fronte aos poderes fácticos.

Nese sentido reflexionou sobre a teoría política que establece que a consolidación democrática se produce cando chegan a gobernar as xeracións orixinadas propia democracia, e a contradicción coa realidade lucense, onde se perpetúan as élites políticas do post-franquismo.

Portomeñe analizou o importante espazo electoral do voto crítico e rupturista na cidade, que nas eleccións de autonómicas de 2012 superou o 15%, coa irrupción fundamental de AGE. Un voto que aumentou ao 20% nas eleccións europeas do pasado ano, cando se suma o apio das forzas fundamentais que constitúen este espazo. Xa que logo, Portomeñe chamou unidade e á configuración dunha iniciativa cidadá das organizacións, colectivos e persoas do espazo rupturista para configurar unha Syriza lucense con opcións reais de acadar a maioría electoral, lembrando o efecto multiplicador do que AGE foi un bo exemplo. Afirmou que EU Lugo leva anos traballando pola unidade en base á mobilización social, e meses invertidos para conquerir a unidade electoral para as vindeiras eleccións municipais de maio.

Portomeñe destacou a difícil situación que atravesa o concello de Lugo despois de décadas de gobernos do bipartidismo, e en concreto da necesidade de rematar co goberno megalómano (co MIHL como mellor exemplo), corrupto e antidemocrático de Orozco, a quen responsabilizou directamente dos efectos nefastos da crise económica na nosa cidade pola súa complicidade cos poderes económicos. Unha política moi visible na política do "ladrillo" e na privatización de servizos públicos. Por iso, ironizou parafraseando un eslogan anterior do alcalde, "Orozco está tan tolo de amor por Lugo que non é descartable un idilio de amor con Xaime Castiñeira (PP)" para garantir que o bipartidismo e as élites locais non perden o goberno municipal.

O candidato de EU aludiu á necesidade perentoria dun programa transformador e de esquerda para a cidade, porque "a este Concello non se lle poden poñer parches: é necesario un cambio rupturista e radicalmente democrático con base na unidade popular". Nese sentido, Portomeñe sinalou que foi elexido como candidato de EU para a unidade, e que está disposto e participar en procesos electivos abertos como un candidato máis, sempre que exista unha base programática asumida pola súa organización.

Carlos Anxo Portomeñe Pérez naceu en Lugo o 11 de decembro de 1968. É membro da Executiva nacional de Esquerda Unida, na que desempeña o cargo de Secretario de Política Institucional, do Consello Político Federal de IU e da Permanente federal do PCE. Forma parte das Comisións Coordinadoras de Alternativa Galega de Esquerda (AGE) e de AGE en Europa, e participa no grupo parlamentario de AGE. Colabora na Comisión de Internacional de IU e no grupo de Oriente Medio do Partido da Esquerda Europea (PIE).

Activista destacado e decidido na loita contra a corrupción, contra os recortes sociais e na defensa dos dereitos dos/as traballadores/as, foi precursor do Movemento antiglobalización e desde hai anos membro activo do Movemento pola paz e contra as guerras, entre outros.

Artesán e escultor de profesión, estudiou Ciencias Políticas. Ademais de colaborador habitual do xornal Mundo Obrero e responsable político da revista de pensamento marxista Nuestra Bandera, tamén ten publicado como ensaísta, poeta, narrador e especialista en memoria democrática.

AGE TRABALLARÁ POR SACAR A GALICIA DA SITUACIÓN LÍMITE DE DEVASTACIÓN NA QUE O GOBERNO GALEGO DO PP TEN SUMIDO A NOSA EDUCACIÓN E A NOSA CULTURA

2015-01-21T19:12:00.000+01:00

Os deputados Xabier Ron e Ramón Vázquez presentaron as liñas de traballo do grupo de AGE para este ano no eido educativo e cultural.

Os deputados de AGE aseguran que Jesús Vázquez é o “peor conselleiro de Educación na historia da democracia no noso país” e lamentaron que estea máis interesado pola súa carreira municipal que pola educación e a cultura de Galicia.

Santiago de Compostela, 21 de xaneiro de 2015.- O grupo parlamentar de Alternativa Galega de Esquerda (AGE), traballará para sacar ao noso país da situación límite e de total devastación na que o Goberno galego de Alberto Núñez Feijóo ten sumidas áreas fundamentais como son a Educación e a Cultura. Os deputados Xabier Ron e Ramón Vázquez presentaron esta mañá en rolda de prensa as liñas de traballo do grupo parlamentar de AGE para este ano e que supoñen avanzar la liña oposta á que nos leva o Partido Popular cunha aposta por colaboracións público-privadas nas que os beneficios van para as empresas a través de cartos públicos, mentres que as perdas e prexuízos van para á cidadanía.

O deputado Ramón Vázquez centrou a súa intervención no eido educativo denunciando en primeiro lugar a estratexia de engano do Goberno galego que está a insistir nun relato da recuperación con obxectivos claramente electorais para os que impulsa pequenos incrementos de orzamento e programas totalmente baleiros que non solucionarán a catastrófica situación na que nos teñen sumido. Os datos son claros ao respecto con máis de 70 centros educativos públicos pechados, 203 aulas menos, e máis cerca de 1.400 profesores e profesoras menos desde o 2009, segundo os datos publicados polo Instituto Galego de Estatística (IGE). E isto nun momento no que aumentou en 20.000 o número de alumnos e alumnas en Galicia. Estes datos unidos aos recentemente coñecidos e que destacan a perda de 27.000 mozos e mozas menores de 35 anos emigrados, “deixan unha crónica de futuro tremendamente incerta e complicada” como salientou o deputado Ramón Vázquez.

Co obxectivo de loitar contra o escenario de destrución do Partido Popular, o grupo parlamentar de AGE traballará por sacar adiante un programa de construción no que destaca a presentación dunha Proposición non de Lei específica para o ensino rural, o mais castigado polas políticas de recortes da Xunta de Galicia. Ramón Vázquez destacou que a actuación urxente no ensino rural galego é o “paso fundamental para garantir a supervivencia do noso campo e do noso país”. Outra das actuacións de AGE para este ano será a realización dun estudo sobre a situación actual dos centros educativos públicos galegos, abandonados polo PP e que os está sumir no colapso e nun deterioro inaceptable. No eido educativo, o grupo parlamentar prestará especial esforzo á atención á diversidade esixindo que “o Goberno galego deixe de atacar aos que máis necesidades teñen”.

AGE presentará diversas iniciativas encamiñadas a potenciar a investigación nas Universidades galegas e garantir a creación de grupos de investigación baseados no interese xeral e non criterios de mercado para poñer en mans de empresas privadas os seus traballos. Co impulso á creación destes grupos lograríase ademais frear a importante e grave fuga de cerebros que esta a dar na actualidade ante a falla de futuro na que os mozos e mozas atópanse no noso país. Alternativa Galega de Esquerda presentará así mesmo este ano un programa de retorno para os xoves emigrados para loitar contra o drama da emigración xuvenil que o ano pasado provocou que 27.000 menores de 35 anos marcharan do noso país pola falla de expectativas.

O deputado Xabier Ron pola súa banda alertou do “delirio absoluto”no que parece atoparse a Xunta de Galicia no tocante a políticas de protección e impulso da Cultura do noso país “cuns orzamentos secuestrados por fórmulas de colaboración público-privadas que o único que están a conseguir é que os beneficios vaian para as empresas mentres que as perdas queden para a cidadanía como esta a acontecer por exemplo en Campo Lameiro”. O recorte do 60 por cento nos orzamentos da Xunta de Galicia en Cultura desde 2009, dan unha idea do interese, preocupación e compromiso do Partido Popular co noso patrimonio e a nosa historial. “O noso patrimonio está a esmorecer baixo o abandono do PP que mantén a estratexia de degradar, silenciar e ocultar para que sexa máis fácil despois xustificar unha actuación e arrasar con todo” denunciou o deputado Xabier Ron. Esta estratexia é a que está a seguir por exemplo o Goberno galego cos restos do Castelo de Rande afectados pola ampliación da AP-9 e que grazas a un Goberno “ineficaz, incompetente e inoperante” atópanse no abandono máis absoluto e terminarán por facer desaparecer calquera pegada da nosa historia nesta zona.

O grupo parlamentar de AGE defendeu a necesidade de apostar pola xestión pública dos parques arqueolóxicos, con persoal público que garanta a súa conservación e a defensa do noso patrimonio. O grupo esixirá así mesmo, “que se faga público o catálogo de Patrimonio de Galicia que o PP ten agochado de xeito consciente nun caixón da Xunta de Galicia”.

A eliminación do canon nas bibliotecas escolares ou a creación do bono cultura son dúas das cuestións nas que o grupo parlamentar de AGE traballará este ano impulsando novas iniciativas no Parlamento de Galicia para continuar o traballo xa realizado ata o momento e rexeitado polo grupo maioritario do Partido Popular.

Por último, Alternativa Galega de Esquerda impulsará a creación dunha Comisión de Estudo da actual situación da lingua galega para deixar a un lado as lecturas partidistas dos datos e coñecer de primeira man e de todos aqueles axentes culturais e sociais implicados no tema, cal é a realidade da lingua galega e entre todos, traballar en prol da súa defensa e impulso en todos os ámbitos da vida no noso país.

ESQUERDA UNIDA DEFENDE A CONSTITUCIÓN DUNHA FRONTE CIDADÁ AMPLA PARTINDO DUNS PRINCIPIOS PROGRAMÁTICOS BÁSICOS.

2015-01-13T18:56:00.000+01:00

EU-LUGO PRESENTOU HOXE 12 MEDIDAS URXENTES PARA TRANSFORMAR O CONCELLO.

Os representantes de Esquerda Unida Lugo Ramón Vázquez e Carlos Portomeñe ofreceron hoxe unha rolda de prensa para informar sobre o posicionamento de EU de cara ás vindeiras eleccións municipais, analizando a coxuntura política na cidade, a converxencia política, o proceso interno de primarias abertas e o programa electoral, entre outros.

O coordinador comarcal Ramón Vázquez, sinalou que as vindeiras eleccións municipais non son unha convocatoria mais, senón que constitúen unha oportunidade histórica para derrubar o réxime corrupto sostido polo bipartidismo. “Un réxime corrupto que na nosa cidade ten unha clara manifestación no Goberno Local, caracterizado pola especulación urbanística, a privatización dos servizos públicos municipais e a entrega de subvencións e axudas públicas a empresas, colectivos e persoas afíns”. Ramón Vázquez afirmou que a “corporación municipal leva 15 anos facendo política para ás empresas afíns e non para a maioría social do Concello”

O coordinador comarcal afirmou que “ningunha organización pode pretender por si soa transformar radicalmente a nosa cidade, polo que cómpre aglutinar todas as forzas dispoñibles e dispostas a rachar democraticamente cun sistema que está a arrasar cos dereitos básicos da cidadanía” e recordou que “o nacemento de Alternativa Galega de Esquerda é un precedente claro da necesidade de sumar forzas para acabar coas políticas antisociais que sofre a maioría social do noso pais”.

Diante desta situación Ramón Vázquez considerou que “a unidade, a xenerosidade e a responsabilidade, deben ser os cimentos dos procesos de construción das plataformas cívicas e das dinámicas de converxencia, pero é necesario partir duns principios programáticos básicos que doten de contido político ás diferentes propostas. Non se pode falar dende o baleiro ideolóxico ou con fins puramente electoralistas. A cidadanía estase a xogar o seu futuro dende o concreto” engadiu.

Pola súa banda o responsable de política local de EU-Lugo, Carlos Portomeñe, lembrou que “Esquerda Unida naceu no seu día como un movemento político social de unidade na loita contra a entrada na OTAN e esa vocación de unidade na loita da esquerda é o noso principal sinal de identidade”. Portomeñe engadiu que a “unidade non pode darse a costa de renunciar a un programa claro de esquerdas que poña por diante das siglas, as necesidades da maioría social”. O responsable de política local recordou que “Esquerda Unida leva anos denunciando a corrupción en Lugo, reclamando a remunicipalización de servizos, facendo propostas dende fora da institución municipal, e ese é o noso aval coa cidadanía”

Carlos Portomeñe afirmou ademais que “para transformar o Concello de Lugo non abonda con cambiar ao Goberno, nin tampouco con sacar a Orozco das institucións, senón que require da implicación, o compromiso e a participación de toda a cidadanía critica do noso concello nun novo proxecto de cidade radicalmente distinto”. Por iso o responsable de política local aclarou que “Esquerda Unida non se vai a sentar nunha mesa camilla para facer sopas de letras. É necesario facer política con maiúsculas partindo de contidos e desexos comúns que nos vinculen como cidadáns” e fixo referencia a famosa frase de Anguita de “programa, programa, programa”.

Finalmente Portomeñe pasou a explicar as 12 medidas urxentes para transformar o Concello de Lugo, deixando claro que se trata dunha proposta de mínimos programáticos para a confluencia, aberta a debate e achegas, que pasarán a formar parte do programa aberto municipal ampliado que Esquerda Unida está en proceso de elaboración en contacto co tecido asociativo da cidade, coas organizacións sindicais e veciñais e cos movementos sociais.

Os representantes de Esquerda Unida concluíron anunciando o inicio do proceso de primarias abertas no que militantes e simpatizantes poden participar para elixir ou ser elixidos como candidato ás vindeiras eleccións municipais, dentro dos procesos de converxencia por concretarse na nosa cidade.

A recollida de avais dos candidatos comeza o 21 de xaneiro e remata o 30 de xaneiro, a campaña de primarias irá dende o 31 de xaneiro ata o 14 de febreiro e a votación será os días 14 e 15 de febreiro.

12 MEDIDAS URXENTES PARA LUGO

1.Auditoría cidadá das contas do municipio

2.Remunicipalización dos servizos privatizados.

3. Novo regulamento de participación cidadá baseado na radicalidade democrática.

4.Orzamentos pariticipativos na xestación, xestión e no control.

5. Tolerancia cero cos corruptos e os corruptores. Entre outras, un salario do alcalde e dos concelleiros nunca superior a tres veces o SMI

6. Plan especial e urxente para combater a pobreza e a exclusión social infantil.

7. Fiscalidade progresiva e xusta para aumentar os recursos municipais, garantir os servizos públicos e permitir que os que paguen mais os que mais teñen.

8. Servizos Sociais Públicos, universais e descentralizados.

9. Derrubo dos edificios ilegais do Parque Rosalía de Castro na zona coñecida como o Garañón.

10. Comisión de investigación municipal aberta á cidadanía sobre o PXOM e anulación como mínimo, da porcentaxe ilegal pendente de aprobación.

11. Novo PEPRI (Plan de Especial Protección, Rehabilitación e Reforma Interior do Recinto Amurallado de Lugo e a súa zona de influencia).

12. Obxectivo de “ EMPREGO PRECARIO 0 NO PÚBLICO”

ESQUERDA UNIDA-LUGO ESIXE AO CONCELLO O ESTABLECEMENTO DUN “PROGRAMA CONCILIA NADAL” PARA AS FAMILIAS LUCENSES.

2014-12-17T14:32:00.000+01:00

A actividade “Aulas abertas” no Nadal, cuxo prazo de inscripción remata hoxe, non alcanza nin ó 1% dos rapaces a quen vai dirixido.

EU-Lugo esíxelle ao Goberno do Concello de Lugo, o establecemento dun “Programa Concilia Nadal” para favorecer a conciliación da vida familiar e laboral dos fogares con menores a cargo durante os preto de 20 días que duran as vacacións escolares do nadal. Un período, o de Nadal, onde moitas familias nunha situación económica e laboral moi complicada, pasan serios apuros para coidar e atender ós seus fillos e fillas.

As 100 prazas ofrecidas nas “Aulas abertas” pola Concellería de Benestar, son absolutamente insuficientes para os 12.474 menores de 15 anos censados no concello de Lugo, polo que tan só alcanzarían o 0,5 % dos nenos e nenas a quen vai dirixido, en horario de 9.30 a 13.30.

Por outra banda, para Esquerda Unida, o programa de Nadal, previsto pola Concellería de Cultura, ten un marcado carácter festivo e non contempla a grave situación das familias lucenses, nun Concello no que 17.469 familias chegan con dificultade a fin de mes (segundo os datos oficiais do Instituto Galego de Estatística) e nunhas datas no que moitas familias teñen que asumir, nun período de incremento de gastos nos fogares como o Nadal, novos gastos de gardería ou de coidadores a domicilio durante o período non lectivo.

EU-Lugo demanda do Concello de Lugo o establecemento de obradoiros socioeducativos durante a xornada laboral que sexan abertos a todas as familias de Lugo, tendo especialmente en conta a situación económica das persoas solicitantes e aproveitando as instalacións educativas existentes no Concello.

Finalmente, EU critica o feito de que a metade dos eventos contemplados polo programa para o Nadal deseñado polo Goberno de Lugo, teña lugar en instalacións da Igrexa Catolica, dende igrexas, centros parroquiais a residencias de anciáns, o que resulta impropio dun modelo de xestión cultural público e que teña aspiracións de chegar a toda a cidadanía.