كيف الحال يا حلوين، الحمدلله ليا اسبوع تقريبا في ماليزيا عشان أكمل دراستي
دوبي مخلص من واجب مادة Life Drawing 2 المادة كنت خايف منها وقرفان، هي مادة حق سكتشات مودل، يعني يجي مودل “رجال مش عريان ” ونرسمه بسرعة. ما حبيتها كثير لأنها متعبة. الشي الحلو أنو السنة دي المادة باين أنها حتكون ممتعة لانو اسلوبها اختلف صرنا نتعلم رسم الجسد بأساليب مختلفة وحنظلل وكدا ومن خلال تجربتي تسهل فهم الأوضاع وبيني وبينكم حبيتها أكثر لأنو الأساليب “جرافيكية” يعني ممكن أعدل فيها شوية واسوي فيها ثيم شخصيات.

طووويب ايش كمان ايش كمان ايوه صح خلصت الفيلم حقت سوريا ونشرته ليا اسبوعين تقريبا  تقدروا تشوفوه من هون

زي ماوعدتكم حنزل ميكينق اوف بس اخلص كم شغلة أول متعلقة من فترة وأدوني اراؤكم لأني حنزل تدوينة خاصة اتكلم فيها عن تجربتي مع البرنامج أي استفسارات حول العمل اسدحوها لو سمحتوا.

اخيرا وليس آخرا راح أحاول أسوي لكم أبديت اسبوعي ويمكن نسوي لكم مفاجعة تعجبكم إن شاء الله

محدثكم من لاقون بردانا

عبدالله سعيد مع نصفه الآخر

ساعات أحس أنو لو في دي المدونة روح كانت إما إنها راح تكرهني موت، أو راح تحوبني موت في حالة كانت روح هبلة! صاير ما أكتب إلا لمن يجيني أرق ولا لمن تكون نفسيتي تعبانة يختي عليها ولا لمن يجيني داك الشعور الي مايخليني أشعر بشيء وأبغى أكتب عن شعوري تجاه عدمية الشعور الي خلّف تدوينات بالهبل لم تنشر وبعضها غير قابل للنشر!
لحسه مو ؟

عموما للأسف الشديد قبل أسبوع وزيادة كم يوم سويت عملية جراحية في فمي المقدس اسمها “قطع ذروة” (يوجد صورة مقرفة للخندق الي انحفر في فمي ) العملية كانت بسبب إهمالي لسني الجميل الي انفلق من 7 سنوات تقريبا طبعا أنا كنت مطنشه لحد ما بدأ لونه يتغير فا سويت حالة إستنفار عشان اكتشف انو الشغلة مضروبه ضرب جامد وماتخارج بدون عملية ! الحمدلله خلصتها وعلى أساس اليوم الصباح (الساعة دحين 3:40 صباحا) أروح أفك الخياطة. أيوه صح ليش للأسف الشديد ؟ عشان عادة لمن تجيني حالة عدمية الشعور أسكر اللمبة حق الغرفة وازبطلي كدا ابريق شاي معتبر واجلس اشرب في صمت وانا متكي على الجدار .. تخيل كدا تقعد 4 ساعات بدون تفكير ولا نت ولا حاجة مجرد شاي وبس! أوم الفلة ياشيخ بس عشان الجراحة ممنوع أشرب أي شي حار

طبعا في الليلة الجميلة دي عندي أرق مش أكتر ولو اني تعبان نفسيا حبتين تهي تهي  << مو كدا الناس يتعبوا نفسيا يا ابني مو كدا 
في حال لسى ماقفلت الصفحة في وجهي حابب اسوي لكم أبديت للمشروع الي كلمتكم عليه حق سوريا.

حاليا تقريبا انتهيت من جزء كبير منه، تعلمت أشياء كثييييير واستفدت جدا منه، يكفيني أني تعرفت على برنامج زي الأفتر افكتس وحاسس أني لو كدا مخمخت عليه حقدر اطلع بأشياء أفضل بكثير بدمج المهارات البسيطة الي أعرفها في الفوتوشوب والثريدي و الأفتر. وعازم بإذن الله بعد ما أنشر العمل أنزل دروس لأهم العناصر والأساليب الي استخدمتها منها طريقة رسم مثل الخلفيات الي رسمتها عالفوتوشوب وكيف رتبتها عشان احركها على الأفتر افكتس .

مقهور بس أنو ماكان عندي خلفية كافية عن كيف راح أنفذ العمل لما بديت أخطط له، يعني في أشياء كنت جاهل تماما كيف حسويها على الأفتر لكن اخلصها عالفوتوشوب بعدين انقلها للأفتر وافكر كيف حسويها والحمدلله أشياء كثيرة طلعت أحسن مما كنت أتوقع، ياشيخ العمل كله كنت حسويه أبسط بكثير من النتيجة الحالية! والشي الي يحمس أنو دا كلو وأنا بالعافية اعرف البرنامج ودا أول عمل ليا فيه، يعني كأنك تقول أو تصميم ليا على الفوتوشوب الي حتشوفوه بعدين هو أول تصميم ليا على الأفتر. كيف يجي أحمس ؟

حاليا حخلص آخر مشهدين من العمل وبعدها حيبقى ليا مشهدين مش صعبين لكن حياخذوا وقت حق أبو يومين لكل واحد لأنو انيميشين، ولو اني بصراحة ماحسوي انيميشين انيميشين يعني حاجة حقت أبو أمشي العمل هي حلوه مش بطالة بس مو شغل يريح ضميري الأنيميتوري . قاعد احاول أخلص بأسرع وقت لانو الموضوع صار مزعج كل ماشافني أحد أو كلمت أحد عنو قعد يضحك ويقول بشار حيموت وسوريا راح تتحرر ويسوا دستور وحينتخبوا واحد وأنتا لسى ماخلصت ههههههه العمل بشكل عام هو تجربة فنية أكثر من أنو نتاج لدراستي لأنو كل الأشياء الي استخدمتها هي أشياء تعلمتها ذاتيا، وأتمنى أطلع بشي قد المقام رغم كل الظروف الي أحاطتني وماقدرت اوديها البريد ..

عموما على قولة براين آدمز .. تو يو آي ويل ألويز ريترن .. ويريفير يو ستاي أيل فايند ذا واي.

اشوفكم على خير يا حلوين، أذن الفجر

ما حطول عليكم كثير لأنو لسى وراكم هرجة تسمعوها وتشوفوها، دا فيديو بسيط دردشة زي ماتقولوا حول التحريك أو الأنيميشن عن طريق البرامج ثلاثية الأبعاد، مش شرط تكون مهتم بشكل كبير في المجال يعني خذ الموضوع حق أبو معلومات عامة و ممكن تكون بوابة لك في إنك تبدأ الإهتمام بهالمجال؟! من يدري؟

بكل ثقالة دمي المتوقعة وبكل المصالة واللكاعة الي ممكن تتوقعوا وجودها في العالم الي أحنا عايشين فيه، حبيت أديكم جرعة مركزة من كل دا في فيديو واحد هههههه

[ إضغط على الأيقونة فوق للإنتقال لصفحة اليوتيوب ولا تنسى الـ HD ]

الفيديو الي نزلته في الفيسبوك هو دا

وتقدروا تشيكوا على الـ playlist لكل أعمال التحريك القديمة حقي.

إذا حابين أتكلم بجد عن الأنيميشين ونجرب سوى نحرك مشهد بسيط أدوني كومنتات عاليوتيوب وعالمدونة وبلاش بخل انتوا كمان 150 مشاهدة وكومنت واحد فقير ههههه

وحابب بس أنوه أنو لسى أنا مابديت في دراستي الجامعية استخدام برنامج المايا أو حتى مابدينا ندخل في التحريك من أصلو وكدا. كل المعلومات والخبرة دي اجتهاد شخصي مني ولسى حناخذها في الكلية قريبا إن شاء الله.

تحياتي

قد عمرك سألت نفسك وأنتا تجرب حاجة جديدة، أنا ليش ما أعرف دا الشي من زمان؟! من كثر ما أنتا معجب فيه بشدة!

قبل يومين تقريبا تحمست أكمل مشروع أجلته وماطلت فيه كثير لأسباب مختلفة. المشروع عبارة عن فيلم انيميشين 2d قصير وبسيط. يعني حق أبو 4 دقائق تقريبا!
المهم خطة العمل تغيرت كثير بسبب قلة الخبرة، يعني كل شي قاعد أسويه من ناحية اختيار البرامج المناسبة، للعمل، للأدوات والأسلوب، لمراحل العمل .. مبني على خبرة سطحية جدا! بشكل مختصر دا أول عمل أسويه من دا النوع. ودا أكثر شي قتل همتي له أنو احتمال كبير مايطلع “perfect”!

المهم الخطة الي رسيت عليها اخيرا بعد مابديت في غيرها ووقفت وكدا أنو ارسم مشاهد العمل على الفوتوشوب والتحريك كمان يعني حرسم كل فريم للعمل على الفوتوشوب (الثانية حتكون عبارة عن 20 فريم تقريبا في دا العمل تحديدا) ودي الحركة حتقتلني قتل من ناحية الإنتاج لأنها شغلة مرهقة جدا يعني ححفظ كل الـ 4800 فريم تقريبا بشكل يدوي مع التحريك داخل كل فريم حسويه!!! يعني بشكل تقريبي كأني بسوي فيلم متحرك بالطريقة الكلاسيكية صورة ورى صورة ..إلخ
لكن تفاءلت كثير بنظام المونتاج داخل الفوتوشوب الجديد (شيك عليه من هنا) وعلى اساس قلت خلاص حسوي اغلب التحريك عن طريق أدوات الفيديو الموجودة. بس بمجرد جربته لقيت انو حيخلي الموضوع أكثر صعوبة من الطريقة الكلاسيكية بالنسبة للأفكار الي ابغاها. بغض النظر عن أنو المميزات جدا جدا جدا عاجبتني.

المهم قبل ما اكتشف الحقيقة المُرة مع الفوتوشوب واحد من أقاربي سألني على حاجة في برنامج After Effects وانا بصراحة ماقد جربت دا البرنامج مرة كل الي اعرفوا انو برنامج حق مؤثرات بصرية وقناة المجد زمان أزعجوا أهل أهلنا بفلتر الأشعة حق النصوص إذا تذكروه هههههه نسيت اسمو بس عموما دي معرفتي عنه المهم قلت للولد ولو ماعليك خليني اشيك على الي تبغاه يمكن أعرف له. وسويت بحث بسيط على اليوتيوب وكنت محمل البرنامج قبلها بكم يوم على اساس احتياط لو احتجتوا مستقبلا مع الكلية فا بصراحة أكتشفت انو الهرجة سهلة يعني زالت الرهبة الي كانت حاسسها فيه! طبعا عرفت الشغلة الي يبغاها قريبي ورحت بيتهم اشرح له كيف يسويها =P

قلت لنفسي خليني اجرب الأفتر إيفيكتس يمكن يزبط مع الأفكار الي ابغاها في الفيلم خصوصا أنو التوافقية بين برامج أدوبي رائعة جدا .. وجربت!
من جد قلت لنفسي الشريفة أنا ليش ما أعرف لدا البرنامج من زمان!! كأنك بتستخدم فوتوشوب. اللهم فوتوشوب فيديو، مش صور ثابتة! وكمية الأفكار للمشاريع الي ممكن تخرج بيها منه مو طبيعية سيبوكم من الشارات والمؤثرات البصرية أنا اتكلم عن قوة البرنامج وقابلية تبسيط الإنتاج عن طريقه شي مرة مو طبيعي!

بعد ماخلصت تقريبا رسم واحد من خلفيات المشاهد في الفيلم

حبيت اسوي له تحريك بسيط على الأفتر من باب أنو اتعرف على البرنامج وايش ادواته وكيف يتم التحريك. واجهت عدة مشاكل وغلطت كثير وطلع الشغل مفقع بس عن جد انبسطت منو مرة!

– تأكد أنك على دقة HD-

طبعا زي ماقلت العمل دا مجرد تجريبي المشهد ماحيكون بدي الطريقة. المهم بعد ماسويت دا قلت أبغى أجرب حركة تانية في البرنامج انو اخلي المشهد فيه بُعد أو عمق ثلاثي الأبعاد يعني الفوكس يتنقل من مكان لمكان دي الخاصية اسمها 3d camera في الأفتر ايفيكتس وكنت متحمس مرة لها عشان في كم فكرة في بالي طبعا كالعادة وانا منسدح عالسرير تعبان ومكسر ابغى أنام إلا ودماغي يقول ..

هههههه المهم قمت للكمبيوتر وبديت الشغل. كان الموضوع مشواااار مرة طويل لأنو لسى حروح لملف الفوتوشوب أرتبه وازبطه بحيث اقسم وافصل الصخور إلى طبقات على حسب قربها وبعدها من الكاميرا ودا الشي كان صعب لأنو مثلا في ليرات كثيرة تأثيرها وتعديلها مو بس عالصخور لكن على كل العمل وأنا خلقه شغلي مشعتر في الليرات عالفوتوشوب ههههه فا قعدت اقصقص والصق واحدد ووو لحد ما قسمت البتاع (حتكلم بشكل كامل عن دا الشيء بإذن الله إذا انتهيت من الفيلم) رحت للأفتر ايفيكتس وطولت صراحة يعني أنا بديت الشغل كله الساعة 6 الصباح خلصت العصرية! المهم دا الي طلع معايا وانا نص نايم

– تأكد أنك على دقة HD-

زي ماتلاحظون دخول المشهد مختلف، استفدت عدة أشياء من دي التجربة:
أو لشي أنو صرت أعرف أقسم العمل على اجزاء يعني مثلا ورى القمر راح تلاحظون حاجة بالتدور؟ وكمان في اشياء سويتها في السحاب بس مو باينة كل دا سويته في ملف عمل واحد بعدين حطيت دي النتيجة في عمل جديد. يعني مثلا ليرات الخلفية مادمجتها كلها بسبب العناصر الي كنت ابغى احركها فا طالعة معايا مرة مرة كثيرة

كمان تعلمت استخدام الكاميرا في البرنامج لو تلاحظون أنو الفوكس يتغير على حسب بعد الأجسام منه يعني كل ماقربت لقدام العناصر الي في الخلفية تشوش هذه وحدة من فوائد الـ 3d camera تعطيك إحساس العُمق والمسافات بين العناصر في العمل. كمان تحسنت مهاراتي في كل الأدوات الي استخدمتها من قبل رغم الفرق يوم واحد بين العملين لكن في النتيجة المعرفية تحسنت فعلا بشكل كبير وإن كان مو باين.

زي ماقلت كل دي مجرد تجارب عشان اتعلم اشياء محددة يعني حتى مكساج الصوت ماحيكون كدا بإذن الله في العمل النهائي، راح أرجع أعيد كل شي من جديد لمن اخلص رسم باقي الخلفيات بإذن الله. ولمن أخلص من المشروع بإذن الله حنزل making of + دروس طعمة لزيزة ومقرمشة على دا البرنامج الفلته!!

ملاحظة: لو جتك دي الرسالة عن طريق الإيميل دا يعني أنك اشتركت “”بنفسك”” في قائمتي البريدية في موقعي، وبالتالي الرسالة تترسل “”اتوماتيكيا”” لك. لو حابب تلغي الإشتراك حتلاقي رابط في آخر الرسالة.

تحياتي يا أمامير
عبادي تمر الزبادي

أمس وقف الموقع بسبب عدم تجديد الدومين والحمدلله ارسلت لنعمان رسالة صوغننه ورجعه على طول ربي يبارك فيه، فا أحب أنوه من جديد انو الموقع شغال من بدايته بدعم من الحليوه نعومي هههههه 

طوويب نبدأ نستعرض الأعمال الأخيرة ولو أني كنت ابغى اأجل دي التدوينة لحد ما أنتهي من كم عمل كمان بس ما ابغى أخلي التدوينة الاخيرة وحيدة مسكينة يختي عليها ههههههه

أول عمل كانت عندي أفكار كثيرة لموضوع القرآن والصلاة كنت أبغى أنفذها قبل رمضان بس وحدة من الأفكار شفت واحد سواها فا فقدت الرغبة في تنفيذ شي مكرر من قريب أو بعيد (متلازمة الكمال ) .. باقي في فكرة للصلاة يمكن انفذها في وقت تاني بإذن الله. عموما العمل دا كان تجربة لدا الأسلوب حاجة خفيفة وبسيطة شفتها في عمل وحبيت اجربها مع فكرة جديدة إن شاء الله تعجبكم.

الفكرة الأولى كانت أنو أسوي حروف بخط الثلث تخرج من المصحف ويكون عنوان العمل “أحرف النور” بس قلت ليش ما أسميها “التنوير أو الإستنارة ” وبالتالي تكون العبارة “نور على نور” وهي حتكون تجسيد حقيقي للصورة! احتضان للمصحف، المصحف مفتوح مو مقفل، ابتسامة خفيفة، وشكل الأيدي منسجم مابين حرص على ثبات مكان المصحف وعلى فتح المصحف.

المقصد أنو اولا الشخص الي ماسك المصحف يشعر بنوره وبالطمأنينة معه ولهذا كانت الإبتسامة + شكل اليد اليمنى في الأسفل.
الثاني أنو الراحة والطمأنينة دي ما جاءت من وجود المصحف على الصدر فقط لا كانت أيضا بأنه كان مفتوح بالإضافة لحركة اليد اليسرى الي ممكن تحس فيها مبالغة في فتح غلاف المصحف. بحيث يشير إلى حركة القرآن العملية في حياته مش مجرد زينة وشعار.
وبالتالي “نور على نور” هي العبارة الي فعلا ممكن تعبر عن رسالة العمل، نور القرآن لا يتم إلا بنور النية .. بنور القلب.
وأذكر هنا كلام لسيد قطب رحمه الله: إن هذا القرآن لا يمنح كنوزه إلا لمن يُقبل عليه بهذه الروح، روح المعرفة المنشئة للعمل.

العمل التاني فرفوش شويتين هههههه ماحتكلم عنو كثير عشان ما أخرب الطبخة لكن زي ماتقولوا يبغالي وقت عليه. الشخصية مش نفس شخصية عمر حسين ولا نفس القصة، الفكرة كانت في بالي من فترة بس مافضيت لها فا قلت اسوي بس شغلة سريعة عشان ماتروح عليا.

الرسمة مش قد كدا فيها اخطاء لكن كانت تجربة ممتعة!
إن شاء الله حبدأ في دا المشروع قبل نهاية دي السنة، محتاج بس أحسن مهاراتي في الرسم أكثر.

العمل الأخير كان المفروض يكون دمج بين 3D & 2D بس مدري يمكن أسويها أو أوفر الوقت وأسوي عمل 2D جديد .. الأفكار كثيرة بس يبغالها رواقة لان الزاوية الي في بالي صعبة حبتين والشكل العام ما أظن حيطلع زي ماكنت متخيله بس ححاول بعد عمليين كمان .

– أضغط على الصور للدقة العالية-

عموما دا كان درس تعبني كثير لاني واجهت مشاكل والي قاعد يشرح يستعبط وينقز يعني في اشياء مايقول كيف سواها أو حتى يرقع اخطاء بدون مايوريك ايش الخطأ وكيف رقعه يعني تكون غلطان في فيديو الفيديو الي بعدو تلاقي الخطأ مرقع طيب كيف سويتو !!؟ اكتشف بنفسك! ومو حق انو بيعلمك تعتمد على نفسك اكثر من انو شغل سريع سريع. حتى الإخراج النهائي سويتوا بنفسي وتركت آخر درسين. بس الحمدلله تعلمت كثير وصلحت الأخطاء بنفسي، أغلب الشرح والأدوات أنا عارفها بس استفدت من الاخطاء كثير + في اشياء بسيطة واختصارات كان يسويها الي يشرح تسرع عملية التنفيذ بشكل رهيب. الحلو من الدروس أنك تتعلم عادات حلوة في التصميم أو التنفيذ وتتنبه من عادات سيئة جدا تتطور مع استخدامك للأدوات في المودلينق خصوصا.
عن نفسي أفضل دروس ممكن تستفيد منها عادات ممتازة في المودلينج هي دروس 3DBUZZ دروس روعة مرة وعفوية اثنين يدردشون ويشرحون في نفس الوقت يعني شوية تلاقيه يشرح لك أدوات وأساليب دقيقة شوية تلاقيهم يهرجون على فيلم هاري بوتر الجديد ويخربوا عليك القصة ..إلخ هههههه يعني شي ممتع للمشاهدة والتعلم، خصوصا أنهم مجانين تفاصيل زيي هههههههه.

هذا كان الشغل لحد دحين، محتاج فترة نقاهة للقراءة، بعدها حرجع اسوي عمل انيميشين + عمل 2d حاليا عندي فكرتين .. فكرة حركز فيها على لغة الجسد و تعابير الوجه وعمل تاني حركز على الألوان ماني عارف في ايهم ابدأ فا شو رأيكم؟؟

تحياتي
عبادي تمر الزبادي 

كل عام وأنتم بخير وعساكم من عواده يارب، وربنا يبلغنا رمضان القادم بأتم صحة وأسمى غاية وأقوى إيمان بإذن الله

الأعمال في رمضان كانت قليلة جدا لأني تفرغت كثيرا للقراءة وعلى آخر رمضان جاني إنهيار عصبي من كثرة المشاوير في الصباح والمسا هههههه الحمدلله، بس استغليت الوقت في المشاوير وخلصت كم درس صوتي كنت مأجلهم. 

أول رسمة رسمتها تقريبا قبل رمضان، فكرة وطنت في بالي أنو ليش لمن الواحد يبغى يعبر عن الحب يرسم قلب (طبعا الموضوع له بعد منطقي وتاريخي من علاقة العاطفة بعضلة القلب و حتى رسمة القلب المعروفة “♥” ) فا قلت خليني استعبط وأرسم الدماغ الي دائما يكون هو الي يطرد أو يُخمد الشعور العاطفي في مفهوم الناس له، يعني من قوة الإنحراف أو الإنضباط العقل صار هو الي يعشق هههههههههه عموما سويت الرسمة وحبيت أخليها لطيفة جدا بحيث ماتعطي إنطباع مفهوم الذكاء المرتبط بالعقل أو الدماغ أكثر من المفهوم العام للعقل أنو الشخصية الذاتية بكل مافيها.
نسخة الفيسبوك حبيت أدلعها شويتين وأضفت لها لمسة خاصة

من يوم ما دخل رمضان وأنا عندي عادة سيئة جدا، أنا فطرةً ما أعرف أنام وأنا أفكر يعني لو في موضوع في بالي لا يمكن أنام، لذلك دائما لما أبغى أنام وأنشغل بالتفكير لو أضطريت أحاول أفكر بموضوع أهبل عشان أفقد اهتمامي تدريجيا وأنام على غفلة! .. من بداية رمضان وأنا صاير استحضر المواضيع المهمة إستحضارا، يعني كأنو عباطة أنو ما أبغى أنام رغم إني ما أنسدح إلا وأنا منهك تماما لكن بسبب التفكير أقعد أتقلب ساعات وأحيانا أكمل إلى اليوم التاني! الرسمة التانية جت زي كدا لسى يادوبك أبغى أنام جت ريكس في بالي وقعدت اتأمل بعض المواقف وقلت ليش ما أرسم لها رسمة؟! وهات أفكار للرسمة هههههه المضحك في الموضوع أنو غرفة النوم مش هيا نفسها الغرفة الي فيها الكمبيوتر فا صاير أروح للكمبيوتر أقول حرسم بس سكتش للفكرة وبعدين أرجع أنام ولمن أرجع أقول حقوم أرسم بس الراس وبعدين أرجع أنام وعلى دا الحال لحد ماخلصت الرسمة رايح جاي من غرفة لغرفة هههههههه 

استعنت في دي الرسمة ببعض المراجع واستفدت منها كثير .. أنصح أي واحد يبغى يتعلم بأسرع طريقة يكون له مكتبة للتعابير والزوايا والشخصيات يجمعها من الأنمي الي يشوفه وكل مايبغى يرسم يراجع دي المراجع ويستفيد منها عشان يطور مهاراته خصوصا في التعابير.

الرسمة الثالثة على أساس كنت ابغى اتقدم خطوة جديدة في الرسم وأرسم شخصيتين مع الخلفية بس الوقت الضيق + أنو لسى أجرب برنامج جديد ماسمح لي أخذ راحتي و اتبحبح في التنفيذ لكن عموما النتيجة لا بأس بها، مش راضي عنها لكن لا بأس، إذا ماهي خطوة للإمام حتكون وقفة تدفع العمل الجاي خطوات بإذن الله. لأني بصراحة محروق على دا العمل بالزات المفروض كان يكون أحسن خصوصا أني ملاحظ الأخطاء الي فيه دحين بس أبغاه يفحس في قلبي مزبوط عشان اتعلم صح << وحش 

وأخيرا دا عمل أنيمشين جديد، من تقريبا 2010 وأنا وقفت تمرين على الأنيميشين بالرغم من أني كنت مازلت في بداياتي بس بصراحة كانت عندي رهبة من التجربة لكن مصادفة حملت سلسلة دروس للمايا وكان من بينها درس حركة المشي فا قلت خليني أشوفه (مجرد متابعة للدرس بدون تنفيذ) بس لمن شفته حسيت أنو أقدر أسويه يعني مافيه الصعوبة الي كنت متخيلها قبل، رغم أنه كان ومازال شغلة متعبة وتاخذ وقت طويل يعني الثانية الواحدة الي اشتغلت عليها أخذت أكثر من 5 ساعات (24 فريم = الخطوات الرئيسية في حركة المشي بعدين نكررها على حسب مانحب) بس عموما أرتحت كثير وكسرت الحاجز وراضي بالنتيجة الحمدلله واستمتعت جدا بتنفيذها 

الحين إما أني راح اكمل السيارة الي ماخلصتها أو أني راح أرسم رسمة جديدة .. شكلي حرسم الرسمة أول حاجة خفيفة بس بحاول أبني شخصيتي الخاصة بإذن الله وأحس لساتني مو مستوعب اسلوب الأنمي أحتاج وقت أكثر معاه.

نشوفكم في وقت تاني يا عسولين

كيف الحلوين الأمامير ؟؟ ههههه المهم دا الأسبوع الحمدلله كان الإنتاج جيد جدا وغير متوقع!

كنت أظن سابقا أن الرسم يرتكز بشكل رئيسي في تطويره على ثقة الشخص، عشان كدا كنت أكره مفهوم الموهبة الي يحط في دماغك أنو أنتا تولد محدد و مقولب ومُعلب تنفع لكدا ولا ماتنفع والي طبعا رأي يمثل جهل شديد وسطحية مسطحة في أبسط مفاهيم القدرات الإنسانية و نمذجة الدماغ وطبعا عشان ما أكثر لكاعة وتنقلب مدونة تمبلر نخش في الموضوع ههههههههه

الهرجة أنو بصراحة رجعت ثقتي بنفسي وبقوة! الغريب كيف تحولت رؤيتي للموضوع أول كنت كل ماتجيني فكرة أأجلها لأني أحس أنو ماحقدر أسويها دحين الموضوع تحول لتحدي أنو أكيد حقدر وأحاول أطبق الأفكار مباشرة و (أتحمل طول وقت التنفيذ) ياشيخ من قوة الحماس أقول حخلص العمل مثلا في يومين أقوم أخلصه في ساعتين عشان ما أقدر أسيب الفوتوشوب والتابلت من يدي مثلا آخر عمل حق “يدغدغني” قلت حسيبه كدا ثلاث أيام أخلصه بمزاج وأغير شوية في التعابير لحد ما أرسي على بر .. خلصته في ليلة ههههههه طبعا مسألة الثقة جاية من أني قاعد أشوف تطبيق أفضل من الي أنا أقنعت نفسي أنو دا أنا مستوايا .. نفس الشي ينطبق على متعلم الرسم الجديد، دائما راح تحس أنو شغلك رووووعة في البداية بعد يوم ترجع تشوف شغلك حتبدأ تلاحظ الأخطاء (شيء جيد جدا) لكن لذة ذاك الشعور القديم (شغلي يجننننننن  ) راح يحفزك أكثر على التجربة مجددا والتعامل مع الأخطاء بموضوعية، بغض النظر طبعا عن مستوى تطورك وملاحظتك للأخطاء .. الإنسان كائن عجيب!

عموما رسومات دا الأسبوع كان المفترض تكون برضو تدريب على المناقا لكن حاولت أحول صورة واقعية لشخصية أنمي و أشوف أيش يجي مني ..

أول رسمة ألهمتني أياها شخصية Ryuk في مسلسل Death Note

التانية كانت المفروض تكون رسمة أنمي – لدي الصورة – بس غيرتها كتير فا أختفت الملامح

الثالثة والأخيرة رسمة – لدي الصورة– طبعا قصة الصورة أنو خالد (ولد خالتي) كنت أصوره في سطوح بيت جدي (2008 الظاهر) المهم وحطيت كتكوت على كتفه فا بدأ يضحك ويقول كلام مو مفهوم من الضحك، اتضح بعدين أنه يقول “يدغدغني” يقصد الكتكوت هههههههه طبعا أنا عجبتني الهرجة وقت ماكان يضحك وصورتها والحين حاولت أرسمها بشكل كارتوني عشان أتدرب على تعابير الوجه.

[ أضغط عالصورة لمشاهدتها بحجم أكبر ]

الأسبوع دا حتفرغ شويتين للقراءة أحتاج شوية ترويق وحرسم رسمتين تقريبا وحده لأختي (غيرانة ليش ترسم خالد بس) و وحده فكرتها حتعجبكم أكيد إن شاء الله أخليها مفاجأة 

طبعا بغض النظر عن مستوى الشغل دحين ورضايا عنه، عارف أنو فيه اخطاء وبديت اشوفها. لكن المهم بالنسبة لي في دي المرحلة أني حوقف أقول للناس مستوايا في الرسم تراجع، النقطة دي بالنسبة ليا تكفي. أخيرا بديت أرجع اتمرن عشان أرجع للمستوى الي كنت فيه وأحسن إن شاء الله.

تحياتي

السلام عليكم ورحمة الله وبركاته

الأسبوع دا تركت مودلينق السيارة وجلست أرسم انمي! بصراحة ثقتي في قدرات الرسم انهزت كثير ومشكلتي صرت ما اتحمل وقت عشان اجلس اتمرن مقهور أني ما أزبط الرسمة بسرعة فا قلت ياولد بطلك بكبكة وارجع تمرن 

والحمدلله بديت افتح مانقا Bleach الي تعجبني رسوماتها مرة واحفظ الصفحات الي اشوف فيها شي ابغى ارسمو وكدا جمعت لي كم صورة وبديت ارسم منها اتمرن على الرسم ومنها اتعلم على اسلوب الأنمي كمان 

التجربة كانت ممتعة جدا في البداية كنت أحاول ارسم اجزاء من الوجه يعني العين بس أو الفم بس وكدا ولأني كمان قاعد احاول استعجل النتائج تنرفزت كثير عشان مو قادر ازبطها لكن قلت ياولد جرب ارسم رسمة كاملة وشوف بعدين والحمدلله كانت النتائج أفضل مما توقعت صحيح اخذت وقت طويل لكن دقة الرسم كانت أفضل بكثير مما كنت اظن من نفسي. صحيح عكننت في آخر رسمة حق ايتشيقو بس استفدت كثير منها برضو وتعاملي مع التابلت تحسن أكثر برضو ولله الحمد. وبالمناسبة الرسمة الي فوق في المصغرات كانت أول تجربة لكن مانشرتها فيها اخطاء كثيرة.

حاليا حستمر كمان اسبوع زمان في التمرين عالرسم وبعدين حرجع للسيارة وحتكون آخر مشروع على المايا إن شاء الله لأنو حمر على أغلب الأدوات بيها، التركيز حيكون على الرسم والكونسبت آرت إن شاء الله. طبعا غير أني استلكع كل شوية والتاني واسيب كل شي واجلس اقرأ طول اليوم ولا فجأة اقوم أكتب في المدونة التانية ..إلخ المزاج حاقة قميلة أوي ياقدعان هههههه 

نشوفكم على خير

طووويب .. انتهيت من الرسمة الي بديت فيها من التدوينة الي راحت (حق العين) 

كانت الفكرة معقدة أكثر ومقرفة اكثر بس صراحة حبيت اخلص بسرعة لأنو الهدف كان تجربة حركة أنو أرسم بدرجات الرمادي أول وبعدين ألون وبصراحة مرة مرة مريحة، لأني أول كنت أرسم بالألوان مباشرة زي دي الرسمة

فائدة الرسم بدرجات الرمادي أنك بدل ماتركز في الألوان تركز أكثر على درجات الإضاءة والظل وبعدين تمخمخ مزبوط على الألوان عن نفسي حبيت هالأسلوب مرة وحستخدمه دائما إن شاء الله لاني ذقت الويل في الرسمة حق الوردة ورسمات تانية غيرها. لمن تلون مباشرة وماعندك خبرة كافية العناصر تكون مشعترة درجاتها بشكل كبير لأني انشغل عن الإهتمام بدرجات الألوان للألوان نفسها وايش اختار، فا مع الأسود والأبيض التحكم اسهل بكثير خصوصا لو حددت من بدري مفاتيح الدرجات يعني نِسب تشبع الألوان زي كدا مثلا

عموما في أفكار كثيرة حرسمها بعد ما انتهي من المشروع الجديد إن شاء الله .. ومشروعنا الجديدة نمجذة لامبرقيني على المايا بإذن الله .. حتاخذ وقت طويل وربنا يعين الأسلوب الي حنفذها بيه جديد عليا (قاعد أطبق دروس) وبإذن الله أخلصها وأسوي لها ريندر وكل حاقة وبعدين اعرضها إن شاء الله.

تحياتي

عبدالله .. والأقر على الله!

الحمدلله انتهيت من نمذجة المعبد من اسبوع زمان حاجة زي كدا بس قلت حنزله مع العمل الجاي مرة وحدة وانتهيت من التاني كمان الحمدلله 

العمل كان ممتع جدا و النتيجة النهائية جت مصادفة، كنت أجرب أطبق درس وكدا شفته عاليوتيوب على الإضاءات بس طلعت النتيجة زي ماكنت اتخيلها وقلت ياولد ألحق أحفظ الملف هههههه على أساس كنت بس أجرب والحمدلله زبطت. 

– أضغط على الصور عشان تشوفها بدقة أعلى –

العمل الي انتهيت منه الحين هو إنحراف عن جادة الحق والصواب هههههه للأسف الشديد على آخر زمن صرت أنمذج مسدسات والعياذ بالله 

هو تطبيق لدرس طويل (مدة ملفات الفيديو حوالي 6 ساعات من الشرح) بس مالي نفس أسوي له خامات و إضاءات وكدا يعني عشان يصير مشهد متكامل وفيه واقعية أكثر .. يمكن أسويها بعدين لكن حاليا حبدأ في مشروع جديد على الفوتوشوب إن شاء الله وهذه تلميحة له ..

مواهاهاهاهاهااهااااا  .. يالله خمنوا أيش حرسم ؟!!

طوووويب .. بابا فرحان استنى شوية، رايحين نتقابل في الحلقة الجية